༡༽ ལོ་འདིར་ཤེས་རིག་ལས་ཁུངས་ཀྱི་ཁྱབ་ཁོངས་གཏན་ཉིན་སློབ་གྲྭ་ ༤༤ མཐོ་སློབ་དང་སྦྱོང་བརྡར་ཁང་ཁག་གི་ནང་རིམ་པ་འདྲ་མིན་གྱི་སློབ་སྦྱོང་བྱེད་མཁན་ཁྱོན་བོད་ཕྲུག ༩༨༡༡ ཡོད། གཞི་རིམ་འཛིན་གྲྭ་བཅུ་གཅིག་མན་གྱི་སློབ་གྲྭ་ ༤༤ ཡོད་པའི་ནང་སློབ་ཕྲུག་གྲངས་ ༩༦༡༥ དང་དགེ་ལས་གྲངས་ ༦༨༢ ཡོད།
༢༽ ལོ་འདིར་འཛིན་རིམ་ ༡༡ ཐོན་པའི་སློབ་ཕྲུག་ཁྱོན་བསྡོམས་ ༡༤༠ བྱུང་བའི་ཁོངས་ནས་མཐོ་སློབ་ཏུ་ ༣༢ དང༌། དྲུང་ཡིག་སློབ་སྦྱོང་དུ་ ༢ ལྕགས་པར་སྦྱོང་བར་ ༢ སྨན་ཞབས་སྦྱོང་བར་ ༢ དགེ་འོས་སུ་བུ་མོ་ ༡༤ རྩིས་པའི་སློབ་སྦྱོང་དུ་ ༢ ལས་ཁུངས་ཁག་ནང་ལས་བགོས་བྱས་པ་ ༤ པ་ཆ་མ་རིར་བཟོ་སློབ་ཏུ་ ༡ མུ་མཐུད་སློབ་སྦྱོང་བྱེད་འདོད་མེད་པ་ ༤ དྭང་སློབ་ཁོངས་བསྐྱོད་པ་ཕོ་མོ་གྲངས་༢༩ རིགས་ལམ་སློབ་གྲྭར་གྲྭ་ཞུགས་བྱས་པ་ ༢ སློབ་སྦྱོང་དུ་བསྐྱོད་ཡུལ་མེད་པར་བར་ལྡིང་དུ་ལུས་པ་ ༤༦ བཅས་བྱུང་ཡོད། དེ་ལྟར་ལུས་དོན་ནི། ཐོག་མའི་འཆར་གཞི་ལྟར་ན། འདི་ལོའི་སློབ་ཐོན་རྣམས་ཐོག་མར་དྭང་སློབ་ཏུ་ཟླ་བ་དྲུག་བསྐྱོད་དགོས་པ་དང༌། དེ་རྗེས་མཐོ་སློབ་སོགས་སུ་གཏོང་རྒྱུ་བཀོད་སྒྲིག་བྱེད་དགོས། འོན་ཀྱང་གློ་བུར་གནས་ཚུལ་ལ་འགྱུར་བ་བྱུང་སྟེ་ཚང་མ་དྭང་སློབ་ཏུ་གཏོང་མ་ཐུབ་པ་དང་གཅིག སྔ་ལོ་ཟླ་དྲུག་དྭང་སློབ་ཏུ་བཏང་བ་རྣམས་འདི་ལོ་མཐོ་སློབ་ཏུ་གཏོང་དགོས་པ་དང་གཉིས་སོགས་ཀྱིས་སློབ་ཡོན་མ་ལྡང་བར་བརྟེན་སློབ་ཕྲུག ༤༦ བར་ལྡིང་དུ་ལུས་པ་རེད།
