མིག་འཕྲུལ་སྟོན་པ།
ཀུན་རྣམ་གྱིས་བསྒྱུར།
པཱ་ལགས་ཀྱིས་ཤ་བག་ལེབ་ཉོས་ཏེ་བཞག་ཡོད་པ་དེ་དག་བུ་བཀྲ་ཤིས་ཀྱིས་མཐོང་བས། ཟ་འདོད་ཀྱིས་འགྲམ་ཆུ་འཁོར་ཡང་། པཱ་ལགས་ཀྱིས་ལམ་སང་གནང་གི་མེད་པར་བརྟེན་བུ་བཀྲ་ཤིས་ཀྱིས་རིག་པ་ཞིག་བཏང་ནས། པཱ་ལགས། པཱ་ལགས། ངས་མིག་འཕྲུལ་ཡག་པོ་ཞིག་རྩེ་ཤེས་ཀྱི་ཡོད། ཅེས་ཞུས་པར་པཱ་ལགས་ཀྱིས། ཨ་ལས་བྱས་ན་རང་གིས་ང་ལ་མིག་འཕྲུལ་ག་རེ་སྟོན་གྱི་ཡིན་པ། ཞེས་དྲིས་པར་བུ་བཀྲ་ཤིས་ཀྱིས། པཱ་ལགས་ཀྱིས་ངའི་ཁའི་ནང་དུ་ཤ་བག་ལེབ་ཅིག་བླུགས་གནང་དང༌། ངས་ལམ་སང་ཡལ་ཐུབ་པའི་མིག་འཕྲུལ་ཞིག་བསྟན་ཆོག ཅེས་ཞུས་པར་པཱ་ལགས་ཀྱིས་བུའི་ཁའི་ནང་ཤ་བག་ལེབ་གཅིག་བླུགས་མ་ཐག བུ་བཀྲ་ཤིས་ཀྱིས་ལམ་སང་བཟས་ནས་མིད་པར་བཏང་སྟེ། ད་མིག་འཕྲུལ་གཟིགས་སོང་ངམ། ཞེས་ཞུས་པར་པཱ་ལགས་དེ་ནི་རང་གི་བུའི་རིག་པར་ཧང་སངས་པ་རེད།
བུ་གླེན་པ།
སྨྱུག་རྒོད་གངས་བུ་དཔལ།
ཨ་མ་ཞིག་ལ་བུ་གླེན་པ་སྤྱང་གྲུང་གཏན་ནས་མེད་པ་ཞིག་ཡོད་པས། སེམས་འཚབ་ངང་རང་གི་བུ་དེ་ཅུང་ཟད་སྤྱང་དུ་འགྲོ་བའི་ཆེད། གྲོང་པའི་བུ་སྐད་ཆ་ཤོད་མཁས་པོ་སྤྱང་གྲུང་ལྡན་པ་ཞིག་ཡོད་པ་དེའི་ལྷན་དུ་ཁྱིམ་
མཚེས་ཤིག་གི་བ་ཕྱུགས་ཤི་བར་སེམས་གསོ་བྱེད་དུ་བཏང་བ་རེད། བུ་སྤྱང་པོ་དེས། བ་ཕྱུགས་ཤི་བར་ནང་མི་ཚང་མ་སེམས་ཁྲལ་གནང་མི་དགོས། ཤ་དང་པགས་པ་སོགས་ལ་ལྟ་བཟོ་མེད་པ་མིན། ཞེས་ལབ་པ་དེ་དག་བུ་གླེན་པའི་སེམས་ནང་ངེས་པོ་བྱུང༌། ཡང་ཉིན་ཤས་རྗེས་གྲོང་པ་གཞན་ཞིག་གི་ཕ་རྒན་གྲོངས་པས་ཁོ་པ་དེར་སེམས་གསོ་བྱེད་དུ་བཏང་བར་བུ་གླེན་པས། ཕ་གྲོངས་ཀྱང་ནང་མི་ཚང་མ་སེམས་ཁྲལ་བྱེད་མི་དགོས། ཤ་དང་པགས་པར་ལྟ་བཟོ་ཡོད་པ་རེད་ལབ་གྲབས་བྱེད་སྐབས། བུ་སྤྱང་པོ་དེ་དེར་འབྱོར་ཏེ། པཱ་ལགས་དམ་པ་དེ་ང་ཚོ་ཚང་མའི་པཱ་ལགས་རེད། འདི་འདྲ་སེམས་ཁྲལ་གནང་མི་དགོས། ཞེས་ལབ་པས་བུ་གླེན་པའི་སེམས་ནང་མི་ཤི་ན་དེ་ལྟར་ལབ་དགོས་པ་འདྲ་དྲན་པ་རེད། དེ་ནས་ཟླ་ཤས་རྗེས་ཁོ་རང་གི་གཅེན་པོའི་བཟའ་ཟླ་གྲོངས་པས་བུ་གླེན་པ་གཅེན་པོའི་མདུན་ཡོང་སྟེ། གཅེན་པོ་ལགས། སེམས་ཁྲལ་མ་གནང་དང༌། བཟའ་ཟླ་གྲོངས་མཁན་དེ་ང་ཚོ་ཚང་མའི་བཟའ་ཟླ་རེད་པ། ཞེས་ལབ་པར་གཅེན་པོའི་ནང་མི་ཚང་མས་ཁོང་ཁྲོ་དང་བཅས་བུ་གླེན་པ་ཕྱིར་འབུད་བཏང་ངོ་། །
ང་དང་ཁྱེད་ཀྱི་དབྱེ་བ་མེད།
