ཞང་ཁང་ལ་སོང༌།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
བསམ་ཡས་བཤད་གྲྭའི་ནང་གྲྭ་ཚུལ་ཁྲིམས་ཟེར་བ་ཞིག་ཡོད་པ་ཁོང་དགོན་པའི་ལས་དོན་ཞིག་གི་ཆེད་ཧོང་ཀོང་(རྒྱ་སྐད་ལ་ཞང་ཁང་ཟེར་)ལ་ཕེབས་དགོས་བྱུང་བ་རེད། ཁོང་དེར་ཕེབས་རྗེས་ཀྱི་ཉིན་ཤས་རྗེས་ཁོང་གི་སྲིང་མོ་ཁམས་ནས་བསམ་ཡས་སུ་ཁོང་ཐུག་འཕྲད་དུ་འབྱོར། ཤག་རོགས་གྲྭ་པ་དེས། ཚུལ་ཁྲིམས་ཉིན་ཤས་སྔོན་ཞང་ཁང་ལ་ཕྱིན་སོང༌། ཁྱེད་རང་ལྷོད་ལྷོད་སྡོད། ཅེས་ལབ་པར་སྲིང་མོ་དེས། ད་ནི་དཔེ་བསགས་ཚར་འདུག གྲྭ་པ་ལོག་པ་མ་ཟད་ད་དུང་གཞང་ཁང་ལའང་འགྲོ་ཕོད་པ་དེ་འདྲ་དཔེ་སྲིད་དོགས་མེད་བསམས་ཏེ་ངུ་ཤོར་བ་རེད། ཤག་རོགས་གྲྭ་པ་དེས། བུ་མོ་ཁྱེད་རང་དེ་འདྲ་ངུ་དགོས་དོན་ག་རེ་འདུག ཚུལ་ཁྲིམས་མགྱོགས་པོ་གྲྭ་སར་ལོག་ཡོང་གི་རེད། ཅེས་ལབ་པར་བུ་མོ་དེས། འོ་ཛི་སྐུ་ཞབས་ལགས། གཞང་ཁང་ལ་སོང་ནས་གྲྭ་པ་ལོག་ཚར་ནའང་ད་དུང་ཚུར་ལོག་རྒྱུ་ཞིག་ཨེ་ཡོད། ཅེས་ལབ་བོ། །
སྒོ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
བོད་མི་ཚོང་ཁྲོམ་བཤམས་ནས་སྡོད་མཁན་ཞིག་གི་སར་དབྱིན་ཇིའི་མི་ཞིག་སླེབས་ཏེ། ཚོང་པ་ལགས། བོད་སྐད་ཐོག་ནས་ཅ་ལག་འདི་ཚོ་རེ་རེའི་མིང་གང་ཡིན་གསུངས་རོགས་གནང་དང༌། ང་ཅ་ལག་ཉོ་དགོས་ཡོད་ལ་
ཞོར་ལ་བོད་སྐད་ཀྱང་སྦྱང་དགོས་ཡོད། ཅེས་ལབ་པར་བོད་མི་ཚོང་པ་དེས་དགའ་པོའི་ངང་ནས། འདི་ལ་གཟི་ཟེར། ཕ་གི་འཁོར་ལོ་རེད། འདི་སྒམ་རེད། འདི་ཕོར་པ་རེད། འདི་བྱི་རུ་རེད། ཅེས་རེ་རེ་བཞིན་ངོ་སྤྲོད་བྱས་ཀྱང་དབྱིན་ཇི་དེས་གཅིག་ཀྱང་མ་ཉོས་པར་ད་དུང་སྐད་ཆ་མང་པོ་དྲིས། གང་ཙམ་ནས་ཚོང་པ་དེའང་ཉོབ་སྐབས་དབྱིན་ཇི་དེས་སྒོ་ཞིག་ལ་མཛུབ་མོ་བཙུགས་ཏེ། ཕ་གིའི་མིང་ལ་ག་རེ་ཟེར་བ་རེད་དམ། ཞེས་དྲིས་པར་ཚོང་པ་དེས་སྐད་ཤུགས་ཆེན་པོས། སྒོ། སྒོ། ཟེར་ནས་ཡང་བསྐྱར་ཡང་བསྐྱར་ཐེངས་གཉིས་ལབ་པར་བརྟེན། དབྱིན་ཇི་དེའི་སེམས་ནང༌། ངས་ཅ་ལག་གཅིག་ཀྱང་མ་ཉོས་ཙང་ཚོང་པ་ཁོ་ཁོང་ཁྲོ་ལངས་ཏེ་རྒྱུགས། རྒྱུགས། go go ཞེས་ལབ་པ་རེད་བསམས་ཏེ། དེར་མ་བསྡད་པར་མགྱོགས་པོ་ཕྱིན་པ་རེད།
