ཆུ་སྐྱེས་སྒྲོལ་མས་བརྩམས།

པར་སྐྲུན་གསལ་བཤད།

ཕོ་མོ་འདྲ་མཉམ་གྱི་ལྟ་ཚུལ་ཤུགས་ཆེར་གླེང་བའི་དེང་གི་སྤྱི་ཚོགས་ལ་མཚོན་ན། བུད་མེད་ལ་ཉམས་ཞིབ་བྱ་རྒྱུ་དེའང་དུས་རབས་ཀྱི་དགོས་མཁོ་ཞིག་ཏུ་གྲུབ་ཕྱིར། ང་ཚོས་ཀྱང་བུད་མེད་ནི་གནམ་གྱི་ཕྱེད་ཀ་ཡིན་མིན་ཇི་ལྟར་ཡང། མི་གླེང་ཀ་མེད་དུ་གྱུར་བའི་བུད་མེད་ཅིས་ཀྱང་གླེང་དགོས་པར་མཐོང། དེ་ལྟ་ནའང། ད་སྔ་བོད་རང་ཉིད་ལ་ཆེད་དུ་བུད་མེད་ཀྱི་སྐོར་ལ་ཉམས་ཞིབ་བྱེད་མཁན་ཉུང་ཞིང། བུད་མེད་གླེང་བ་ལ་དཔྱད་གཞིའི་རྒྱུ་ཆ་ལྷག་ཏུ་དཀོན། སྒོས་སུ་བུད་མེད་ཅིག་གིས་བུད་མེད་གླེང་བ་ནི་ནམ་ལངས་ཀྱི་སྐར་མའི་འགྲན་ཟླར་ཆས་འདུག། དེར་བརྟེན། ད་ལན་ཆུ་སྐྱེས་སྒྲོལ་མས་བོད་ཀྱི་བུད་མེད་གྲགས་ཆེན་ངོ་སྤྲོད་ཅེས་པའི་དེབ་ཅིག་བརྩམས་པ་ལ་བསྔགས་བརྗོད་དང་བཅས་དཔར་འགྲེམས་ཞུས་པ་ཡིན།
དེ་ལྟ་ནའང། དོ་སྣང་བྱ་དགོས་པ་ནི་དེབ་འདིར་འཁོད་པའི་བུད་མེད་ཀྱི་རིགས་ཡོད་དོ་ཅོག་དངོས་བྱུང་གི་མི་སྣ་ཤ་སྟག་ཏུ་ཁས་ལེན་དཀའ་བ་དང། ད་དུང་དེབ་འདིར་མ་འཁོད་པའི་བོད་ཀྱི་བུད་མེད་གྲགས་ཆེན་ཡང་ཡོད་ངེས་པ་རྟོགས་དགོས། གཞན་ཡང་འདིར་འཁོད་མི་སྣའི་འཁྲུངས་འདས་ཀྱི་ལོ་ཚིགས་དང་འཁྲུངས་ཡུལ་སོགས་ལ་མཐའ་གཅིག་ཏུ་ཡིན་མིན་གྱི་ཐག་གཅོད་བྱེད་དཀའ་བས་རེ་ཞིག་རྩོམ་པ་པོའི་འདོད་བློ་ལྟར་རང་སོར་བཞག་ཡོད། དེ་མིན། དེབ་འདིའི་སྟོད་ཀྱི་ཆ་ནི་ངོ་སྤྲོད་ཀྱི་རྣམ་པར་ཡོད་ལ། སྨད་ཆ་ནི་མིང་མཛོད་ལྟ་བུར་ཡོད་པའང་ཐུགས་སྣང་ཡོད་པར་མཛོད།
དེབ་འདི་ངེད་ལས་ཁུངས་ཀྱིས་གཞི་རིམ་གོང་འོག་བར་གསུམ་གྱི་སློབ་མའི་གཞོགས་འདེགས་སློབ་དེབ་ཏུ་དམིགས་ནས་དཔར་བ་ཡིན་ལ། གཞན་དུ་བོད་ཀྱི་བུད་མེད་ལ་ཉམས་ཞིབ་བྱེད་མཁན་དག་ལ་རམ་འདེགས་སུ་འགྱུར་བའི་དཔྱད་གཞིའི་རྒྱུ་ཆ་ཞིག་ཏུ་འགྱུར་བར་ཡང་བསམས་པ་ཡིན། ཡིན་ཡང། ད་དུང་འདིར་ལྷག་ཆད་ནོར་གསུམ་གྱི་སྐྱོན་ཆ་ཡོད་ངེས་པས། གཟུ་གནས་བློ་ལྡན་དག་གིས་དགོངས་འཆར་ལྷུག་སྩོལ་ཡོང་བར་མཁྱེན། ཤེས་རིག་ལས་ཁུངས་ཤེས་ཡོན་ལྷན་ཚོགས་ཀྱི་སྤྱི་ཁྱབ་ཡིག་ཚང་ནས། ཕྱི་ལོ་ ༢༠༡༣ ལོ་ཟླ་༡༢ ཚེས་༡༠ ལ།
སྤྱི་ཁྱབ་རྩོམ་སྒྲིག་པ།       བཀྲ་ཤིས་དོན་གྲུབ།
ལག་བསྟར་རྩོམ་སྒྲིག་པ།       འཇམ་དབྱངས།
ཞུ་དག་པ།           རེ་མདོ་སེང་གེ།

