༄༅། །ལོ་ལྟར་ཕྱི་ཟླ་ ༡༡ ཚེས་ ༡༤ ཉིན་རྒྱ་གར་གྱི་སྲིད་བློན་དང་པོ་པཎྜི་ཏ་ཇ་ཝཱ་ཧར་ལཱལ་ནེཧ་རཱུ་མཆོག་གི་སྐུའི་འཁྲུངས་སྐར་དང་བསྟུན། བྱིས་པའི་ཉིན་མོ་ཞེས་རྒྱ་གར་རྒྱལ་ཡོངས་སུ་སྲུང་བརྩི་ཞུ་མུས་ཡིན་པ་ལྟར། བོད་པའི་སློབ་གྲྭ་ཁག་གི་ནང་དུའང་བྱིས་པའི་ཉིན་མོ་སྲུང་བརྩི་ཞུ་བཞིན་ཡོད་པས། ངས་ཐོག་མར་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཚབ་ཞུས་ཏེ་སློབ་ཕྲུག་ཚང་མར་འཚམས་འདྲི་དང་སྦྲགས་ཉིན་མོ་འདི་ཧ་ཅང་སྐྱིད་ཡོང་བའི་སྨོན་འདུན་ཞུ་རྒྱུ་ཡིན།
སྔ་ལོའི་བྱིས་པའི་ཉིན་མོའི་གཏམ་བཤད་ཀྱི་བརྗོད་བྱ་གཙོ་བོ་བོད་ཀྱི་ཐུན་མོང་མ་ཡིན་པའི་སྐད་ཡིག་ལ་སྦྱངས་བརྩོན་དང་ཉར་ཚགས་བྱ་དགོས་པའི་གལ་གནད་དང་། སློབ་གཉེར་བྱེད་སྐབས་ཐོས་བསམ་སྒོམ་གསུམ་ཡ་མ་བྲལ་བ་དགོས་གལ། དམིགས་བསལ་དགོས་མཁོ་ཅན་གྱི་སློབ་གྲོགས་རྣམས་ལ་བྱམས་སྐྱོང་གནང་དགོས་སོགས་ཀྱི་སྐོར་ཞུས་ཡོད་པ་སློབ་ཕྲུག་ཚང་མས་དགོངས་པར་བཅངས་ཏེ་ཕྱག་བསྟར་གནང་མུས་ཡིན་ངེས།
➢ ལོ་ཤས་གོང་ནས་རྒྱ་ནག་གཞུང་གིས་བོད་མི་རིགས་དང་བཅས་པ་རྩ་བརླག་གཏོང་རྒྱུར་དམིགས་ཏེ། བོད་དུ་རང་ལོ་ ༦ ནས་ ༡༨ བར་གྱི་བོད་ཕྲུག་ན་གཞོན་ཇི་སྙེད་ཅིག་ལ་བཙན་པོ་དབང་ཤེད་ཀྱི་སྒོ་ནས་བཅའ་སྡོད་སློབ་གྲྭ་ཁག་ནང་འགྲིམ་དུ་བཅུག་སྟེ། སློབ་ཚན་དང་བསླབ་གཞི་ཡོངས་རྫོགས་རྒྱ་ཡིག་རྐྱང་པའི་ཐོག་ནས་སློབ་འཁྲིད་བྱེད་བཞིན་པ་དང་། སློབ་སྦྱོང་དང་ཞལ་ལག་གི་མཐུན་རྐྱེན་ཚད་ལྡན་མེད་པའི་ཁར། བཙན་གཡེམ་དང་གདུག་རྩུབ་གཏོང་གི་ཡོད་པ། དེ་བཞིན་བོད་ཀྱི་ཐུན་མོང་མ་ཡིན་པའི་ཆོས་དང༌། རིག་གཞུང༌། སྐད་ཡིག