གཞི་རིམ་སློབ་མའི་ཕུལ་བྱུང་རྩོམ་ཡིག་འདེམས་སྒྲུག་གི་ལས་རིམ་ངོ་སྤྲོད།
༡། རྩོམ་ཡིག་འདེམས་སྒྲུག་གི་དམིགས་ཡུལ།
གཏན་ཉིན་སློབ་གྲྭ་ཁག་གི་བོད་ཡིག་ཁྲིད་སྦྱོང་ལ་སྐུལ་འདེད་དང་ཤུགས་སྣོན་བྱ་སླད། ཕྱི་ལོ་ ༡༩༩༦ ལོ་ནས་བཟུང་ཤེས་རིག་ལས་ཁུངས་ཀྱིས་ལོ་རེར་འཛིན་རིམ་དྲུག་པ་ཡན་གྱི་རྒྱལ་ཡོངས་རྩོམ་ཡིག་འདེམས་སྒྲུག་གི་ལས་རིམ་སྤེལ་མུས་ལགས་ཤིང༌། རྩོམ་ཡིག་འདེམས་སྒྲུག་དེ་ནི་སློབ་གྲྭ་དང་སློབ་ཕྲུག་བྱེ་བྲག་པའི་གྲུབ་འབྲས་ལ་གཟེངས་བསྟོད་གནང་རྒྱུ་ཙམ་མ་ཡིན་པར། གཏན་ཉིན་སློབ་གྲྭ་ཁག་གི་བོད་ཡིག་གནས་ཚད་ལ་གདེང་འཇོག་དང་དཔྱད་ཞིབ་ཀྱི་གཞི་རྩར་འགྱུར་ཆེད་དང༌། འབྲེལ་ཡོད་དགེ་རྒན་རྣམས་ལ་སློབ་མའི་རྩོམ་འབྲིའི་གནས་ཚད་དང་ཁ་ཕྱོགས། རྩོམ་འབྲིའི་སློབ་ཁྲིད་ལ་ལམ་སྟོན་དང་དཔྱད་ཞིབ་ཀྱི་རིན་ཐང་མཁོ་སྤྲོད། སློབ་མ་རྣམས་ལ་དུས་རྒྱུན་རྩོམ་འབྲིའི་ནུས་རྩལ་སྦྱོང་བརྡར་གྱི་དཔྱད་གཞིར་འགྱུར་བ་བཅས་ཀྱི་ཕན་ནུས་ཐོན་པའི་དམིགས་ཡུལ་བཟུང་ཡོད།
༢། རྩོམ་ཡིག་འདེམས་སྒྲུག་གི་བརྒྱུད་རིམ།
རྩོམ་ཡིག་འདེམས་སྒྲུག་བྱེད་སྟངས་ནི།
ཀ ཐོག་མར་འཛིན་རིམ་སོ་སོའི་ནང་སྔོན་འགྲོའི་རྩོམ་ཡིག་འདེམས་སྒྲུག་བྱས་ཏེ་རྩེ་ཕུད་སློབ་མ་རེ་འདེམས་དགོས།
ཁ ཤེས་ལས་ཀྱིས་རྩོམ་འདེམས་ཀྱི་དུས་ཚེས་དང༌། རྩོམ་ཡིག་གི་ཁ་བྱང་བཅས་སློབ་ཁོངས་སོ་སོར་བསྐུར་རྒྱུ།
ག གཏན་འབེབས་དུས་ཚེས་སུ། སློབ་ཁག་སོ་སོས་འབྲེལ་ཡོད་བོད་དགེ་དང་ས་གནས་འགོ་འཛིན་ལས་ཁུངས་ཀྱི་འཐུས་མི། དགེ་རྒན་དང་ཕ་མའི་འཐུས་ཚོགས་ཀྱི་འཐུས་མི་གཉིས་བཅས་ཀྱི་གཟིགས་རྟོག་འོག་འདེམས་སྒྲུག་བྱ་རྒྱུ།
ང འདེམས་སྒྲུག་དངོས་གཞིའི་སྐབས་དུས་ཡུན་སྐར་མ་ ༡༥ སྔོན་དུ་ཤེས་ལས་ཀྱིས་བསྐུར་བའི་རྩོམ་བྱང་ཁ་ཕྱེས་ཆོག