མི་གསུམ་བར་དོར་ཐུག་པ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ཉི་ཧོང་ནས་ཡིན་པའི་མི་ཞིག་དང་། བོད་ནས་ཡིན་པའི་མི་ཞིག ཨ་རི་ནས་ཡིན་པའི་མི་གཅིག་བཅས་མི་གསུམ་བར་དོར་ཐུག་པ་རེད། ཁོང་གསུམ་གྱི་ཕན་ཚུན་བར་དོར་ཡོང་དགོས་དོན་གང་ཡིན་སྐོར་སྐད་ཆ་དྲིས་པར། དང་པོ་ཉི་ཧོང་པ་དེས་བརྗོད་གསལ། ང་ནི་འཛམ་གླིང་དམག་ཆེན་གཉིས་པའི་སྐབས་སུ། ཨ་མེ་རི་ཀའི་དམག་མི་ཚོས་ང་ཚོའི་ལུང་པར་རྡུལ་ཕྲན་མཚོན་ཆ་གཡུགས་ཏེེ། མི་དང་སྲོག་ཆགས་སྡོད་གནས་མེད་པ་བཟོས་ཙང་ང་འདིར་གནས་སྤོས་པ་ཡིན་ཞེས་བཤད། དེའི་རྗེས་བོད་ནས་ཡོང་མཁན་དེས། ཕྱི་ལོ་ ༡༩༥༩ ལོར་བོད་དུ་རྒྱ་མིས་བཙན་འཛུལ་བྱེད་སྐབས། རྒྱ་དམག་སྟོང་ཕྲག་མང་པོས་སྐོར་བ་བརྒྱབ་ནས་འཛམ་གླིང་ནང་ལ་འགྲོ་སའི་ལམ་བཀག་སོང་བར་བརྟེན་ང་འདིར་མ་ཡོང་རང་ཡོང་བཟོས་སོང༌། ཞེས་བཤད། དེ་ནས་ཨ་རི་ནས་ཡོང་མཁན་མི་དེས། ང་དང་པོ་ཨ་རིར་འགྲོ་དུས་ལོ་སུམ་ཅུ་བསྡད་ཆོག་པའི་ཝི་ས་རག་སོང༌། དེ་ནས་ངས་ཨ་རིར་འཛམ་གླིང་ཚོང་འབྲེལ་བསྟི་གནས་ཁང་ནང་ལས་ཀ་བྱས་ནས་སྡོད་སྐབས། ༢༠༠༡ ཟླ་ ༩ ཚེས་ ༡༡ ཉིན་ཏག་ཏག་ཨ་རིར་སྡོད་རྒྱུའི་ཝི་ས་རྫོགས་སོང༌། བྱས་ཙང་ང་འདིར་ཝི་ས་ཞུ་བར་སླེབས་པ་ཡིན། ཝི་ས་རག་རྗེས་ཨ་རིར་སླར་ཡང་འགྲོ་རྒྱུ་ཡིན་ཞེས་བཤད་དོ། །
ཤེས་རབ་སྙིང་པོ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
བལ་ཡུལ་ནང་ཡོད་པའི་མི་ཚང་ཞིག་གིས་གྲྭ་བ་ཁ་ཤས་རང་གི་ནང་དུ་ཞབས་བརྟན་ལ་གདན་འདྲེན་ཞུས། དེའི་རྗེས་སྐུ་ཞབས་ཚོས་ཤེས་རབ་སྙིང་པོ་འདོན་བཞིན་པའི་སྐབས་སྦྱིན་བདག་དེས། མིག་མེད། རྣ་བ་མེད། སྣ་
མེད། ལྕེ་མེད། ལུས་མེད། ཅེས་པ་རྣམས་ཐོས་པ་དང་སྦྲགས་ནང་མི་རྣམས་སྐད་བཏང་སྟེ། དེ་རིང་སྐུ་ཞབས་ཚོས་ཞལ་འདོན་ཁྱད་མཚར་ཞིག་འདོན་གནང་གི་འདུག ཅེས་ཚང་མས་ཡག་པོ་ཉན་སྐབས། དྲི་མེད། རོ་མེད། རེག་བྱ་མེད། ཆོས་མེད་དོ། །ཞེས་འདོན་པ་ཐོས་པས་བུ་ཆེ་བ་དེས། པཱ་ལགས་ཞབས་བརྟན་འདི་འདྲ་འདོན་མ་གནང་རོགས་ཞུས་དང༌། ང་ཚོའི་ནང་ལ་གང་ཡང་མེད་པ་ཆགས་པ་འདུག བུ་མོས་སྐུ་ཞབས་ཚོས་ཞལ་འདོན་རྫུན་མ་འདོན་གྱི་འདུག་ཅེས་ལབ། མ་རྒན་ཆོས་དད་ཆེན་པོ་ཡོད་པ་དེས། ཁྱེད་ཚོས་ཧ་གོ་ཡི་མ་རེད། ཉན་མི་དགོས། ཞེས་དེར་སྡོད་མ་བཅུག དེ་ནས་སྤོ་བོ་དང་རྨོ་མོ་གཉིས་ཀྱིས་ལེགས་པར་ཉན་སྐབས། དེ་བཞིན་དུ་སྡུག་བསྔལ་བ་དང་ཀུན་འབྱུང་བ་དང༌། འགོག་པ་དང་ལམ་མེད། ཅེས་འདོན་བཞིན་པ་ཐོས་པས་རྨོ་མོ་དེ་ཧང་སངས་ཏེ། སྐྱབས་སུ་མཆི། མིག་དང་རྣ་བ་ཚང་མ་མེད་ནའང་ད་དུང་སྡུག་བསྔལ་མེད་པ་དེ་ནི་སངས་རྒྱས་ལོས་ཡིན། ང་ཚོ་ནི་རྐང་ལག་གང་རུང་གཅིག་མེད་ནའང་སྡུག་བསྔལ་ག་ཚོད་ཡོང་གི་མ་རེད་དམ། ཞེས་གཅིག་གིས་གཅིག་ལ་བཤད་པའི་སྐད་ཆ་དེ་དག་སྐུ་ཞབས་ཚོས་ཐོས་ཏེ། འཇིག་རྟེན་རྨོངས་པ་ཟེར་རྒྱུ་དེ་འདི་འདྲ་ཞིག་རེད་ཨང་སྙམ་སྟེ་ཤ་ཚ་ཞིང་གད་མོའང་ཤོར་དགོས་བཟོས།