རྩོམ་པ་པོའི་གསལ་བཤད།

༄༅། །ཕྱི་ལོ་ ༢༠༡༠ ཟླ་ ༧ ཚེས་ ༡༤ ཉིན་དེབ་འདི་ལས་གཞི་ཞིག་གི་ངོ་བོ་ནས་འགན་ལེན་ཞུས་པ་ཡིན། གོང་ཚེས་བོད་གཞུང་ཤེས་རིག་ལས་ཁུངས་དང་ལྷན་བོད་ཀྱི་བུད་མེད་གྲགས་ཅན་རིགས་ངོ་སྤྲོད་ཀྱི་དེབ་ཆུང་འདི་རྩོམ་སྒྲིག་ཆོད་གན་བཞག་སྟེ། བོད་ཀྱི་ལོ་རྒྱུས་ནང་སྙན་གྲགས་ཡོད་པ་དང༌། ཡང་ན། ལོ་རྒྱུས་ཡིག་ལམ་ན་མཇལ་དུ་ཡོད་པ། དམངས་ཁྲོད་ཤོད་རྒྱུན་ཁྲོད་གནས་པའི་བུད་མེད་གྲགས་ཅན་རིགས་ཀྱི་ངོ་སྤྲོད་དེབ་ཆུང་འདི་འབྲི་རྩོམ་བྱེད་པ་ལ་ཞུགས།
འདི་ནི་ཕྱི་ལོ་ ༢༠༠༢ ལོ་དིལླི་བོད་ཁང་གི་སཾ་བྷོ་ཊའི་ཞིབ་འཇུག་སློབ་ཡོན་གནང་བ་ནས་ལོ་གསུམ་རིང་བོད་ཀྱི་བུད་མེད་སྐོར་ལ་ཉམས་ཞིབ་ཞུ་རྒྱུ་བྱུང་བ་དེའི་རྗེས་ཀྱི་བསམ་བློ་གཉིས་པ་ཞིག་ལས་བྱུང་བའང་ཡིན། དེ་དུས་ཀྱི་ཉམས་ཞིབ་དེ་ནི་དུས་བཅད་ཅིག་གི་འོག་ནས་བྱས་པ་ཞིག་ཡིན་སྟབས། དེ་རྗེས་སུའང་དོ་སྣང་དེ་མ་བརླག་པའི་ངང༌། དཔེ་ཀློག་སོགས་ཀྱི་སྐབས་སུ་བོད་ཀྱི་བུད་མེད་སྐོར་ལ་དོ་སྣང་མུ་མཐུད་ནས་བྱས་པ་ལས་དཔྱད་གཞིའི་ཡིག་ཆ་གང་འཚམ་རྙེད་སོན་བྱུང་བ་དེ་ཚོ་གསོག་ཉར་དང༌། བསྐྱར་ཞིབ་ལྟ་བུའང་མུ་མཐུད་བྱས་པ་ཡིན། འདི་ནི་ང་རང་བུད་མེད་ཅིག་གིས་བུད་མེད་སྐོར་ལ་དོ་སྣང་མུ་མཐུད་བྱས་པའི་སེམས་ཁམས་དང་འབྲེལ་བ་ཞིག་ཡིན་པར་ཡང་བརྗོད་ཆོག
ཐོག་མར་ངས་དེབ་ཆུང་འདི་ཚན་པ་རེ་རེ་བྱས་ནས་སྒྲུང་རྩོམ་གྱི་ལམ་ནས་འབྲི་རྩིས་ཞུས་པ་ཡིན། འོན་ཀྱང༌། སྒྲུང་རྩོམ་དུ་བྲིས་པ་ཡིན་ན། དེ་ལོ་རྒྱུས་ཀྱི་སྣང་བརྙན་ཞིག་ཡིན་པའི་ངོས་འཛིན་བྱེད་མཁན་ཧ་ཅང་ཉུང་ཉུང་རེད། ལྷག་པར་བྱིས་པ་ལོ་ཆུང་ཚོའི་ནང་དེ་བས་ཉུང་ཉུང་རེད་ལ། མཚམས་རེར་སྒྲུང་གི་རྣམ་པར་བྲིས་པ་དེ་རྟོག་བཟོ་རང་ཡིན་པའི་ངོས་འཛིན་བྱེད་ཀྱི་འདུག་སྟབས། ལོ་རྒྱུས་ཀྱི་བརྗིད་ཉམས་དེ་མ་བརླག་པར་ཉར་ཆེད། ངོ་སྤྲོད་རང་གི་རྣམ་པར་བྲིས་པ་ཡིན།