ཅ འདེམས་སྒྲུག་མཇུག་སྒྲིལ་མ་ཐག་སློབ་མའི་རྩོམ་ཡིག་སྟེང་གཟིགས་རྟོག་ཚོགས་ཆུང་གིས་རྟགས་ཐམ་བཀོད་དེ་ཉིན་དེ་རང་ལ་ཤེས་ལས་སུ་སྦྲག་གཏོང་བྱ་དགོས།
༣། རྩོམ་འདེམས་གདེང་ཞིབ་བྱེད་ཐབས།
ས་གནས་སློབ་ཁག་གིས་དུས་ཚེས་རྒྱས་བཅད་ནང་བསྐུར་འབྱོར་བྱུང་བའི་རྩོམ་ཡིག་རྣམས་ལ་གདེང་ཞིབ་སླད། ཤེས་རིག་ལས་ཁུངས་ཀྱིས་འཛིན་རིམ་སོ་སོར་རྩོམ་ཡིག་གདེང་ཞིབ་པ་ཆེད་ལས་མཁས་པ་རེ་བསྐོ་འཛུགས་གནང་སྟེ། འཛིན་རིམ་སོ་སོའི་ཨང་རིམ་རྩེ་ཕུད་གསུམ་རེ་འདེམས་སྒྲུག་གིས་བྱ་དགའ་གནང་རྒྱུ་དང་ཆབས་ཅིག རྩོམ་ཡིག་རྣམས་སྨྱུག་གསར་ཞེས་པའི་ལོ་འཁོར་དུས་དེབ་ནང་ཕྱོགས་བསྒྲིགས་ཀྱིས་གཏན་ཉིན་སློབ་གྲྭ་ཡོངས་སུ་རིན་མེད་འགྲེམས་སྤེལ་བྱེད་བཞིན་ཡོད།
རྩོམ་སྒྲིག་པའི་གཏམ།
བློ་གསལ་ན་ཆུང་སྨྱུག་ཐོགས་པ་རྣམས་དང་རྒྱ་ཆེའི་ཀློག་པ་པོ་ཚང་མར་འཚམས་འདྲིའི་བཀྲ་ཤིས་བདེ་ལེགས་དང་བཅས་ཏེ་གསལ་བཤད་ཀྱི་ཚིག་འགའ་ཞུ་བ་ལ།
༡། འདིར་བཀོད་རྩོམ་ཡིག་རྣམས་འགྲན་སྡུར་གྱི་དུས་བཅད་ཆུ་ཚོད་གསུམ་ནང་སློབ་ཕྲུག་ཚོས་སྐབས་ཐོག་ཏུ་བྲིས་པ་ཡིན་ཞིང་རྩོམ་ཡིག་གི་གོ་རིམ་སྒྲིག་སྟངས་ནི་འཛིན་རིམ་གཞིར་བཟུང་གིས་བདམས་བཀོད་བྱས་ཡོད།
༢། མ་རྩོམ་དུ་བྱུང་བའི་ཡིག་ནོར་དང་ཚིག་སྦྱོར་མི་བདེ་བ་རེ་ཟུང་དགོས་དབང་གིས་བཟོ་བཅོས་མི་རྒྱག་ཀ་མེད་རིགས་ཕུད། མ་རྩོམ་རང་སོར་འཇོག་ཐབས་བྱས་ཡོད།
༣། རྩོམ་ཡིག་སོ་སོའི་མཇུག་ཏུ་རྩོམ་ཡིག་དཔྱད་མཆན་རེ་བྲིས་ཡོད། དཔྱད་མཆན་འབྲི་བའི་དམིགས་ཡུལ་ནི་སློབ་མ་ཚོར་རྩོམ་ཡིག་གི་ལེགས་ཉེས་གསལ་སྟོན་བྱ་རྒྱུ་ཁོ་ནའི་ཆེད་དུ་ཡིན།
༤། ཁྱོན་ཡོངས་ནས་བཤད་ན། གཞི་རིམ་སློབ་མའི་རྩོམ་འབྲིའི་ཤེས་ཚད་ཅུང་ཞན་ཚོད་འདུག་པས། རྗེས་ཕྱོགས་བོད་དགེ་དག་གིས་རྩོམ་འབྲིའི་ཤེས་བྱ་ཁྲིད་སྟོན་ཐད་སྔར་ལས་ཀྱང་ཤུགས་སྣོན་ཡོང་བའི་རེ་སྐུལ་ཞུ་རྒྱུ་ཡིན།