ཁྲིད་གས།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
རྒྱ་གར་བ་ཡུལ་སྐོར་སྤྲོ་འཆམ་པ་བུ་མོ་མཛེས་མ་ཞིག་བོད་པའི་ཚོང་ཁང་ཞིག་ལ་ཡོང་ནས་ཅ་ལག་ཁ་ཤས་ཉོས། འགྲོ་རན་ཁར་ཚོང་དཔོན་ཕོ་གསར་དེར་ཅ་ལག་སྟེང་བྲིས་ཡོད་པའི་རིན་པ་རྣམས་ཆད་ལུས་མེད་པར་སྤྲད་དེ། ཋཱིཀ་ ཧཻ་ ཞེས་ལབ་སྟེ་འཛུམ་ཙམ་བྱས། ཚོང་དཔོན་དེས་རྒྱ་གར་སྐད་ཚིག་གཅིག་ཀྱང་ཤེས་ཀྱི་མེད་པས། བུ་མོ་མཛེས་མ་དེས་བོད་སྐད་རྒྱག་ཤེས་ཀྱི་འདུག་པ་མ་ཟད། ད་དུང་ཁྲིད་གས་ཞེས་མོ་རང་ཁྲིད་ཀྱི་ཡིན་པས། ཞེས་ཤོད་ཀྱིན་འདུག་བསམས་ཏེ་དགའ་ཐག་ཆོད་དེ། འོ་ཛི་འཁྲིད་དང་འཁྲིད། བུ་མོ་མཛེས་མ་ཁྱེད་རང་འདྲ་བ་མ་འཁྲིད་ན་གཞན་སུ་འཁྲིད། ཅེས་བུ་མོ་དེའི་ལག་པ་ནས་འཇུས་ཏེ་ནང་ལ་འཁྲིད་རྩིས་བྱེད་སྐབས། བུ་མོ་དེ་ནི་ཁོང་ཁྲོ་ཆེན་པོ་ལངས་ནས་མོ་རང་གིས་རྐང་པར་གྱོན་པའི་ལྷམ་ཡ་གཅིག་མར་ཕུད་དེ། ཚོང་པ་དེར་གཞུ་རྩིས་བྱས་པས་ཚོང་དཔོན་དེ་བྲོས་འགྲོ་དགོས་བྱུང་བ་རེད། ཚོང་དཔོན་ཁོ་སྐད་ངན་ཤོར་གྱིན། ཧིན་རྒྱ་གར་བུ་མོ་དེ་ཧམ་པ་ཚ་བ་ལ། དང་པོ་ང་ཁྲིད་གས། ཞེས་ལབ་མཁན་མོ་རང་རེད། ཨ་ནི་ངས་འཁྲིད་རྩིས་བྱེད་སྐབས་ཡང་མོ་རང་ཁོང་ཁྲོ་ལང་དགོས་དོན་གང་ཡིན་ནམ། ཞེས་འུ་ཐུག་ངང་ལུས་སོ། །
ར་ཡིག
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
སློབ་གྲྭ་ཞིག་གི་ནང་ལ་གསར་དུ་ཞུགས་མཁན་སློབ་ཕྲུག་མང་པོ་སླེབས་ཡོད་པ་ཚོར་འཛིན་གྲྭ་གང་དུ་གཏོང་ཚོད་ལྟའི་ཡིག་རྒྱུགས་གཏོང་གི་ཡོད་པས། ཐེངས་དེར་ཡང་ཕྲུ་གུ་རེ་རེ་བཞིན་ཡིག་རྒྱུགས་གཏོང་སྐབས་
ནག་པང་ངོས་ལ་བོད་ཡིག་འབྲི་རུ་འཇུག་གི་ཡོད། དེའི་རྗེས་ཚེ་རིང་གི་རིམ་པར་སླེབས་ཏེ་རྒན་ལགས་ཀྱིས། ཚེ་རིང༌། ཁྱེད་རང་གིས་ནག་པང་སྟེང་དུ་ར་ཡིག་གཅིག་བྲིས་ལབ་པ་རེད། ཚེ་རིང་ནི་ཡི་གེ་ན་གཅིག་ཀྱང་མི་ཤེས་མཁན་ཞིག་ཡིན་སྟབས། ཁོ་པས་ནག་པང་སྟེང་དུ་རྭ་ཅོ་དང༌། རྔ་མ། དེ་བཞིན་རྐང་ལག་ཆ་ཚང་ལྡན་པའི་ར་ཞིག་བྲིས་པས། འཛིན་གྲྭ་དེའི་ནང་ཡོད་པའི་སློབ་ཕྲུག་ཚང་མ་གད་མོ་ཧ་ཅང་ཤུགས་ཆེན་ཞིག་ཤོར་བ་རེད། དགེ་རྒན་དེས། འོ་ཛི་འདི་འདྲ་མ་རེད། ཅེས་རང་ཉིད་ཀྱིས་ནག་པང་དུ་ར་ཡིག་གཅིག་བྲིས་ཏེ། ར་ཡིག་ཟེར་ན་འདི་ལ་ཟེར་བ་རེད། ཅེས་ཚེ་རིང་ལ་གསལ་བཤད་གནང་བར་ཚེ་རིང་གིས་དེར་ཧང་སངས་སངས་ངང་ནས་བལྟས་ཏེ། ཁྱད་མཚར་ལ། རྒྱ་གར་ལུང་པའི་ར་ལ་རྐང་ལག་དང་རྭ་ཅོ་རྔ་མ་གང་ཡང་མི་འདུག ཅེས་ལབ་ནས་ནག་པང་ལྡེབས་སུ་མིག་ཧུར་རེར་ཅེར་ནས་བསྡད་སྐབས། འཛིན་གྲོགས་གཞན་རྣམས་སྔར་ལས་ཀྱང་ལྷག་པའི་གད་མོ་ཤུགས་ཆེ་ཤོར་དགོས་བཟོས་སོ། །