ཕུར་བུ་རྡོ་རྗེས་བསྡུས།
གཉེན་སྒྲིག་བྱས་མ་ཐག་པའི་གཞོན་ནུ་བཟའ་ཚོ་གཉིས་ཀྱིས་ཉིན་གཅིིག་ཁང་པའི་ནང་ཅ་དངོས་རྣམས་སྒྲིག་གཤོམ་བྱེད་བཞིན་ཡོད་པའི་སྐབས་བཟའ་ཟླས་རང་གི་ཁྱོ་གར། ཁྱེད་ཀྱི་ཅ་ལག་འདི་ག་པར་སྒྲིག་གི་ཡིན་ནམ། ངའི་འདི་ག་པར་སྒྲིག་ན་ཡག་ག་འདུག ཅེས་གྲོས་འདྲི་བྱས་པར་སྐྱེ་དམན་དེས། འོ་ཛི་ཁྱེད་རང་འདི་འདྲ་གསུང་མ་གནང་དང༌། ད་ཆ་ངེད་གཉིས་གཉེན་སྒྲིག་བྱས་ཟིན་པའི་བཟའ་ཟླ་རེད། བྱས་ཙང་གཅིག་སེམས་གཅིག་ལ་གཏད་དེ་མི་གཅིག་སེམས་གཅིག་ལྟ་བུ་བྱེད་དགོས་པ་ལས། ཁྱོད་ཀྱི་དང་ཡང་ན་ངའི་ཟེར་ནས་དབྱེ་འབྱེད་དགོས་དོན་རྩ་བ་ནས་མེད། བྱས་ཙང་ད་ནས་བཟུང་ཐ་ན་ཁབ་སྐུད་ཙམ་གྱི་དངོས་པོ་ཞིག་ཡིན་ནའང༌། ངེད་གཉིས་ཀྱི། ཞེས་ཤོད་དགོས་པ་ལས། ངའི་དང༌། ཁྱོད་ཀྱི། ཞེས་གཏན་ནས་ཤོད་མི་ཆོག་ཅེས་བཤད་པས་ཁྱོ་གས་ཀྱང༌། དངོས་གནས་ཁྱེད་རང་གིས་གསུངས་པ་ལྟར་རེད། ད་ནས་བཟུང་དེ་རང་ཞུ་ཆོག ཅེས་ཁས་བླངས་པ་རེད། དེ་ནས་ཅུང་ཟད་རྗེས་ཁྱོ་ག་དེ་ཁྲུས་ཁང་ནང་དུ་སོང་སྟེ་དུས་ཡུན་ཅུང་ཙམ་འགོར་བ་ན། བཟའ་ཟླས་ཁོང་ལ། ཁྱེད་རང་ག་རེ་གནང་གི་ཡོད་དམ། ཞེས་དྲིས་པར་ཁྱོ་ག་དེས་ལམ་སང༌། ང་ཨ་ར་་་་མ་རེད། ངས་ང་རང་གཉིས་ཀྱི་ཨ་ར་གཞར་བཞིན་ཡོད། ཅེས་ལབ་པ་རེད།
གྲི་གང་བྱུང་མ་གཡུགས།
ཕུར་བུ་རྡོ་རྗེས་བསྡུས།
གནའ་སྔ་མོའི་དུས་སུ་རྣམ་ཀུན་དཔའ་དང་བློ་ཁོག་ཡོད་མདོག་མདོག་བྱེད་མཁན་གྱི་གྲི་རིང་ཐོགས་པའི་མི་གཉིས་རྒྱག་རེས་ཤོར་བ་རེད། སྐབས་དེར་གཉིས་ཀས་གྲི་རིང་ཤུབས་ལས་ཕྱུངས་ཏེ། ཁྱོད་ཤི་དང་ཡང་ན་ང་གསོན་གྱིས་གྲི་གཡུག་རེས་བྱས་ཏེ་དམར་འཛིང་དྲག་པོ་བྱས། ཕན་ཚུན་གྲི་གཡུག་རེས་དུས་ཡུན་གང་ཙམ་ཞིག་བྱས་རྗེས་མི་གཅིག་གིས་གཅིག་ཤོས་ཀྱི་གདོང་ལེན་མ་ཐུབ་སྟེ། རིམ་བཞིན་ཕྱིར་བཤོལ་བྱེད་ཀྱིན་བྱེད་ཀྱིན་ལ་མི་གཞན་དེར། ཝ་ཡེ། གྲི་གང་བྱུང་མ་གཡུགས་མ་གཏོགས་ངའི་མིག་ལ་ཐེབས་པ་འདུག་ག ཞེས་བརྗོད་པ་རེད།
ངའི་ཕག་པས་ནོར་འདུག
བསྟན་འཛིན་བཟང་མོ།
