༄༅། །འདི་ག་ཤེས་རིག་ལས་ཁུངས་ཀྱི་རིགས་ལམ་རྒྱུས་སྟོན་པ་དགེ་བཤེས་ངག་དབང་བརྩོན་འགྲུས་ལགས། ཕྱི་ལོ་༢༠༡༦ ཟླ་ ༡ ཚེས ༩ ནས་ ༡༡ བར་སྦེལ་ཀོབ་སམ་བྷོ་ཊ་སློབ་གྲྭ་ཁག་ ༣ དང་། ཕྱི་ཚེས་ ༡༢ ནས་ ༢༥ བར་ཚན་རིག་དགེ་རྒན་ཚོར་རིགས་ལམ་ཟབ་སྦྱོང་སློབ་ཁྲིད་གྲུབ་མཚམས། ཕྱི་ཚེས་ ༣༠ ནས་ཟླ་ ༣ ཚེས་ ༨ བར་ལྷོ་ཕྱོགས་མོན་གྷོ་གཞིས་གྲོང་དྲུག་པའི་ཉིན་སློབ་དང་གཞིས་གྲོང་གསུམ་པའི་གཏན་སློབ། ཀོ་ལེ་གྷལ་ཉིན་སློབ། ཧོན་སུར་ཉིན་སློབ། སྦེལ་ཀོབ་བདེ་སླར་ཉིན་སློབ། སྦེལ་ཀོབ་དབུས་ཉིན་སློབ། སྦེལ་ཀོབ་བོད་ཁྱིམ་གཏན་སློབ་བཅས་སློབ་ཁག་ ༧ ལ་རྒྱུས་སྟོན་ཞུས་ཡོད།
ཕྱོགས་མཚུངས་ཕྱི་ཟླ་ ༤ ཚེས་ ༡ ནས་ཟླ་ ༥ ཚེས་ ༣ བར་དྷ་ས་ཉེར་འཁོར་དཔེ་སྟོན་སློབ་གྲྭ་དང། གངས་སྐྱིད་དཔེ་སྟོན་ཉིན་སློབ། དྷ་སྟེང་བོད་ཁྱིམ། མེཀ་ལོ་བོད་ཁྱིམ་ཉིན་སློབ། དྷ་ཤོད་བོད་ཁྱིམ། ཌལ་ཧོར་གཏན་སློབ་བཅས་དང་། ཕྱི་ཟླ་ ༥ ཚེས་ ༡༦ ནས་ཕྱི་ཟླ་ ༦ ཚེས་ ༡༥ བར་བལ་ཡུལ་ཨ་ཏི་ཤ་སློབ་གྲྭ། རྣམ་རྒྱལ་མཐོ་སློབ། སྲོང་བཙན་སློབ་གྲྭ། གངས་ཏི་སེ་སློབ་གྲྭ། ལེགས་བཤད་ཚལ་སློབ་གྲྭ། རྣམ་རྒྱལ་འབྲིང་སློབ་བཅས་སློབ་ཁག་ ༦ ནང་རིགས་ལམ་རྟོག་ཞིབ་དང་རྒྱུས་སྟོན་ཞུས་ཡོད།
གཞན་ཡང་ཕྱི་ཟླ་ ༦ ཚེས ༢༡ ནས་ ༢༥ བར་མ་ན་ལི་དང་ཅོན་ཏ་ར་སམ་བྷོ་ཊ་སློབ་ཁག་ ༢ དང་། ཕྱི་ཚེས་ ༢༨ ནས་ཕྱི་ཟླ་ ༧ ཚེས་ ༢༨ བར་མ་སུ་རི་གཏན་
སློབ། མ་སུ་རི་བོད་ཁྱིམ། རཱཇ་པུར་བོད་ཁྱིམ། བདེ་སྐྱིད་གླིང་སཾ་བྷོ་ཊ། སྤོན་ཊ་སཾ་བྷོ་ཊ། པུ་རུ་ཝ་ལ་སཾ་བྷོ་ཊ་ཉིན་སློབ་བཅས་སློབ་ཁག་ ༦ རྒྱུས་སྟོན་ཞུས་ནས་ཕྱི་ཟླ་ ༨ ཚེས་ ༤ ནས་ ༡༠ བར་ལྷོ་ཕྱོགས་རིགས་ལམ་འདུ་འཛོམས་ལ་ཆེད་བཅར་གྱིས་རྟོག་ཞིབ་དང་ལམ་སྟོན་ཞུས་ཡོད།
དེ་རྗེས་ཕྱི་ཟླ་ ༨ ཚེས་ ༡༥ ནས་ ༣༡ བར་ར་སྦང་ལ་ཉིན་སློབ་དང་ཀ་སྦུག་གཏན་སློབ། རྡོར་གླིང་གཏན་སློབ། སྤོག་རེས་སྦོང་སློབ་གྲྭ བསུ་ན་མདའ་གཏན་བཅས་ལ་སློབ་རིགས་ལམ་རྒྱུས་སྟོན་ཞུས་རྗེས། ཕྱི་ཟླ་ ༩ ཚེས་ ༡ ནས་༧ བར་བྱང་ཤར་ཁུལ་གྱི་སློབ་ཁག་ ༡༣ གྱི་རིགས་ལམ་འདུ་འཛོམས་རྟོག་ཞིབ་དང་ལམ་སྟོན་ཞུས་པ་མ་ཟད།