མི་སྣ་རིང་པོ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
དོན་ཡོད་ཟེར་བའི་མི་སྣ་ཁུག་རིང་པོ་ཞིག་ཡོད་པ་དེས་རང་གི་བུ་ལ་བརྗོད་དོན། བུ། མི་སྣ་རིང་པོ་དེ་ཚོ་ལས་སླ་པོར་ཁོང་ཁྲོ་ལང་གི་མ་རེད། ཅེས་བཤད་པ་རེད། དེ་ནས་ཉིན་ཤས་སོང་རྗེས་བུ་དེ་སློབ་སྦྱོང་མ་བྱས་པར་འཚུབ་ཐེར་ཁོ་ན་བྱས་པར་སོང༌། པ་ཕ་དེ་ཁོང་ཁྲོ་ཆེན་པོ་ལངས་ཏེ་ཉེས་རྡུང་གཏོང་དགོས་བྱུང་བ་རེད། སྐབས་དེར་བུ་དེ་ངུ་ཡིན་ངུ་ཡིན་ལ། པཱ་ལགས་ཀྱིས་ང་ལ་སྐད་ཆ་རྫུན་མ་གསུངས་འདུག མི་སྣ་ཁུག་རིང་པོ་དེ་ཚོ་ལས་སླ་པོར་ཁོང་ཁྲོ་ལང་གི་མ་རེད་གསུངས་པ་མ་ཡིན་ནམ། འོ་ན་པཱ་ལགས་ཁྱེད་རང་ལ་སྣ་ཁུག་རིང་པོ་འདུག་ག ག་རེ་བྱས་ནས་ལས་སླ་པོར་ཁོང་ཁྲོ་ལངས་སོང་ངམ། ཞེས་ཞུས་པར་པ་ཕས་སྐད་ཆ་དེ་གོ་བ་དང་གད་མོ་ཤོར་ཏེ། ཡིན་རྒྱུ་དེ་འདྲ་རེད། ཡིན་ནའང་ཁྱེད་རང་གིས་འཚུབ་ཐེར་མང་པོ་བྱས་ཙང༌། པ་ཕའི་སྣ་ཁུག་ཡང་ཐུང་དུ་སོང་འདུག ཅེས་མཚར་གཏམ་བཤད་པས་ཕ་བུ་གཉིས་གད་མོ་ཤོར་དགོས་ཆགས།
མིག་ལ་བརྟག་དཔྱད་བྱེད་དུ་བསྐྱོད་པ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
མི་གཅིག་སྨན་ཁང་ནང་མིག་བརྟག་དཔྱད་བྱེད་དུ་སོང་བ་ན། སྨན་པས་ག་རེ་གནང་སོང་ངམ་ཞེས་བརྗོད་པར་ཁོ་པས། ངའི་མིག་གིས་ཡག་པོ་ཁྱོན་ནས་མཐོང་ཐུབ་ཀྱི་མི་འདུག ག་རེ་བྱས་ན་དྲག་གི་རེད་དམ་ཨེམ་ཆི་
ལགས། ཞེས་ཞུས་པར་ཨེམ་ཆི་དེས། དེ་ལས་སླ་པོ་རེད། མིག་ཤེལ་ཞིག་བསྒྲིགས་ནས་གྱོན་ན་ཡག་པོ་གཟིགས་ཐུབ་ཀྱི་རེད། ཅེས་གསུངས་པར་མི་དེ་ཧ་ཅང་དགའ་ནས། ད་ཡིན་ན་དཔེ་མི་སྲིད་པའི་ཡག་པོ་བྱུང་སོང༌། དེ་མིན་ང་ལ་ག་དུས་ཡིན་ནའང་རྨི་ལམ་ནང་ལ་གདོན་འདྲེ་འདྲ་པོ་དེ་འདྲ་དང་། སེམས་ཅན་ཞེད་སྣང་ཚ་པོ་རྐྱང་རྐྱང་མ་གཏོགས་ཡག་པོ་གཅིག་ཀྱང་མཐོང་རྒྱུ་མི་འདུག བྱས་ཙང་དེ་རིང་ནས་བཟུང་མིག་ཤེལ་བསྒྲིགས་ཚར་རྗེས་མཚན་ལའང་མིག་ཤེལ་མ་ཕུད་པར་གྱོན་གྱི་ཡིན། ཞེས་ཞུས་པར་སྨན་པ་ཁོ་པར་ཁོང་ཁྲོ་ལངས་ཏེ། ཁྱོད་རང་ཆོ་མེད་པའི་སྐད་ཆ་མ་ཤོད་དང༌། ང་ཚོས་གཉིད་ཁུག་དུས་གྱོན་རྒྱུའི་མིག་ཤེལ་དེ་འདྲ་བཟོ་ཤེས་ཀྱི་མེད། ཅེས་གཤེ་གཤེ་བཏང་བར་མི་དེས། ད་ཡིན་ན་སྨན་པས་ཀྱང་ཡག་པོ་མཐོང་རྒྱུ་བཟོ་ཐུབ་ཀྱི་མི་འདུག་ལབ་ནས་ཕྱི་རུ་ཐོན་སོང་བ་རེད།
བྱ་དེ་ཁག་ཅིག་ལ་དང་པོ་ནས་རྐང་པ་གཅིག་ལས་མེད།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