སྤོ་སྤོ་དཀོན་མཆོག་ཚེ་རིང་གི་ཕག་པ་ཞིག་གློ་བུར་དུ་རླངས་འཁོར་གྱིས་བརྫིས་པ་རེད། སྐབས་དེར་སྤོ་སྤོ་དཀོན་མཆོག་ཚེ་རིང་གིས་ཧང་སངས་སངས་ངང་ནས། འོ་ཛི་ངའི་ཕག་པ་རླངས་འཁོར་གྱིས་བརྫིས་སོང༌། ཞེས་སྐད་ཅོར་ཆེན་པོ་བརྒྱབ་པས། རླངས་འཁོར་གཏོང་མཁན་གྱི་ཁ་ལོ་པ་དེ་ལམ་སང་མར་བབས་ཡོང་སྟེ་སྐད་ཤུགས་ཆུང་ངུས། པཱ་ལགས། དངོས་གནས་བྱས་ན་ཁྱེད་རང་གི་ཕག་པས་ནོར་འདུག ཡིན་ནའང་ངས་ཁྱེད་རང་ལ་སྒོར་བཅུ་སྤྲད་ཆོག་ཅེས་ཟེར་ནས་སྒོར་བཅུ་སྤྲད་པ་རེད། སྐབས་དེར་གྲོང་མི་གཅིག་གིས་དེ་དག་མཐོང་རྗེས་སེམས་ཀྱིས་མ་བཟོད་པར། སྤོ་སྤོ་དཀོན་མཆོག་ཚེ་རིང་ལགས། ཁྱེད་ཀྱིས་དགོངས་པ་ཡག་པོ་བཞེས་གནང་དང༌། ཁྱེད་ཀྱི་ཕག་པ་རླངས་འཁོར་གྱིས་བརྫིས་ནས་བསད་པར་སྒོར་བཅུ་ལས་མ་སྤྲད་པ་དཔེ་སྲིད་ཀྱི་མ་རེད། ཅེས་བརྗོད་པར། སྤོ་སྤོ་དཀོན་མཆོག་ཚེ་རིང་གིས་དགའ་སྤྲོའི་རྣམ་པ་དང་བཅས། དེ་རིང་བདག་ལ་ཁེ་བཟང་རག་བྱུང༌། དངོས་གནས་བྱས་ན་ངའི་ཕག་པས་ནོར་འདུག ཅེས་བཤད་པས་གཡས་གཡོན་གྱི་གྲོང་མི་ཚང་མ་གད་མོ་རང་དབང་མེད་པར་ཤོར་རོ། །
མཱ་ཅང་མཁས་པའི་རྒྱལ་པོ།
བསྟན་འཛིན་བཟང་མོ།
སྔོན་རྒྱལ་པོ་ཞིག་མཱ་ཅང་རྒྱག་རྒྱུར་ཤིན་ཏུ་དགའ་པོ་ཡོད་ལ་མཁས་པོ་ཡང་ཡོད། ཉིན་གཅིག་རྒྱལ་པོས་ཡུལ་འདིར་མཱ་ཅང་མཁས་ཤོས་རང་ཉིད་ཡིན་པས། ངས་ཚོང་པ་འབྱོར་ལྡན་ཁག་ཅིག་དང་མཉམ་དུ་མཱ་ཅང་བརྒྱབ་ནས་རྒྱན་ཆེན་པོ་བཙུགས་ན། ང་ལ་ཁོ་ཚོའི་དཔལ་འབྱོར་ཚང་མ་ཐོབ་ཐུབ་བསམས་ནས་རང་གི་བློན་པོ་རྣམས་ལ། རང་རེའི་རྒྱལ་ཁབ་ནང་འབྱོར་ཕྱུག་ཚོའི་དཔལ་འབྱོར་ཚང་མ་ང་ལ་ཐོབ་པ་བྱ་རྒྱུ་ཡིན། བྱས་ཙང་ཁྱོད་ཚོས་འབྱོར་ཆེན་མཱ་ཅང་རྒྱག་རྒྱུར་དགའ་ལ་མཁས་པ་སུ་ཡོད་འདིར་སྐད་བཏང་ཐུབ་ན་བྱ་དགའ་སྤྲོད་རྒྱུ་ཡིན་ཞེས་བཀའ་བཏང༌། ཉིན་ཤས་རྗེས་བློན་པོ་ཞིག་གིས་སྤྲང་པོ་གོས་ཧྲུལ་ཞིང་ཤ་རིད་པ་ཞིག་ཁྲིད་ནས། རྒྱལ་པོ་རིན་པོ་ཆེས་བཀའ་གནང་བ་བཞིན་མཱ་ཅང་མཁས་ཤོས་དེ་སྐད་བཏང་ཡོད་ཅེས་སྙན་སེང་ཞུས། དེའི་རྗེས་རྒྱལ་པོས་སྤྲང་པོ་ལྟ་བུའི་མི་དེ་གཟིགས་མ་ཐག ཁོ་སྤྲང་པོ་ཞིག་མཱ་ཅང་མཁས་པ་རེད་ཅེས་འདིར་ཁྲིད་ཡོང་བ་དཔེ་མི་སྲིད་པ་རེད། ཅེས་རབ་ཏུ་ཁྲོས། སྐབས་དེར་བློན་པོ་དེས་སྐད་ཆུང་ངུས། འདི་ནི་རང་རེའི་རྒྱལ་ཁབ་ནང་གི་དཔལ་འབྱོར་ཆེ་ཤོས་དེ་རེད། ཡིན་ནའང་མཱ་ཅང་ཤིན་ཏུ་མཁས་པའི་དབང་གིས་ད་ལྟ་འདི་འདྲ་ཆགས་པ་རེད། ཅེས་ཞུས་པར་རྒྱལ་པོ་མཱ་ཅང་མཁས་པ་དེ་ཅི་བྱ་གཏོལ་མེད་དུ་ལུས་སོ། །