གོམས་སྲོལ་དང་བཅས་པར་སྦྱངས་བརྩོན་དང་གོམས་འདྲིས་ཏིལ་འབྲུ་ཙམ་ཡང་བྱེད་མ་བཅུག་པ་སོགས་མདོ་དོན་བོད་མིའི་ངོ་བོ་དྲི་མ་ཙམ་ཡང་མེད་པ་བཟོས་དང་བཟོ་བཞིན་པའི་རྒོལ་ལན་དུ། བཙན་བྱོལ་རང་དབང་ལུང་པའི་ནང་གནས་སྡོད་བྱེད་བཞིན་པའི་བྱེས་འབྱོར་བོད་མི་རྩམ་གཟན་པ་ཡོངས་ནས་ལྷག་བསམ་གཟོང་ཁ་གཅིག་ཏུ་བསྒྲིལ་ཏེ་ཆོས་རིག་ལེགས་བྱང་དང་སྐད་ཡིག་གོམས་སྲོལ་བཟང་པོ་དེ་དག་འཛིན་སྐྱོང་སྤེལ་གསུམ་བྱ་རྒྱུར་སྔར་ལྷག་འབད་འབུངས་ཞུ་ཐུབ་པའི་གཞེན་སྐུལ་ཞུ་རྒྱུ་ཡིན།
➢ སློབ་ཕྲུག་རྣམས་ནས་ཡིག་རྒྱུགས་དང་བརྒྱ་ཆ་ཁོ་ནའི་ཆེད་དུ་སློབ་གཉེར་བྱེད་པ་མ་ཡིན་པར་ནམ་ཞག་རྒྱུན་གཏན་ནས་ཀློག་རྩལ་དང་།འབྲི་རྩལ། ཉན་རྩལ། བཤད་རྩལ་སོགས་ཀྱི་ཐོག་ལ་དམིགས་བསལ་ཤུགས་སྣོན་བརྒྱབ་སྟེ་ཕྱོགས་ཡོངས་ནས་སློབ་སྦྱོང་ཆ་ཚང་བ་ཞིག་བྱེད་ཐུབ་པ་དགོས་རྒྱུ་དང་། ད་ལྟའི་ཆར་བཀླག་བྱའི་དཔེ་དེབ་ཀྱི་མཐུན་རྐྱེན་ཧ་ཅང་བཟང་ནའང་། ཀློག་པ་པོ་ཉུང་བའི་དཀའ་ངལ་ལྟ་བུ་མངོན་པས།དེ་དོན་སློབ་ཕྲུག་རང་ཉིད་ཀྱི་རྒྱུད་ལ་དཔེ་ཀློག་གི་གོམས་གཤིས་འཇགས་ཐབས་བྱ་རྒྱུ་ནི་གལ་འགངས་ཆེ་ཤོས་ཆགས་ཡོད།
➢ སློབ་ཕྲུག་རྣམས་འཚར་ལོངས་བྱེད་བཞིན་པའི་གནས་སྐབས་སུ་ཕྱིའི་ལུས་ལ་གནོད་པའི་མངར་ཟས་དང་། ཁེངས་ཟས། འགྱིག་ཤོག་ནང་གི་བཅུད་མེད་ཟས་རིགས་རྣམས་མཆོད་མི་དགོས་པ་གཙོ་འདོན་གནང་རྒྱུ་དང་། ནང་སེམས་ཁམས་ཀྱི་འཕྲོད་བསྟེན་ལ་ཕན་པའི་༸གོང་ས་མཆོག་གི་བཀའ་སློབ་ཁག་ལྟ་ཀློག་ཉན་གསུམ་བྱ་རྒྱུ་དང་། གཞན་ཕན་གྱི་བསམ་པས་ཀུན་ནས་བསླངས་ཏེ་ཕན་ཚུན་བྱམས་སྐྱོང་དང་རོགས་སྐྱོར་གནང་ཐུབ་པ་སོགས་བྱུང་ཚེ་ལུས་སེམས་གཉིས་ཀའི་འཕྲོད་བསྟེན་ལ་ཕན་ཐོགས་ཆེ་བ་ཡོང་ངེས།
➢ ཕ་མ་རྣམས་ཀྱི་ངོས་ནས་ཀྱང་རང་རང་སོ་སོའི་བུ་ཕྲུག་གི་མི་ཚེའི་མདུན་ལམ་དང་ཤེས་ཡོན་སློབ་གསོའི་མཐུན་རྐྱེན་སྦྱོར་སྤྲོད་ཐུབ་པ་སོགས་ཀྱི་འབྱུང་རྩ་གཙོ་བོ་དེ་ནི་༸གོང་ས་༸སྐྱབས་མགོན་ཆེན་པོ་མཆོག་ནས་སྐུ་ན་ཕྲ་སྒང་ནས་བོད་དང་བོད་མིའི་རྩ་དོན་ཆེད་དུ་སྐུ་ངལ་ལ་གདོང་ལེན་མི་ཉུང་བ་ཞིག་བསྐྱོན་པའི་འབྲས་བུ་ལ་བརྟེན་ནས་བྱུང་བ་ཞིག་ཡིན་པས་བཀའ་དྲིན་རྗེས་དྲན་ཞུ་དགོས་པ་མ་ཟད། རང་གི་བུ་ཕྲུག་ལའང་༸གོང་ས་མཆོག་གི་བཀའ་དྲིན་ཡིན་པ་ངེས་པར་གསུང་དགོས།
