སྐྱེས་མཆོག་གེ་སར་ནོར་བུ་དགྲ་འདུལ་གྱིས། །
དམག་ལས་དང་པོ་བདུད་བྱ་སྤུན་གསུམ་བཏུལ། །
ལྷ་སྲས་དེ་ཡི་སྐུ་རིམ་འཚོ་རྟེན་སོགས། །
ཅི་དགོས་སྐོར་ལ་གླིང་དཔོན་ཞིབ་གྲོས་བྱས། །
དེ་ནས་བདུད་རིགས་ཡོངས་ཀྱི་བླ་སྲོག་ལྕགས་ཀྱི་བྱ་ཁྲ་སྤུན་གསུམ་ཡོད་པ་དེ་རྣམས་ཀྱིས་རིའི་རྒྱལ་པོ་རི་རབ་ཀྱི་ལོགས་སུ་ཚང་བཟོས་ཤིང༌། སྐབས་རེར་ལུས་བྲག་རྡོ་ལྟ་བུ་ཤིན་ཏུ་ཆེན་པོར་གྱུར་པ་དང༌། སྐབས་རེར་ལུས་མཐེ་བོང་ལྟ་བུའི་ཧ་ཅང་ཆུང་ངུར་གྱུར་ཏེ་ཉིན་རེ་བཞིན་འཛམ་བུ་གླིང་གི་དགེ་སེམས་དང་ལྡན་པའི་སྐྱེ་བོ་རྣམས་ཀྱི་ཚེ་སྲོག་ལ་བར་ཆད་གཏོང་བ་དང༌། སེམས་ཅན་ཀུན་ལ་འཚེ་བའི་ལས་1མང་དུ་བྱས། ཚུལ་དེ་ནི་མི་ཕལ་པ་རྣམས་ཀྱིས་མཐོང་མི་ཐུབ་ཀྱང་དཀར་ཕྱོགས་ཀྱི་ལྷ་སྐྱོང་སྲུང་མ་རྣམས་ཀྱིས་གཟིགས་ནས་བདུད་བྱ་སྤུན་གསུམ་པོ་བར་སྣང་དུ་བཀུག་སྟེ་གང་དུ་ཡང་འགྲོ་དབང་མེད་པར་གྱུར་ཏེ་ལྡིང་སྐོར་བྱེད་བཞིན་པའི་སྐབས་སུ། གླིང་གེ་སར་གྱིས་འདུལ་བའི་དུས་ལ་བབས་པ་གཟིགས་ནས་རྫུ་འཕྲུལ་གྱིས་གཞན་ཕལ་པས་མཐོང་མི་ཐུབ་པའི་མདའ་དང་གཞུ་བཀོད་དེ་ནམ་མཁར་འཕངས་མ་ཐག་བྱ་རོ་གསུམ་ཐང་དུ་ལྷུངས་སོ། །
དེའི་དུས་སུ་སྐུ་གཅེར་བུར་བྲག་སྟེང་དུ་བཞུགས་པས་རྡོ་ཐོག་ན་བྱིས་པ་ལོ་གསུམ་ཙམ་གྱི་བརླ་དང་མཚང་རའི་རྗེས་དུས་ད་ལྟ་ཡང་དངོས་སུ་མཐོང་རྒྱུ་ཡོད་པ་རེད། དེ་ནས་བཟུང་མི་རྣམས་ཀྱིས་ངག་རྒྱུན་དུ། ཞག་གཅིག་ཞག་ངོ་མ་ལོན་གོང༌། །གནམ་གྱི་བྱ་ནག་སྤུན་གསུམ་བཏུལ། །ཞེས་ཟེར་སྲོལ་བྱུང་བ་རེད། རྒྱ་ཚ་ཞལ་དཀར་གྱིས་སྐྱེ་བུ་དེ་པང་དུ་བླངས་ནས་དགའ་སྤོབས་ཆེན་པོས། ང་ཡི་སྤུན་ཆུང་འདིའི་འཕྲིན་ལས་ཐམས་ཅད་བདེ་བླག་ཏུ་འགྲུབ་པར་གྱུར་ཅིག ཕྲུ་གུ་འདི་དེ་རིང་སྐྱེས་པ་ཞིག་ཡིན་ཡང་ལོ་གསུམ་གྱི་གཟུགས་ཚད་ལོངས་པ་ཞིག་འདུག