མི་ཁ་ཆེ་རེད།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ཧིནྡུའི་ཆོས་ལུགས་ཀྱི་བུ་མོ་ཞིག་དང་ཁ་ཆེའི་ཆོས་ལུགས་ཀྱི་བུ་ཞིག་ཕན་ཚུན་བརྩེ་དུང་ཆེན་པོས་དགའ་རོགས་ཆགས་ཏེ། བུ་མོ་དེས་མོ་རང་གི་ནང་མི་ལ་བུ་དེའི་མཉམ་དུ་ཆང་ས་རྒྱག་དགོས་ལབ་སྟེ། བུ་དེ་ཡག་པོ་ཡོད་ལུགས་སྐོར་འགྲེལ་བཤད་བརྒྱབ་སྟབས། བུ་མོའི་ཕས་རང་གི་བུ་མོའི་འདོད་བློ་དང་བསྟུན་ཏེ་ཆང་ས་རྒྱག་རྒྱུ་ཁས་ལེན་གནང་བ་རེད། བུ་དེ་ཆོས་ལུགས་ཁ་ཆེ་ཡིན་པའི་རྒྱུ་མཚན་གྱི་མ་རྒན་ཅུད་ཟད་མ་དགའ་བར། ང་ཚོའི་བུ་མོ་བུ་དེ་དང་ཆང་ས་བརྒྱབ་ན་ཡག་པོ་ཡོད་པ་མ་རེད། གང་ཡིན་ཟེར་ན་བུ་དེ་ནི་ཁ་ཆེ་རེད། ཅེས་ལབ་པར་བུ་མོའི་ཕས། གང་ཡོད་པ་མ་རེད། བུ་དེ་ཁ་ཆེ་ཡིན་ན་ཡིན། དེ་མིན་སྣ་ཆེན་ཡིན་ནའང་ཡིན། བུ་མོ་མོ་རང་ལ་འགྲིག་གི་རེད་ལབ་སྟེ། མ་རྒན་དེས་ཅི་བཤད་འདི་བཤད་མེད་པ་བཟོས་པ་རེད།
བྱ་དགའ་ཨང་དང་པོ་དང་གཉིས་པ་ཐོབ་པ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ཉིན་གུང་ཆུ་ཚོད་དང་པོ་ཙམ་གྱི་དུས་ཚོད་ཅིག་ལ་དུད་ཚང་ཞིག་གི་ནང་དུ་རྐུན་མ་ཞིག་འཛུལ་ཏེ། ཅ་ལག་རྩ་ཆེན་ཆུང་ཆུང་ཞིག་ཡོད་པ་དེ་བརྐུས་ནས་བྲོས། བདག་པོས་རྐུན་མ་མཐོང་སྟེ་རྗེས་འདེད་བཏང་ནས་
བརྒྱུགས་སྟབས། རྐུན་མ་དེ་ཐང་ཆེན་ཞིག་ལ་མི་མང་པོ་རྒྱུག་ཤར་འགྲན་བསྡུར་བྱེད་བཞིན་ཡོད་པ་དེའི་དཀྱིལ་དུ་བྲོས། བདག་པོས་ཁོ་པོའི་རྗེས་སུ་བརྒྱུགས། རྐུན་མ་དེ་ཤིན་ཏུ་དངངས་སྐྲག་ངང་མགྱོགས་པོ་བྲོས་ཀྱང་བདག་པོས་རྗེས་ཟིན་ཏེ་འཇུ་གྲབས་བྱེད་སྐབས། རྒྱུག་ཤར་གློད་མཁན་དེ་ཚོས་མཐོང་སྟེ་རྐུན་མ་དེ་འཛིན་མ་བཅུག སྦྱིན་བདག་དེ་ཁོང་ཁྲོ་ལངས་ནས། མི་འདི་རྐུན་མ་རེད། ཅེས་ལབ་ཀྱང་མ་ཕན་པར་རྒྱུག་ཤར་གློད་མཁན་ཚོས་རྐུན་མ་ཡིན་ནའང་འདྲ། ཇག་པ་ཡིན་ནའང་འདྲ། གང་ལྟར་ད་ལྟ་ང་ཚོ་རྒྱུག་ཤར་གློད་མཁན་ལ་ཁྱད་པར་ག་རེ་ཡོད་རེད་དམ། ཞེས་ལབ་སྟེ་འཇུ་བཟུང་བྱེད་མ་བཅུག་པས། བདག་པོ་དེས་ལན་གང་ཡང་སྤྲད་རྒྱུ་མ་རག་པར་རྐུན་མ་དེའི་རྗེས་ལ་ཧ་ཅང་མགྱོགས་པོ་བརྒྱུགས་ཏེ་རྗེས་ཟིན་གྲབས་བྱེད་སྐབས། ཁོང་ཚོ་གཉིས་རྒྱུག་ཤར་གློད་མཁན་ཚོའི་སྔོན་ལ་སླེབས་ཏེ། མི་མང་པོས་ཁོང་ཚོ་གཉིས་ཀ་བཟུང་ནས་རྐུན་མ་ལ་བྱ་དགའ་ཨང་དང་པོ་དང་སྦྱིན་བདག་ལ་ཨང་གཉིས་པ་སྤྲད་པ་རེད།
གུང་གསེང་ཟེར་བའི་སློབ་ཕྲུག་གཅིག
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
