༄༅། །ཕྱི་ལོ་ ༢༠༡༥ ཟླ་ ༩ ཚེས་ ༢ ཉིན་བོད་གཞུང་མང་ཡོངས་ཀྱི་མང་གཙོའི་ཉིན་མོ་སྲུང་བརྩིའི་མཛད་སྒོ་དང་སྟབས་བསྟུན། འདི་ག་ཤེས་རིག་ལས་ཁུངས་ནས་ཕྱི་ལོ་ ༢༠༠༢ ལོར་བོད་གཞུང་དགའ་ལྡན་ཕོ་བྲང་དབུ་བརྙེས་ནས་ལོ་ངོ་ ༣༦༠ འཁོར་བའི་དུས་ཆེན་སྲུང་བརྩི་ཞུ་སྐབས། དམིགས་བསལ་ལས་འགུལ་མང་དག་སྤེལ་ཡོད་པའི་ཁོངས་ནས་རྒྱ་གར་རྒྱལ་ཡོངས་འཛིན་རིམ་ ༡༢ ཡིག་རྒྱུགས་ཆེན་མོའི་ནང་ཚན་རིག་དང་། སྒྱུ་རྩལ། ཚོང་རིག་བཅས་སློབ་ཚན་སྡེ་ཁག་སོ་སོའི་ནང་ནས་སྦྱངས་འབྲས་རྩེ་ཕུད་སོན་པའི་སློབ་ཕྲུག་རྣམས་ལ་དགའ་ལྡན་ཕོ་བྲང་སློབ་ཕྲུག་གཟེངས་རྟགས་ཞེས་པ་ལོ་ལྟར་གནང་ཡོད་པ་མ་ཟད། འདི་ལོ་བྱ་དགའ་གནང་ཐེངས་ ༡༤ པ་ཆགས་ཡོད།
 གཟེངས་རྟགས་འདིའི་དམིགས་ཡུལ་ནི། ༸གོང་ས་༸སྐྱབས་མགོན་ཆེན་པོ་མཆོག་སྐུ་ཕྲེང་རིམ་བྱོན་གྱིས་དབུ་ཁྲིད་པའི་བོད་གཞུང་དགའ་ལྡན་ཕོ་བྲང་གི་བཀའ་དྲིན་རྗེས་དྲན་དང་། གཞན་ཡང་གཞི་རིམ་སློབ་གྲྭའི་སློབ་ཚན་སྡེ་ཁག་གསུམ་གྱི་ནང་གྲུབ་འབྲས་རྩེ་ཕུད་སོན་པའི་སློབ་ཕྲུག་གསུམ་ལ་ལེགས་གསོལ་གཟེངས་བསྟོད་ཕྱག་འཁྱེར་གནང་སྟེ། བོད་ཕྲུག་ཡོངས་ཀྱི་ཤེས་ཡོན་གོང་མཐོར་གཏོང་རྒྱུའི་སེམས་ཤུགས་སྤར་རྒྱུ་དང་མིག་དཔེ་བཟང་པོ་སྟོན་ཐབས་ཆེད་ཡིན་འདུག ཕྱི་ལོ་ ༢༠༡༣ ལོ་ནས་བཟུང་བཀའ་ཤག་སྐབས་ ༡༤ པས་ལས་དོན་ཚང་མའི་ནང་ནས་ཤེས་ཡོན་གལ་ཆེ་ཤོས་བརྩིས་གནང་གི་ཡོད་པ་ལྟར་མཐོ་རིམ་སློབ་ཡོན་སྤར་ཆ་གནང་བ་དང་འབྲེལ། དགའ་ལྡན་ཕོ་བྲང་གཟེངས་རྟགས་འདི་བཞིན་སློབ་ཚན་སྡེ་ཁག་གསུམ་གྱི་སློབ་མ་རྩེ་ཕུད་གསུམ་རེ་བྱས་ཏེ་སློབ་ཕྲུག་དགུ་སྤར་ཆ་གནང་བ་དང་དངུལ་གྱི་བྱ་དགའ་ཡང་སྒོར་ ༥༠༠༠ ནས་སྤར་ཆ་གནང་སྟེ་ཨང་རིམ་དང་པོར་སྒོར་ ༢༠༠༠༠ དང་། ཨང་རིམ་གཉིས་པར་སྒོར་ ༡༥༠༠༠། ཨང་རིམ་གསུམ་པར་ ༡༠༠༠༠ བར་སྤར་ཆ་གནང་ཡོད།
འདི་ལོའི་གཟེངས་རྟགས་ཐེངས་ ༡༤ པ་འདི་བཞིན་ཕྱི་ལོ་ ༢༠༡༥ ལོར་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ནང་གྲུབ་འབྲས་རྩེ་ཕུད་སོན་པ་དགུ་ལ་ལེགས་སྐྱེས་ཕྱག་འཁྱེར་དང་བྱ་དགའ་བཅས་སྐུ་མགྲོན་གཙོ་བོ་རྒྱ་གར་གྲོས་ཚོགས་ཀྱི་འཐུས་མི་སྐུ་ཞབས་ཤན་ཏ་ཀུ་མཱར་མཆོག་དང་། དམིགས་བསལ་སྐུ་མགྲོན་རྒྱ་གར་གྱི་བློན་ཆེན་མེ་ནི་ཀ་གཱན་དྷི་མཆོག བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་བཅས་ནས་གནང་ཡོད།

