རྒྱལ་ཡོངས་རྩོམ་ཡིག་འགྲན་སྡུར་གྱི་ལས་རིམ་ངོ་སྤྲོད།
༡། རྩོམ་ཡིག་འགྲན་སྡུར་གྱི་དམིགས་ཡུལ།
གཏན་ཉིན་སློབ་གྲྭ་ཁག་གི་བོད་ཡིག་ཁྲིད་སྦྱོང་ལ་སྐུལ་འདེད་དང་མཇུག་གནོན་བྱ་སླད། ཕྱི་ལོ་༡༩༩༦ ལོ་ནས་བཟུང་ཤེས་རིག་ལས་ཁུངས་ནས་ལོ་རེར་འཛིན་རིམ་དྲུག་པ་ཡན་འདབས་སུ་རྒྱལ་ ཡོངས་རྩོམ་ཡིག་འགྲན་སྡུར་གྱི་ལས་རིམ་སྤེལ་མུས་ལགས་ཤིང༌། རྩོམ་ཡིག་འགྲན་སྡུར་དེ་ནི་སློབ་གྲྭ་དང་སློབ་ཕྲུག་བྱེ་བྲག་པའི་གྲུབ་འབྲས་གཟེངས་བསྟོད་གནང་རྒྱུ་ཙམ་མ་ཡིན་པར། གཏན་ཉིན་སློབ་གྲྭ་ཁག་གི་བོད་ཡིག་གནས་ཚད་ལ་གདེང་འཇོག་དང་དཔྱད་ཞིབ་ཀྱི་གཞི་རྩར་འགྱུར་ཆེད་དང༌། འབྲེལ་ཡོད་དགེ་རྒན་རྣམས་ལ་སློབ་མའི་རྩོམ་འབྲིའི་གནས་ཚད་དང་ཁ་ཕྱོགས། རྩོམ་འབྲིའི་སློབ་ཁྲིད་ལ་ལམ་སྟོན་དང་དཔྱད་ཞིབ་ཀྱི་རིན་ཐང་མཁོ་སྤྲོད། སློབ་མ་རྣམས་ལ་དུས་རྒྱུན་རྩོམ་འབྲིའི་ནུས་རྩལ་ལ་སྦྱོང་བརྡར་གྱི་དཔྱད་གཞིར་འགྱུར་བ་བཅས་ཀྱི་ཕན་ནུས་འདོན་སྤེལ་ཡོང་བའི་དམིགས་ཡུལ་བཟུང་ཡོད།
༢། རྩོམ་འགྲན་གྱི་བརྒྱུད་རིམ།
རྩོམ་ཡིག་འགྲན་སྡུར་བྱེད་སྟངས་ནི།
ཀ) ཐོག་མར་འཛིན་རིམ་སོ་སོའི་ཁྲོད་སྔོན་འགྲོའི་རྩོམ་ཡིག་འགྲན་སྡུར་སྤེལ་ཏེ་རྩེ་ཕུད་སློབ་མ་རེ་རེ་འདེམས་དགོས།
ཁ) ཤེས་ལས་ནས་རྩོམ་འགྲན་གྱི་དུས་ཚེས་དང༌། རྩོམ་ཡིག་གི་ཁ་བྱང་བཅས་སློབ་ཁོངས་སོ་སོར་གཏོང་རྒྱུ།
ག) གཏན་འབེབས་དུས་ཚེས་སུ། སློབ་ཁག་སོ་སོས་འབྲེལ་ཡོད་བོད་དགེ་དང་ས་གནས་འགོ་འཛིན་ལས་ཁང་གི་འཐུས་མི། དགེ་རྒན་ཕ་མའི་འཐུས་ཚོགས་ཀྱི་འཐུས་མི་གཉིས་བཅས་ཀྱི་གཟིགས་རྟོག་འོག་འགྲན་སྡུར་སྤེལ་རྒྱུ།