གུང་གསེང་ཟེར་བའི་སློབ་ཕྲུག་གཅིག་འཛིན་གྲྭ་ལྔ་པའི་ནང་གསར་དུ་འཛུལ། སློབ་ཕྲུག་དེའི་མིང་ལ་གུང་གསེང་ཟེར་བ་རྒན་ལགས་མ་གཏོགས་སུས་ཀྱང་ཤེས་མཁན་མེད། རྒན་ལགས་ཀྱིས་སློབ་ཕྲུག་ཚོ་རིམ་པས་སོ་སོའི་མིང་བོས་ཏེ་ཡིག་རྒྱུགས་གཏོང་སྐབས་གུང་གསེང་ཟེར་བའི་སློབ་ཕྲུག་དེའི་རིམ་པར་སླེབས་སྐབས། ཡ་་་་ད་གུང་གསེང་ཡིན་ད། ཞེས་ལབ་པར་སློབ་ཕྲུག་ཚོས་ད་རིང་གུང་གསེང་སྔ་པོ་བཏང་སོང་བསམས་ནས་དགའ་ཐག་ཆོད་དེ་ལམ་སང་ཕྱིར་བརྒྱུགས། རྒན་ལགས་དེས་གུང་གསེང་བཏང་བ་ཡིན་ཞེས་བརྗོད་མེད་ཅེས་ལབ་ཀྱང་སློབ་ཕྲུག་ཚོས་ཉན་ལོང་མེད་པར་ཕྱིར་ཐོན་ཟིན། ཉིན་རྗེས་མ་འཛིན་གྲྭ་ཚོགས་པ་དང་རྒན་ལགས་དེས། དེ་རིང་ངས་གུང་གསེང་གི་མིང་བརྗེ་པོ་བརྒྱབ་ནས་ཚེ་རིང་ཞེས་བཏགས་པ་ཡིན། བྱས་ཙང་དེ་རིང་ནས་བཟུང་ཚེ་རིང་ཞེས་ལབ་ན། གུང་གསེང་གི་མིང་ཡིན་པ་ཧ་གོ་བ་བྱེད་དགོས། ཞེས་གསུངས། དེ་ནས་སྔར་བཞིན་སློབ་ཕྲུག་ཚོའི་མིང་རིམ་པས་འབོད་ཀྱིན་ཡིག་རྒྱུགས་གཏོང་སྐབས་མིང་བརྗེ་པོ་བརྒྱབ་ཟིན་པའི་སློབ་ཕྲུག་དེའི་མིང་རིམ་པར་སླེབས་སྐབས། རྒན་ལགས་ཀྱིས། ད་ཚེ་རིང་ཡིན་ད། ཅེས་ལབ་པ་དང་སློབ་ཕྲུག་དེ་ཚོས་གུང་གསེང་གི་མིང་བརྗེ་པོ་བརྒྱབ་ཟིན་པ་གོ་སྟེ། དེ་རིང་ཡང་རྒན་ལགས་ཀྱིས་གུང་གསེང་སྔ་པོ་བཏང་སོང་བསམས་ཏེ། དགའ་ཐག་ཆོད་ནས་ལམ་སང་འཛིན་གྲྭ་གྲོལ་བ་རེད།
ལྷ་སར་སྤུན་མཆེད་ཐུག་པར་བསྐྱོད་པ།
བསྟན་འཛིན་བཟང་མོ།
ཐེངས་གཅིག་ཨ་ཁུ་མགོན་པོ་ལྷ་སར་སྤུན་མཆེད་ཐུག་པར་བསྐྱོད། ཁོ་པ་ལྷ་སར་སླེབས་པ་ཙམ་ལས་སྤུན་མཆེད་ཀྱི་སྡོད་གནས་གང་དུ་ཡོད་མེད་ཤེས་ཀྱི་མེད་ལ་ཁ་བྱང་ཡང་མེད། ཨ་ཁུ་མགོན་པོས་ཁྲོམ་གཞུང་གང་
སར་ཕྱིན་པ་མ་ཟད། མི་ཐུག་ཚད་ལ་བུ་པ་སངས་ལགས་བཞུགས་ས་གང་དུ་ཡིན་ནམ། ཞེས་དྲིས་རུང་སུས་ཀྱང་ཤེས་ཀྱི་མེད་པ་རེད། མཐར་ཨ་ཁུ་མགོན་པོ་འུ་ཐུག་ཐབས་ཟད་ཀྱི་རྣམ་པ་དང་བཅས། གྲོང་ཁྱེར་ནང་དུ་ཡོད་པའི་མི་རྣམས་སྤྱང་པོ་ཞེ་དྲག་ཡོད་རེད་ཟེར་བ་གོ་མྱོང༌། འོན་ཀྱང་ངས་བལྟས་ན་སྤྱང་རྒྱུ་གང་ཡང་མི་འདུག ཐ་ན་བུ་པ་སངས་སྡོད་ས་ཡང་ཤེས་ཀྱི་མི་འདུག ཅེས་བརྗོད་པ་ལམ་ཟུར་གྱི་མི་ཞིག་གིས་ཐོས་ནས། ཨ་ཁུ་ལགས། ཁྱེད་རང་ལ་སྤུན་མཆེད་ཀྱི་ཁ་བྱང་མེད་ན་གྲོང་ཁྱེར་ཆེན་པོ་འདི་ལྟ་བུར་བུ་པ་སངས་ཟེར་བ་མང་པོ་ཞེ་དྲག་ཡོད་པས། ཁྱེད་ཀྱི་སྤུན་མཆེད་བུ་པ་སངས་གང་དུ་ཡོད་སུས་ཤེས་ཐུབ། ཅེས་ལབ་པར་ཁོ་པས། ཨ་ལས་དེ་འདྲ་ཞིག་ཀྱང་མཁྱེན་གྱི་མེད་དམ། ཞེས་ལན་སློག་པས་ཁོ་པ་ངོ་ཚ་ཐག་ཆོད་དེ་ལུས་སོ། །
