བལ་ཡུལ་རྣམ་རྒྱལ་མཐོ་རིམ་སློབ་གྲྭ།

དཀར་ཆག

སྔོན་གླེང༌།
རྒྱབ་ལྗོངས།
སྒྲིག་འཛུགས་སྒྲོམ་གཞི།
སློབ་གྲྭའི་དམིགས་ཡུལ།
སློབ་གྲྭ་གནས་སྤར་དང་དེའི་ཤུགས་རྐྱེན།
བལ་ཡུལ་རྒྱལ་ཡོངས་ཀྱི་སློབ་གྲྭ་རྩེ་ཕུད་ལ་ངོས་འཛིན།
དཔེ་མཛོད་དང་ཀམ་པུ་ཊར་སྦྱོང་བརྡར་ཁང༌།
ཤེས་ཡོན་སྲིད་བྱུས་ལག་བསྟར་གྱི་གནས་ཚུལ་རགས་བསྡུས།
སློབ་མའི་ཤེས་ཡོན་སྤྱི་དང༌། དམིགས་བསལ་བོད་ཀྱི་སྐད་ཡིག་རིག་གཞུང་བཅས་ཡར་རྒྱས་ལས་རིམ་སྐོར།

སྔོན་གླེང༌།

འགྲོ་བ་ལྷ་དང་བཅས་པའི་མགོན་སྐྱབས་མཚུངས་ཟླ་མ་མཆིས་པ་ྋསྤྱི་ནོར་ྋགོང་ས་སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ནས་བོད་བསྟན་སྲིད་བདེ་དོན་གྱི་ཆེད་དུ་ཁྱིམ་མཚེས་རྒྱལ་ཁབ་རྒྱ་གར་དུ་བཙན་བྱོལ་ལ་ཆིབས་བསྒྱུར་ཞབས་སོར་བཀའ་དྲིན་ཆེ་བ་འཁོད་འཕྲལ། བོད་ཀྱི་ཆོས་དང་རིག་གཞུང༌། ཡུལ་གོམས་གཤིས་ལུགས། སྐད་ཡིག་བཅས་པ་ཉམས་པ་སོར་ཆུད་དང་མི་ཉམས་གོང་འཕེལ་སླད་ཆོས་སྡེ་ཁག་དང༌། གཞིས་ཆགས། ལྷག་པར་དུ་བོད་རང་དབང་སླར་གསོའི་རྨང་གཞི་མ་འོངས་བོད་ཀྱི་སོན་རྩ་རང་རིགས་གཞོན་སྐྱེས་རྣམས་ལ་སྲོལ་རྒྱུན་གཙོར་བཟུང་དེང་རབས་ཀྱི་ཤེས་ཡོན་སློབ་སྦྱོང་ཚད་ལྡན་སྤྲོད་རྒྱུའི་ཆེད་རྒྱ་གར་གཞུང་གི་རོགས་རམ་འོག་བཙན་བྱོལ་བོད་མིའི་གཞི་རིམ་གཏན་ཉིན་སློབ་གྲྭ་མང་དག་གསར་འཛུགས་གནང་ཡོད། བལ་ཡུལ་ཁུལ་དུ་གནས་སྡོད་སྐྱབས་བཅོལ་བོད་མིའི་བུ་ཕྲུག་གིས་གཙོས་པའི་ཆོས་དང་རིག་གཞུང་གཅིག་པའི་ཧི་མ་ལ་ཡའི་རི་རྒྱུད་ཀྱི་མི་མང་དཔེར་ན། མུས་ཏང་དང༌། མ་ནང༌། ར་སུབ། སོ་ལུ་ཁུམ་བུ། སྤོག་ར། ཀཐ་མན་གྲུ་ནས་ཤར་པ་དང༌། རྟ་མང༌། གཉི་ཤང༌། དགུ་རོང༌། ར་ཡེ་སོགས་ཀྱི་སློབ་ཕྲུག་རྣམས་ལའང་སློབ་སྦྱོང་གི་མཐུན་རྐྱེན་གོ་སྐབས་བསྐྲུན་སླད་བོད་གཞུང་ཤེས་རིག་ལས་ཁུངས་ནས་གངས་ཅན་བདེ་རྩའི་འཛིན་སྐྱོང་འོག་དམའ་རིམ་དང་འབྲིང་རིམ་འཛིན་གྲྭ་བཅུ་པ་གང་རུང་བར་ཡོད་པའི་སློབ་གྲྭ་ཁྱོན་བསྡོམས་གྲངས་༡༢ གསར་འཛུགས་གནང་ཡོད། འོན་ཀྱང་འཛིན་གྲྭ་བཅུ་པ་ཐོན་རྗེས་སློབ་ཕྲུག་ཉུང་ཤས་ཤིག་སློབ་སྦྱོང་མུ་མཐུད་ཆེད་རྒྱ་གར་དུ་བསྐྱོད་བཞིན་པ་མ་གཏོགས། སློབ་ཕྲུག་མང་ཆེ་བ་ཁྱིམ་ཚང་ཕ་མའི་དཔལ་འབྱོར་གནས་སྟངས་ཞན་པའི་དབང་གིས་སློབ་སྦྱོང་མཇུག་སྐྱོང་མ་ཐུབ་པར་འཕྲོ་བརླག་འགྲོ་བཞིན་ཡོད་པར་འབྲེལ་ཡོད་ཕ་མ་དང་སྤྱི་ཚོགས་ཁྲོད་བློ་འཚབ་ཆེན་པོ་ཡོད།

རྒྱབ་ལྗོངས།

བོད་གཞུང་ཤེས་རིག་ལས་ཁུངས་ནས་ཐོག་མ་སློབ་གྲྭ་རྒྱག་ཡུལ་གྱི་ས་ཆ་སྤུས་གཟིགས་གནང་བ་དང༌། རྒྱལ་སྤྱིའི་ཨེ་སེ་ཨོ་ཨེ་སེ་(SOS)རོགས་ཚོགས་ནས་སློབ་ཁང་འཛིན་ཆས་དང་བཅས་པ་གསར་སྐྲུན་རོགས་རམ་གནང་སྟེ། ཕྱི་ལོ་༡༩༨༨ཟླ་༤ ཚེས་༢ ཉིན་བལ་ཡུལ་རྣམ་རྒྱལ་མཐོ་སློབ་གསར་དུ་དབུ་བརྙེས་ཤིང༌། སྐབས་དེར་འཛིན་རིམ་དྲུག་པ་ནས་བརྒྱད་པ་བར་དང༌། སློབ་ཕྲུག་ཁྱོན་བསྡོམས་གྲངས་༢༠༠ དང་དགེ་ལས་ཁྱོན་བསྡོམས་གྲངས་༡༠ བཅས་ཡོད། སློབ་གྲྭ་འདི་བཙུགས་པའི་འགོ་སྟོད་ཀྱི་ལོ་ཤས་རིང༌། སློབ་གྲྭའི་དཔལ་འབྱོར་གནས་སྟངས་ཞན་པའི་དབང་གིས་དཀའ་ངལ་མི་ཉུང་བ་ཞིག་འཕྲད་ཡོད་ནའང༌། སྐབས་དེའི་སློབ་གྲྭའི་དབུ་དགེ་ལས་བྱེད་རྣམས་ཀྱིས་ལྷག་བསམ་དང་སྙིང་སྟོབས་ཆེན་པོས་སྐུ་ངལ་འཛེམས་མེད་ངང་ཕྱག་ལས་གནང་བའི་ཐོག ཀ་ཐ་མན་གྲུར་གནས་སྡོད་རང་རིགས་གཏོང་ཕོད་ཅན་རྣམས་ཀྱིས་ཀྱང་སློབ་གྲྭའི་གནས་སྟངས་གཉན་འཕྲང་ཆེ་བའི་དུས་སྐབས་དེར་ཤིན་ཏུ་བསྔགས་འོས་པའི་དཔལ་འབྱོར་གྱི་མཐུན་རྐྱེན་རོགས་རམ་གནང་ཡོད་འདུག་པའི་ཉེར་ལེན་ལ་བརྟེན། དེང་སྐབས་སློབ་གྲྭ་འདིར་འཛིན་རིམ་དྲུག་པ་ནས་བཅུ་གཉིས་བར་ཁྱོན་བསྡོམས་སློབ་ཕྲུག་གྲངས་༤༢༤ ཡོད་པ་དང༌། འཛིན་སྐྱོང་ལས་བྱེད་གྲངས་༧ དགེ་རྒན་གྲངས་༢༧ མ་བྱན་སོགས་སྤྱིར་བཏང་ལས་བྱེད་གྲངས་༢༠ བཅས་ཁྱོན་བསྡོམས་དགེ་ལས་གྲངས་༥༤ ཡོད།

སྒྲིག་འཛུགས་སྒྲོམ་གཞི།

ཕྱི་ལོ་༢༠༠༤ ལོར་དཔལ་ལྡན་བོད་གཞུང་ཤེས་རིག་ལས་ཁུངས་ནས་བལ་ཡུལ་ཁུལ་དུ་ཡོད་པའི་བཙན་བྱོལ་བོད་མིའི་སློབ་གྲྭ་རྣམས་ད་ལྟ་རྒྱ་གར་ནང་ཡོད་པའི་བོད་ཁྱིམ་སློབ་གྲྭ་ལྟར། བལ་ཡུལ་གངས་ཅན་བདེ་རྩའི་འཛིན་སྐྱོང་འོག་རང་སྐྱོང་སྡེ་ཚན་ཞིག་ཏུ་ངོས་འཛིན་ཐག་གཅོད་ཀྱི་བཀའ་རྒྱ་ཕེབས་གསལ་བཞིན་འཛིན་སྐྱོང་གནང་མུས་རེད། ཚོགས་མི་བརྒྱད་ལས་གྲུབ་པའི་སློབ་གྲྭའི་འཛིན་སྐྱོང་ལྷན་ཚོགས་ཡོད་པ་དེས། ལོ་རེར་ཐེངས་གཅིག་གམ་གཉིས་ཡང་ན་དགོས་གལ་ནམ་བྱུང་ལ་ལྷན་ཚོགས་བསྐྱངས་ཏེ། སློབ་གྲྭའི་ཁྱོན་ཡོངས་ཀྱི་འཛིན་སྐྱོང་ལས་དོན་ལ་རྟོག་ཞིབ་སྟངས་འཛིན་དང༌། དཔལ་འབྱོར་དང་འབྲེལ་བའི་གལ་ཆེའི་གནད་དོན་ཐག་གཅོད། ལོ་རེའི་སྔོན་རྩིས་འགྲོ་གྲོན་དང་འཆར་གཞི་བཀའ་འཁྲོལ། རྩིས་ཁྲ་དང་རྩིས་ཞིབ་སྙན་ཐོར་ཞིབ་འཇུག་མཇུག་གནོན་སོགས་གནང་བཞིན་ཡོད།

སློབ་གྲྭའི་དམིགས་ཡུལ།

རྣམ་རྒྱལ་མཐོ་རིམ་སློབ་གྲྭའི་དམིགས་ཡུལ་གཙོ་བོ་ནི། སློབ་ཕྲུག་རྣམས་ལ་བོད་ཀྱི་སྐད་ཡིག་དང༌། ཆོས་དང་རིག་གཞུང་གི་སློབ་སྦྱོང་ཚད་ལྡན་སྤྲོད་རྒྱུའི་ཐོག དེང་རབས་ཀྱི་ཤེས་ཡོན་སློབ་སྦྱོང་ཆ་ལག་ཚང་ཞིང་སྤུས་ཚད་ལྡན་པ་ཞིག་སྦྱོར་སྤྲོད་ཡོང་ཐབས་སོགས་མདོར་ན་བོད་མི་མཚན་ཉིད་ཚང་བ་ཞིག་ཡོང་ཐབས་སུ་འབད་བརྩོན་ཞུ་རྒྱུ་ཡིན། སློབ་འཇུག བལ་ཡུལ་གངས་ཅན་བདེ་རྩའི་ཁྱབ་ཁོངས་སུ་ཡོད་པའི་སློབ་གྲྭ་ཁག་བརྒྱད་ནས་ཐོན་པའི་སློབ་ཕྲུག་ཡིན་ཕྱིན། སློབ་སྦྱོང་བཟང་ཞན་དང་ཡིག་རྒྱུགས་བརྒྱ་ཆ་མཐོ་དམན་ལ་མ་ལྟོས་པར་ལོ་ལྟར་སློབ་གྲྭ་འདིའི་འཛིན་རིམ་དྲུག་པ་དང༌། བརྒྱད་པ། དགུ་པ། བཅུ་གཅིག་བཅས་ཀྱི་ནང་ཐད་ཀར་སློབ་འཇུག་གནང་བཞིན་ཡོད་པ་དང༌། དེ་མིན་སྒེར་སློབ་ཁག་ནས་སློབ་གྲྭ་འདིར་འཛུལ་ཞུགས་བྱས་པའི་སློབ་ཕྲུག་རྣམས་ཀྱིས་བོད་ཡིག་དང༌། ཨིན་ཇི། ཨང་རྩིས་བཅས་སློབ་ཚན་གསུམ་ཐོག་ཚུད་རྒྱུགས་བཏང་སྟེ་སློབ་འཇུག་གནང་གི་ཡོད། ཕྱི་ལོ་༡༩༨༩ ནས་༢༠༠༩ བར་འདས་པའི་ལོ་ངོ་༢༡ རིང་རྣམ་རྒྱལ་མཐོ་སློབ་ཀྱི་སློབ་མའི་གྲངས་འབོར་འཕར་ཆག་གི་གནས་སྟངས་གཤམ་གསལ། དགེ་ལས་བསྐོ་བཞག་གནང་ཕྱོགས། སློབ་གྲྭའི་ནང་དགེ་ལས་ཀྱི་ས་མིག་སྟོང་པ་ཡོད་ཚེ་སློབ་གྲྭའི་ལས་ཁུངས་ནས་གཞུང་འབྲེལ་གསར་ཤོག་བརྒྱུད་གསལ་བསྒྲགས་དང་འབྲེལ་དགེ་རྒན་གྱི་འོས་ཆོས་ཚང་ཞིང་ཉམས་མྱོང་ལྡན་པ་རྣམས་འཛིན་གྲྭའི་ནང་སློབ་ཁྲིད་དང༌། ངོ་ཐུག་གི་ལམ་ནས་དྲག་འདེམས་ཀྱིས་མཐའ་མ་གངས་ཅན་བདེ་རྩ་ནས་བསྐོ་བཞག་ཡི་གེ་གནང་མུས་ཡིན། དགེ་ལས་ཀྱི་ཐོབ་ཐང་དང་ལས་འགན་སོགས་གངས་ཅན་བདེ་རྩ་ནས་གཏན་འབེབས་གནང་བའི་སྒྲིག་གཞི་ལྟར་ལག་བསྟར་གནང་བཞིན་ཡོད། གཏན་འབེབས་སློབ་ཚན་དང་ཟུར་སྦྱོང་རིག་གནས། བལ་ཡུལ་ཆེས་མཐོའི་འབྲིང་རིམ་ཤེས་ཡོན་ལྷན་ཁང་ནས་ངོས་འཛིན་དང་གཏན་འབེབས་གནང་བའི་སློབ་ཚན་དང༌། བོད་གཞུང་སློབ་གྲྭ་སྤྱི་མཚུངས་བཞིན་བོད་གཞུང་ཤེས་རིག་ལས་ཁུངས་ནས་གཏན་འབེབས་གནང་བའི་བོད་ཡིག་སློབ་ཚན་བཅས་བསླབ་གཞི་གཙོ་བོར་བཟུང་ནས་སློབ་ཁྲིད་གནང་མུས་ཡིན། བར་ལམ་བལ་ཡུལ་གཞུང་ནས་འཛིན་རིམ་དགུ་པ་དང་བཅུ་པའི་གདམ་གའི་སློབ་ཚན་ནང་བོད་ཡིག་སློབ་ཚན་འཇོག་རྒྱུའི་ཆེད་སློབ་དེབ་རྩོམ་སྒྲིག་སྐོར་གྱི་གནས་ཚུལ་གསར་ཤོག་ཁག་ཏུ་གསལ་བསྒྲགས་སྤེལ་གསལ་ལྟར། བལ་ཡུལ་གངས་ཅན་བདེ་རྩ་ནས་བོད་ཡིག་སློབ་དེབ་ཚད་ལྡན་རྩོམ་སྒྲིག་དགོས་གལ་ཆེ་བར་གཟིགས་ཏེ། བལ་ཡུལ་བོད་ཡིག་རྩོམ་སྒྲིག་ཚོགས་ཆུང་ཞིག་ཟུར་འཛུགས་དང་འབྲེལ་སློབ་དེབ་རྩོམ་སྒྲིག་གིས་བོད་གཞུང་ཤེས་རིག་ལས་ཁུངས་སུ་སྤྱན་བསྟར་ལམ་སྟོན་བཀའ་སློབ་ཞུས་རྗེས་བལ་ཡུལ་གཞུང་ནས་སློབ་དེབ་པར་བསྐྲུན་གནང༌། དེ་ནས་ཕྱི་ལོ་༢༠༠༢།༢༠༠༣ སློབ་དུས་ནས་བཟུང་འཛིན་རིམ་བཅུ་པ་བར་ཡོད་པའི་གཞུང་སྒེར་སློབ་གྲྭ་ཁག་ཅིག་ནང་དངོས་སུ་སློབ་ཁྲིད་འགོ་འཛུགས་ཀྱིས་ལོ་ལྟར་བལ་ཡུལ་རྒྱལ་ཡོངས་འཛིན་རིམ་བཅུ་པའི་གདམ་གའི་བོད་ཡིག་ཡིག་རྒྱུགས་བཏང་དང་གཏོང་བཞིན་ཡོད། བོད་ཡིག་སློབ་ཚན་འཕར་མ་ཞིག་སློབ་ ཁྲིད་ལག་བསྟར་བྱ་ཐུབ་བྱུང་བ་འདིས་སློབ་ཕྲུག་ཚོས་བོད་ཡིག་ལ་དོ་སྣང་དང་བོད་ཡིག་གནས་ཚད་ཡར་རྒྱས་འགྲོ་བར་ཕན་ཐོགས་ཆེན་པོ་བྱུང་ཡོད། སློབ་ཕྲུག་རྣམས་ལ་འཛིན་གྲྭའི་ནང་སློབ་ཚན་སློབ་ཁྲིད་ཀྱི་ཟུར་སྦྱོང་རིག་གནས་དཔེར་ན། ལོ་ལྟར་ཁང་ཚན་དང་འཛིན་གྲྭ་ནང་ཁུལ་བོད་ཨིན་བལ་བཅས་ཀྱི་སྐད་རིགས་གསུམ་གྱི་ཐོག་རྩོམ་ཡིག་འགྲན་བསྡུར། བོད་ཡིག་ཡིག་གཟུགས་འགྲན་བསྡུར། རི་མོ་འགྲན་བསྡུར་སོགས་ཤེས་ཡོན་དང་འབྲེལ་བའི་བྱེད་སྒོ་གོ་སྒྲིག་གནང་གི་ཡོད་པ་མ་ཟད། འདས་པའི་ལོ་ཤས་ནང་བལ་ཡུལ་སློབ་གྲྭ་ནང་ཁུལ་བོད་ཨིན་བགྲོ་གླེང་འགྲན་བསྡུར་དང༌། རྩོམ་ཡིག་འགྲན་བསྡུར། དྲི་བརྩད་འགྲན་བསྡུར་སོགས་ཀྱང་གོ་སྒྲིག་ཐེངས་འགའ་བྱུང་བར་འཛུལ་ཞུགས་ཀྱིས་བྱ་དགའ་གང་མང་ཐོབ་ཡོད།

སློབ་གྲྭ་གནས་སྤར་དང་དེའི་ཤུགས་རྐྱེན།

སློབ་གྲྭ་འདི་ཐོག་མ་ཕྱི་ལོ་༡༩༨༨ ལོར་འཛིན་རིམ་དྲུག་པ་ནས་བརྒྱད་པ་བར་ལས་མེད་ཀྱང༌། ཕྱི་ལོ་༡༩༨༩ ལོར་འཛིན་རིམ་དགུ་པ་དང༌། ཡང་ཕྱི་ལོ་༡༩༩༠ ལོ་འཛིན་རིམ་བཅུ་པ་བཅས་ལོ་རེ་འཛིན་རིམ་རེ་སྤར་ཐུབ་བྱུང་ཡོད། དུས་ཡུན་དེའི་རིང་སློབ་སྤྱི་གཉིས་འཕོ་འགྱུར་ཕྱིན་ཡོད་ཅིང༌། ཕྱི་ལོ་༡༩༨༨།༡༩༨༩ བར་སྐུ་ཞབས་བསོད་ནམས་སྟོབས་རྒྱལ་ལགས་སློབ་སྤྱིའི་ལས་གནས་སུ་ཕེབས་ཤིང༌། ཕྱི་ལོ་༡༩༩༠།༡༩༩༢ བར་སྐུ་ཞབས་ཟླ་བ་དོན་གྲུབ་ལགས་ཀྱིས་སློབ་སྤྱིའི་ཐུགས་འགན་བཞེས་ཡོད། དེ་ནས་ཕྱི་ལོ་༡༩༩༣ ལོ་བོད་གཞུང་ཤེས་རིག་ལས་ཁུངས་ནས་སྐུ་ཞབས་དབང་འདུས་ཕུན་ཚོགས་ལགས་སློབ་གྲྭའི་ངེས་སྟོན་པར་བསྐོ་བཞག་གནང་བས། ལོ་ཤས་ནང་སློབ་གྲྭའི་དཔལ་འབྱོར་གནས་སྟངས་ཀྱིས་མཚོན་ཕྲུ་གུའི་ཤེས་ཡོན་གཙོ་བོ་གྱུར་པའི་ཕྱི་ནང་མཐུན་རྐྱེན་ཡར་རྒྱས་ཤུགས་ཆེར་སོང་ཞིང༌། སློབ་ཕྲུག་རྣམས་འཛིན་རིམ་བཅུ་པ་སློབ་ཐོན་རྗེས་རྒྱ་གར་དུ་ཕེབས་མི་དགོས་པར་མུ་མཐུད་དུ་སློབ་སྦྱོང་སྤྲོད་ཐུབ་བྱུང་ན་དགེ་མཚན་ཆེ་བར་གཟིགས་ཏེ། བོད་གཞུང་ཤེས་རིག་ལས་ཁུངས་ཀྱི་བཀའ་འཁྲོལ་འོག་ཕྱི་ལོ་༡༩༩༥ ཟླ་༤ ཚེས་༢༧ ཉིན་རྒྱལ་སྤྱིའི་ཨེ་སེ་ཨོ་ཨེ་སེ་(SOS)ཚོགས་པའི་ཚོགས་གཙོ་སྐུ་ཞབས་(Mr. Helmut Kutin)ལགས་ནས་འཛིན་རིམ་༡༢ བར་གནས་སྤར་བྱས་པའི་གཞུང་འབྲེལ་གསལ་བསྒྲགས་སྤེལ་ཞིང༌། འཛིན་རིམ་བཅུ་གཅིག་དང་བཅུ་གཉིས་ཀྱི་ཚོང་འབྲེལ་དང་སྒྱུ་རྩལ་སྡེ་ཚན་ཁོངས་གཏོགས་ཀྱི་སློབ་ཕྲུག་རྣམས་སློབ་གྲྭ་འདིར་མུ་མཐུད་དེ་སློབ་སྦྱོང་བྱ་རྒྱུའི་གོ་སྐབས་ཡོད་པ་དང༌། དེ་མིན་ཚན་རིག་སྡེ་ཚན་ནང་སློབ་སྤྱོང་བྱ་འདོད་ཡོད་རིགས་རྣམས་རྒྱ་གར་མ་སུ་རི་གཏན་སློབ་ཁོངས་སུ་ཚུད་ཐབས་ལམ་སྟོན་རོགས་རམ་ཞུ་མུས་ཡིན། སློབ་གྲྭ་འདི་འཛིན་རིམ་བཅུ་གཉིས་བར་གནས་སྤར་ཐུབ་པར་བརྟེན་སློབ་ཕྲུག་རྣམས་འཛིན་རིམ་བཅུ་པ་ཐོན་རྗེས་བར་ལྡིང་དུ་མ་ལུས་པར་མུ་མཐུད་སློབ་སྦྱོང་བྱ་རྒྱུའི་གོ་སྐབས་བཟང་པོ་ཐོབ་སྟེ་ཕྲུ་གུ་དང་ཕ་མ་གཉིས་ཀའི་དཀའ་ངལ་སེལ་ཐུབ་པ་བྱུང་ཡོད་པ་མ་ཟད། དམིགས་བསལ་རྒྱ་གར་དུ་ཡོད་པའི་སྐྱབས་བཅོལ་བོད་མིའི་སློབ་ཕྲུག་མང་བའི་སྐུ་ངལ་ཡོད་མུས་ཐོག་བལ་ཡུལ་སྐྱབས་བཅོལ་བོད་མིའི་སློབ་ཕྲུག་ཀྱང་སློབ་བཞེས་གནང་དགོས་པའི་སྐུ་ངལ་ཡང་སེལ་ཐུབ་པ་སོགས་ཀྱི་ཕན་ཐོགས་རྒྱ་ཆེར་བྱུང༌། ཡིག་རྒྱུགས་གྲུབ་འབྲས། ཕྱི་ལོ་༢༠༠༧ ལོའི་བལ་ཡུལ་རྒྱལ་ཡོངས་འཛིན་རིམ་བཅུ་གཅིག་གི་ཡིག་རྒྱུགས་ནང་འཛུལ་ཞུགས་གནང་མཁན་སློབ་ཕྲུག་ཁྱོན་བསྡོམས་གྲངས་༩༩ བྱུང་ཡོད་པ་ནས། སློབ་ཕྲུག་གྲངས་༣༢ ཨང་དང་པོ་དང༌། སློབ་ཕྲུག་གྲངས་༦༦ ཨང་གཉིས་པ། བསྐྱར་རྒྱུགས་གཏོང་དགོས་པ་སློབ་ཕྲུག་གྲངས་༡ བཅས་སློབ་གྲྭའི་ཡིག་རྒྱུགས་འཕྲོད་པའི་བརྒྱ་ཆ་༩༨་༩༩ ཡིན། ཕྱི་ལོ་༢༠༠༧ ལོའི་བལ་ཡུལ་རྒྱལ་ཡོངས་འཛིན་རིམ་བཅུ་གཅིག་གི་ཡིག་རྒྱུགས་ནང་འཛུལ་ཞུགས་གནང་མཁན་སློབ་ཕྲུག་ཁྱོན་བསྡོམས་གྲངས་༥༠ བྱུང་ཡོད་པ་ནས། སློབ་ཕྲུག་གྲངས་༣༠ ཨང་དང་པོ་དང༌། སློབ་ཕྲུག་གྲངས་༢༠ ཨང་གཉིས་པའི་གྲས་སུ་ཡིག་རྒྱུགས་འཕྲོད་དེ་སློབ་གྲྭའི་ཡིག་རྒྱུགས་འཕྲོད་པའི་བརྒྱ་ཆ་༡༠༠ ཡིན། སློབ་གྲྭ་འདིའི་ཕྱི་ལོ་༡༩༩༨ ནས་༢༠༠༨ བར་གཞི་རིམ་གོང་མ་འཛིན་རིམ་བཅུ་པ་དང་བཅུ་གཉིས་པའི་རྒྱལ་ཡོངས་ཡིག་རྒྱུགས་གྲུབ་འབྲས་གནས་སྟངས་གཤམ་གསལ།