ང) འགྲན་སྡུར་དངོས་གཞི་མ་སྤེལ་གོང་གི་དུས་ཡུན་སྐར་མ་༡༥ སྔོན་དུ་ཤེས་ལས་ཀྱིས་བཏང་བའི་རྩོམ་ཡིག་ཁ་བྱང་གི་ཁ་ཕྱེ་དགོས།
ཅ) འགྲན་སྡུར་མཇུག་གྲིལ་མ་ཐག་ཏུ་སློབ་མ་རེ་རེའི་རྩོམ་ཡིག་ཐོག་གཟིགས་རྟོག་ཚོགས་ཆུང་གི་རྟགས་ཐམ་འཁོད་དེ་ཉིན་དེ་རང་ལ་ཤེས་ལས་སུ་སྦྲག་གཏོང་བྱ་དགོས།
༣། རྩོམ་འགྲན་ལ་གདེང་ཞིབ་བྱེད་ཐབས།
ས་གནས་སློབ་ཁག་ནས་དུས་ཚེས་རྒྱས་བཅད་ནང་ཚུད་འབྱོར་བའི་ཕུལ་བྱུང་རྩོམ་ཡིག་རྣམས་ལ་གདེང་ཞིབ་བྱ་སླད། ཤེས་ལས་ནས་རྩོམ་ཡིག་གདེང་ཞིབ་ཚོགས་ཆུང་བསྐོ་འཛུགས་གནང་བ་བརྒྱུད། འཛིན་རིམ་སོ་སོའི་ཨང་རིམ་རྩེ་ཕུད་གསུམ་རེ་འདེམས་སྒྲུག་གིས་བྱ་དགའ་གནང་རྒྱུ་དང་ཆབས་ཅིག ཕུལ་བྱུང་རྩོམ་ཡིག་རྣམས་ལ་དཔྱད་མཆན་གནད་བསྡུས་རེ་དང་བཅས་སྨྱུག་གསར་ཞེས་པའི་ ལོ་རེའི་དུས་དེབ་ནང་ཕྱོགས་བསྒྲིགས་ཀྱིས་གཏན་ཉིན་སློབ་གྲྭ་ཡོངས་སུ་རིན་མེད་འགྲེམས་སྤེལ་བྱེད་བཞིན་ཡོད།
རྩོམ་སྒྲིག་པའི་གཏམ།
སྡེ་ཚན་དང་པོ། (འཛིན་གྲྭ་དྲུག་པ)
སྡེ་ཚན་གཉིས་པ། (འཛིན་གྲྭ་བདུན་པ)
སྡེ་ཚན་གསུམ་པ། (འཛིན་གྲྭ་བརྒྱད་པ)
སྡེ་ཚན་བཞི་པ། (འཛིན་གྲྭ་དགུ་པ)
སྡེ་ཚན་ལྔ་པ། (འཛིན་གྲྭ་བཅུ་པ)
སྡེ་ཚན་དྲུག་པ། (འཛིན་གྲྭ་བཅུ་གཅིག་པ)
སྡེ་ཚན་བདུན་པ། (འཛིན་གྲྭ་བཅུ་གཉིས་པ)
ཕྱི་ལོ་༢༠༡༡ ལོའི་བཙན་བྱོལ་བོད་མིའི་གཏན་ཉིན་སློབ་གྲྭ་ཁག་གི་བོད་ཡིག་ཡིག་གཟུགས་འགྲན་སྡུར་ནང་བྱ་དགའ་ཐོབ་པའི་ཡིག་གཟུགས་བདམས་བཀོད།
གླེང་བརྗོད།
