ཟླ་རེའི་གསར་འགྱུར།

ཆེས་མཐོའི་བརྡ་ཆད་གཏན་འབེབས་ལྷན་ཚོགས་ཐེངས་སུམ་ཅུ་སོ་གཅིག་པ་ལེགས་གྲུབ་ཟིན་པ།

གསར་འཕྲིན།

༄༅། །འདི་གར་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༧ ཚེས་ ༡༨ ནས་ ༢༣ བར་ཉིན་གྲངས་དྲུག་རིང་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་བརྡ་ཆད་ཚན་པའི་གོ་སྒྲིག་འོག་ཤེས་རིག་ལས་ཁུངས་ཀྱི་ཚོགས་ཁང་དུ་ཆེས་མཐོའི་བརྡ་ཆད་གཏན་འབེབས་ལྷན་ཚོགས་ཐེངས་སུམ་ཅུ་སོ་གཅིག་པ་བསྐྱངས་ཡོད།

དེ་ཡང་ཉིན་གྲངས་དྲུག་གི་རིང་ཤེས་ཡོན་དང་། ཁྲིམས་ལུགས། ཆབ་སྲིད། དཔལ་འབྱོར། རྩིས་རིག ཁོར་ཡུག ཚན་རིག འཕྲུལ་ཆས་སྤྱི་དང་། ཡང་སྒོས་སྨན་རྩིས་དང་རྩི་ཤིང་རིག་པ་སོགས་ཀྱི་ཐ་སྙད་ཁྱོན་བསྡོམས་གྲངས་ ༦༧༠ ལྷག་ཙམ་གཏན་འབེབས་གནང་ཐུབ་པ་བྱུང་ཡོད།

སྤྱིར་བོད་ཀྱི་སྐད་ཡིག་སྲུང་སྐྱོབ་དང་གོང་འཕེལ་སླད་རྒྱུན་སྤྱོད་དང་དེང་རབས་ཀྱི་རིག་ཚན་སྣ་ཚོགས་པའི་ཐ་སྙད་རྣམས་གཅིག་གྱུར་གཏན་འབེབས་དགོས་གལ་གཟིགས་ཏེ། བཀའ་ཤག་སྐབས་བཅུ་གསུམ་པའི་གཙོ་སྐྱོང་ལམ་སྟོན་འོག ཕྱི་ལོ་ ༢༠༠༦ ལོར་ཤེས་རིག་བརྡ་ཆད་ཚན་པ་འདི་བཞིན་དངོས་སུ་འགོ་འཛུགས་གནང་བ་ནས་བཟུང་ད་བར་ཨིན་བོད་ཤན་སྦྱར་གཏན་འབེབས་བརྡ་ཆད་དེབ་ཕྲེང་བཅུ་བཞི་བར་དང་། ཐ་སྙད་པར་རིས་སྦྲགས་མའི་དཔེ་དེབ་སོགས་འདོན་སྤེལ་ཐུབ་པ་བྱུང་བ་ཙམ་དུ་མ་ཟད། གཞི་རིམ་མང་ཚོགས་ལ་གོ་རྟོགས་རྒྱ་གང་ཆེ་ཡོང་སླད་བོད་ཀྱི་བརྙན་འཕྲིན་བརྒྱུད་༸སྐུའི་བླ་གཟའ་ནམ་ཡིན་ལ་ཐ་སྙད་ངོ་སྤྲོད་ཀྱི་ལེ་ཚན་ཞིག་ཀྱང་སྤེལ་མུས་ཡིན།

བརྡ་ཆད་དེ་དག་བོད་མིའི་སྒྲིག་འཛུགས་ཀྱི་དབུས་སའི་ལས་ཁུངས་ཡོངས་རྫོགས་དང་། སྤྱི་སྒེར་སློབ་གྲྭ་ཁག གཞུང་དང་གཞུང་ཁོངས་མ་ཡིན་པའི་ཚོགས་སྡེ། དགོན་སྡེ་ཆོས་སྒར་དང་དཔེ་མཛོད་ཁང་། བརྒྱུད་ལམ་ཁག་སོགས་སུ་རྒྱ་གང་ཆེར་འགྲེམས་གཏོང་དང་དེབ་གཟུགས་པར་འགྲེམས་ཟིན་རིམ་བཞིན་ཚན་པའི་དྲྭ་ཚིགས་དང་བཀོལ་སྤྱོད་མཉེན་ཆས་ཐོག་འཇོག་མུས་ཡིན་པ་བཅས། །

སྔོན་མ།
བཙན་བྱོལ་བོད་མིའི་ཤེས་ཡོན་ལྷན་ཚོགས་དང་ཤེས་ཡོན་སློབ་སྟོན་ཚོགས་ཆུང་གི་ཚོགས་གཙོ་དང་ཚོགས་མི་ལྷན་རྒྱས་ཀྱིས་བོད་པའི་སློབ་གྲྭ་ཁག་ལ་གཟིགས་སྐོར་གནང་བ།
ཕྱི་མ།
ཕྱི་ལོ་ ༢༠༢༢ ལོའི་སྲིད་སྐྱོང་གཟེངས་བསྟོད་གསལ་བསྒྲགས།
Menu