སྐྱག་གཅིན་གཉིས་རྒྱུག་ཤར་འགྲན་སྡུར།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
དུས་རྒྱུན་དུ་སྐྱག་པ་དང་གཅིན་པ་གཉིས་རྒྱུག་ཤར་འགྲན་སྡུར་ཇི་ཙམ་བྱས་ཀྱང་། ག་དུས་ཡིན་ན་ཡང་གཅིན་པ་ཨང་དང་པོ་
ཐོབ་ཀྱི་ཡོད། ཉིན་གཅིག་སྐྱག་པས། ད་ཐེངས་ངས་རིག་པ་ཞིག་བཏོན་ཏེ་རང་ཉིད་ཨང་དང་པོ་ཐོབ་པ་བྱེད་དགོས། ཞེས་བསམ་བཞིན་རང་གི་ཨ་ཞང་དྲུང་དྲུང་ཡིན་པ་རྙང་མའི་སར་སོང་སྟེ། ཨ་ཞང་རྙང་མ་ལགས། ང་ལ་ཕྱག་རོགས་ཤིག་གནང་དང༌། གཅིན་པ་ཁོ་དང་ང་གཉིས་རྒྱུག་ཤར་འགྲན་སྐབས་ག་དུས་ཡིན་ནའང་ཁོ་རང་ལ་ཨང་དང་ཐོབ་པ་ལས་ང་ལ་རྩ་བ་ནས་ཐོབ་འཇུག་གི་མི་འདུག ཅེས་ལབ་པར་རྙང་མས། ལྟས་ངན་སྐྱག་པ་ཁྱོད་ཀྱིས་ཟ་རྒྱུ་རྐྱང་རྐྱང་མ་གཏོགས་གཞན་ཅི་གང་འཇོན་གྱི་མ་རེད། ད་རེས་ཨ་ཞང་ངས་གཅིན་པ་ཁོའི་མཉམ་དུ་རྒྱུག་ཤར་འགྲན་སྡུར་ཞིག་བྱས་ཆོག ཁྱོད་རང་ཡག་པོ་བྱས་ནས་ལྟོས་ཨང༌། ཞེས་ལབ་སྟེ་སོང་བ་རེད། དེ་ནས་གཅིན་པར་རྙང་མས་དེ་རིང་ང་གཉིས་རྒྱུག་ཤར་འགྲན་སྡུར་ཡིན་ད། ཅེས་ལབ་སྟེ་འགྲན་སྡུར་འགོ་བཙུགས་པ་རེད། སྐབས་དེར་རྙང་མས་དབུགས་རིང་ཞིག་དང་ལྷན་དུ་སྐད་ཅོར་ཆེན་པོ་ཞིག སྐྲག་་་སྐྲག་་་རྫུབ། ཟེར་བ་དང་སྦྲགས་རྒྱུགས་པས་རྙང་མ་ནི་གཅིན་པའི་སྔོན་ལ་ཕྱིར་སླེབས་པས། སྐབས་དེར་རྙང་མར་ཨང་དང་པོའི་རྒྱལ་ཁ་དེ་ཐོབ་པས་རང་གི་ཚ་བོ་སྐྱག་པ་དགའ་ཐག་ཆོད་དགོས་བཟོས་པ་རེད།
ཏ་ལི་བྷན་གྱི་འགོ་གཙོ་དང་སྲིད་འཛིན་བྷུཤ
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ཉེ་ཆར་ཏ་ལི་བྷན་གྱི་འགོ་གཙོས་ཨ་རིའི་སྲིན་འཛིན་བྷུཤ་ལ་ཁ་པར་ཞིག་བཏང་སྟེ། ཁྱོད་རང་གིས་ང་གང་སར་འཚོལ་བཞིན་ཡོད་པས་ང་དངོས་གནས་ཐུག་འདོད་འདུག་གམ། ཞེས་དྲིས་པར་བྷུཤ་ཡིས་ཁོང་ཁྲོ་དང་སྦྲགས། ཁྱོད་རང་མི་དངོས་གནས་བློ་ཁོག་ཡོད་མཁན་ཞིག་དང་། འཇོན་ཐང་ཡོད་མཁན་ཞིག་ཡིན་ན། ངའི་མདུན་ཡོང་ནས་དཔའ་དང་འཇོན་ཐང་སྟོན་དང༌། དེ་མིན་སྲིན་བུ་ནང་བཞིན་ཡིབས་ནས་མ་སྡོད། ཅེས་ལབ་པར་ཏ་ལི་བྷན་གྱི་འགོ་གཙོས། ཁྱོད་རང་གིས་ངའི་དཔའ་དང་འཇོན་ཐང་ལ་བལྟ་འདོད་འདུག་ན་ངའི་མཉམ་དུ་ཨ་ལཱ་སར་འགྲོ། ང་ཡི་དཔའ་དང་འཇོན་ཐང་གི་འཁྲབ་གཞུང་ཆ་ཚང་ཁྱོང་རང་གི་མདུན་དུ་བསྟན་ཆོག ཅེས་བཤད་པར་བྷུཤ་ཡིས། ངས་ཁྱོད་རང་གང་མགྱོགས་ཨ་ལཱ་སར་བཏང་ཆོག དེ་ནས་ཁྱོད་རང་གིས་འཁྲབ་གཞུང་དེ་ཚོ་གྲ་སྒྲིག་བྱས་ནས་སྒུགས་ཨ། ང་མགྱོགས་པོ་སླེབ་ཡོང༌། ཞེས་བཤད། ཏ་ལི་བྷན་གྱི་འགོ་གཙོས། ང་ཨ་ལཱ་སར་གཏོང་རྩིས་ཡོད་པ་ཤིན་ཏུ་ཐུགས་རྗེ་ཆེ། ང་ནི་གང་མགྱོགས་འགྲོ་འདོད་འདུག ང་མ་འགྲོ་གོང་ད་དུང་འཁྲབ་གཞུང་ཁ་ཤས་ཤིག་བསྟན་རྩིས་ཡོད་པས་ཐུགས་སྤྲོ་པོ་བྱས་གཟིགས་ཨང༌། དུས་ཚོད་མང་པོ་མེད་ཨ་ལཱ་སར་མགྱོགས་པོ་ཐུག་ཡོང༌། ཞེས་ལབ་སྟེ་ཁ་པར་མཚམས་འཇོག་བྱས། བྷུཤ་ཁོང་ཁྲོ་མེ་ལྟར་འབར་ཏེ། ཨ་ལཱའི་ཨ་ཕྲུག་ཁྱོད་ཨ་ལོག་ཅིག་བརྒྱབ་ན་མ་གཏོགས་མ་འོངས་པར་ཨ་རི་ཨ་ལོག་བརྒྱབ་ཉེན་འདུག ཅེས་ལྕོག་རྩེའི་སྟེང་ཁུ་ཚུར་གཞུས།