༣༽ འཛིན་གྲྭ་ ༡༡ ཐོན་རྗེས་སིམ་ལ་དྷ་རམ་ས་ལ། བྷེང་ལོར་བཅས་ཀྱི་རྒྱ་གར་གྱི་དགེ་རྒན་འོས་སྦྱོང་ཁང་ནས་འོས་སྦྱོང་བྱས་ཟིན་པའི་བོད་ཕྲུག ༣༠ སྐོར་ལ་སླར་ཡང་ཕྱི་ཟླ་ ༧ ཚེས་ ༥ ནས་ཟླ་བ་དྲུག་རིང་དྷ་ཤོད་ཟུར་གསོག་ཏུ་དམིགས་བཀར་བོད་ཀྱི་སྐད་ཡིག་དང་ནང་ཆོས། ཆོས་འབྱུང༌། རྒྱལ་རབས་སོགས་ཀྱི་སྦྱོང་བརྡར་སྤྲད་པར་གྲུབ་འབྲས་ཧ་ཅང་ཡག་པོ་བྱུང་ཞིང༌། དེ་དག་གཏན་ཉིན་སློབ་ཁག་ཏུ་བསྐོ་བཞག་བྱེད་འགོ་བཙུགས། སྦྱོང་བརྡར་འདིའི་འགན་འཛིན་དུ་དགེ་རྒན་གྱི་བྱ་བར་ཤེས་ཚད་དང་མྱོང་རྒྱུས་ཟབ་པའི་སིམ་ལའི་སློབ་དགེ་བྱམས་པ་ཆོས་གྲགས་ལགས་ཆེད་མངགས་བསྐོ་བཞག་བྱས་ཤིང༌། རིགས་སློབ་དབུ་དགེ་དགེ་བཤེས་བློ་བཟང་རྒྱ་མཚོ་སོགས་ཀྱིས་སློབ་ཁྲིད་གནང༌།
༤༽ རྒྱ་གར་ནང་གཞི་རིམ་སློབ་གྲྭའི་སློབ་རིམ་ལ་བསྒྱུར་བཅོས་ཀྱིས་འཛིན་རིམ་ ༡༡ ནས་ ༡༢ དུ་སྤར་ཟིན་པ་ལྟར། བོད་མིའི་གཏན་ཉིན་སློབ་གྲྭ་ཁག་ཀྱང་འདི་ལོ་ནས་འཛིན་རིམ་ ༡༢ དུ་སྤར་རྒྱུར་གཏན་འཁེལ་བྱུང༌།
༥༽ ལོ་འདིའི་ཕྱི་ཟླ་ ༨ པ་ནས་པ་ཆ་མ་རིའི་བཟོ་ལས་སློབ་གྲྭ་བསྐྱར་དུ་སྒོ་འབྱེད་བྱས་ཏེ་འཛིན་རིམ་ ༥།༦ ཐོན་པ་གྲངས་ ༢༢ ཡོད་པར་བོད་ཕྱོགས་ནས་ལྟ་རྟོག་བྱེད་མི་བོད་དགེ་གཅིག་ལྕོགས་ཤིག་བསྐོས། སློབ་སྦྱོང་ཐད་སློབ་ཕྲུག ༨ ལ་ལོ་གཉིས་རིང་ལྕགས་དཀྲུག་སློབ་སྦྱོང་དང༌། སློབ་ཕྲུག ༦ ལ་ལོ་གཉིས་རིང་ལྕགས་དཀྲུག་བཅད་ཁ་སྒྲིག་བཟོ། སློབ་ཕྲུག ༨ ལ་ལོ་གཅིག་རིང་ཤིང་བཟོ་བཅས་བསླབ་གཏན་འཁེལ། རྩ་བའི་སློབ་གྲྭ་དེར་སློབ་ཕྲུག ༨༠ ཐམ་པ་ལོངས་པ་བཟོ་རྒྱུའི་འཆར་གཞི་བཀོད།
