༄༅། །ཕྱི་ལོ་ ༢༠༢༦ ཟླ་བ་ ༩ ཚེས་ ༢༠ ནས་ ༢༣ བཅས་ཉིན་གྲངས་བཞིའི་རིང་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་མདུན་ལམ་ཚན་པའི་གོ་སྒྲིག་འོག་དྷ་སྟེང་བོད་ཁྱིམ་སློབ་གྲྭར་ཤེས་ནུས་ཞན་པའི་སློབ་ཕྲུག་རྣམས་ལ་གཞི་རྩའི་ཁ་གསོ་སློབ་ཁྲིད་ཐབས་བྱུས་ཀྱི་ཟབ་སྦྱོང་ (Fundamental Remedial Teaching Strategies for Children with Learning Difficulties) ཞིག་གནང་ཡོད།
ཟབ་སྦྱོང་གི་དམིགས་ཡུལ་གཙོ་བོ་ནི། དགེ་རྒན་རྣམས་ལ་ལག་ལེན་དང་དཔང་རྟགས་ལྡན་པའི་རྒྱུ་ཆ་མཁོ་སྤྲོད་ཀྱིས་འཛིན་གྲྭའི་ནང་ཤེས་ནུས་འདྲ་མིན་གྱི་སློབ་ཕྲུག་རྣམས་ལ་ལག་བསྟར་གནང་ཐུབ་པའི་ཁ་གསོ་སློབ་ཁྲིད་ཀྱི་ཐབས་བྱུས་གསར་པའི་སློབ་ཁྲིད་གནང་བཏང་སྐོར་ཟབ་ཁྲིད་བྱ་རྒྱུ་དེ་ཡིན། སྐབས་དེར་སཾ་བྷོ་ཊའི་སློབ་གྲྭ་དང་། བོད་ཕྲུག་ཁྱིམ་སྡེ། མ་སུ་རི་བོད་ཕྲུག་ཁྱིམ་སྡེ་བཅས་ཀྱི་དགེ་རྒན་ཁྱོན་བསྡོམས་ ༢༧ མཉམ་ཞུགས་གནང་ཡོད།
ཟབ་སྦྱོང་དེ་བཞིན་མཌ་ར་སི་འབྲི་ཀློག་འཆོལ་སྐྱོན་ཚོགས་པ་ནས་མཐུན་སྦྱོར་གནང་བ་དང་། ཚོགས་པ་འདི་ནི་གཞུང་ཁོངས་མ་ཡིན་པའི་ཚོགས་པ་ཞིག་ཡིན་ཞིང་། འདས་པའི་ལོ་ངོ་ཉི་ཤུ་ལྷག་གི་རིང་ཚོགས་པས་ལས་རིམ་སྣ་མང་སྤེལ་ཏེ་སྤྱི་ཚོགས་ནང་ཕན་རླབས་ཆེན་པོ་གྲུབ་བཞིན་ཡོད། ཉིན་གྲངས་བཞིའི་རིང་མཌ་ར་སི་འབྲི་ཀློག་འཆོལ་སྐྱོན་ཚོགས་པའི་ཁྱད་སྟོན་མི་སྣ་བཞི་ནས་ཤེས་ནུས་ཞན་པའི་སློབ་ཕྲུག་རྣམས་ཀྱི་ཀློག་རྩལ་དང་། འབྲི་རྩལ། དག་ཆ། ཨང་རྩིས་བཅས་ཡར་རྒྱས་ཇི་ལྟར་གཏོང་དགོས་མིན་གྱི་སློབ་ཁྲིད་ཐབས་ལམ་ཐོག་ཟབ་ཁྲིད་གནང་ཡོད།
སློབ་ཚན་ཁྲོད་གཙོ་བོ་ཤེས་ནུས་ཞན་པའི་སློབ་ཕྲུག་རྣམས་ལ་སྒྲ་གདངས་རིག་པ་ཡར་རྒྱས་ཀྱི་གོ་རྟོགས་དང་ཀློག་རྩལ། དག་ཆའི་སྒྲོམ་གཞི། འབྲི་རྩལ། དེ་བཞིན་མཐོང་ཐོས་རེག་གསུམ་གྱི་ཐབས་ལམ་བེད་སྤྱོད་ཀྱིས་ཨང་རྩིས་ཁྲིད་ཐབས་བཅས་ཀྱི་ཐོག་ལ་ཟབ་ཁྲིད་གནང་ཡོད།
དེ་བཞིན་ཟབ་སྦྱོང་ཁྲོད་སློབ་གྲྭའི་ཁོར་ཡུག་དང་ནང་གི་ཁོར་ཡུག་བར་འབྲེལ་མཐུད་ཡོང་སླད་དམིགས་བསལ་དགོས་མཁོ་ཅན་གྱི་སློབ་ཕྲུག་གི་ཕ་མ་རྣམས་ལྷན་འཛོམས་ཀྱིས་དགེ་རྒན་རྣམས་ལ་ཕ་མ་སོ་སོའི་ཉམས་མྱོང་དང་འབྲེལ། གནས་སྟངས་དེ་བཞིན་དང་ལེན་བྱེད་པའི་དུས་རིམ་དང་ཉིན་རེའི་འཚོ་བའི་ཁྲོད་འཕྲད་བཞིན་པའི་དཀའ་ངལ་ཁག་གསལ་སྟོན་གནང་ཡོད། ཕ་མ་ཚོའི་ཉམས་མྱོང་ལས་དགེ་རྒན་རྣམས་ལ་ཕ་མ་ཚོར་འཕྲད་བཞིན་པའི་དཀལ་ངལ་ཐོག་ཤེས་རྟོགས་ཀྱིས་ཕན་ཚུན་བར་བྱམས་བརྩེའི་བསམ་པ་བསྐྲུན་ཐུབ་པ་བྱུང་ཡོད།
ཟབ་སྦྱོང་དེ་བཞིན་ཕྱི་ཟླ་ ༩ ཚེས་ ༢༣ ཉིན་མཇུག་བསྡུས་ཡོད་པ་དང་། སྐབས་དེར་སྐུ་མགྲོན་གཙོ་བོར་བོད་ཕྲུག་ཁྱིམ་སྡེའི་སྤྱི་ཁྱབ་ཤེས་ཡོན་ངེས་སྟོན་པ་ངག་དབང་ལྷ་མོ་ལགས་ཆེད་ཕེབས་ཀྱིས་ཡོངས་ཚུད་འཛིན་ཁང་བསྐྲུན་པར་དགེ་རྒན་གྱི་འགན་འཁྲི་དང་ནུས་པའི་སྐོར་གསལ་སྟོན་དང་འབྲེལ། ཤེས་ནུས་ཞན་པའི་སློབ་མ་རྣམས་ལ་ཤེས་ཡོན་ཡང་དག་པ་ཞིག་ཐོབ་སླད་དགེ་རྒན་རྣམས་ནས་འཛིན་གྲྭའི་ནང་སློབ་ཁྲིད་གནང་བའི་སྐབས་སློབ་ཁྲིད་ཀྱི་ཐབས་ལམ་གསར་པ་དག་ལག་བསྟར་གནང་དགོས་པའི་འབོད་སྐུལ་གནང་ཡོད།
ཟབ་སྦྱོང་དེ་བཞིན་ཌ་ནི་ཌ་ (DANIDA) རོགས་ཚོགས་ནས་མཐུན་འགྱུར་གནང་ཡོད་པ་བཅས། །