མི་ཞིག་གིས་བྲེལ་འཚུབ་ངང་ནས་ཁྲོམ་ནས་བྱ་ཤ་གཅིག་ཉོས་ཏེ་ནང་ལ་ལོག་སོང་བ་རེད། ནང་དུ་སླེབས་རྗེས་འགྱིག་ཤོག་ནང་ནས་ཕྱིར་བཏོན་ཏེ་ལྟ་སྐབས། བྱ་ཤ་དེ་ལ་རྐང་པ་གཅིག་མ་གཏོགས་མེད་སྟབས། ཁོ་པས་ལམ་སང་བྱ་ཤ་ཕྱིར་སློག་བྱེད་པར་སོང་སྟེ་ཚོང་པ་དེར། བྱ་ཤ་འདི་ལ་རྐང་པ་གཅིག་མ་གཏོགས་མི་འདུག གང་ཡིན་ནམ། ཞེས་རྙོག་གྲ་བཤད་པར། ཚོང་པ་དེས་དེ་བས་ཧམ་པ་ཆེ་ཙམ་ངང་ནས། འོ་ཛི་ཁོང༌། བྱ་དེ་ཁག་ཅིག་ལ་དང་པོ་ནས་རྐང་པ་གཅིག་ལས་མེད། གལ་ཏེ་ཁྱེད་རང་ཡིད་མ་ཆེས་ན་བྱ་གསོ་ཁང་ལ་བལྟ་བར་སོང༌། བྱ་གསོ་ཁང་ནང་སླེབས་རྗེས་ཡག་པོ་ལྟ་སྐབས། བྱ་དེ་ཁག་ཅིག་རྐང་པ་ཡ་གཅིག་བསྐུམས་ནས་སྡོད་ཀྱི་ཡོད་སྟབས། ཁོ་པའི་སེམས་ནང༌། དངོས་གནས་ཚོང་པ་དེས་བཤད་པ་ལྟར་བྱ་དེ་ཁག་ཅིག་ལ་རྐང་པ་ཡ་གཅིག་ལས་མི་འདུག་སྙམ་སྟེ་ལོག་འགྲོ་དགོས་བྱུང་ངོ༌། །
ང་ཚོ་ཨ་རིའི་གྲོང་ཁྱེར་ནིའུ་ཡོཀ་ལ་འགྲོ་འདོད་འདུག
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ཨ་རིའི་ཚན་རིག་སྡེ་ཚན་གྱི་ཚོགས་མི་འགའ་ཤས་ཤིག་བོད་ཀྱི་འབྲོག་པའི་ས་ཁུལ་དུ་དེང་རབས་ཀྱི་འཕྲུལ་ཆས་ཀམ་པུ་ཊར་གྱི་སྐོར་གོ་རྟོགས་སྤེལ་བར་བསྐྱོད་པ་རེད། ཚན་རིག་པ་ཁོང་རྣམས་བོད་ཀྱི་འབྲོག་པའི་ས་
ཁུལ་དུ་འབྱོར་རྗེས་དེང་རབས་ཀྱི་འཕྲུལ་ཆས་ཀམ་པུ་ཊར་ཞེས་པ་དེའི་དགེ་མཚན་སྐོར་ལ་འགྲེལ་བཤད་བརྒྱབ་སྟེ། ཀམ་པུ་ཊར་ནི་བེད་སྤྱོད་ཆེ་ལ་ཤོང་ཚད་དེ་བས་ཆེ་བའི་འཕྲུལ་ཆས་ཤིག་ཡིན། དཔེར་ན་ཀམ་པུཊར་ཞིག་གི་ནང་འཛམ་བུ་གླིང་བླུགས་ནའང་ཤོང་གི་རེད། ཅེས་སོགས་ཀྱི་འགྲེལ་བརྗོད་བྱས་པར། བོད་ཀྱི་འབྲོག་པ་རྣམས་ཡ་མཚན་ཆེན་པོ་སྐྱེས། དེའི་རྗེས་ཁོང་ཚོ་ལོག་འགྲོ་ཁར་འབྲོག་པ་ཚོས། ཐུགས་རྗེ་ཆེ་ཞུས་པ་དང་སྦྲགས། རྗེས་སུ་ཁྱེད་རྣམས་འདི་ཕྱོགས་ཕེབས་སྐབས་ཨ་རིའི་གྲོང་ཁྱེར་”ནིའུ་ཡོཀ་”ཟེར་བ་དེ་ཀམ་པུ༌ཊར་ནང་ལ་བླུགས་ནས་འཁྱེར་ཡོང་རོགས་གནང་། ང་ཚོ་ཨ་རིའི་གྲོང་ཁྱེར་དེར་འཆམ་འཆམ་ཞིག་ལ་འགྲོ་འདོད་འདུག ཅེས་ལབ་པར་ཨ་རིའི་ཚན་རིག་སྡེ་ཚན་གྱི་ཚོགས་མི་དེ་ཚོས་ཁོང་རང་ཚོས་འགྲེལ་བཤད་ག་ཚོད་བྱས་ཀྱང་གོ་བརྡ་སྤྲོད་སྟངས་ནོར་བ་ཧ་གོ་སྟེ་ངོ་ཚ་པོ་བྱུང་བ་རེད།