བལ་ཡུལ་རྒྱལ་ཡོངས་ཀྱི་སློབ་གྲྭ་རྩེ་ཕུད་ལ་ངོས་འཛིན།

དེ་ཡང་ཕྱི་ལོ་༢༠༠༣ ལོར་བལ་ཡུལ་བདུན་རེའི་གསར་ཤོག་(SAPTAHIK)རྩོམ་སྒྲིག་ཁང་གིས་བལ་ཡུལ་ཆེས་མཐོའི་འབྲིང་རིམ་སློབ་གྲྭ་ཞིག་ལ་དགོས་ངེས་ཀྱི་ཕྱི་ནང་མཐུན་རྐྱེན་ཚད་ལྡན་ཡོད་པའི་ཐོག འཛིན་རིམ་བཅུ་གཅིག་དང་བཅུ་གཉིས་བཅས་སོ་སོའི་ནང་ཉུང་མཐར་སློབ་ཕྲུག་གྲངས་༨༢ རེ་དགོས་པ་སོགས་ཀྱི་ཆ་རྐྱེན་ཚང་བའི་འཛིན་རིམ་བཅུ་གཅིག་དང་བཅུ་གཉིས་ཀྱི་ལོ་གཉིས་རེའི་རྒྱལ་ཡོངས་ཡིག་རྒྱུགས་གྲུབ་འབྲས་ཕྱོགས་བསྡོམས་ཀྱིས་རྩེ་ཕུད་སློབ་གྲྭ་བཅུའི་མཚན་གཞུང་འདེམས་སྒྲུག་བྱས་པའི་ཁྲོད། བལ་ཡུལ་རྒྱལ་ཡོངས་ནང་གོང་གསལ་ཆ་རྐྱེན་ལྡན་པའི་འཛིན་རིམ་བཅུ་གཅིག་དང་བཅུ་གཉིས་ཀྱི་སློབ་གྲྭ་ཁྱོན་བསྡོམས་གྲངས་༨༥༦ ཡོད་པའི་ཁྲོད། འདས་པའི་ལོ་གཉིས་ནང་བལ་ཡུལ་རྒྱལ་ཡོངས་ཡིག་རྒྱུགས་གྲུབ་འབྲས་ཕྱོགས་བསྡོམས་ཀྱིས་རྩེ་ཕུད་སོན་པའི་སློབ་གྲྭ་བཅུའི་མཚན་གཞུང་གསར་ཤོག་ཏུ་གསལ་བསྒྲགས་སྤེལ་བའི་ནང༌། བལ་ཡུལ་རྣམ་རྒྱལ་མཐོ་སློབ་རྩེ་ཕུད་ཨང་བཞི་པ་སོན་ཡོད། ཕྱི་ལོ་༢༠༠༥ ལོར་སློབ་གྲྭའི་ཡིག་རྒྱུགས་གྲུབ་འབྲས་ལེགས་ཀྱང་གོང་གསལ་སློབ་ཕྲུག་གི་གྲངས་ཚད་མ་ལོངས་པའི་རྐྱེན་གྱིས་རྣམ་རྒྱལ་མཐོ་སློབ་སོགས་རྩེ་ཕུད་སློབ་གྲྭ་གཞན་དང་ཁག་ཅིག་ཀྱང་ཐེངས་འདིའི་རྩེ་ཕུད་སློབ་གྲྭ་བཅུའི་གྲས་སུ་ཚུད་ཐུབ་བྱུང་མེད་ཅེས་གསར་ཤོག་རྩོམ་སྒྲིག་པས་འགྲེལ་བརྗོད་གནང་ཡོད། ཕྱི་ལོ་༢༠༠༦ ལོར་བལ་ཡུལ་རྒྱལ་ཡོངས་ནང་གོང་གསལ་ཆ་རྐྱེན་ལྡན་པའི་འཛིན་རིམ་བཅུ་གཅིག་དང་བཅུ་གཉིས་ཀྱི་སློབ་གྲྭ་ཁྱོན་བསྡོམས་གྲངས་༡༠༡༨ ཡོད་པའི་ཁོངས་ནས་ལོ་གཉིས་ཀྱི་བལ་ཡུལ་རྒྱལ་ཡོངས་ཡིག་རྒྱུགས་གྲུབ་འབྲས་ཕྱོགས་བསྡོམས་ཀྱིས་རྩེ་ཕུད་སློབ་གྲྭ་བཅུའི་མཚན་གཞུང་གསར་ཤོག་ནང་གསལ་བསྒྲགས་སྤེལ་བའི་ནང༌། བལ་ཡུལ་རྣམ་རྒྱལ་མཐོ་སློབ་རྩེ་ཕུད་ཨང་དང་པོ་སོན་ཡོད། ཡང་ཉེ་ཆར་ཕྱི་ལོ་༢༠༠༨ ཟླ་༧ ཚེས་༣ འཁོད་པའི་བལ་ཡུལ་རྒྱལ་ཡོངས་བདུན་རེའི་གསར་ཤོག་(SAMAYA)ཞེས་པའི་ནང་གནས་ཚུལ་ཐོན་གསལ། རྣམ་རྒྱལ་མཐོ་སློབ་ལ་ཡིག་རྒྱུགས་འཕྲོད་པའི་རྩེ་ཕུད་ཆེས་མཐོའི་འབྲིང་རིམ་སློབ་གྲྭ་ཞེས་འགོ་བརྗོད་དུ་འཁོད་པའི་ནང༌། བྱབྱའདས་པའི་ལོ་གསུམ་གྱི་འཛིན་རིམ་བཅུ་གཅིག་དང་བཅུ་གཉིས་ཀྱི་འཛིན་གྲྭ་སོ་སོའི་ནང་ཉུང་མཐར་སློབ་ཕྲུག་གྲངས་༣༠ རེ་དང༌། ཡིག་རྒྱུགས་འཕྲོད་པའི་བརྒྱ་ཆ་༧༠ ལྷག་གྲུབ་འབྲས་སོན་པའི་རྒྱལ་ཡོངས་ཆེས་མཐོའི་འབྲིང་རིམ་སློབ་གྲྭ་མཚན་གཞུང་ཀ་ཁའི་རིམ་པ་ལྟར་བསྒྲིགས་ཡོད། འོན་ཀྱང་འཛིན་རིམ་བཅུ་གཅིག་དང་བཅུ་གཉིས་ནས་འཛིན་གྲྭ་གང་རུང་གཅིག་གི་ཡིག་རྒྱུགས་གྲུབ་འབྲས་ཧ་ཅང་ལེགས་ཀྱང་གཅིག་ཤོས་གཏན་འབེབས་བརྒྱ་ཆ་༧༠ ཚད་གཞི་ལས་དམའ་བ་ཡོད་པའི་ཆེས་མཐོའི་འབྲིང་རིམ་སློབ་གྲྭའི་མཚན་གཞུང་འདིར་བཀོད་མེད།བྱབྱ ཅེས་གསལ་བཤད་བྱས་པའི་གཤམ་དུ་བལ་ཡུལ་རྒྱལ་ཡོངས་འཛིན་རིམ་བཅུ་གཅིག་དང་བཅུ་གཉིས་ཀྱི་ལོ་གསུམ་གྱི་ཡིག་རྒྱུགས་གྲུབ་འབྲས་རྩེ་ཕུད་སོན་པའི་སློབ་གྲྭའི་མཚན་གཞུང་དང་བརྒྱ་ཆ་བཅས་བཀོད་པ་ཙམ་ལས་ཨང་དང་པོ་དང་གཉིས་པ་གང་ཡང་བྲིས་མེད་མོད། འོན་ཀྱང་འཛིན་རིམ་བཅུ་གཅིག་དང་བཅུ་གཉིས་ཀྱི་ལོ་གསུམ་གྱི་ཡིག་རྒྱུགས་གྲུབ་འབྲས་རྩེ་ཕུད་སོན་པའི་སློབ་གྲྭའི་མཚན་གཞུང་བརྒྱ་ཆའི་གོ་རིམ་སྒྲིག་སྐབས། བལ་ཡུལ་རྣམ་རྒྱལ་མཐོ་སློབ་རྩེ་ཕུད་ཨང་དང་པོ་སོན་ཡོད། གཞི་རིམ་མཐུན་རྐྱེན་ཡར་རྒྱས་ཀྱི་བྱུང་རིམ། སློབ་གྲྭ་འདི་ཐོག་མར་འགོ་འཛུགས་སྐབས་འཛིན་ཁང་དང་ཕྲུ་གུའི་ཉལ་ཁང་སྟེང་ཤོད་ཅན་གྱི་ཁང་ཆེན་༡ དང༌། ལས་ཤག་གཅིག་ཐོག་ཅན་ཁང་མིག་པ་༢ ནང་མི་ཡོད་པའི་ལས་ཤག་༣ བཅས་ལས་མེད། སློབ་གྲྭ་འདི་འཛིན་རིམ་བཅུ་གཉིས་ལ་གནས་སྤར་བྱས་རྗེས་སློབ་ཕྲུག་དང་དགེ་ལས་ཀྱི་གྲངས་འབོར་ཡང་རིམ་འཕར་བྱུང་བར་བརྟེན། རྒྱལ་སྤྱིའི་ཨེས་ཨོ་ཨེས་རོགས་ཚོགས་ཀྱི་ཚོགས་གཙོ་སྐུ་ཞབས་ཀུ་ཊིན་(Mr. Helmut Kutin)ལ་རེ་སྐུལ་ཞུས་དོན་ལྟར། སློབ་ཕྲུག་གྲངས་༡༠༠ ཙམ་ཤོང་པའི་བུ་རྒན་པའི་ཉལ་ཁང་ཐོག་བརྩེགས་གཉིས་ཅན་ནང་ཆས་དང་བཅས་པ་གསར་རྒྱག་གནང་སྟེ། ཕྱི་ལོ་༡༩༩༧ ཟླ་༣ ཚེས་༢༧ ཉིན་རྒྱལ་སྲས་ལཱག་ཤི་མི་དེ་ཝི་ཤཱ་དང༌། ཚོགས་གཙོ་སྐུ་ཞབས་ཀུ་ཊིན་(Late Princess Sharada Rajaya Laxmi Devi Sha, Mr. Helmut Kutin) བོད་གཞུང་ཤེས་རིག་བཀའ་བློན་ལྕམ་སྐུ་རིན་ཆེན་མཁའ་འགྲོ་ཆོས་རྒྱལ་བཅས་ཀྱིས་དབུ་འབྱེད་ལེགས་པར་བསྐྱངས། ཕྱི་ལོ་༢༠༠༡ ལོ་ཇི་ལྟར་རེ་བསྐུལ་ཞུས་དོན་ལྟར་རྒྱལ་སྤྱིའི་ཨེས་ཨོ་ཨེས་རོགས་ཚོགས་ནས་ལས་ཁུངས་དང༌། ཀམ་པུ་ཊར་སྦྱོང་བརྡར་ཁང༌། ཚོགས་ཁང་སོགས་ཡོད་པའི་ཁང་པ་ཐོག་བརྩེགས་༣ ཅན་འཛིན་ཆས་དང་བཅས་པ་གསར་སྐྲུན་གནང༌། སློབ་ཕྲུག་རྣམས་ཀྱི་ཉལ་ཆས་དགུན་ཁའི་གུང་གསེང་དང་སྟབས་བསྟུན་གྱིས་ལོ་ལྟར་ཉམས་གསོ་བྱས་ཏེ་ལོ་མང་སོང་ཞིང༌། ཕྱི་ལོ་༢༠༠༧ ལོར་ཉལ་ཁེབས་དང་འབོལ་གདན་སྔས་མགོ་བཅས་པ་ཆ་ཚང་སྔར་ལས་རྒྱུ་ཆ་ལེགས་པ་བརྗེ་ལེན་བྱས་པ་དང༌། བུ་དང་བུ་མོའི་ཞལ་ལག་མཆོད་ཁང་ནང་ཅོག་ཙེ་དང་ཞབས་སྟེགས་ཀྱང་ལོ་ངོ་བཅོ་བརྒྱད་ལྷག་ཙམ་གྱི་རིང་བེད་སྤྱད་བྱས་ཏེ་བསྐུལ་ཟད་དུ་སོང་ཡོད་སྟབས། ཅོག་ཙེ་དང་ཞབས་སྟེགས་ཆ་ཚང་རྒྱུ་ཆ་སྤུས་ལེགས་གསར་ཉོ་ཐུབ་པ་བྱུང་ཡོད། སློབ་གྲྭའི་གསོལ་ཐབ་ཁང་ལ་མཐུན་རྐྱེན་དང་གཙང་སྦྲ་དགོས་གལ་ཤིན་ཏུ་ཆེ་བར་བརྟེན། ཕྱི་ལོ་༢༠༠༧ ལོ་སློབ་གྲྭའི་ཐབ་ཚང་ཐབ་ཆས་དང་བཅས་པ་དེང་དུས་དང་མཐུན་པ་གསར་སྐྲུན་བྱས་ཡོད། སློབ་གྲྭའི་ནང་སློབ་ཕྲུག་གི་གྲངས་འབོར་འཕར་བཞིན་པར་བརྟེན་འཐུང་ཆུའི་དཀའ་ངལ་ཡོང་རྒྱུར་ངེས་པས། སློབ་གྲྭའི་གཞུང་ཆུ་སྔར་ཡོད་ཐོག་ས་འོག་གི་ཆུ་སློབ་ཕྲུག་ཚོར་ནམ་དགོས་བེད་སྤྱོད་གཏོང་ཆོག་པ་བཟོས། བལ་ཡུལ་ནང་གློག་ཤུགས་མ་འདང་བའི་དཀའ་ངལ་ཡོད་པའི་རྐྱེན་གྱིས་གློག་ཤི་བའི་གནས་ཚུལ་རྒྱུན་མཐུད་ཡོང་མུས་ལ་བརྟེན། སློབ་ཕྲུག་གི་ཉལ་ཁང་དང་འཛིན་ཁང་ཙམ་ཁྱབ་ཐུབ་པའི་སྐམ་གློག་འཕྲུལ་འཁོར་ཆུང་ཆུང་ཞིག་ད་བར་བེད་སྤྱོད་བྱས་ཡོད་ཀྱང༌། ཕྱི་ལོ་༢༠༠༨ ལོ་སློབ་གྲྭའི་འཛིན་ཁང་དང༌། སློབ་ཕྲུག་གི་ཉལ་ཁང༌། ལས་ཤག་སོགས་ཆ་ཚང་ལ་གློག་ཤུགས་ཁྱབ་ཐུབ་པའི་སྐམ་གློག་གི་མཐུན་རྐྱེན་ལེགས་སྒྲུབ་ཀྱིས་གོང་འཁོད་དཀའ་ངལ་གཙང་སེལ་ཐུབ་པ་བྱུང་ཡོད། སློབ་གྲྭའི་ནང་ལོ་རེར་ཁང་ཚན་ནང་ཁུལ་གྱི་གླུ་གར་འགྲན་བསྡུར། གཞུང་འབྲེལ་དང་སློབ་གྲྭའི་དུས་དྲན་མཛད་སྒོ་སོགས་ཀྱི་འཁྲབ་སྟོན་སྐབས་སུ་འཁྲབ་ཆས་དང༌། རྒྱན་ཆ། རོལ་ཆ་སོགས་གཡར་སྤྱོད་བྱེད་མ་དགོས་པ་ཆ་ཚང་སློབ་གྲྭ་རང་ངོས་ནས་འདང་ངེས་མཁོ་སྒྲུབ་བྱས་ཡོད། འཛིན་གྲྭའི་ནང་སློབ་ཕྲུག་རྣམས་ཀྱི་ཅོག་ཙེ་དང་ཞབས་སྟེགས་ཆ་ཚང་གསར་བཟོ་བརྗེ་ལེན་བྱ་རྒྱུ་འགོ་འཛུགས་བྱས་ཏེ་འཛིན་རིམ་བཅུ་གཅིག་དང་བཅུ་གཉིས་ཀྱི་ཅོག་ཙེ་དང་ཞབས་སྟེགས་སྤུས་ལེགས་གསར་བཟོ་གྲུབ་སྟེ་དངོས་སུ་བེད་སྤྱོད་བྱེད་བཞིན་པ་དང༌། ལྷག་འཕྲོས་ཀྱང་རིང་མིན་གང་མགྱོགས་འགྲུབ་ཉེར་ཡོད།

དཔེ་མཛོད་དང་ཀམ་པུ་ཊར་སྦྱོང་བརྡར་ཁང༌།

སློབ་གྲྭའི་དཔེ་མཛོད་ཁང་དུ་བོད་ཨིན་བལ་བཅས་སྐད་རིགས་གསུམ་ཐོག་དཔེ་དེབ་ཁྱོན་བསྡོམས་གྲངས་༧༠༠༠ ལྷག་དང༌། སྐད་རིགས་གསུམ་གྱི་ཉིན་རེའི་གསར་ཤོག དུས་དེབ་དང་གཟུགས་མཐོང་བརྙན་འཕྲིན་སོགས་ཀྱི་མཐུན་རྐྱེན་ཆ་ཚང་བསྐྲུན་ཡོད། དམིགས་བསལ་འཛིན་གྲྭ་མཐོ་རིམ་གྱི་སློབ་ཕྲུག་ཚོར་སློབ་ཚན་དང་འབྲེལ་བའི་ཟུར་བལྟའི་དཔེ་དེབ་མི་ཉུང་བ་ཡོད་པ་མ་ཟད། སློབ་ཕྲུག་དང་དགེ་རྒན་ལ་མཁོ་བའི་དཔེ་དེབ་ལོ་ལྟར་གསར་པ་མངགས་ཉོ་གནང་བཞིན་ཡོད། སློབ་ཕྲུག་རྣམས་འཛིན་གྲྭ་རེས་མོས་ཀྱིས་དཔེ་མཛོད་ཁང་དུ་འཁྲིད་དེ་དཔེ་དེབ་ཀློག་པའི་གོ་སྐབས་འདང་ངེས་སྤྲོད་པ་དང༌། དགེ་ལས་སློབ་ཕྲུག་རྣམས་ཀྱིས་དཔེ་མཛོད་ཁང་བེད་སྤྱོད་གཏོང་རྒྱུ་གལ་ཆེ་བའི་འབོད་སྐུལ་ཡང་ཡང་གནང་མུས་ཡིན། སློབ་གྲྭའི་ཀམ་པུ་ཊར་སྦྱོང་བརྡར་སྡེ་ཚན་ནང་ད་ལྟའི་ཆར་གློག་ཀླད་ཐོན་གསར་ཁྱོན་བསྡོམས་གྲངས་༢༡ ཡོད། འཛིན་རིམ་དྲུག་པ་ནས་བཅུ་གཉིས་བར་གྱི་སློབ་ཕྲུག་རྣམས་སློབ་གྲྭ་གཞན་དང་སྤྱི་མཚུངས་ལྟར་ཀམ་པུ་ཊར་སློབ་ཁྲིད་དང་ཆབས་ཅིག་ཡིག་ཚད་ཀྱང་གཏོང་བཞིན་ཡོད། ཆོས་ཕྱོགས་ཀྱི་བྱེད་སྒོ། བདུན་ཕྲག་རེའི་རེས་གཟའ་ལྷག་པ་ནམ་ཡིན་ལ་སློབ་གྲྭའི་ཆོས་དགེ་ནས་སློབ་ཕྲུག་རྣམས་ལ་སྐྱབས་འགྲོ་ལས་འབྲས། ཕྱག་མཆོད་འབུལ་ཚུལ། བསང་གསོལ། རླུང་རྟ། ཆང་རག་དང་ཐ་མག་གི་ཉེས་དམིགས། ཡ་རབས་སྤྱོད་བཟང་སོགས་དང་འབྲེལ་བའི་འཆད་འཁྲིད་འགྲེལ་བཤད་དང༌། རེས་གཟའ་སྤེན་པ་ནམ་ཡིན་ལ་དེའི་སྐོར་དྲི་བ་དྲིས་ལན་གནང་གི་ཡོད། སློབ་ཕྲུག་ནས་གཞུང་ཆེན་ཀློག་རྒྱུའི་གོམས་གཤིས་འཇགས་ཐབས་སོགས་སུ་དམིགས་ཏེ་ལོ་ལྟར་ས་ག་ཟླ་བའི་རིང་འབུམ། ཉི་ཁྲི་དང༌། བརྒྱད་སྟོང་ཚར་རེ་དག་སྒྲོག་ཞུ་བཞིན་པ་མ་ཟད། སྟོན་པའི་དུས་ཆེན་རྣམ་བཞི་ལ་ཆོས་དགེ་ནས་དུས་ཆེན་ངོ་སྤྲོད་དང་འབྲེལ་དགེ་ལས་སློབ་ཕྲུག་ཡོངས་ནས་བླ་མ་མཆོད་པའི་སྒོ་ནས་གསོལ་ཚོགས་འབུལ་བཞིན་ཡོད། ལོ་གཅིག་ནང་ཆོས་ལུགས་རིས་མེད་ཀྱི་མཁན་པོ་བླ་སྤྲུལ་དགེ་བཤེས་ཚད་ལྡན་གང་མང་གདན་ཞུས་ཀྱིས་དགེ་སློབ་ཡོངས་ལ་བླང་དོར་བཀའ་སློབ་ཞུ་རྒྱུ་དང༌། དེ་བཞིན་སློབ་ཕྲུག་རྣམས་བལ་ཡུལ་ནང་པའི་གནས་ཁྱད་པར་ཅན་དཔེར་ན། སྟག་མོ་ལུས་སྦྱིན། གླང་རི་ལུང་བསྟན། ཡང་ལེ་ཤོད་སོགས་དང༌། རིས་མེད་དགོན་སྡེ་ཚད་ལྡན་ཁག་ལ་གནས་མཇལ་དང་འབྲེལ་གནས་བཤད་བཅས་གོ་སྒྲིག་གནང་བཞིན་ཡོད། སློབ་ཕྲུག་རྣམས་ཀྱིས་ཉིན་ལྟར་སྔ་དགོང་ཞལ་འདོན་ཆག་མེད་འདོན་བཞིན་པའི་ཐོག བོད་གཞུང་ཆོས་རིག་ལས་ཁུངས་ནས་ྋགོང་ས་ྋསྐྱབས་མགོན་ཆེན་པོ་མཆོག་གི་སྐུ་ཕྱྭའི་ཞབས་རིམ་གསོག་སྒྲུབ་སོགས་ཀྱི་བཀའ་རྒྱ་ནམ་ཕེབས་ཆད་མེད་གསོག་སྒྲུབ་ཞུས་ཏེ་དུས་ཐོག་ཏུ་སྒྲུབ་ཐོ་འབུལ་མུས་ཡིན། ཟློས་གར་དང་འབྲེལ་བའི་རིག་གཞུང་འཁྲབ་སྟོན། བོད་གཞུང་ཤེས་རིག་ལས་ཁུངས་ནས་གཏན་འབེབས་གནང་བའི་ཟློས་དགེའི་ལམ་སྟོན་དཔེ་དེབ་འཛིན་རིམ་དྲུག་པ་ནས་བརྒྱད་པ་བར་སློབ་ཁྲིད་གནང་བཞིན་པའི་ཐོག སློབ་ཕྲུག་རྣམས་ཀྱིས་བོད་གཞས་ལ་དོ་སྣང་དང་དབྱིངས་ཞུགས་ཐབས་སུ་སྒྲ་སྡུད་འཁོར་ལོ་དང་གཟུགས་མཐོང་བརྙན་བེད་སྤྱོད་གཏོང་བ། གཞན་ཡང་རྒྱུན་ལྡན་མཉམ་གཞས་དང༌། འཁྲབ་གཞས། རོལ་ཆ་སོགས་ཀྱི་སྦྱོང་བརྡར་སྤྲོད་བཞིན་ཡོད། ལོ་རེའི་ནང་ཁང་ཚན་ནང་ཁུལ་བོད་ཀྱི་ཐུན་མོང་མ་ཡིན་པའི་རོལ་ཆ་འགྲན་བསྡུར་དང༌། གཏམ་བརྗོད་འགྲན་བསྡུར། རྐང་བྲོ་གླུ་གཞས་འགྲན་བསྡུར་གོ་སྒྲིག་གནང་བ་དང༌། དེ་བཞིན་ལོ་འཁོར་རེར་སློབ་ཚན་གཞན་དང་སྤྱི་མཚུངས་འབྲི་རྒྱུགས་དང༌། ངག་རྒྱུགས། འཁྲབ་གཞས། རོལ་ཆ། མཉམ་གཞས་སོགས་ཤེས་ཡོན་དང་རིག་རྩལ་བཅས་ཀྱི་ལམ་ནས་ཡིག་ཚད་ཀྱང་གཏོང་གི་ཡོད།

ཤེས་ཡོན་སྲིད་བྱུས་ལག་བསྟར་གྱི་གནས་ཚུལ་རགས་བསྡུས།

༡། རིགས་ལམ་སློབ་སྤེལ། བོད་གཞུང་ཤེས་རིག་ལས་ཁུངས་ནས་སློབ་གྲྭ་ཁག་གི་འབྲེལ་ཡོད་སློབ་དགེ་རྣམས་ལ་རིགས་ལམ་ཟབ་སྦྱོང་གནང་བ་དང་སྦྲགས་བཀའ་ཁྱབ་གནང་དོན་ལྟར། ཕྱི་ལོ་༢༠༠༤ ཟླ་༣ ཚེས་ ༡༠ ནས་བཟུང་འཛིན་རིམ་དྲུག་པ་དང༌། བདུན་པ། བརྒྱད་པ་བཅས་ཀྱི་འཛིན་གྲྭའི་ནང་རིགས་ལམ་སློབ་ཁྲིད་དང་འབྲེལ་ཕྱི་དྲོ་ཆུ་ཚོད་ཕྱེད་རིང་འཛིན་གྲྭ་རེས་མོས་ཀྱིས་ཐོག་མར་ཐལ་མོ་བརྡབ་སྟངས་དང༌། ལུས་ངག་གི་རྣམ་འགྱུར་སྟོན་སྟངས་ནས་འགོ་བཙུགས་ཏེ་རྟགས་གསལ་གཏོང་སྟངས་སློབ་སྟོན་གནང་སྟེ། སློབ་གྲྭའི་གུང་གསེང་དང་སྟབས་བསྟུན་གྱིས་ཉེ་འཁོར་དགོན་སྡེ་ཆེ་ཁག་ཏུ་བསྐྱོད་དེ་གྲྭ་བཙུན་རྣམས་ཀྱི་ལྷན་དུ་སློབ་ཕྲུག་རང་རང་གི་འདོད་བློ་ལྟར་བརྗོད་གཞི་འདྲ་མིན་ཐོག་རྩོད་པའི་བགྲོ་གླེང་བྱས་ཏེ་ཕན་ཐོགས་རྒྱ་ཆེ་བྱུང་ཡོད། ལོ་རེར་དགོན་སྡེ་ཁག་ནས་གཟུར་དཔང་གདན་ཞུས་ཀྱིས་སློབ་ཕྲུག་ནང་ཁུལ་རིགས་ལམ་བགྲོ་གླེང་འགྲན་བསྡུར་གོ་སྒྲིག་གནང་དང་གནང་མུས་ཡིན་པ་དང༌། ཕྱི་ལོ་༢༠༠༨ ལོ་ནས་བཟུང་འཛིན་རིམ་དགུ་པ་དང་བཅུ་པ་གཉིས་ལ་ཡང་རིགས་ལམ་གསར་འཛུགས་གནང་ཡོད། སློབ་ཕྲུག་རྣམས་ཀྱི་འབྲི་རྒྱུགས་དང༌། ངག་རྒྱུགས། རྩོད་རྒྱུགས་བཅས་གསུམ་གྱི་ལམ་ནས་ལོ་ཕྱེད་དང་ལོ་འཁོར་ཡིག་རྒྱུགས་གཏོང་གི་ཡོད་པ་དང༌། རིགས་ལམ་སློབ་ཁྲིད་འགོ་བཙུགས་པ་ནས་བཟུང་སློབ་ཕྲུག་ཚོས་ནང་ཆོས་ཐོག་གོ་རྟོགས་གཏིང་ཟབ་ཕྱིན་ཡོད་པ་མ་ཟད། སེམས་ལ་དྲན་རྒྱུ་རྒོད་པོ་དང༌། ངག་ལྕེ་བདེ་པོ། ཡིད་སྤོབས་ལྡན་པ། དེ་སྔ་མི་གཞན་གྱིས་སྐད་ཆར་ཉན་རྐྱང་མ་ཡིན་པར། བརྟག་ཞིབ་དང་བསམ་གཞིགས། དོགས་འདྲི་བྱ་རྒྱུ་སོགས་ཀྱི་གོམས་གཤིས་བཟང་པོ་འཇགས་པ་མངོན་སུམ་དུ་མཐོང་ཐུབ། ༢། ལུས་སྦྱོང༌། བོད་གཞུང་ཤེས་རིག་ལས་ཁུངས་ནས་ཕྱི་ལོ་༢༠༠༨ ཟླ་༣ ཚེས་༡༨ ནས་༢༥ བར་ས་རཱ་བོད་ཀྱི་མཐོ་སློབ་ཁང་དུ་ཤེས་ཡོན་སྲིད་བྱུས་གསར་པའི་དགོངས་དོན་དང་མཐུན་པའི་བོད་ཀྱི་སྲོལ་རྒྱུན་རྣལ་འབྱོར་གྱི་ལུས་སྦྱོང་ཡོ་གའི་སྐོར་ཟབ་སྦྱོང་གོ་སྒྲིག་གནང་བར་སློབ་གྲྭ་འདིའི་འབྲེལ་ཡོད་སློབ་དགེ་ངོ་བཅར་ཞུས་ཏེ་ཟབ་སྦྱོང་ནས་ཕྱིར་འབྱོར་འཕྲལ། ཕྱི་ལོ་༢༠༠༨ཟླ་༤ ཚོས་༡ ནས་བཟུང་བདུན་རེའི་རེས་གཟའ་སྤེན་པ་ཕུད་དེ་མིན་ཉིན་ལྟར་སྔ་དྲོ་དབུགས་སྦྱོང་(Pranayam)ནང་ནས་གཙོ་བོ་བདུད་རྩི་འབེབས་སྦྱོང༌།(Bhastrika pranayam) དབུགས་ལེན་གཟི་འབར།( kapal-Bhati) ཕྱིའི་རླུང་སྦྱོང་(Bahya Pranayam) གཏོང་ལེན་རླུང་སྦྱོང་(Anulom-vilom) བུང་བའི་སྙན་འཇོ།(Bhramri Pranayam) ཨོྃ་ཡིག་བྱིན་འབེབས་(Omkar)བཅས་སློབ་ཕྲུག་ཡོངས་ལ་ལུས་སྦྱོང་གི་སྦྱོང་བརྡར་སྤྲོད་བཞིན་ཡོད་པ་དང༌། དེ་བཞིན་སློབ་གྲྭ་གུང་གསེང་དང་འཛིན་གྲྭ་གྲོལ་མཚམས་བཅས་སུ་ཁང་ཚན་ནང་ཁུལ་རྩེད་རིགས་འགྲན་བསྡུར་དང༌། མཆོང་རྒྱུག་འཕེན་གསུམ་གྱི་སློབ་གྲྭའི་ལོ་འཁོར་རྩེད་འགྲན་བཅས་གོ་སྒྲིག་ལག་བསྟར་གནང་མུས་ཡིན། ༣། སློབ་གྲྭའི་སློབ་ཡོན་དང་རྒྱུན་གྲོན། རྣམ་རྒྱལ་མཐོ་རིམ་སློབ་འབྲིང་འདིར་སློབ་སྦྱོང་བྱེད་མཁན་སློབ་ཕྲུག་གི་ཕ་མ་ཉམ་ཐག་ཡིན་ཕྱིན་འདི་ནས་རིགས་རུས་དབྱེ་འབྱེད་མེད་པར་འབྲེལ་ཡོད་ཚོགས་སྐྱིད་སོགས་ནས་རྒྱབ་གཉེར་ཕྱག་བྲིས་ཚད་ལྡན་ཡོད་རིགས་ལ་སློབ་སྦྱོང་མཇུག་འཁྱོལ་མ་ཐུབ་ཀྱི་བར་སློབ་ཡོན་སྦྱིན་བདག་ཐབས་འཚོལ་གནང་དང་གནང་བ་དང༌། ཕྲུ་གུའི་སློབ་ཡོན་ཕ་མ་རང་ཉིད་ནས་གནང་མཁན་ཉུང་ཤས་ལས་མེད། སློབ་གྲྭ་འདི་ནི་བཙན་བྱོལ་བོད་མིའི་སྤྱི་ཚོགས་ཀྱི་སློབ་གྲྭ་ཞིག་ཡིན་པར་བརྟེན་སློབ་ཕྲུག་རྣམས་ལ་ཟས་གོས་གནས་མལ་དོད་སྣེ་སེལ་ཙམ་མ་གཏོགས་བསྡུ་ལེན་གནང་གི་མེད་ཅིང༌། སློབ་གྲྭའི་རྒྱུན་གྲོན་ཆ་ཚང་སློབ་གྲྭའི་ངེས་སྟོན་པས་ཐབས་འཚོལ་གནང་དགོས་པའི་འགན་འཁྲི་ཡོད་པ་བཞིན་ཐབས་ཤེས་འབད་བརྩོན་གནང་སྟེ། ད་བར་ྋསྤྱི་ནོར་ྋགོང་ས་མཆོག་གི་བླ་ན་མེད་པའི་ཐུགས་རྗེ་བཀའ་དྲིན་གྱིས་སློབ་གྲྭའི་ནང་དཔལ་འབྱོར་གྱི་དཀའ་ངལ་མེད་པར་སློབ་ཕྲུག་ཚོར་མཐུན་རྐྱེན་གང་ལེགས་སྤྲོད་ཐུབ་པ་བྱུང་ཡོད། ༤། གཙུག་ལག་སློབ་གྲྭའི་སློབ་ཡོན། རང་གཞུང་ཤེས་ལས་ཁུངས་སུ་འཛིན་གྲྭ་བཅུ་གཉིས་ཐོན་པའི་སློབ་ཕྲུག་ཚོར་སློབ་ཡོན་རོགས་རམ་སྐྱབས་འཇུག་ཡོང་བའི་འབོད་སྐུལ་ཞུས་དོན་བཞིན། ཕྱི་ལོ་༡༩༩༧ ནས་བཟུང་ལོ་ལྟར་སློབ་ཕྲུག་གྲངས་༡༠ ལ་མཐོ་རིམ་གཙུག་ལག་སློབ་གྲྭར་བསྐྱོད་རྒྱུའི་སློབ་ཡོན་དང༌། སློབ་ཕྲུག་གྲངས་༥ ལ་ལས་རིགས་སྦྱོང་བརྡར་ནང་སློབ་སྦྱོང་བྱ་རྒྱུའི་སློབ་ཡོན་གནང་རྒྱུ་ཞལ་བཞེས་བཟང་པོ་ཐོབ་དོན་བཞིན་ད་བར་སློབ་ཡོན་གནང་དང་གནང་མུས་ཡིན། སློབ་གྲྭ་འདིས་རེ་སྐུལ་ཞུས་དོན་ལྟར་ཨ་རི་དང་ཧི་མ་ལ་ཡ་བའི་ཐེབས་རྩ་ཚོགས་པ་(American Himalayan Foundation) ནས་ལོ་ལྟར་སློབ་ཕྲུག་གྲངས་༥ ལ་མཐོ་རིམ་གཙུག་ལག་སློབ་གྲྭར་བསྐྱོད་རྒྱུའི་སློབ་ཡོན་རོགས་རམ་གནང་རྒྱུའི་ཞལ་བཞེས་གནང་དོན་ལྟར་ཕྱི་ལོ་༢༠༠༠ ནས་བཟུང་ད་བར་མུ་མཐུད་དུ་སློབ་ཡོན་རོགས་རམ་གནང་བཞིན་ཡོད། མདོར་ན་འཛིན་གྲྭ་བཅུ་གཉིས་ཐོན་པའི་སློབ་ཕྲུག་མུ་མཐུད་དུ་སློབ་སྦྱོང་བྱ་འདོད་མེད་པ་རེ་ཟུང་ཕུད་དེ་མིན་སློབ་ཕྲུག་ཆ་ཚང་ལ་ད་བར་སློབ་ཡོན་ཕུལ་ཐུབ་པ་བྱུང་ཡོད། ༥། སློབ་གྲྭ་ཕན་ཚུན་དབར་གྱི་འབྲེལ་ལམ། བལ་ཡུལ་ས་མཚམས་ཁུལ་གྱི་མ་ནང་(Manang)སློབ་གྲྭས་གཙོས་པའི་སློབ་གྲྭ་ཁག་ཅིག་གི་རོགས་སྐྱོར་ཚོགས་པ་(Nepal Initiative Schongua-Gernany)ནས་ཕྱི་ལོ་༢༠༠༦ ལོར་སློབ་གྲྭའི་ངེས་སྟོན་པ་སྐུ་ཞབས་དབང་འདུས་ཕུན་ཚོགས་མཆོག་ལ་འཇར་མན་(Germany)དུ་མགྲོན་འབོད་གནང་དོན་ལྟར་ངོ་བཅར་གནང་སྟེ། སྐྱབས་བཅོལ་བོད་མིའི་སློབ་གྲྭའི་གནས་སྟངས་སྤྱི་དང༌། ཉམ་ཐག རྒན་འཁོགས་སོགས་ཀྱི་དཀའ་ངལ་གནས་ཚུལ་འགྲེལ་བརྗོད་ཞིབ་ཕྲ་ཞུ་རྒྱུའི་གོ་སྐབས་བཟང་པོ་བྱུང་ཡོད་པ་མ་ཟད། ཞོར་འཕྲོས་སུ་སློབ་གྲྭ་འདིའི་གནས་སྟངས་དང་འཛིན་རིམ་བཅུ་གཉིས་ཐོན་རྗེས་མཐོ་རིམ་གཙུག་ལག་སློབ་གྲྭའི་སློབ་ཡོན་དཀའ་ངལ་སྐོར་བཀའ་བསྡུར་ལྷུག་པོ་བྱུང་བར་དགོངས་བཞེས་གནང་སྟེ། སློབ་ཕྲུག་གྲངས་༡༠ ལ་ལག་ཤེས་སློབ་སྦྱོང་ཆེད་སློབ་ཡོན་ལོ་ལྟར་གནང་རྒྱུའི་ཞལ་བཞེས་གནང་སྟེ། ད་བར་མུ་མཐུད་གནང་མུས་ཡིན། ཡང་སློབ་གྲྭ་ཕན་ཚུན་དབར་མི་རིགས་སོ་སོའི་སྐད་ཡིག་དང༌། རིག་གཞུང༌། གོམས་གཤིས་སོགས་ཀྱི་ཤེས་ཡོན་དང་ཉམས་མྱོང་བརྗེ་རེས་ཆེད་སློབ་ཕྲུག་དང་དགེ་རྒན་ཕན་ཚུན་ཕར་འགྲོ་ཚུར་འོང་གནང་རྒྱུའི་འཆར་གཞི་གཏན་འཁེལ་གནང་དོན་བཞིན། དེ་འཕྲལ་འཇར་མན་(Germany)སློབ་གྲྭ་དེའི་སློབ་ཕྲུག་༢ སློབ་གྲྭ་འདིར་བཏང་འབྱོར་བྱུང་སྟེ། ཟླ་བ་གཉིས་རིང་གཙོ་བོ་སློབ་གྲྭའི་ནང་སློབ་ཕྲུག་སྤྱི་བྱིངས་ལྟར་སྔ་དྲོ་མལ་ས་ནས་བཞེངས་པ་ནས་ཕྱི་དྲོ་མ་གཟིམ་བར་གྱི་སློབ་གྲྭའི་སྒྲིག་འཛུགས་ནང་སྡོད་རྒྱུའི་གོམས་གཤིས་འཇགས་ཐབས་འབད་བརྩོན་གནང་བ་མ་ཟད། དམིགས་བསལ་བོད་ཀྱི་སྐད་ཡིག་དང༌། གོམས་གཤིས། བོད་དོན་དང་འབྲེལ་བའི་སྐོར། དེ་བཞིན་བོད་ཀྱི་རོལ་ཆ་སྦྱོང་བརྡར་སོགས་ཀྱི་ཉམས་མྱོང་བསགས་ཏེ་ཕྱིར་ལོག་ཞིང༌། འདི་ནས་ཀྱང་སྐབས་དེར་སློབ་ཕྲུག་གཅིག་གོང་གསལ་(German) སློབ་གྲྭ་དེར་བཏང་བས་ཕན་ཚུན་གཉིས་ཀར་ཕན་ཐོགས་གྲུབ་འབྲས་གང་ལེགས་བྱུང་བའི་ཚོར་སྣང་བྱུང་ཡོད་པར་བརྟེན། ཕྱི་ལོ་༢༠༠༨ ཟླ་༥ པའི་ཟླ་མཇུག་ཏུ་སླར་ཡང་སློབ་གྲྭའི་དགེ་རྒན་ཞིག་དང་སློབ་ཕྲུག་གཅིག་བཅས་འཇར་མན་(German)གྱི་གོང་གསལ་སློབ་གྲྭ་དེར་བསྐྱོད་ཐུབ་བྱུང་ཡོད་པ་མ་ཟད། མ་འོངས་པར་ཡང་མུ་མཐུད་དུ་ལས་འཆར་སྤེལ་རྒྱུ་ཡིན། ༦། ཤེས་ཡོན་ལྟ་སྐོར། འཛིན་རིམ་བཅུ་གཉིས་པའི་སློབ་ཕྲུག་རྣམས་འདས་པའི་ལོ་ཤས་ནང་རྒྱ་གར་གྱི་རྒྱལ་ས་ལྡི་ལི་དང་ཨག་ར་གྲོང་ཁྱེར་ནང་གནའ་བོའི་ལོ་རྒྱུས་ལྡན་པའི་སྙན་གྲགས་ཅན་གྱི་ས་ཁུལ་ཁག་ཅིག་དང༌། བཙན་བྱོལ་བོད་གཞུང་གི་བསྟི་གནས་བཞུགས་སྒར་རྡ་ས། རྡོར་གླིང་སོགས་སུ་ཤེས་ཡོན་ལྟ་སྐོར་དུ་བསྐྱོད་ཡོད་ཅིང༌། སློབ་ཕྲུག་རྣམས་ཤེས་ཡོན་ལྟ་སྐོར་དུ་བསྐྱོད་རྒྱུར་དགའ་ མོས་ཆེ་བ་མ་ཟད། ཕན་ཐོགས་ཀྱང་ཆེན་པོ་བྱུང་ཡོད་པས་མ་འོངས་པར་ཡང་མུ་མཐུད་འཁྲིད་རྒྱུའི་འཆར་གཞི་སྒྲིག་བཞིན་ཡོད། ༧། རྣམ་རྒྱལ་སློབ་ཕྲུག་ཚོགས་པ།(Namgyal students council) རྣམ་རྒྱལ་སློབ་ཕྲུག་ཚོགས་པའི་ནང་རྒྱུན་ལས་འཐུས་མི་གྲངས་༣༧ ཡོད་པ་དང༌། སློབ་གྲྭའི་ངེས་སྟོན་པ་ནི་ཚོགས་པ་དེའི་སློབ་སྟོན་པ་ཡིན། ཚོགས་པ་འདིའི་འཐུས་མི་རྣམས་འཛིན་རིམ་བཅུ་གཉིས་པའི་སློབ་ཕྲུག་ནང་ནས་འོས་འདེམས་བྱེད་སྲོལ་ཡོད། ཚོགས་པ་དེས་སློབ་ཕྲུག་དང༌། དགེ་རྒན། འཛིན་སྐྱོང་བཅས་ཀྱི་དབར་འབྲེལ་མཐུད་ཀྱི་ལས་དོན་བསྒྲུབ་རྒྱུ་དང༌། ཚོགས་པ་དེར་ནང་གསེས་ཤེས་རིག་སྡེ་ཚན་དང༌། ཆོས་སྲིད་སྡེ་ཚན། རྩེད་རིགས་སྡེ་ཚན་བཅས་སྡེ་ཚན་གསུམ་དུ་བགོས་ཡོད། སྡེ་ཚན་དེ་དག་ནས་ལོ་རེར་འཛིན་གྲྭ་ནང་ཁུལ་ཤེས་ཡོན་དང༌། རྩེད་སྣ། རི་མོ་སོགས་ཀྱི་འགྲན་བསྡུར་སྣ་ཚོགས་གོ་སྒྲིག་བྱེད་བཞིན་ཡོད་པ་མ་ཟད། བོད་དོན་ཐོག་དམིགས་བསལ་དོ་སྣང་དང་ཤེས་འདོད་ཡོད་པའི་སློབ་ཕྲུག་ལྔ་བཅུ་སྐོར་ལ་བོད་ཀྱི་ཆབ་སྲིད་དང་འབྲེལ་བའི་ཟབ་སྦྱོང་གང་མང་གོ་སྒྲིག་བྱས་ཡོད། དེ་བཞིན་སློབ་གྲྭའི་ནང་དུས་ཆེན་དང་མཛད་སྒོ་སོགས་ཀྱི་གྲ་སྒྲིག་གི་ལས་དོན་ལའང་འགན་འཁུར་ཆ་ཚང་བྱེད་ཀྱི་ཡོད། ༨། རྣམ་རྒྱལ་ཁོར་ཡུག་ཚོགས་པ།(Namgyal Green Club) རྣམ་རྒྱལ་ཁོར་ཡུག་ཚོགས་པའི་ནང་རྒྱུན་ལས་འཐུས་མི་གྲངས་༡༢ དང༌། ཚོགས་མི་གྲངས་༢༠༥ སློབ་སྟོན་པ་དགེ་ལས་༢ བཅས་ཡོད། ཚོགས་པ་འདིས་རྒྱུན་ལྡན་སློབ་གྲྭའི་འཛིན་ཁང་གཙང་མ་ཉར་རྒྱུ་དང་འཛིན་ཆས་བདག་ཉར། སློབ་གྲྭའི་ཕྱི་ནང་གཙང་སྦྲ། མེ་ཏོག་དང་ཤིང་སྣ་འདེབས་འཛུགས། ཚལ་ཞིང་འདེབས་ལས་སོགས་གནང་མུས་ཡིན་པ་མ་ཟད། བལ་ཡུལ་བཆོད་རྟེན་བྱ་རུང་ཁ་ཤོར་དང༌། འཕགས་ཤིང་མཆོད་རྟེན། སློབ་གྲྭའི་ཉེ་འགྲམ་གྱི་ཧིན་དུའི་ལྷ་ཁང༌། མཆོད་རྟེན་ཚེ་རིང་རྒན་གསོ་ཁང༌། སྣེ་ལེན་ཁང༌། ས་གནས་དབང་པོ་སྐྱོན་ཅན་གྱི་སྡོད་གནས་སོགས་སུ་ལོ་ལྟར་སྤྱི་ཚོགས་ནང་གཙང་སྦྲ་འཕྲོད་བསྟེན་ཐད་མ་བསྐུལ་དང་བླངས་ཀྱི་ཞབས་ཞུ་སྒྲུབ་བཞིན་ཡོད་པ་དང༌། གཞན་ཡང་སློབ་གྲྭའི་ནང་གུང་གསེང་དང་སྟབས་བསྟུན་གྱིས་འཛིན་གྲྭའམ་ཁང་ཚན་ནང་ཁུལ་རྐང་རྩེད་སྤོ་ལོའི་འགྲན་བསྡུར་སོགས་ཀྱི་གོ་སྒྲིག་གནང་སྟེ་བྱ་དགའ་གསོལ་རས་ཀྱང་འབུལ་མུས་ཡིན། ༩། ཉམ་ཐག་རོགས་སྐྱོར། རང་ཅག་སྐྱབས་བཅོལ་བོད་མི་རྣམས་གནས་ཡུལ་བལ་ཡུལ་གཞུང་མང་གི་བཀའ་དྲིན་ཆ་ཤས་གསབ་ཐབས་དང༌། མི་རིགས་ཕན་ཚུན་དབར་མཐུན་འབྲེལ་དམ་ཟབ་ཡོང་སླད་སློབ་གྲྭའི་ཉེ་འཁོར་གྲོང་གསེབ་ཀྱི་ཡུལ་མི་རྣམས་ལ་རོགས་ཕན་གང་ཐུབ་ཞུ་བཞིན་ཡོད། དེ་ཡང་ས་གནས་གཞོན་སྐྱེས་ཚོགས་པ་(club)ཞིག་ཡོད་པར་ཁོང་ཚོའི་ལས་ཁུངས་ཆེད་ཅོག་ཙེ་དང་ཞབས་སྟེགས་འགའ་ཤས་ཞལ་འདེབས་ཕུལ་བ་མ་ཟད། ལོ་ལྟར་རྩེད་ཆས་ཀྱི་མཐུན་རྐྱེན་སོགས་རོགས་རམ་ཞུ་མུས་ཡིན། སློབ་གྲྭའི་ཉེ་འཁོར་གྲོང་གསེབ་ཀྱི་ཡུལ་མི་ཉམ་ཐག་དང༌། རྒན་འཁོགས། དབང་པོ་སྐྱོན་ཅན་ཁག་ཅིག་བཅས་ལ་བཟའ་བཅའི་རིགས་སྦྱིན་པ་དང༌། དེ་བཞིན་ཁྱིམ་ཚང་ནང་བུ་ཕྲུག་མང་བའི་དཀའ་ངལ་ཡོད་རིགས་ལ་གྱོན་ཆས་ཆ་ཚང་རེ་བཅས་ད་བར་ལོ་གཉིས་བསྟུད་མར་རོགས་རམ་ཞུས་ཡོད། ལྷག་པར་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་དགུང་གྲངས་༧༠ ཕེབས་པའི་ལོ་འཁོར་གཅིག་རིང་དམིགས་བསལ་མཆོད་སྦྱིན་རྒྱ་མི་ཆུང་བ་བཏང་བ་ལས། སློབ་གྲྭའི་ཉེ་འགྲམ་དུ་ཡུལ་མི་ལྟ་རྟོག་རོགས་རམ་བྱེད་མཁན་གཅིག་ཀྱང་མེད་པའི་ཨ་མ་རྒན་མོ་ཞིག་ཡོད་པར་སྡོད་ཁང་གསར་རྒྱག་དང༌། གདན་དང་མལ་ཆས། ཉིན་རེའི་ཁ་ཟས་བཅས་མ་འཆི་བར་རོགས་རམ་བྱ་རྒྱུའི་ཁས་ལེན་བརྟན་པོ་ཞུས་ཡོད་པ་ལྟར་མུ་མཐུད་རོགས་སྐྱོར་དང་གཟིགས་སྐྱོང་གནང་བཞིན་ཡོད། དེ་མཚུངས་ྋགོང་ས་ྋསྐྱབས་མགོན་ཆེན་པོ་མཆོག་དགུང་གྲངས་༧༣ དང་༧༤ བཞེས་པའི་སྐུའི་འཁྲུངས་སྐར་དུས་དྲན་གྱི་ཉིན་མོར། མགོན་པོ་གང་ཉིད་སྐུ་ཚེ་བརྟན་ཅིང་མཛད་འཕྲིན་རྒྱས་པ་སོགས་སྒོ་དུ་མར་དམིགས་ཏེ་སློབ་གྲྭའི་ཉེ་འགྲམ་གོ་ཀར་ཎའི་གྲོང་གསེབ་ཏུ་ཡུལ་མིའི་དབང་པོ་སྐྱོན་ཅན་གྱི་སློབ་ཕྲུག་༡༠༠ སྐོར་ཞིག་ཡོད་པར་འབྲས་དང་ལྡ་ལི། སྣུམ་སོགས་ཟླ་གཅིག་རིང་འདང་བའི་བཟའ་བཅའི་རིགས་སྦྱིན་པ་དང༌། ཉིན་གུང་ཤ་མེད་ཞལ་ལག་རྒྱས་པ་བཅས་ད་བར་ལོ་གཉིས་བསྟུད་མར་ཕུལ་བར་ཤིན་ཏུ་དགའ་ཚོར་ཆེན་པོ་བྱུང་ཡོད། ཡང་ན་ཡ་པ་ཏི་(Nayapati)གྲོང་གསེབ་ཏུ་ས་གནས་བུད་མེད་ལས་མེད་རིགས་ལ་ལག་ཤེས་སློབ་སྦྱོང་སྤྲོད་ཡུལ་གྱི་འཚེམ་ཁང་ཞིག་ཡོད་པ་དེའི་དགེ་རྒན་ལ་གླ་ཕོགས་འབུལ་མ་ཐུབ་པའི་རྐྱེན་གྱིས་ལོ་ཤས་སྔོན་ཙམ་དུ་འཚེམ་ཁང་སྒོ་རྒྱག་དགོས་བྱུང་འདུག་པར། སློབ་གྲྭ་འདིས་གནས་ཚུལ་ཤེས་རྟོགས་བྱུང་འཕྲལ། ལོ་གཅིག་གི་དགེ་རྒན་གྱི་གླ་ཕོགས་སློབ་གྲྭ་ནས་རོགས་རམ་ཞུ་རྒྱུའི་ཁས་ལེན་བྱས་འཕྲལ་འཚེམ་ཁང་སླར་ཡང་སྒོ་ཕྱེ་ཐུབ་བྱུང་སྟེ་གྲོང་གསེབ་དེའི་བུད་མེད་༣༠ ཙམ་ལ་འཚེམ་བཟོ་སློབ་སྦྱོང་མུ་མཐུད་སྤྲོད་ཐུབ་པ་བྱུང་ཡོད།

