གཡང་ནོར་བློ་ཡིས་མ་བཟོད་བརྟག་པའི་ཕྱིར། །
ཁྲོ་ཐུང་སྤྲུལ་པ་བྲག་ཕུག་ནང་འཛུལ་སྐབས།
ཇོ་རུས་སྤྲུལ་པ་བཀག་པའི་བྱིན་རླབས་པས། །
གཡོ་སྒྱུའི་རྫུན་ལྤགས་བྲག་ཕུག་ནང་དུ་བུད། །
བུ་ཇོ་རུས་ཨ་མྱེས་སྒམ་པོ་ར་ཛར་སྤྲུལ་ནས་སྟག་རོང་གི་ཁྱད་ནོར་གཉིས་པོ་ལོན་པའི་ཞག་པོ་ཁ་ཤས་ཀྱི་རྗེས་སུ། བུས་ཨ་མ་ལ་ཞུས་པར། དེ་རིང་ངའི་རིག་པ་སྔར་བས་དྭངས་ཤིང་བློ་བདེ་བ་དང༌། བག་ཕེབས་པ་ཞིག་འདུག་གསུངས་ཏེ་དགའ་བདེར་བཞུགས་པའི་སྐབས། ནམ་མཁའ་ནས་སྤྲུལ་པའི་གཡུ་སྦྲང་ཞིག་གིས་བུ་ཇོ་རུ་ལ་ལུང་བསྟན་གྱི་གླུ་འདི་ལྟར་བླངས་སོ། །
གླུ་ཨ་ལ་ལ་མོ་ཨ་ལ་ལེན། །གླུ་ཐ་ལ་ལ་མོ་ཐ་ལ་ལེན། །སྐྱབས་བསླུ་མེད་དཀོན་མཆོག་གསུམ་པོ་མཁྱེན། །མ་ནེ་ནེར་ལུང་བསྟན་འདི་འདྲ་ཡོད། །གླིང་སྟག་རོང་དཔོན་པོ་ཁྲོ་ཐུང་དེར། །ཕར་བལྟས་ན་སེམས་པ་གནག་དང་འདྲ། །ལས་གང་བྱས་ཇོ་རུའི་གྲོགས་སུ་འགྱུར། །ཁོའི་སྙིང་ལ་གདོན་འདྲེ་ནག་པོ་ཞུགས། །སེམས་གདོན་འདྲེ་དེ་དང་མ་བྲལ་ན། །ནམ་རྒྱུན་དུ་གླིང་དཀར་ནང་འཁྲུག་བྱེད། །ཁོའི་རྫུ་འཕྲུལ་བཀག་པའི་བྱིན་གྱིས་རློབས། །སེམས་གདོན་འདྲེ་ཁ་ནས་སྐྱུགས་སུ་ཆུགས། །ལས་ངན་པ་སྤང་པའི་མནའ་ཆུ་བླུགས། །ལས་མི་བདེ་ཌ་རུ་འདྲ་བ་དེ། །རྫོང་བཅུ་གཉིས་སྒོ་མོ་འབྱེད་ཚེ་མཁོ། །བུ་ཇོ་རུའི་ཐུགས་ལ་དེ་ལྟར་ཟུངས། །
ཞེས་གསུངས་པ་དེ་ཐོས་པ་དང༌། དེ་མ་ཐག་ཇོ་རུས་རྫུ་འཕྲུལ་གིས་ལྕི་ཕུ་བྲག་ནག་ཏུ་ཕེབས་ཏེ་བྱ་ཁྲ་ཞིག་ཏུ་སྤྲུལ་ནས་བྲག་ལོགས་སུ་བབས་ཏེ་བཞུགས།
དེ་ཉིན་ཁྲོ་ཐུང་ཡང་ཉིན་ཤས་གོང་རང་ནོར་གཞན་ལག་ཏུ་ཤོར་བར་བློས་མ་བཟོད་དེ་ལྕི་ཕུ་བྲག་ནག་ཏུ་ལྟ་བར་ཡོང༌། དེར་བྲག་སྒོ་ནི་རྡོ་ཕ་བོང་ཤིན་ཏུ་ཆེན་པོ་ཞིག་གིས་བཀག་ནས་འདུག་ཀྱང་དེ་ལ་ཞིབ་མོར་བལྟ་དུས་རྒྱུག་པས་ཨི་ཁུང་ཆུང་ངུ་གཉིས་ཕུག་ནས་ཡོད་པ་མཐོང༌། ཁྲོ་ཐུང་གིས་ཨི་ཁུང་ཞིག་ནས་བྲག་ཕུག་ནང་ལྐོག་བལྟ་བྱས་པས། དེའི་ནང་རྡོ་ལེབ་ཅིག་གི་སྒང་ལ་ཨ་མྱེས་སྒམ་པོ་ར་ཛཱ་མགོ་ཐུར་དུ་བསྟན་ཏེ་མགོའི་རལ་པ་ཡང་ནག་ཉིལ་ལེར་