ལས་སླ་པོ་རེད།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ཡུལ་སྐོར་སྤྲོ་འཆམ་པ་མང་པོ་ཞིག་གནའ་རྫས་རྩ་ཆེན་རིགས་ལ་ལྟ་བར་འགྲོ་སྐབས། ཁོང་ཚོ་འགྲེམས་སྟོན་ཁང་ཞིག་གི་ནང་འབྱོར། འགྲེམས་སྟོན་ཁང་དེའི་ནང་དངོས་པོ་ཧ་ཅང་ཡ་མཚན་ཅན་ཞིག་མཐོང་བ་རེད། སྐབས་དེར་ལྟ་སྐོར་བ་ཞིག་གིས་འགྲེམས་སྟོན་ལས་བྱེད་ཅིག་ལ། ཁོང་། དངོས་པོ་ཡ་མཚན་ཅན་འདིའི་མིང་ལ་གང་ཟེར་རམ། ཞེས་དྲིས་པར་མི་དེས། འདི་ཡི་མིང་ལས་སླ་པོ་རེད། ཅེས་ལབ་པར་ཡང་ལྟ་སྐོར་བ་དེས། ལས་སླ་པོ་ཡིན་ན་གསུངས་དང་། ཞེས་ལབ་པར་མི་དེས་སླར་ཡང་། ལས་སླ་པོ་རེད། ཅེས་ལབ། ཡང་ལྟ་སྐོར་བ་དེས། ལས་སླ་པོ་ཡིན་ན་མི་གསུང་བ་གང་ཡིན་ནམ་ཞེས་དྲིས། འགྲེམས་སྟོན་ལས་མི་དེ་འུ་ཐུག་སྟེ། ངས་ཐེངས་ག་ཚོད་ལབ་མ་བྱུང་ངམ། ད་དུང་ཡང་མིང་ལས་སླ་པོ་དེ་ཤེས་ཀྱི་མི་འདུག་གམ། ཞེས་གཤེ་གཤེ་བཏང་། སྤྲོ་འཆམ་པ་དེ་ཚོས་ཁྱེད་རང་གིས་མིང་མ་ལབ་པར་ང་ཚོས་ག་འདྲ་ཟེ་ཧ་གོ་གི་རེད་དམ་ལབ་པར་ལས་མི་དེས། འོ་ཛི་ངས་ཐེངས་ག་ཚོད་ལབ་ཀྱང་གོ་གི་མི་འདུག ད་ཡག་པོ་ཉོན་ཨ། དངོས་པོ་འདིའི་མིང་ལ། ལས་སླ་པོ་ཟེར་གྱི་ཡོད། ཅེས་གསལ་བཤད་བྱས་པས་མཐར་སྤྲོ་འཆམ་པ་ཚོས་གཞི་ནས་དངོས་པོ་ཡ་མཚན་ཅན་དེའི་མིང་ག་གོ་ཐུབ་པ་བྱུང་སྟེ། ལས་སླ་པོ་ཟེར་བའི་མིང་འདི་ནི་དངོས་གནས་ལས་སླ་པོ་ཞིག་རེད་མི་འདུག དེ་ལས་འདིའི་མིང་ལ་དཀའ་ལས་ཁག་ལབ་ན་ཡག་ཤོས་རེད། ཅེས་ལབ་པས་མི་ཚང་མ་གད་མོ་ཤོར་དགོས་པ་བྱུང་ངོ་། །
རྫུན་བཤད་ཆོག་པའི་ཉི་མོ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ཕྱི་ཟླ་བཞི་པའི་ཟླ་འགོ་ཤར་བའི་ཉི་མོ་དགོན་པ་ཞིག་གི་ནང་ལ་གྲྭ་པ་ཚོས་གཅིག་གིས་གཅིག་ལ་རྫུན་བཤད་རེས་བྱས་ཏེ་རྙོག་གྲ་ཆེན་པོ་ཆགས། དགོན་པའི་མཁན་པོས། དེ་ལྟར་རྙོག་གྲ་ཆགས་ཡོད་པ་མཁྱེན་ཏེ་གྲྭ་པ་དེ་
ཚོ་སྐད་བཏང་ནས་གཅིག་གིས་གཅིག་ལ་རྫུན་བཤད་དགོས་དོན་གང་ཡིན་ནམ། ཞེས་བཀའ་འདྲི་གནང་བར། གྲྭ་པ་ཞིག་གིས་མཁན་པོར་ཞུས་དོན། ང་ཚོས་རྫུན་བཤད་དགོས་དོན་ནི་དེ་རིང་གི་ཉི་མོ་འདི་ནི་རྒྱལ་སྤྱིའི་ནང་རྫུན་བཤད་ཆོག་པའི་ཉི་མོའི་དུས་ཆེན་ཡིན་པའི་རྒྱུ་མཚན་གྱིས་ཡིན་ཞེས་ཞུས། སྐབས་དེར་མཁན་རིན་པོ་ཆེས་སླར་ཡང་། ཨ་ལས་ཁྱེད་ཚོས་རྫུན་བཤད་ཆོག་པའི་ཉི་མོ་ཡིན་པའི་རྒྱུ་མཚན་གྱིས་རྫུན་ཤོད་ཀྱི་ཡོད་དམ། ཞེས་བཀའ་འདྲི་གནང་བར་གྲྭ་པ་ཚོས། ལགས་དེ་རང་ཡིན། ཞེས་ཞུས་པར་མཁན་རིན་པོ་ཆེ་མཆོག་གིས། འོ་ན་རྒྱ་གར་གྱི་ཆང་ས་རྒྱག་པའི་དུས་ཆེན་ཡིན་པའི་རྒྱུ་མཚན་གྱིས་ཁྱེད་ཚོ་ཡང་ཆང་ས་རྒྱག་རྒྱུ་ཡིན་ནམ། ཞེས་གསུངས་པར་གྲྭ་པ་དེ་ཚོ་ཁ་ཁུ་སིམ་མེར་སྡོད་དགོས་བྱུང་། སླར་ཡང་མཁན་པོས། རབ་ཏུ་བྱུང་བ་རྣམས་ཀྱིས་རྫུན་ནམ་ཡང་བཤད་མི་རུང་། སངས་རྒྱས་བཅོམ་ལྡན་འདས་ཀྱིས་མི་དགེ་བ་བྱེད་པའི་དུས་ཆེན་ཞིག་ནམ་ཡང་གནང་མེད། ཅེས་བཀའ་བཀྱོན་གནང་སྟེ་དགོན་པ་དེར་རྫུན་གཏམ་ནམ་ཡང་བཤད་མི་ཆོག་པའི་སྒྲིག་ཁྲིམས་གསར་པ་ཞིག་བཟོས་སོ། །