སློབ་མའི་ཤེས་ཡོན་སྤྱི་དང༌། དམིགས་བསལ་བོད་ཀྱི་སྐད་ཡིག་རིག་གཞུང་བཅས་ཡར་རྒྱས་ལས་རིམ་སྐོར།

༡༽ འཛིན་རིམ་དྲུག་པ་ནས་བཅུ་གཉིས་བར་གྱི་འཛིན་གྲྭ་སོ་སོའི་ནང་ལོ་ཕྱེད་དང་ལོ་འཁོར་ཡིག་རྒྱུགས་སློབ་ཕྲུག་རྩེ་ཕུད་གསུམ་ལ་མཇལ་དར་ཨ་ཤེ་དང་བྱ་དགའ་གསོལ་རས་ལོ་ལྟར་འབུལ་བཞིན་ཡོད། ༢༽ གཞི་རིམ་བར་མའི་འཛིན་རིམ་དྲུག་པ་ནས་བཅུ་གཉིས་བར་སྡེ་ཚན་གསུམ་དུ་བགོས་ཏེ། ལོ་ཕྱེད་དང་ལོ་འཁོར་ཡིག་རྒྱུགས་སོ་སོའི་སྐབས་སུ་སྡེ་ཚན་རེའི་ནང་བརྒྱ་ཆ་མཐོ་ཤོས་ལོན་མཁན་གསུམ་རེར་དམིགས་བསལ་མཇལ་དར་ཨ་ཤེ་དང་དངུལ་རྐྱང་སྒོར་༥༠༠ རེ་འབུལ་བཞིན་ཡོད། ༣༽ བོད་གཞུང་ཤེས་རིག་ལས་ཁུང་ནས་ལོ་ལྟར་བུ་དང་བུ་མོ་རྩེ་ཕུད་རེ་ལ་བྱ་དགའ་གསོལ་རས་གནང་བ་ཕུད། དེ་འཕྲོས་འཛིན་རིམ་བཅུ་གཉིས་ཀྱི་སློབ་ཕྲུག་རྣམས་ལས་སློབ་ཕྲུག་ཕུལ་བྱུང་རེར་སློབ་གྲྭ་ནས་དམིགས་བསལ་མཇལ་དར་ཨ་ཤེ་དང་གཟེངས་རྟགས། དངུལ་རྐྱང་སྒོར་༥༠༠ ཕྱག་འཁྱེར་བཅས་འབུལ་མུས་ཡིན། ༤༽ འཛིན་རིམ་བཅུ་པ་དང་བཅུ་གཉིས་ཀྱི་རྒྱལ་ཡོངས་བོད་ཡིག་ཡིག་རྒྱུགས་སོ་སོའི་ནང་བརྒྱ་ཆ་མཐོ་ཤོས་ལོན་མཁན་སློབ་ཕྲུག་རེ་ལ་དམིགས་བསལ་མཇལ་དར་ཨ་ཤེ་དང་དངུལ་རྐྱང་སྒོར་༥༠༠ རེ་འབུལ་མུས་ཡིན། ༥༽ སློབ་གྲྭའི་སྔ་དྲོའི་འདུ་འཛོམས་ཀྱི་སྐབས་སུ་རེས་གཟའ་ཉི་མ་ནམ་ཡིན་ལ་སློབ་དགེ་རེས་མོས་ཀྱིས་བརྗོད་གཞི་རང་མོས་ཐོག་སྤྱིར་བཏང་ཤེས་བྱ་སོགས་དང་འབྲེལ་བའི་སྐོར་གྱི་གསུང་བཤད་དང༌། དེ་མིན་རེས་གཟའ་ཟླ་བ་ནས་རེས་གཟའ་པ་སངས་བར་ཉིན་ལྟར་སློབ་ཕྲུག་གསུམ་ལས་གཅིག་གིས་ཨིན་སྐད་དང་བལ་སྐད་གང་རུང་ཞིག་གི་ཐོག་གསུང་བཤད་གནང་རྒྱུ་དང༌། དེ་འཕྲོས་སློབ་ཕྲུག་གཉིས་ཀྱིས་བོད་སྐད་ཐོག་གསུང་བཤད་གནང་རྒྱུའི་གོ་སྐབས་ཕུལ་ཡོད། བོད་སྐད་ཐོག་དམིགས་བསལ་ྋགོང་ས་མཆོག་གི་བཀའ་སློབ་དང༌། བོད་དོན་སྐོར། ཆོས་དང་རིག་གཞུང༌། གོམས་གཤིས་སོགས་དང་འབྲེལ་བའི་སྐོར་གསུང་བཤད་གནང་གི་ཡོད། ༦༽ འཛིན་རིམ་དགུ་པ་ནས་བཅུ་གཉིས་བར་གྱི་སློབ་ཕྲུག་ཚོས་བོད་ཡིག་སློབ་དེབ་སློབ་ཕྲུག་རང་ངོས་ནས་ཉོ་མ་དགོས་པར་སློབ་གྲྭ་བལ་ཡུལ་མཆོད་རྟེན་དུ་ཡོད་པའི་རང་གཞུང་ཤེས་རིག་དེབ་ཁང་ནས་བླུ་ཡོན་ཞུས་ཏེ་སློབ་ཕྲུག་ཚོར་ལོ་ལྟར་སྔ་གཡར་གནང་མུས་ཡིན། ༧༽ འཛིན་རིམ་དྲུག་པ་ནས་བརྒྱད་པ་བར་གྱི་སློབ་ཕྲུག་རྣམས་ལ་ཨིན་བོད་ཤན་སྦྱར་ཚིག་མཛོད་དང༌། འཛིན་རིམ་དགུ་པ་ནས་བཅུ་གཉིས་བར་གྱི་སློབ་ཕྲུག་རྣམས་ལ་དག་ཡིག་གསར་བསྒྲིགས་སློབ་གྲྭ་རང་གཞུང་ནས་རིན་མེད་ལོ་ལྟར་སྔ་གཡར་གནང་མུས་ཡིན། ༨༽ སློབ་གྲྭ་རང་ངོས་ནས་བརྡ་སྤྲོད་པའི་རྩ་བ་ཕྱོགས་བསྡེབས་དེབ་ཆུང་ཞིག་དཔར་བསྐྲུན་གྱིས་འཛིན་རིམ་དྲུག་པ་ནས་བཅུ་གཉིས་བར་གྱི་སློབ་ཕྲུག་རྣམས་ལ་འགྲེམས་སྤེལ་གནང་སྟེ། ཉིན་ལྟར་ཕྱི་དྲོའི་ཞལ་འདོན་མཇུག་ཏུ་འདོན་བཞིན་ཡོད། ༩༽ མ་འོངས་པར་སློབ་ཕྲུག་རྣམས་སློབ་གྲྭ་ཐོན་ཏེ་སྤྱི་ཚོགས་ནང་ཕེབས་སྐབས་སུ་རྒྱུན་ལྡན་རང་གཞན་བསོད་ནམས་གསོག་ཆེད་ཞལ་འདོན་གསུང་རྒྱུ་དང་བསང་གསོལ་གཏོང་རྒྱུར་དཀའ་ངལ་མེད་པ་ཕན་ཐོགས་ཡོང་རྒྱུ་སོགས་སུ་དམིགས་ཏེ། འདི་ལོ་བསང་གསོལ་གསེར་སྐྱེམས་འཕྲིན་བཅོལ་བཅས་ཀྱི་ཕྱོགས་བསྡེབས་དེབ་ཆུང་ཞིག་གཞུང་དགོན་བསམ་གཏན་གླིང་གི་མཁན་རིན་པོ་ཆེ་མཆོག་ལ་དགོངས་སྐོར་ཞུས་ཏེ་པར་འགྲེམས་ཀྱིས། སློབ་གྲྭའི་སློབ་ཕྲུག་དང་ལས་བྱེད་རྣམས་ཀྱིས་ཟླ་རེའི་ཚེས་བཅོ་ལྔ་ནམ་ཡིན་ལ་བསང་གསོལ་གཏོང་རྒྱུའི་ལམ་སྲོལ་གསར་གཏོད་གནང་བ་དང༌། དེ་བཞིན་ཀ་ཐ་མན་གྲུ་ཁུལ་གྱི་སློབ་གྲྭ་དང༌། གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག དགོན་སྡེ་ཁག་ཅིག་བཅས་ལའང་རིན་མེད་ཐོག་འགྲེམས་སྤེལ་གནང་ཡོད། ༡༠༽ སློབ་གྲྭའི་དཔེ་མཛོད་ཁང་དུ་བོད་ཡིག་གསར་ཤོག་ཁག་ཅིག་མངགས་ཉོ་གནང་བཞིན་ཡོད་པའི་ཐོག སློབ་ཕྲུག་འཛིན་རིམ་དྲུག་པ་ནས་བཅུ་གཉིས་བར་གྱི་འཛིན་གྲྭ་སྡེ་ཚན་རེ་རེར་བོད་ཡིག་གསར་ཤོག་བང་ཆེན་དང༌། དུས་བབ། གཉན་ཆེན་ཐང་ལྷ། ལྷོ་ཕྱོགས་ཕོ་ཉ། བོད་མིའི་རང་དབང༌། ཤེས་བྱ་གསར་དེབ་སོགས་དམིགས་བསལ་མངགས་ཉོ་གནང་སྟེ་གོང་གསལ་གསར་ཤོག་སློབ་གྲྭར་འབྱོར་རིམ་བཞིན་སྐབས་འཕྲལ་འབྲེལ་ཡོད་བོད་དགེ་ནས་འཛིན་གྲྭ་སོ་སོར་འགྲེམས་སྤེལ་དང་སྦྲགས་སློབ་ཕྲུག་ཚོར་ངེས་པར་ཀློག་འཇུག་གི་ཡོད། མདོར་ན་སློབ་གྲྭ་འདི་བཙུགས་པ་ནས་ད་བར་ལོ་ངོ་༢༠ སོང་རིང་བལ་ཡུལ་རྒྱལ་ཡོངས་འཛིན་རིམ་བཅུ་པ་སྡེ་ཚན་༡༨ ཡིག་རྒྱུགས་བཏང་ཟིན་པའི་ཁྲོད་སློབ་ཕྲུག་གྲངས་༨༠༩ སློབ་མཐར་ཕྱིན་ཡོད་པ་དང༌། བལ་ཡུལ་རྒྱལ་ཡོངས་འཛིན་གྲྭ་བཅུ་གཉིས་སྡེ་ཚན་༡༢ ཡིག་རྒྱུགས་བཏང་བའི་ཁྲོད་སློབ་ཕྲུག་གྲངས་༦༢༣ སློབ་མཐར་ཕྱིན་ཡོད་པ་ལས་སློབ་ཕྲུག་ཁག་ཅིག་ད་ལྟ་རྒྱ་བལ་དང་ཕྱི་རྒྱལ་ཡུལ་གྲུ་ཁག་ཏུ་སློབ་སྦྱོང་མུ་མཐུད་གནང་བཞིན་ཡོད་པ་དང༌། ཡང་འགའ་ཤས་སློབ་སྦྱོང་ཆ་ཚང་མཐའ་འཁྱོལ་ཏེ་བཙན་བྱོལ་བོད་མིའི་སྤྱི་ཚོགས་ནང་རང་རང་གི་ལས་རིགས་སྣ་ཚོགས་སུ་ཞུགས་ཏེ་བོད་གཞུང་དམངས་ཀྱི་ཞབས་འདེགས་ཞུ་བཞིན་ཡོད་དོ། །

རྣམ་རྒྱལ་འབྲིང་རིམ་སློབ་གྲྭ།

དཀར་ཆག

༡། འགོ་འཛུགས།
༢། མཐུན་རྐྱེན་འཛུགས་སྐྲུན།
༣། དགེ་ལས་དང་སློབ་ཕྲུག་གྲངས་འབོར།
༤། ཤེས་ཡོན་ལས་རིམ།

༡། འགོ་འཛུགས།

བལ་ཡུལ་རྣམ་རྒྱལ་འབྲིང་རིམ་སློབ་གྲྭ་ནི། རྒྱལ་ས་ཀ་ཐ་མན་གྲུ་ཉེ་ཁུལ་ཨི་ཆན་གུ་(Ichangu)ཞེས་པའི་ས་གནས་སུ་ཆགས་ཡོད། སློབ་གྲྭ་འདི་ཐོག་མར་ཕྱི་ལོ་༡༩༨༡ ཟླ་༡༠ ཚེས་༡༥ ཉིན་སློབ་གྲྭ་འགོ་འཛུགས་ཤིང༌། སྐབས་དེར་སློབ་ཕྲུག་གྲངས་༢༠ བོད་དགེ་༡ ཨིན་དགེ་༡ འགན་འཛིན་༡ མ་བྱན་༢ བཅས་ཁྱོན་བསྡོམས་དགེ་ལས་གྲངས་༥ ཡོད།
ཕྱི་ལོ་༢༠༠༨ ལོར་ཁྱོན་བསྡོམས་སློབ་ཕྲུག་གྲངས་༥༢༨ དང༌། དགེ་རྒན་གྲངས་༢༥ གཞན་ལས་བྱེད་གྲངས་༢༥ བཅས་ཁྱོན་བསྡོམས་དགེ་ལས་གྲངས་༥༠ ཡོད།

༢། མཐུན་རྐྱེན་འཛུགས་སྐྲུན།

བལ་ཡུལ་བོད་གཞུང་འཕགས་ཤིང་རྣམ་རྒྱལ་འབྲིང་རིམ་གཏན་འཇགས་སློབ་གྲྭ་འདི་ཕྱི་ལོ་༡༩༨༡ ལོར་བོད་གཞུང་ཤེས་རིག་ལྷན་ཁང་གིས་བལ་ཡུལ་གཞིས་ཆགས་ཁག་གི་གཞི་རིམ་སློབ་ཐོན་ཕྲུ་གུའི་ཆེད། ཁང་མིག་ཁ་ཤས་ཡོད་པའི་ས་ཆ་རུ་པ་ནི་(Rupani)༢ ཡོད་པ་སྤུས་གཟིགས་ཀྱིས་ཞག་སྡོད་སློབ་ཁང་གསར་སྐྲུན་གནང༌། སྐབས་དེར་གཞི་རིམ་འོག་མ་ཐོན་པའི་སློབ་ཕྲུག་༢༠ སློབ་བཞེས་གནང་ཡོད། སློབ་ཕྲུག་དེ་རྣམས་སྤྱི་ཡོངས་སློབ་ཚན་ལེན་པར་སྤ་རོ་སྤ་ཀར་ཞེས་པའི་ས་གནས་ཡུལ་མིའི་ཉིན་མོའི་སློབ་གྲྭར་འགྲོ་བཞིན་ཡོད་ཅིང༌། སྔ་དགོང་གཉིས་སུ་སློབ་གྲྭ་རང་ནང་བོད་ཡིག་དང་ཨིན་ཇིའི་སྐད་ཡིག་སློབ་འཁྲིད་བྱས་ཡོད།
ཕྱི་ལོ་༡༩༨༢ ལོར་བལ་གཞུང་གི་ཤེས་རིག་སྲིད་བྱུས་ལ་འཕོ་འགྱུར་བྱུང་བའི་གོ་སྐབས་དང་བསྟུན། བོད་གཞུང་ཤེས་རིག་ལས་ཁུངས་ནས་ས་གནས་འདིར་གཞི་རིམ་སློབ་གྲྭ་ཚད་ལྡན་ཞིག་དགོས་གལ་ཆེ་བར་གཟིགས་ཏེ། ཞག་སྡོད་སློབ་ཕྲུག་༢༠ ཐོག་འཕགས་ཤིང་བོད་གཞུང་ཉིན་མོའི་སློབ་གྲྭའི་དགེ་ལས་སློབ་ཕྲུག་འཛིན་ཆས་དང་བཅས་པ་ཟླ་བསྒྲིལ་གྱིས་སློབ་ཕྲུག་གྲངས་༢༥༤ དང་དགེ་ལས་གྲངས་༡༣ བྱུང་ཡོད། ལོ་དེར་བལ་གཞུང་ཤེས་རིག་ལས་ཁུངས་སུ་ཁྲིམས་མཐུན་དེབ་སྐྱེལ་བཀའ་འཁྲོལ་ཐོབ་ནས་ཕྱི་ལོ་༡༩༨༣ ཟླ་༢ ཚེས་༢༣ ཉིན་རྣམ་རྒྱལ་འབྲིང་རིམ་སློབ་གྲྭ་དངོས་སུ་དབུ་བརྙེས།
དེ་ནས་ཕྱི་ལོ་༡༩༨༩ བར་སློབ་ཁང་རྒྱ་བསྐྱེད་དང་ཆབས་ཅིག་སློབ་ཕྲུག་ཉལ་ཁང་ཆེད་གཡས་གཡོན་དུ་ཁང་པ་ཁག་གསུམ་གླ་གཡར་ཞུས་ཡོད་ཀྱང༌། ལོ་རེ་བཞིན་སློབ་ཕྲུག་གི་གྲངས་འབོར་རིམ་འཕར་བྱུང་བས་སློབ་ཁང་གི་དཀའ་ངལ་འཕྲལ་སེལ་ཐབས་ལམ་ཁོ་ནས་སེལ་མ་ཐུབ་པར་གཞིགས་ཏེ། ཕྱི་ལོ་༡༩༩༠ ལོར་སློབ་ཁང་གསར་པའི་འཆར་གཞི་སྙན་གསེང་རོགས་རམ་འབོད་བསྐུལ་ཞུས་པ་བཞིན་ཕྱི་ལོ་༡༩༩༢ ལོར་བྷེལ་ལྗམ་གྱི་སྐུ་ཞབས་བྷེ་རོན་(C. Baron De Van Steenwijk)གྱི་རོགས་རམ་ལ་བརྟེན་ནས་ས་ཆ་རུ་པ་ནི་༡༦ དང༌། བོད་གཞུང་ཤེས་རིག་ལྷན་ཁང་གི་རོགས་སྐྱོར་འོག་ས་ཆ་རུ་པ་ནི་༡་༦ སྤུས་གཟིགས་གནང་བའི་ཐོག ཕྱི་ལོ་༡༩༩༦ ལོར་རྒྱལ་སྤྱིའི་ཨེ་སེ་ཨོ་ཨེ་སེ་(SOS)རོགས་ཚོགས་ཀྱི་ཚོགས་གཙོ་སྐུ་ཞབས་ཧེལ་མུཊ་ཀུ་ཊིན་(Mr. Helmut Kutin)གྱིས་སློབ་ཕྲུག་༧༠༠ ཤོང་བའི་སློབ་ཁང་གསར་རྒྱག་གི་སྦྱིན་བདག་གནང་བ་ཕྱི་ལོ་༡༩༩༦ ཟླ་༥ ཚེས་༢༩ ཉིན་ཨར་ལས་འགོ་བཙུགས་ཀྱིས་ཕྱི་ལོ་༡༩༩༨ ཟླ་༡༠ ཚེས་༤ ཉིན་དབུ་འབྱེད་གནང༌།

༣། དགེ་ལས་དང་སློབ་ཕྲུག་གྲངས་འབོར།

ཕྱི་ལོ་༡༩༨༩ ནས་༢༠༠༧ བར་བལ་ཡུལ་བོད་གཞུང་འཕགས་ཤིང་རྣམ་རྒྱལ་འབྲིང་རིམ་གཏན་འཇགས་སློབ་གྲྭ་འདིའི་དགེ་རྒན་ལས་བྱེད་དང་སློབ་ཕྲུག་གྲངས་འབོར་འཕར་ཆག་གི་གནས་སྟངས་གཤམ་གསལ།
ད་བར་སློབ་གྲྭ་འདི་ནས་བོད་རིགས་སློབ་མ་བརྒྱ་ཆ་༨༠ དང༌། ཧི་མ་ལ་ཡའི་རི་རྒྱུད་སློབ་མ་བརྒྱ་ཆ་༢༠ བཅས་ཁྱོན་བསྡོམས་གྲངས་༡༩༤༨ ཙམ་ལ་འབྲིང་རིམ་ཤེས་ཡོན་སློབ་སྦྱོང་གི་གོ་སྐབས་བཟང་པོ་སྦྱོར་སྤྲོད་ཐུབ་པ་བྱུང་ཡོད།
ཕྱི་ལོ་༢༠༠༧ ཟླ་༡༢ ཚེས་༣༡ ཉིན་བོད་གཞུང་ཤེས་རིག་ལས་ཁུངས་ཀྱི་སྡོམ་ཐོ་ལྟར་ན། རྣམ་རྒྱལ་འབྲིང་སློབ་འདིར་སློབ་ཕྲུག་བུ་༢༤༩ དང་བུ་མོ་༢༤༢ བཅས་ཁྱོན་བསྡོམས་༤༩༡ ཡོད་པའི་ནང་གཏན་སློབ་སློབ་ཕྲུག་༢༩༨ དང༌། ཉིན་སློབ་སློབ་ཕྲུག་༡༩༣ བོད་རིགས་མ་ཡིན་པའི་སློབ་ཕྲུག་༡༦༦ བཅས་ཡོད། དགེ་རྒན་༢༧ དང་ལས་བྱེད་༢༣ བཅས་ཁྱོན་བསྡོམས་དགེ་ལས་༥༠ ཡོད།
སློབ་གྲྭ་འདིའི་ཕྱི་ལོ་༡༩༨༩ ལོ་ནས་༢༠༠༩ བར་གྱི་ལོ་ངོ་༢༡ རིང་སློབ་ཕྲུག་གྲངས་འབོར་འཕར་ཆག་གི་གནས་སྟངས་གཤམ་གསལ།