ཁ་མ་གཏོགས་ཡོད་པ་མ་རེད།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ཕྲུ་གུ་ཆུང་ཆུང་ཞིག་གིས་ཐ་མག་འཐེན་བཞིན་བསྡད་ཡོད་པ་ཁོ་པའི་ཕས་གཟིགས་ཏེ་ཕྲུ་གུ་དེའི་ཨ་མཆོག་ནས་བཟུང་སྟེ། ཁྱེད་རང་ལ་ཐ་མག་འཐེན་སྟངས་སུས་བསླབས་བྱུང་ངམ། ག་འདྲ་བྱས་ནས་ཤེས་བྱུང༌། ཞེས་
ཚ་འདྲི་བྱས་པར་ཕྲུ་གུ་དེས། པཱ་ལགས་ང་ལ་ཐ་མག་འཐེན་སྟངས་བསྟན་འཛིན་གྱིས་བསླབས་བྱུང༌། ཐ་མག་འཐེན་ན་ཞིམ་པོ་དང་སྣང་བ་སྐྱིད་པོ་ཡོད་རེད་ལབ་བྱུང༌། བྱས་ཙང་ངས་འཐེན་པ་ཡིན། ད་རེས་མ་གཏོགས་རྩ་བ་ནས་འཐེན་གྱི་མིན། པཱ་ལགས་ཐུགས་རྗེས་གཟིགས་ང་མ་བརྡུང་རོགས་གནང༌། ཞེས་ཞུས་པར་པཱ་ལགས་དེས་ཁོང་ཁྲོ་དང་སྦྲགས། ག་རེ། མི་དེའི་སྐད་ཆར་ཉན་རྒྱུ་ག་རེ་ཡོད་རེད། ཁོ་ལ་ཁ་མ་གཏོགས་ཡོད་མ་རེད་གསུངས་གནང་ངམ། ཞེས་ཞུས་པར་པ་ཕ་དེ་ནི་དེ་བས་ཁོང་ཁྲོ་ཆེ་བ་ལངས་ཏེ། ཨ་་་་ག་རེ། ད་བྱས་ན་ཁྱེད་རང་ལ་ཨ་མཆོག་མེད་པ་འདྲ། ག་ཚོད་ལབ་ཀྱང་གོ་རྒྱུ་མི་འདུག ཅེས་གཤེ་གཤེ་བཏང་བར་བུ་དེས། ངའི་ཨ་མཆོག་པཱ་ལགས་ཀྱིས་དམ་པོར་བཟུང་ཡོད་པས་ཡིན་གྱི་རེད། ཅེས་ཞུས་པར་པཱ་ལགས་དེར་གསུང་རྒྱུ་གང་ཡང་མ་རག་པར་ལུས་པ་རེད།
བཙོན་ཁང་ནང་འགྲོ་རྒྱུའི་ལག་འཁྱེར།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
བལ་ཡུལ་དུ་གནས་སྡོད་བོད་མི་ཞིག་གིས་ཨ་རིར་འགྲོ་རྒྱུའི་ལག་ཁྱེར་རྫུན་མ་ཞིག་བཟོས་ཏེ། ཨ་རིའི་གཞུང་ཚབ་ལ་ཕྱིན་ནས་ལག་ཁྱེར་དེ་བསྟན་ནས། ལོ་གཅིག་གི་མཐོང་མཆན་(visa)སྤྲོད་རོགས་ལབ་པར་གཞུང་ཚབ་ཀྱི་མི་དེས། ཁྱེད་རང་གི་ལག་འཁྱེར་འདི་ཨ་རིར་འགྲོ་རྒྱུའི་ལག་འཁྱེར་རེད་མི་འདུག ཅེས་ལབ། ལག་འཁྱེར་བདག་པོ་དེས་ད་དུང་ཨ་རིར་འགྲོ་རྒྱུའི་ལག་འཁྱེར་ཡིན། ཞེས་ཐེངས་མང་ལབ་ཀྱང་ཨ་རིའི་གཞུང་ཚབ་པས་སླར་ཡང་རེད་མི་འདུག་ཅེས་ལབ་པ་རེད། མཐར་ལག་འཁྱེར་རྫུན་མ་བཟོས་ཏེ་འཁྱེར་མཁན་དེ་འུ་ཐུག་སྟེ། འོ་ན་འདི་ཨ་རིར་འགྲོ་རྒྱུའི་ལག་འཁྱེར་མིན་ན་ག་པར་འགྲོ་རྒྱུའི་ལག་འཁྱེར་རེད་དམ། ཞེས་དྲིས་པར་ཨ་རིའི་གཞུང་ཚབ་པ་དེས། འདི་བཙོན་ཁང་ལ་འགྲོ་རྒྱུའི་ལག་འཁྱེར་རེད། ཅེས་ལབ་པར་ཡང་ལག་འཁྱེར་རྫུན་མ་འདི་ནི་ཁྱེད་རང་བཙོན་ཁང་ལ་འགྲོ་རྒྱུའི་ལག་འཁྱེར་མིན་ན་གང་རེད་དམ། ཞེས་ཁོ་པའི་ལག་འཁྱེར་རྫུན་མ་དེའི་སྟེང་ཐམ་ག་དམར་པོ་ཞིག་བརྒྱབ་ནས། ད་ཁྱེད་རང་གིས་ལག་འཁྱེར་འདི་ཁྱེར་ནས་བཙོན་ཁང་ནང་ལོ་གཉིས་བསྡད་ཆོག་པ་ཡོད། ཅེས་ལབ་རྗེས་ཉེན་རྟོག་པས་ཁོ་པ་འཛིན་བཟུང་བྱས་པ་རེད།
གྲྭ་བཙུན་ཚོས་ག་རེ་བྱས་ནས་སྐྲ་བཞར་གྱི་ཡོད།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