འདི་ཡང་མ་བཞི་སྨུག་པོ་གདོང་གི་རྒྱུད་པ་ཁྱུང་སྒོ་ངའི་ནང་ནས་རྩལ་དྲུག་རྫོགས་པ་ཞིག་ཡིན་པ་ཐག་གིས་ཆོད། ངེད་སྤུན་གཉིས་ཀྱིས་ཅི་བྱས་ལམ་དུ་མི་འགྲོ་བའི་ཐེ་ཚོམ་མེད། སྔར་གྱི་གཏམ་དཔེར། བུ་སྤུན་གཉིས་སྒྲིག་དགྲ་ཡི་ཐོ་བ། །རྒོད་མ་གཉིས་སྒྲིག་ཕྱུགས་ཀྱི་རུ་མ། །ཟེར་བ་ལྟར་ཡིན། ཕྲུ་གུ་འདི་ལ་གྱོན་པའི་གོས་དང༌། དཀར་གསུམ་ཟས་ཀྱིས་གསོ་སྐྱོང་ལེགས་པར་བྱོས། །ཞེས་གསུངས་ཤིང་དབུ་ཐོད་གཏུགས་ཏེ་ངའི་གཅུང་པོ་འདི་ལ་རེ་ཞིག་མིང་ལ་ཇོ་རུ་ཞེས་བཏགས་རྒྱུ་ཡིན། འདི་ལ་ངོ་མཚར་བའི་རྟགས་མཚན་གསལ་པོ་འདུག འགོགས་མོ་ཁྱོད་ཀྱིས་བུ་འདི་ཉར་ཚགས་ཡག་པོ་གྱིས། ངས་སྤྱི་དཔོན་ལ་སྙན་གསེང་ཞུས་ནས་ཕྲུ་གུ་འདིའི་མ་འོས་པའི་ཆེད་གྲོས་མོལ་ཡག་པོ་ཞིག་བྱ་རྒྱུ་ཡིན་ཞེས་གསུངས་ཏེ། ཤར་རེར་གླིང་དཀར་སྤྱི་དཔོན་གྱི་དྲུང་དུ་བཅར་ཏེ་ལོ་རྒྱུས་ཞུ་བའི་གླུ་འདི་ལྟར་བླངས་སོ། །
གླུ་ཨ་ལ་ལ་མོ་ཨ་ལ་ལེན། །གླུ་ཐ་ལ་ལ་མོ་ཐ་ལ་ལེན། །ས་འདི་ཁྲ་དཀར་གནམ་རྫོང་རེད། །ང་ནི་རྒྱ་ཚ་ཞལ་དཀར་ཡིན། །གླིང་སྤྱི་དཔོན་གསོན་དང་ཞུ་རྒྱུ་ཡོད། །དཔྱིད་གསུམ་སོ་ནམ་བྱས་པ་ཡི། །སྟོན་གསུམ་འབྲས་བཟང་སྙེ་མ་དེ། །སེར་ལྡེམ་མེར་ཞིང་ཁའི་རྒྱན་དུ་བྱུང༌། །འདི་ནམ་འབྲེག་མི་ཤེས་ཁྱོད་ལ་འདྲི། །མ་ཀླུ་མོ་འགོགས་བཟའ་ལྷ་མོ་དེར། །བུ་རྨད་བྱུུང་སྐྱེས་མཆོག་ལྷ་སྲས་འཁྲུངས། །ལོ་གསུམ་གྱི་གཟུགས་ཚད་ལོངས་ནས་འདུག །དེའི་ཚེ་ལ་བར་ཆད་མི་ཡོང་སླད། །ཚེ་དབང་ཞབས་རིམ་གསོག་སྒྲུབ་དང། །གཉིས་ནས་རྒྱལ་སར་ཆེ་འདོན་དང༌། །གསུམ་ནས་མ་འོངས་འཚོ་རྟེན་སོགས། །ཅི་བྱ་དགོས་བློ་ཐག་མ་ཆོད་པས། །གླིང་སྤྱི་དཔོན་མཆོག་གིས་བཀའ་ཞིག་སྩོལ། །