ད་ལྟའི་དེབ་ཆུང་འདི་ཕྱི་ལོ་ ༢༠༡༠ ཟླ་ ༧ ནས་ཕྱི་ལོ་ ༢༠༡༡ ཟླ་ ༣ བར་རྩོམ་སྒྲིག་བགྱིས་པ་ཞིག་ཡིན། རྩོམ་སྒྲིག་འདི་གྲུབ་ནས་ད་ལྟ་བར་ལོ་ངོ་གཉིས་མ་ཟིན་ཙམ་འགོར། ད་ལྟ་པར་སྐྲུན་གནང་འཆར་དང་ཆབས་ཅིག གནད་དོན་འགའ་རེའི་ཐད་ལ་བསྐྱར་ཞིབ་དགོས་པར་ཡང་མངགས་ཆ་གནང་དོན་ལྟར། དུས་ཚོད་ཀྱི་བྲེལ་ཟིང་ལ་དཔག་པའི་བསྐྱར་ཞིབ་རབ་རིབ་ཅིག་ཞུས་ཁུལ་ཡིན། ད་ཆ་བསམས་ན། ཐོག་མའི་དུས་སུ། ངས་དཔྱད་གཞིའི་རྒྱུ་ཆ་མང་པོ་ཞིག་བཀླགས། གཤིབ་སྡུར་ཡང་གང་འཚམ་ཞུས་པ་དེ་ཚོ། ངོ་སྤྲོད་རང་གི་རྣམ་པར་འབྲི་རྒྱུ་གཙོ་འདོན་ཞུས་པ་དེས། གནད་འགག་མང་པོ་ཞིག་གི་འདྲེན་ཁུངས་སམ་ཁུངས་གཏུགས་ཞུ་ཡུལ་གསལ་སྟོན་བྱེད་རྒྱུ་ཆད་ལུས་སུ་གྱུར་པ་ནི་ཆ་མ་ཚང་བའི་ཆ་ཤས་གལ་ཆེན་ཞིག་ཡིན་པ་ཚོར། གནས་དུས་ཀྱི་དབང་གིས། ད་ནི་སྔར་གྱི་དཔྱད་གཞིའི་རྒྱུ་ཆ་དེ་ཚོ་ཡང་བསྐྱར་བསྔོག་པའི་དུས་ཚོད་ཁྱོན་ནས་བྱུང་མ་སོང༌། དོགས་གནད་ཁ་ཤས་ཐད་བསྐྱར་ཞིབ་ཙམ་ལས་བྱུང་མ་སོང་སྟབས། ངོ་སྤྲོད་རྩོམ་ཡིག་རང་གི་རྣམ་པ་འདི་ནས་མི་འཇོག་རང་འཇོག་གྱུར་སོང་བར་ཀློག་མཁན་རྣམས་ལ་བཟོད་གསོལ་འབུལ་བ་ཡིན།
ཤེས་རིག་ལས་ཁུངས་ནས་འདི་འདྲ་ཞིག་འབྲི་བར་གོ་སྐབས་དང་མཐུན་འགྱུར་གནང་བ་དང༌། གཞན་ཡང༌། དེབ་ཆུང་འདི་འབྲི་ བའི་སྔ་རྗེས་སུ། དཔྱད་གཞིའི་ཡིག་ཆ་མཁོ་འདོན། དཔེ་དེབ་གཡར་པོ། དགོངས་ཚུལ་ཕན་ཐོགས་ཅན་གནང་མཁན་སོགས་རམ་འདེགས་གནང་མཁན་ཚང་མར། ཐུགས་རྗེ་ཆེ་ཞུ་བ་ཡིན། ཕྱི་ལོ་ ༢༠༡༣ ཟླ་ ༡༠ ཚེས་ ༨ ཉིན། ཆུ་སྐྱེས་སྒྲོལ་མས།
རྩོམ་སྒྲིག་པའི་གསལ་བཤད།

དགོས་དབང་གིས་དེབ་འདིའི་གཞུང་དངོས་ཀ་ཕྲེང་གི་གོ་རིམ་ལྟར་བསྐྱར་སྒྲིག་བྱས་ཡོད།

དཀར་ཆག

མདུན་ཤོག