༤། ཤེས་ཡོན་ལས་རིམ།

བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་གཏན་འབེབས་གནང་རྗེས། བོད་གཞུང་ཤེས་རིག་ལས་ཁུངས་ཀྱིས་ཤེས་ཡོན་སྲིད་བྱུས་སྐོར་དགེ་རྒན་ཟབ་སྦྱོང་དང་སློབ་གྲྭ་ཁག་གི་འགན་འཛིན་ལྷན་ཚོགས་སོགས་སྐོང་ཚོགས་གནང་བར་དང་དོད་ཆེན་པོས་འཛུལ་ཞུགས་བྱས་པ་བརྒྱུད་སྲིད་བྱུས་སྐོར་གོ་རྟོགས་དང་ལག་ལེན་བྱེད་སྟངས་ཐད་ཕན་ཐོགས་ཆེན་པོ་བྱུང༌།
དེ་ཡང་ཕྱི་ལོ་༢༠༠༧ ཟླ་༡༠ ཚེས་༢༤ ནས་ཟླ་༡༡ ཚེས་༡ བར། བོད་གཞུང་ཤེས་རིག་ལས་ཁུངས་ནས་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་དང་འབྲེལ་བའི་དམིགས་བསལ་ཟབ་སྦྱོང་གལ་ཆེན་ཞིག་གོ་སྒྲིག་གནང་སྐབས། སློབ་གྲྭ་འདིའི་སློབ་སྤྱི་དང་དགེ་ཆོས་གཉིས་ཆེད་བཅར་གྱིས་སློབ་གྲྭར་ཕྱིར་འཁོར་རྗེས་ཤེས་ཡོན་སྲིད་བྱུས་ཀྱི་བརྒྱུད་རིམ་ངོ་སྤྲོད་དང༌། སྲོལ་རྒྱུན་ཤེས་ཡོན་ངོས་འཛིན་བྱེད་སྟངས་དང༌། ཤེས་ཡོན་གྱི་དགོས་པ་དང་དམིགས་ཡུལ་དེ་བཞིན་ཟབ་སྦྱོང་སྐབས་མཁས་དབང་ཁག་གི་གསུང་བཤད་སོགས་ཡིག་ངག་གཉིས་ཐོག་ནས་འགྲེལ་བརྗོད་གོ་རྟོགས་སྤེལ་བ་མ་ཟད། ལྷག་པར་ཟབ་སྦྱོང་མཇུག་བསྡོམས་ཉིན་ཡིག་ཐོག་གནང་བའི་དོན་ཚན་ཁག་གཉིས་ཀྱི་ཐོག་འཕྲལ་དུ་ལག་བསྟར་གནང་བཞིན་ཡོད།
གནས་ཡུལ་རྒྱལ་ཁབ་ཀྱི་ཤེས་ཡོན་སྲིད་བྱུས་ལ་གཞན་དབང་སྟབས་བསྟུན་མི་བྱེད་ཐབས་མེད་རྐྱེན་པས་རང་སྐད་གཙོ་བཟུང་གི་ཤེས་ཡོན་སྲིད་བྱུས་ཆ་ཚང་བ་ལག་བསྟར་བྱ་ཐབས་དཀའ་ནའང༌། འདི་ལོ་ནས་བཟུང་བོད་ཡིག་གནས་ཚད་ཡར་རྒྱས་གཏོང་ཆེད་སྔོན་འགྲོ་ནས་བཟུང་འབྲི་ཀློག་དག་གསུམ་གྱི་རྨང་གཞི་དམ་འཛིན་གྱིས་དག་ཡིག་དང་ལྗོན་དབང་བློ་འཛིན་ངག་རྒྱུགས། འཛིན་རིམ་བརྒྱད་པར་དགོང་དྲོ་དམིགས་བསལ་བོད་ཡིག་ཁྲིད་སྦྱོང་འཛིན་གྲྭ་སོགས་གསར་སྣོན་བྱས་ཡོད།
སྔོན་འགྲོའི་ཤེས་ཡོན་གཙིགས་ཆེར་འཛིན་པའི་ཤེས་ཡོན་སྲིད་བྱུས་ཐོག ཕྱི་ལོ་༢༠༠༨ ཟླ་༤ ནས་བཟུང་རིམ་གྱིས་བསྒྱུར་བཅོས་ཀྱིས་སྔོན་འགྲོའི་དགེ་རྒན་༣ སློབ་གྲྭ་གྲོལ་རྗེས་མོན་ཊེ་སོ་རི་འོས་སྦྱོང་ཟླ་བ་གསུམ་གྱི་རིང་དགུན་ཁའི་གུང་གསེང་དང་སྟབས་བསྟུན་ཆེད་གཏོང་བྱས་པ་དང༌། ཕྲུ་གུའི་སྦྱིན་བདག་ལ་སྔོན་འགྲོའི་སློབ་ཁྲིད་ཐབས་ལམ་ཡོ་ཆས་ཐོག་རོགས་སྐྱོར་འབོད་བསྐུལ་ཞུས་པ་ལྟར། བལ་སྒོར་༡༣༠༡༠༠ རོགས་རམ་ཐོབ་སྟེ་སློབ་ཁྲིད་ཡོ་ཆས་རྣམས་མཁོ་སྒྲུབ་གནང་སྟེ་ད་ཆ་བེད་སྤྱོད་གཏོང་མུས་ཡིན།
འཛིན་རིམ་ལྔ་པ་ཡན་ཆེད་ཞོགས་པ་རྒྱལ་གླུའི་སྐབས་སློབ་ཕྲུག་བཞི་རེས་བོད་ཡིག་གསར་ཤོག་ཕྲེང་འབེབས་གཅིག་རེས་མོས་ཀྱིས་རྒྱུན་ཀློག་བྱ་བའི་ལས་རིམ་འགོ་འཛུགས་བྱས་པ་དང༌། འཛིན་རིམ་ལྔ་བ་མན་རེས་གཟའ་པ་སངས་ཉིན་རྒྱབ་ཆུ་ཚོད་གཅིག་རིང་སློབ་གྲྭའི་མཆོད་ཁང་དུ་ལས་དང་པོ་བར་ནང་ཆོས་ངོ་སྤྲོད་ཀྱི་ལས་རིམ་རྒྱུན་གཏན་ལག་བསྟར་ཞུ་བཞིན་ཡོད། ཁྱད་པར་སློབ་གྲྭའི་ནང་མ་འོངས་མདུན་ལམ་སློབ་སྟོན་པ་ཆེད་བོད་གཞུང་ཤེས་རིག་ལས་ཁུངས་ཀྱིས་ཆེད་བསྐོས་ལས་བྱེད་ངོ་ཕེབས་གནང་བ་ཕན་འབྲས་ཅི་ཆེ་བྱུང་ཡོད།
ཕྱི་ལོ་༢༠༠༩ ལོར་རྣམ་རྒྱལ་འབྲིང་རིམ་སློབ་གྲྭའི་སློབ་ཕྲུག་༥༠༢ ལོ་འཁོར་ཡིག་རྒྱུགས་ནང་འཛུལ་ཞུགས་བྱས་པའི་ཁྲོད། སློབ་ཕྲུག་༥༣༥ ཡིག་རྒྱུགས་འཕྲོད་པ་དང༌། ༦༧ མ་འཕྲོད་པ། རྒྱུགས་ཞུགས་མ་ཐུབ་པ་༢༦ བཅས་བྱུང་བས། རྒྱུགས་འཕྲོད་བརྒྱ་ཆ་༨༦་༦༥ ཡིན།
འོན་ཀྱང༌། སྤྱིར་བཏང་བལ་ཡུལ་ནང་སྲིད་དོན་གྱི་གཡོ་འཁྱམ་ཆེ་ཞིང་གནས་ཡུལ་རྒྱལ་ཁབ་ཀྱི་ཤེས་ཡོན་སྲིད་བྱུས་ལག་བསྟར་དགོས་པ། སྐྱབས་བཅོལ་གྱི་གནས་སྟངས་འོག་སློབ་གྲྭའི་མཐུན་རྐྱེན་ཐད་དཀའ་ངལ་ཆེ་ཁར། གནས་ཡུལ་ཁོར་ཡུག་དང་མཐུན་རྐྱེན་དབང་གིས་དགེ་རྒན་ཚད་ལྡན་རག་དཀོན་པའི་དཀའ་ངལ་ལྷག་པར་ཆེ་བའི་གནས་སྟངས་བཅས་སོ། །

སྲོང་བཙན་འབྲིང་རིམ་གོང་མའི་སློབ་གྲྭ།

དཀར་ཆག

༡། འགོ་འཛུགས།
༢། མཐུན་རྐྱེན་འཛུགས་སྐྲུན།
༣། སློབ་འཇུག་དང་ཡིག་རྒྱུགས་གྲུབ་འབྲས།
༤། ཤེས་ཡོན་ལས་རིམ།
༥། གཞུང་འབྲེལ་འཚམས་གཟིགས།

༡། འགོ་འཛུགས།

བལ་ཡུལ་རྒྱལ་ས་ཀ་ཐ་མན་གྲུ་མཆོད་རྟེན་བྱ་རུང་ཁ་ཤོར་ཉེ་ཁུལ་དུ་ཡོད་པའི་སྲོང་བཙན་བལ་བཟའ་གཏན་ཉིན་འབྲིང་རིམ་གོང་མའི་སློབ་གྲྭ་ནི། བལ་ཡུལ་དོན་གཅོད་སྐུ་ངོ་རིན་ཆེན་དར་ལོ་ལགས་ཀྱིས་ཐུགས་ཁུར་འོག་ཕྱི་ལོ་༡༩༨༢ ཕྱི་ཟླ་༣ ཚེས་༢༨ ཉིན་འགོ་འཛུགས་གནང༌། ཐོག་མར་སློབ་གྲྭ་འདིར་སློབ་ཕྲུག་༡༠༠ སྐོར་ཞིག་དང་དགེ་རྒན་༡༠ གྲངས་ཤིག་ལས་མེད་ཅིང༌། འཛིན་ཁང་སོགས་མཐུན་རྐྱེན་དམིགས་བསལ་གང་ཡང་མེད་པར་ཁྱིམ་ཚང་ཞིག་གི་ཁང་པ་གླ་གཡར་བྱས་འདུག འཛིན་ཁང་གི་ཁང་གླ་ཨ་ཨེམ་(IM)རོགས་ཚོགས་ནས་ཟླ་རེར་ཨ་སྒོར་༢༠༠ གནང་འདུག དེ་ནས་རིམ་བཞིན་སློབ་ཕྲུག་གྲངས་འབོར་འཕར་ཆ་བྱུང་བར་བརྟེན། ཕྱི་ལོ་༡༩༨༥ ཡས་མས་སུ་གཏན་སློབ་ཀྱི་ངོ་བོར་དེབ་སྐྱེལ་ཞུས་ཏེ་གཏན་སློབ་དང་ཉིན་སློབ་གཉིས་ཀའི་ཁང་པ་གླ་ལེན་བྱས་པ་དང༌། གཏན་སློབ་ཀྱི་ཁང་གླའི་འགྲོ་གྲོན་བོད་གཞུང་ཤེས་རིག་ལས་ཁུངས་ནས་སྔ་འདོན་གནང་འདུག
ཕྱི་ལོ་༢༠༠༩ ལོར་སློབ་གྲྭ་འདིའི་ནང་སྔོན་འགྲོ་ནས་འཛིན་རིམ་བཅུ་པ་བར་ཁྱོན་བསྡོམས་སློབ་ཕྲུག་གྲངས་༧༤༥ དང༌། དགེ་ལས་༦༥ བཅས་ཡོད།

༢། མཐུན་རྐྱེན་འཛུགས་སྐྲུན།

ཕྱི་ལོ་༡༩༨༩ ལོར་བོད་གཞུང་བལ་ཡུལ་དོན་གཅོད་དང་ཤེས་རིག་སྐུ་ཚབ་གཅིག་ལྕོགས་སྐུ་ངོ་དཔལ་འབྱོར་ཚེ་རིང་ལགས་ཀྱིས་ད་ལྟའི་སློབ་སྤྱི་བྱམས་པ་ཕུན་ཚོགས་ལགས་དགེ་ཆེར་བསྐོ་གཏོང་གནང༌། སྐབས་དེར་སློབ་ཕྲུག་༣༠༠ སྐོར་དང་འཛིན་རིམ་དྲུག་པ་བར་ཡོད་ཅིང༌། དེ་ནས་སློབ་ཕྲུག་གྲངས་འབོར་རིམ་འཕར་དབང་གིས་འཛིན་ཁང་དང་ཉལ་ཁང་གིས་མ་ལྡེང་བའི་གནས་སྟངས་འོག སྒེའུ་ཁང་མེད་པའི་ལྕགས་ཤོག་གི་འཛིན་ཁང་ནང་ཉིན་མོར་ཚ་ཞིང་དགུན་ཁ་གྲང་ངར་ཆེ་བའི་དཀའ་ངལ་ཤུགས་ཆེར་བྱུང༌། ཕྱི་ལོ་༡༩༩༠ ལོར་འཛིན་ཁང་དང༌། ཉལ་ཁང༌། ལས་ཤག་བཅས་གསུམ་གྱི་ལས་འཆར་ཐོག་སི་ཝི་ཌན་གྱི་སྒེར་སྐྱོར་རོགས་ཚོགས་(SOIR-IM, The Swedish Organization for Individual Relief)ནས་རོགས་རམ་ཞལ་བཞེས་ཐོབ་སྟེ། ཕྱི་ལོ་༡༩༩༠ ལོར་འཛིན་ཁང༌། ཕྱི་ལོ་༡༩༩༢ ལོར་ཉལ་ཁང༌། ཕྱི་ལོ་༡༩༩༤ ལོར་ལས་ཤག་དང་འཛིན་ཆས་ཆ་ཚང་བཅས་རོགས་སྐྱོར་གནང་སྟེ་སློབ་གྲྭའི་གཞི་རྩའི་མཐུན་རྐྱེན་དང་སློབ་ཁྲིད་ཀྱི་གནས་ཚད་ཡར་རྒྱས་མངོན་གསལ་བྱུང༌། དེ་ནས་རིམ་བཞིན་སློབ་བུ་ཆེ་ཆུང་དབར་མཉམ་བསྲེས་བྱས་ཚེ་སློབ་གྲྭའི་བར་གསེང་སྐབས་སུ་དཀའ་ངལ་འཕྲད་མུས་ལ་བརྟེན། ཕྱི་ལོ་༢༠༠༡ ལོར་སྔོན་འགྲོའི་སྡེ་ཚན་ཟུར་དུ་འཛུགས་པའི་འཆར་གཞི་བཟོས་ནས་ཨུ་རོབ་རོགས་ཚོགས་(EU)ནས་འཛིན་ཁང་༦ དང་དགེ་རྒན་ལས་ཁུངས་ཁང་མིག འཛིན་ཆས་བཅས་རོགས་རམ་ཐོབ། འོག་གི་རོལ་ཆ་སྦྱོང་བརྡར་ཁང་དང་སློབ་གྲྭའི་ཡིག་ཚང༌། རྩེད་ཐང་བཅས་སློབ་གྲྭ་རང་ནས་རོགས་དངུལ་ཐབས་འཚོལ་གྱིས་གསར་སྐྲུན་ཐུབ་པ་བྱུང་ཡོད། དེང་སྐབས་སློབ་གྲྭ་འདིའི་འཛིན་ཁང་དང་འཛིན་ཆས་ཚང་མ་དེང་རབས་ཀྱི་ཆ་རྐྱེན་གང་ལེགས་ཡོད་པ་མ་ཟད། ཚན་རིག་ཚོད་ལྟ་ཁང་དང༌། དཔེ་མཛོད་ཁང༌། ཀམ་པུ་ཊར་སྦྱོང་བརྡར་ཁང་སོགས་སློབ་ཁྲིད་ལ་གཞོགས་འདེགས་ཀྱི་ཆ་རྐྱེན་ཚད་ལྡན་ཡོད་པ་དང༌། སློབ་གྲྭ་འདིའི་ཕྱི་ནང་མཐུན་རྐྱེན་སྤྱི་དང་ཁྱད་པར་སློབ་མའི་སློབ་སྦྱོང་ཐོག་བལ་ཡུལ་གྱི་སློབ་གྲྭ་ལེགས་གྲས་སུ་ཆ་འཇོག་བྱེད་མུས་ཡིན།

༣། སློབ་འཇུག་དང་ཡིག་རྒྱུགས་གྲུབ་འབྲས།

སྲོང་བཙན་འབྲིང་རིམ་གོང་མའི་སློབ་གྲྭ་འདི་ཉིད་ཕྱི་ལོ་༡༩༩༧ ལོར་འཛིན་རིམ་བཅུ་པའི་ཡིག་རྒྱུགས་འགོ་བཙུགས་པ་ནས་ཕྱི་ལོ་༢༠༠༨ བར་སློབ་ཕྲུག་གྲངས་༣༧༢ ཡིག་རྒྱུགས་གྲུབ་འབྲས་ལེགས་ཐོན་བྱུང་ཡོད། ཐེངས་དགུར་རྒྱུགས་འཕྲོད་བརྒྱ་ཆ་༡༠༠ དང༌། ཕྱི་ལོ་༢༠༠༥།༢༠༠༦ ལོ་ནས་མུ་མཐུད་སློབ་ཕྲུག་གསུམ་རྩེ་ཕུད་གྲས་སུ་ཐོན་ཡོད། འཛིན་གྲྭ་བཅུ་པའི་སློབ་ཕྲུག་ཉམ་ཐག་རྣམས་སློབ་གྲྭ་འདི་ནས་སློབ་མཐར་ཕྱིན་རྗེས་རྣམ་རྒྱལ་མཐོ་རིམ་དང་མཐོ་རིམ་གཞན་ནང་སློབ་ཡོན་མུ་མཐུད་ཡོང་ཐབས་ཞུས་ཡོད། དེ་ཡང་སློབ་ཕྲུག་རང་ངོས་ནས་ཤེས་ཡོན་སྦྱོང་འདོད་ཀྱི་འདོད་པ་མ་རྫོགས་བར་གངས་ཅན་བདེ་རྩ་བརྒྱུད་སློབ་ཡོན་རོགས་རམ་ཐབས་འཚོལ་གནང་བཞིན་ཡོད། ད་ལྟ་རོགས་ཚོགས་ཁག་ཚང་མ་ཁྱོན་བསྡོམས་ཉམ་ཐག་སློབ་ཕྲུག་༤༡༢ ཡོད་པ་དེའི་ནང་ཡུལ་མི་གྲངས་༡༠༠ ཙམ་ལ་རོགས་རམ་ཐོབ་ཡོད། ཕྱི་ལོ་༢༠༠༧ ཟླ་༡༢ ཚེས་༣༡ ཉིན་བོད་གཞུང་ཤེས་རིག་ལས་ཁུངས་ཀྱི་སྡོམ་ཐོ་ལྟར་ན། སྲོང་བཙན་འབྲིང་རིམ་གོང་མའི་སློབ་གྲྭ་འདིར་སློབ་ཕྲུག་བུ་༡༨༧ དང་བུ་མོ་༢༡༠ བཅས་ཁྱོན་བསྡོམས་༣༩༧ ཡོད་པ་ལས་སློབ་ཕྲུག་༣ མ་གཏོགས་ཚང་མ་གཏན་སློབ་ཡིན་ཞིང༌། བོད་རིགས་མ་ཡིན་པའི་སློབ་ཕྲུག་༨༥ ཡོད། དགེ་རྒན་༢༨ དང་ལས་བྱེད་༢༥ བཅས་ཁྱོན་བསྡོམས་དགེ་ལས་༥༣ ཡོད། ཕྱི་ལོ་༡༩༨༩ ནས་༢༠༠༩ བར་འདས་པའི་ལོ་ངོ་༢༡ རིང་བལ་ཡུལ་སྲོང་བཙན་འབྲིང་རིམ་གོང་མའི་སློབ་གྲྭ་འདིའི་སློབ་ཕྲུག་གྲངས་འབོར་གནས་སྟངས་གཤམ་གསལ། སློབ་གྲྭ་འདིའི་འདས་པའི་ལོ་ངོ་༩ རིང་སློབ་ཕྲུག་སྤྱི་ཡོངས་ཀྱི་ལོ་འཁོར་ཡིག་རྒྱུགས་ཀྱི་ཆ་སྙོམས་རྒྱུགས་འཕྲོད་བརྒྱ་ཆ་༨༧་༨༠ སླེབས་ཡོད་པ་གཤམ་གསལ།

སློབ་གྲྭ་འདིའི་འཛིན་རིམ་བཅུ་པའི་སློབ་ཕྲུག་ཐོན་ཐེངས་ཐོག་མ་གསུམ་ནི་བརྒྱ་ཆ་༡༠༠ ཡིན། ཐོན་ཐེངས་དང་པོ་དང་གཉིས་པའི་སྐབས་སློབ་ཕྲུག་ཕལ་ཆེ་བ་ཨང་སྡེ་དང་པོ་དང་གཉིས་པའི་ཨང་ཆ་མཐོ་གྲས་སུ་སླེབས་ཡོད། དེ་བཞིན་ཐོན་ཐེངས་གསུམ་པར་སློབ་མ་༢༨ ཡོད་པའི་ཁྲོད་༡༤ ལ་ཨང་སྡེ་དང་པོ་ཐོབ་པ་དང༌། སློབ་ཕྲུག་༡༤ ཨང་སྡེ་གཉིས་པའི་ཨང་ཆ་མཐོ་གྲས་སུ་ཚུད། ཕྱི་ལོ་༢༠༠༠ ལོའི་ཐོན་ཐེངས་བཞི་པར་ཁྱོན་སློབ་ཕྲུག་༢༠ ཡོད་པའི་ཁོངས་ནས་༡༢ ལ་ཨང་སྡེ་དང་པོ་ཐོབ་པ་དང༌། སློབ་ཕྲུག་༨ ལ་ཨང་སྡེ་གཉིས་པ་ཐོབ་ཡོད། ཕྱི་ལོ་༢༠༠༡ ལོའི་ཐོན་ཐེངས་ལྔ་པའི་སློབ་ཕྲུག་༤༧ ཡིག་རྒྱུགས་ནང་ཞུགས་པར་༢༢ ལ་ཨང་སྡེ་དང་པོ་ཐོབ་པ་དང༌། སློབ་ཕྲུག་༢༥ ལ་ཨང་སྡེ་གཉིས་པ་ཐོབ་ཡོད། སློབ་གྲྭ་འདིའི་འཛིན་རིམ་བཅུ་པའི་ལོ་འཁོར་ཡིག་རྒྱུགས་བསྟུད་མར་ལོ་ལྔར་རྒྱུགས་འཕྲོད་བརྒྱ་ཆ་༡༠༠ ལོན་ཡོད་པ་དང༌། འདས་པའི་ལོ་ངོ་༡༢ ནང་རྒྱུགས་འཕྲོད་བརྒྱ་ཆ་༡༠༠ ལོན་པ་ཐེངས་བརྒྱད་བྱུང་བའི་གྲུབ་འབྲས་བཟང་པོ་ཐོབ་ཡོད། འདས་པའི་ལོ་ངོ་༡༢ རིང་སྲོང་བཙན་འབྲིང་རིམ་སློབ་གྲྭ་འདིའི་འཛིན་རིམ་བཅུ་པའི་རྒྱལ་ཡོངས་ལོ་འཁོར་ཡིག་རྒྱུགས་གྲུབ་འབྲས་གནས་སྟངས་གཤམ་གསལ།

༄༅། །བལ་ཡུལ་སྲོང་བཙན་འབྲིང་རིམ་སློབ་གྲྭའི་འཛིན་རིམ་བཅུ་པའི་ལོ་འཁོར་ཡིག་རྒྱུགས་གྲུབ་འབྲས། 

༤། ཤེས་ཡོན་ལས་རིམ།

དེང་སློབ་གྲྭ་འདིར་སྔོན་འགྲོ་ནས་འཛིན་རིམ་བཅུ་པ་བར་ཡོད་ཅིང༌། སློབ་གྲྭའི་རྒྱུན་ལྡན་སློབ་ཚན་ནི་ཨིན་ཡིག་དང༌། བོད་ཡིག བལ་ཡིག རྩིས་རིག ཚན་རིག སྤྱི་ཚོགས་ཚན་རིག མི་འབོར་དང་ཁོར་ཡུག ས་ཁམས། ལོ་རྒྱུས། སྤྱི་ཚོགས་འཕེལ་རིམ། ཀམ་པུ་ཊར། གླུ་དབྱངས་དང་བྲོ་གར། རྩེད་མོ་དང་ལུས་སྦྱོང་བཅས་ཡིན། ཤེས་ཡོན་སློབ་གསོའི་དམིགས་ཡུལ་ནི་སློབ་མའི་ཕྱོགས་ཡོངས་ཀྱི་ཡར་རྒྱས་འབྱུང་ཐབས་བྱ་རྒྱུ་དེ་ཡིན་སྟབས། སློབ་གྲྭའི་ནང་སློབ་མ་ཚོའི་ལུས་སེམས་གཉིས་ཀར་སྦྱོང་བརྡར་དང་སློབ་སྟོན་གྱི་མཐུན་རྐྱེན་གང་ལེགས་བསྐྲུན་ཡོད། དུས་རྒྱུན་འཛིན་གྲྭའི་རིགས་ཕུད་སློབ་གྲྭའི་ནང་ཤེས་ཡོན་དང་འབྲེལ་བའི་སློབ་མའི་འཚོ་བ་དོན་སྙིང་ལྡན་ཞིང་ཕུན་སུམ་ཚོགས་པ་ཞིག་བཟོ་སླད་ཡ་རབས་བཟང་སྤྱོད་ཀྱི་སློབ་སྟོན་དང་ལས་འགུལ་དང༌། ལུས་རྩལ་དང་རྩེད་རིགས། རིག་རྩལ་འགྲན་བསྡུར། ཕྱི་བསྐྱོད་ལྟ་བསྐོར། སྤྱི་ཚོགས་ཞབས་ཞུ། བོད་ཨིན་བལ་སྐད་ཐོག་བགྲོ་གླེང༌། རྩོམ་དང་རི་མོ་འགྲན་བསྡུར། སློབ་གྲྭའི་ལོ་འཁོར་དུས་དེབ་རང་བཞིན་གསལ་བའི་མེ་ལོང་འདོན་སྤེལ་ལྟ་བུའི་ལས་འགུལ་དང་བྱེད་སྒོ་སྣ་མང་སྤེལ་མུས་ཡིན། དེང་སྐབས་སློབ་གྲྭ་འདིར་སློབ་ཞུགས་གནང་མཁན་སློབ་ཕྲུག་རྣམས་ལ་ཚད་ལྡན་གྱི་དེང་རབས་ཤེས་ཡོན་དང་བོད་ཀྱི་སྲོལ་རྒྱུན་ཤེས་ཡོན་ཟུང་འབྲེལ་གྱིས་སྦྱོར་སྤྲོད་གནང་བཞིན་ཡོད་པ་མ་ཟད། ཁྱིམ་ཚང་ཉམ་ཐག་འབྱོར་ཞན་མི་ཉུང་བ་ཞིག་ལ་དམིགས་བསལ་རོགས་སྐྱོར་གྱིས་སློབ་འཇུག་གནང་བཞིན་ཡོད། ཉེ་ལམ་ཕྱི་ལོ་༢༠༠༥ ལོར་སློབ་གྲྭ་འདིས་ཁྱོན་ཉམ་ཐག་སློབ་ཕྲུག་༤༠༡ ཙམ་ལ་སྦྱིན་བདག་ཐབས་འཚོལ་གནང་ཡོད། ཕྱི་ལོ་༢༠༠༡ ལོར་བོད་གཞུང་ཤེས་རིག་ལས་ཁུངས་ཀྱིས་རྒྱ་བལ་འབྲུག་གསུམ་ནང་འཛིན་རིམ་བརྒྱད་པའི་སློབ་ཕྲུག་ཁྲོད་ཤེས་ཡོན་འགྲན་བསྡུར་སྤེལ་བའི་ནང་སློབ་གྲྭ་འདིའི་བུ་མོ་ཚེ་རིང་སྒྲོལ་མ་རྩེད་ཕུད་གྲས་སུ་ཐོན་ཏེ། ཨ་རིའི་ཝ་ས་ཆི་སློབ་གྲྭ་(Wasatch Academy, Utah)རུ་སློབ་ཡོན་སྤྲོད་མི་དགོས་པར་དམིགས་བསལ་སློབ་བཞེས་གནང་ཡོད། འདས་པའི་ལོ་ངོ་ཉེར་ལྔའི་སློབ་གྲྭ་འདིའི་སློབ་འཇུག་གྲངས་འབོར་༢༥༠༠ ལྷག་ལོངས་ཡོད། དེ་བཞིན་ཕྱི་ལོ་༢༠༠༥ ལོའི་བལ་ཡུལ་རྒྱལ་ཡོངས་འཛིན་རིམ་བཅུ་པའི་ཡིག་རྒྱུགས་ཆེན་མོའི་ཁྲོད་སྲོང་བཙན་སློབ་གྲྭའི་གྲུབ་འབྲས་བརྒྱ་ཆ་༨༩་༦༥ ལོན་པ་མ་ཟད། སློབ་ཕྲུག་གཅིག་གྲུབ་འབྲས་རྩེ་ཕུད་ཁྲོད་ཚུད་པས། བོད་གཞུང་ཤེས་རིག་ལས་ཁུངས་ནས་བསྔགས་བརྗོད་ཀྱི་ཕྱག་བྲིས་ཕེབས་ཡོད། ཕྱི་ལོ་༢༠༠༥ ཟླ་༣ ཚེས་༡༧ རྒྱལ་ཡོངས་ཤེས་ཡོན་གྱི་ཉིན་མོ་ཐེངས་༣༠ པའི་ཐོག བལ་ཡུལ་དབུས་ཡར་རྒྱས་དང་ཆེ་བསྟོད་ཁང་(National Development and Honour Centre Nepal, NDHCN)ནས་སྲོང་བཙན་སློབ་གྲྭའི་སློབ་སྤྱི་བྱམས་པ་ཕུན་ཚོགས་ལགས་སུ་དམིགས་བསལ་སློབ་སྟོན་མཁས་པའི་གཟེངས་རྟགས་ཕུལ་ཡོད། བོད་གཞུང་ཤེས་རིག་ལས་ཁུངས་ཀྱིས་གཞི་རིམ་སློབ་དགེ་རྣམས་ལ་དམིགས་བསལ་ཟབ་སྦྱོང་གང་མང་ཞིག་གོ་སྒྲིག་གནང་བའི་ཁྲོད་སློབ་གྲྭ་འདིའི་དགེ་ལས་རྣམས་དང་དོད་ཆེན་པོས་འཛུལ་ཞུགས་ཞུས་ཡོད་ལ། ཕན་འབྲས་ཀྱང་མི་ཉུང་བ་བྱུང་ཡོད། ད་ལྟའི་ཆར་ཕྱིའི་མཐུན་རྐྱེན་དང་ནང་གི་ཤེས་ཡོན་བཅས་བཟང་གྲས་སུ་གནས་ཡོད། བཙན་བྱོལ་གྱི་གནས་སྐབས་རིང་འདི་ལྟ་བུའི་གྲུབ་འབྲས་བཟང་པོ་ཐོབ་པ་གཙོ་བོ་ྋསྤྱི་ནོར་ྋགོང་ས་སྐྱབས་མགོན་ཆེན་པོས་དབུས་བོད་གཞུང་མང་གཉིས་ཀྱི་བཀའ་དྲིན་དང༌། སྒོས་སུ་སློབ་གྲྭའི་འབྲེལ་ཡོད་དགེ་ལས་ཚང་མས་ལས་འགན་འཐུས་གཙང་བསྒྲུབས་པའི་བླ་མེད་སྲི་ཞུ་ལ་བརྟེ
ན་ནས་བྱུང༌།

༥། གཞུང་འབྲེལ་འཚམས་གཟིགས།

སྲོང་བཙན་འབྲིང་རིམ་གོང་མའི་སློབ་གྲྭ་འདིའི་ནང་རང་གཞུང་གི་མཛད་གཙོ་ཁག་དང༌། བལ་ཡུལ་སྐུ་ཚབ་དོན་གཅོད། གངས་ཅན་བདེ་རྩའི་འགན་འཛིན་དང་དྲུང་ཆེ། ཕྱི་རྒྱལ་རོགས་ཚོགས་ཀྱི་འགན་འཛིན་དང་སྦྱིན་བདག་ཁག བལ་ཡུལ་རྒྱལ་ཁབ་དང་ས་གནས་རྫོང་གི་འབྲེལ་ཡོད་དཔོན་རིགས་དང་ལས་བྱེད་བཅས་མང་པོ་ཞིག་ཆེད་ཕེབས་ཀྱིས་འཚམས་གཟིགས་གནང་ཡོད། དེ་དག་ལས་ཁག་ཅིག་དཔེ་མཚོན་དུ་དྲངས་པ་གཤམ་གསལ། ཕྱི་ལོ་༢༠༠༥ ཟླ་༥ ཚེས་༡༢ ཉིན་ཕ་རན་སི་བོད་དོན་རོགས་ཚོགས་ཀྱི་ཚོགས་གཙོ་ཝིར་ཇི་ནི་སཱ་ཝིན་(Mme.Virginie Savin)དང་ཕྱག་རོགས་བཅས་ཀྱིས་འཚམས་གཟིགས་གནང་ཞིང༌། ཟླ་༧ ཚེས་༡༧ ཉིན་གངས་ཅན་བདེ་རྩའི་དྲུང་ཆེ་ཚེ་རིང་སྟོབས་རྒྱལ་ལགས་དང༌། ཨ་ཡི་ཨེམ་རོགས་ཚོགས་ཀྱི་ཕྱིར་བསྐྱོད་འགན་འཛིན་སྐུ་ཞབས་དབང་ཕྱུག་རྒྱལ་པོ་དང་སྦྱིན་བདག་འཚོལ་ཞིབ་དྲུང་ཆེ་དོན་གྲུབ་སྒྲོལ་མ་ལགས་བཅས་ཆེད་ཕེབས་གནང༌། ཟླ་༧ ཚེས་༡༩ ཉིན་སི་ཊར་སི་སྦག་ཕ་རན་སི་བོད་པའི་རོགས་ཚོགས་ཀྱི་མཐུན་འགྱུར་འོག་སློབ་གྲྭ་འདིར་ཕ་རན་སིའི་སྐད་ཡིག་འཛིན་གྲྭ་ཚུགས་ནས་ལོ་ངོ་༡༠ འཁོར་བའི་དུས་དྲན་སྲུང་བརྩིའི་ཐོག སྐུ་མགྲོན་གཙོ་བོ་ཕ་རན་སིའི་བལ་ཡུལ་སྐུ་ཚབ་དོན་གཅོད་སྐུ་ཞབས་མི་ཤལ་ཇོ་ལི་ཝེཊ་(Mr.Michel Jolivett)མཆོག་དང༌། སི་ཊར་སི་སྦོག་ཕ་རན་སི་བོད་ཚོགས་(Club Tibet)ཚོགས་གཙོ་མི་ཤལ་ཇཱ་མན་(Mr.Michel Jermann)མཆོག་དང༌། མའེ་རི་མ་ཌེ་ལིན་པོ་རུའུ་ལིང་ཀ་མཆོག་བཅས་ཆེད་ཕེབས་ཀྱིས་དུས་དྲན་ལ་མཉམ་ཞུགས་གནང༌། ཟླ་༧ ཚེས་༢༩ ཉིན་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་སྐུ་ཞབས་སྐལ་བཟང་ཕུན་ཚོགས་ལགས་དང་ས་གནས་གཞོན་ནུའི་ཚོགས་མི་ཁག་ཅིག་བཅས་ཆེད་ཕེབས་འཚམས་གཟིགས་ཀྱིས་གསུང་བཤད་གལ་ཆེན་གནང༌། ཟླ་༡༡ ཚེས་༢༠ ཉིན་སློབ་གྲྭའི་ལོ་འཁོར་རྩེད་འགྲན་སྐབས། སྐུ་མགྲོན་གཙོ་བོ་ཀ་ཐ་མན་གྲུ་རྫོང་གི་ཤེས་རིག་ལས་འཛིན་སྐུ་ཞབས་ལཀ་ཤི་མན་ཁན་ནལ་(Mr.Laxman Khanal)མཆོག་ཆེད་ཕེབས་གསུང་བཤད་གནང༌། གཞན་ཡང་བོད་མི་མང་སྤྱི་འཐུས་དང་ཀུན་བརྩེ་རིན་པོ་ཆེ་བཅས་མི་སྣ་གདན་འདྲེན་གྱིས་གསུང་བཤད་གནང་ཡོད། ཕྱི་ལོ་༢༠༠༦ ཟླ་༤ ཚེས་༡༧ ཉིན་ཕ་རན་སིའི་སི་ཊར་སི་སྦག་བོད་དོན་ཚོགས་པའི་ཚོགས་གཙོ་སྐུ་ཞབས་མི་ཤལ་མན་མཆོག་དང་ཚོགས་མི་ཁག་ཆེད་ཕེབས་འཚམས་གཟིགས་གནང༌། ཟླ་༦ ཚེས་༢༡ ཉིན་ཨི་ཊ་ལི་བོད་ཁང་གི་ངེས་སྟོན་པ་སྐུ་ཞབས་བཀྲ་ཤིས་ཚེ་རིང་ལགས་འཚམས་གཟིགས་སུ་ཕེབས་པ་དང༌། ཟླ་༧ ཚེས་༡༣ ཉིན་བོད་གཞུང་ཤེས་རིག་ལས་ཁུངས་ཀྱི་དྲུང་ཆེ་ལས་འཕར་སྐུ་ཞབས་དངོས་གྲུབ་རྡོ་རྗེ་ལགས་སློབ་གྲྭ་འདིར་ཆེད་ཕེབས་ཀྱི་འཚམས་གཟིགས་ཀྱིས་རང་གཞུང་གི་སྲིད་བྱུས་དང་འབྲེལ་བའི་ལས་དོན་ལམ་སྟོན་ཞིབ་རྒྱས་གནང༌། ཟླ་༨ ཚེས་༡༡ ཉིན་ལྡི་ལི་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་འགན་འཛིན་སྤྱི་འཐུས་སྤེན་པ་ཚེ་རིང་ལགས་དང༌། བོད་མི་མང་སྤྱི་འཐུས་ལས་ཐོག་ཡེ་ཤེས་ཕུན་ཚོགས་ལགས། སྤྱི་འཐུས་སྒྲོལ་མ་མཚོ་མོ་ལགས་བཅས་ཀྱིས་འཚམས་གཟིགས་ཀྱིས་དགེ་སློབ་རྣམས་ལ་རང་གཞུང་གི་སྲིད་བྱུས་དང་བོད་རྒྱའི་གནས་སྟངས། མ་འོངས་བྱེད་ཕྱོགས་སོགས་ཀྱི་སྐོར་ལམ་སྟོན་བཀའ་སློབ་གནང༌། ཕྱི་ལོ་༢༠༠༧ ཟླ་༤ ཚེས་༢༨ ཉིན། སྲོང་བཙན་མཐོ་སློབ་འདིའི་ཁེ་མེད་སྤྱི་ཚོགས་ཞབས་འདེགས་ཞུས་ནས་ལོ་ངོ་ཉེར་ལྔ་འཁོར་བའི་དུས་དྲན་སྲུང་བརྩི་སླད་མཛད་སྒོ་གཟབ་རྒྱས་ཤིག་གོ་སྒྲིག་ཞུས། དུས་དྲན་གྱི་མཛད་སྒོའི་ཐོག་བོད་གཞུང་བལ་ཡུལ་སྐུ་ཚབ་དོན་གཅོད་དང༌། བོད་མི་མང་སྤྱི་འཐུས། ས་གནས་འགོ་འཛིན། གངས་ཅན་བདེ་རྩའི་དྲུང་ཆེ་ལས་ཐོག་དང་ཟུར་པ་ཁག རང
་བདེན་ཚོགས་ཆུང༌། ཕ་མའི་འཐུས་ཚོགས། ཕྱི་རྒྱལ་སྦྱིན་བདག་དང་གྲོགས་པོ་སོགས་ཕེབས་ཡོད། སློབ་གྲྭའི་ངོས་ནས་བལ་ཡུལ་གྱི་བོད་མི་སྐྱབས་བཅོལ་བའི་ཤེས་ཡོན་སློབ་གསོའི་ལས་དོན་ཐོག་བྱས་རྗེས་བཞག་པའི་བོད་མི་དང་ཕྱི་རྒྱལ་སྦྱིན་བདག་ཁག་ལ་དྲན་རྟེན་དང་ལེགས་གསོལ་བྱ་དགའ་ཕུལ་ཡོད། དེ་བཞིན་སློབ་གྲྭའི་ནང་ཁུལ་དང༌། བལ་ཡུལ་བོད་སློབ་གཞན་གདན་འདྲེན་བཅས་ཀྱི་ལམ་ནས་རིག་གཞུང་བགྲོ་གླེང་དང་འཁྲབ་སྟོན། རྩེད་འགྲན་སོགས་ཀྱི་ལས་རིམ་སྤེལ་ཏེ་སློབ་ཕྲུག་ཚོའི་བློ་སྟོབས་འཕེལ་ཕྱིར་བྱ་དགའི་བདག་རྐྱེན་རྒྱ་མི་ཆུང་བ་གནང་ཡོད། མདོར་ན། ཉེ་བའི་ལོ་ཤས་ནང་སློབ་གྲྭ་འདིར་དཔལ་ལྡན་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་དང༌། ཤེས་རིག་བཀའ་བློན་ཐུབ་བསྟན་ལུང་རིགས། དྲུང་ཆེ་གཡུ་ཐོག་ཀརྨ་དགེ་ལེགས་སོགས་བཙན་བྱོལ་བོད་གཞུང་གི་མཛད་གཙོ་རྣམ་པ་དང༌། དཔལ་ལྡན་ས་སྐྱའི་བདག་ཁྲི་གོང་མ་རིན་པོ་ཆེ་མཆོག་དང༌། ཆུ་བཟང་རིན་པོ་ཆེ། བློ་བཟང་བསྟན་འཛིན་རིན་པོ་ཆེ། ཀུན་བརྩེ་རིན་པོ་ཆེ་སོགས་བླ་ཆེན་ཁག གཞན་ཡང་བལ་ཡུལ་སྐུ་ཚབ་དོན་གཅོད་རིམ་པ། བལ་ཡུལ་གནས་བཞུགས་བོད་མི་མང་སྤྱི་འཐུས་རྣམ་པ། གངས་ཅན་བདེ་རྩའི་དྲུང་ཆེ་རིམ་པ་སོགས་ས་གནས་འབྲེལ་ཡོད་འགོ་འཛིན་གྱིས་གཟིགས་རྟོག་ལམ་སྟོན་གནང་ཞིང༌། ཨ་རི་བོད་ཀྱི་ཐེབས་རྩའི་ཚོགས་གཙོ་རིན་ཆེན་དར་ལོ་དང༌། ཕ་རན་སིའི་བལ་ཡུལ་སྐུ་ཚབ་དོན་གཅོད་སྐུ་ཞབས་མི་ཤལ་ཇོ་ལི་ཝེཊ་དང༌། སི་ཊར་སི་སྦག་ཕ་རན་སི་བོད་ཚོགས་ཀྱི་ཚོགས་གཙོ་མི་ཤལ་ཇཱ་མན། ཨ་རིའི་གློག་བརྙན་འཁྲབ་འཁྲིད་པ་གྲགས་ཅན་སྐུ་ཞབས་རི་ཆར་ཌི་གྷེར་སོགས་ཕྱི་རྒྱལ་རོགས་ཚོགས་འགོ་འཛིན་དང་གྲགས་ཅན་མི་སྣ། བལ་ཡུལ་ཀ་ཐ་མན་གྲུ་རྫོང་ཤེས་ཡོན་ལས་འཛིན་ལཀ་ཤི་མན་ཁན་ནལ་སོགས་ས་གནས་དཔོན་རིགས་ཁག་བཅས་ཆེད་ཕེབས་ཀྱིས་འཚམས་གཟིགས་དང་ལམ་སྟོན་བཀའ་སློབ་ཟབ་རྒྱས་གནང་ཡོད།