ཆང་ཁང༌།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ཐེ་ཝན་གྱི་རྒྱལ་ས་ཐེའེ་པེ་ལ་དགོན་པ་ཞིག་ཡོད་ཅིང་། ཉིན་གཅིག་དགོན་པའི་དབུ་འཛིན་གྱིས་གྲྭ་ཆུང་ཞིག་ལ། ཁྱེད་ཚོའི་རྒན་ལགས་སྐད་གཏོང་བར་འགྲོ་དགོས་ལབ། གྲྭ་ཆུང་དེས་ཆུ་ཚོད་གཅིག་ཙམ་བཙལ་ཡང་མ་རྙེད་པས་མི་རྒྱུས་ཡོད་ཞིག་ལ་རྒན་ལགས་ག་པར་ཕེབས་དྲིས་པར། མི་དེས་ཆང་རག་བཏུང་སའི་ས་ཆ་ཞིག་ལ་ཕྱིན་སོང་ལབ། གྲྭ་ཆུང་དེས་དེར་སོང་ནས་ཡར་མར་བལྟས་པས་རྒན་ལགས་ར་བཟི་སྟེ་མི་གཞན་དང་འཁྲུག་པ་རྒྱག་བཞིན་ཡོད་པ་མཐོང༌། དེ་མ་ཐག་དེར་སོང་སྟེ་རྒན་ལགས་དགོན་པའི་ནང་ཁྲིད། སང་ཉིན་དེར་རྒན་ལགས་ར་བཟི་དྭངས་ཏེ་སློབ་ཕྲུག་ཚོར་ཡིག་རྒྱུགས་གཏོང་པར་ཕེབས། དེ་ཉིན་ཁ་ཉིན་རྒན་ལགས་ཁོང་རང་སྐད་གཏོང་བར་འགྲོ་མཁན་གྱི་གྲྭ་ཆུང་དེ་ཡིག་རྒྱུགས་མ་འཕྲོད་པར་བརྟེན་རྒན་ལགས་ཀྱིས་གྲྭ་ཆུང་དེར། ཁ་སང་ཁྱེད་རང་སློབ་སྦྱོང་མ་བྱས་པར་ག་པར་སོང་བ་ཡིན་ནམ་ཞེས་དྲིས། སློབ་ཕྲུག་གཞན་ཞིག་གིས་ཁོ་ཆང་ཁང་ནང་ལ་སོང་འདུག་ཞུས། རྒན་ལགས་ཀྱིས་གྲྭ་ཆུང་དེར་འགྲམ་ལྕག་ཚ་ཐག་ཆོད་གཅིག་གཞུས་ཏེ། མི་སྡུག་རིགས་སྡུག་ཚད་འགྲོ་སར་ཁྱེད་རང་མ་གཏོགས་སུ་འགྲོ་ཡི་རེད་དམ། ཞེས་ལབ་པར་གྲྭ་ཆུང་དེས། རྒན་ལགས་ཁྱེད་རང་འགྲོ་ཡི་རེད། ཅེས་ལབ་པར་ཡང་རྒན་ལགས་དེས་འགྲམ་ལྕག་ཞུ་གྲབས་བྱེད་སྐབས་གྲྭ་ཆུང་དེས་མིག་ཆུ་གཏོང་གིན་ལ། ངས་རྒན་ལགས་ཁྱེད་རང་སྐད་གཏོང་བར་ཡོང་སྐབས། རྒན་ལགས་ཁྱེད་རང་ཆང་ཁང་ནང་ར་བཟི་ནས་འཁྲུག་པ་བརྒྱབ་པ་དྲན་གནང་གི་མི་འདུག་གམ། ཞེས་ཞུས་པར་སློབ་ཕྲུག་ཚང་མ་གད་མོ་དབང་མེད་ཤོར། རྒན་ལགས་ནི་ཁོང་རང་གི་རང་སྐྱོན་རྣམས་དངོས་སུ་ཐོན་པས་ཅི་བྱེད་འདི་བྱེད་མེད་པར་ངོ་གནོངས་དགོས་པ་ཆགས་སོ། །
ཧ་མ་གོ་གོང་ནས་ཁོང་ཁྲོ་ལངས་པ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
མི་མང་པོ་ཞིག་ལྷ་ས་བར་སྐོར་ནང་བར་སྐོར་རྒྱག་བཞིན་ཡོད་པའི་སྐབས་ཤིག་ལ། ལྷ་ས་བ་ཕོ་གསར་ཞིག་ཁོང་ཚོའི་དཀྱིལ་དུ་ཧ་རེ་ཧུ་རེའི་ངང་ནས་མགྱོགས་པོ་རྒྱུགས་ཡོང༌། སྐབས་དེར་སྟབས་མ་ལེགས་པ་ཞིག་ལ་
