རྒྱ་ཚ་ཞལ་དཀར་རྒྱ་ཡིས་མགྲོན་དུ་བོས། །
འགོགས་གླིང་འཁྲུགས་ཏེ་ཆོས་རྒྱལ་འགོགས་པས་བཀྲོངས། །
སྤྲང་ཁྱིམ་མ་བུས་རྒྱ་ཚར་གསང་གཏམ་བཤད། །
དཔའ་པོའི་ངར་སྐད་སྤྱི་དཔོན་སྙན་དུ་བསྒྲགས། །
དེ་ནས་བུ་རྒྱ་ཚ་ཞལ་དཀར་དེ་ནི་ཕྲུ་གུ་གཞན་དང་མི་འདྲ་བར་གཟུགས་པོའི་འཚར་ལོངས་ཟླ་རེ་ལས་ཟླ་རེ་ཆེ་བར་བྱུང་སྟེ་མཐར་ལུས་སྟོབས་ཡོངས་སུ་རྒྱས་པའི་དུས་ལ་སླེབས་སྐབས། རྒྱ་མི་ཆེན་གྱིས་གླིང་གི་ཚ་བོ་རྒྱ་ཚ་ཞལ་དཀར་དང༌། འཇང་གི་ཚ་བོ་ཉི་ཁྲི་སྐར་ཆེན། ཧོར་གི་ཚ་བོ་ལྷ་བུ་ལེགས་བུ་བཅས་གསུམ་རྒྱ་ནག་ཡུལ་དུ་མགྲོན་འབོད་གནང་ནས་ཚ་བོ་རེ་ལ་གཞན་ལ་མེད་པའི་ཁྱད་ནོར་དང༌། རྟ་རེ་དང། གྲི་རེ། ཁྲབ་རེ་གཙོས་གསེར་དངུལ་ཇ་དར་སོགས་བསམ་གྱིས་མི་ཁྱབ་པ་གནང་བ་དང་སྦྲགས། ཡུལ་ལུང་འཛིན་སྟངས་དང༌། འབངས་མི་སྐྱོང་སྟངས། དགྲ་བོ་འདུལ་སྟངས་སོགས་ཀྱི་བསླབ་བྱ་རིན་ཐང་བྲལ་བ་གནང༌།
དེ་ནས་ཁོང་གསུམ་གྱིས་རང་རང་གི་བློན་འཁོར་རྣམས་ལ་ཞང་པོས་གནང་པའི་རྟ་དྲེལ་གོ་མཚོན་དང༌། ནོར་རྫས་ལ་སོགས་པ་རྣམས་བསྐུར་ཏེ། ཐུགས་སྤྲོ་པོའི་ངང་རང་རང་གི་ཕ་ཡུལ་ཕྱོགས་སུ་ཕྱིར་ལོག་གོ །བུ་རྒྱ་ཚ་ཞལ་དཀར་རྒྱ་ནག་ཏུ་ཕེབས་པའི་རྗེས་ཙམ་ལ་གླིང་དཀར་དང༌། འགོགས་ཡུལ་གཉིས་ས་མཚམས་རྩོད་རྙོག་ལས་མཆེད་དེ་དམག་འཁྲུག་བྱུང་སྟེ། འགོགས་ཡུལ་ཕ་ཚོ་བཅོ་བརྒྱད་1གླིང་དཀར་གྱིས་ཕམ་པར་བཟོས་ཀྱང་མཐར། སྤྱི་དཔོན་གྱི་བུ་འབྲིང་བ་གླེན་པ་ཆོས་རྒྱལ་དེ་ཡང་འགོགས་པས་བཀྲོངས། རེ་ཞིག་གནས་ཚུལ་དེ་བུ་རྒྱ་ཚ་ལ་མ་བཤད་པར་གསང་བ་བྱས་ཏེ་བཞག་ཀྱང༌། ཉིན་ཞིག་གླིང་གི་སྤྲང་ཁྱིམ་མ་བུ་གཉིས་2ཀྱིས་རྒྱ་ཚ་ལ་བཤད་པས། བུ་རྒྱ་ཚ་ནི་སྙིང་ལ་གྲི་བཙུགས་པ་ལྟ་བུའི་འགྱོད་པ་དྲག་པོ་བྱུང་སྟེ། དེ་མ་ཐག་ཏུ་སྤྱི་དཔོན་གྱི་དྲུང་དུ་ཕེབས་ནས་གླུ་འདི་ལྟར་བླངས་སོ། །