ལེགས་བཤད་ཚལ་སློབ་གྲྭ།

དཀར་ཆག

༡། འགོ་འཛུགས།
༢། མཐུན་རྐྱེན་འཛུགས་སྐྲུན།
༣། སློབ་འཇུག་དང་མཐར་ཕྱིན་སློབ་ཕྲུག་གྲངས་འབོར།
༤། ཤེས་ཡོན་སྲིད་བྱུས་ལག་བསྟར།
༥། གཞུང་འབྲེལ་འཚམས་གཟིགས་སྐོར།

༡། འགོ་འཛུགས།

སྤོག་ར་གློ་སྒྲིག་བྱམས་པ་གླིང་ལེགས་བཤད་ཚལ་འབྲིང་རིམ་སློབ་གྲྭ་ནི། བཙན་བྱོལ་བོད་མིའི་གནས་འཁོད་བལ་ཡུལ་སྤོག་ར་ས་ཁུལ་དུ་གནས་པའི་གཞིས་ཆགས་ཁག་བཞིའི་ཡ་གྱལ་བྱམས་པ་གླིང་གཞིས་ཆགས་སུ་ཕྱི་ལོ་༡༩༧༩ ཟླ་༡ ཚེས་༡ ཉིན་འགོ་བཙུགས་ཡོད་ཅིང༌། སྐབས་དེར་དགེ་རྒན་༡ དང་སློབ་ཕྲུག་ཕོ་མོ་གྲངས་༢༤ ཡོད། ཕྱི་ལོ་༢༠༠༧ ཟླ་༡༠ ཚེས་༧ ནས་གཞུང་འབྲེལ་གངས་ཅན་བདེ་རྩ་ནས་དེ་སྔོན་བོད་གཞུང་རྣམ་རྒྱལ་མཐོ་རིམ་སློབ་གྲྭའི་རྩིས་དགེ་བྱམས་པ་བཟང་པོ་ལགས་བྱམས་གླིང་ལེགས་བཤད་ཚལ་སློབ་གྲྭའི་དགེ་ཆེའི་ལས་ཚབ་ཏུ་བསྐོ་གཏོང་བཀོད་མངགས་ཕེབས་པ་ནས་བཟུང༌། ད་ལྟ་སློབ་གྲྭ་འདིའི་དགེ་ཆེ་བྱམས་པ་བཟང་པོ་ལགས་ནས་གནང་མུས་ཡིན། ཕྱི་ལོ་༢༠༠༨ ལོར་སློབ་གྲྭ་འདིར་སྔོན་འགྲོ་ནས་འཛིན་རིམ་བདུན་པ་བར་ཡོད་ཅིང༌། ཁྱོན་བསྡོམས་དགེ་ལས་༢༠ དང༌། སློབ་ཕྲུག་ཕོ་མོ་གྲངས་༡༩༢ ཡོད།

༢། མཐུན་རྐྱེན་འཛུགས་སྐྲུན།

ཕྱི་ལོ་༡༩༧༤ ལོར་ཧེ་ལི་ཊར་ཞེས་པའི་བལ་ཡུལ་སྤོག་རའི་ས་གནས་དེར་གློ་སྒྲིག་འཛུགས་ཀྱི་དམག་མི་རྣམས་གཏན་སྡོད་བྱ་ཡུལ་བྱམས་པ་གླིང་ཞེས་མིང་བཏགས་ཏེ་གཞིས་ཆགས་ཀྱི་འགོ་ཐོག་མར་ཚུགས་ཤིང༌། སྐབས་དེར་མི་མང་ལ་དཀའ་ངལ་ཛ་དྲག་ཆེ་སྟབས་ྋགོང་ས་ྋསྐྱབས་མགོན་ཆེན་པོ་མཆོག་གི་ལམ་སྟོན་འོག་བཙན་བྱོལ་བོད་གཞུང་གིས་དམིགས་བསལ་དགོངས་བཞེས་བཀའ་དྲིན་བསྐྱངས་པས་ཕྲུ་གུ་ལོ་ལྔའི་ཡན་ཆད་ཡོངས་རྫོགས་ཤེས་རིག་གིས་རྡ་ས་བོད་ཕྲུག་ཁྱིམ་སྡེའི་ཁོངས་སུ་སྔ་རྗེས་ཐེངས་གཉིས་སློབ་འཇུག་དགོངས་བཞེས་གནང་ཡོད། དེ་ནས་ལོ་རེ་བཞིན་སློབ་ཕྲུག་གྲངས་འབོར་འཕེལ་རྒྱས་སོང་བ་ལ་བརྟེན་ནས་ས་གནས་རང་དུ་གཞི་རིམ་གྱི་སློབ་གྲྭ་ཞིག་མེད་དུ་མི་རུང་བར་གཟིགས་ཏེ། སྐབས་དེར་ཕྱི་ནང་གི་མཐུན་རྐྱེན་གང་ཅིའི་ཐད་དཀའ་ངལ་སྣ་མང་ཞིག་འཕྲད་ཡོད་ནའང༌། ས་གནས་འགོ་འཁྲིད་པ་དང་སེར་སྐྱ་མི་མང་རྣམས་ཀྱིས་དཀའ་ངལ་འཛེམས་མེད་བགྱིས་པའི་འབྲས་བུར་ལེགས་གཤད་ཚལ་སློབ་གྲྭ་འདི་ཉིད་གསར་འཛུགས་ཐུབ་པ་བྱུང༌། སློབ་གྲྭ་འདིའི་འཛིན་ཁང་ལས་ཤག་དང་འཛིན་ཆས་སོགས་ཕྱིའི་མཐུན་རྐྱེན་གྱི་བྱུང་རིམ་མདོ་ཙམ་བཀོད་ན། ༡། ཕྱི་ལོ་༡༩༧༩ ལོར་སྔོན་འགྲོའི་འཛིན་ཁང་༢ དང་འཛིན་ཆས་གསར་བཟོ་གནང༌། ༢། ཕྱི་ལོ་༡༩༨༩ ལོར་(TDF, Belgium)རོགས་ཚོགས་ནས་གངས་ཅན་བདེ་རྩ་བརྒྱུད་འཛིན་ཁང་༢ དང་འཛིན་ཆས་གསར་སྒྲུབ་གནང༌། ༣། ཕྱི་ལོ་༡༩༨༤ ལོར་བྷེལ་ཇམ་རོགས་ཚོགས་(TDF, Belgium)ཀྱི་རོགས་རམ་འོག་འཛིན་ཁང་༢ དང་ཡིག་ཚང་༡ འཛིན་ཆས་དང་བཅས་གངས་ཅན་བདེ་རྩ་བརྒྱུད་གསར་བཞེངས་གནང༌། ༤། ཕྱི་ལོ་༡༩༨༥ ལོར་བྷེལ་ཇམ་རོགས་ཚོགས་(TDF, Belgium)ནས་གངས་ཅན་བདེ་རྩ་བརྒྱུད་ལོ་ལྟར། འཛིན་གྲྭ་རིམ་འཕར་བཞིན་འཛིན་རིམ་༢།༣།༤ བཅས་ཀྱི་འཛིན་ཁང་༢ དང༌། འཛིན་ཆས་ཁ་ཚང་བཅས་གསར་བསྒྲུབ་བྱས། ༥། ཕྱི་ལོ་༡༩༨༧ ལོར་བྷེལ་ཇམ་རོགས་ཚོགས་(TDF, Belgium)ནས་གངས་ཅན་བདེ་རྩ་བརྒྱུད་ལོ་ལྟར་འཛིན་གྲྭ་རིམ་འཕར་བཞིན་འཛིན་རིམ་༥།༦།༧ བཅས་ཀྱི་འཛིན་ཁང་༣ དང་འཛིན་ཆས་བཅས་གསར་བཟོ་གནང༌། ༦། ཕྱི་ལོ་༡༩༨༩ ལོའི་ལོ་མཇུག་ལ་བྷེལ་ཇམ་རོགས་ཚོགས་(TDF, Belgium)ནས་གངས་ཅན་བདེ་རྩ་བརྒྱུད་སློབ་གྲྭར་མཁོ་གནད་ཆེ་བའི་ཚོགས་ཁང་དང༌། དཔེ་མཛོད་ཁང༌། ཚན་རིག་བརྟག་དཔྱད་ཁང་བཅས་གསར་རྒྱག་གནང་བ་མ་ཟད། དགོས་ངེས་འཛིན་དངོས་དང་ཡོ་ཆས་གསར་སྒྲུབ་གནང༌། ༧། བལ་ཡུལ་ཧི་མ་ལ་ཡའི་རི་རྒྱུད་མི་མང་རྣམས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་ལ་དོ་སྣང་ཡོད་ཅིང་བོད་རིགས་གཅིག་མཚུངས་ཡིན་སྟབས། ཁོ་ཚོའི་ཕྲུ་གུ་ཚོའི་ཤེས་ཡོན་སློབ་སྦྱོང་ཆེད་སློབ་གྲྭའི་ནང་ཉལ་ཁང་འདང་ངེས་མེད་སྟབས། ཕྱི་ལོ་༡༩༩༤ ལོར་འཇར་མན་ཚོགས་པ་ཞིག་གི་རོགས་རམ་འོག་སློབ་ཕྲུག་ཉལ་ཁང་ཁང་མིག་༡༠ ཅན་ཞིག་གསར་རྒྱག་གནང༌། ༨། ཕྱི་ལོ་༡༩༩༧ ལོར་ཕ་རན་སིའི་བོད་སྐྱོར་རོགས་ཚོགས་(AET)ནས་གློ་སྒྲིག་ལས་ཁུངས་བརྒྱུད་གཏན་སློབ་ནང་ཕྱི་མིའི་སློབ་ཕྲུག་མང་བ་དང༌། ཉལ་ཁང་གི་དཀའ་ངལ་དངོས་འབྲེལ་འཕྲད་སྟབས་ཉལ་ཁང་ཁང་མིག་དྲུག་དང་གསང་སྤྱོད་༦ ཁྲུས་ཁང་༦ བཅས་གསར་བཞེངས་གནང༌། ༩། ཕྱི་ལོ་༡༩༩༦ ལོར་འཇར་མན་གྱི་སྐུ་ཞབས་ཌེ་ཊར་(Mr. Dieter)གྱི་རོགས་རམ་འོག་གཏན་སློབ་ཚོར་གསོལ་ཚིགས་ཁང་གསར་བཞེངས་གནང༌། ༡༠། ཕྱི་ལོ་༡༩༩༨ ལོར་འཇར་མན་གྱི་སྐུ་ཞབས་ཌེ་ཊར་(Mr. Dieter)གྱི་རོགས་རམ་འོག་གཏན་སློབ་ཀྱི་ཐབ་ཚང་དང་གཉེར་ཚང་མཉམ་དུ་གསར་བཞེངས་གནང༌། ༡༡། ཕྱི་ལོ་༢༠༠༩ ཟླ་༡༠ པའི་ནང་སློབ་གྲྭའི་ནང་གཏན་སྡོད་མཐུན་རྐྱེན་རོགས་རམ་ཆེད་འཇར་མན་གྱི་སྐུ་ཞབས་ཀལ་ཀོ་ལི་(Mr. Karl Koelle)དང༌། སྐུ་ཞབས་ཌེ་ཊར་(Mr. Dieter)གཉིས་བརྒྱུད་གཏན་སློབ་ཀྱི་ཐབ་ཚང་རྒྱ་བསྐྱེད་ཀྱིས་མཚོན་ལོ་མང་རིང་མཇུག་སྐྱོང་མ་ཐུབ་པའི་ཉ
ི་འོད་སྤྱི་ཐབ་(Solar kitchen)ཀྱི་མཐུན་རྐྱེན་གསར་འཛུགས་ཀྱིས་མཇུག་སྐྱོང་མཐིལ་ཕྱིན་པ་གནང་བས། གསོལ་ཐབ་གསར་པ་བཀོལ་སྤྱོད་ཀྱིས་གང་ཅིར་སྟབས་བདེ་འཐུས་གཙང་བྱུང༌། ༡༢། ཕྱི་ལོ་༢༠༠༩ ཟླ་༡༠ པའི་ནང་ནེ་དར་ལན་ཌི་གོ་ལ་སྔོག་ཞིབ་ཐེབས་རྩ་(Global Exploration Fundation, Netherland)ཡི་རོགས་རམ་འོག་སློབ་གྲྭ་འདིའི་ཟློས་གར་རོལ་དབྱངས་ཁང་དང་དམིགས་བསལ་འཛིན་ཁང་བཅས་ཆེད་ཁང་མིག་གཉིས་ཅན་ཞིག་གསར་རྒྱག་ཐུབ་པ་བྱུང༌། སློབ་གྲྭ་འདིའི་དཔེ་དེབ་ཀྱི་ཆ་རྐྱེན་ཐད་སློབ་ཕྲུག་ཚོའི་གནས་བབ་དང་བསྟུན་ཏེ་སློབ་དེབ་དང་ཀློག་དེབ་འདྲ་མིན་མཁོ་སྒྲུབ་བྱེད་པ་དང༌། སློབ་དེབ་ནི་གཞི་རྩའི་ཆ་ནས་བོད་གཞུང་ཤེས་རིག་ལས་ཁུངས་ནས་གཏན་འབེབས་གནང་བའི་བོད་ཡིག་སློབ་དེབ་འཛིན་རིམ་དང་པོ་ནས་བདུན་པ་བར་དང༌། གཞན་ཨིན་བལ་གཉིས་ཀྱི་སློབ་དེབ་བལ་ཡུལ་ཤེས་རིག་ལས་ཁུངས་ཀྱིས་གཏན་འབེབས་གནང་ཡོད་པ་དེ་དག་སློབ་ཚན་གྱི་ཁྲིད་གཞི་བྱེད་མུས་ཡིན། འཛིན་རིམ་དང་པོ་ནས་བདུན་པ་བར་གྱི་སློབ་ཕྲུག་ཚོའི་ཆེད་དུ་སློབ་གྲྭའི་ནང་དཔེ་མཛོད་ཁང་ཞིག་དང༌། གཏན་སློབ་ཁང་བུ་དང་བུ་མོའི་ཉལ་ཁང་སོ་སོར་དཔེ་མཛོད་ཁང་ཆུང་ཆུང་རེ་ཡོད་པས། དེའི་ནང་བོད་བལ་ཨིན་གསུམ་གྱི་དཔེ་དེབ་སྣ་འཛོམས་བཀོད་སྒྲིག་བྱས་ཡོད། དེང་སྐབས་སློབ་གྲྭ་འདིའི་ཕྱིའི་མཐུན་རྐྱེན་དུ་འཛིན་གྲྭ་སྔོན་འགྲོ་ནས་འཛིན་རིམ་བདུན་པ་བར་གྱི་འཛིན་ཁང་ཆ་ཚང༌། དཔེ་མཛོད་ཁང་དང༌། ཚན་རིག་སློབ་ཁྲིད་ཁང༌། ཀམ་པུ་ཊར་སྦྱོང་བརྡར་འཛིན་ཁང༌། མཐུན་རྐྱེན་ཐོན་ཁུངས་སྡེ་ཚན། དགེ་ཆེའི་ཡིག་ཚང་དང་རྩིས་ཁང༌། དགེ་རྒན་ལྷན་འཛོམས་ཁང༌། མགྲོན་ཁང༌། སློབ་ཕྲུག་བུའི་ཉལ་ཁངདང༌། བུ་མོའི་ཉལ་ཁང༌། གསོལ་ཚིགས་ཁང༌། སྤྱི་ཐབ། གསང་སྤྱོད་དང་ཁྲུས་ཁང༌། རྩེད་ཐང༌། ལྕགས་རིའི་ཁོར་ཡུག་དང་བཅས་པ་འཛིན་གྲྭའི་གནས་ཚད་དང་འཚམས་པའི་གཞི་རིམ་གྱི་མཐུན་རྐྱེན་ཆ་ཚང་འཛོམས་ཡོད། ཕྱི་ལོ་༢༠༠༩ ལོར་སློབ་གྲྭ་འདིར་སློབ་ཕྲུག་བུ་༨༣ དང༌། བུ་མོ་༨༩ བཅས་༡༧༢ ཡོད་པའི་ཁྲོད། བོད་རིགས་སློབ་ཕྲུག་༧༠ བཅས་ཡོད་ལ། དགེ་རྒན་༡༣ དང༌། ལས་བྱེད་༨ བཅས་ཁྱོན་བསྡོམས་ལས་བྱེད་༢༡ ཡོད།

༣། སློབ་འཇུག་དང་མཐར་ཕྱིན་སློབ་ཕྲུག་གྲངས་འབོར།

བོད་གཞུང་ཤེས་རིག་ལས་ཁུངས་ཀྱི་ཕྱི་ལོ་༢༠༠༧ ཟླ་༡༢ ཚེས་༣༡ ཉིན་གྱི་སྡོམ་ཐོ་ལྟར་ན། ལེགས་བཤད་ཚད་སློབ་གྲྭ་འདིར་སློབ་ཕྲུག་བུ་༡༠༦ དང་བུ་མོ་༡༡༣ བཅས་༢༡༩ ཡོད་པའི་ནང་གཏན་སློབ་གྲངས་༡༡༩ དང༌། ཉིན་སློབ་གྲངས་༡༠༠ ཡོད་ཅིང༌། བོད་རིགས་མ་ཡིན་པའི་སློབ་ཕྲུག་༡༡༦ ཡོད། དགེ་རྒན་༡༡ དང་ལས་བྱེད་༨ བཅས་ཁྱོན་བསྡོམས་དགེ་ལས་༡༩ ཡོད། ཕྱི་ལོ་༡༩༨༩ ནས་ཕྱི་ལོ་༢༠༠༩ བར་འདས་པའི་ལོ་ངོ་༢༡ རིང་སློབ་ཕྲུག་གྲངས་འབོར་གནས་སྟངས་གཤམ་གསལ། ཕྱི་ལོ་༡༩༨༩ ལོ་ནས་བཟུང་ཕྱི་ལོ་༢༠༠༩ བར་འཛིན་གྲྭ་མཐའ་འཁྱོལ་བའི་སློབ་ཕྲུག་ཁྱོན་བསྡོམས་༣༢༥ བྱུང་ཡོད་པ་ལོ་རེའི་ཐོན་གྲངས་གཤམ་གསལ། བལ་ཡུལ་ལེགས་བཤད་ཚལ་དམའ་འབྲིང་སློབ་གྲྭའི་མཐར་ཕྱིན་ཕྲུག་གྲངས་རེའུ་མིག

༤། ཤེས་ཡོན་སྲིད་བྱུས་ལག་བསྟར།

བལ་ཡུལ་ནང་ཐོག་མར་སློབ་གྲྭ་གསར་འཛུགས་གནང་དུས་ནས་རྩ་བའི་ྋསྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གིས་བཙན་བྱོལ་བོད་མིའི་སློབ་གྲྭ་སྤྱི་ཁྱབ་ལ་སྩལ་བའི་བཀའ་སློབ་ལམ་སྟོན་གྱི་དགོངས་དོན་སྙིང་བཅངས་ཀྱིས། སློབ་གྲྭ་འདི་ཉིད་ཟུར་དུ་འཛུགས་དགོས་དོན་ཡང་བོད་མིའི་ཐུན་མིན་སྐད་ཡིག་གིས་གཙོས་པའི་ཆོས་དང་རིག་གཞུང་གོམས་གཤིས་བཟང་པོ་མི་ཉམས་རྒྱུན་འཛིན་གནང་རྒྱུ་དོན་གྱི་སྙིང་པོ་ཡིན་པས། ཡུལ་དུས་གནས་བབ་དང་མཐུན་པའི་སློབ་ཚན་དང་སློབ་དེབ་བསྐྱར་ཞིབ་རིམ་པ་ལག་བསྟར་གནང་ཡོད། འོན་ཀྱང༌། བློ་ཕམ་པ་ཞིག་ལ། ཕྱི་ལོ་༢༠༠༤ ལོར་གཏན་འབེབས་གནང་བའི་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ནི་ད་བར་སློབ་གྲྭ་འདིར་ལག་བསྟར་ཆ་ཚང་ཞིག་བྱུང་ཐུབ་མེད། རྒྱུ་མཚན་ནི་གནས་ཡུལ་རྒྱལ་ཁབ་ཀྱི་དམིགས་བསལ་ཁོར་ཡུག་འོག་བོད་མིའི་སློབ་གྲྭ་སྤྱི་ཁྱབ་ལ་བྱུང་བའི་དཀའ་ངལ་ཞིག་ཡིན། འོན་ཀྱང༌། ཤེས་ཡོན་སྲིད་བྱུས་ནང་ཤེས་ཡོན་ལམ་ལུགས་དང་སྒྲོམ་གཞི་ལས་ཤེས་ཡོན་གྱི་ངོས་འཛིན་དང༌། ལྟ་སྟངས། གདེང་འཇོག ལག་བསྟར་གནང་ཕྱོགས་བཅས་གལ་ཆེན་ཡིན་པ་མངོན་གསལ་ལྟར། ཉེ་བའི་ལོ་བཅུའི་ནང༌། བོད་གཞུང་ཤེས་རིག་ལས་ཁུངས་ནས་རྒྱ་གར་དང་བལ་ཡུལ་གཉིས་ཀར་སྔོན་འགྲོ་དང་གཞི་རིམ་འོག་མའི་དགེ་རྒན་ཟབ་སྦྱོང་རིམ་པ་གོ་སྒྲིག་འཛུགས་སྐྱོང་གནང་བ་མ་ཟད། ལྷག་པར་ཕྱི་ལོ་༢༠༠༦།༠༧ ལོར་བལ་ཡུལ་སློབ་གྲྭའི་འགོ་ལས་རྣམས་བཞུགས་སྒར་དྷ་སར་བསྡུ་སྐོང་གིས་དཔལ་ལྡན་བཀའ་ཁྲི་མཁས་དབང་ཟམ་གདོང་རིན་པོ་ཆེས་གཙོས་པའི་དབུ་འཁྲིད་དང་མཁས་དབང་རྣམ་པས་སྲིད་བྱུས་སྐོར་ཟབ་ཁྲིད་བཀའ་སློབ་ཞིབ་རྒྱས་གནང་བའི་དགོངས་དོན་ལྟར། སློབ་གྲྭའི་ནང་ཁུལ་སྲིད་བྱུས་དགོངས་དོན་བགྲོ་གླེང་ཞིབ་རྒྱས་ངང་དགེ་རྒན་རང་ངོས་ནས་ལག་བསྟར་གང་ཐུབ་ཞུ་མུས་ཡིན།

༥། གཞུང་འབྲེལ་འཚམས་གཟིགས་སྐོར།

ལེགས་བཤད་ཚལ་སློབ་གྲྭ་འགོ་བཙུགས་པ་ནས་ད་ལྟའི་བར་བཙན་བྱོལ་བོད་གཞུང་ནས་དགོངས་བཞེས་ཟབ་མོ་གནང་སྟེ། སློབ་ཕྲུག་ཚོའི་ཤེས་ཡོན་འཕེལ་རྒྱས་འབྱུང་ཐབས་ལ་དམིགས་ཏེ་གཟིགས་སྐོར་དུ་ཕེབས་པ་དང༌། བཀའ་སློབ་ལམ་སྟོན་རིམ་པར་གནང་མཁན་ཨ་མ་རྗེ་བཙུན་པདྨ་མཆོག་དང༌། ཤེས་རིག་བཀའ་བློན་ཟུར་བ་རིན་ཆེན་མཁའ་འགྲོ། ད་ལྟའི་ཤེས་རིག་བཀའ་བློན་ཐུབ་བསྟན་ལུང་རིགས་མཆོག སྐབས་སོ་སོའི་བོད་མི་མང་སྤྱི་འཐུས་ཁག གངས་ཅན་བདེ་རྩའི་འགན་འཛིན་འཕྲིན་ལས་རྣམ་རྒྱལ། བྷེལ་ལྗམ་ཊིཌིཨེཕ་རོགས་ཚོགས་ཀྱི་ཨ་མ་ཁིརིསིཊེན་ཝར་སྦག་ལགས་སོགས་ཀྱིས་ཤེས་ཡོན་གོང་འཕེལ་གཏོང་རྒྱུའི་ཐད་ལ་བཀའ་སློབ་ཟབ་མོ་རིམ་པར་བསྩལ་བ་ལ་བརྟེན་ནས་སློབ་ཕྲུག་ཚོར་ཕན་འབྲས་གང་ལེགས་ཐོབ་ཡོད།

འཇོ་ཁེལ་ཨ་ཏི་ཤ་ཉིན་སློབ།

དཀར་ཆག

༡། ཐོག་མར་འགོ་འཛུགས།
༢། མཐུན་རྐྱེན་འཛུགས་སྐྲུན།
༣། སློབ་ཕྲུག་གྲངས་འབོར།
༤། ཤེས་ཡོན་སྲིད་བྱུས་ལག་བསྟར།
༥། ཡིག་རྒྱུགས་གནས་སྟངས།

༡། ཐོག་མར་འགོ་འཛུགས།

འཇོ་ཁེལ་ཨ་ཏི་ཤ་ཉིན་མོ་སློབ་གྲྭ་འདི་ནི། བལ་ཡུལ་གྱི་རྒྱལ་ས་ཀ་ཐུ་མན་གྲུ་ཉེ་ཁུལ་ཇོ་ལ་ཁེལ་བསམ་གྲུབ་གླིང་བོད་མིའི་གཞིས་ཆགས་ཁོངས་སུ་ཆགས་ཡོད་ཅིང༌། སློབ་གྲྭ་དེ་ཐོག་མར་ཕྱི་ལོ་༡༩༨༤ ཟླ་༣ ཚེས་༥ ཉིན་འགོ་འཛུགས་གནང༌། སྐབས་དེའི་དུས་སུ་སློབ་ཕྲུག་གྲངས་༡༣༢ དང་དགེ་ལས་གྲངས་༧ ཡོད། ཕྱི་ལོ་༢༠༠༨ ལོར་ཁྱོན་བསྡོམས་སློབ་ཕྲུག་གྲངས་༧༨ དང༌། དགེ་ལས་༡༡ བཅས་ཡོད།