རྒྱུན་ལྡན་མི་ཚོགས་མང་པོའི་ཁྲོད་དུ་སྐད་ཆ་འདྲ་མིན་སྣ་ཚོགས་ཡོང་གི་ཡོད་པ་བཞིན། ཉིན་གཅིག་མི་འགའ་ཞིག་མཉམ་དུ་འཛོམས་བསྡད་ཡོད་ས་དེར་མི་གཅིག་གིས། གྲྭ་པ་དང་ཨ་ནེ་
ཚོས་རྒྱུན་དུ་སྐྲ་མར་རིལ་ནང་བཞིན་ག་རེའི་དོན་དུ་བཞར་གྱི་ཡོད་དམ། ཁྱེད་ཚོས་ཤེས་ཀྱི་ཡོད་དམ། ཞེས་ལབ་པར་མི་གཅིག་གིས། དེ་ལས་སླ་པོ་རེད། མི་སྐྱ་ཕོ་མོ་ཚོས་ཁོང་ཚོར་སྣང་བ་མི་འགྲོ་བའི་ཆེད་དུ། གྲྭ་བཙུན་ཚོས་རང་གི་དབུ་སྐྲ་བཞར་དགོས་ཀྱི་ཡོད་པ་རེད། ཅེས་ལབ་པར་མི་གཞན་ཞིག་གིས་ལམ་སང༌། སྐད་ཆ་དེ་དངོས་གནས་འདྲ་ཆགས་པོ་ལབ་སོང༌། གང་ཡིན་ཟེར་ན་དེང་སང་མི་སྐྱ་ཕོ་མོ་མང་པོ་ཞིག་གིས་གྲྭ་པ་དང་ཨ་ནེ་དེ་ཚོར་ཁ་ཞེ་དྲག་གཏོང་གི་འདུག ཅེས་བཤད་པ་རེད།
ནོར་འཁྲུལ་བཟོ་མཁན་ཁྱོད་རེད།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
མཐོ་རིམ་སློབ་གྲྭ་ཞིག་གི་ནང་ལ་སློབ་ཕྲུག་འབོར་ཤོབ་ཚ་པོ་ཞིག་ཡོད་ཅིང་། ག་དུས་ཡིན་ནའང་སློབ་ཕྲུག་ཉམ་ཆུང་ཚོ་ལ་ཐུབ་ཚོད་དང་རྫིག་རྫིག་བྱེད་ཀྱི་ཡོད་པར་བརྟེན་སློབ་ཕྲུག་ཉམ་ཆུང་དེ་ཚོ་འུ་ཐུག་སྟེ། ཉིན་གཅིག་ཁོ་པ་ཚོ་ཁ་མཐུན་ནས་སློབ་ཕྲུག་འབོར་ཤོབ་ཚ་པོ་དེ་ཚུར་བཟུང་སྟེ། གྱོན་གོས་ཆ་ཚང་ཕུད་ནས་མི་མང་དཀྱིལ་དུ་དམར་ཧྲེང་མར་འགྲོ་རུ་བཅུག་པས་མི་མང་ཚོས་ཁོ་པར་འཕྱ་སྨོད་བྱས། སློབ་གྲྭའི་འགན་འཛིན་གྱིས་ཀྱང་ཁོ་པར་ད་ནས་བཟུང་སློབ་གྲྭར་ཡོང་མི་ཆོག ཅེས་གསུངས་པ་རེད། སློབ་ཕྲུག་དེ་ནི་ཤིན་ཏུ་བློ་ཕམ་སྐྱེས་ཏེ། ཐུགས་རྗེ་གཟིགས་ང་སློབ་གྲྭ་ནས་མ་ཕུད་རོགས་གནང༌། ངས་ཉེས་ཆད་ག་རེ་སྒྲུབ་དགོས་ཀྱང་ཞུ་ཆོག ཅེས་རེ་བ་དང་ཞུ་བ་བྱས་པས་འགན་འཛིན་མཆོག་ནས། འོ་ན་ཁྱེད་ཀྱིས་ཉེས་ཆད་སྒྲུབ་ཐུབ་ཀྱི་ཡོད་ན་འགྲིག་གི་རེད། དང་པོ་སློབ་ཕྲུག་ཉམ་ཆུང་ལ་ཐུབ་ཚོད་བཏང་བའི་ཉེས་ཆད་སྒོར་ ༡༠༠༠ དང་། མི་མང་དཀྱིལ་དམར་ཧྲེང་མར་ཕྱིན་པའི་ཉེས་ཆད་སྒོར་ ༥༠༠ སློབ་ཕྲུག་དེ་ཚོས་ཁྱེད་རང་མི་མང་དཀྱིལ་དུ་དམར་ཧྲེང་དུ་འགྲོ་བཅུག་པའི་ཉེས་ཆད་སྒོར་ ༣༠༠ བཅས་འབུལ་དགོས། ཞེས་གསུངས། སློབ་ཕྲུག་དེས། ང་དམར་ཧྲེང་མ་མི་མང་དཀྱིལ་དུ་འགྲོ་འཇུག་མཁན་ཁོང་ཚོ་རེད། དེའི་ཉེས་ཆད་ངས་ག་རེ་བྱས་སྒྲུབ་དགོས་རེད་དམ། དེ་ཁོང་ཚོའི་ནོར་འཁྲུལ་མ་རེད་དམ། ཞེས་ཞུས་པར་འགན་འཛིན་གྱིས། དང་པོ་ནོར་འཁྲུལ་འགོ་འཛུགས་མཁན་དང་ནོར་འཁྲུལ་བཟོ་འཇུག་མཁན་དེ་ཁྱེད་རང་རེད། དེས་མ་ཚད་རྒྱུ་མཚན་འདིས་རྐྱེན་བྱས་ནས་རྙོག་གྲ་ཡོད་ཚད་ཀྱི་ཉེས་པ་ཁྱེད་རང་གི་ཐོག་ལ་འབབ་རྒྱུ་རང་རེད། ཅེས་གསུངས་པས་སློབ་ཕྲུག་དེ་ནི་མགོ་བསྒུར་ནས་མི་སྡོད་ཀ་མེད་བྱུང་ངོ༌། །
ནག་ཚོང་རྒྱག་མཁན་དེ་ཚོ་ལ་ཨ་སྒོར་མང་པོ་འདུག