རྩེ་ཕུད་སློབ་མ་རྣམས་ཀྱི་ལོ་རྒྱུས་སྙིང་བསྡུས།

སློབ་ཚན་སྡེ་ཁག་གསུམ་ཡོད་པ་ནས་ཨང་རིམ་དང་པོ་ལོན་པའི་སློབ་ཕྲུག་རྣམས་གཤམ་གསལ།

ཀ༽ ཚན་རིག་སློབ་ཚན་ཁོངས་ནས་སེ་ལ་ཀུའི་བོད་ཁྱིམ་གྱི་སློབ་མ་མི་ཅི་ཀོ་ཡ་མ་ས་ཀི་ལགས། བརྒྱ་ཆ་ ༩༣ ཐོབ་ཡོད་པ་དང། འདི་ལོ་ཁོ་མོ་ལོ་གཅིག་བར་མཚམས་བསྡད་ཡོད་འདུག
ཁ༽ སྒྱུ་རྩལ་སློབ་ཚན་ཁོངས་ནས་སུ་ཇ་བོད་ཁྱིམ་གྱི་སློབ་མ་ཤ་བོ་མཆོད་རྟེན་ལགས། བརྒྱ་ཆ་ ༩༣་༢ ཐོབ་ཡོད་པ་དང། ད་ལྟ་རྒྱ་གར་རྒྱལ་ས་ལྡི་ལིའི་ཧིན་དུ་(Hindu College) མཐོ་སློབ་ཏུ་ (Political Sc.Honors) སློབ་སྦྱོང་བྱེད་བཞིན་ཡོད།
ག༽ ཚོང་རིག་སློབ་ཚན་ཁོངས་ནས་རྡ་སྟེང་བོད་ཁྱིམ་གྱི་སློབ་མ་བསྟན་འཛིན་བདེ་ཆེན་ལགས། བརྒྱ་ཆ་ ༩༡་༢ ཐོབ་ཡོད་པ་དང་། ད་ལྟ་རྒྱ་གར་རྒྱལ་ས་ལྡི་ལིའི་ཤྲི་རཱམ་ཀོ་ལི་ཇི་ཨོཕ་ཀོ་མར་སི་ (Shri Ram College of Commerce) མཐོ་སློབ་ཏུ་ (B.ComHonors) སློབ་སྦྱོང་བྱེད་བཞིན་ཡོད།