༢། མཐུན་རྐྱེན་འཛུགས་སྐྲུན།

ཐོག་མར་སློབ་གྲྭ་ཆགས་སྟངས་ནི་འཇོ་ཁེལ་བསམ་གྲུབ་གླིང་གཞིས་ཁོངས་སུ་ཕྱི་ལོ་༡༩༦༠ ལོ་ནས་ཉིན་མོའི་སློབ་གྲྭ་ཞིག་ཡོད་པ་ཕྱི་ལོ་༡༩༧༤ ནས་བཟུང་བལ་ཡུལ་གཞུང་ནས་ཤེས་ཡོན་སྲིད་བྱུས་གསར་པ་ཞིག་ཕྱག་བསྟར་གནང་སྟེ་སྒེར་པའི་སློབ་གྲྭ་ཚང་མ་གཞུང་བཞེས་གནང་བས། འཇོ་ཁེལ་ཉེ་འགྲམ་གྱི་སློབ་གྲྭ་ཆུང་ཆུང་ཚང་མ་ཟླ་བསྒྲིལ་གྱིས་གཞུང་འཛིན་གནང་བའི་རྐྱེན་གྱིས་རང་རིགས་ཀྱི་སློབ་གྲྭའི་ནང་ཡུལ་མིའི་སློབ་ཕྲུག་མང་དག་ཅིག་སླེབས་ཏེ་བོད་ཕྲུག་རྣམས་གྲངས་ཉུང་དུ་གྱུར། རིམ་བཞིན་ཡུལ་མིའི་དགེ་ལས་མང་དུ་ཕྱིན་པ་དང་ཆབས་ཅིག་འཛིན་སྐྱོང་ཡང་ཡུལ་མིའི་ལག་ཏུ་ཤོར་ཏེ། སྐབས་དེར་སྔ་དགོང་ཙམ་མ་གཏོགས་ཉིན་མོར་ཡུལ་མིའི་སློབ་གྲྭར་གྱུར་ཡོད།
ལོ་ཤས་རྗེས་ཕྱི་ལོ་༡༩༧༩ ལོར་བལ་ཡུལ་གཞུང་ནས་སློབ་གྲྭ་བདག་གཉེར་བྱེད་རྒྱུར་དཀའ་ངལ་འཕྲད་རྐྱེན། སྔར་གྱི་སྒེར་གཉེར་སློབ་གྲྭ་རྣམས་རང་འཇགས་སྒེར་གཉེར་བྱེད་ཆོག་པའི་ལམ་སྲོལ་གསར་གཏོད་གནང་མོད། འོན་ཀྱང༌། སློབ་ཕྲུག་དང་དགེ་རྒན་ལས་བྱེད་གང་ཅིའི་ཐད་བོད་རིགས་གྲངས་ཉུང་དུ་གྱུར་ཟིན་པར་བརྟེན་སློབ་གྲྭ་རྩིས་ལེན་མ་ཐུབ་པས། བོད་མིའི་སློབ་ཕྲུག་ཚོ་སློབ་གྲྭ་དེར་མུ་མཐུད་སློབ་གཉེར་མི་བྱ་ཐབས་མེད་བྱུང༌། དེ་ནས་དུས་ཡུན་གང་འཚམས་ཕྱིན་རྗེས། བོད་ཕྲུག་ཚོའི་ཤེས་ཚད་ཀྱང་རིམ་གྱིས་ཉམས་རྒུད་ཕྱིན་སྟབས་བོད་གཞུང་བལ་ཡུལ་སྐུ་ཚབ་དོན་གཅོད་དང༌། ཤེས་རིག་ལས་འཛིན། གངས་ཅན་བདེ་རྩའི་དྲུང་ཆེ། བཟོ་གཞིས་སྐུ་ངོ་བཅས་གནད་ཡོད་མི་སྣ་ཁག་ཅིག་ལྷན་འཛོམས་ཀྱིས་བོད་ཕྲུག་ཚོ་དེ་ལྟར་བཞག་ན་འགྲིགས་ཐབས་མེད་པར་གཟིགས་ཏེ། བོད་མིའི་སློབ་གྲྭ་ཞིག་ཟུར་འཛུགས་གནང་རྒྱུའི་ཐུགས་ཐག་བཅད་པ་དང་སྦྲགས། དཔལ་འབྱོར་གྱི་མཐུན་རྐྱེན་དང་འགྲོ་གྲོན་སོགས་འཆར་གཞི་ཞིབ་ཚགས་གནང་བ་གཞིར་བཟུང་ཨ་ཏི་ཤ་སློབ་གྲྭ་འདི་ཉིད་ཕྱི་ལོ་༡༩༨༤ ལོར་ནས་བལ་གཞུང་ཤེས་རིག་ལས་ཁུངས་སུ་ཁྲིམས་མཐུན་དེབ་སྐྱེལ་གྱིས་ཐོག་མར་དབུ་འཛུགས་གནང༌། དེ་དུས་སློབ་ཕྲུག་གྲངས་༡༣༢ དང་དགེ་ལས་༧ ཡོད་ནའང༌། འཛིན་ཁང་ལོགས་སུ་མེད་པའི་རྐྱེན་གྱིས་ལོ་གཅིག་རིང་ཁང་གླའི་ཐོག་སློབ་གྲྭ་འགོ་འཛུགས་གནང་ཡོད།
དེ་ནས་རྒྱུན་བསྲིངས་ནས་འཇོ་ཁེལ་བསམ་གྲུབ་གླིང་གཞིས་ཆགས་ནས་ས་ཆ་སྔ་གཡར་གནང་སྟེ། ཐོག་མར་ཁང་མིག་༦ གི་ཨར་ལས་འགོ་བཙུགས་ཀྱིས་ཕྱི་ལོ་༡༩༨༥ ལོར་སློབ་ཁང་གསར་པའི་ནང་གནས་སྤོས་ཐུབ་པ་བྱུང༌། དེ་དུས་སློབ་གྲྭ་དེར་སྔོན་འགྲོ་གོང་འོག་ནས་འཛིན་རིམ་གཉིས་པ་བར་ཡོད། རིམ་བཞིན་སློབ་ཕྲུག་གི་གྲངས་འབོར་མང་དུ་ཕྱིན་པ་མ་ཟད། འཛིན་རིམ་ཡང་སྤར་ཆ་བྱུང་སྟབས་འཛིན་ཆས་གསར་བཟོ་དང་འཛིན་ཁང་ཁང་མིག་༣ ཅན་ཞིག་འཇོ་ཁེལ་བཟོ་གྲྭའི་ཁང་པ་རྒྱག་སྐབས་འཇར་མན་སྒོར་༡༠༠༠༠ ཐམ་པ་རོགས་རམ་བྱུང༌།
ཕྱི་ལོ་༡༩༩༡ ལོར་སྔར་ཡོད་འཛིན་ཁང་ཁང་མིག་༦ ཅན་དེའི་ཐོག་སློབ་གྲྭར་རྒྱུན་མཁོ་ཡོད་པའི་ཚོགས་ཁང་ཞིག་གསར་རྒྱག་གནང་ཡོད། ཕྱི་ལོ་༡༩༩༤ ལོར་སློབ་ཕྲུག་ལྡབ་འཕར་བྱུང་སྟེ་འཛིན་ཁང་གི་དཀའ་ངལ་འཕྲད་རྐྱེན་ཁང་མིག་༥ ཅན་གྱི་ཁང་པ་ཞིག་གསར་རྒྱག་གནང་བས་ད་ཆ་འཛིན་ཁང༌། དཔེ་མཛོད། སློབ་གྲྭའི་ལས་ཁུངས། ལས་བྱེད་ཚོགས་ཁང༌། རྩེད་ཆས་འཁྲབ་ཆས་སོགས་འཇོག་སའི་མཛོད་ཁང་སོགས་གང་ཅིའི་ཐད་མཐུན་རྐྱེན་འདང་ངེས་ཡོད།
ཕྱི་ལོ་༡༩༩༩ ལོར་སྔར་ཡོད་འཛིན་ཆས་རྣམས་རྙིང་གོག་སྐུལ་ཟད་དུ་སོང་རྐྱེན་འཛིན་ཆོས་ཆ་ཚང་བསྐྱར་གསོ་གནང༌། ཕྱི་ལོ་༢༠༠༡ ལོ་ནས་ཀམ་པུར་ཊར་ཚུགས་ཡུལ་མེད་རྐྱེན་འཇོ་ཁེལ་བཟོ་གཞིས་འགོ་འཛིན་ལ་དཀའ་ངལ་ཞུས་འབྲས་སུ་བཟོ་གྲྭ་ནས་ཁང་མིག་ཆེན་པོ་ཞིག་སྔ་གཡར་གནང་ནས་ཀམ་པར་ཊར་སློབ་རྒྱུའི་སྡེ་ཚན་གསར་པ་ཞིག་འཛིན་གྲྭ་གསུམ་པ་ནས་འགོ་འཛུགས་གནང༌། ད་ཆ་སློབ་ཕྲུག་གི་ཆེད་ཀམ་པུ་ཊར་གྲངས་༡༨ ཡོད།
སློབ་གྲྭ་འདིའི་ནང་སློབ་དེབ་དང་དཔེ་དེབ་ཀྱི་གནས་སྟངས་གང་ལེགས་ཡོད། དཔེ་མཛོད་ལ་མཚོན་ན་སློབ་གྲྭ་འགོ་ཚུགས་སྐབས་དཔེ་མཛོད་ནང་བོད་ཡིག་དང་ཨིན་ཡིག་གི་དེབ་ཁྱོན་བསྡོམས་༥༠༠ ལྷག་ཡོད་པ་དང༌། ད་ཆ་དཔེ་མཛོད་ནང་དཔེ་དེབ་གསར་རྙིང་བསྡོམས་པའི་གྲངས་༡༥༠༠ ལྷག་ཡོད།
ཕྱི་ལོ་༢༠༠༩ ལོར་ཨ་ཏི་ཤ་སློབ་གྲྭའི་ནང་སློབ་ཕྲུག་བུ་༣༣ དང་བུ་མོ་༤༣ བཅས་༧༦ ཡོད། དགེ་ལས་༡༢ ཡོད་པའི་ཁོངས་སུ་བོད་རིགས་༩ ཡོད།

༣། སློབ་ཕྲུག་གྲངས་འབོར།

ཕྱི་ལོ་༢༠༠༧ ཟླ་༡༢ ཚེས་༣༡ ཉིན་བོད་གཞུང་ཤེས་རིག་ལས་ཁུངས་ཀྱི་སྡོམ་ཐོ་ལྟར་ན། རྣམ་རྒྱལ་མཐོ་སློབ་ཏུ་སློབ་ཕྲུག་བུ་༣༤ དང་བུ་མོ་༥༤ བཅས་ཁྱོན་བསྡོམས་༨༨ ཡོད་པ་ཚང་མ་ཉིན་སློབ་ཡིན་ཞིང༌། བོད་རིགས་མ་ཡིན་པའི་སློབ་ཕྲུག་༣ ཡོད། དགེ་རྒན་༩ དང་ལས་བྱེད་༣ བཅས་ཁྱོན་བསྡོམས་དགེ་ལས་༡༢ ཡོད།
འཇོ་ཁེལ་ཨ་ཏི་ཤ་སློབ་གྲྭ་འདི་ཉིད་འགོ་ཚུགས་པ་ནས་བཟུང་ཕྱི་ལོ་༢༠༠༩ བར་འདས་པའི་ལོ་ངོ་༢༡ རིང་གི་སློབ་ཕྲུག་གྲངས་འབོར་འཕར་ཆག་གི་གནས་སྟངས་གཤམ་གསལ།

༤། ཤེས་ཡོན་སྲིད་བྱུས་ལག་བསྟར།

ཕྱི་ལོ་༢༠༠༥ ཟླ་༥ པའི་ནང་བོད་གཞུང་ཤེས་རིག་ལས་ཁུངས་ནས་བཞུགས་སྒར་རྡ་སར་གོ་སྒྲིག་གནང་བའི་རྒྱ་བལ་འབྲུག་གསུམ་གྱི་སློབ་གྲྭ་ཁག་གི་འགན་འཛིན་དང་སློབ་སྤྱི་རྣམ་པ་ལྷན་འཛོམས་སྐབས། དཔལ་ལྡན་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་ནས་ཤེས་ཡོན་སྲིད་བྱུས་ཀྱི་དོན་ཚན་རྣམས་སློབ་གྲྭ་ཁག་ཏུ་ཕྱག་བསྟར་ཕྱོགས་དང་ཤེས་ཡོན་སྲིད་བྱུས་ཀྱི་ནང་དོན་འགྲེལ་བརྗོད་དང་སྦྲགས་ལག་བསྟར་དགོས་པའི་བཀའ་བསྐུལ་གནང་དོན་བཞིན། འཇོ་ཁེལ་སློབ་གྲྭའི་འཛིན་སྐྱོང་ངོས་ནས་ཀྱང་བལ་ཡུལ་དུ་དུས་སྟོན་དང་ཚོགས་འདུ་སོགས་མི་མང་འདུ་འཛོམས་སོགས་ཀྱི་གོ་སྐབས་དམ་འཛིན་གྱིས་ཕྲུ་གུའི་ཕ་མས་གཙོས་པའི་མི་མང་ལ་ཤེས་ཡོན་སྲིད་བྱུས་ཀྱི་དགོས་དམིགས་དང་ལག་བསྟར་བྱེད་ཕྱོགས་སྐོར་འགྲེལ་བརྗོད་དང་དྲིལ་བསྒྲགས་བྱས་ཡོད་ལ། ད་ཆ་སློབ་མའི་ལོ་ཚད་ལ་དཔགས་པའི་གྲུབ་འབྲས་མི་དམན་ཙམ་བྱུང་བའི་ཉམས་ཚོར་བྱུང༌།
བལ་ཡུལ་སློབ་ཁག་རྣམས་གངས་ཅན་བདེ་རྩ་ཐེབས་རྩ་ཚོགས་པའི་གཟིགས་སྐྱོང་འོག་ཟུར་སྐྱོང་ངང་ཡོད་པས། བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་གཏན་འབེབས་གནང་རྗེས། སློབ་ཁག་སོ་སོས་ཟབ་སྦྱོང་དང་ཚོགས་འདུ། བགྲོ་གླེང་སོགས་ཀྱི་བརྒྱུད་ལམ་ལ་བརྟེན་ནས་སྲིད་བྱུས་ཀྱི་དགོངས་དོན་སློབ་སྦྱོང་དང་གོ་རྟོགས་གོང་འཕེལ་བཏང་སྟེ། གནས་ཡུལ་རྒྱལ་ཁབ་ཀྱི་དམིགས་བསལ་གནས་སྟངས་འོག་ཤེས་ཡོན་སྲིད་བྱུས་ལག་བསྟར་གང་ཐུབ་ཞུ་བཞིན་ཡོད། འཇོ་ཁེལ་སློབ་གྲྭ་འདིས་འདས་པའི་ལོ་དུ་མའི་རིང་སྲིད་བྱུས་ལག་བསྟར་གནང་བའི་ཉམས་མྱོང་དང་གྲུབ་འབྲས་བྱུང་རིམ་མདོར་ཙམ་བརྗོད་ན།
སྤྱིར་ཤེས་ཡོན་སློབ་སྦྱོང་གི་སྒྲོམ་གཞི་སྔར་བཞིན་ཡིན་ན་ཡང་ཕ་མ་དང་སློབ་ཕྲུག་གཉིས་ཀའི་ངོས་ནས་དེ་སྔ་དང་བསྡུར་ན་ཤེས་ཡོན་སློབ་སྦྱོང་གི་དམིགས་བསལ་དགེ་ཕན་དང་དམིགས་ཡུལ་འཛིན་སྟངས་ལ་ཁྱད་པར་གང་འཚམས་ཤིག་བྱུང་ཡོད། དེ་སྔ་ཡིན་ན་འབྲེལ་ཡོད་ཕ་མ་དང་སྤྱི་ཚོགས་ཁྲོད་ཤེས་ཡོན་སློབ་སྦྱོང་ནི་དོ་བདག་རང་ཉིད་ཀྱི་ལྟོ་གོས་ཁོ་ནའི་གནད་དོན་ཞིག་དང༌། དེའི་ཆེད་ཕྱི་མི་རིགས་ཁག་ལ་འབྲེལ་ལམ་བྱ་རྒྱུ་དང༌། ཕྱིའི་རྒྱལ་ཡུལ་ཁག་ཏུ་འགྲོ་བསྐྱོད་ཐུབ་པའི་ལག་ཆ་ལྟ་བུར་ངོས་འཛིན་བྱེད་མཁན་མང་པོ་ཡོད་ནའང༌། དེང་སྐབས་མི་མང་པོ་ཞིག་གིས་ཤེས་ཡོན་སློབ་སྦྱོང་གི་དགོས་དམིགས་ནི་ལྟོ་གོས་གཏམ་གསུམ་འཚོལ་རྒྱུ་ཁོ་ནའི་ཆེད་མ་ཡིན་པར། མིའི་རྣམ་འབྱེད་ཀྱི་ཤེས་རབ་སད་རྫོགས་སྨིན་གསུམ་བྱས་པ་བརྒྱུད་ནུས་རྩལ་དང་གཤིས་སྤྱོད་གོང་འཕེལ་གཏོང་བ་དང༌། རང་དབང་དང༌། གཞན་ཕན། གསར་གཏོད། རྒྱུན་འཛིན་བཅས་ཀྱི་ཁྱད་ཆོས་ལྡན་པའི་བོད་མི་ཚད་ལྡན་ཞིག་བསྐྱེད་བསྲིང་བྱ་གལ་ཆེ་བ་གོ་རྟོགས་བྱུང་སྟེ། རང་རེའི་གཞི་རིམ་ཤེས་ཡོན་སྲིད་བྱུས་ཀྱི་དགོངས་དོན་ཐོག་ངེས་པ་རྙེད་དེ་རྒྱབ་སྐྱོར་གནང་མཁན་ཉིན་བཞིན་ཇེ་མང་དུ་འགྲོ་མུས་ཡིན།

༥། ཡིག་རྒྱུགས་གནས་སྟངས།

སློབ་གྲྭ་སོ་སོར་དུས་ནས་དུས་སུ་གཞུང་འབྲེལ་མི་སྣ་གཟིགས་བསྐོར་རིམ་ཕེབས་རྣམས་ཀྱིས་ཐུགས་བརྩེ་ཆེན་པོས་སློབ་གྲྭ་འདིའི་སློབ་ཕྲུག་ཚོར་མ་འོངས་མདུན་ལམ་དང་མི་ཚེའི་དོན་སྙིང༌། ཤེས་ཡོན་དང་བཟང་སྤྱོད། གནའ་དེང་གི་རིག་གཞུང༌། མི་རིགས་ཀྱི་གནས་སྟངས། ན་གཞོན་ཚོའི་ལས་འགན། རྒྱལ་སྤྱིའི་གནས་བབ་སོགས་ཀྱི་ཐོག་བཀའ་སློབ་ལམ་སྟོན་ཟབ་རྒྱས་གནང་ཡོད།
འདས་པའི་ལོ་ངོ་༢༥ ནང༌། སློབ་གྲྭ་འདི་ཉིད་གནས་ཡུལ་དང་གཞི་རིམ་ཆ་རྐྱེན་ལ་དཔགས་པའི་ཤེས་ཡོན་སློབ་སྦྱོང་གི་གྲུབ་འབྲས་གང་ལེགས་ཐོན་ཡོད། གཤམ་དུ་སློབ་གྲྭའི་ལོ་དུས་སོ་སོར་ཡིག་རྒྱུགས་གྲུབ་འབྲས།
འཇོ་ཁེལ་ཨ་ཏི་ཤ་བོད་མིའི་སློབ་གྲྭའི་ལོ་དུས་སོ་སོར་ཡིག་རྒྱུགས་གྲུབ་འབྲས།

དཔལ་དབྱངས་ཅན་ལྷ་མོ་ཉིན་སློབ།

དཀར་ཆག

༡། འགོ་འཛུགས
༢། མཐུན་རྐྱེན་འཛུགས་སྐྲུན།
༣། སློབ་འཇུག་དང་ཤེས་ཡོན་གནས་སྟངས།

༡། འགོ་འཛུགས།

བལ་ཡུལ་ཀ་ཐ་མན་གྲུ་ནས་བྱང་ཕྱོགས་ཀི་ལོ་མི་ཊར་༡༠༠ ནང་ཚུད་ཡོད་པའི་སོ་ལུ་ཁུམ་བུ་ས་ཁུལ་གྱི་གློ་ཚེ་རོག་རྣམ་རྒྱལ་གླིང་བོད་གཞིས་ཀྱི་དཔལ་དབྱངས་ཅན་ལྷ་མོ་ཉིན་སློབ་ནི། ཕྱི་ལོ་༡༩༨༩ ཟླ་༣ ཚེས་༢༠ ཉིན་གསར་འཛུགས་གནང༌། སྐབས་དེར་སློབ་གྲྭ་དེར་ཁྱོན་བསྡོམས་སློབ་ཕྲུག་གྲངས་༢༠ དང༌། དགེ་ལས་གྲངས་༤ བཅས་ཡོད།
ཕྱི་ལོ་༢༠༠༨ ལོར་ཁྱོན་བསྡོམས་སློབ་ཕྲུག་གྲངས་༤༦ དང་དགེ་ལས་གྲངས་༥ བཅས་ཡོད།

༢། མཐུན་རྐྱེན་འཛུགས་སྐྲུན།

ཐོག་མ་སློབ་གྲྭའི་ཆགས་སྟངས་ནི་གཞིས་ཆགས་ཀྱི་ས་ཁོངས་སུ་སི་ཝི་ཌན་རོགས་ཚོགས་ཨཡེ་ཨེམ་གྲརྒྱགྱི་རོགས་རམ་འོག་སློབ་གྲྭའི་ཨར་ལས་འགོ་འཛུགས་ཀྱིས། རྨང་གཞིའི་ཨར་ལས་ཡུལ་མིར་བོགས་མར་བཏང་བ་དང༌། ཨར་འདམ་དང་སོ་ཕག་རྣམས་ཉེ་འཁོར་ཡུལ་མིས་གླ་མེད་འོར་འདྲེན་བྱས་ཏེ་སློབ་ཁང་འཛུགས་སྐྲུན་བྱས། དཔེ་མཛོད་ཁང་དང་འཛིན་ཁང༌། རྒྱུན་མཁོའི་ཆ་རྐྱེན་ཚང་མ་ད་ལྟ་གང་འཚམས་ཡར་རྒྱས་སོང་ཡོད།
སློབ་གྲྭ་འགོ་ཚུགས་པ་ནས་བཟུང་འཛིན་རིམ་བཞི་པ་མཐར་ཕྱིན་པའི་སློབ་ཕྲུག་གྲངས་༡༠༩ བྱུང་ཡོད། དེང་སྐབས་སློབ་གྲྭ་འདིའི་དགེ་ཆེ་དབང་འདུས་ཚེ་རིང་ལགས་ཡིན།
ཕྱི་ལོ་༢༠༠༩ ལོར་སློབ་གྲྭ་འདིར་ཁྱོན་བསྡོམས་སློབ་ཕྲུག་བུ་༡༩ དང་བུ་མོ་༣༠ བཅས་བསྡོམས་༤༩ ཡོད་པའི་ཁྲོད། བོད་རིགས་སློབ་ཕྲུག་༣༡ ཡོད། དེ་བཞིན་དགེ་རྒན་སྐྱེས་པ་༣ དང་བུད་མེད་༣ བཅས་༦ ཡོད་པ་ཚང་མ་བོད་རིགས་ཡིན།

༣། སློབ་འཇུག་དང་ཤེས་ཡོན་གནས་སྟངས།

ཕྱི་ལོ་༢༠༠༧ ཟླ་༡༢ ཚེས་༣༡ ཉིན་བོད་གཞུང་ཤེས་རིག་ལས་ཁུངས་ཀྱི་སྡོམ་ཐོ་ལྟར་ན། ལོ་དེར་གློ་ཚེ་རོག་ཉིན་སློབ་འདིར་སློབ་ཕྲུག་བུ་༢༡ དང་བུ་མོ་༢༥ བཅས་ཁྱོན་བསྡོམས་༤༦ ཡོད་པ་ཚང་མ་ཉིན་སློབ་ཡིན་ཞིང༌། བོད་རིགས་མ་ཡིན་པའི་སློབ་ཕྲུག་༡༢ ཡོད། དགེ་རྒན་༥ དང་ལས་བྱེད་༡ བཅས་ཁྱོན་བསྡོམས་དགེ་ལས་༦ ཡོད།
སློབ་གྲྭ་འདིའི་ཕྱི་ལོ་༡༩༨༩ ལོ་ནས་༢༠༠༩ བར་འདས་པའི་ལོ་ངོ་༢༡ རིང་གི་སློབ་ཕྲུག་གྲངས་འབོར་འཕར་ཆག་རིམ་བྱུང་གི་གནས་སྟངས་གཤམ་གསལ།
ཐོག་མར་སློབ་གྲྭ་འགོ་ཚུགས་སྐབས་འཛིན་རིམ་གཉིས་པ་ལས་མེད་ཀྱང༌། ད་ལྟ་སྔོན་འགྲོ་ནས་འཛིན་རིམ་བཞི་པ་བར་ཡོད་ཅིང༌། བསླབ་བྱའི་རིག་ཚན་ཡང་བོད་ཀྱི་སྐད་ཡིག་དང༌། ཨིན་ཡིག བལ་པོའི་སྐད་ཡིག ཨང་རྩིས། ཚན་རིག་བཅས་ཀྱི་ཐོག་རི་མོ་དང༌། ཟློས་གར། ལུས་རྩལ། ལག་ཤེས་ཕྲན་ཚགས་བཅས་ཀྱི་སློབ་ཚན་གོ་སྒྲིག་གནང་ཡོད་ལ། འདས་པའི་ལོ་ངོ་དུ་མའི་རིང་སློབ་གྲྭ་འདི་ནས་ཐོན་པའི་སློབ་མ་རྣམས་སྤོག་ར་དང་ཁ་ཐ་མན་གྲུ་ས་ཁུལ་སློབ་ཁག་ནང་སློབ་ཞུགས་བྱས་དང་བྱེད་མུས་ཡིན།
དཔལ་དབྱངས་ཅན་ལྷ་མོ་ཉིན་སློབ་འདིའི་འདས་པའི་ལོ་ངོ་ལོ་༡༠ རིང་སློབ་ཕྲུག་སྤྱི་ཡོངས་ཀྱི་ལོ་འཁོར་ཡིག་རྒྱུགས་གནས་སྟངས་བཀོད་པ་གཤམ་གསལ།
དཔལ་དབྱངས་ཅན་ལྷ་མོ་ཉིན་སློབ་ཀྱི་འདས་པའི་ལོ་ངོ་ལོ་༡༠ རིང་སློབ་ཕྲུག་སྤྱི་ཡོངས་ཀྱི་ལོ་འཁོར་ཡིག་རྒྱུགས་གནས་སྟངས་རེའུ་མིག

སློབ་གྲྭ་འདིར་དུས་ནས་དུས་སུ་བལ་ཡུལ་གངས་ཅན་བདེ་རྩའི་ལས་བྱེད་ཀྱིས་གཙོས་པའི་གནད་ཡོད་མི་སྣ་གཟིགས་སྐོར་ཕེབས་སྐབས་བཀའ་སློབ་དོན་ཕན་ལྡན་པ་གནང་བར་དགེ་ལས་སློབ་ཕྲུག་ཡོངས་ཀྱིས་ཤེས་ཡོན་ཡར་རྒྱས་ཡོང་ཐབས་སྐོར་གྱི་བཀའ་སློབ་གཞིར་བཟུང་འབད་བརྩོན་ཞུ་མུས་ཡིན། སློབ་གྲྭ་འདི་རྙིང་པ་མིན་རྐྱེན་བལ་གཞུང་ཤེས་རིག་གསར་བརྗེའི་སྐབས་གྱོང་གུན་སོགས་གང་ཡང་བྱུང་མེད་པ་དང༌། དེང་སྐབས་སྒེར་གྱི་སློབ་གྲྭའི་མིང་ཐོག་ཡར་རྒྱས་གཏོང་མུས་ཡིན།

མ་ནང་བློ་འཕེལ་གླིང་སློབ་གྲྭ།

དཀར་ཆག

༡། འགོ་འཛུགས
༢། མཐུན་རྐྱེན་འཛུགས་སྐྲུན།
༣། སློབ་འཇུག་དང་ཤེས་ཡོན་གནས་སྟངས།
༤། གཞུང་འབྲེལ་འཚམས་གཟིགས།

༡། འགོ་འཛུགས།

བལ་ཡུལ་མ་ནང་སྙེ་ཤངརྫོང་ནང་བོད་མི་ཉུང་ཤས་ལས་མེད་སྟབས་སློབ་གྲྭ་དམིགས་བསལ་ཟུར་དུ་མི་དགོས་པར་ས་གནས་བོད་ཕྲུག་རྣམས་བལ་ཡུལ་ཤར་ཁུམ་གངས་ཇོ་མོ་གླང་མ་སློབ་གྲྭ་དང་སྤོག་ར་གངས་ཏི་སི་སློབ་གྲྭ་བཅས་སུ་གཏོང་བཞིན་ཡོད་པས་ཕ་མ་དང་ཕྲུ་གུ་ཚང་མ་ལ་དཀའ་ངལ་གང་མང་ཞིག་འཕྲད་མུས་ལ་བརྟེན། ྋགོང་ས་ྋསྐྱབས་མགོན་ཆེན་པོ་མཆོག་གི་ྋསྐྱབས་འོག་བལ་ཡུལ་དོན་གཅོད་ཁང་གི་དགོངས་གཞི་ལྟར་ཕྱི་ལོ་༡༩༩༥ ལོར་མ་ནང་ཁུལ་དུ་སློབ་གྲྭ་གསར་འཛུགས་ཀྱི་དགོངས་བཞེས་གནང་བ་བཞིན་མ་ནང་ས་གནས་ཡུལ་མི་དང་དཔོན་རིགས་ཁག་ལ་སློབ་གྲྭ་འཛུགས་ཡུལ་གྱི་ས་ཁྱོན་ཁོར་ཡུག་གནང་སྐྱབས་ཞུས་པར་ཁོང་རྣམས་ནས་ཞལ་བཞེས་གནང་བའི་འོག་ས་ཆ་ཐོབ།
ཕྱི་ལོ་༡༩༩༧ ཟླ་༤ ནས་ཐོག་མར་ཉལ་ཁང་དང་འཛིན་ཁང་ལས་ཤག་བཅས་ཁྱོན་བསྡོམས་ཁང་མིག་༡༢ འཛུགས་སྐྲུན་འགོ་འཛུགས་ཀྱིས་ཕྱི་ལོ་༡༩༩༨ ཟླ་༥ ནང་ལེགས་གྲུབ་བྱུང༌།
ཕྱི་ལོ་༡༩༩༨ ཟླ་༩ ཚེས་༢ ཉིན་སློབ་གྲྭ་དབུ་འབྱེད་དང་འབྲེལ་ྋསྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་ནས་བློ་འཕེལ་གླིང་སློབ་གྲྭ་ཞེས་པའི་མཚན་གསོལ་གནང་བ་དང་མཉམ་དགེ་རྒན་༢ དང་ལས་བྱེད་༣ སློབ་ཕྲུག་༢༠ འདུ་འཛོམས་ཐོག་སློབ་གྲྭ་གསར་འཛུགས་གནང་ཐུབ་པ་བྱུང༌།
ཕྱི་ལོ་༢༠༠༨ ནང་ཁྱོན་བསྡོམས་སློབ་ཕྲུག་ཕོ་མོ་གྲངས་༨༠ དང༌། དགེ་རྒན་༥ དང་ལས་བྱེད་༦ བཅས་ཡོད།

༢། མཐུན་རྐྱེན་འཛུགས་སྐྲུན།

ཕྱི་ལོ་༡༩༩༩ དང་༢༠༠༠ ལོར་བལ་ཡུལ་གངས་ཅན་བདེ་རྩའི་ལས་ཁུངས་བརྒྱུད་སློབ་གྲྭ་འདིའི་སློབ་ཕྲུག་ཉལ་ཁང་༢ དང་ཚོགས་ཁང་༡ ཐབ་ཚང་༡ སློབ་ཕྲུག་གྱོན་གོས་འཇོག་ཡུལ་གྱི་ཁང་མིག་༡ བཅས་གསར་སྐྲུན་གནང༌།
ཕྱི་ལོ་༡༩༩༨ ཟླ་༥ ནང་ཉལ་ཁང་དང་འཛིན་ཁང་ལས་ཤག་བཅས་ཁྱོན་བསྡོམས་ཁང་མིག་༡༢ འཛུགས་སྐྲུན་ལེགས་གྲུབ་བྱུང༌།
ཕྱི་ལི་༢༠༠༤ ནས་སློབ་ཕྲུག་དང་དགེ་ལས་སོགས་གྲངས་འབོར་ཇེ་མང་དུ་འཕེལ་བར་བརྟེན། བལ་ཡུལ་གངས་ཅན་བདེ་རྩའི་གཟིགས་སྐྱོང་འོག་སློབ་གྲྭའི་ཚོགས་ཁང་གསར་རྒྱག་དང་འབྲེལ་ཐབ་ཚང་དང༌། གཉེར་ཚང༌། དགེ་ཆེ་ལས་ཤག་སོགས་གསར་སྐྲུན་གནང༌། དེ་དང་མཉམ་དུ་ཉམས་གསོའི་ལས་རིགས་ཇི་ཡོད་གངས་ཅན་བདེ་རྩ་ལས་ཁུངས་ནས་དུས་ཐོག་གཟིགས་བསྐོར་གྱིས་དགོས་མཁོ་གལ་ཆེ་བ་རྣམས་ཐུགས་བསམ་ཆེ་བཞེས་ཀྱིས་རོགས་སྐྱོར་གནང་དང་གནང་མུས་ཡིན།
སློབ་གྲྭ་འདི་བཞིན་གསར་འཛུགས་བྱས་པ་ནས་ད་ལྟ་བར་སློབ་མ་རྣམས་ཀྱི་སློབ་དེབ་ཆ་ཚང་རིན་མེད་ཕུལ་བ་དང༌། དམའ་རིམ་སློབ་གྲྭ་ཞིག་ཡིན་པའི་ཆ་ནས་དམིགས་བསལ་དཔེ་མཛོད་དུས་ཚོད་ཡོད་ཀྱང་སློབ་ཕྲུག་ལ་དགོས་མཁོ་ཡོད་ཚེ་དུས་ཚོད་ནམ་བྱུང་ལ་བེད་སྤྱོད་བྱེད་བཞིན་ཡོད།
ཕྱི་ལོ་༡༩༩༨ ནས་༢༠༠༨ བཅས་ལོ་ངོ་༡༠ རིང་འདི་ག་བློ་འཕེལ་གླིང་སློབ་གྲྭ་ནས་སློབ་ཕྲུག་གྲངས་༨༠ ཐམ་པ་འཛིན་རིམ་གསུམ་པ་ཐོན་རྗེས་བལ་ཡུལ་ཀ་ཐ་མན་གྲུ་དང་སྤོག་ར་སློབ་གྲྭ་ཁང་ནང་སློབ་སྦྱོང་མུ་མཐུད་བྱེད་བཞིན་ཡོད།
བློ་འཕེལ་གླིང་སློབ་གྲྭ་འདི་བཞིན་བལ་ཡུལ་གངས་ཅན་བདེ་རྩའི་ཁྱབ་ཁོངས་སློབ་གྲྭ་ལོ་ན་ཆུང་ཤོས་དེ་ཡིན། སློབ་གྲྭ་འདི་ཕྱི་ལོ་༡༩༩༨ ལོར་དབུ་བརྙེས་པ་ནས་བཟུང་ལོ་ལྟར་གངས་ཅན་བདེ་རྩའི་ལས་ཁུངས་ནས་ལས་བྱེད་གཟིགས་བསྐོར་ཕེབས་བཞིན་ཡོད།
ཕྱི་ལོ་༢༠༠༩ ལོར་སློབ་གྲྭ་འདིར་ཁྱོན་བསྡོམས་སློབ་ཕྲུག་བུ་༣༤ དང་བུ་མོ་༤༡ བཅས་བསྡོམས་༧༥ ཡོད་པའི་ཁྲོད། བོད་རིགས་སློབ་ཕྲུག་༤༥ ཡོད། དེ་བཞིན་དགེ་རྒན་སྐྱེས་པ་༧ དང་བུད་མེད་༤ བཅས་དགེ་ལས་༡༡ ཡོད་པའི་ནང་༩ བོད་རིགས་ཡིན། དགེ་ཆེ་ནི་མགོན་པོ་དབང་ཕྱུག་ལགས་ཡིན།

