དོན་གྲུབ་རྒྱལ།
བདག་ནི་ལྷ་ཡུལ་ལྟ་བུའི་རྒྱལ་ས་ན་གནས་ཀྱང། །
ཕ་ཡུལ་དྲན་པའི་འདུན་པ་འགོག་ཐབས་རང་མི་འདུག །
མཛེས་སྡུག་ལྡན་པའི་ཕ་ཡུལ་རྩྭ་ཐང་དེ་དྲན་དུས། །
བདག་གི་སེམས་འདི་རྟ་ཕོ་གཤོག་ཐོགས་དང་འདྲ་བྱུང། །
ད་ནི་མི་སྡོད་རང་གི་ཕ་ཡུལ་ལ་ཆས་འགྲོ། །
ཞིམ་མངར་ཅན་གྱི་ཆུ་མིག་དྭངས་མོ་དེ་དྲན་བྱུང། །
བང་རྩལ་བསྐྱེད་དེ་མུ་མེད་རྩྭ་ཐང་ལ་ཆས་འགྲོ། །
འཚོ་བཅུད་ལྡན་པའི་རམ་དཀར་རྩྭ་མཆོག་དེ་དྲན་བྱུང། །
ཞོགས་པའི་ཉི་གཞོན་མཐོན་མཐིང་མཁའ་དབྱིངས་སུ་འཆར་དུས། །
ཕྱོགས་བཞིའི་ལྷུན་པོ་གངས་དཀར་ཅོད་པན་གྱིས་མཛེས་ཤིང། །
ཁོ་ར་ཁོར་ཡུག་ལྗོན་ཤིང་དོ་ཤལ་གྱིས་བརྒྱན་ནས། །
འཕྱོར་སྒེག་ལང་ཚོ་ངོམས་པའི་ཕ་ཡུལ་དེ་དྲན་བྱུང། །
ཉི་རྩེ་ས་ལ་ཤར་བའི་སྔ་དྲོ་ཡི་དུས་སུ། །
བཅུ་དྲུག་ལང་ཚོས་སྙེམས་པའི་གེ་སར་གྱི་གཞོན་ནུ། །
དབུ་འཕང་དགུང་དང་མཉམ་པའི་རྟ་ཕོ་ལ་བཅིབས་ཏེ། །
སྒོ་ཕྱུགས་འཚོ་སྐྱོང་བྱེད་པའི་ངང་ཚུལ་དེ་དྲན་བྱུང། །
དཀར་གསལ་ཟླ་འོད་འཕྲོ་བའི་མཚན་མོ་ཡི་དུས་སུ། །
གསེར་གྱི་བཞོ་གཟུང་བཏགས་པའི་འཇོ་སྒེག་གི་བུ་མོས། །
“དགོ་དགོ་”གླུ་དབྱངས་ངག་གི་དབྱངས་རྟ་ལ་འགུག་བཞིན། །
འབྲི་མོའི་འོ་མ་བཞོ་བའི་ངང་ཚུལ་ཡང་དྲན་བྱུང། །
ཨེ་མ་དགུན་གསུམ་ཤ་མར་རྩམ་གསུམ་གྱིས་ཕྱུག་དུས། །
རི་ལུང་ཐང་གསུམ་དགའ་སྤྲོའི་སྣང་བ་ཡིས་ཁེངས་སོང། །
གནམ་ལོ་གསར་དུ་ཚེས་པའི་དགའ་སྟོན་གྱི་དུས་སུ། །
གླུ་གར་གཞས་གསུམ་གཏོང་བའི་རྩེད་འཇོ་འདི་སྐྱིད་པ། །
དཔྱིད་གསུམ་སྦྲང་ཆར་འཛིན་མའི་ཁྱོན་ཡོངས་ལ་འཇོ་དུས། །
ཐོན་སྐྱེད་ལོ་མ་རྒྱས་པའི་རྩྭ་ཐང་འདི་མཛེས་པ། །
ཁུ་བྱུག་གསུང་སྙན་སྒྲོག་པའི་གླུ་དབྱངས་འདི་སྙན་པ། །
ནོར་ལུག་འཕེལ་ཀ་རྒྱས་པའི་ངང་ཚུལ་འདི་སྤྲོ་བ། །
དབྱར་གསུམ་ཉི་མ་ཤར་ཕྱོགས་རི་རྩེ་ནས་འཛུམ་དུས། །
རིག་གནས་མེ་ཏོག་བཞད་པའི་རྩྭ་ཐང་འདི་མཛེས་པ། །
སློབ་གསོའི་ལས་དོན་དར་བའི་འདབ་མ་འདི་རྒྱས་པ། །
ཚན་རིག་ལག་རྩལ་འཕེལ་བའི་ཟེའུ་འབྲུ་འདི་དགའ་བ། །
སྟོན་གསུམ་གཡུར་ཟ་ལྡེམ་པའི་འབྲས་ལྡན་གྱི་དུས་འདིར། །
འགྱུར་གཞིའི་ལྗོན་ཤིང་གྲུབ་འབྲས་ལོ་འདབ་ཀྱིས་བརྒྱན་ཞིང། །
ཐོན་སྐྱེད་འབྲས་བུས་བཀླུབས་པའི་དགེ་མཚན་འདི་མཐོང་ནས། །
རྩྭ་ཐང་དྲན་པའི་གླུ་དབྱངས་དབང་མེད་དུ་ཤོར་སོང། །
ད་ནི་བསམས་ཤིང་བསམས་ཤིང་ཕ་ཡུལ་དེ་དྲན་བྱུང། །
ལོ་ཡི་དུས་འཁོར་སྐད་ཅིག་སྐད་ཅིག་ཏུ་འདས་ཀྱང། །
རྒྱང་བསྐྱོད་གླུ་སྒྲ་བདག་དང་ཇེ་ཉེ་དང་ཇེ་ཉེ། །
མ་འོངས་ཡུལ་ལྗོངས་བདག་གི་མཐོང་ལམ་དུ་ཤར་འོངས། །