༄༅། །ཕྱི་ལོ་ ༢༠༡༥ ཟླ་ ༥ ཚེས་ ༢༦ ཉིན་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་གོ་སྒྲིག་འོག་རྒྱ་བལ་མཐོ་སློབ་ནང་འགྲིམ་བཞིན་པའི་སློབ་ཕྲུག་རྣམས་ལ་འགོ་ཁྲིད་ཟབ་སྦྱོང་ཞིག་གོ་སྒྲིག་གནང་ཡོད།
དེ་ཡང་ཟབ་སྦྱོང་ཉིན་གཉིས་པའི་ཚོགས་མགོན་དུ་དཔལ་ལྡན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་བོད་ཀྱི་མང་གཙོའི་འཕེལ་རིམ་སྐོར་ལ་གསུང་བཤད་གནང་དོན། ནམ་རྒྱུན་ངས་བཙན་བྱོལ་བོད་མིའི་མང་གཙོའི་འཕེལ་རིམ་སྐོར་འགྲེལ་བཤད་རྒྱག་སྐབས་རིམ་པ་གསུམ་དུ་དབྱེ་བཞིན་ཡོད། རིམ་པ་དང་པོ་ནི། ཕྱི་ལོ་ ༡༩༦༠ ནས་ ༡༩༩༠ བར་གྱི་གནས་སྟངས་དང་། གཉིས་པ་ནི། ཕྱི་ལོ་ ༡༩༩༡ ནས་ ༢༠༠༡ བར་དང་། རིམ་པ་གསུམ་པ་ནི། ཕྱི་ལོ་ ༢༠༠༡ ནས་ ༢༠༡༡ བར། ཕྱི་ལོ་ ༢༠༡༡ ནས་ད་བར་རིམ་པ་བཞི་པ་ལྟ་བུ་ཆགས་ཀྱི་ཡོད། ད་བར་བཙན་བྱོལ་བོད་མིའི་མང་གཙོའི་འཕེལ་རིམ་ལ་གཞིགས་སྐབས་འཕེལ་རྒྱས་གང་ཕྱིན་ཡོད་པ་ཚང་མ་སྤྱི་ནོར་ ༸གོང་ས་༸སྐྱབས་མགོན་ཆེན་པོ་མཆོག་གིས་ལམ་སྟོན་མཛད་པ་ཁོ་ནའི་འོག་ནས་བྱུང་བ་ཞིག་མ་གཏོགས་མི་མང་རང་གིས་ཐོག་ནས་མང་གཙོའི་འཕེལ་རིམ་ཐོག་སེམས་ཁུར་བླངས་ནས་མང་གཙོའི་གནས་བབ་འདི་ལྟ་བུ་ཞིག་ལ་སླེབས་པ་ཞིག་རྩ་བ་ནས་མིན། དེར་བརྟེན་ཕྱི་ལོ་ ༡༩༥༡ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བཅུ་དྲུག་བཞེས་པའི་དུས་སྐབས་དེར་བོད་ཀྱི་ལོ་རྒྱུས་ཀྱི་ཐོག དུས་ཚོད་ཧ་ཅང་གཉན་ཕྲང་ཅན་ཞིག་ཆགས་ཡོད།
སྐབས་དེར་༸གོང་ས་མཆོག་གིས་བོད་མིའི་ཆོས་སྲིད་གཉིས་ཀྱི་ཐུགས་འགན་བཞེས་གནང་མཛད་དགོས་བྱུང་ཡོད། སྐུ་ན་ཧ་ཅང་ཕྲ་བའི་དུས་སྐབས་ནས་བོད་ནང་གི་ཆབ་སྲིད་ཀྱི་འགྲོ་ལུགས་དང་། ཁྲིམས་ལུགས། ས་ཆའི་བདག་དབང་། ཁྲལ་གྱི་འགྲོ་སྟངས་སོགས་བསྐྱར་བཅོས་མཛད་རྒྱུའི་དགོངས་བཞེད་ཡོད་པ་དང་། དེ་རྗེས་མགོན་པོ་གང་ཉིད་མཆོག་གིས་བོད་མིའི་ཆོས་སྲིད་གཉིས་ཀྱི་སྐུ་དབང་ཡོངས་རྫོགས་བདག་གིར་བཞེས་རྗེས་ཕྱི་ལོ་ ༡༩༥༢ ཙམ་ནས་བོད་ནང་ལེགས་བཅོས་ཚོགས་ཆུང་འཛུགས་གནང་མཛད། དེའི་ནང་ས་ཆའི་བདག་དབང་དང་། ཁྲལ་གྱི་འགྲོ་སྟངས་སོགས་ལ་འགྱུར་བ་གཏོང་རྒྱུའི་དགོངས་གཞི་ཡོད་ཀྱང། ༸གོང་ས་མཆོག་གི་དགོངས་བཞེད་ལྟར་ལེགས་བཅོས་ཚོགས་ཆུང་གིས་ལས་དོན་བསྒྲུབ་ཐུབ་མེད། ལས་དོན་བསྒྲུབ་མ་ཐུབ་པའི་རྒྱུ་མཚན་རྣམ་པ་ཚོས་མཁྱེན་གསལ་རེད། ཕྱི་ལོ་ ༡༩༥༡ ལོར་རྒྱ་ནག་དམར་པོའི་སྲིད་གཞུང་གིས་བོད་མི་རྣམས་ལ་བཙན་དབང་འོག་ཐོག་གྲོས་མཐུན་དོན་ཚན་བཅུ་བདུན་ཟེར་བ་དེར་མིང་རྟགས་བཀོད་བཅུག་པ་རེད། སྐབས་དེར་བོད་ནང་གི་ཆབ་སྲིད་དང་འཛིན་སྐྱོང་གི་འགྲོ་ལུགས་ཐོག་རྒྱ་ནག་གིས་ཐེ་བྱུས་བྱེད་འགོ་བཙུགས་ཟིན་སྟབས། མགོན་པོ་གང་ཉིད་མཆོག་གི་དགོངས་གཞི་ལྟར་བཅོས་བསྒྱུར་ཐུབ་མེད། དེང་སྐབས་༸གོང་ས་མཆོག་གི་བཀའ་སློབ་ནང་། མགོན་པོ་གང་ཉིད་མཆོག་གིས་བོད་མིའི་ཆབ་སྲིད་ཀྱི་ལམ་ལུགས་དེ་མང་གཙོའི་ལམ་ལུགས་ཐོག་ཕེབས་དགོས་པའི་དགོངས་བཞེས་མཛད་ཚུལ་ནི།
ཕྱི་ལོ་ ༡༩༥༤ ལོའི་ལོ་མཇུག་དང་། ༡༩༥༥ ལོའི་ལོ་མགོར་༸རྒྱལ་བ་རིན་པོ་ཆེ་མཆོག་རྒྱ་ནག་ཏུ་ཆིབས་སྒྱུར་བསྐྱངས་སྐབས། པཎ་ཆེན་རིན་པོ་ཆེ་མཆོག་ལྷན་རྒྱས་སུ་བཅར་ཡོད། ཟླ་ཤས་རིང་རྒྱ་ནག་ཏུ་བཞུགས་པའི་རིང་རྒྱ་ནག་དམར་ཤོག་གི་ཚོགས་འདུ་འཚོགས་སྟངས་དང་། འགྲོ་ལུགས་འགྲོ་སྟངས་ཆ་ཚང་གཟིགས་ཡོད། སྤྱིར་ཚོགས་འདུ་འཚོགས་པའི་སྐབས་སུ་བང་སྒྲིག་པོ་དང་། སྒྲིག་འཛུགས་ལྡན་པ་ལྟ་བུ་ཡོད། འོན་ཀྱང་སོ་སོའི་སྒེར་གྱི་བསམ་ཚུལ་རྣམས་རང་དབང་ཐོག་ནས་བརྗོད་རྒྱུའི་ཐོབ་ཐང་མེད་པའི་གནས་སྟངས་ལ་ཐུགས་ཞིབ་མཛད་ཡོད། དེ་རྗེས་ཕྱི་ལོ་ ༡༩༥༦ ལོར་རྒྱ་གར་དུ་སྟོན་པ་བཅོམ་ལྡན་འདས་སྐུ་མྱང་ངན་ལས་འདས་ནས་ལོ་ ༢༥༠༠ འཁོར་བའི་དུས་དྲན་མཛད་སྒོར་ཆིབས་སྒྱུར་བསྐྱངས་སྐབས། རྒྱ་གར་གྲོས་ཚོགས་སུའང་གཟིགས་ཞིབ་མཛད་རྒྱུའི་གོ་སྐབས་བྱུང་ཡོད། སྐབས་དེར་རྒྱ་གར་གྲོས་ཚོགས་ནང་སྐད་ཅོར་དང་འུར་ཟིང་ཚ་མདོག་ཡོད་ཀྱང་། འཐུས་མི་སོ་སོའི་བསམ་བློའི་ནང་གང་ཡོད་པ་དེ་དག་རང་དབང་ཐོག་ནས་ཤོད་རྒྱུའི་གོ་སྐབས་ཡོད་པ་སྐུ་མདུན་གྱིས་གཟིགས་པར་བརྟེན་མང་གཙོའི་ལམ་ལུགས་ལ་སྔ་མོ་ནས་ཐུགས་མོས་ཡོད་པ་དེ་དག་དེ་བས་ཀྱང་ཤུགས་ཆེ་རུ་ཕྱིན་ནས་མ་འོངས་པར་བོད་པའི་ཆབ་སྲིད་ཀྱི་ལམ་ལུགས་འདི་མང་གཙོའི་ལམ་ལུགས་ཐོག་འགྲོ་དགོས་ཀྱི་འདུག ཅེས་ཐུགས་ལ་སྐུལ་ལྕགས་ཐེབས་རྒྱུའི་གཞི་རྩ་གཙོ་བོ་དེ་ནས་བྱུང་ཡོད། ཅེས་སོགས་ཀྱི་གསུང་བཤད་གནང་རྗེས་སློབ་ཕྲུག་རྣམས་ཀྱི་དྲི་བར་ལན་འདེབས་གནང་།
བོད་མིའི་སྒྲིག་འཛུགས་ཀྱི་དྲ་བ་ལས་དྲངས།