༄༅། །འདི་གར་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་ ༤ ཚེས་ ༢ ཉིན་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་དང་། སཾ་བྷོ་ཊ་བོད་སློབ་ཚོགས་པའི་འགན་འཛིན་ཚེ་རིང་དོན་གྲུབ་ལགས། བརྡ་ཆད་ཚན་པའི་འགན་འཛིན་ཨོ་རྒྱན་བསྟན་འཛིན་ལགས་བཅས་ཏི་ཛུ་དར་རྒྱས་གླིང་གཞིས་ཆགས་སུ་ཕེབས་འབྱོར་བྱུང་སྐབས་དེ་གའི་ས་གནས་འགོ་འཛིན་དང་། ས་འཐུས་ཚོགས་གཙོ། སཾ་བྷོ་ཊ་སློབ་གྲྭའི་དགེ་ཆེ། ཚོགས་སྡེ་ཁག་གི་འགན་འཛིན་རྣམ་པ། སློབ་ཕྲུག མི་མང་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས།
ཕྱི་ཚེས་ ༣ ཉིན་གྱི་སྔ་དྲོ་ཆུ་ཚོད་ ༧ ཐོག་ལྷ་དགོན་བྱང་ཆུབ་ཆོས་གླིང་དགོན་པར་གནས་མཇལ་དང་། ༸རྫོགས་ཆེན་དགའ་ནོར་རིན་པོ་ཆེ་མཆོག་མཇལ་བཅར་གྱིས་བོད་ཀྱི་རྩ་དོན་དང་འབྲེལ་བའི་ལས་དོན་ཇི་བརྩམས་གེགས་མེད་ལྷུན་གྱིས་གྲུབ་པར་ཐུགས་སྨོན་སྐྱབས་འཇུག་གནང་སྐྱོང་ཡོང་བའི་གསོལ་འདེབས་ཞུས།
དེ་ཉིན་སྔ་དྲོ་ཆུ་ཚོད་ ༩།༠༠ ཐོག་སཾ་བྷོ་ཊ་སློབ་གྲྭར་མཚམས་གཟིགས་སུ་ཕེབས་ཤིང་། སྔ་དྲོའི་འདུ་འཛོམས་སར་སློབ་གྲྭའི་དགེ་ཆེས་སློབ་གྲྭའི་ལས་བསྡོམས་སྙན་སེང་ཞུས་རྗེས་སློབ་མ་རྣམས་ཀྱིས་སློབ་གྲྭའི་བྱེད་སྒོ་ཁག་དང་། གཞས་སྣ་གཟིགས་འབུལ་ཞུས། དེ་རྗེས་སློབ་གྲྭའི་འཛིན་ཁང་དང་ཁོར་ཡུག་བཅས་ལ་གཟིགས་ཞིབ་གནང་།
ཤེས་རིག་བཀའ་བློན་མཆོག་གིས་སློབ་ཕྲུག་དང་། དགེ་ལས། ཕ་མའི་སྡེ་ཚན་སོ་སོར་གསུང་བཤད་གནང་བའི་ནང་། སློབ་མ་རྣམས་ནས་སློབ་སྦྱོང་ཐོག་སྔར་ལྷག་འབད་འབུངས་གནང་དགོས་སྐོར་དང་། འཕྲོད་བསྟེན་དང་ཟས་བཅུད་བསྟེན་ཕྱོགས། ཡ་རབས་བཟང་སྤྱོད་དང་ལྡན་ཞིང་ཕན་ཚུན་འཆམ་མཐུན་ངང་གནས་དགོས་སོགས་དང་། དེ་བཞིན་དགེ་ལས་དང་ཕ་མ་རྣམས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་སུ་དྲན་པའི་ཐོག་ནས་མ་འོངས་སོན་རྩ་བུ་ཕྲུག་རྣམས་ཀྱི་ཕྱི་ནང་གི་ཤེས་ཡོན་སྤྱི་དང་། ཡང་སྒོས་ཡ་རབས་བཟང་སྤྱོད་ལྡན་པའི་བོད་མི་ཚད་ལྡན་ཞིག་ཆགས་རྒྱུར་ཚང་མས་ཕྱར་གྲུ་མཉམ་འདེགས་གནང་དགོས་གལ་འགངས་ཆེ་བ་སོགས་ཀྱི་གསུང་བཤད་གནང་ཡོད།