༣། སློབ་འཇུག་དང་ཤེས་ཡོན་གནས་སྟངས།

ཕྱི་ལོ་༢༠༠༧ ཟླ་༡༢ ཚེས་༣༡ ཉིན་བོད་གཞུང་ཤེས་རིག་ལས་ཁུངས་ཀྱི་སྡོམ་ཐོ་ལྟར་ན། མ་ནང་བློ་འཕེལ་གླིང་སློབ་གྲྭ་འདིར་སློབ་ཕྲུག་བུ་༣༦ དང་བུ་མོ་༤༤ བཅས་ཁྱོན་བསྡོམས་༨༠ ཡོད་པ་ལས་གཏན་སློབ་གྲངས་༧༠ དང༌། ཉིན་སློབ་གྲངས་༡༠ ཡོད་ཅིང༌། བོད་རིགས་མ་ཡིན་པའི་སློབ་ཕྲུག་༣༣ ཡོད། དགེ་རྒན་༦ དང་ལས་བྱེད་༦ བཅས་ཁྱོན་བསྡོམས་དགེ་ལས་༡༢ ཡོད།
སློབ་གྲྭ་འདིའི་ཕྱི་ལོ་༢༠༠༡ ལོ་ནས་ནས་༢༠༠༩ བར་སློབ་ཕྲུག་གི་གྲངས་འབོར་འཕར་ཆག་གི་གནས་སྟངས་རེའུ་མིག་ཏུ་བཀོད་པ་གཤམ་གསལ།
ཕྱི་ལོ་༢༠༠༧ ཟླ་༡༠ ཚེས་༢༤ ནས་ཟླ་༡༡ ཚེས་༡ བར་བོད་གཞུང་ཤེས་རིག་ལས་ཁུངས་ནས་བཙན་བྱོལ་བོད་མའི་གཞི་རིམ་ཤེས་ཡོན་སྲིད་བྱུས་དང་འབྲེལ་བའི་ཟབ་སྦྱོང་གནང་བ་དང༌། དེ་བཞིན་སྲིད་བྱུས་དང་འབྲེལ་བའི་དེབ་རིགས་འགྲེམས་སྤེལ་གནང་བའི་དགོངས་དོན་ལ་སློབ་སྦྱོང་བགྱིས་ཏེ། སློབ་གྲྭའི་འཛིན་སྐྱོང་དང་ལམ་ལུགས་སྒྲོམ་གཞི་སོགས་དང་མ་འབྲེལ་བའི་ཆ་སྟེ། སློབ་སྟོན་གྱི་བསམ་བློ་དང༌། རྩ་འཛིན། ཐབས་ལམ། ཤེས་ཡོན་གྱི་ངོས་འཛིན། དམིགས་ཡུལ་སོགས་བོད་དགེ་ཚང་མས་གོ་རྟོགས་གཏིང་ཟབ་བཏང་སྟེ་ལག་བསྟར་གང་ཐུབ་ཞུ་མུས་ཡིན།
བལ་ཡུལ་སྤྱི་དང༌། ཁྱད་པར་འདི་ཁུལ་བོད་མི་ཚོ་ཡུལ་མིའི་སྐད་དང་གོམས་གཤིས་ཀྱི་ཤན་ཤུགས་ཆེ་སྟབས། སློབ་ཕྲུག་ཁོ་ན་ཙམ་མ་ཡིན་པར་སློབ་ཕྲུག་ཚོའི་ཕ་མ་རྣམས་ལའང་ནང་ཆོས་དང་རིག་གཞུང༌། སྐད་ཡིག་གལ་ཆེ་སྐོར་གྱི་ཚོགས་འདུ་རིམ་པ་གོ་སྒྲིག་བགྱིས་ཏེ་ཕ་མ་དང་མཉམ་འབྲེལ་བྱ་རྒྱུ་སྔོན་ལས་གལ་ཆེར་བརྩིས་ཡོད།
བློ་འཕེལ་གླིང་སློབ་གྲྭ་འདི་འཛིན་གྲྭ་གསུམ་པ་ལས་མེད་སྟབས། སློབ་ཕྲུག་གསར་འཇུག་སྐབས་བོད་སྐད་མི་ཤེས་པ་རྣམས་ལ་ཐོག་མར་ཟླ་བ་གཉིས་རིང་བོད་སྐད་ལ་ཤུགས་སྣོན་སྤྲད་པ་དང༌། གཞི་རིམ་འོག་མའི་འཛིན་གྲྭའི་ནང་སློབ་འཁྲིད་སྐབས་བོད་སྐད་བེད་སྤྱོད་བྱེད་བཞིན་པ་མ་ཟད། སློབ་ཕྲུག་དང་དགེ་སློབ་ནང་ཁུལ་བོད་སྐད་ཁོ་ན་སྤྱོད་པའི་འབད་རྩོལ་ཞུ་བཞིན་ཡོད།
སློབ་ཕྲུག་ཚོའི་གཟུགས་གཞི་འཚར་ལོངས་རྒྱུན་ལྡན་འབྱུང་སླད་རྣམ་འབྱོར་གྱི་ལུས་སྦྱོང་དང་དབུགས་སྦྱོང་ཡོ་ག་སོགས་ནས་སློབ་ཕྲུག་རྣམས་ལ་ནད་ན་ཚ་ཉུང་བ་ལ་ཕན་ཐོགས་མངོན་གསལ་བྱུང་ཡོད།
ས་གནས་འདིར་མ་ནང་ཡུལ་སྐད་སྤྱོད་ཁྱབ་ཆེ་བའི་རྐྱེན་གྱིས་བོད་སྐད་ལ་དོ་ཕོག་ཆེན་པོ་འབྱུང་མུས་ལ་བརྟེན། སློབ་ཕྲུག་རྣམས་ལ་བོད་ཀྱི་སྐད་ཡིག་སྦྱངས་གོམས་ཐོག་དམིགས་བསལ་ལས་རིམ་གོ་སྒྲིག་དགོས་ངེས་ལ་བརྟེན། སློབ་གྲྭའི་འཛིན་སྐྱོང་ནས་ལོ་ལྟར་ཁང་ཚན་ནང་ཁུལ་འགྲན་བསྡུར་སྣ་ཚོགས་སློབ་གྲྭའི་བྱེད་སྒོའི་ནང་འཇོག་ཐབས་གནང་མུས་དེ་དག་གིས་སློབ་ཕྲུག་རྣམས་ལ་ཕན་ཐོགས་ཆེན་པོ་བྱུང་ཡོད། དེར་བརྟེན་མ་ནང་རྫོང་གི་སློབ་གྲྭ་གཞན་ལའང་བོད་པའི་སློབ་གྲྭ་ཞེས་མིག་དཔེ་བཟང་པོར་གྱུར་ཡོད་པ་མ་ཟད། ཕྱི་ལོ་༢༠༠༨ ལོར་མ་ནང་རྫོང་ཤེས་རིག་ལས་ཁུངས་ནས་གོ་སྒྲིག་གནང་བའི་རྫོང་ནང་ཁུལ་གྱི་སློབ་མའི་རི་མོ་འགྲན་བསྡུར་སྐབས་ནང་བློ་འཕེལ་གླིང་སློབ་གྲྭ་ནས་སློབ་ཕྲུག་༢༠ འཛུལ་ཞུགས་བྱས་པའི་ཁྲོད་མཐའ་མའི་འགྲན་བསྡུར་ནང་སློབ་ཕྲུག་༡༥ ཚུད། འགྲན་བསྡུར་དེའི་ནང་མ་ནང་རྫོང་ཁོངས་སུ་ཡོད་པའི་སློབ་གྲྭ་༥༠ ཙམ་འཛུལ་ཞུགས་བྱས་ཡོད། མཐའ་མའི་འགྲན་བསྡུར་ནང་སློབ་ཕྲུག་གཉིས་ཨང་གཉིས་པ་དང་སློབ་ཕྲུག་གཅིག་ཨང་གསུམ་པ་བྱུང༌། དེ་བཞིན་སློབ་འཁྲིད་འཁྲིད་ཆས་སྤུས་ལེགས་ཤོས་དེ་བློ་འཕེལ་གླིང་སློབ་གྲྭ་ཐོབ་པ་སོགས་ས་གནས་མ་ནང་རྫོང་གི་རྫོང་དཔོན་གྱིས་ལག་འཁྱེར་དང་གསོལ་རས་གནང༌།

༤། གཞུང་འབྲེལ་འཚམས་གཟིགས།

དེ་བཞིན་ཕྱི་ལོ་༡༩༩༨།༡༩༩༩ ལོར་གངས་བདེ་དྲུང་ཆེ་འཕྲིན་ལས་རྣམ་རྒྱལ་ལགས་དང༌། རྣམ་རྒྱལ་མཐོ་སློབ་ཀྱི་ངེས་སྟོན་པ་དབང་འདུས་ཕུན་ཚོགས། སློབ་གྲྭའི་སྦྱིན་བདག་ཨེར་ཝིན་བཅས་ཆེད་ཕེབས་ཀྱིས་གཟིགས་རྟོག་གནང༌།
ཕྱི་ལོ་༡༩༩༩།༢༠༠༠ ལོར་བོད་མི་མང་སྤྱི་འཐུས་བྱ་དུར་བཟང་པོ་ལགས་དང་ངག་དབང་ལྷ་མོ། སློབ་གྲྭའི་སྦྱིན་བདག་ཨེར་ཝིན། གངས་བདེ་དྲུང་ཆེ་འཕྲིན་ལས་རྣམ་རྒྱལ། བལ་ཡུལ་སྐུ་ཚབ་དོན་གཅོད་ཁང་གི་སྐུ་ཚབ་ཉི་མ་བསམ་མཁར་བཅས་ཀྱིས་འཚམས་གཟིགས་དང་རྟོག་ཞིབ་གནང༌།
ཕྱི་ལོ་༢༠༠༠།༢༠༠༡།༢༠༠༢ བཅས་སུ་ལོ་ལྟར་སློབ་གྲྭའི་སྦྱིན་བདག་ཨེར་ཝིན་དང༌། གངས་ཅན་བདེ་རྩའི་དྲུང་ཆེ་འཕྲིན་ལས་རྣམ་རྒྱལ་བཅས་ནས་གཟིགས་རྟོག་གནང༌། ཕྱི་ལོ་༢༠༠༣།༢༠༠༤ ལོར་སློབ་གྲྭའི་སྦྱིན་བདག་ཨེར་ཝིན་དང༌། གངས་ཅན་བདེ་རྩའི་འཛིན་སྐྱོང་དྲུང་ཆཻ་སྐུ་ངོ་ཚེ་རིང་སྟོབས་རྒྱས་ལགས་ནས་གཟིགས་རྟོག་གནང༌།
ཕྱི་ལོ་༢༠༠༤།༢༠༠༥ ལོར་སློབ་གྲྭའི་སྦྱིན་བདག་ཨེར་ཝིན་དང༌། གངས་བདེ་ལས་ཁུངས་ཀྱི་འཛིན་སྐྱོང་བ་རྒན་བསོད་ནམས་ཚེ་རིང་བཅས་ཀྱིས་གཟིགས་རྟོག་གནང༌།
དེ་བཞིན་བལ་ཡུལ་གཞུང་གི་ཤེས་རིག་བློན་ཆེན་དང་ས་གནས་ཡར་རྒྱས་བློན་ཆེན་མཉམ་མི་རྗེ་རྣམས་ནས་༢༠༠༦ ལོར་གཟིགས་རྟོག་གནང་ཡོད་པ་དང༌། མ་ནང་ཤེས་རིག་འགན་འཛིན་ནས་ཕྱི་ལོ་༢༠༠༦ དང་༢༠༠༧ ལོར་གཟིགས་རྟོག་གནང༌།
ཕྱི་ལོ་༢༠༠༧ ཟླ་༤ པར་བོད་མི་མང་སྤྱི་འཐུས་རྒྱལ་རོང་ཟླ་བ་ཚེ་རིང་དང་ཆོས་སྐྱོང་དབང་ཕྱུག་གཉིས་ནས་སློབ་གྲྭ་འཚམས་གཟིགས་གནང་སྟེ། ད་ཡོད་འཛིན་རིམ་གསུམ་པའི་གནས་ཚད་འཛིན་རིམ་ལྔ་པ་བར་སྤར་ཆ་དགོངས་བཞེས་ཡོང་བ་ཞེས་ས་གནས་མི་མང་དང་སློབ་གྲྭའི་ངོས་ནས་ཞུ་གསོལ་བྱུང་བར་རྒྱབ་གཉེར་གྱིས་གངས་ཅན་བདེ་རྩ་དང་བོད་གཞུང་ཤེས་རིག་ལས་ཁུངས་སུ་ཞིབ་གནས་ཕུལ། གཞིས་ཆགས་ཀྱི་ས་གནས་འགོ་འཛིན་ནས་ལོ་ལྟར་འཚམས་གཟིགས་བཅས་ཤེས་ཡོན་དང་འབྲེལ་བའི་གཟིགས་བསྐོར་གནང་མུས་ཡིན།
གོང་གསལ་རྣམས་ནས་སློབ་གྲྭ་འདིའི་མ་འོངས་པའི་མདུན་ལམ་ཡག་པོ་བཟོ་དགོས་པ་དང་སློབ་གྲྭ་འདིའི་འགན་ཁྱེར་ཏེ་མ་ནང་དུ་བོད་མིའི་གཞིས་ཆགས་མེད་སྟབས་རང་གི་རྩ་ཆེ་སྐད་ཡིག་དང་རིག་གཞུང་ཆོས་རྣམས་མི་ཉམས་རྒྱུན་འཛིན་བྱ་དཀའ་བའི་དཀའ་ངལ་ཁྱད་གསོད་བྱ་དགོས་ཚུལ། སློབ་གྲྭ་ཕན་ཚུན་དབར་དུས་དུས་སུ་རིག་གཞུང་བགྲོ་གླེང་དང༌། རི་མོ། རྩོམ་རིག་སོགས་སློབ་འཁྲིད་གནང་ཐུབ་ན་ལེགས་པའི་ལམ་སྟོན་གནང༌།

གངས་དཀར་ཏེ་སེ་སློབ་གྲྭ།

དཀར་ཆག

༡། འགོ་འཛུགས
༢། ཤེས་ཡོན་གནས་སྟངས།
༣། གཞུང་འབྲེལ་འཚམས་གཟིགས།

༡། འགོ་འཛུགས།

སྤོག་ར་བཀྲ་ཤིས་དཔལ་འཁྱིལ་བོད་གཞིས་གངས་ཏེ་སེ་སློབ་གྲྭའམ། བལ་ཡུལ་ཀེ་ལ་ཤ་སློབ་གྲྭ་ནི། ཕྱི་ལོ་༡༩༦༣ ལོར་གསར་འཛུགས་གནང༌། ཐོག་མའི་ཆར་སློབ་ཕྲུག་གྲངས་༡༠༠ ཡས་མས་ཙམ་ལ་བོད་ཡིག་དང་ཨིན་ཇི། ཨང་རྩིས་གསུམ་གྱི་སློབ་ཚན་བཀོད་སྒྲིག་བྱས་ཡོད། ཕྱི་ལོ་༡༩༦༤ ལོར་ཡེ་ཤུའི་བླ་དཔོན་མཽ་རན་སེ་(Father Morains Committee)ཟེར་བ་ཞིག་གིས་བལ་ཡུལ་འཇོ་ཁེལ་བསམ་འགྲུབ་གླིང་གཞིས་ཆགས་སློབ་གྲྭ་དང༌། སྤོག་ར་བཀྲ་ཤིས་དཔལ་འཁྱིལ་གཞིས་སློབ་གཉིས་ཀ་བདག་གཉེར་གནང་སྟེ། སྐུ་ཞབས་བཀྲ་ཤིས་ཕུན་ཚོགས་ལ་དགེ་རྒན་འོས་སྦྱོང་སྦྱོར་སྤྲོད་ཀྱིས་བོད་དགེར་བསྐོ་བཞག་གནང་འདུག
ཕྱི་ལོ་༡༩༦༥ ལོར་སློབ་གྲྭ་འདིའི་འཛིན་སྐྱོང་སུད་སི་ས་ཊ་རོགས་ཚོགས་ལ་རྩིས་སྤྲོད་བྱས།
ཕྱི་ལོ་༡༩༧༢ ལོ་ནས་བལ་ཡུལ་དུ་ཤེས་རིག་གསར་བརྗེ་ཞེས་པའི་ཆབ་སྲིད་ཀྱི་འཕོ་འགྱུར་བྱུང་སྟེ་སྒེར་པའི་སློབ་གྲྭ་ཡོངས་རྫོགས་གཞུང་བཞེས་དང༌། སློབ་ཚན་ཆ་ཚང་བལ་སྐད་ཐོག་སློབ་དགོས་བྱུང༌། བོད་མིའི་སློབ་གྲྭ་རྣམས་ཀྱང་གཞུང་བཞེས་བཏང་བས་ཉིན་གུང་སོགས་བར་གསེང་སྐབས་སུའང་བོད་ཡིག་སློབ་མི་ཆོག་པར་བྱས། དེ་རྗེས་བལ་ཡུལ་གངས་ཅན་བདེ་རྩ་ནས་བལ་གཞུང་ལ་དེབ་སྐྱེལ་ལེགས་གྲུབ་བྱུང་བས། བོད་མིའི་གཞིས་ཆགས་སློབ་གྲྭ་ཁག་ལ་དམིགས་བསལ་བོད་དགེ་བསྐོ་འཛུགས་ཆོག་པའི་བཀའ་འཁྲོལ་ཐོབ་པ་དང༌།
སྔ་དགོང་གཉིས་ལ་བོད་ཡིག་སློབ་ཁྲིད་བསྐྱར་དུ་འགོ་འཛུགས་ཐུབ་པ་བྱུང༌།
ཕྱི་ལོ་༡༩༧༢ ནས་བཟུང་ད་ལྟ་བར་སློབ་གྲྭ་འདིའི་འགྲོ་སོང་ཆ་ཚང་བལ་ཡུལ་གངས་ཅན་བདེ་རྩ་ཚོགས་པ་ནས་ནར་གཏོང་གནང་བཞིན་ཡོད།
༢། ལོ་རེའི་སློབ་ཕྲུག་གྲངས་འབོར་གནས་སྟངས།
ཕྱི་ལོ་༡༩༨༣ ལོ་ནས་ད་བར་སློབ་གྲྭ་འདིའི་སློབ་ཕྲུག་གྲངས་འབོར་དང༌། ཤེས་ཡོན་མཐུན་རྐྱེན། གཞུང་འབྲེལ་མི་སྣ་འཚམས་གཟིགས་ཀྱི་གནས་ཚུལ་དུས་ཚོད་ཀྱི་བྱུང་རིམ་བཞིན་བཀོད་པ་གཤམ་གསལ།
ཀ) ཕྱི་ལོ་༡༩༨༣
སློབ་ཕྲུག་ཁྱོན་བསྡོམས་༡༢༢ ཡོད་པ་དེའི་ནང་བུ་༦༥ དང་བུ་མོ་༥༧ ཡོད། སྐབས་དེར་འཛིན་རིམ་ལྔ་པ་བར་ཡོད་ལ་ལས་བྱེད་༨ བྱུང་འདུག
ཁ) ཕྱི་ལོ་༡༩༨༤
ལོ་འདིར་ཁྱོན་བསྡོམས་སློབ་ཕྲུག་གྲངས་༡༥༥ ཡོད་པ་དང༌། དེའི་ནང་བུ་༨༡ དང་བུ་མོ་༧༩ ཡོད། ལས་བྱེད་༨ འདུག འདིའི་བར་དུ་སློབ་ཕྲུག་རྣམས་ཀྱིས་སྔ་དགོང་གཉིས་ལ་བོད་ཡིག་སློབ་སྦྱོང་བྱེད་པ་མ་གཏོགས་ཉིན་གུང་བལ་ཡུལ་གཞུང་གི་སློབ་གྲྭ་ཚུགས་བཞིན་ཡོད་འདུག ལོ་འདིའི་ནང་བལ་ཡུལ་དུ་སྒེར་གཉེར་སློབ་གྲྭ་མང་པོ་འཛུགས་བཞིན་པའི་སྐབས་ཡིན་སྟབས་རང་རེའི་སློབ་གྲྭ་འདི་ཡང་བལ་གཞུང་གི་འོག་ནས་སྒེར་དུ་བསྒྱུར་ཐུབ་འདུག་པ་མ་ཟད། རྒན་ཕུན་ཚོགས་བཀྲ་ཤིས་ལགས་ནས་བལ་གཞུང་ལ་དེབ་སྐྱེལ་གྱིས་སློབ་གྲྭའི་མིང་ལ་གངས་དཀར་ཏེ་སེ་སློབ་གྲྭ་(Mount Kailash School)ཞེས་བཏགས་འདུག ཁོང་གིས་༡༩༩༤ ལོ་བར་དུ་སློབ་གྲྭ་འདིར་དགེ་ཆེ་གནང༌།
ག) ཕྱི་ལོ་༡༩༨༥
ལོ་འདིར་ཁྱོན་བསྡོམས་སློབ་ཕྲུག་གྲངས་༦༨ ཡོད་པ་དང༌། དེའི་ནང་བུ་༢༧ དང་བུ་མོ་༣༩ ཡོད། དགེ་རྒན་དང་ལས་བྱེད་ཁྱོན་བསྡོམས་༨ ཡོད།
ང) ཕྱི་ལོ་༡༩༨༦
ལོ་འདིར་ཁྱོན་བསྡོམས་སློབ་ཕྲུག་གྲངས་༡༠༩ ཡོད་པ་དང༌། དེའི་ནང་བུ་༥༩ དང་བུ་མོ་༥༠ ཡོད། དགེ་རྒན་དང་ལས་བྱེད་ཁྱོན་བསྡོམས་༨ ཡོད།
ཅ) ཕྱི་ལོ་༡༩༨༧
ལོ་འདིར་ཁྱོན་བསྡོམས་སློབ་ཕྲུག་གྲངས་༡༣༣ ཡོད་པ་དང༌། དེའི་ནང་བུ་༥༠ དང་བུ་མོ་༨༣ ཡོད། དགེ་རྒན་དང་ལས་བྱེད་ཁྱོན་བསྡོམས་༨ ཡོད།
ཆ) ཕྱི་ལོ་༡༩༨༨
ལོ་འདིར་ཁྱོན་བསྡོམས་སློབ་ཕྲུག་གྲངས་༩༥ ཡོད་པ་དང༌། དེའི་ནང་བུ་༤༡ དང་བུ་མོ་༥༤ ཡོད། དགེ་རྒན་དང་ལས་བྱེད་ཁྱོན་བསྡོམས་༨ ཡོད།
ཇ) ཕྱི་ལོ་༡༩༨༩
ལོ་འདིར་ཁྱོན་བསྡོམས་སློབ་ཕྲུག་གྲངས་༡༦༧ ཡོད་པ་དང༌། དེའི་ནང་བུ་༨༠ དང་བུ་མོ་༨༧ ཡོད། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༨ དང༌། དགེ་ལས་༨ བཅས་ཡོད།
ཉ) ཕྱི་ལོ་༡༩༩༠
ལོ་འདིར་ཁྱོན་བསྡོམས་སློབ་ཕྲུག་གྲངས་༡༧༩ ཡོད་པ་དང༌། དེའི་ནང་བུ་༨༧ དང་བུ་མོ་༩༢ ཡོད། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༨ དང༌། དགེ་ལས་༩ བཅས་ཡོད།
ཏ) ཕྱི་ལོ་༡༩༩༡
ལོ་འདིར་ཁྱོན་བསྡོམས་སློབ་ཕྲུག་གྲངས་༡༢༩ ཡོད་པའི་ནང་བུ་༦༢ དང་བུ་མོ་༦༧ ཡོད། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༧ དང༌། དགེ་རྒན་དང་ལས་བྱེད་ཁྱོན་བསྡོམས་༡༠ བཅས་ཡོད།
ཐ) ཕྱི་ལོ་༡༩༩༢
ལོ་འདིར་ཁྱོན་བསྡོམས་སློབ་ཕྲུག་གྲངས་༡༡༩ ཡོད་པའི་ནང་བུ་༥༢ དང་བུ་མོ་༦༨ ཡོད། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༡༧ དང༌། དགེ་ལས་གྲངས་༡༠ བཅས་ཡོད།
ད) ཕྱི་ལོ་༡༩༩༣
ལོ་འདིར་ཁྱོན་བསྡོམས་སློབ་ཕྲུག་གྲངས་༢༡༧ ཡོད་པའི་ནང་བུ་༡༡༥ དང་བུ་མོ་༡༠༢ ཡོད། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༡༤ དང༌། དགེ་ལས་གྲངས་༡༡ བཅས་འདུག ལོ་འདིར་བོད་གཞུང་ཤེས་རིག་བཀའ་བློན་རྗེ་བཙུན་པད་མ་མཆོག་གིས་རོགས་སྐྱོར་གནང་བ་བཞིན་སློབ་མའི་ཉལ་ཁང་ཐོག་བརྩེགས་གཉིས་ལྡན་ཞིག་འཛུགས་སྐྲུན་གནང༌།
ན) ཕྱི་ལོ་༡༩༩༤
ལོ་འདིར་ཁྱོན་བསྡོམས་སློབ་ཕྲུག་གྲངས་༡༨༧ ཡོད་པའི་ནང་བུ་༩༧ དང་བུ་མོ་༩༠ ཡོད། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༡༡ ཡོད་ལ། དགེ་རྒན་དང་ལས་བྱེད་ཁྱོན་བསྡོམས་༡༡ ཡོད།
པ) ཕྱི་ལོ་༡༩༩༥
ལོ་འདིར་ཁྱོན་བསྡོམས་སློབ་ཕྲུག་༢༡༠ ཡོད་པའི་ནང་བུ་༡༠༤ དང་བུ་མོ་༡༠༦ ཡོད། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༨ ཡོད་ལ། དགེ་རྒན་དང་ལས་བྱེད་ཁྱོན་བསྡོམས་༡༧ ཡོད།
ལོ་འདིར་དགེ་ཆེ་འཆི་མེད་གཡུ་སྒྲོན་ལགས་ཀྱིས་འགྲུལ་བཞུད་རོགས་ཚོགས་(Trek Aid)ནས་རོགས་རམ་ཐབས་འཚོལ་གྱིས་འཛིན་ཁང་༣ དང་སློབ་གྲྭའི་འཛིན་ཆས་ཆ་ཚང་གསར་བཟོ་ཐུབ་པ་བྱུང༌།
ཕ) ཕྱི་ལོ་༡༩༩༦
ལོ་འདིར་ཁྱོན་བསྡོམས་སློབ་ཕྲུག་གྲངས་༢༣༤ ཡོད་པའི་ཁྲོད་བུ་༡༡༠ དང་བུ་མོ་༡༢༤ ཡོད། དེ་མིན་ཡུལ་མིའི་སློབ་ཕྲུག་༦ བྱུང་ཡོད། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༢༤ ཡོད། ཁྱོན་བསྡོམས་དགེ་ལས་༡༧ བཅས་ཡོད།
བ) ཕྱི་ལོ་༡༩༩༧
ལོ་འདིར་ཁྱོན་བསྡོམས་སློབ་ཕྲུག་གྲངས་༣༠༨ ཡོད་པའི་ནང་བུ་༡༦༦ དང་བུ་མོ་༡༤༢ ཡོད། དེ་མིན་ཡུལ་མིའི་སློབ་ཕྲུག་༡༣ ཀྱང་བྱུང་འདུག འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༡༩ ཡོད་ལ། དགེ་ལས་༡༧ ཡོད།
ལོ་འདིར་དགེ་ཆེ་ཡེ་ཤེས་རྒྱལ་མཚན་ལགས་ནས་སློབ་གྲྭའི་རྩེད་ཐང་ལ་ར་བ་བསྐོར་བ་དང༌། སློབ་གྲྭའི་ཡིག་ཚང་གསར་རྒྱག་ཐུབ་པ་བྱུང༌།
མ) ཕྱི་ལོ་༡༩༩༨
ལོ་འདིར་ཁྱོན་བསྡོམས་སློབ་ཕྲུག་གྲངས་༢༩༧ ཡོད་པའི་ནང་བུ་༡༦༩ དང་བུ་མོ་༡༢༨ ཡོད། དེ་མིན་ཡུལ་མིའི་སློབ་ཕྲུག་༡༡ ཡོད། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༡༩ ལས་གཉིས་ཀྱིས་རྒྱུགས་འཕྲོད་མི་འདུག དགེ་ལས་ཁྱོན་བསྡོམས་༡༧ འདུག
ལོ་འདིར་ཤེས་རིག་དྲུང་ཆེ་ཚེ་རིང་དབང་རྒྱལ་མཆོག་ཀེ་ལ་ཤ་སློབ་གྲྭ་འདིར་གཟིགས་སྐོར་ལ་ཕེབས་ཤིང༌། སློབ་གྲྭའི་དགེ་སློབ་ཚང་མའི་སེམས་ཤུགས་དང་གྲུབ་འབྲས་ལ་དམིགས་བསལ་གཟེངས་བསྟོད་གནང༌།
ཙ) ཕྱི་ལོ་༡༩༩༩
ལོ་འདིར་ཁྱོན་བསྡོམས་སློབ་ཕྲུག་གྲངས་༢༦༧ ཡོད་པའི་ནང་བུ་༡༣༩ དང་བུ་མོ་༡༢༨ ཡོད། དེ་མིན་ཡུལ་མིའི་སློབ་ཕྲུག་༡༣ ཡོད། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༡༤ ཡོད་པ་དང༌། དགེ་ལས་༡༧ བཅས་ཡོད།
ལོ་འདིར་བོད་གཞུང་འཕྲོད་བསྟེན་བཀའ་བློན་སློབ་གྲྭར་གཟིགས་སྐོར་དུ་ཕེབས་ཤིང༌། གཙང་འཕྲོད་སོགས་གང་ཅིའི་ཐད་ཚགས་ཚུད་ཀྱི་རྣམ་པ་མངོན་པས་འབྲེལ་ཡོད་དབུ་ལས་ཡོངས་ལ་བསྔགས་བརྗོད་དང་འབྲེལ། མ་འོངས་སློབ་ཕྲུག་རྣམས་ཀྱི་ཤེས་ཡོན་གོང་འཕེལ་ཡོང་ཆེད་ཐུགས་ཁུར་ཆེ་བཞེས་གནང་གལ་ཆེ་བའི་བཀའ་བསྐུལ་གནང༌།
ཟླ་༡༢ ཚེས་༧ ཉིན་བོད་གཞུང་ཤེས་རིག་བཀའ་བློན་དང་དྲུང་ཆེ་རྣམ་གཉིས་ཆེད་ཕེབས་ཀྱིས་གང་ཅིའི་ཐད་ཡར་རྒྱས་འགྲོ་བཞིན་པར་བསྔགས་བརྗོད་དང༌། མ་འོངས་བྱེད་ཕྱོགས་སྐོར་ཅིག་ཀྱང་ལམ་སྟོན་གནང་ཡོད། རོགས་རམ་ཐབས་འཚོལ་གྱིས་ཡིག་ཚང་དུ་ཀམ་པུ་ཊར་གཅིག་དང༌། སློབ་གྲྭའི་འཁྲབ་ཆས། ཚན་རིག་བརྟག་དཔྱད་ཀྱི་ལག་ཆ་དང་རྫས་སྦྱོར་སོགས་ཀྱི་མཐུན་འགྱུར་ཐོབ།
ཚ) ཕྱི་ལོ་༢༠༠༠
ལོ་འདིར་ཁྱོན་བསྡོམས་སློབ་ཕྲུག་གྲངས་༢༥༠ ཡོད་པའི་ནང་བུ་༡༢༥ དང་བུ་མོ་༡༢༥ ཡོད། དེ་མིན་ཡུལ་མིའི་སློབ་ཕྲུག་༡༧ ཡོད། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༡༦ ཡོད་པ་དང༌། དགེ་ལས་༢༠ ཡོད།
ལོ་འདིར་ཤེས་རིག་དྲུང་ཆེ་མཆོག་སློབ་གྲྭ་འདིར་འཚམས་གཟིགས་སུ་ཕེབས། སློབ་གྲྭའི་གནས་སྟངས་ལ་གཟིགས་ཞིབ་གནང་རྗེས་གདེང་སྤོབས་ཆེན་པོ་བྱུང༌། སློབ་གྲྭ་ཡར་རྒྱས་ཆེད་ཕྱག་རོགས་གང་དགོས་གནང་རྒྱུ་གསུངས། རོགས་ཚོགས་བརྒྱུད་ནས་སློབ་གྲྭའི་རྩེད་ཐང་སྙོམས་པ་དང༌། ར་སྐོར་གྱི་རྩིག་པ་དང༌། རྒྱལ་སྒོ་ཆ་ཚང་གསར་བཟོ་ཐུབ་པ་བྱུང༌།
དགེ་རྒན་གཉིས་གསར་དུ་བསྐོ་བཞག་གནང་བར་བཞུགས་གནས་ཀྱི་དཀའ་ངལ་བྱུང་བར་གངས་ཅན་བདེ་རྩས་ཁང་མིག་ཐོག་བརྩེགས་༡ ཡོད་པ་ཞིག་གསར་རྒྱག་གནང༌།
ཛ) ཕྱི་ལོ་༢༠༠༡
ལོ་འདིར་ཁྱོན་བསྡོམས་སློབ་ཕྲུག་གྲངས་༢༣༠ ཡོད་པའི་ནང་བུ་༡༠༩ དང་བུ་མོ་༡༢༡ ཡོད། དེ་མིན་ཡུལ་མིའི་སློབ་ཕྲུག་ཀྱང་བྱུང༌། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༡༨ ཡོད་པ་དང༌། དགེ་ལས་༢༠ ཡོད།
བོད་གཞུང་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་མཆོག་སློབ་གྲྭར་གཟིགས་སྐོར་ལ་ཕེབས་སྐབས། བོད་ཀྱི་གཞོན་སྐྱེས་རྣམས་ལ་ཕྱི་ནང་གི་གཞི་རྩའི་ཤེས་ཡོན་སྣ་འཛོམས་སློབ་ཁྲིད་གནང་ཕྱོགས་དངོས་སུ་མཐོང་ནས་དགའ་སྤོབས་ཆེན་པོ་སྐྱེས་ཤིང༌། བུ་ཕྲུག་ཚོར་བོད་ཀྱི་ཆོས་དང་རིག་གཞུང་རྒྱུད་ལ་འཇོག་རྒྱུ་དགོས་གལ་ཤིན་ཏུ་ཆེན་པོ་ཡིན་པའི་འབོད་སྐུལ་དགེ་སློབ་ཡོངས་ལ་ཞུས་འདུག
ཨོ་སི་ཊི་རི་ཡའི་གནམ་གྲུའི་ཁ་ལོ་བའི་ཚོགས་པ་བརྒྱུད་སློབ་མར་གྱོན་ཆས་དང༌། ཟློས་གར་འཁྲབ་ཆས། སློབ་གྲྭའི་འཛིན་ཁང་ཉམས་གསོ་སོགས་ཀྱི་ཆེད་རོགས་རམ་བྱུང༌།
ཝ) ཕྱི་ལོ་༢༠༠༢
ལོ་འདིར་ཁྱོན་བསྡོམས་སློབ་ཕྲུག་གྲངས་༢༣༤ ཡོད་པའི་ནང་བུ་༡༠༩ དང་བུ་མོ་༡༢༥ ཡོད། ཡུལ་མིའི་སློབ་ཕྲུག་༦ བཅས་བྱུང༌། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༡༨ ཡོད་པ་དང༌། དགེ་ལས་ཁྱོན་བསྡོམས་༢༠ ཡོད།
ཕྱི་ཟླ་དྲུག་པའི་ཟླ་མཇུག་ལ་བོད་མི་མང་སྤྱི་འཐུས་སློབ་གྲྭར་གཟིགས་སྐོར་ལ་ཕེབས་ནས་སློབ་ཕྲུག་རྣམས་སློབ་སྦྱོང་ལ་དོ་སྣང་ཆེན་པོ་འདུག་པས་དབུ་ལས་ཚར་མར་འཚམས་འདྲི་དང་ཐུགས་རྗེ་ཆེ་ཞེས་གསུངས་ཡོད་ལ། བོད་གཞུང་ཤེས་རིག་བཀའ་བློན་དང་དྲུང་ཆེ་གཉིས་ཀྱིས་གཟིགས་སྐོར་གནང་སྐབས། ལྷག་བློ་ཆེར་བསྐྱེད་ཀྱིས་བོད་ཕྲུག་ཚོའི་ཤེས་ཡོན་ཐོག་འབད་བརྩོན་གནང་འདུག་པར་བསྔགས་བརྗོད་དང་མུ་མཐུད་མཇུག་སྐྱོང་ཡིད་གཟབ་དགོས་སྐོར་གསུངས་ཡོད།
ཉི་ཧོང་གི་རོགས་ཚོགས་ཤིག་ནས་འབུམ་གཉིས་ཀྱི་རོགས་སྐྱོར་ཐོབ་སྟེ། ཁ་པར་ཐོག་བཏང་ཡོད་ལ། དེའི་ལ་ཁ་རིན་པོ་ཆེ་ནས་ཀྱང་ཞལ་འདེབས་གནང་ཡོད། དེ་མིན་སློབ་གྲྭའི་ཡིག་སྣོད་དེབ་སྣོད་ཚང་མ་རོགས་ཚོགས་གཞན་ཞིག་བརྒྱུད་ནས་ཉོ་སྒྲུབ་ཐུབ་པ་བྱུང་ཡོད།
ཞ) ཕྱི་ལོ་༢༠༠༣
ལོ་འདིར་ཁྱོན་བསྡོམས་སློབ་ཕྲུག་གྲངས་༢༠༥ ཡོད་པའི་ནང་བུ་༩༧ དང་བུ་མོ་༡༠༨ ཡོད། དེ་མིན་ཡུལ་མིའི་སློབ་ཕྲུག་༧ བྱུང་ཡོད། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༡༨ ཡོད་པ་དང༌། དགེ་ལས་༢༠ ཡོད།
གངས་ཅན་བདེ་རྩ་ཚོགས་པས་རྩ་བའི་འགྲོ་སོང་ཆ་ཚང་གནང་བཞིན་ཡོད་ནའང༌། དམིགས་བསལ་ཐོག་ས་གནས་ས་ཐོག་ནས་སེལ་དགོས་སྟབས། ཀམ་པུ་ཊར་འཛིན་ཁང་དང་ཀམ་པུ་ཊར་ཉི་ཤུ་རྩ་གྲངས་ཐོག་སློབ་ཕྲུག་རྣམས་ལ་དེང་དུས་ཤེས་ཡོན་གྱི་མཐུན་རྐྱེན་སྦྱར་ཐུབ་པ་བྱུང་ཡོད།
ཟ) ཕྱི་ལོ་༢༠༠༤
ལོ་འདིར་ཁྱོན་བསྡོམས་སློབ་ཕྲུག་༢༡༡ ཡོད་པའི་ནང་བུ་༩༢ དང་བུ་མོ་༡༡༩ དགེ་ལས་༢༠ བཅས་ཡོད། དེ་མིན་ཡུལ་མིའི་སློབ་ཕྲུག་༧ བྱུང༌། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༢༧ ནས་༢ ཡིག་རྒྱུགས་འཕྲོད་མེད་པ་དང༌།
འ) ཕྱི་ལོ་༢༠༠༥
ལོ་འདིར་ཁྱོན་བསྡོམས་སློབ་ཕྲུག་གྲངས་༢༠༩ ཡོད་པའི་ནང་བུ་༡༡༤ དང་བུ་མོ་༩༥ ཡོད། དེ་མིན་ཡུལ་མིའི་སློབ་ཕྲུག་༡༠ ཡོད། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༢༣ ཡོད་པ་དང༌། དགེ་ལས་༢༠ ཡོད།
ཡ) ཕྱི་ལོ་༢༠༠༦
ལོ་འདིར་ཁྱོན་བསྡོམས་སློབ་ཕྲུག་གྲངས་༢༠༦ ཡོད་པའི་ནང་བུ་༩༥ དང་བུ་མོ་༡༡༡ ཡོད། དེའི་ནང་ཡུལ་མིའི་སློབ་ཕྲུག་༢༣ བྱུང་འདུག འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༢༡ ཡོད་པ་དང༌། དགེ་ལས་༢༠ ཡོད།
ར) ཕྱི་ལོ་༢༠༠༧
ལོ་འདིར་ཁྱོན་བསྡོམས་སློབ་ཕྲུག་གྲངས་༢༡༥ ཡོད་པའི་ནང་བུ་༡༠༠ དང་བུ་མོ་༡༡༥ ཡོད། དེའི་ནང་ཡུལ་མིའི་སློབ་ཕྲུག་༡༠ བྱུང་འདུག འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༣༢ དང༌། དགེ་ལས་༡༧ བཅས་ཡོད།
ལ) ཕྱི་ལོ་༢༠༠༨
ལོ་འདིར་ཁྱོན་བསྡོམས་སློབ་ཕྲུག་གྲངས་༡༨༨ ཡོད་པའི་ནང་བུ་༨༧ དང་བུ་མོ་༡༠༡ ཡོད། དེའི་ནང་ཡུལ་མིའི་སློབ་ཕྲུག་༡༠ བྱུང༌། འཛིན་གྲྭ་བརྒྱད་པ་བར་འགྲོ་བའི་སློབ་ཕྲུག་༢༨ དང༌། དགེ་ལས་༡༧ བཅས་ཡོད།
ཤ) ཕྱི་ལོ་༢༠༠༩
ལོ་འདིར་ཁྱོན་བསྡོམས་སློབ་ཕྲུག་གྲངས་༡༥༠ ཡོད་པའི་ནང་སློབ་ཕྲུག་བུ་༦༨ དང་བུ་མོ་༨༢ ཡོད། དེའི་ཁྲོད་བོད་རིགས་སློབ་ཕྲུག་༡༢༠ དང་ཡུལ་མིའི་སློབ་ཕྲུག་༣༠ བཅས་ཡོད། ཁྱོན་བསྡོམས་དགེ་༡༠ དང་ལས་བྱེད་༥ བཅས་དགེ་ལས་༡༥ ཡོད་པའི་ཁྲོད་བོད་རིགས་༡༠ ཡོད།
ཕྱི་ལོ་༡༩༨༩ ནས་སློབ་གྲྭ་འདི་ལ་འཛིན་རིམ་བདུན་པ་བཙུགས་ཐུབ་པ་བྱུང་འདུག་ལ། ཕྱི་ལོ་༡༩༨༩ ནས་༢༠༠༩ བར་འདས་པའི་ལོ་ངོ་༢༡ རིང་སློབ་གྲྭ་འདི་ནས་འཛིན་རིམ་བདུན་པའི་ཡིག་རྒྱུགས་འཕྲོད་ནས་གཞི་རིམ་གོང་མའི་སློབ་གྲྭར་བསྐྱོད་མཁན་སློབ་ཕྲུག་གྲངས་༥༦༥ བྱུང་འདུག།