༦༽ རྒྱ་གར་ནང་གསར་བཙས་བོད་ཕྲུག་སློབ་འཇུག་གི་གོ་སྐབས་མ་ཐོབ་པ་ཚོར་སློབ་གྲོན་ཕྱེད་འབབ་ཧིན་སྒོར་ ༡༠༠ ཐམ་པ་རེ་ཕུལ་ཏེ་སློབ་འཇུག་བྱས་འཐུས་གཏན་འཁེལ་ལྟར། ྋགོང་ས་ྋསྐྱབས་མགོན་ཆེན་པོ་མཆོག་སྐུ་སྒེར་ནས་ཧིན་སྒོར་ ༡༠༠༠༠༠ དང༌། ཀ་ཏ་ཡིད་ཆེས་དགེ་རྩའི་རྩ་དོན་དམིགས་ཡུལ་ལྟར་འདི་ལོ་ནས་བཟུང་སྐྱེད་འབབ་ཐོག་ནས་ཧིན་སྒོར་ ༧༠༠༠༠ གསོལ་སྩལ་བཀའ་དྲིན་ཆེ་ཐོག དབྱིན་ཡུལ་བྱིས་པའི་རོགས་ཚོགས་ཀྱིས་སློབ་ཕྲུག༌༥༧ ལ་སློབ་ཡོན་ཕྱེད་འབབ་བཅས་རོགས་རམ་ཐོབ་རིགས་རྣམས་བོད་མི་ཁ་འཐོར་དུ་གནས་སྡོད་བྱ་ཡུལ་ཀྲུའུ་ཀྲིང་དང༌། སིམ་ལ་ཕུ། ལ་དྭགས། རྡོར་གླིང༌། ཀ་སྦུག་སོགས་ལ་སློབ་ཡོན་རྩ་ཆག་དང༌། སྣེ་སེལ། ཕྱེད་འབབ་སོགས་ཇི་བྱེད་ཀྱི་ཁ་གྲངས་དྲང་སྙོམ་ཆ་བགོས་བྱས་ཏེ་འདེམས་སྒྲུག་བྱས། ཞིབ་ཕྲའི་གནས་ཚུལ་གཤམ་གསལ།
|
ཟླ་དྲུག་བོད་ཀྱི་སྐད་ཡིག་རིག་གཞུང་དང་འབྲེལ་བའི་དམིགས་བཀར་འོས་སྦྱོང་པ་དང་དགེ་རྒན་རྣམ་པ། ༡༩༧༦ ལོར་བསྒྲོན། གཡས་བརྩིས། མདུན་གྲལ། ༡༽ སྐལ་བཟང་དོན་ལྡན། ༢༽ སྤེན་པ་སྟོབས་རྒྱལ། ༣༽ ནོར་བུ་བསམ་འཕེལ། ༤༽ དགེ་རྒན་བྱམས་པ་ཆོས་གྲགས། ༥༽ དགེ་རྒན་བློ་བཟང་རྒྱ་མཚོ། ༦༽ ཤེས་རིག་གནད་ཡོད་ལས་བྱེད་བྱམས་པ་ཡོན་ཏན། ༧༽ དགེ་རྒན་བྱང་ཆུབ་ཚུལ་ཁྲིམས། ༨༽ དཔལ་རྣམ། ༩༽ ཉི་མ་རྒྱལ་མཚན། |
གོང་གསལ་དངུལ་འབོར་ཆ་བགོས་ཀྱིས་སློབ་འཇུག་བྱས་པ་སློབ་ཕྲུག༌༨༥ སིམ་ལ་དང་ཌལ་ཧོར། རྡོར་གླིང་བཅས་ཀྱི་སློབ་སྤྱི་གསུམ་ནས་རོགས་རམ་གནང་བ་ ༣ ཕྱི་རྒྱལ་མི་རིགས་གསུམ་གྱིས་རོགས་རམ་གནང་བ་ ༣ སློབ་གྲོན་ཆ་ཤས་སྒོར་ ༤༠ ཕ་མས་ཕུལ་ཏེ་ཁ་གསབ་དབྱིན་ཡུལ་རོགས་ཚོགས་ཀྱིས་ཁ་སྣོན་གནང་བ་ ༥༧ སློབ་གྲོན་ཆ་ཚང་ཕ་མས་ཕུལ་བ་ ༢༡༡ དྷ་ས་བོད་ཁྱིམ་ནས་སློབ་གྲོན་ཆ་ཚང་གནང་བ་ ༡༧༤ བཅས་ཁྱོན་བསྡོམས་སློབ་ཕྲུག ༥༣༣ སློབ་འཇུག་བྱས། ༼སློབ་གྲོན་ཆ་ཤས་ཕ་མས་འབུལ་དགོས་ཁོངས་ནས་ས་གནས་བདེ་དོན་ཁ་ཤས་ཀྱིས་དུས་ཐོག་ཕྲུ་གུ་འདེམས་གཏོང་མ་ཐུབ་པ་ ༩༣ བྱུང་ཡོད། འདིའི་སྐོར་ཞིབ་ཕྲ་མཁྱེན་འདོད་ཡོད་པ་ཚོས་སྐབས་དེའི་སློབ་འཇུག་ཡིག་ཆ་དང་ལོ་འཁོར་ལས་བསྡོམས་སུ་གཟིགས།༽ དེ་བཞིན་ད་དུང་སློབ་འཇུག་མ་ཐུབ་པ་རྣམས་ཐུབ་ཐབས་སུ་རོགས་རམ་བསྡུ་སློང་གི་སློང་ཡིག་བཟོས་ཏེ་ཕྱི་ནང་རོགས་ཚོགས་ཁག ༩༠༠ ལ་བཏང་སྟེ་སློབ་གྲོན་ཐབས་འཚོལ་སྒོ་གང་ས་ནས་ཞུ་འགོ་བཙུགས་ཤིང༌། སློབ་ཡོན་ལས་གཞི་འདིར་བོད་ཕྲུག་མཐའ་སྐྱོའི་མ་དངུལ་ཟེར་ཞིང༌། ཕྱིས་སུ་བོད་ཕྲུག་མཐའ་སྐྱོའི་སློབ་ཡོན་དང་བདེ་དོན་མ་དངུལ་ཟེར། ཕྱི་ལོ་ ༡༩༨༡ ཟླ་ ༨ ཚེས་ ༢༤ ཉིན་ལས་གཞི་འདི་ཉིད་རྒྱ་གར་གཞུང་གི་ཁྲིམས་ལུགས་ཆ་རྐྱེན་འོག་ཁེ་མེད་ཚོགས་པའི་ངོ་བོར་དེབ་སྐྱེལ་བྱས་ཡོད།
༧༽ ལོ་འདིར་ཕ་རན་སིར་མཐོ་རིམ་སློབ་སྦྱོང་དུ་ཉེ་བའི་གཙུག་ལག་རབ་འབྱམས་པ་སློབ་ཐོན་མི་བཞི་བཏང༌།
༨༽ འདི་ལོ་གུང་གསེང་ལ་བླངས་རྗེས་སློབ་གྲྭར་ཕྱིར་ལོག་མ་བྱས་པ་ཕྲུ་གུ་ ༡༥ ལས་མ་བྱུང་ཡང༌། དེ་དག་དུས་ཐོག་ཕ་མ་སོ་སོས་སློབ་གྲྭར་མ་བསྐྱལ་ཚེ། དེ་སྔོན་སློབ་སྦྱོང་སྤྲད་པའི་དུས་ཡུན་གྱི་སློབ་གྲོན་བརྒྱ་ཆ་ ༢༥ སྒྲུབ་འབུལ་ཞུ་དགོས་པའི་བཀོད་ཁྱབ་བཏང་བ་ལྟར་སློབ་ཕྲུག ༣ གྱིས་སྒྲུབ་འབུལ་ཞུས། དེ་བྱིངས་ཀྱིས་ཕ་མ་རྒས་གཅོང་ལ་ལྟ་རྟོག་བྱེད་དགོས་ཁར་འཁོས་ཞན་ཉམ་ཐག་ཡིན་པས་ཉེས་ཆད་སྒྲུབ་དམིགས་མེད་ལུགས་ཐོག་ས་གནས་གཞིས་འགོས་ཀྱང་རྒྱབ་གཉེར་རིམ་བསྟུད་ཕུལ་སྟབས་རང་འདོད་བཞིན་མ་འཇོག་ཀ་མེད་ཆགས།