ཉིན་རྒྱབ་ཆུ་ཚོད་ ༢།༠༠ ཐོག་ཏི་ཛུ་དར་རྒྱས་གླིང་ས་གནས་མང་ཚོགས་ལ་བླང་དོར་གསུང་བཤད་གནང་བ་དང་། དེ་རྗེས་མང་ཚོགས་ཀྱི་དྲི་བ་ཁག་ལ་ལན་འདེབས་གནང་གྲུབ་རྗེས་གུ་ཝཱ་ཧཱ་ཊི་བརྒྱུད་ཤིས་ལོང་དུ་ཕེབས་ཐོན་གནང་།
ཕྱི་ཟླ་ ༤ ཚེས་ ༤ ཉིན་ཤིས་ལོང་ས་གནས་སུ་ཕེབས་འབྱོར་བྱུང་སྐབས་དེ་གའི་ས་གནས་འགོ་འཛིན་དང་། ས་འཐུས་ཚོགས་གཙོ། སཾ་བྷོ་ཊ་སློབ་གྲྭའི་དགེ་ཆེ། ཚོགས་སྡེ་ཁག་གི་འགན་འཛིན་རྣམ་པ། སློབ་ཕྲུག མི་མང་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས།
ཕྱི་ཟླ་ ༤ ཚེས་ ༥ ཉིན་དེ་གའི་སློབ་གྲྭའི་འཛིན་གྲྭར་གཟིགས་ཞིབ་དང་སྦྲགས་དགེ་སློབ་ཕ་མ་རྣམས་ལ་གསུང་བཤད་གནང་། ཉིན་རྒྱབ་ཆུ་ཚོད་ ༣།༣༠ ཐོག་ཤིས་ལོང་ས་གནས་མང་ཚོགས་ལ་བླང་དོར་གསུང་བཤད་གནང་བ་དང་། དེ་རྗེས་མང་ཚོགས་ཀྱི་དྲི་བ་ཁག་ལ་ལན་འདེབས་གསལ་བཤད་གནང་།
ཕྱི་ཚེས་ ༦ གྱི་སྔ་དྲོ་ཆུ་ཚོད་ ༦།༠༠ ཐོག་ཤིས་ལོང་ནས་གཞུང་འཁོར་བརྒྱུད་བསྟན་འཛིན་སྒང་གཞིས་ཆགས་སུ་ཕེབས་ཐོན་གནང་།
ཕྱི་ཚེས་ ༧ ཉིན་གྱི་སྔ་དྲོ་ཆུ་ཚོད་ ༩།༠༠ ཐོག་བསྟན་འཛིན་སྒང་སཾ་བྷོ་ཊ་སློབ་གྲྭར་མཚམས་གཟིགས་སུ་ཕེབས་ཤིང་། སྔ་དྲོའི་འདུ་འཛོམས་སར་སློབ་གྲྭའི་དགེ་ཆེས་སློབ་གྲྭའི་ལས་བསྡོམས་སྙན་སེང་ཞུས་རྗེས་སློབ་མ་རྣམས་ཀྱིས་སྙན་ཚིག་གྱེར་འདོན་དང་། རིགས་ལམ་རྟགས་གསལ། ལུས་སྦྱོང་། གཞས་སྣ་གཟིགས་འབུལ་བཅས་ཞུས། སློབ་གྲྭའི་འཛིན་ཁང་དང་། སྡེ་ཚན་ཁག སློབ་མའི་སྡོད་ཁང་བཅས་ལ་གཟིགས་ཞིབ་གནང་གྲུབ་རྗེས་དགེ་ལས་སློབ་མ་ཡོངས་ལ་བླང་དོར་གསུང་བཤད་གནང་།
ཉིན་རྒྱབ་ཆུ་ཚོད་ ༢།༣༠ ཐོག་བསྟན་འཛིན་སྒང་ས་གནས་མང་ཚོགས་ལ་བླང་དོར་གསུང་བཤད་གནང་བ་དང་། དེ་རྗེས་མང་ཚོགས་ཀྱི་དྲི་བ་ཁག་ལ་ལན་འདེབས་གསལ་བཤད་གནང་བ་བཅས། །