༢། ཤེས་ཡོན་གནས་སྟངས།

བོད་གཞུང་ཤེས་རིག་ལས་ཁུངས་ཀྱི་ཕྱི་ལོ་༢༠༠༧ ཟླ་༡༢ ཚེས་༣༡ ཉིན་གྱི་སྡོམ་ཐོ་ལྟར་ན། སྤོག་ར་བཀྲ་ཤིས་དཔལ་འཁྱིལ་ཀེ་ལ་ཤ་སློབ་གྲྭའི་ནང་སློབ་ཕྲུག་བུ་༩༨ དང་བུ་མོ་༡༡༧ བཅས་ཁྱོན་བསྡོམས་སློབ་ཕྲུག་༢༡༥ ཡོད་པའི་ཁྲོད་གཏན་སློབ་ཕྲུག་༦༨ དང༌། ཉིན་སློབ་གྲངས་༡༤༧ དང༌། བོད་རིགས་མ་ཡིན་པའི་སློབ་ཕྲུག་༤༡ ཡོད། དགེ་རྒན་༡༥ དང་ལས་བྱེད་༥ བཅས་ཁྱོན་བསྡོམས་དགེ་ལས་༢༠ ཡོད།
ཕྱི་ལོ་༢༠༠༡ ལོ་ནས་༢༠༠༩ བར་འདས་པའི་ལོ་ངོ་༩ རིང་སློབ་གྲྭ་འདིའི་སློབ་ཕྲུག་གྲངས་འབོར་འཕར་ཆག་གི་གནས་སྟངས་གཤམ་གསལ།
བཙན་བྱོལ་བོད་མིའི་གཞི་རིམ་ཤེས་རིག་སྲིད་བྱུས་ཐོག་བལ་ཡུལ་བོད་མིའི་སློབ་གྲྭ་ཁག་ནས་དོ་སྣང་ཆེན་པོ་བྱེད་བཞིན་ཡོད་ནའང༌། གཞན་དབང་སྟབས་བསྟུན་ལ་བརྟེན་ལག་བསྟར་ཆ་ཚང་ཞིག་བྱ་དཀའ་བའི་གནས་སྟངས་ཆགས་འདུག་ཀྱང༌། སྲིད་བྱུས་དགོངས་དོན་བོད་མི་དགེ་རྒན་ལས་བྱེད་དང༌། སློབ་ཕྲུག་མི་མང་བཅས་ལ་འགྲེལ་བརྗོད་ཡང་ཡང་བྱེད་པ་དང༌། སློབ་གྲྭ་དང་འཛིན་གྲྭའི་སྒྲོམ་གཞི་འགྱུར་བཅོས་མ་བཏང་བའི་སྒོ་ནས་སློབ་ཁྲིད་ཀྱི་དོན་སྙིང་ཐད་འགྱུར་བ་འབྱུང་ཐབས་གཙོ་འདོན་བྱས་ཡོད།
དེ་ཡང་དེང་རབས་སློབ་གསོ་རིག་པའི་གཞུང་དོན་ལྟར་སློབ་ཚན་དང་སློབ་མ་སྐྱོང་སྟངས་ལག་བསྟར་བྱེད་པ་དང་ཆབས་ཅིག བོད་མིའི་མྱོང་གོམས་དང་ཆེས་འཚམས་པའི་བོད་ཀྱི་སྲོལ་རྒྱུན་སློབ་ཁྲིད་ཐབས་ལམ་དང་ལྟ་གྲུབ་ལས་ལེགས་ཆ་བསྡུ་ལེན་གྱིས་སློབ་མ་རྣམས་ཀུན་སྤྱོད་དང་ཤེས་ཡོན་གཉིས་ལྡན་ཞིག་བསྐྱེད་བསྲིང་བྱེད་པའི་དམིགས་ཡུལ་བཟུང་ཡོད།
བོད་མིའི་ཆོས་རིག་སློབ་སྦྱོང་ལ་མཚོན་ན། སློབ་གྲྭ་རང་ངོས་ནས་སློབ་ཕྲུག་རྣམས་ལ་བོད་ཀྱི་ཆོས་དང་རིག་གཞུང་ལ་དོ་སྣང་དང་གོ་རྟོགས་སྤེལ་ཆེད་བོད་སྐད་ངོ་སྤྲོད་དང་ཡར་རྒྱས། ཡིག་གཟུགས་སྦྱོང་བརྡར། འབྲི་ཀློག་དག་གསུམ་གྱི་རྨང་གཞི་འདིང་ཐབས། གཞན་ཡང་ཞོགས་པ་སློབ་ཕྲུག་ལྷན་འཛོམས་སར་སློབ་ཕྲུག་འཛིན་གྲྭ་བཞི་པ་ཡན་ཆད་རྣམས་ཀྱིས་ཉིན་ལྟར་བཀའ་སློབ་དང་གསར་འགྱུར་སོགས་བོད་ཡིག་ཀློག་པ་དང་བཤད་པ། སློབ་གྲྭའི་ཁང་ཚན་ནང་ཁུལ་འགྲན་བསྡུར་གྱི་ཚུལ་གྱིས་བརྡ་དག་འགྲན་བསྡུར་དང༌། རྩོམ་ཡིག་དང་རིག་རྩལ་དང་སྙན་ཚིག་རིག་ལམ་སོགས་ཀྱི་འགྲན་བསྡུར་སྤེལ་བ། འཕྲོད་བསྟེན་སྐོར་གྱི་རིག་རྩལ་འགྲན་བསྡུར(Quiz)དང་བྱེད་སྒོ་སྣ་ཚོགས། རྣལ་འབྱོར་གྱི་དབུགས་སྦྱོང་(Yoga)དང་བོད་ཀྱི་རིག་གཞུང་ནང་མེད་ཐབས་མེད་པའི་གླུ་གར་རོལ་མོ་སོགས་ཀྱི་ནང་དོན་དམ་འཛིན་བྱེད་བཞིན་ཡོད།

༣། གཞུང་འབྲེལ་འཚམས་གཟིགས།

གངས་དཀར་ཏེ་སེའམ་ཀེ་ལ་ཤ་སློབ་གྲྭ་འདིར་བལ་ཡུལ་གངས་ཅན་བདེ་རྩ་དང༌། རང་གཞུང་ཤེས་རིག་ལས་ཁུངས་ཀྱི་དབུ་ལས། ཕྱོགས་གཟིགས་སྤྱི་འཐུས། བལ་ཡུལ་སྐུ་ཚབ་དོན་གཅོད་དང་ལས་བྱེད། དེ་བཞིན་ས་གནས་འགོ་འཛིན་དང༌། བལ་ཡུལ་ས་གནས་དཔོན་རིགས། ཆེད་ལས་པ། ས་གནས་ཕ་མའི་འཐུས་ཚོགས་སོགས་འབྲེལ་ཡོད་ཁག་གིས་སྐབས་སྐབས་སུ་འཚམས་གཟིགས་གནང་སྟེ། སློབ་གྲྭའི་གནས་སྟངས་སྤྱི་དང༌། ཁྱད་པར་གཞི་རྩའི་མཐུན་རྐྱེན་དང་དཀའ་ངལ་སྐོར་ལ་ཐུགས་ཞིབ་ཀྱིས་མཐུན་འགྱུར་ཞུ་སྒོ་ཁག་འབྲེལ་ཡོད་སོ་སོར་འབོད་ཚུལ་དང་རྒྱབ་སྐྱོར་ཞུས་པའི་གནས་ཚུལ་རྣམས་འདིར་མ་སྤྲོས།

དཔལ་འབྱོར་གླིང་མཉྫུ་ཤྲི་སློབ་གྲྭ།

དཀར་ཆག

༡། འགོ་འཛུགས
༢། མཐུན་རྐྱེན་འཛུགས་སྐྲུན།
༣། སློབ་འཇུག་གནས་སྟངས།

༡། འགོ་འཛུགས།

ཕྱི་ལོ་༡༩༥༩ ལོར་བོད་མི་རྣམས་བཙན་བྱོལ་དུ་འབྱོར་རྗེས། བོད་ཀྱི་བསྟན་སྲུང་དང་བླངས་རུ་ཁག་གིས་བལ་ཡུལ་གློ་སྨོན་ཐང་དུ་ལོ་ངོ་༡༤ རིང་འཇབ་དམག་ལས་འགུལ་ནང་ཞུགས་རྗེས། ཕྱི་ལོ་༡༩༧༤ ལོར་བོད་མི་ཁག་ཅིག་བལ་ཡུལ་བྱང་ཁུལ་སྤོག་རར་གནས་གཞི་ཆགས་ཏེ་གདན་འཐག་གཙོས་པའི་འཚོ་ཐབས་འགོ་འཛུགས་གནང་བས། དཔལ་འབྱོར་གླིང་བོད་མིའི་སྡོད་སྒར་རམ་ལག་ཤེས་བཟོ་རིག་ལྟེ་གནས་ཞེས་པ་ཆགས།
སློབ་གྲྭ་འདི་ནི་དཔལ་འབྱོར་གླིང་ལག་ཤེས་བཟོ་རིག་ལྟེ་གནས་ནས་ཕྱི་ལོ་༡༩༧༧ ཟླ་༤ ཚེས་༡༣ ཉིན་ཤྲི་མཉྫུ་ཤྲི་དམའ་རིམ་སློབ་གྲྭ་(Shree Manjushree Primary School)གསར་འཛུགས་གནང༌། སྐབས་དེར་འཛིན་ཁང་གི་དམིགས་སྒོར་ས་འདམ་གྱི་སྤྱིལ་ཁང་ཞིག་ལས་མེད། སྡོད་སྒར་འདིའི་ཕྲུ་གུ་དང་མཉམ་དུ་བཙུན་ཆུང་ཁ་ཤས་བཅས་གྲངས་༣༥ འདུས་ནས་གཞི་རིམ་སློབ་སྦྱོང་སྤྲོད་འགོ་བརྩམས། གངས་ཅན་བདེ་རྩ་ཚོགས་པའི་སྒྲིག་གཞི་གཞིར་བཟུང་དགེ་རྒན་གཅིག་ཀྱང་བསྐོས་མེད་ཀྱང༌། དགེ་རྒན་གཅིག་གི་གསོལ་ཕོགས་ནར་གཏོང་གནང༌། དེར་བརྟེན་དཔལ་འབྱོར་གླིང་ལག་ཤེས་བཟོ་རིག་ལྟེ་གནས་ཀྱི་ལས་བྱེད་འཇིགས་མེད་བསྟན་འཛིན་ལགས་དང༌། རྟ་མགྲིན་ལགས། མིག་དམར་དགྲ་འདུལ་ལགས་གསུམ་ནས་ལྷག་བསམ་ཆེན་པོས་ཕྱི་ལོ་༡༩༨༠ བར་དགེ་རྒན་གྱི་ཐུགས་འགན་དང་བླངས་ཀྱིས་བཞེས་ཡོད།
ཕྱི་ལོ་༡༩༨༠ ལོར་སྐུ་ཞབས་བློ་བཟང་བསྟན་འཛིན་སློབ་གྲྭའི་འགན་འཛིན་ལ་བསྐོ་བཞག་གནང་སྟེ། སློབ་གྲྭའི་སློབ་ཚན་གཙོ་བོ་བོད་ཡིག་དང༌། ཨིན་ཇི། རྩིས་རིག་གསུམ་ཡིན། སྐབས་དེར་འཛིན་གྲྭ་གསུམ་ཡོད།
ཕྱི་ལོ་༡༩༨༣ ལོར་བློ་བཟང་བསྟན་འཛིན་ལགས་འཕོས་པའི་ཚབ་ཏུ་རྒན་ཆུང་ལགས་ཀྱིས་འགན་འཛིན་གྱི་ཐུགས་འགན་བཞེས། བལ་ཡུལ་དུ་གནས་སྡོད་བོད་མི་ཚོར་མཚོན་ན་བལ་པོའི་སྐད་ཤེས་རྒྱུ་གལ་ཆེན་ཡིན་པར་གཞིགས་ཏེ། སྐུ་ཞབས་སྦི་ཌུར་ཇོ་ཤི་(Mr. Bidur Joshi)དགེ་རྒན་དུ་བསྐོ་བཞག་གནང༌། དེ་ནས་སློབ་ཕྲུག་ཚོར་བལ་པོའི་སྐད་ཡིག་གི་སློབ་ཚན་འཕར་མ་སློབ་འགོ་བཙུགས།
ཕྱི་ལོ་༢༠༠༩ ལོར་སློབ་གྲྭ་འདིར་ཁྱོན་བསྡོམས་སློབ་ཕྲུག་བུ་༤༢ དང་བུ་མོ་༢༢ བཅས་བསྡོམས་༦༤ ཡོད་པའི་ཁྲོད། བོད་རིགས་སློབ་ཕྲུག་༣༥ ཡོད། དགེ་རྒན་སྐྱེས་པ་༡ དང་བུད་མེད་༦ བཅས་༧ ཡོད་པ་ལས་༦ བོད་རིགས་ཡིན།

༢། མཐུན་རྐྱེན་འཛུགས་སྐྲུན།

སྐབས་དེར་སྤོག་ར་དཔལ་འབྱོར་གླིང་འདི་ཁུལ་གྱི་ཁྱིམ་ཚང་ཕ་མ་ཕལ་ཆེ་བ་དབུལ་ཕོངས་ཉམ་ཐག་ཞེ་གཅིག་ཡིན་སྟབས་དེབ་དང་སློབ་ཡོན་སྤྲོད་ཐུབ་ཀྱི་མེད་པས། དཔལ་འབྱོར་གླིང་ལག་ཤེས་བཟོ་རིག་ལྟེ་གནས་ནས་སློབ་གྲོན་ཆ་ཚང་ཐབས་འཚོལ་གནང་སྟེ། སློབ་ཕྲུག་ཚོར་འགྲོ་གྲོན་གཅིག་ཀྱང་སྤྲོད་མི་དགོས་པའི་ཐོག་ནས་སློབ་སྦྱོང་སྤྲད་ཡོད་ལ། ལྕམ་སྐུ་ཨེ་ནུ་ ཊེ་གར་སི་ཊེཌ་(Aino Tigerstead)ཡི་རོགས་སྐྱོར་འོག་འཛིན་ཁང་གསར་རྒྱག་དང་ཆབས་ཅིག་དགེ་རྒན་གཅིག་གི་གླ་ཕོགས་ཀྱང་གསོལ་སྩལ་གནང༌།
ལོ་དུས་རིམ་སོང་གིས་སློབ་ཕྲུག་ཚོའི་ཤེས་ཡོན་གོང་མཐོར་གཏོང་སླད་དགེ་རྒན་མང་པོ་བསྐོ་བཞག་གནང་བ་དང་ཆབས་ཅིག་སློབ་ཚན་ཡང་མང་དུ་བཏང༌། དགེ་རྒན་དང་ཕ་མའི་འབྲེལ་ལམ་ཟབ་ཏུ་གཏོང་སླད་དགེ་རྒན་ཕ་མའི་ཚོགས་ཆུང་གསར་འཛུགས་གནང་གལ་ཆེ་བར་གཞིགས་ཏེ། ཕྱི་ལོ་༡༩༨༥ ཟླ་༣ ཚེས་༢༡ ཉིན་ཕ་མ་ཚོས་འོས་ཤོག་འཕངས་ཏེ་དགེ་རྒན་ཕ་མའི་ཚོགས་ཆུང་ཐོག་མར་བཙུགས།
ཕྱི་ལོ་༡༩༨༦ ལོར་འཛིན་ཁང་༥ དང་ཡིག་ཚང་༡ བཅས་གསར་རྒྱག་གནང་བས་སློབ་ཕྲུག་ཚོ་འཛིན་རིམ་ལྔ་པ་བར་འགྲོ་ཐུབ་པ་བཟོས། དཔལ་འབྱོར་གླིང་ལག་ཤེས་བཟོ་རིག་ལྟེ་གནས་ཁང་གིས་སློབ་ཕྲུག་ཚང་མར་སྒྲིག་ཆས་གསར་བཟོས་གནང་སྟེ། ཕྱིས་སུ་སློབ་གྲྭའི་སྒྲིག་ཆས་དང་ཡིག་ཆས་ཀྱི་འགྲོ་གྲོན་གློ་སྒྲིག་འཛིན་སྐྱོང་ཚོགས་ཆུང་ནས་གནང་ལམ་བཏོད།
ཕྱི་ལོ་༡༩༨༩ ལོར་ཨིན་ལན་བོད་ཀྱི་རོགས་ཚོགས་(Help Tibet England) ནས་སྔོན་འགྲོའི་སྡེ་ཚན་(Kindergarden section)༢ དང་བྱིས་གསོ་ཁང་གི་སྡེ་ཚན་༡ བཅས་གསར་རྒྱག་ལ་རོགས་སྐྱོར་གནང་བ་དང༌། སྔོན་འགྲོའི་ཕྲུ་གུར་གཟིགས་སྐྱོང་གནང་མཁན་མ་ཚབ་རྒན་མོ་གཉིས་ཀྱང་བསྐོ་བཞག་གནང༌།
ཕྱི་ལོ་༡༩༩༡ ཟླ་༧ ཚེས་༡༥ ཉིན་སློབ་གྲྭའི་འཛིན་སྐྱོང་ཚགས་ཚུད་གཏོང་སླད་གཞིས་ཆགས་ལས་ཁང་ནས་སློབ་གྲྭའི་འཛིན་སྐྱོང་འགན་འཁུར་ཡོངས་རྫོགས་གློ་སྒྲིག་བདེ་དོན་ལས་ཁུངས་ལ་རྩིས་སྤྲོད་གནང༌། དེ་ནས་བཟུང་སློབ་གྲྭའི་འགྲོ་གྲོན་ཡོངས་རྫོགས་གློ་སྒྲིག་ལས་ཁུངས་ནས་ཐབས་འཚོལ་གྱིས་གཏོང་མུས་ཡིན། སློབ་གྲྭའི་འཛིན་སྐྱོང་ལས་དོན་ཆེད་འཛིན་སྐྱོང་ཚོགས་ཆུང་ཞིག་ཡོད་པ་དེའི་ནང་ཚོགས་མི་ལྔ་ཡོད་པ་དེའི་ཁོངས་གློ་སྒྲིག་བདེ་དོན་གྱི་ཚོགས་གཙོ། གཞིས་འགོ། དགེ་རྒན་ཆེན་མོ་དང་དགེ་རྒན་ཕ་མའི་ཚོགས་ཆུང་བཅས་ཡིན། སློབ་གྲྭའི་འཛིན་སྐྱོང་ཡར་རྒྱས་གཏོང་ཕྱོགས་ལ་ཟླ་རེར་ཚོགས་འདུ་རེ་ཚོགས་བཞིན་ཡོད།
ཕྱི་ལོ་༡༩༩༥ ལོར་སྐུ་ཞབས་ཌེ་ཝིད་ ཨེ་ཌིཡི་ནི་(David Adean)ནས་ཨིན་ཡུལ་ནས་དང་བླངས་དགེ་རྒན་གནང་བར་ཡོང་མཁན་དེའི་རོགས་སྐྱོར་འོག་སློབ་གྲྭའི་དཔེ་མཛོད་ཁང་གསར་རྒྱག་ཐུབ་པ་བྱུང༌། དེ་ནི་སློབ་ཕྲུག་ཚོའི་ཤེས་ཡོན་ཡར་རྒྱས་གཏོང་སླད་བཟོས། ཊ་རེཀ་ཨེཌ་(Trek Aid)རོགས་ཚོགས་ནས་ཌེ་ཝིད་བརྒྱུད་དཔེ་མཛོད་ལ་དགོས་ངེས་ཀྱི་འཛིན་ཆས་དང་དེབ་རོགས་རམ་གནང༌།
ཕྱི་ལོ་༡༩༩༦ ལོར་ལྕམ་སྐུ་ཨི་མ་ཁར་ཊར་(Emma Carter)ནས་རོགས་དངུལ་གནང་སྟེ་དཔེ་མཛོད་ཀྱི་སྟེང་དུ་ཁང་མིག་འཕར་མ་ཞིག་བརྒྱབས། དེ་སྔའི་ཡིག་ཚང་དེ་གཉེར་ཁང་ལ་བསྒྱུར་ཏེ་ཁང་མིག་གསར་པ་དེར་ཡིག་ཚང་བཟོས།
ཕྱི་ལོ་༡༩༩༩ ལོར་ལྕམ་སྐུ་ཨེ་མིའ་ཌོག་ལཱ་སེ་(Amy Douglas)དང་ལྕམ་སྐུ་ས་རཱ་ལོང་གྷེར་(Sarah Longar)གཉིས་ཀྱིས་རོགས་རམ་འོག་སིལ་སྤོལ་རྩེད་ཐང་འཐུས་ཚང་ཞིག་བཟོས། ཁོང་གཉིས་ཀྱང་ཨིན་ཡུལ་ནས་དང་བླངས་དགེ་རྒན་གནང་བར་ཡོང་མཁན་རེད།
ཕྱི་ལོ་༢༠༠༠ ལོར་སྔོན་འགྲོའི་འཛིན་གྲྭར་འགྲོ་མཁན་བོད་ཕྲུག་ཚོའི་སློབ་སྦྱོང་གནད་སྨིན་ཡོང་སླད་སྔོན་འགྲོའི་དགེ་རྒན་གཞོན་མ་ཞིག་གསར་བསྐོ་གནང༌། ཕྱི་ལོ་༢༠༠༥ ལོར་རྒྱལ་སྤྱིའི་ཨོ་ཀན་ཌན་(Ockenden International)དང་གློ་སྒྲིག་བདེ་དོན་ཐུན་མོང་ནས་རྒྱུ་སྦྱོར་གྱིས་ཚོགས་ཁང་ཆུང་ངུ་༡ དང་ཁང་མིག་འཕར་མ་༢ གསར་རྒྱག་གནང༌། སྔ་དགོང་ཞལ་འདོན་གནང་བའི་སྐབས་དང་རིག་གཞུང་འཁྲབ་སྟོན་སྦྱོང་བརྡར་བྱེད་པའི་སྐབས་གནམ་གཤིས་ཀྱི་དཀའ་ངལ་འཕྲད་བཞིན་ཡོད་པར་བརྟེན་ཚོགས་ཁང་ཆུང་ངུ་དེས་ཕན་ཐོགས་ཆེན་པོ་བྱུང༌། ཁང་མིག་གཞན་གཉིས་དེ་ཚན་རིག་ཚོད་ལྟ་ཁང་དང་ཀམ་པུ་ཊར་སྦྱོང་བརྡར་ཁང་དུ་བཀོལ་སྤྱོད་བྱེད་མུས་ཡིན།
སློབ་གྲྭ་འདིར་ད་བར་དགེ་ཆེ་རིམ་ཕེབས་ཀྱི་མཚན་གཞུང་དང་ལས་དུས་གཤམ་གསལ།

ཕྱི་ལོ་༢༠༠༧ ལོར་ཨིན་ལན་དུ་དང་བླངས་དགེ་རྒན་བྱས་མྱོང་བའི་སྐུ་ཞབས་བྷེན་ཇ་མེན་ མེ་ཡེར་(Mr. Benjamin Meyer)གྱིས་སློབ་གྲྭ་འདིའི་སློབ་ཕྲུག་ཚོའི་འཐུང་ཆུའི་འཕྲོད་བསྟེན་གྱི་དགོས་མཁོ་དགོངས་གཟིགས་ཀྱིས་འཐུང་ཆུ་གཙང་བཟོའི་འཕྲུལ་ཆས་(Eurogurd)རྟགསར་འཛུགས་གནང་བས། སློབ་ཕྲུག་ཚོའི་རྒྱུན་གཏན་འཕྲོད་བསྟེན་ལ་ཕན་ཐོགས་བྱུང༌།
དེང་སྐབས་སློབ་གྲྭ་འདིར་གཞི་རིམ་ཤེས་ཡོན་སློབ་སྦྱོང་སྦྱོར་སྤྲོད་ཀྱི་མཐུན་རྐྱེན་ཆ་ཚང་ལྡན་ཡོད། ཕྱི་ལོ་༢༠༠༦།༢༠༠༧ ལོར་སློབ་གྲྭ་འདིར་ཁྱོན་བསྡོམས་སློབ་ཕྲུག་གྲངས་༦༡ ཡོད་པའི་ཁོངས་ནས་བོད་པའི་ཕྲུ་གུ་༣༣ དང་ས་གནས་ཡུལ་མིའི་ཕྲུ་གུ་༢༨ ཡོད། ཕྱི་ལོ་༢༠༠༧།༢༠༠༨ ལོར་སློབ་ཕྲུག་གྲངས་༦༢ དང་དམའ་རིམ་དགེ་རྒན་༦། བྱིས་གསོའི་སྡེ་ཚན་དུ་སྔོན་འགྲོའི་དགེ་རྒན་༡ དང་མ་ཚབ་༢ བཅས་ཡོད།

༣། སློབ་འཇུག་གནས་སྟངས།

ཕྱི་ལོ་༢༠༠༧ ཟླ་༡༢ ཚེས་༣༡ ཉིན་བོད་གཞུང་ཤེས་རིག་ལས་ཁུངས་ཀྱི་སྡོམ་ཐོ་ལྟར་ན། བལ་ཡུལ་དཔལ་འབྱོར་གླིང་སློབ་གྲྭ་འདིར་སློབ་ཕྲུག་བུ་༣༤ དང་བུ་མོ་༢༧ བཅས་ཁྱོན་བསྡོམས་༦༡ ཡོད་པ་ཚང་མ་ཉིན་སློབ་ཡིན་ཞིང༌། སློབ་ཕྲུག་དེ་དག་ཁྲོད་བོད་རིགས་མ་ཡིན་པའི་སློབ་ཕྲུག་༢༧ དང༌། ཁྱོན་བསྡོམས་དགེ་ལས་༦ བཅས་ཡོད།
ཕྱི་ལོ་༡༩༨༩ ལོ་ནས་༢༠༠༩ བར་འདས་པའི་ལོ་ངོ་༢༡ རིང་དཔལ་འབྱོར་གླིང་མཉྫུ་ཤྲི་སློབ་གྲྭའི་སློབ་ཕྲུག་གྲངས་འབོར་འཕར་ཆག་གི་གནས་སྟངས་གཤམ་གསལ།
དེ་བཞིན་ཕྱི་ལོ་༢༠༠༩ ལོར་སློབ་གྲྭ་འདིའི་སྔོན་འགྲོ་འོག་མའི་ནང་སློབ་མ་༧ ཡོད་པ་དང༌། སྔོན་འགྲོ་གོང་མར་སློབ་མ་༧ འཛིན་རིམ་དང་པོར་སློབ་མ་༡༡ འཛིན་རིམ་གཉིས་པར་སློབ་མ་༩ འཛིན་རིམ་གསུམ་པར་སློབ་མ་༩ འཛིན་རིམ་བཞི་པར་སློབ་མ་༣ འཛིན་རིམ་ལྔ་པར་སློབ་མ་༤ བུ་བཅོལ་ཁང་གི་ཕྲུ་གུ་༡༤ བཅས་ཁྱོན་བསྡོམས་སློབ་མ་༥༠ ཡོད།
སློབ་གྲྭ་འདི་ནས་མཐར་ཕྱིན་སློབ་མ་ཇི་ཙམ་གསོ་སྐྱོང་བྱས་པའི་གྲངས་འབོར་ནི། ཕྱི་ལོ་༡༩༨༧ ནས་ཕྱི་ལོ་༢༠༠༨ བར་ཁྱོན་བསྡོམས་སློབ་ཕྲུག་གྲངས་༢༠༧ ཐོན་ཡོད་ཅིང༌། གནས་ཡུལ་དང་སློབ་གྲྭའི་མཐུན་རྐྱེན་ལ་གཞིགས་ན་གང་ལེགས་བྱུང་ཡོད། སློབ་ཐོན་མ་ཐུབ་པའི་སློབ་ཕྲུག་ལྷག་མ་རྣམས་དཔལ་འབྱོར་གྱི་དཀའ་ངལ་འཕྲད་ནས་སློབ་གྲྭ་བསྐྱུར་དགོས་བྱུང་ཡོད། ཁ་ཤས་ནི་རིག་སྟོབས་ཞན་པས་སློབ་མཇུག་མ་འཁྱོལ་བ་དང་ཡང་བྱུང་ཞིང༌། ཁ་ཤས་ནི་རབ་ཏུ་བྱུང་ནས་ཆོས་སྡེ་ཁག་ཏུ་འཛུལ་ཞུགས་བྱས་པ་ཡང་ཡོད།
ཕྱི་ལོ་༢༠༠༩ ལོར་ལོ་འཁོར་ཡིག་རྒྱུགས་སུ་ཞུགས་པའི་སློབ་ཕྲུག་༥༠ ནང༌། སློབ་ཕྲུག་༤༥ ཡིག་རྒྱུགས་འཕྲོད་པ་དང༌། ༥ མ་འཕྲོད་པ་བཅས་རྒྱུགས་འཕྲོད་བརྒྱ་ཆ་༩༠ ཡིན།
སློབ་གྲྭ་འདིར་བོད་གཞུང་ཤེས་རིག་ལས་ཁུངས་དང༌། སྤྱི་འཐུས། གངས་ཅན་བདེ་རྩ། བལ་ཡུལ་སྐུ་ཚབ་དོན་གཅོད་རྣམ་པ་བཅས་དུས་དུས་སུ་འཚམས་གཟིགས་སུ་ཕེབས་ཏེ་ཕན་ནུས་ལྡན་པའི་བཀའ་སློབ་ལམ་སྟོན་གནང་བ་ཁག་དགེ་རྒན་དང་སློབ་ཕྲུག་ཚོའི་ཤེས་ཡོན་དང་ཀུན་སྤྱོད་ཡར་རྒྱས་གཏོང་བར་ཕན་ཐོགས་ཆེན་པོ་བྱུང༌།