༄༅། །ཕྱི་ལོ་ ༢༠༢༥ ཟླ་བ་ ༡ ཚེས་ ༡༠ ཉིན་སཾ་བྷོ་ཊ་བོད་སློབ་ཚོགས་པའི་གོ་སྒྲིག་འོག་བཞུགས་སྒར་ངྷ་སའི་ནོར་བུ་གསོལ་མགྲོན་ཁང་དུ་སཾ་བྷོ་ཊ་བོད་སློབ་ཚོགས་པའི་ཁྱབ་ཁོངས་སློབ་གྲྭ་ཁག་གི་ལོ་འཁོར་འགན་འཛིན་ཚོགས་འདུ་ཐེངས་བཅུ་བདུན་པ་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་སྐུ་མགྲོན་གཙོ་བོ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་དང་། སཾ་བྷོ་ཊ་བོད་སློབ་ཚོགས་པའི་སྤྱི་ཁྱབ་འགན་འཛིན་ཚེ་རིང་དོན་གྲུབ་ལགས། འགན་འཛིན་གཞོན་པ་བསྟན་འཛིན་ངག་སྒྲོན་ལགས། དེ་བཞིན་སཾ་བྷོ་ཊ་བོད་སློབ་ཁྱབ་ཁོངས་སློབ་གྲྭ་ཁག་གི་སློབ་སྤྱི་དང་། དགེ་ཆེ་རྣམ་པ་ལྷན་འཛོམས་ཀྱིས་ཐོག་མར་སྐུ་མགྲོན་གཙོ་བོ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་སྣང་གསལ་མར་མེ་ཞལ་ཕྱེ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་རྟེན་འབྱུང་མཇལ་དར་སྒྲོན་འབུལ་ཞུས་རྗེས་སཾ་བྷོ་ཊ་བོད་སློབ་ཚོགས་པའི་སྤྱི་ཁྱབ་འགན་འཛིན་ཚེ་རིང་དོན་གྲུབ་ལགས་ཀྱིས་ཕེབས་བསུའི་འཚམས་འདྲི་དང་སྦྲགས་ཚོགས་འདུའི་གྲོས་གཞི་ཁག་ངོ་སྤྲོད་གནང་གྲུབ་མཚམས་སྐུ་མགྲོན་གཙོ་བོ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་ཚོགས་བཅར་བ་ཡོངས་ལ་འཚམས་འདྲི་དང་འབྲེལ། སཾ་བྷོ་ཊ་བོད་སློབ་ཚོགས་པའི་སྤྱི་ཁྱབ་འགན་འཛིན་ཚེ་རིང་དོན་གྲུབ་ལགས་ཀྱིས་འཛིན་རིམ་དྲུག་པ་ནས་བརྒྱད་པ་བར་བོད་ཡིག་ཐོག་ཤུགས་བསྐྱོན་གནང་རྒྱུའི་ཁས་ལེན་གནང་བར་བསྔགས་བརྗོད་གནང་བ་དང་ཆབས་ཅིག གཞི་རིམ་འོག་མའི་འཛིན་གྲྭ་དང་པོ་ནས་ལྔ་པ་བར་སློབ་གྲྭའི་བྱེད་སྒོ་མཐའ་དག་ཚགས་ཚུད་པོ་ཡོད་པ་དང་། དེ་བཞིན་སློབ་གྲྭ་ཕལ་ཆེ་བའི་ནང་འཛིན་གྲྭ་བཅུ་པ་དང་བཅུ་གཉིས་གལ་ཆེན་པོ་བརྩིས་ཏེ་དོ་སྣང་མང་བ་བྱེད་ཀྱི་ཡོད་ཀྱང་། འབྲིང་རིམ་འཛིན་གྲྭ་དྲུག་པ་ནས་བདུན་པ་བར་དོ་སྣང་དེ་ཙམ་གནང་གི་མེད་པ་གསུངས་སོང་།