སྐྱེས་རབས་དཔག་བསམ་འཁྲི་ཤིང༌།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
སྨན་ཧ་ཅང་དཀོན་པའི་ལུང་པ་གཅིག་ལ་མི་ཞིག་ཉིན་མང་པོའི་རིང་མཚན་མོ་ཆུ་ཚོད་དང་པོ་གཉིས་པའི་བར་གཉིད་མ་ཁུག་པར་དཀའ་ངལ་འཕྲད་ཀྱི་ཡོད་པ་མ་ཟད། སྨན་ཡང་ཟ་རྒྱུ་མ་རྙེད་སྟབས། རོགས་པ་མི་རྒན་ཞིག་གིས་དེབ་ཀློགས་དང་ག་ལེར་གཉིད་ཁུག་གི་རེད། ཅེས་ལབ་པར་མི་དེས་སྐད་ཆ་དེ་ཉན་ཏེ་མཚན་མོ་ཉལ་རན་ཁར་སྐྱེས་རབས་དཔག་བསམ་འཁྲི་ཤིང་བལྟས་པ་རེད། དེབ་དེ་ཧ་ཅང་སྙན་པོ་བྱུང་སྟེ་རིམ་པས་སྐྱེས་ཕྲེང་ཁ་ཤས་ལྟ་སྐབས་ནམ་ལངས་ཟིན། རོགས་པ་མི་རྒན་དེས་མདང་དགོང་དེབ་ཀློག་པ་དེས་གཉིད་ཁུག་རྒྱུར་ཕན་ཐོགས་བྱུང་སོང་ངམ། ཞེས་དྲིས་པར་མི་དེས་ཕན་ཐོགས་རྒྱུ་ཕར་བཞག་གནོད་བསྐྱལ་བྱུང༌། དེབ་དེ་སྙན་ཐག་ཆོད་ནས་མཚན་གང་གཉིད་ཁུག་བཅུག་མ་བྱུང་ལབ། རྒད་པོ་དེའི་བསམ་པར་དེབ་དེ་སྙན་པོ་ཞིག་ཡོད་པ་འདྲ་བསམས་ཏེ། ཁོ་རང་གིས་ཡང་ཉལ་རན་ཁར་གཅིག་བལྟས་པས་སྙན་ཐག་ཆོད་དེ་མཚན་གང་དེབ་དེ་ཀློག་གིན་བསྡད་དོ། །
དེ་ལྟ་ལོ་མང་པོའི་སྔོན་ནས་ཡོད་མ་རེད།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
རྒྱ་ནག་རི་བོ་རྩེ་ལྔར་གནས་སྐོར་འགྲོ་མཁན་བཟའ་ཟླ་གཉིས་མི་མང་རླངས་འཁོར་ནང་སོང་བས། རླངས་འཁོར་དེ་འབབ་རིལ་ཤོར་ཏེ་ཁྱོ་ག་དེ་དྲན་མེད་དུ་བརྒྱལ། སྐྱེ་དམན་དེར་ཉེན་ཚབས་གང་ཡང་མ་བྱུང་སྟབས་ཁྱོ་
ག་སྨན་ཁང་དུ་འཁྱེར་ཏེ་ཛ་དྲག་སྡེ་ཚན་ནང་བསྐྱལ། མོ་རང་སེམས་འཚབ་ངང་ཛ་དྲག་སྡེ་ཚན་གྱི་སྒོ་འགྲམ་དེར་སྨན་པ་སྒུག་ནས་བསྡད། སྐར་མ་ཉི་ཤུ་ཙམ་གྱི་མཚམས་ལ་སྨན་པ་ཕྱིར་ཐོན་པ་དང་ལམ་སང་སྐད་ཆ་དྲིས་པར། སྨན་པས་སྲོག་ལ་ཉེན་ཁ་གང་ཡང་མི་འདུག ཡིན་ནའང་ཟེར་ནས་བཤད་རྒྱུ་ཚབས་ཆེན་ཞིག་ཡོད་ཀྱང་བཤད་མ་ཐུབ་པའི་བཟོ་འདྲ་བྱས་ཏེ་འཚེར་སྣང་གི་རྣམ་པ་ཞིག་བསྟན་པར། སྐྱེ་དམན་དེ་སེམས་ཁྲལ་ཆེན་པོའི་ངང༌། སྨན་པ་ལགས་ག་རེ་འདུག་ནའང་ང་ལ་གསུངས་རོགས་གནང་དང༌། ཞེས་ལབ་པར་སྨན་པ་དེས། མགོ་བོ་གོག་ཚར་འདུག