ཞེས་པའི་གླུ་འདི་ཕུལ་བར། གླིང་སྤྱི་དཔོན་རོང་ཚ་ཁྲ་རྒན་གྱིས་བསམ་བློ་མང་དུ་བཏང་ནས་ཡིན་ལུགས་མིན་ལུགས་ཀྱི་གླུ་ལན་འདི་ལྟར་བླངས་སོ། །
གླུ་ཨ་ལ་ལ་མོ་ཨ་ལ་ལེན། །གླུ་ཐ་ལ་ལ་མོ་ཐ་ལ་ལེན། །བླ་མ་ཡི་དམ་མཁའ་འགྲོ་གསུམ། །མི་འབྲལ་སྤྱི་བོའི་རྒྱན་དུ་བཞུགས། །སྟེང་གོང་མ་ལྷ་ཡིས་བཀོད་འདྲའི་སྲས། །གཉེན་ཉེ་དུས་ཆེ་འདོན་བྱས་པ་དེ། །ཕྱོགས་མེད་པའི་འགྲོ་བས་བཀུར་ལེ་མིན། །མ་འགོགས་མོའི་སྐྱེས་མཆོག་ལྷ་སྲས་དེ། །སྟོབས་རྫུ་འཕྲུལ་གྱིས་གསེར་ཁྲིར་མ་བཞུགས་བར། །བཀུར་མི་དགོས་རང་སར་བཞག་ན་ཡང། །དབང་བཙན་པོས་གོང་ལ་ཤོར་ཏེ་འགྲོ །ཕ་ཨ་ཁུའི་དཔུང་རོགས་དགོས་དོན་མེད། །སྲས་དགུང་ལོ་བཅུ་གཉིས་མ་སོན་བར། །ལས་ཅི་མཛད་རྗེས་སུ་འབྲང་རྒྱུ་ལས། །འདི་དགོས་ཀྱི་ཁ་ཏ་དགོས་དོན་མེད། །དགྲ་བདུད་སྡེ་ཕམ་པར་མཛད་ངེས་ཡིན། །ལས་དེ་འདྲ་སྔོན་གྱིས་བསྐོས་པ་རེད། །ཡུན་མི་འགོར་སྐྱིད་པའི་ཉི་མ་ཤར། །དེ་ཨེ་གོ་ཞལ་དཀར་འབུམ་པ་དཔོན། །གླུ་དེ་ནི་ཞལ་དཀར་ཐུགས་ལ་ཟུངས། །
ཞེས་ཕྱི་ནང་བསླབ་བྱ་སོགས་བཀའ་བགྲོས་ཞིབ་མོར་མཛད་དེ་ཐུགས་དགྱེས་པོའི་ངང་ནས་ཕྱིར་ཕེབས་སོ། །
ཡང་སྙིང་སྲས་དེར་གནས་ཚུལ་ཇི་བྱུང་ལེའུ་ཕྱི་མར་གཟིགས་པར་འཚལ།
མཆན་འགྲེལ།
- འཚེ་བའི་ལས། གཞན་ལ་གནོད་པའི་ལས་ཀ་བྱས་པ་ལ་ཟེར།
དྲི་བ།
༡། རྒྱ་ཚས་ལྷ་སྲས་ལ་མཚན་གང་གསོལ་འདུག་གམ།
༢། ལྷ་སྲས་དེ་སྐྱེས་པ་དང་གཞན་ཕན་གྱི་ཕྱག་ལས་བདུད་བྱ་བཏུལ་ཡོད་ན། གྲོགས་པོ་ཁྱེད་ཀྱིས་གཞན་ལ་ཕན་པའི་ལས་ཀ་གང་ཞིག་བྱེད་རྩིས་ཡོད་དམ།
གླེང་བརྗོད། | ལེའུ་དང་པོ། | ལེའུ་གཉིས་པ། | ལེའུ་གསུམ་པ། | ལེའུ་བཞི་པ། | ལེའུ་ལྔ་པ། | ལེའུ་དྲུག་པ། | ལེའུ་བདུན་པ། | ལེའུ་བརྒྱད་པ། | ལེའུ་དགུ་པ། | ལེའུ་བཅུ་པ། | གློག་རྡུལ་དེབ།