༄༅། །བོད་མིའི་སྒྲིག་འཛུགས་བཀའ་ཤག་གིས་བོད་མིའི་ཤེས་ཡོན་ཡར་རྒྱས་ཐོག་དམིགས་བསལ་འབད་བརྩོན་གནང་དང་གནང་མུས་ཡིན་པ་མ་ཟད། དེང་དུས་རིག་གསར་གྱི་ཤེས་ཡོན་ནང་བོད་མི་ཆེད་ལས་པ་དང་རིགས་གཅིག་རྐང་འཛིན་གང་མང་འཐོན་ཐབས་བྱ་རྒྱུའི་ལས་གཞི་སྤེལ་དང་སྤེལ་མུས་ཁོངས་སུ། ད་ལམ་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་ཁུལ་དུ་མཛད་འཕྲིན་སྐྱོང་བཞིན་པའི་སྐབས་དང་བསྟུན། ཕྱི་ལོ་ ༢༠༡༢ ཟླ་ ༡༠ ཚེས་ ༡༤ ཉིན་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་བོད་མིའི་སྒྲིག་འཛུགས་ཀྱི་སྲིད་སྐྱོང་དང་ཤེས་རིག་བཀའ་བློན་གཅིག་ལྕོགས་མཁས་དབང་བློ་བཟང་སེང་གེ་མཆོག་དང་། ཤེས་རིག་དྲུང་ཆེ་དངོས་གྲུབ་ཚེ་རིང་ལགས་རྣམ་གཉིས་ཀྱིས་འཛམ་གླིང་ནང་སྙན་གྲགས་ཆེ་བའི་ཨ་རིའི་མཐོ་སློབ་ཧར་ཝ་ཌི་དང་སི་ཊན་ཕོཌ། མེ་སི་ཅུ་སི་འཕྲུལ་རིག་སློབ་གྲྭ ཀལ་ཊེ་ཆི། པི་རིན་སི་ཊོན། ཡེལ་ (Harvard, Stanford, MIT, Caltech, Princeton, and Yale) བཅས་དང། གཞན་ཡང་མཐོ་སློབ་དྲག་གྲས་ཁག་ ༢༠ བཅས་ཁྱོན་མཐོ་སློབ་གྲངས་ ༣༠ ལྷག་གི་ཞལ་ངོ་ (Deans) དང་སློབ་འཇུག་འགན་འཛིན་ admissions representatives རྣམས་མཇལ་འཕྲད་མཛད་ཡོད་པ་མ་ཟད། སྐབས་དེར་ཞལ་ངོ་རྣམ་པས་བོད་རིགས་སློབ་མ་རྣམས་འབྲེལ་ཡོད་མཐོ་སློབ་ཁག་ནང་སློབ་འཇུག་བྱ་རྒྱུའི་གནས་ཚད་ལོང་མིན་ཞིབ་འཇུག་མཐིལ་ཕྱིན་གནང་རྗེས་སློབ་མ་རྩེ་ཕུད་ཁག་ཅིག་འདེམས་སྒྲུག་བྱ་རྒྱུའི་ལས་འཆར་སྙན་སྒྲོན་ཞུས།
    ཕྱོགས་མཚུངས་༸གོང་ས་མཆོག་གིས་ཤེས་ཡོན་སྐོར་སྤྱི་དང་ལྷག་པར་སློབ་ཚན་འདྲ་མིན་ནང་བོད་མི་རིགས་གཅིག་རྐང་འཛིན་གང་མང་འཐོན་ཐབས་མཛད་རྒྱུའི་ཐུགས་ཀྱི་འཆར་སྣང་སྐོར་བཀའ་སློབ་གསལ་བཤད་མཛད། སྐབས་དེར་ཞལ་ངོ་རྣམས་ཀྱིས་༸གོང་ས་མཆོག་ལ་བརྗོད་གཞི་འདྲ་མིན་ཐོག་དྲི་བ་འབུལ་རྒྱུའི་གོ་སྐབས་ཀྱང་ཐོབ་ཡོད་ལ། ༸གོང་ས་མཆོག་དང་མཇལ་འཕྲད་དེས་ཞལ་ངོ་རྣམ་པར་སེམས་