ཁམས་པའི་མི་ཞིག་ལ་འབུད་རྒྱག་ཕྲན་བུ་ཤོར་བ་རེད། དེར་བརྟེན་ཁམས་པ་དེ་ནི་ཤིན་ཏུ་ཁོང་ཁྲོ་ལངས་པའི་རྣམ་འགྱུར་དང་སྦྲགས། ཕ་རོ་ཟ་རྒྱུ་ག་རེ་བྱེད་ཀྱི་ཡོད་དམ། ཞེས་ལབ་པར་ལྷ་སའི་ཕོ་གསར་དེས། ངག་འཇམ་པོའི་ཐོག་ནས། ཨ་ཕོ་ལགས་དང་པོ་ངས་ག་རེ་བྱེད་ཀྱི་ཡོད་མེད་ཧ་མ་གོ་གོང་ནས་ག་རེ་བྱས་ནས་ཁོང་ཁྲོ་ལང༌གི་ཡོད་དམ། ཞེས་ལབ་པར། ཁམས་པའི་མི་དེ་ཡུད་ཙམ་ཞིག་ཅི་ཟེར་འདི་ཟེར་མེད་པར་མི་ཚོགས་དེའི་ནང་ངོ་ཚ་ཁ་སྐྱེངས་ངང་གནས་དགོས་བཟོས་པ་རེད།
ལས་རོགས་ཤིག་བྱུང་ན་ཕན་ཐོགས་ཆེན་པོ་ཡོང་བ་འདུག
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
དཔེ་མཛོད་ཁང་ཞིག་ལ་དྲུང་ཡིག་ལས་ཀ་ཡག་པོ་མི་བྱེད་མཁན་ཞིག་ཡོད་པ་རེད། དཔེ་མཛོད་དེའི་འགན་འཛིན་གྱིས་ཁོ་པས་ལས་དོན་ཡག་པོ་སྒྲུབ་ཀྱི་མེད་སྐོར་གོ་ཐོས་ལན་མང་བྱུང་བར་བརྟེན། ཉིན་གཅིག་དྲུང་ཡིག་དེ་ལ་ཁ་ཐུག་ལས་ཀ་མེད། ཁྱེད་རང་འགྲོ་དགོས་ཞེས་ལབ་མ་ཐུབ་ཀྱང་ད་ཆ་དྲུང་ཡིག་གཞན་ཞིག་སྐད་གཏོང་དགོས་ས་རེད། ཅེས་སྐད་ཆ་བསྐོར་ནས་བཤད་སྟབས་དྲུང་ཡིག་དེས་ལམ་སང་དགའ་བའི་རྣམ་འགྱུར་དང་སྦྲགས། དེ་འདྲ་བྱུང་ན་དཔེ་ཡག་པོ་ཡོང་བ་འདུག ང་ལ་ལས་རོགས་ཤིག་བྱུང་ན་ལས་ཀ་བྱེད་རྒྱུ་ལ་ཕན་ཐོགས་ཆེན་པོ་ཡོང་བ་འདུག ཅེས་དགའ་མདོག་ཁ་པོས་དེ་ལྟར་ལན་སྤྲད་པ་ན། འགན་འཛིན་དེ་ནི་ཅི་བཤད་མེད་པར་མིག་ཧོབ་བེར་ལྟ་དགོས་པ་བཟོས་པ་རེད།
ཨུ་པར་ཝཱ་ལཱས་བཟོས་པ།
ས་སྐྱ་མཐོ་སློབ་པ་ཁྲི་ཚོ་འགྱུར་མེད་རྡོ་རྗེ།
ཧིནྡུའི་ཆོས་ལུགས་ཡིན་པའི་རྒྱ་གར་གྱི་བུ་མོ་ཞིག་ལ་ཕྲུ་གུ་སྐྱེ་གྲབས་བྱེད་སྐབས། སྐྱེ་ཟུག་ཧ་ཅང་ཆེན་པོ་བརྒྱབ་པར་བརྟེན་སྐད་ངན་རང་དབང་མེད་པར་ཤོར་ཏེ། འདི་འདྲའི་ན་ཟུག་ཆེན་པོ་གཏོང་དགོས་པ་ངས་གང་
བྱས་པའི་རྣམ་སྨིན་ཡིན་ནམ། ཞེས་སྐད་ཤུགས་ཆེན་པོས་ངུས་པར། མོའི་ཁྱོ་ག་དེས་མཛུབ་མོ་གནམ་ལ་བཙུགས་ཏེ་རྒྱ་གར་སྐད་ཐོག་ནས། འདི་ནི་ཨུ་པར་ཝཱ་ལཱས་བཟོས་པ་ཞིག་རེད། ཁྱེད་རང་ངུས་མ་ངུས་ཡོད་པ་མ་རེད། དེ་ལས་སྡུག་རུས་གང་ཐུབ་ཐུབ་བྱོས་དང༌། སྐྱེས་ཚར་སོང་ན་ན་ཚ་གཏོང་གི་མ་རེད། ཅེས་ལབ་པ་རེད། སྐད་ཆ་དེ་བུ་མོའི་པ་ཕས་གོ་བ་དང་སྦྲགས་ཁོ་པར་མ་འདོད་པའི་རྣམ་འགྱུར་ཞིག་བསྟན་ཏེ། རང་གི་མཛུབ་མོ་ཁོ་པའི་འདོམས་ཀྱི་ཐད་དུ་མར་བཙུགས་ཏེ་རྒྱ་གར་སྐད་ནང༌། ག་རེ་ཨུ་པར་ཝཱ་ལཱས་བཟོས་པ་རེད། ལྟོས་དང་ཁྱོད་རང་ནི་ཅེ་ཝཱ་ལཱ་འདིས་བཟོས་པ་རེད། ཅེས་གཤེ་གཤེ་བཏང་བ་རེད། སྐབས་དེར་བུ་མོ་དང་བུ་མོའི་ཁྱོ་ག་གཉིས་ནི་ངོ་ཚ་ཐག་ཆོད་དེ་སྐད་ཆའང་ཤོད་མི་ནུས་པར་ལུས་ཤིང༌། ན་ཟུག་ཀྱང་གར་སོང་མེད་པར་བུ་ཞིག་བདེ་བར་བཙས་སོ། །