ཅེས་ལབ་པར་སྐྱེ་དམན་དེས་སྐད་ཆ་དེ་གོ་མ་ཐག་སྐད་ཆེན་པོས་ངུས་ཏེ། མགོ་བོ་གོག་ཚར་ན་མི་གསོན་པོ་ཞིག་ག་པར་ཡོང་གི་རེད་དམ། ཞེས་ཟེར་གྱིན་སྐད་ཆེན་པོས་ངུས། སྨན་པས་ལམ་སང༌། མ་རེད་སྟེང་གི་མགོ་བོ་གོག་འདུག་ལབ་ཀྱི་མེད། འོག་གི་མགོ་བོ་ཁོ་གོག་འདུག་ཟེར་གྱི་ཡོད། ཅེས་ལབ་པར་སྐྱེ་དམན་དེ་ངུ་བཞིན་ཡོད་ནའང་ལམ་སང་དབང་མེད་གད་མོ་ཞིག་ཤོར་ཏེ། དེ་ལྟ་ལོ་མང་པོའི་སྔོན་ནས་ཡོད་མ་རེད། ཅེས་ལབ་ནས་འཛུམ་དམུལ་དམུལ་ངང་ཞུས་པར། སྨན་པ་དེ་ནི་ངོའང་ཚ་ལ་གད་མོ་ཡང་ཤོར་དགོས་པ་བྱུང་བ་རེད།
གད་མོ་བགད་པ་དེ་འཕྲོད་བསྟེན་རེད།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ཐེངས་གཅིག་འཛིན་གྲྭ་འཚོགས་བཞིན་པའི་སྐབས་ལ་དགེ་རྒན་ཞིག་གིས་རང་གི་སློབ་ཕྲུག་ཚོ་ལ། སློབ་ཕྲུག་ཚོ། གད་མོ་མང་པོ་བགད་རྒྱུ་དེ་འཕྲོད་བསྟེན་ཞིག་རེད་ད། ཞེས་གསུངས་སྟབས་ལམ་སང་སློབ་ཕྲུག་ཚང་མས་རྒན་ལགས་ཀྱིས་བཀའ་མོལ་ག་རེ་གསུངས་ནའང་གད་མོ་བགད། སྐུ་གཟུགས་འགུལ་བསྐྱོད་ཏོག་ཙམ་གནང་ནའང་གད་མོ་བགད། ཕྲུ་གུ་ཁ་ཤས་ལ་ཉེས་རྡུང་བཏང་ཡང་གད་མོ་བགད། གད་མོ་བགད་མི་དགོས་ལབ་ཀྱང་གད་མོ་བགད་པར་བརྟེན། རྒན་ལགས་འུ་ཐུག་ནས་འཛིན་གྲྭའི་ཕྱི་ལོགས་ལ་ཐོན་དགོས་བྱུང་བ་རེད།
ཆུ་ཚོད་གཉིས་ཉན་ཡང་ཅི་གང་གོ་རྒྱུ་མི་འདུག
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
སྤྱང་མདོག་དང་གྲུང་མདོག་ཁ་པོ་ཡོད་པའི་རྒྱལ་ཁབ་གཞན་གྱི་གསང་ཉུལ་བ་ཞིག་བོད་ཀྱི་ལུང་ཁུག་ཅིག་ནང་སླེབས་ཏེ། ཡར་མར་ལྟ་གིན་འགྲོ་བཞིན་པའི་སྐབས། མི་མདོག་ངན་གྱོན་གོས་སྐྱོ་པོ་ཞིག་ལས་གྱོན་རྒྱུ་
མེད་པ་ཞིག་གྱང་ངོས་ལ་ཁ་ཕྱོགས་ནས་གཅིག་གོ་གི་ཡོད་པ་ལྟར་ཉན་གྱིན་བསྡད་ཡོད་པ་མཐོང་བས། གསང་ཉུལ་བ་དེས་ལམ་སང་དེར་སོང་ནས་ཉན་ཡང་གང་ཡང་མ་ཐོས་པར་བརྟེན་མི་མདོག་ངན་དེར། ཁྱེད་རང་ག་རེ་ཉན་གྱི་ཡོད་དམ། ཞེས་དྲིས་པར་མི་དེས་སྐད་ཆ་ཅི་ཡང་མ་བཤད་པར་མཛུབ་མོ་མཆུ་ཏོར་བཞག་ནས་ཁ་བཙུམ་ཟེར་བའི་བརྡ་སྤྲད་དེ་སྔར་བཞིན་ཉན་གྱིན་བསྡད། གསང་ཉུལ་བ་དེས་མི་འདིས་ཉན་སྟངས་ལ་བལྟས་ན་ཏན་ཏན་གསང་བའི་གནས་ཚུལ་གལ་ཆེན་ཞིག་གོ་གི་ཡོད་པ་ཐག་ཆོད་བསམས་ཏེ། གྱང་ངོས་ལ་རྣ་བ་གཏད་དེ་སྐར་མ་དྲུག་ཅུ་ཙམ་ཏག་ཏག་ཉན་ཡང་གོ་རྒྱུ་ཚོར་རྒྱུ་ཅི་ཡང་མ་བྱུང་སྟབས་ཤིན་ཏུ་ཁོང་ཁྲོ་ལངས་ནས། ངས་ཆུ་ཚོད་གཅིག་ཏག་ཏག་ཉན་ཡང་གོ་རྒྱུ་ཐོས་རྒྱུ་གང་ཡང་མི་འདུག ཅེས་སྐད་ཤུགས་ཆེན་པོའི་ངང་མི་མདོག་ངན་དེར་ལབ་པར། མི་མདོག་ངན་དེས་དེ་བས་སྐད་ཤུགས་ཆེན་པོས། ངས་ཆུ་ཚོད་གཉིས་ཏག་ཏག་ཉན་པ་ཡིན། ད་དུང་གང་ཡང་གོ་རྒྱུ་མི་འདུག ཅེས་ལབ་པས་གསང་ཉུལ་བ་དེ་ནི་ཁོང་ཁྲོ་དང་ངོ་ཚས་ཅི་ལབ་འདི་ལབ་མེད་པར་ལུས་སོ། །