འགུལ་ཧ་ཅང་ཆེན་པོ་ཐེབས་པར་བརྟེན། ཞལ་ངོ་མང་པོ་ཞིག་གོས་ལྷན་ཚོགས་གྲུབ་བསྟུན། ཤེས་རིག་དྲུང་ཆེ་དངོས་གྲུབ་ཚེ་རིང་ལགས་དང་དངོས་སུ་ཐུག་འཕྲད་གནང་སྟེ་བོད་མིའི་སྒྲིག་འཛུགས་ཤེས་རིག་ལས་ཁུངས་དང་འབྲེལ་བ་རྒྱུན་འཁྱོངས་གནང་རྒྱུའི་ཁས་ལེན་ཡང་གནང་ཡོད། ༸གོང་ས་མཆོག་དབུ་བཞུགས་ཀྱི་ལྷན་ཚོགས་དེ་ལེགས་པར་གྲུབ་མཚམས་གོང་བརྗོད་ཨ་རིའི་མཐོ་སློབ་ཁག་གི་ཞལ་ངོ་འགན་འཛིན་རྣམ་པས་སྲིད་སྐྱོང་བློ་བཟང་སེང་གེ་མཆོག་དང་ལྷན་ཆུ་ཚོད་ ༡ ལྷག་ཙམ་རིང་གྲོས་མོལ་གནང་ཡོད།
    སྐབས་དེར་སྲིད་སྐྱོང་མཆོག་གིས་ཁོང་དེ་སྔ་ཨ་རིའི་ཧར་ཝ་ཌི་གཙུག་ལག་སློབ་གྲྭར་སློབ་སྦྱོང་བྱས་པ་དེས་ཕན་འབྲས་ཇི་བྱུང་གསལ་བཤད་གནང་སྐབས། ཞལ་ངོ་དང་འགན་འཛིན་རྣམ་པས་ཨ་རིའི་མཐོ་སློབ་རྩེ་ཕུད་ནས་ཐོན་པའི་སློབ་མ་གཅིག་གིས་གོ་སྐབས་བྱུང་ཚེ་འགྱུར་བ་ཆེན་པོ་གཏོང་ཐུབ་པའི་ནུས་པ་ཡོད་པ་དེར་ངོ་མཚར་ཆེན་པོ་བྱུང་བའི་རྣམ་འགྱུར་བསྟན་ཡོད། དེ་ཡང་ཨེམ་ཧར་སི་ཊི་གཙུག་ལག་སློབ་གྲྭའི་ (Amherst College) སློབ་འཇུག་ཞལ་ངོ་ (Dean of Admissions) སྐུ་ཞབས་ཐོ་མ་སི་པ་ཀར་ (Thomas Parker) མཆོག་གིས་ལྷན་ཚོགས་དེའི་སྐོར་གསུང་དོན། ང་རང་ལོ་ངོ་ ༣༢ རིང་སློབ་འཇུག་ཞལ་ངོའི་ལྷན་ཚོགས་ནང་ནས་དེ་རིང་གི་ལྷན་ཚོགས་འདི་གལ་གནད་ཆེ་ཤོས་གྲས་ཤིག་ཆགས་ཡོད། བཙན་བྱོལ་བོད་མིའི་སློབ་ཕྲུག་ཚད་ལྡན་རྣམས་ལ་ང་ཚོའི་གཙུག་ལག་སློབ་གྲྭས་འདི་ག་མཐོ་སློབ་ནང་སློབ་སྦྱོང་ཆེད་ཉལ་ཁང། ཀློག་དེབ། (books) སློབ་ཁྲིད་སློབ་ཡོན་ (Tuition) གྱི་མཐུན་རྐྱེན་ཆ་ཚང་སྤྲོད་རྒྱུ་མ་ཟད། རྒྱ་གར་ནས་ཨ་རིར་འགྲོ་འོང་ཐེངས་གཉིས་ཀྱི་ལམ་གྲོན་གནང་རྒྱུ་ཡིན། བཙན་བྱོལ་བོད་མིའི་སློབ་ཕྲུག་རྣམས་ལ་མཐུན་རྐྱེན་འདི་འདྲ་གནང་མཁན་ང་ཚོའི་མཐོ་སློབ་གཅིག་པུ་མིན་པར་ཨ་རིའི་མཐོ་སློབ་དྲག་གྲས་གཞན་ཡང་ཡོད།
ཅེས་གསུངས་ཡོད་པ་བཅས།།

ཡོང་ཁུངས། དབུས་བོད་མིའི་སྒྲིག་འཛུགས་ཀྱི་དྲ་བ།