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ངག་དབང་ཟེར་བའི་ཚོང་པ་ཞིག་ཡོད། ཚོང་པ་དེས་རྨོ་མོ་གཅིག་ལ་ཚོང་གི་སྐོར་ལ་སྐད་ཆ་བཤད་དེ། ནག་ཚོང་རྒྱག་མཁན་དེ་ཚོ་ལ་ཨ་རིའི་སྒོར་མོ་དཔེ་མང་པོ་ཡོད་རེད། ཅེས་ལབ་སྐབས་རྨོ་མོ་ལགས་དེས། དེ་ཚོས་འདི་འདྲ་བྱེད་ཀྱི་རེད། དང་པོ་ཨ་སྒོར་དཔེ་མང་པོ་བདག་པོ་བརྒྱབ་པ་དང་སྦྲགས་རྗེས་སུ་ཨ་སྒོར་རྫུན་མ་བཟོ་རྒྱུའི་ཉེན་ཁ་ཡོད་རེད། ཅེས་ལབ་པར་ཚོང་པ་དེ་གད་མོ་ཤོར་ཏེ། ངས་ལབ་པ་དེ་རྨོ་མོ་ལགས་ཁྱེད་རང་གིས་གོ་མི་འདུག ཅེས་གསལ་བཤད་བྱས་པར་རྨོ་མོ་ལགས་དེ་གད་མོ་ཤོར་དགོས་བཟོས་པ་རེད།
དཀོན་མཆོག་གིས་མཁྱེན་བཅུག་རྒྱུ་མེད།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ཕན་ཚུན་ངོ་ཤེས་མ་ཐག་པའི་མི་གཉིས་ལམ་དུ་མཉམ་དུ་འགྲོ་སྐབས། གཅིག་གིས་གང་བྱུང་དུ་ལུད་པ་གཡུགས་པ་གཞན་དེས་མཐོང་བས་སྐྱུག་བྲོ་བཟོད་དཀའ་བ་ལངས་ཏེ། དཀོན་མཆོག་མཁྱེན། ང་ལ་ལམ་རོགས་ཛོར་པོ་འདི་འདྲ་ཞིག་ག་ནས་རག་པ་ཡིན་ནམ། ཞེས་ལབ་མ་ཐག་གཞན་དེས་ངོ་ཚ་ཁ་སྐྱེངས་ངང་ནས། འོ་ཛི་ཁོང༌། གནས་ཚུལ་ཛོར་པོ་དེ་འདྲ་དཀོན་མཆོག་གིས་གཏན་ནས་མཁྱེན་བཅུག་རྒྱུ་མེད། ཅེས་བཤད་པ་རེད།
སྤྲང་པོའི་བོད་གཞས།
སྨྱུག་རྒོད་གངས་བུ་དཔལ
།
མོན་གྷོ་གཞིས་ཆགས་སུ་རྒྱ་གར་བ་སྤྲང་པོ་ཞིག་ཡོད་པ་དེས་བོད་སྐད་ཚིག་གཅིག་ཤེས་ཀྱི་མེད་ཀྱང་དངུལ་སློང་བའི་ཐབས་སུ་བོད་གཞས་འདྲ་མིན་སྦྱངས་ཏེ༌གཏོང་གི་ཡོད། དེ་ལྟར་ཟླ་བ་སྔོན་མ་དེའི་ནང་ཡང་རྒྱ་གར་བ་སྤྲང་པོ་དེས་འབད་བརྩོན་ཆེན་པོ་བྱས་ནས་ཕུར་བུ་རྣམ་རྒྱལ་གྱིས་བཏང་བའི་གཞས་གསར་པ། མཉམ་དུ་འགྲོ་ཞེས་པ་དེ་སྦྱངས་རྗེས་ཨ་མ་རྣམ་རྟོག་ཚ་པོ་ཞིག་ཡོད་པ་དེའི་སྒོ་འགྲམ་དུ་སོང་སྟེ་སྐད་ཆེན་པོས། མཉམ་དུ་འགྲོ། མཉམ་དུ་འགྲོ། ང་དང་མཉམ་དུ་འགྲོ། ཞེས་བཏང་བས། ཨ་མ་དེ་ནི་རྣམ་རྟོག་ཟ་ཐག་ཆོད་དེ། ག་རེ་ང་འུ་ག་ཚོད་ཐུག་ཀྱང་སྤྲང་པོ་ཁྱོད་ཀྱི་མཉམ་དུ་འགྲོ་མ་དགོས་ཙམ་ཡོད། ཅེས་དངུལ་སྟེར་རྒྱུ་ཕར་བཞག་ད་དུང་གཤེ་གཤེ་བཏང་སྟེ་ཕྱིར་འབུད་བྱས་སོ། །
ལས་ཀ་འགོ་བཙུགས་ནས་མ་ཚར་བར་མཚམས་འཇོག་བྱེད་རྒྱུ་མེད།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ཕ་མས་རང་གི་ཕྲུ་གུར་དུས་རྒྱུན་དུ་ལས་ཀ་ཞིག་འགོ་བཙུགས་ནས་མ་ཚར་བར་མཚམས་འཇོག་བྱེད་རྒྱུ་མེད། ཅེས་བསླབ་བྱ་གནང་གི་ཡོད་པར་བརྟེན། ཉིན་གཅིག་ཕྲུ་གུ་ཞིག་ལ་བཀའ་འགྱུར་དང་བསྟན་འགྱུར། བོད་ཀྱི་མཁས་དབང་ཚོའི་བཀའ་འབུམ་རྣམས་ཀྱི་དཀར་ཆག་དཔེ་བཤུ་བྱེད་བཅུག་པ་རེད། དེ་ནི་ཕྲུ་གུ་དེའི་ལས་ཀ་བྱེད་པ་ཐེངས་དང་པོ་ཡིན། ཕྲུ་གུ་དེས་དཀར་ཆག་དཔེ་བཤུའི་ལས་ཀ་འགོ་བཙུགས་ཏེ། ཉིན་གང་པོར་མཚམས་མ་བཞག་པར་དཔེ་བཤུ་བྱས་ནས་ཟ་མ་ཡང་ཟ་ཁོམ་མ་བྱུང་སྟབས། ཕ་རྒན་ཧང་སངས་ནས་ངའི་བུ་དེ་ལས་ཀ་ཧུར་ཐག་འདི་འདྲ་བྱས་དྲགས་ན། ནད་པ་ཆཌ་པའི་ཉེན་ཁ་འདུག་བསམས་ནས་བུ་དེར། དེ་རིང་ལས་མཚམས་ཞོག