ཕྱི་ཟླ་ ༩ ཚེས་ ༡༢ ནས་ཟླ་ ༡༠ ཚེས་ ༩ བར་བསྟན་འཛིན་སྒང་གཏན་སློབ། ཤེས་ལོངས་གཏན་སློབ། ཏེ་ཛུ་ཉིན་སློབ། མེ་འོ་ཉིན་སློབ་བཅས་བྱང་ཤར་ཁུལ་གྱི་སློབ་ཁག་ ༩ དང་། ཕྱི་ཟླ་ ༩ ཚེས་ ༡༣ ནས་ ༢༨ བར་སེ་ལ་ཀུའི་བོད་ཁྱིམ་སློབ་གྲྭ། ཧར་པ་སྤུར། གྷོ་རི་མ་ཕཱི་བོད་ཁྱིམ་བཅས་ལ་སྐོར་བསྐྱོད་ཀྱིས་རིགས་ལམ་རྒྱུས་སྟོན་ཞུས་ཡོད།
རྒྱུས་སྟོན་སྐབས་སློབ་ཁག་ཚང་མའི་ལྟ་གྲུབ་དགེ་རྒན་ཚོའི་སློབ་ཁྲིད་གནང་ཕྱོགས་རྟོག་ཞིབ་དང། ལོ་རེར་སློབ་ཁྲིད་གནང་སྟངས། ཐོག་མར་དབང་ཤེས་ཀྱི་ཡུལ་དུ་གྱུར་པའི་བརྗོད་གཞི་ལས་སླ་པོའི་རིགས་གདམ་དགོས་གལ་དང་། ཚད་གཞི་ཡང་སློབ་ཕྲུག་ཚང་མས་ཤེས་ཐུབ་པ་ཞིག་བསླབ་རྒྱུ། དྲི་བ་འགོད་སྟངས་དང་ལན་བཞི་མ་ནོར་བ་དང་། ཁྱབ་མ་ཁྱབ་གོ་བརྡ་འཕྲོད་ངེས་བྱ་རྒྱུ། གོ་རིམ་དང་པོ་མཚན་ཉིད་དབྱེ་བ་དང་མུ་གསུམ། གཉིས་པར་མུ་བཞི། གསུམ་པར་གཅིག བཞི་པ་ཐ་དད། ལྔ་པ་འགལ་བ། དྲུག་པ་དོན་གཅིག བདུན་པ་ཁྱབ་མཐའ་གཏོང་སྟངས་སོགས་སློབ་སྟོན་གནང་ཡོད། ཐོག་མར་འབྲེལ་ཡོད་ལྟ་གྲུབ་དགེ་རྒན་སོ་སོ་ནས་དུས་ཡུན་སྐར་མ་ལྔ་ཙམ་འགྲེལ་བཤད་བརྒྱབས་ནས་སློབ་མ་ཚོས་ཕན་ཚུན་ལན་མང་རྩོད་སྦྱོང་བྱས་ཏེ་སླར་ཡང་འགྲེལ་བཤད་བྱ་རྒྱུ། སློབ་མ་རེ་རེ་ལ་རྒྱུགས་བླངས་ནས་ཤེས་མཁན་ཚོས་མ་ཤེས་མཁན་ཚོར་བསླབ་བཅུག་རྒྱུ། གཞན་ཡང་དམ་བཅའ། རྩོད་ཟླ། རྒྱུགས་སྤྲོད་སོགས་བྱེད་སྟངས་ཆ་ཚང་ཉམས་མྱོང་རྣམས་གཞན་ལ་དངོས་སུ་བསྟན་པ་དང། མ་མཐའ་ནའང་ལོ་རེར་འཛིན་གྲྭ་དྲུག་པ་ཡན་གྱིས་སློབ་མ་རྣམས་ནས་བརྗོད་གཞི་མི་འདྲ་བའི་ཐོག་ནས་མུ་གསུམ་ཉི་ཤུ་དང་མུ་བཞི་ཉི་ཤུ་ཁྱབ་མཐའ་བཅས་བསླབ་དགོས་པ་སྐུལ་འདེད་གནང་ཡོད་པ་མ་ཟད། གང་ཤེས་པ་རྣམས་སློབ་ཚན་གཞན་དང་གཞན་སློབ་སྦྱོང་སྐབས་བེད་སྤྱོད་གནང་དགོས་པའི་ལམ་སྟོན་གནང་། འདི་ལོའི་སློབ་དུས་ཀྱི་རྒྱུས་སྟོན་མཐའ་མ་དེ་ཕྱི་ཟླ་ ༡༠ ཚེས་ ༣༡ ནས་ཕྱི་ཟླ་ ༡༡ ཚེས་ ༡༢ བར་སིམ་ལ་གཏན་སློབ་དང་ཌོ་ལན་ཇི་གཏན་སློབ་བཅས་སུ་གནང་གཏན་འཁེལ་ཡོད་པ་བཅས་སོ། །