ཤི་ནས་འདུག་པ་དང༌། དེའི་རྒྱབ་ཀྱི་བྲག་ངོས་སུ་དབྱུག་པ་བེར་ཀ་དང༌། གཡང་གི་སྒྱེ་མོ་གཉིས་བཀལ་ནས་བཞག་འདུག་པ་མཐོང་མ་ཐག་ཁོ་ཤིན་ཏུ་དགའ་ནས་བྱི་བ་ཆུང་ཆུང་ཞིག་ཏུ་སྤྲུལ་ཏེ་བྲག་ཕུག་ནང་དུ་འཛུལ་ནས་བལྟ་སྐབས་སྔར་གྱི་དབྱུག་པ་དང༌། གཡང་སྒྱེ་གཉིས་མཐོང་རྒྱུ་མེད་པར་གྱུར། འོན་ཀྱང་ཁོའི་སེམས་སུ་རང་ཉིད་བྱི་བར་སྤྲུལ་ཡོད་པས་བྱི་བའི་མིག་གིས་མ་མཐོང་བ་རེད་བསམས་ནས། གཟུགས་པོ་བྱི་བ་རང་འཇགས་ལ་མགོ་བོ་ཁྲོ་རང་གི་མགོ་ལ་སྤྲུལ་ནས་ཕྱོགས་ཐམས་ཅད་ལ་ལྟ་བཞིན་པའི་སྐབས། ཇོ་རུས་མ་ནེ་ནེའི་ལུང་བསྟན་གནང་བ་ལྟར་ཁྲོ་ཐུང་གི་སྤྲུལ་པ་བཤིག་རྒྱུ་མེད་པར་བྱིན་གྱིས་བརླབས་པ་དང༌། རྫུ་འཕྲུལ་གྱིས་བྲག་ཕུག་དེའི་ནང་མི་རོ་རློན་པ་ཁོ་ནས་ཁེངས་པར་བྱས་པས། ཁྲོ་ཐུང་ནི་གཞན་དང་མི་འདྲ་བའི་སྔགས་ག་ཚོད་བཏབ་ཀྱང་སྤྲུལ་མ་ཐུབ། མགྱོགས་མྱུར་ཨི་ཁུང་ནས་དོན་སྐབས་ལུས་ཐར་ཡང་མགོ་མ་ཐར་བས་ཁོའི་རྒྱུན་བསྟེན་གྱི་ལྷ་རྟ་མགྲིན་ལ་གསོལ་བ་ག་ཚོད་བཏབ་ཀྱང་ཕན་པ་གང་ཡང་མ་བྱུང༌། སྐབས་དེར་ཇོ་རུ་བྲག་སྒོར་ཕེབས་ཏེ་ཅི་ཡང་མི་ཤེས་པའི་ཁུལ་གྱིས་གསུངས་པར། ཨ་ཁྱད་མཚར། བདུད་སྒམ་པོ་ར་ཛཱ་བཏུལ་སའི་ཕུག་པ་འདིར་གཟུགས་ཅན་མི་མ་དགོས་གཟུགས་མེད་ཀྱི་འདྲེ་ཡིན་ཡང་ཐར་ས་མེད། འོན་ཀྱང༌། དེ་རིང་བྲག་སྒོར་རྟ་ཞིག་བཏགས་འདུག་པས་དེའི་ནང་རྫུ་འཕྲུལ་ཅན་གྱི་ལྷ་འདྲེ་གང་རུང་ཞིག་སླེབས་ཡོད་པ་ཐག་གིས་ཆོད་ཟེར་ཞིང། བྲག་སྒོ་བྱིས་པ་ཐར་ཙམ་ཞིག་ཕྱེ་ནས་ནང་དུ་གཟིགས་པར་ཕེབས། སྐབས་དེར་ཁྲོ་ཐུང་མཐོང་བ་དང་ཇོ་རུས་གློ་བུར་དུ་འདྲོགས་ཁུལ་བྱས་ཏེ། ཨའོ། བདུད་མི་མགོ་རྒྱ་བོ་འདི་ཟ་འདྲེ་ཞིག་ཡིན་པ་ཐག་ཆོད། འདི་མ་བསད་ན་གནོད་པ་ཆེན་པོ་བསྐྱལ་ངེས་རེད། ཅེས་གསུངས་ནས་ལྕང་དཀར་གྱི་རྒྱུག་པ་དེ་འཕྱར་ནས་གཞུ་རྩིས་བྱས་པས། ཁྲོ་ཐུང་གི་སེམས་སུ་ད་ནི་ཞུ་བ་འབུལ་ན་མ་གཏོགས་སྲོག་མགོ་ཐར་ས་མ་རེད་བསམས་ཏེ། ལུས་འདར་སིག་སིག་ངང༌།