ལབ་པར་བུ་དེས་ད་ལྟ་དཀར་ཆག་བཤུས་ཚར་མ་སོང༌། ཞུས་ནས་མཚམས་འཇོག་མ་བྱས་པར་མུ་མཐུད་བྱས། ཕས་བུ་ལ་ཁྱེད་རང་གིས་ལས་ཀ་འདི་ཟླ་བ་གཅིག་གི་ལས་ཀ་རེད་མ་གཏོགས་ཉིན་གཅིག་ལ་ཚར་རྒྱུ་དེ་འདྲ་མ་རེད། དེ་རིང་གི་དཔེ་བཤུ་བྱེད་མཚམས་བཞག་ནས་ཞལ་ལག་ཟོ་མ་གཏོགས་ནད་པ་ཆགས་ཀྱི་རེད། ཅེས་གསུངས་པར་བུ་དེས། འོ་ན་པཱ་ལགས་ཁྱེད་རང་གིས་ང་ལ་ག་དུས་ཡིན་ནའང་ལས་ཀ་ཞིག་འགོ་བཙུགས་ཚར་ནས་མཚམས་འཇོག་བྱེད་རྒྱུ་མེད་ཅེས་གསུངས་པ་མ་ཡིན་ནམ། བྱས་ན་ངས་མཚམས་འཇོག་བྱེད་དགོས་རེད་དམ། ཞེས་ཞུས་པར་པ་ཕ་དེ་ཤིན་ཏུ་དགའ་ནས་ང་ཡི་བུ་འདིས་ཏན་ཏན་ཕ་མའི་ཁར་བརྩི་འཇོག་བྱེད་མཁན་ཞིག་རེད་འདུག་བསམས་པ་རེད། འོན་ཀྱང་སྐད་ཆ་ཏོག་ཙམ་གོ་ནོར་བྱུང་འདུག་བསམས་ཏེ་བུ་ལ་གོ་བརྡ་ལེགས་པོ་སྤྲད།
པ་འགོ་ལ་མ་རེད་རྗེས་ལ་རེད།
དགའ་སོག་དཀོན་མཆོག་རྒྱ་མཚོ།
ཚེ་རིང་རང་ཡུལ་དང་ཁ་བྲལ་ནས་ལོ་གསུམ་སོང་བའི་ཉིན་གཅིག་ཕ་ཡུལ་ལ་ཁ་པར་ཞིག་གཏོང་སྐབས་མཉམ་འཇོག་ཅི་ཡང་མ་བྱས་པར་ལམ་སང༌། ཧ་ལོ། ཧ་ལོ། ཅེས་ལབ་པར་བོད་ནང་ཁ་པར་ཉན་མི་དེས། ཧ་ལོ་ཞེས་པའི་གོ་དོན་མ་རྟོགས་པར། ང་ཚོ་ཧ་ལོག་མིན་བོད་པ་ཡིན། ཞེས་ཚིག་འཇམ་པོས་ལབ་ཀྱང་ཚེ་རིང་ཁོང་ཁྲོ་ལངས་ཏེ། པ་འགོ་སྤྲང་པོ་དེས་ག་རེ་ལབ་ཀྱི་འདུག་ཅེས་ལབ་པར་བོད་ནང་གི་མི་དེས་གོ་ནོར་ཤོར་བ་འདྲ་སྙམ་སྟེ་གསལ་བཤད་ཀྱི་ཚུལ་དུ། པ་མགོ་ལ་མ་རེད། པ་མཇུག་ལ་ཡོད་པ་རེད་ཟེར། བོད་པ་ཞེས་པ་མཇུག་ལ་ཡོད་རེད། ཅེས་ལབ་པས་རང་སྐད་གཙང་མར་གཞན་གྱི་ཐ་སྙད་སྲེ་མཁན་ཚེ་རིང་ཁ་པར་མི་འཇོག་ཐབས་མེད་བྱུང་བ་རེད།
བསམ་བློ་ཆེན་པོ་ཐོངས་དང༌།
སྨྱུག་རྒོད་གངས་བུ་དཔལ།
དེ་སྔ་གཞིས་ཆགས་སུ་ཡོད་པའི་སློབ་ཕྲུག་འགའ་ཞིག་མོ་ཊ་ཆུང་ཆུང་ཊ་ཊ་སོ་མོ་ཞེས་པ་བཏང་ནས་འཚོ་བ་སྐྱེལ་མཁན་གྱི་ཁ་ལོ་པ་རྣམས་ལ་སྣང་བ་འགྲོ་ཡི་ཡོད། ཉིན་གཅིག་སློབ་གྲྭ་ཐོན་ལ་ཉེ་བའི་བུ་ཉི་བསྐྱལ་གྱི་ཕ་སྟོབས་རྒྱལ་ནས་རང་གི་བུར། བུ་ཁྱོད་རང་སློབ་གྲྭ་ཐོན་རྗེས་ལས་ཀ་ག་རེ་བྱེད་ཀྱི་ཡིན་ནམ། ཞེས་དྲིས་གནང་བར་བུ་ཉི་བསྐྱལ་གྱིས་ལམ་སང༌། ཊ་ཊ་སོ་མོ་གཏོང་མཁན་བྱེད་ཀྱི༌ཡིན། ཞེས་ཞུས་པར་ཕ་སྟོབས་རྒྱལ་ཧང་སངས་ནས། ཨ་ཙི་བུ་བསམ་བློ་ཆུང་ཆུང་དེ་འདྲ་མ་གཏོང༌། བསམ་བློ་ཆེན་པོ་བཏང་ནས་ཤོད་དང༌། ཞེས་གསུངས་རྗེས་བུ་ཉི་བསྐྱལ་གྱིས་བསམ་བློ་གང་ཙམ་བཏང་རྗེས། བྱས་ན་པཱ་ལགས་ང་སློབ་གྲྭ་ཐོན་རྗེས་མོ་ཊ་ཆེན་པོ་དེ་འདྲ་གཏོང་མཁན་བྱེད་ཀྱི་ཡིན། ཞེས་ཞུས་པར་ཕ་སྟོབས་རྒྱལ་དེ་བས་ཧང་སངས་དགོས་པ་བཟོས་པ་རེད།
སྒྲོལ་མ་ཉེར་གཅིག་བརྗེད་པ།
དྷ་ས་རིགས་སློབ་ངག་དབང་རྣམ་གྲོོལ།
རྣམ་གྲོལ་བོད་ནས་རྒྱ་གར་དུ་ནང་ཆོས་སྦྱོང་བར་སླེབས་པ་བཞིན་འབྲས་སྤུངས་དགོན་པར་སོང༌། སྟབས་ལེགས་པ་ཞིག་ལ་ཁོ་པར་རང་ཉིད་ཀྱི་གཤིས་ཀ་དང་མཐུན་པའི་དགེ་རྒན་སྐལ་བཟང་ལགས་ཀྱི་དགེ་ཕྲུག་བྱ་
