༄༅། །ཕྱི་ལོ་ ༢༠༢༦ ཟླ་བ་ ༩ ཚེས་ ༢༨ ཉིན་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཚོགས་ཁང་གསར་པའི་ནང་ཤེས་རིག་ལས་ཁུངས་ཀྱི་གོ་སྒྲིག་འོག་བཙན་བྱོལ་བོད་མིའི་ཤེས་ཡོན་ལྷན་ཚོགས་དང་ཤེས་ཡོན་སློབ་སྟོན་ཚོགས་ཆུང་གཅིག་ལྕོགས་ཀྱི་ལྷན་ཚོགས་ཐེངས་བཅུ་བཞི་པ་བསྐོང་ཚོགས་གནང་ཡོད་ཅིང་། སྐབས་དེར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གཙོས་པས་ཤེས་རིག་བཀའ་བློན་ཨོ་རྒྱན་བསྟན་འཛིན་མཆོག ཤེས་རིག་དྲུང་ཆེ་ཀརྨ་ཆོས་དབྱིངས་ལགས། བཙན་བྱོལ་བོད་མིའི་ཤེས་ཡོན་ལྷན་ཚོགས་དང་ཤེས་ཡོན་སློབ་སྟོན་ཚོགས་ཆུང་གི་ཚོགས་གཙོ་བཀའ་ཟུར་ཐུབ་བསྟན་ལུང་རིགས་མཆོག དེ་བཞིན་ཤེས་ལྷན་འགན་འཛིན་དྲུང་འཕར་བསྟན་འཛིན་པདྨ་ལགས། དེང་རབས་ཤེས་ཡོན་ཚན་པའི་འགན་འཛིན་འཇམ་དབྱངས་དབང་རྒྱལ་ལགས། སྲོལ་རྒྱུན་ཤེས་ཡོན་ཚན་པའི་འགན་འཛིན་དངོས་གྲུབ་བསྟན་པ་ལགས། ཤེས་རིག་ཟུང་དྲུང་དགེ་འདུན་དོན་ཡོད་ལགས། ཤེས་རིག་དྲུང་གཞོན་བསྟན་འཛིན་དཔལ་ལགས། སློབ་དཔོན་བསོད་ནམས་རྒྱལ་མཚན་ལགས། སྒང་ཏོག་དཔལ་ཁང་སློབ་གཉེར་ཁང་གི་སློབ་སྤྱི་སྤྱི་ཟུར་ཉི་མ་དོན་གྲུབ་ལགས། དགེ་བཤེས་ལྷ་རམས་པ་བློ་གྲོས་བཟང་པོ་ལགས། དྷ་ས་བོད་ཁྱིམ་སྤྱི་ཁྱབ་ཤེས་ཡོོན་ངེས་སྟོན་པ་ངག་དབང་ལྷ་མོ་ལགས། མ་སུ་རི་བོད་ཁྱིམ་ཤེས་ཡོན་འགན་འཛིན་རིག་འཛིན་ཟླ་བ་ལགས། སཾ་བྷོ་ཊའི་སྤྱི་ཁྱབ་འགན་འཛིན་གཞོན་པ་བསྟན་འཛིན་ངག་སྒྲོན་ལགས་བཅས་ལྷན་ཞུགས་ཀྱིས་དབུ་འབྱེད་མཛད་སྒོ་ཚོགས་གནང་ཡོད།
དེ་ཡང་མཛད་སྒོའི་ཐོག་མར་ཤེས་ལྷན་འགན་འཛིན་བསྟན་འཛིན་པདྨ་ལགས་ཀྱིས་ཕེབས་བསུའི་འཚམས་འདྲི་དང་སྦྲགས། ལྷན་ཚོགས་ཀྱི་ཚོགས་གཙོ་གཙོས་པའི་ཚོགས་མི་རྣམ་པའི་ངོ་སྤྲོད་དང་། ལྷན་ཚོགས་ཀྱི་དམིགས་ཡུལ་དང་ཐེངས་འདིའི་གྲོས་གཞི་ཁག་ངོ་སྤྲོད་གནང་གྲུབ་མཚམས། བཙན་བྱོལ་བོད་མིའི་ཤེས་ཡོན་ལྷན་ཚོགས་དང་ཤེས་ཡོན་སློབ་སྟོན་ཚོགས་ཆུང་གི་ཚོགས་གཙོ་བཀའ་ཟུར་ཐུབ་བསྟན་ལུང་རིགས་མཆོག་གིས་ཤེས་ཡོན་ལྷན་ཚོགས་དང་ཤེས་ཡོན་སློབ་སྟོན་ཚོགས་ཆུང་ནི་ཤེས་ཡོན་སྲིད་བྱུས་འོག་ནས་བྱུང་བ་ཞིག་ཡིན་པ་དང་། བོད་པའི་སློབ་གྲྭ་ཁག་གི་ནང་ཤེས་ཡོན་སྲིད་བྱུས་ལག་བསྟར་ཡང་དག་ཡོང་བར་ཚོགས་མི་རྣམས་ནས་ཤེས་ཡོན་སྲིད་བྱུས་ཀྱི་རྒྱབ་ལྗོངས་དང་དམིགས་ཡུལ། བྱུང་རིམ་རྣམས་ལ་ངེས་པར་དུ་གོ་རྟོགས་གཏིང་ཟབ་དགོས་གལ་དང་འབྲེལ། ཁོང་ཉིད་དེ་སྔོན་ཤེས་ཡོན་སྲིད་བྱུས་གཏན་འབེབས་གནང་བའི་སྐབས་དངོས་སུ་ཡོད་པའི་ཆ་ནས་སྲིད་བྱུས་དེའི་ལོ་རྒྱུས་ཀྱི་རྒྱབ་ལྗོངས་རྣམས་ངོ་སྤྲོད་གནང་སྟེ། སྲིད་བྱུས་དེ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་དང་། བཅའ་ཁྲིམས་ཀྱི་ལུང་། མང་ཚོགས་དང་གྲོས་ཚོགས་ཀྱི་རྒྱབ་སྐྱོར་འོག་གཏན་འབེབས་གནང་བ་ཞིག་ཡིན་པ་འགྲེལ་བརྗོད་གནང་སོང་།
དེ་རྗེས་ཤེས་རིག་བཀའ་བློན་ཨོ་རྒྱན་བསྟན་འཛིན་མཆོག་གིས་དཔལ་ལྡན་སྲིད་སྐྱོང་གཙོས་པས་ཚོགས་མི་ཡོངས་ལ་འཚམས་འདྲི་ཞུས་པ་དང་ཆབས་ཅིག ཤེས་ཡོན་སྲིད་བྱུས་ནི་ཕྱི་ལོ་ ༢༠༠༤ ལོར་སྐབས་དེའི་བཀའ་ཤག་དང་གྲོས་ཚོགས་ནས་གཏན་འབེབས་གནང་སྟེ་ཕྱི་ལོ་ ༢༠༠༥ ལོར་སློབ་གྲྭ་ཟུར་འཛུགས་ཀྱིས་ལག་བསྟར་གནང་ནས་རིམ་བཞིན་སློབ་གྲྭ་གཞན་ཁག་གི་ནང་ལག་བསྟར་གནང་འགོ་འཛུགས་པའི་སྐོར་དང་། སྐབས་དེར་བོད་མིའི་སྤྱི་ཚོགས་ནང་ཤེས་ཡོན་སྲིད་བྱུས་དེ་ལྟ་བུ་གཏན་འབེབས་གནང་བ་ནི་གཟི་བརྗིད་ཅན་ཞིག་དང་སྤྱི་ཚོགས་ལ་ཕན་རླབས་ཆེན་པོ་ཞིག་ཡིན་ཞིང་། ཤེས་ཡོན་སྲིད་བྱུས་དེ་བཞིན་རྒྱ་གར་གྱི་ཤེས་ཡོན་སྲིད་བྱུས་དང་རྒྱ་ཆེ་ཆུང་ཙམ་གྱི་ཁྱད་པར་ལས་ནང་དོན་གྱི་ཆ་ནས་གཅིག་མཚུངས་ཡིིན་པ་འགྲེལ་བརྗོད་གནང་ཡོད། དེ་ལྟར་ཤེས་ཡོན་སྲིད་བྱུས་དེ་ཉིད་གལ་ཆེན་འཛིན་པའི་ཐོག་སློབ་གྲྭ་ཁག་གི་ནང་ལག་བསྟར་གནང་བར་འབད་བརྩོན་གནང་དགོས་གལ་དང་། ལྷག་པར་ཕ་མ་རྣམས་ལ་ཤེས་ཡོན་སྲིད་བྱུས་ཀྱི་དམིགས་ཡུལ་དང་རྒྱབ་ལྗོངས་བཅས་ཀྱི་གོ་རྟོགས་སྤེལ་དགོས་པའི་གལ་གནད། དེ་བཞིན་ཚོགས་འདུའི་ཐོག་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་དེར་གདོང་ལེན་ཇི་ལྟར་གནང་དགོས་མིན་ཐོག་གྲོས་གཞི་བཞག་གནང་བར་བསྔགས་བརྗོད་གནང་།
དེ་ནས་དཔལ་ལྡན་སྲིད་སྐྱོང་མཆོག་གིས་ལྷན་ཚོགས་ཀྱི་ཚོགས་མི་རྣམས་ནས་ད་ལྟའི་བོད་པའི་སྤྱི་ཚོགས་ཀྱི་གནས་སྟངས་དང་མཐུན་པའི་སྒོ་ནས་ལྷན་ཚོགས་དེ་བཞིན་སྒྲིག་འཛུགས་ཀྱི་འོག་དང་ཡང་ན་རང་དབང་ཅན་གྱི་སྡེ་ཚན་འོག་གནས་ཚེ་དགེ་སྐྱོན་ཇི་ཞིག་ཡོད་མེད་ཐོག་དཔྱད་ཞིབ་ཀྱིས་དགོངས་པ་བཞེས་དགོས་པའི་ལམ་སྟོན་གནང་ཡོད།