སློབ་ཚན་སྡེ་ཁག་གསུམ་ཡོད་པ་ནས་ཨང་རིམ་གཉིས་པ་ལོན་པའི་སློབ་ཕྲུག་རྣམས་གཤམ་གསལ།

ཀ༽ ཚན་རིག་སློབ་ཚན་ཁོངས་ནས་སེ་ལ་ཀུའི་བོད་ཁྱིམ་གྱི་སློབ་མ་བསྟན་འཛིན་ཀུན་བཟང་ལགས། བརྒྱ་ཆ་ ༩༢་༦ ཐོབ་ཡོད་པ་དང། ད་ལྟ་རྒྱ་གར་གྱི་རྒྱལ་ས་ལྡི་ལིར་ (JEE Coaching) སློབ་སྦྱོང་བྱེད་བཞིན་ཡོད།
ཁ༽ སྒྱུ་རྩལ་སློབ་ཚན་ཁོངས་ནས་སུ་ཇ་བོད་ཁྱིམ་གྱི་སློབ་མ་རིན་ཆེན་གཡུ་སྒྲོན་ལགས། བརྒྱ་ཆ་ ༩༢ ཐོབ་ཡོད་པ་དང། ད་ལྟ་རྒྱ་གར་རྒྱལ་ས་ལྡི་ལིའི་མི་རན་ཌ་(Miranda House) མཐོ་སློབ་ཏུ་ (Political Sc.Honors) སློབ་སྦྱོང་བྱེད་བཞིན་ཡོད།
ག༽ ཚོང་རིག་སློབ་ཚན་ཁོངས་ནས་རྡ་སྟེང་བོད་ཁྱིམ་གྱི་སློབ་མ་བསྟན་འཛིན་འཕྲིན་ལས་ལགས། བརྒྱ་ཆ་ ༨༨་༢ ཐོབ་ཡོད་པ་དང། ད་ལྟ་རྒྱ་གར་བྱང་ཕྱོགས་འཇའ་ལཎ་ཌར་ (Lovely Professional University) མཐོ་སློབ་ཏུ་ (BBA) སློབ་སྦྱོང་བྱེད་བཞིན་ཡོད།

སློབ་ཚན་སྡེ་ཁག་གསུམ་ཡོད་པ་ནས་ཨང་རིམ་གསུམ་པ་ལོན་པའི་སློབ་ཕྲུག་རྣམས་གཤམ་གསལ།

ཀ༽ ཚན་རིག་སློབ་ཚན་ཁོངས་ནས་སྦེལ་ཀོབ་བོད་ཁྱིམ་གྱི་སློབ་མ་བསྟན་འཛིན་སྒྲོལ་མ་ལགས། བརྒྱ་ཆ་ ༩༡་༨ ཐོབ་ཡོད་པ་དང་། འདི་ལོ་ཁོ་མོ་ལོ་གཅིག་རིང་བར་མཚམས་བསྡད་ཡོད་འདུག
ཁ༽ སྒྱུ་རྩལ་སློབ་ཚན་ཁོངས་ནས་སུ་ཇ་བོད་ཁྱིམ་གྱི་སློབ་མ་མགོན་རྒྱལ་ལགས། བརྒྱ་ཆ་ ༩༡་༢ ཐོབ་ཡོད་པ་དང། ད་ལྟ་རྒྱ་གར་ལྷོ་ཕྱོགས་སྦེང་ལོར་དུ་ཡོད་པའི་(CMR Law School) མཐོ་སློབ་ཏུ་ (LLB) སློབ་སྦྱོང་བྱེད་བཞིན་ཡོད།
ག༽ ཚོང་རིག་སློབ་ཚན་ཁོངས་ནས་མ་སུ་རི་གཏན་སློབ་ཀྱི་སློབ་མ་བསྟན་འཛིན་དབང་མོ་ལགས། བརྒྱ་ཆ་ ༨༨ ཐོབ་ཡོད་པ་དང་། ད་ལྟ་བྱང་ཕྱོགས་ནོཡི་ཌ་ (BBA,Institute of management Studies,Noida) ཞེས་པར་སློབ་སྦྱོང་བྱེད་བཞིན་ཡོད་པ་བཅས། སློབ་ཕྲུག་སློབ་སྦྱོང་རྩེ་ཕུད་སོན་པ་རྣམས་ལ་འདི་ལོའི་དགའ་ལྡན་ཕོ་བྲང་གི་གཟེངས་རྟགས་གནང་ཡོད་པ་བཅས།།