རྒྱུ་བྱུང༌། དེ་ནས་ལོ་ཤས་སོང་རྗེས་བོད་ནང་རྣམ་གྲོལ་གྱི་ནང་མིར་གོད་ཆག་བྱུང་བའི་གནས་ཚུལ་འབྱོར་བར་སོང་། ཁོས་རྒན་ལགས་ཀྱི་བཀའ་འབྲེལ་བཞིན་བོད་དུ་ཕྱིན་ནས་ལོ་བཞི་ཙམ་བསྡད་དེ་ཚུར་ཡོང༌། འོན་ཀྱང་སྐབས་དེར་རང་གི་འཛིན་གྲོགས་ཚོ་དང་མཉམ་དུ་འགྲོ་ཐབས་མེད་པ་དང་། གཉིས་ནས་བོད་དུ་ངན་གོམས་ཤོར་ཡོད་པས་ཉིན་ལྟར་འཁྱམ་ཉུལ་བྱེད་པ་དང་། དགོན་པའི་ལས་ཀ་ཞིག་ཨེ་རག་ལྟ་བ་ལས་སློབ་སྦྱོང་ལ་དོ་སྣང་མི་བྱེད་པ་མ་ཟད། དེ་སྔ་ཤར་ཤར་ཏུ་འདོན་པའི་སྒྲོལ་མ་ཉེར་གཅིག་གི་བསྟོད་པ་དེ་ཡང་འཁྱར་འཁྱོར་ལས་འདོན་མ་ཤེས་སྟབས། རྒན་ལགས་ཀྱིས་ཁོ་པར། ད་ཆ་ཁྱོད་ཀྱི་ཤེས་སྤྱོད་གཉིས་ཀར་ལྟ་བཟོ་མེད་པ་མ་ཟད། སྒྲོལ་མ་ཉེར་གཅིག་དེ་ཡང་ཤེས་ཀྱི་མི་འདུག ཅེས་གསུངས་པར་ཁོ་པས། ཨ་ཙི་སྒྲོལ་མ་ཉེར་གཅིག་ངས་བོད་ལ་མ་སོང་གོང་ནས་ཀྱང་ཤེས་ཀྱི་མེད་པ། རྒན་ལགས་ཁྱེད་ཀྱིས་གསུངས་དང་ཉེར་གཅིག་སུ་དང་སུ་རེད་དམ། ཞེས་ཞུས་པར་དགེ་རྒན་དེས། སྒྲོལ་ལྗང༌། སྒྲོལ་དཀར། དེ་ནས་ཞེས་མགོ་བོ་འཕུར་འཕུར་གནང་གིན་སྒྲོལ་མ་ཁྲོ་གཉེར་ཅན་སོགས་མང་པོ་ཡོད་རེད། ཅེས་གསུངས་དགོས་བྱུང་བ་རེད།
མི་མ་ཤི་སར་འགྲོ་ས་ཡོད་དམ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
དབྱིན་ཇིའི་བྷི་བྷི་སི་གསར་འགྱུར་ཤོད་མཁན་ཞིག་གིས་ནང་པའི་མཚན་ཉིད་རིགས་ལམ་ཤེས་མཁན་གྱི་གྲྭ་པ་ཞིག་དྲི་བ་དྲིས་ལན་གྱི་ལས་རིམ་ནང་གདན་འདྲེན་ཞུས་ཏེ། དྲི་བ་དང་པོར། ང་ཚོ་འཛམ་གླིང་གི་མི་མ་ཤི་སར་འགྲོ་ས་ཡོད་དམ། ཞེས་དྲིས་པར་གྲྭ་པ་དེས་བསམ་བློ་ཞིག་བཏང་སྟེ། ཡོད་དང་ཡོད། ཅེས་ལན་སྤྲད་པར། གསར་བཀོད་པས་ཧང་སངས་སངས་ངང་ནས། བྱས་ན་ས་ཆ་དེ་གང་ན་ཡོད་དམ། ཞེས་དྲིས་པར་སྐུ་ཞབས་དེས། ས་ཆ་མང་པོ་ཡོད། དཔེར་ན་སུད་སི་དང་བོད། ནིའུ་ཛ་ལེནྜ། སིང་ག་པུར་སོགས་ཀྱི་སེམས་ཅན་དམིགས་བསལ་ཅན་འདྲ་མིན་སྣ་ཚོགས་དང༌། རྫ་རི་དང་། བྲག་རི། སྤང་རི། གངས་རི་སོགས་རང་བྱུང་ཁམས་ཀྱི་མཛེས་ཆོས་ལྡན་པའི་ལུང་པ། བཀོད་པ་དོད་པའི་མཛེས་ལྗོངས་ཡོད་སར་འཆམ་འཆམ་འགྲོ་སའི་ལུང་པ་དེ་ཚོ་ནི། འཛམ་གླིང་ནང་ནས་མི་མ་ཤི་སར་གསོན་པོ་དེ་ཚོ་འགྲོ་ས་རེད་མ་གཏོགས་གཤིན་པོ་ནི་འགྲོ་ཐུབ་ཀྱི་མ་རེད། ཅེས་ལན་བརྒྱབ་སྟབས། དབྱིན་ཇིའི་གསར་བཀོད་པ་དེ་ཚོར་ཅི་ཡང་ལབ་རྒྱུ་མ་རྙེད་པར་ལུས་སོ། །
ཨེ་སེ་ཧཻ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
རྒྱ་གར་གྱི་གནས་ཆེན་ཨེ་ལོ་ར་དང་ཨཇན་ཏ་ཞེས་གྲུབ་ཆེན་བརྒྱད་ཅུའི་བྲག་ཕུག་ཁག་ལ་གནས་མཇལ་དུ་འགྲོ་མཁན་བོད་མི་ཞིག་གིས་གནས་དེའི་ཉེ་འགྲམ་དུ་མགྲོན་ཁང་ཞིག་གཡར་བར་སོང་སྟེ། མགྲོན་ཁང་གི་
