༄༅། །ཕྱི་ལོ་ ༢༠༡༤ ཟླ་ ༨ ཚེས་ ༢༠ ནས་ ༢༣ བར་ཉིན་གསུམ་རིང་འདི་ག་ཤེས་རིག་ལས་ཁུངས་ཤེས་ཡོན་ལྷན་ཚོགས་སྤྱི་ཁྱབ་ཡིག་ཚང་གིས་གོ་སྒྲིག་འོག དྲིལ་བསྒྲགས་ལྷག་པ་ཚེ་རིང་ཚོགས་ཁང་དུ་གཞི་རིམ་འོག་མའི་ཨང་རྩིས་སློབ་དེབ་གཏན་འབེབས་ཚོགས་འདུ་བསྐོངས་ཚོགས་གནང་།
ཚོགས་འདུའི་ནང་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ཀྱི་དགོངས་དོན་འོག་གཏན་ལ་ཕབ་པའི་གཞི་རིམ་འོག་མའི་ཨང་རྩིས་བསླབ་གཞི་རྩ་འཛིན་གྱི་འབྲུ་དོན་ལྟར། ཕྱི་ལོ་ ༢༠༡༣ ཟླ་༥ ཚེས་ ༨ ལ་གཞི་རིམ་འོག་མའི་སློབ་དེབ་བསྐྱར་ཞིབ་ཚོགས་ཆུང་གིས་བསྐྱར་ཞིབ་བྱས་པ་གཞིར་བཟུང་། བོད་ཁྱིམ་དང་ཤེས་རིག་གཉིས་ཀྱི་ཨང་རྩིས་སློབ་དེབ་བསྐྱར་ཞིབ་ཚོགས་མི་རྣམ་པ་ལྷན་འཛོམས་ཀྱིས་འདི་ལོའི་ཕྱི་ཟླ་གཉིས་པའི་ནང་གཏན་འབེབས་བྱས་འཕྲོས་འཛིན་གྲྭ་བཞི་པའི་ཨང་རྩིས་ཀྱི་སློབ་ཚན་ཁག་ཅིག་དང་། བོད་ཁྱིམ་ཤེས་ཡོན་འཕེལ་རྒྱས་སྡེ་ཚན་ནས་རྩོམ་སྒྲིག་དང་བསྐྱར་ཞིབ་གཏན་འབེབས་ཟིན་པའི་ཨང་རྩིས་སློབ་དེབ་དང་པོ་གཉིས་ལ་མཐའ་མའི་བསྐྱར་ཞིབ་དང་གཏན་འབེབས་གནང་གི་ཡོད་འདུག
ཚོགས་འདུའི་ནང་ཤེས་ཡོན་ལྷན་ཚོགས་སྤྱི་ཁྱབ་ཡིག་ཚང་གི་འགན་འཛིན་དང། འབྲེལ་ཡོད་འགན་འཁུར་བ། ཤེས་རིག་ལས་ཁུངས་ནས་བསྐོ་བཞག་གནང་བའི་བསྐྱར་ཞིབ་ཚོགས་མི་རྣམ་པ་དང་། བོད་ཕྲུག་ཁྱིམ་སྡེ་ནས་བསྐོ་བཞག་གནང་བའི་ཚོགས་མི་རྣམ་པ། ཨང་རྩིས་རྩོམ་སྒྲིག་པ་བཅས་མཉམ་ཞུགས་གནང་ཡོད།
ཐེངས་འདིའི་བསྐྱར་ཞིབ་དང་གཏན་འབེབས་ཀྱི་ཚོགས་འདུ་འདི་བཞིན་གཞི་རིམ་སློབ་གྲྭའི་སློབ་དེབ་རྩོམ་སྒྱུར་གྱི་ལས་གཞི་ཤེས་རིག་ལས་ཁུངས་ནས་ཡོངས་སུ་རྩིས་ལེན་གནང་རྗེས་ཀྱི་དང་པོ་དེ་ཡིན་འདུག
འཆར་གསལ་ལྟར་ན། ཕྱི་ལོ་ ༢༠༡༥ ལོའི་སློབ་དུས་ནས་འཛིན་རིམ་དང་པོའི་ཨང་རྩིས་སློབ་དེབ་གཞི་རིམ་སློབ་གྲྭ་ཁག་ཏུ་ལག་བསྟར་གནང་རྒྱུ་དང་། འཛིན་གྲྭ་གསུམ་པ་ནས་ལྔ་པ་བར་གྱི་ཨང་རྩིས་སློབ་དེབ་རྣམས་རིམ་བཞིན་གཞི་རིམ་སློབ་གྲྭ་ཁག་ཏུ་འགྲེམས་སྤེལ་གནང་སྟེ། ཕྱི་ལོ་ ༢༠༡༦ ལོར་དེ་དག་ལག་བསྟར་གནང་རྒྱུ་ཡིན་འདུག་པ་བཅས།