༥། ཐེངས་འདིའི་བྱེད་སྒོའི་ཁྲོད་བྱ་དགའ་ཐོབ་པ་དེ་རྩོམ་འབྲིའི་གནས་ཚད་མཐའ་འཁྱོལ་བྱུང་བའི་དོན་མ་ཡིན་པས། གཙོ་བོར་རང་ཉིད་ཀྱི་རྩོམ་འབྲིའི་ཤེས་ཚད་དང་ཉམས་མྱོང་གོང་མཐོར་གཏོང་བ་ལ་འབད་བརྩོན་བྱ་རྒྱུ་དེ་ཡིན། དེ་ལྟར་བྱེད་པར་རྩོམ་ཡིག་གང་མང་ལྟ་ཀློག་དང་དབྱེ་ཞིབ་ཀྱི་སྦྱོང་བརྡར་བྱེད་རྒྱུ་ཧ་ཅང་གལ། རྒྱུ་མཚན་དེས་སློབ་ཕྲུག་གཞན་པར་ངན་ཤན་མི་ཐེབས་པའི་ཆེད་དུ་འདིར་བཀོད་རྩོམ་ཡིག་ལ་བཟོ་བཅོས་ཕྲན་ཙམ་བརྒྱབ་སྟེ་དེབ་གཟུགས་སུ་བགྱིས་པ་འདིས་ན་ཆུང་སློབ་མ་ཚོའི་རྩོམ་འབྲིའི་བྱ་བར་སྐུལ་འདེད་དང། མ་འོངས་པར་རྩོམ་ཡིག་འབྲི་སྦྱོང་ལ་ལམ་སྟོན་དང་དཔྱད་གཞིའི་རིན་ཐང་ལྡན་པར་ཡིད་ཆེས་བྱེད་བཞིན་ཡོད།
༦། གཞན་ཡང་དེབ་ཆུང་འདིས་ལོ་ཆུང་སློབ་མ་དག་གི་རྩོམ་ཡིག་གི་གནས་ཚད་ལ་རྒྱུས་ལོན་དང། ཕན་ཚུན་དཔྱད་གཤིབ། ལེགས་ཆ་སྡུད་ལེན། མ་འོངས་པའི་ཁ་ཕྱོགས་དང་དམིགས་འབེན་གསར་འཛུགས་བཅས་ཀྱི་རྒྱུར་འགྱུར་བའི་རེ་བའང་ཡོད།
མཇུག་མཐར་གཞི་རིམ་སློབ་མའི་ཕུལ་བྱུང་རྩོམ་ཡིག་འདེམས་སྒྲུག་གི་བྱེད་སྒོའི་ནང་ཆ་ཤས་ལེན་མཁན་རྟོག་ཞིབ་པ་དང་ཞིབ་འཇུག་པ། འབྲེལ་མཐུད་པ་སོགས་འབྲེལ་ཐོགས་ཚང་མར་ཐུགས་རྗེ་ཆེ་ཞུ་རྒྱུ་དང། རྒྱ་ཆེའི་ཀློག་པ་པོ་རྣམས་ཀྱིས་དགེ་འདོན་སྐྱོན་བསལ་གྱི་རྩ་ཆེའི་དགོངས་འཆར་ལྷུག་སྩོལ་ཡོང་བའི་རེ་སྐུལ་བཅས། ཕྱི་ལོ་༢༠༡༢ ཟླ ༡༢་ ཚེས ༡༠ ལ་རྩོམ་སྒྲིག་པས་ཕུལ།
སྡེ་ཚན་དང་པོ། (འཛིན་གྲྭ་དྲུག་པ)
སྡེ་ཚན་གཉིས་པ། (འཛིན་གྲྭ་བདུན་པ)
སྡེ་ཚན་གསུམ་པ། (འཛིན་གྲྭ་བརྒྱད་པ)
སྡེ་ཚན་བཞི་པ། (འཛིན་གྲྭ་དགུ་པ)
སྡེ་ཚན་ལྔ་པ། (འཛིན་གྲྭ་བཅུ་པ)
སྡེ་ཚན་དྲུག་པ། (འཛིན་གྲྭ་བཅུ་གཅིག་པ)
སྡེ་ཚན་བདུན་པ། (འཛིན་གྲྭ་བཅུ་གཉིས་པ)
ཕྱི་ལོ་༢༠༡༢ ལོའི་བཙན་བྱོལ་བོད་མིའི་གཏན་ཉིན་སློབ་གྲྭ་ཁག་གི་ཡིག་གཟུགས་འགྲན་སྡུར་ཁྲོད་ཀྱི་ཕུལ་བྱུང་ཡིག་གཟུགས་ཕྱོགས་བསྒྲིགས།
