ཤེས་ཡོན་སྡེ་ཚན།

སྲོལ་རྒྱུན་ཤེས་ཡོན་ཚན་པ།

སྲོལ་རྒྱུན་ཤེས་ཡོན་ཚན་པ་འདི་ཉིད་ཤེས་རིག་ཚོགས་ཆེན་ཐེངས་བཞི་པའི་གྲོས་ཆོད་དགོངས་དོན་བཞིན་ཕྱི་ལོ་ ༢༠༠༣ ཟླ་ ༡༡ ཚེས་ ༡ ཉིན་གསར་འཛུགས་གནང་། ཚན་པ་འདི་འཛུགས་དགོས་པའི་དམིགས་ཡུལ་ནི། བཙན་བྱོལ་བོད་མིའི་སློབ་གྲྭ་ཁག་ཏུ་བོད་ཀྱི་སྐད་ཡིག་གཙོས་པའི་སྲོལ་རྒྱུན་རིག་གཞུང་རྒྱུན་འཛིན་ཡོང་ཐབས་དང་། བོད་ཡིག་བརྒྱུད་ལམ་ཐོག་ཡོད་པའི་སློབ་ཚན་ཡོངས་རྫོགས་ཡར་རྒྱས་ཚགས་ཚུད་ཡོང་བར་དམིགས་བསལ་ཤུགས་སྣོན་དང་། རིགས་ལམ་འདུ་འཛོམས་མཚོན་པའི་སློབ་ཕྲུག་གི་རིགས་ལམ་ཤེས་ཚད་གོང་མཐོར་གཏོང་ཐབས་ཐད་ལ་ནུས་ཤུགས་གོང་འཕེལ་གཏོང་རྒྱུ་བཅས་ཡིན།

ཚན་པ་འདིའི་ལས་འགན་གཙོ་བོ་ནི།

    • ༡།  ཤེས་ཡོན་སྲིད་བྱུས་ཀྱི་དགོངས་དོན་གཞིར་བཟུང་གཏན་ཉིན་སློབ་གྲྭ་ཁག་གི་གཞི་རིམ་གོང་འོག་བར་གསུམ་གྱི་བོད་ཡིག་དགེ་རྒན་དང་། ལྟ་གྲུབ་དགེ་རྒན། ཟློས་དགེ སྔོན་དགེ་རྣམས་ལ་སློབ་ཁྲིད་ཐབས་ལམ་དང་འབྲེལ་བའི་ཟབ་སྦྱོང་གོ་སྒྲིག་དང་། དགེ་རྒན་གཞན་རྣམས་ཀྱི་བོད་ཡིག་གནས་ཚད་གོང་མཐོར་གཏོང་ཐབས་དང་འབྲེལ་བའི་ལས་རིམ་གོ་སྒྲིག་ཞུ་རྒྱུ།
    • ༢།   གཏན་ཉིན་སློབ་གྲྭ་ཁག་གི་ཤེས་ཡོན་སྤྱི་དང་། སྔོན་འགྲོ་ནས་གཞི་རིམ་གོང་འོག་བར་གསུམ་སོ་སོའི་དགེ་སློབ་ཀྱི་ལས་འགན་དང་གནས་སྟངས་རྟོག་ཞིབ། ཤེས་ཡོན་དང་འབྲེལ་བའི་མཐུན་རྐྱེན་མཁོ་སྤྲོད་དང་། གསར་འཛུགས། ལྟ་རྟོག་ཞིབ་འཇུག་བཅས་ཀྱི་ལས་དོན།
    • ༣།  དབུས་བོད་སློབ་འཛིན་ཚོགས་ཁྱབ་ཁོངས་སློབ་གྲྭ་ཁག་གི་དགོས་མཁོ་ལ་གཞིགས་པའི་ལྟ་གྲུབ་དགེ་རྒན་དང་། ཟློས་དགེ། བོད་དགེ་བཅས་ཀྱི་བསྐོ་གཞག་རྒྱབ་གཉེར་ཁུངས་གཏོང་ཞུ་རྒྱུ།
    • ༤།  གཏན་ཉིན་སློབ་གྲྭ་ཁག་གི་རིགས་ལམ་འདུ་འཛོམས་འཆར་འགོད་དང་གོ་སྒྲིག་ཞུ་རྒྱུ།
    • ༥།   སྒྲིག་ཞུགས་མ་ཡིན་པའི་རིགས་གཅིག་རྐང་འཛིན་ཉམས་ཞིབ་སློབ་གཉེར་ལས་རིམ་གྱི་འདེམས་རྒྱུགས་དང་རྟོག་ཞིབ། མཇུག་གནོན་ལས་དོན།
    • ༦།   གཞི་རིམ་སློབ་གྲྭ་ཁག་ཏུ་བོད་ཀྱི་སྐད་ཡིག་སློབ་སྦྱོང་ལ་སྐུལ་འདེད་ཆེད་ལོ་རེར་རྒྱལ་ཡོངས་འཛིན་རིམ་སོ་སོའི་ཕུལ་བྱུང་རྩོམ་ཡིག་འདེམས་སྒྲུག་ལས་རིམ་དང་། བོད་ཡིག་ཡིག་རྒྱུགས་བྱ་དགའི་ལས་རིམ། དགའ་ལྡན་ཕོ་བྲང་བྱ་དགའི་ལས་རིམ། བོད་ཡིག་ཡིག་གཟུགས་རྩེ་ཕུད་བྱ་དགའ་སོགས་ཀྱི་ལས་རིམ་གོ་སྒྲིག་དང་འབྲེལ་བའི་ལས་དོན།
    • ༧།   སྲོལ་དེང་ཚན་པ་གཉིས་མཉམ་འབྲེལ་གྱིས་གཏན་ཉིན་སློབ་གྲྭ་ཁག་གི་འཛིན་རིམ་ལྔ་པའི་སྤྱི་རྒྱུགས་དང་། འཛིན་རིམ་བཅུ་པའི་འགོ་ཁྲིད་ཟབ་སྦྱོང་། ཤེས་རིག་ཚོགས་ཆེན། ཕ་མའི་ཚོགས་ཆེན་བཅས་གོ་སྒྲིག་ཞུ་རྒྱུ།
    • ༨།   བྱིས་པའི་ཀློག་རྩལ་ལས་གཞི་འོག་གཏན་ཉིན་སློབ་གྲྭ་ཁག་གི་འཛིན་གྲྭའི་དཔེ་མཛོད་བཟོ་འགོད་དང་འབྲེལ་བའི་ལས་འཆར།

 

Menu