དེ་བཞིན་བོད་པའི་སློབ་གྲྭ་ཁག་གི་ནང་སློབ་ཕྲུག་གི་གྲངས་འབོར་ཉུང་དུ་འགྲོ་བཞིན་པའི་གནས་སྟངས་དང་འབྲེལ་ཏེ། ཤེས་ཡོན་ལྷན་ཚོགས་དང་འབྲེལ་བ་ཡོད་མིན་ལ་མ་ལྟོས་པར་ཚོགས་མི་རྣམས་ནས་སོ་སོའི་ཉམས་མྱོང་བརྒྱུད་གནད་དོན་དེའི་ཐོག་དགོངས་ཚུལ་དང་བགྲོ་གླེང་གནང་ཐུབ་ན་ཐུགས་ཕན་གསོ་ངེས་ཡིན་པ་དང་། ད་ལྟའི་ཆར་བལ་ཡུལ་དང་རྒྱ་གར་ནང་རྟེན་གཞི་བྱས་པའི་བོད་སློབ་ཁག་གི་གནས་སྟངས་དང་། ཕྱི་རྒྱལ་གྱི་གཟའ་མཇུག་སློབ་གྲྭའི་གནས་སྟངས་བཅས་འགྲེལ་བརྗོད་ཀྱིས་དེ་དག་གི་གནས་སྟངས་ལ་གཞིགས་ཏེ་ཇི་ཞིག་གནང་དགོས་མིན་ཐོག་དགོངས་པ་བཞེས་དགོས་གལ།
སྲིད་སྐྱོང་མཆོག་གིས་ལྷག་པར་བོད་ཀྱི་སྐད་ཡིག་སྲུང་སྐྱོབ་དང་འབྲེལ་རྒྱ་ནག་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཟེར་བའི་ཁྲིམས་ཡིག་ལག་བསྟར་བྱས་ཡོད་པ་དང་། ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐད་ཡིག་གི་གལ་གནད་དང་འབྲེལ་བའི་ལམ་སྟོན་བཀའ་སློབ་ཕེབས་པ་གཙོ་བོ་གཞིར་བཟུང་གིས་བཀའ་ཤག་ནས་བོད་ཀྱི་སྐད་ཡིག་གཅེས་སྲུང་གི་རྩ་འཛིན་དང་ལམ་སྟོན་ཞིག་གསལ་བསྒྲགས་གནང་ཡོད་པ་དང་། རྩ་འཛིན་དང་ལམ་སྟོན་དེ་དག་བོད་མིའི་སྒྲིག་འཛུགས་སྤྱི་དང་སྒོས་སུ་ཤེས་རིག་ལས་ཁུངས། དེ་བཞིན་སློབ་གྲྭ་དང་ཚོགས་པ། ཁྱིམ་ཚང་བཅས་ནས་ལག་བསྟར་ཇི་ཞིག་གནང་དགོས་མིན་བཅས་ཀྱི་ཐོག་ཤེས་ཡོན་ལྷན་ཚོགས་ཀྱི་ཚོགས་མི་རྣམས་ནས་ལམ་སྟོན་གྱི་དགོངས་ཚུལ་ཡོད་ཚེ་གནང་སྐྱོང་ཡོང་བ་དང་། དེ་དག་ལག་བསྟར་ཡོང་བའི་འབད་བརྩོན་གནང་རྒྱུ་ཡིན་པ་བཅས་གསུངས།
མཐར་ཤེས་ལྷན་འགན་འཛིན་བསྟན་འཛིན་པདྨ་ལགས་ཀྱིས་ཐུགས་རྗེ་ཆེ་ཞུའི་གསུངས་བཤད་གནང་སྟེ་དབུ་འབྱེད་མཛད་སྒོ་མཇུག་སྒྲིལ་ཡོད།
ཉིན་གཉིས་རིང་གི་ལྷན་ཚོགས་འདིའི་ཐོག་ལྷན་ཚོགས་ཀྱི་སྔ་མའི་གྲོས་ཆོད་ལག་བསྟར་ཇི་གནང་བསྐྱར་ཞིབ་དང་། ཤེས་ཡོོན་ལྷན་ཚོགས་ཀྱི་ཚོགས་མི་རྣམ་པས་བོད་སློབ་ཁག་ཏུ་སྐོར་སྐྱོད་སྐབས་ཀྱི་གཟིགས་ཚུལ་དང་ལེགས་ཉེས་དགོངས་འཆར་སྐོར་བགྲོ་གླེང་། དཔེ་དེབ་པར་སྐྲུན་དང་བོད་སྒྱུར། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ལ་གདོང་ལེན། བོད་སློབ་ཁག་གི་ནང་སློབ་ཕྲུག་གི་གྲངས་འབོར་ཉུང་དུ་འགྲོ་བཞིན་པ་དེར་ཐབས་ལམ་དང་མ་འོངས་པར་སློབ་གྲྭ་ཁག་སྲ་བརྟན་དང་ཡར་རྒྱས་གཏོང་བའི་ཐབས་ལམ་ཇི་དགེ་སྐོར་བཅས་ཀྱི་ཐོག་བགྲོ་གླེང་གནང་རྒྱུ་ཡིན་པ་རེད།།