གླེང་བརྗོད།
འཇམ་དཔལ་དབྱངས་ཀྱི་རྣམ་སྤྲུལ། བཀའ་དྲིན་ཅན་གྱི་སློབ་དཔོན་ཐོན་མི་ནས་ཁྱུང་བོ་གཡུ་ཁྲི་ལ་སོགས་སྔོན་བྱོན་དམ་པ་རྣམས་ཀྱི་ཕྱག་རྒྱུན་བཟང་བོ་ཉམས་པ་སོར་ཆུད་དང་གནས་པ་གོང་འཕེལ་གཏོང་ཕྱིར་དང། དེང་རབས་མཛེས་རྩལ་གྱི་ལེགས་ཆར་ཡང་སློབ་སྦྱོང་དང་སྡུད་ལེན་བྱ་ཆེད། ཕྱི་ལོ་༢༠༠༧ ལོ་ནས་བཟུང་འདི་ག་ཤེས་རིག་ལས་ཁུངས་ཀྱིས་ཡིག་གཟུགས་འགྲན་སྡུར་གྱི་ལས་འགུལ་འདི་འདྲ་ཞིག་རྒྱ་བལ་འབྲུག་གསུམ་གྱི་བོད་པའི་སློབ་གྲྭ་ཁག་ཏུ་རྒྱ་ཁྱབ་ཏུ་སྤེལ་འགོ་ཚུགས་ཤིང༌། འདི་ལྟ་བུ་རེའི་སྒོ་ནས་རང་རེའི་བོད་ཀྱི་ཤེས་རིག་འདི་ཕྱོགས་གང་ཅིའི་ཐད་ནས་འགྲོ་བ་མིའི་རིགས་ཀྱི་བསམ་པའི་ལོངས་སྤྱོད་ཟད་དུ་མེད་པ་ཞིག་ཏུ་འགྱུར་བར་རེ་བ་དང་ཡིད་ཆེས་བྱེད་ཀྱི་ཡོད།
ལས་འགུལ་འདི་སྡེ་ཚན་དྲུག་ཏུ་བགོས་ཏེ་སྡེ་ཚན་རེ་ལ་འཛིན་གྲྭ་གཉིས་རེ་དང༌། སྡེ་ཚན་རེ་རེའི་སློབ་ཕྲུག་རྣམས་ཀྱི་ཡིག་གཟུགས་རྣམས་གདེང་ཞིབ་ཚོགས་ཆུང་ལ་ཕུལ་ནས་སྡེ་ཚན་རེ་ལས་སློབ་ཕྲུག་རྩེ་ཕུད་གསུམ་དང་ལེགས་གསོལ་གྱི་བྱ་དགའ་ལྔ་བཅས་བརྒྱད་རེ་བདམས་ཡོད་ལ། རྩེ་ཕུད་ཀྱི་ཡིག་གཟུགས་རྣམས་འདིར་བདམས་བཀོད་བྱས་ཡོད།
ཡིག་གཟུགས་རྣམས་ཇུས་འགོད་བདེ་ཆེད་བཅད་གཏུབས་གང་འཚམ་བྱས་ཡོད་མོད་མ་ཕྱི་སློབ་མ་རང་ཉིད་ཀྱི་ཡིག་རིས་དངོས་ཡིན་པར་དགོངས་འཇགས་མཛོད།
མ་འོངས་པར་ལས་འགུལ་འདི་རྒྱུན་མཐུད་དེ་སྤེལ་རྒྱུ་ལགས་ན། ལས་དོན་འདི་ཚགས་ཚུད་དང་སློབ་མའི་ཡིག་གཟུགས་ཡར་རྒྱས་ཡོང་བ་ལ་དགེ་རྒན་གྱིས་འབད་བརྩོན་ལ་ཁ་བྲལ་ཐབས་མེད་སྟབས། དགེ་རྒན་རྣམ་པས་ལས་དོན་འདི་ལ་གཞོགས་འདེགས་དང་སློབ་ཕྲུག་ལ་གལ་ཆེན་དོན་ཆེན་དུ་བརྩིས་ཏེ་སྐུལ་སློང་བྱེད་རྒྱུའི་རེ་བ་དང་བཅས། ཕྱི་ལོ་༢༠༡༢ ལོའི་ཟླ་༡༢ པའི་ཚེས་༡ ཉིན།
ཕྱི་ལོ་༢༠༡༢ ལོའི་ཡིག་གཟུགས་འགྲན་སྡུར་ཁྲོད་ཀྱི་ཕུལ་བྱུང་ཡིག་གཟུགས་ཁག