བདག་པོ་ཞིག་ལ་ཁང་གླ་སྐད་ཆ་དྲིས་པར། མགྲོན་ཁང་བདག་པོས། ཁང་གླ་མཐོ་ཤོས་ཉིན་རེར་སྒོར༌ ༡༠༠༠ ཡིན་པ་དང༌། འབྲིང་ལ༌ ༥༠༠། དམའ་ཤོས་ལ༌ ༡༥༠། རེད་ཅེས་འགྲེལ་བཤད་བརྒྱབ། མི་དེས་ཁང་གླ་དམའ་ཤོས་ཀྱི་ཁང་མིག་དེར་ཆ་རྐྱེན་ག་རེ་ཡོད་རེད་དྲིས་པར། མགྲོན་བདག་དེས་མགོ་བོ་གཡུག་གཡུག་བྱས་ཏེ་རྒྱ་གར་གྱི་སྐད་ཐོག་ནས་“ཨེ་སེ་ཧཻ་”ལབ་པར་གནས་སྐོར་བ་དེས་དབྱིན་སྐད་ཐོག་ནས་གྲང་གློག་ཡོད་རེད་ལབ་པ་ཐོས་ཏེ་ཁང་གླ་ཆུང་ཤོས་དེ་གླས། ཁང་པའི་ནང་འགྲོ་སྐབས་གྲང་གློག་སོགས་གང་ཡང་མེད་སྟབས་ལམ་སང་མགྲོན་ཁང་བདག་པོར། ཁྱེད་ཀྱིས་ཁང་གླ་ཆུང་ཤོས་ཀྱི་ནང་ལ་གྲང་གློག་ཡོད་རེད་ཟེར་ནས་རྫུན་ག་རེ་བྱས་ཤོད་ཀྱི་ཡོད། འདིའི་ནང་གང་ཡང་མི་འདུག ཅེས་ལབ་སྟེ་རྙོག་གྲ་བཤད། མགྲོན་ཁང་བདག་པོ་དེས། ངས་གྲང་གློག་ཡོད་རེད་ལབ་མེད། རྒྱ་གར་སྐད་ཐོག ཨེ་སེ་ཧཻ་ཞེས་བོད་སྐད་དུ་བསྒྱུར་ན་དེ་འདྲ་ཞིག་རེད་ལབ་ཀྱི་ཡོད། ཁྱེད་ཀྱིས་གོ་ནོར་ཐེབས་པ་འདྲ། ཞེས་ལབ། གནས་སྐོར་བ་དེས། ངའི་བསམ་པར་ཁྱེད་རང་གིས་དབྱིན་སྐད་ཐོག་ནས་ཨེ་སི་ཡོད་རེད་ལབ་སོང་བསམས་བྱུང༌། བྱས་ཙང་གྲང་གློག་ཞིག་ཡོད་ན་འགྲིགས་ས་རེད་བསམས་ནས་ངས་ཁང་མིག་དེ་གླས་པ་ཡིན་ཞེས་ལབ་ཀྱིན་ཁོ་རང་གད་མོ་ཤོར། །
སྐྱེད་ཀ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ལོ་ལྟར་འཛམ་གླིང་རྒྱལ་ཁབ་གང་སར་བཅའ་དངོས་གསར་པ་འདོན་སྤེལ་བྱེད་བཞིན་ཡོད་པ་ལྟར། རྒྱ་གར་གྱི་བཟོ་གྲྭ་(CAT)ཟེར་བས་ལྷམ་བཟོ་ལྟ་གསར་པ་ཞིག་བཟོས། སྐབས་དེར་ལྷམ་དེ་དར་སོ་ཆེན་པོ་བྱུང་སྟེ་ཉོ་མཁན་ཡང་མང་པོ་བྱུང་བ་རེད། བཀྲིས་ཟེར་བའི་བུ་ཞིག་ཡོད་པ་དེས་ལྷམ་ཐོན་གསར་དེ་ཉོ་འདོད་ཀྱང་སྒོར་བརྒྱ་མ་གཏོགས་མེད་སྟབས། ཁོང་གིས་པཱ་ལགས་སུ་སྒོར་ ༡༠༠༠ བསླངས། པ་ཕས་ཁ་ཐུག་སྤྲོད་ཀྱི་མིན་ལབ་མ་ཐུབ་པར། སྤྲད་ཆོག་འོན་ཀྱང་ལམ་སང་བེད་སྤྱོད་གཏོང་བ་ལས་ལོ་གཅིག་དངུལ་ཁང་ལ་བཅོལ་བཞག་ན་སྒོར་ ༡༠༠ ཁེ་སང་རག་གི་རེད་ལབ། བུ་དེས་ལོ་གཅིག་བསྒུག་བསྡད་པ་ལས་སྒོར་ ༡༠༠༠ དེ་ང་ལ་གནང་རོགས། ངས་ད་ལྟ་རང་སྒོར་ ༡༠༠ སྐྱེད་ཀར་ཕུལ་ཆོག་ལབ་སྟེ། ཁོ་རང་ལ་ཡོད་པའི་སྒོར་ ༡༠༠ ཕར་ཕུལ་བས། པཱ་ལགས་གང་ཡང་གསུང་རྒྱུ་མ་རྙེད་པར་བུ་ལ་སྒོར་ ༡༠༠༠ དེ་སྤྲོད་དགོས་བྱུང་ངོ༌། །
མགོ་དང་མཇིང་པ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
དམག་དཔོན་ཉི་མ་ཚེ་རིང་གིས་རང་གི་གྲོགས་པོར། དམག་སྒར་འདིའི་ནང་གི་འགོ་གཙོ་ཆེ་ཤོས་དེ་ང་ཡིན། ཞེས་འགྲེལ་བརྗོད་བྱས་པར་གྲོགས་པོ་དེས། བྱས་ན་ཁྱིམ་དུ་འགོ་པ་ཆེ་ཤོས་སུ་ཡིན་ནམ། ཞེས་དྲིས་པར་དམག་དཔོན་དེས། ཁྱིམ་དུའང་ང་ཡིན་དགོས་བྱུང༌། ཞེས་ལབ་པར་གྲོགས་པོ་དེས། ཨ་ལས་བྱས་ན་ཁྱེད་རང་གི་སྐུ་ཟླ། ཞེས་དྲིས་པར་དམག་དཔོན་དེས། ཁོང་མཇིང་པ་རེད། ཅེས་ལབ་པར་གྲོགས་པོ་དེས། མཇིང་པ་རེད་ཟེར་བའི་དོན་གང་ཡིན་ནམ། ཞེས་དྲིས་པར་དམག་དཔོན་དེས། ངའི་མགོ་སྒུལ་བར་མཇིང་པས་ཁ་ལོ་བསྒྱུར་དགོས་པའི་དོན་ཆུང་ཆུང་དེའང་ཁྱེད་ཀྱིས་ཤེས་ཀྱི་མེད་དམ། ཞེས་བཤད།
ལྟད་མོ་བཙོག་པ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