སྔོན་པོ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
གྲོང་གསེབ་ཀྱི་མི་ཞིག་གྲོང་ཁྱེར་ནང་སླེབས་ཏེ་མགྲོན་ཁང་ཞིག་ལ་བསྡད། སྐབས་དེར་ཁོ་རང་གློག་བརྙན་ལྟ་འདོད་བྱུང་སྟེ། གཟུགས་བརྙན་འཁོར་ཐག་གླ་གཏོང་བྱེད་སའི་ཚོང་ཁང་ཞིག་ལ་ཕྱིན་ཏེ། ང་ལ་འཁོར་ཐག་ཁ་ཤས་ཤིག་གཡོར་དང་ལབ། ཚོང་པ་དེས་གཟུགས་མཐོང་འཁོར་ཐག་བཞི་གཡར་ཏེ། འདི་ནས་གསུམ་འཁྲུག་འཛིང་རྒྱག་རྒྱུའི་འཁོར་ཐག་རེད། གཅིག་སྔོན་པོ་རེད། ཅེས་མི་དེའི་ལག་ཏུ་སྤྲད། གྲོང་གསེབ་པ་དེས། འོ་ན་འཁོར་ཐག་སྔོན་པོ་འདི་ཅིག་སྟོན་ཙམ་གནང་རོགས་ལབ་པར། བདག་པོས་བརྙན་འཕྲིན་ནང་འཁོར་ཐག་སྔོན་པོ་དེ་བསྟན་པ་དང་སྦྲགས། བརྙན་འཕྲིན་ངོས་སུ་བུ་དང་བུ་མོ་སྐྲ་སེར་པོ་ཡིན་ལ་ཤ་མདོག་ཀྱང་སེར་པོ་དམར་རྗེན་མ་རྐྱང་རྐྱང་ཤར་སྟབས་གྲོང་གསེབ་པ་དེ་ཁོང་ཁྲོ་ལངས་ཏེ། འོ་ཛི་ཁོང་་་་ཁྱེད་ཀྱིས་ང་མགོ་བསྐོར་བཏང་ནས་ག་རེ་གནང་གི་ཡིན། ད་གིན་སྔོན་པོ་རེད་ལབ་མེད་དམ། ད་ལྟོས་དང་སེར་པོ་རྐྱང་རྐྱང་ཤར་ཡོང་གི་འདུག ཅེས་རྙོག་གྲ་བཤད་པར་ཚོང་བདག་དེ་ནི་རང་དབང་མེད་པར་གད་མོ་རྒྱུན་རིང་ཤོར་དགོས་གྱུར་ཏེ་བརྗོད་གསལ། གྲོང་གསེབ་པ་ནི་གྲོང་གསེབ་པ་རང་རེད། ཁག་ཁྱོན་ནས་མེད། ཅེས་ལབ་སྟེ་སྔོན་པོ་ཟེར་བའི་གསང་བའི་མིང་ཚིག་དེའི་གོ་དོན་རྣམས་གསལ་བཤད་བྱས་པས། གྲོང་གསེབ་པ་དེས་གཞི་ནས་སྔོན་པོ་ཞེས་པའི་གོ་དོན་ཤེས་རྟོགས་ཐུབ་པ་བྱུང་བས་ཁོ་རང་ཡང་ངོ་ཚ་ཞིང་གད་མོ་མ་ཤོར་རང་ཤོར་བྱུང་ངོ༌། །
ཁ་འདོན།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
བླ་མ་ཞིག་གིས་རྒྱུན་དུ་ཞོགས་ལྟར་ཞལ་དང་སྤྱན་བཙུམས་ཏེ། ཙོག་ཙོག་གནང་ནས་ཆུ་ཚོད་ཕྱེད་ཀ་ལྷག་ཙམ་བཞུགས་ཀྱི་ཡོད། ཉིན་གཅིག་ཕྲུ་གུ་ཞིག་གིས་བླ་མ་ཁོང་དེ་ལྟར་གནང་བ་མཐོང་བ་དང་སྦྲགས། བླ་མ་ལགས། 
ཁྱེད་རང་དེ་འདྲ་བཞུགས་ནས་ག་རེ་གནང་གི་ཡོད་དམ། ཅེས་དྲིས་པར་བླ་མ་དེས། ང་ཁ་འདོན་བྱེད་ཀྱི་ཡོད། ཅེས་གསུངས་པར། ཡང་ཕྲུ་གུ་དེས། ཨ་ལས་ཞལ་བཙུམས་ནས་བཞུགས་ན་གང་འདྲ་ཟེར་ཞལ་འདོན་གནང་གི་ཡོད་དམ། ཞེས་དྲིས་པར་བླ་མ་དེ་ཅི་ཟེར་འདི་ཟེར་མི་ཤེས་པར་ལུས་སོ། །