ཨ་ཙི་ཇོ་རུ་རིན་པོ་ཆེ། །ཇོ་རུ་མི་མིན་ལྷ་ཡི་སྲས། །ལྷ་དང་བླ་མ་ཡི་དམ་གསུམ། ཐུགས་ཁོང་ཁྲོ་ཡོད་ཀྱང་སེམས་འཛིན་མེད། ང་མ་གསོད་སྟག་རོང་ཁྲོ་ཐུང་ཡིན། །
ཞེས་ཞུས་པས། ཇོ་རུས་གཏམ་དེ་ཐོས་འཕྲལ་ཧང་སང་མདོག་གིས། ཨ་ཁ་ཁ། བདུད་སྒམ་པོ་ར་ཛཱ་ཟེར་བ་དེ་ངས་བཏུལ་ཟིན་ཀྱང་ཁོའི་རྣམ་གཤིས་ཟ་འདྲེ་1ཞིག་ཏུ་སྐྱེས་ནས་ངའི་ཨ་ཁུ་ལ་གནོད་པ་བྱེད་ཀྱི་འདུག ཚ་བོ་ང་དུས་ཚོད་ཏོག་ཙམ་འགོར་ན་ཨ་ཁུ་ཁྱོད་ཤི་རྒྱུ་ལས་མི་འདུག ད་ཨ་ཁུ་ཁྱོད་འདིར་སྡོད་མི་ཉན་མགྱོགས་པོ་ཡར་ཕེབས་ཤིག་གསུངས་ཏེ་བྲག་ཕུག་གི་ཕྱིར་ཡར་འཐེན་ཁུལ་བྱས་པས། བྱི་བའི་ལུས་ཀྱང་བྲག་གསེང་ནས་ཡར་མ་ཐར་བས་ཇོ་རུས། ད་དངོས་གནས་ཁྱོད་ཀྱི་ལུས་ལ་ཟ་འདྲེ་ཡ་མཚན་ཅན་ཞིག་ཞུགས་འདུག བྱི་བའི་ལུས་ཡར་ཐར་ས་ལ་མར་མ་ཐར་བ་ག་ལ་ཡོད། ད་ཁྱོད་ཀྱིས་ལྷ་རྟ་མགྲིན་ལ་གསོལ་བ་རྩེ་གཅིག་ཏུ་ཐོབས་ཤིག་གསུངས་ནས་ཇོ་རུའི་ཕྱག་གཡས་ཁོའི་མགོ་ཐོག་ཏུ་བཞག་སྟེ་ཡིད་ནས་ལྷ་སྲུང་མ་འབོད། སྐབས་དེར་ཁྲོ་ཐུང་གི་ཁ་ནས་སྦྲུལ་ནག་པོ་མགོ་གཉིས་ཅན་ཞིག་བསྐྱུགས། ཇོ་རུས་སྦྲུལ་དེ་བསད་ནས་དེའི་རྣམ་ཤེས་ལྷ་ཡུལ་དུ་དྲངས་སོ། །དེ་མ་ཐག་བྱི་བའི་ལུས་ལ་མི་རྒན་གྱི་མགོ་འཁྱེར་བའི་ཨ་ཁུ་ཁྲོ་ཐུང་ནི་བྲག་ཕུག་གི་ཕྱིར་ཐོན་ཐུབ་ཙམ་བྱུང༌། ཇོ་རུས་ཁྲོ་ཐུང་ལ་ས་ཆ་འདིར་ཡུན་རིང་སྡོད་མི་ཉན་པ། ད་ཁྱོད་ཀྱི་སྤྲུལ་པ་བཤིག་སྟེ་རང་གི་ས་ཆར་ལོག་ན་བཟང༌། ང་ཡང་ལས་བྲེལ་ཆེ་བས་འགྲོ་རན་འདུག་གསུངས་སོ། །
ཡང་སྙིང་ཁྲོ་ཐུང་གི་སྤྲུལ་པ་བཤིག་ཐུབ་ཡོད་མེད་ལེའུ་ཕྱི་མར་གཟིགས་པར་འཚལ།
མཆན་འགྲེལ།
- ཟ་འདྲེ། དུས་རྟག་ཏུ་གྲོད་ཁོག་ལྟོགས་ནས་སྡོད་པའི་གདོན་འདྲེ་ཞིག
དྲི་བ།
༡། ཁྲོ་ཐུང་གི་ལུས་བྱིས་པའི་ལུས་དེ་གང་འདྲ་བྱས་ནས་ཆགས་སམ།
༢། གལ་སྲིད་ཁྱེད་ལ་སྤྲུལ་པ་སྟོན་རྒྱུ་ཡོད་ན་ལས་ཐོག་མ་དེ་གང་བྱེད་རྒྱུ་ཡིན་ནམ།
གླེང་བརྗོད། | ལེའུ་དང་པོ། | ལེའུ་གཉིས་པ། | ལེའུ་གསུམ་པ། | ལེའུ་བཞི་པ། | ལེའུ་ལྔ་པ། | ལེའུ་དྲུག་པ། | ལེའུ་བདུན་པ། | ལེའུ་བརྒྱད་པ། | ལེའུ་དགུ་པ། | ལེའུ་བཅུ་པ། | གློག་རྡུལ་དེབ།