དེང་དུས་ཀྱི་གྲྭ་པ་རབ་དབྱངས་ཟེར་མཁན་ཞིག་ཡོད་པ་རྒྱུན་དུ་ནང་མི་ཚོ་ཕྱིར་ལས་ཀ་བྱེད་པར་སོང་རྗེས་ལམ་སང་སྒོ་བརྒྱབ་ནས་ལྟད་མོ་བཙོག་པ་ཞིག་ལྟ་ཡིན་ཡོད་ཅིང༌། ཉིན་གཅིག་ཕ་རྒན་ཐོག་རྒྱག་མགོ་རྒྱག་ལ་ནང་ལ་འཛུལ་ཡོང་བས། ཁོ་པས་དེ་ལྟར་ལྟད་མོ་བཙོག་པར་ལྟ་བཞིན་པ་གཟིགས། ལམ་སང་ཕ་རྒན་དེས། ཁྱེད་རང་གྲྭ་པ་ཞིག་གིས་ལྟད་མོ་བཙོག་པ་འདི་འདྲ་ལྟ་རྒྱུར་ངོ་ཚ་གི་མི་འདུག་གམ། ཞེས་བཀའ་བཀྱོན་བཏང༌། གྲྭ་པ་དེ་ཧ་ཅང་ངོ་ཚ་པོ་བྱུང་སྟེ་ཐབས་ཤེས་ཤིག་བྱས་ན་མ་གཏོགས་འགྲིག་མ་སོང་སྙམ་སྟེ། ཕ་རྒན་གྱིས་བཤད་པའི་སྐད་ཆ་དེ་ཐད་ཀར་གོ་མ་བྱུང་མདོག་མདོག་བྱས་ཏེ། པཱ་ལགས་ངས་ལྟད་མོ་བཙོག་པ་ལྟ་ཡི་མེད། ད་ལྟ་རང་བརྙན་འཕྲིན་འཁོར་ཐག་དང་བརྙན་འཕྲིན་གཉིས་ཀ་གཙང་མ་གཙང་རྐྱང་བཟོས་པ་ཡིན། ཞེས་ལབ་པར་ཕ་དེས་གྲྭ་པར་ངོ་ཚ་ཕབ་དྲགས་ན་ཡག་པོ་མི་འདུག་བསམས་ཏེ་ཐབས་མཁས་ཐོག འོ་ཏག་ཏག་རེད། སྐུ་ཞབས་རང་གིས་གཙང་མ་བཟོས་པ་དེ་ཡག་པོ་བྱུང་འདུག དེ་རིང་ནས་བཟུང་ཁྱེད་རང་ལ་གཙང་མ་བཟོ་རྒྱུའི་ལས་འགན་མེད་ཅེས་སྨྲས་སོ། །
ཝཱན།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
རྒྱ་ནག་ལྕགས་རིར་འཆམ་འཆམ་འགྲོ་མཁན་མི་གཉིས་ཐུག་སྟེ། མི་གཅིག་གིས་གཞན་དེར་ཁྱེད་རང་གིས་དབྱིན་སྐད་ཤེས་ཀྱི་ཡོད་དམ་ཞེས་དྲིས། གཞན་དེས། ངས་ཞེ་དྲག་ཡག་པོ་ཤེས་ཀྱི་མེད། ཡིན་ནའང་ཟ་སྐད་འཐུང་སྐད་རྒྱག་ཐུབ་ཀྱི་ཡོད་ཅེས་བཤད། མི་གཅིག་དེས། འོ་ན་གཅིག་རྒྱོབས་དང་ལབ། མི་གཞན་དེས། ཝཱན། ཞེས་ཚིག་ཁེར་རྐྱང་གཅིག་བརྒྱབ་སྟེ་གཞན་གང་ཡང་མ་ལབ་སྟབས། མི་གཅིག་དེས་ཁྱེད་རང་གི་དབྱིན་ཇིའི་སྐད་གཅིག་མ་གཏོགས་ཤེས་ཀྱི་མེད་དམ་ལབ་པར། མི་གཞན་དེས་དབྱིན་ཇིའི་སྐད་མང་པོ་ཤེས་ཀྱི་ཡོད། ཡིན་ནའང་ཁྱེད་རང་གིས་ང་ལ་གཅིག་རྒྱོབས་དང་ལབ་པ་མ་ཡིན་ནམ། བྱས་ཙང་ངས་གཅིག་བརྒྱབ་པ་ཡིན་ཞེས་བཤད་སྟབས། མི་གཞན་དེས་ཁོས་དབྱིན་སྐད་ཨོའོ་ཙམ་ཤེས་ཀྱི་ཡོད་པ་འདྲ་བསམས་ནས། དེ་ལས་ལྷག་པ་ཤེས་ཀྱི་ཡོད་མེད་གང་ཡང་མ་དྲིས། དོན་ངོ་མ་མི་གཞན་དེས་དབྱིན་སྐད་ཚིག་གཅིག་མ་གཏོགས་ཤེས་ཀྱི་མེད་ཀྱང་རླུང་རྟ་རྒྱུགས་སྟེ། ཚིག་གཅིག་ཁེར་རྐྱང་ཤེས་པ་དེ་སྤོབས་པ་དང་བཅས་བེད་སྤྱོད་གཏོང་རྒྱུ་རག་པ་རེད།
ཉི་མའི་ཨོ་ལོ་ས་ལ་ཟགས་པ།
ཚེ་དབང་རྟ་མགྲིན།
ཐེངས་གཅིག་གཙང་པའི་མི་གཉིས་ལམ་ལ་འགྲོ་བཞིན་པའི་སྐབས་དེར། མི་གཅིག་གིས་ལམ་ཟུར་དེར་བོན་པོ་རྣམས་ཀྱིས་ཞབས་བརྟན་སྐབས་བེད་སྤྱོད་བྱེད་རྒྱུའི་རགས་ཀྱིས་བཟོས་པའི་ཤང་གསར་པ། ཉི་མའི་ཕྲུ་གུ་ས་ལ་ལྷུངས་པ་དང་འདྲ་བར་འོད་ཆེམ་ཆེམ་འཕྲོ་བ་ཞིག་ཡོད་པ་དེ་མཐོང་སྐབས་ཁོ་པས། ཁོ་དེ་ཁོ་དེ། ཧ་ན་ལྟོས་ཅིག ཉི་མའི་ཨོ་ལོ་ཁོ་ཧ་ན་ཟགས་འདུག་ག ཅེས་མཛུབ་མོ་བཙུགས་ཏེ་བསྟན་པས། གྲོགས་པོ་གཞན་པ་དེ་ཡིས་ཤང་གི་ལྕེ་ལེ་དེར་ལེགས་པར་བལྟས་རྗེས། འོ་འདུག་འདུག གླི་ཝང་འབའ་ཁོ་ཡང་འཁྲུལ་ལེར་འདུག་ཅེས་ལབ་པ་རེད།