འཇམ་དཔལ་དབྱངས་ཀྱི་རྣམ་སྤྲུལ། བཀའ་དྲིན་ཅན་གྱི་སློབ་དཔོན་ཐོན་མི་ནས་ཁྱུང་བོ་གཡུ་ཁྲི་ལ་སོགས་སྔོན་བྱོན་དམ་པ་རྣམས་ཀྱི་ཕྱག་རྒྱུན་བཟང་པོ་ཉམས་པ་སོར་ཆུད་དང་གནས་པ་གོང་འཕེལ་གཏོང་ཕྱིར་དང། དེང་རབས་མཛེས་རྩལ་གྱི་ལེགས་ཆར་ཡང་སློབ་སྦྱོང་དང་སྡུད་ལེན་བྱ་ཆེད། སུད་སིར་གནས་སྡོད་ལྷ་ས་བུའི་མཐུན་ཚོགས་ཀྱི་མཐུན་འགྱུར་རོགས་རམ་འོག་ཕྱི་ལོ་༢༠༠༧ ལོ་ནས་བཟུང་འདི་ག་ཤེས་རིག་ལས་ཁུངས་ཀྱིས་གཞི་རིམ་སློབ་མའི་ཕུལ་བྱུང་ཡིག་གཟུགས་འདེམས་སྒྲུག་གི་ལས་འགུལ་འདི་འདྲ་ཞིག་རྒྱ་བལ་འབྲུག་གསུམ་གྱི་བོད་པའི་སློབ་གྲྭ་ཁག་ཏུ་རྒྱ་ཁྱབ་ཏུ་སྤེལ་འགོ་ཚུགས་ཤིང༌། འདི་ནི་སྤེལ་ཐེངས་བཞི་པ་དེ་ཡིན། ལས་རིམ་འདི་ལྟ་བུར་བརྟེན་ནས་རང་རེའི་གཞི་རིམ་སློབ་མ་རྣམས་བོད་ཡིག་གི་འབྲི་རྒྱུན་མི་ཉམས་རྒྱུན་འཛིན་ཡོང་བར་ཕན་རླབས་ཡོང་བའི་རེ་བ་བྱེད་ཀྱི་ཡོད།
འཛིན་གྲྭ་རེ་སྡེ་ཚན་རེར་བགོས་ཏེ། སྡེ་ཚན་རེ་རེའི་སློབ་མའི་ཡིག་གཟུགས་རྣམས་གདེང་ཞིབ་ཚོགས་ཆུང་ལ་ཕུལ་ནས་རྩེ་ཕུད་གསུམ་དང་ལེགས་གསོལ་བྱ་དགའ་ལྔ་བཅས་འདེམས་གནང་གི་ཡོད་ལ། རྩེ་ཕུད་ཡིག་གཟུགས་རྣམས་འདིར་བདམས་བཀོད་བྱས་ཡོད།
ཡིག་གཟུགས་རྣམས་ཇུས་འགོད་བདེ་ཆེད་བཅད་གཏུབས་གང་འཚམ་བྱས་ཡོད་མོད་མ་ཕྱི་སློབ་མ་རང་ཉིད་ཀྱི་ཡིག་རིས་དངོས་ཡིན།
མ་འོངས་པར་ལས་རིམ་འདི་རྒྱུན་མཐུད་དེ་སྤེལ་རྒྱུ་ལགས་ན། ལས་དོན་འདི་ཚགས་ཚུད་དང་སློབ་མའི་ཡིག་གཟུགས་ཡར་རྒྱས་ཡོང་བ་ལ་དགེ་རྒན་གྱིས་མཛུབ་སྟོན་ལ་ཁ་བྲལ་ཐབས་མེད་སྟབས། དགེ་རྒན་རྣམ་པས་ལས་དོན་འདི་ལ་གཞོགས་འདེགས་ཡོང་བའི་རེ་བ་དང་བཅས།
རྩོམ་སྒྲིག་པས།
ཕྱི་ལོ་༢༠༡༠ ཟླ་༡༢ ཚེས་༡༠ ཉིན།
ཕྱི་ལོ་༢༠༡༡ ལོའི་རྒྱལ་ཡོངས་ཡིག་གཟུགས་འགྲན་སྡུར་ནང་བྱ་དགའ་ཐོབ་པའི་ཡིག་གཟུགས།
རྩོམ་སྒྲིག་པ། འཇམ་དབྱངས།
རྒྱབ་ཤོག་ཇུས་འགོད་པ། འཇམ་དབྱངས།