➢ ཕྲུ་གུ་ཚོར་ཕ་མའི་བྱ་སྤྱོད་བཟང་ངན་རྣམས་མིག་སྔར་ཡང་ཡང་མཐོང་གི་ཡོད་པའི་ཆ་ནས་སེམས་ནང་མང་བ་འཇགས་ཀྱི་ཡོད་སྟབས། ཕ་མའི་སྒོ་གསུམ་གྱི་སྤྱོད་པ་འཁྱེར་སྟངས་ནི་བསླབ་བྱ་གཙོ་བོ་ཆགས་ཀྱི་ཡོད་པས། ཕྲུ་གུར་བསླབ་བྱ་ཁོ་ན་བསྐྱོན་པ་ལས་ཕ་མ་རང་ཉིད་ཀྱི་ངོས་ནས་སྒོ་གསུམ་གྱི་སྤྱོད་ལམ་བཟང་པོ་ཞིག་ལག་བསྟར་གྱིས་མིག་དཔེ་སྟོན་ཐུབ་པ་ཡིན་ན་གྲུབ་འབྲས་གནད་དུ་སྨིན་པ་ཞིག་ཡོང་རྒྱུ་ངེས་པ་ཡིན།
➢ བོད་ཀྱི་སྲོལ་རྒྱུན་རིག་གནས་སྤྱི་དང་། བྱེ་བྲག་ཏུ་ནང་པ་སངས་རྒྱས་པའི་བཀའ་བསྟན་ཡོངས་སུ་རྫོགས་པ་འགྲེལ་བརྗོད་ཐུབ་མཁན་ནི་བོད་ཀྱི་ཐུན་མོང་མ་ཡིན་པའི་སྐད་ཡིག་ཁོ་ན་ཡིན་པས། རང་རེའི་ན་གཞོན་གཙོ་བོར་གྱུར་པའི་བོད་མི་སེར་སྐྱ་བགྲེས་གཞོན་མཆོག་དམན་ཀུན་གྱིས་སྦྱངས་བརྩོན་ལྷོད་མེད་གནང་སྐྱོང་ཡོང་བ་མ་ཟད། སྐད་ཡིག་གཞན་གྱིས་བསྲེ་ལྷད་མི་ཞུགས་པར་བོད་སྐད་གཙང་མ་བསྐྱོན་རྒྱུར་སྒོ་ཀུན་ནས་འབད་རྩོལ་གནང་གལ་ཆེ་བ་དང་། ཤེས་འཇོན་ལྷག་བསམ་ལྡན་པའི་དགེ་ལས་ཡོངས་ནས་སྔར་ལྷག་ངལ་བ་ཁྱད་བསད་ཀྱིས་ཡ་རབས་བཟང་སྤྱོད་དང་ལྡན་ཞིང་། ཕྱི་ནང་ཤེས་ཡོན་གྱིས་ཕྱུག་པའི་བོད་མིའི་སྣེ་ཁྲིད་མི་སྣ་གང་མང་སྐྱེད་སྲིང་གནང་སྐྱོང་ཡོང་བའི་འབོད་སྐུལ་ཞུ་རྒྱུ་ཡིན།
མཐའ་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་མཐའ་དག་ལྷུན་གྱིས་གྲུབ་པ་དང་། གསང་གསུམ་གྱི་མཛད་འཕྲིན་ཡར་ངོའི་ཟླ་ལྟར་འཕེལ་བའི་སྨོན་འདུན་ཤུགས་དྲག་དང་བཅས། ཤེས་རིག་བཀའ་བློན་ལྕང་ར་ཐར་ལམ་སྒྲོལ་མས། ཕྱི་ལོ་ ༢༠༢༥ ཟླ་ ༡༡ ཚེས་ ༡༤ ཉིན།
Kalon-Message-on-Childrens-Day