གླུ་ཨལ་ལ་མོ་ཨ་ལ་ལེན། །ཐ་ལ་ལ་མོ་ཐ་ལ་ལེན། །སྐྱབས་རྒྱལ་བ་རྒྱ་མཚོའི་ཞབས་ལ་འདུད། །ས་འདིའི་ས་ངོ་མ་ཤེས་ན། །ཁྲ་མོ་གླིང་གི་ས་ཆ་རེད། །ང་འདྲ་ང་ངོ་མ་ཤེས་ན། །ང་འབུམ་པ་རྒྱ་ཚ་ཞལ་དཀར་ཡིན། །རྒྱ་མི་ཆེན་དཔོན་གྱི་ཚ་པོ་ཡིན། །ངའི་ཕུ་བོ་འགོགས་ལ་ཤོར་བ་དེའི། །དགྲ་ཤ་ལེན་དགུ་སྐོར་ལེན་དང་གཅིག །ཡང་ལེན་སྙིང་ཁྲག་འཐུང་དང་གཉིས། །འགོགས་ཡུལ་སྟོང་པར་གྱུར་དང་གསུམ། །གཏམ་དེ་འདྲའི་ཐོག་ཏུ་མ་གནས་ན། །ང་རྒྱ་ཚ་ཞལ་དཀར་རོ་དང་འདྲ། །ང་མི་སྡོད་ད་ལྟ་ཉིད་དུ་འགྲོ ཞེས་ངར་ངར་གྱིས་འགོགས་ཡུལ་ལ་དགྲ་ཤ་ལེན་དུ་བསྐྱོད་རྩིས་བྱེད་སྐབས། སྤྱི་དཔོན་གྱི་ཐུགས་ལ་ད་ལན་དམག་ལ་མ་སོང་ན་འགྲིགས་ཀྱང༌། བུ་རྒྱ་ཚ་ལ་ཞུ་སྐྱོར་ནི་མི་འགྲོ །འོན་ཀྱང་ཁོང་གཅིག་པུ་ཕེབས་ན་ག་ནས་འགྲིགས་བསམ་སྟེ་མནོ་བསམ་ཞིབ་མོ་ཞིག་བཏང་ནས་བསྡད།
ཡང་སྙིང་སྤྱི་དཔོན་གྱིས་བུ་རྒྱ་ཚར་གང་བཤད་ཡོད་མེད་ལེའུ་ཕྱི་མར་གཟིགས་པར་འཚལ།།
མཆན་འགྲེལ།
༡། ཕ་ཚོ་བཅོ་བརྒྱད། ཕ་ཡི་མི་རྒྱུད་ཀྱི་སྤུན་མཆེད་ཚང་མར་གོ
༢། སྤྲང་ཁྱིམ་མ་བུ་གཉིས། ཟས་གོས་ཀྱིས་ཕོངས་ཏེ་སློང་མ་རྒྱག་མཁན་གྱི་མ་བུ་གཉིས།
དྲི་བ།
༡། རྒྱ་མི་ཆེན་ཞེས་པ་དེ་རྒྱ་ཚ་ཞལ་དཀར་དང་སྤུན་མཆེད་འགྲོ་སྟངས་གང་འདྲ་ཡིན་ནམ།
༢། སྤྱི་དཔོན་གྱི་བུ་ཆོས་རྒྱལ་འགོགསཔས་བཀྲོངས་པར་རྒྱ་ཚ་ངར་དགོས་དོན་གང་ཡིན་ནམ།
གླེང་བརྗོད། | ལེའུ་དང་པོ། | ལེའུ་གཉིས་པ། | ལེའུ་གསུམ་པ། | ལེའུ་བཞི་པ། | ལེའུ་ལྔ་པ། | ལེའུ་དྲུག་པ། | ལེའུ་བདུན་པ། | ལེའུ་བརྒྱད་པ། | ལེའུ་དགུ་པ། | ལེའུ་བཅུ་པ། | གློག་རྡུལ་དེབ།