དེ་རྗེས་བཀའ་བློན་མཆོག་གིས་འབྲིང་རིམ་གྱི་སློབ་ཕྲུག་ལ་སྐད་ཡིག་དང་། སྒྲིག་འཛུགས། སློབ་ཁྲིད་གནང་སྟངས་ཐོག་ལ་དོ་སྣང་སྤྲོད་ཐུབ་ན་རྨང་གཞི་ལེགས་པོ་བཏིང་ཐུབ་པ་མ་ཟད། མཐོ་རིམ་འཛིན་གྲྭའི་སྐབས་དགེ་རྒན་རྣམས་ལ་སེམས་འཚབ་མི་དགོས་པ་གསུངས། དེ་ནས་ཁོང་མོས་སྔར་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གིས་སྤྱི་ཚོགས་ཚན་རིག་དང་། ཚན་རིག ཨང་རྩིས་བཅས་ཀྱི་ཀློག་དེབ་རྣམས་གྲ་སྒྲིག་གནང་དགོས་སྐོར་གསུངས་པ་ལྟར་ཤེས་རིག་ལས་ཁུངས་ངོས་ནས་ལག་ལེན་བསྟར་གྱི་ཡོད་པའི་འགྲེལ་བརྗོད་གནང་།
གཞན་ཡང་བཀའ་བློན་མཆོག་གིས་ཕྱི་ལོ་ ༢༠༢༥ ནང་འཛིན་རིམ་དྲུག་པའི་སྤྱི་ཚོགས་ཚན་རིག་དང་། ཚན་རིག རྩིས་རིགས་བཅས་ཀྱི་སློབ་ཚན་གྱི་དགེ་རྒན་རྣམས་ལ་དམིགས་ཏེ་ཕྱི་ལོ་ ༢༠༢༦ ནང་ཤེས་རིག་ལས་ཁུངས་ཀྱིས་ཟབ་སྦྱོང་གོ་སྒྲིག་ཞུས་སྟེ་ལོ་གཅིག་གི་དུས་ཡུན་ནང་ཤེས་རིག་ལས་ཁུངས་ངོས་ནས་དགེ་རྒན་རྣམས་སློབ་ཚན་གང་རུང་བསླབ་ཐུབ་པའི་ནུས་པ་ཡོད་པ་ཞིག་བསྐྲུན་རྒྱུ་འབད་བརྩོན་གནང་རྒྱུ་ཡིན་ཞེས་འགྲེལ་བརྗོད་གནང་ཡོད།
དེ་མཚུངས་ཤེས་རིག་བཀའ་བློན་མཆོག་གིས་རང་ཉིད་སློབ་ཁྲིད་གནང་བའི་བརྒྱུད་རིམ་ནང་། དཔལ་འབྱོར་རིག་པ་སློབ་ཁྲིད་གནང་སྐབས་དཀའ་རྙོག་འཕྲད་ཚེ་ཐབས་ལམ་གང་མང་སྒོ་ནས་དཀའ་ངལ་སེལ་ཐབས་གནང་ཡོད་པ་བཞིན་དགེ་རྒན་ཚོས་ཀྱང་སློབ་ཁྲིད་གནང་སྐབས་སྐྱོན་ཡོད་ཚེ་སློབ་ཁྲིད་ཐབས་ལམ་ལ་འགྱུར་བ་གཏོང་དགོས། དེ་བཞིན་སློབ་གྲྭ་ཁག་ལ་ཕེབས་སྐབས་སློབ་གྲྭའི་སློབ་ཕྲུག་ལ་ཉན་ཐོས་ཀྱི་ནུས་པ་སྐྱོ་བོ་ཡོད་པ་གསལ་སྟོན་གནང་བ་དང་འབྲེལ་ཁོང་མོས་ཡག་པོ་ཉན་ན་ཡག་པོ་ཤོད་ཐུབ་པ་དང་། ཡག་པོ་ཀློག་ན་བྲིས་ཐུབ་པའི་ཕན་ཚུན་འབྲེལ་མཐུད་ཆེན་པོ་ཡོད་པ་འགྲེལ་བརྗོད་གནང་ཡོད།
གཞན་ཡང་དགེ་རྒན་རྣམས་ཀྱིས་སློབ་ཕྲུག་རྣམས་ལ་ཉེས་རྡུང་མེད་པར་བྱམས་སྙིང་རྗེའི་ཐོག་སློབ་ཁྲིད་དང་ལམ་སྟོན་གནང་བ་དེ་སི་ཤེས་ཡོན་གྱི་ངོ་བོ་ཡིན་པ་དང་། ཉེས་རྡུང་མེད་པའི་ཁོར་ཡུག་བསྐྲུན་དགོས་པ་ནི་གནད་འགག་ཡིན། ཞེས་སོགས་ཀྱི་གསུང་བཤད་གནང་།
སྤྱིར་སཾ་བྷོ་ཊ་བོད་སློབ་ཚོགས་པའི་ཁྱབ་ཁོངས་སློབ་གྲྭ་ཁག་གི་ལོ་འཁོར་འགན་འཛིན་ཚོགས་འདུ་ཐེངས་བཅུ་བདུན་པ་དེ་བཞིན་ཕྱི་ལོ་ ༢༠༢༥ ཟླ་ ༠༡ ཚེས་ ༡༠ ནས་ ༡༢ བར་ཉིན་གསུམ་རིང་འཚོག་རྒྱུ་ཡིན་པ་དང་། དེར་སློབ་གྲྭ་ཁག་གི་སློབ་སྤྱི་དང་དགེ་ཆེ་གྲངས་ ༢༩ མཉམ་ཞུགས་གནང་ཡོད་པ་བཅས།།
