རྔོག་ལོ་ཙཱ་བ་བློ་ལྡན་ཤེས་རབ།(༡༠༥༩-༡༡༠༩)
༄༅། །ན་མོ་གུ་རུ། དག་ཡིག་ཉེར་མཁོ་བསྡུས་པ་བཞུགས་ཞེས་བྱ་བ། འཇམ་པའི་དབྱངས་ལ་ཕྱག་འཚལ་ལོ། །འདིར་ཉེ་བར་མཁོ་བའི་ཡི་གེ་འདིའི་མིང་འདི་ཞེས་བྱ་ཞིང༌། དོན་འདི་བརྗོད་པ་ལ་ཚིག་འདི་དང་འདི་འཇུག་གོ་ཞེས་བདེ་བླག་ཏུ་རྟོགས་པར་བྱ་བའི་ཕྱིར་བསྟན་བཅོས་འདི་རྩོམ་མོ། །
དེ་ལ་བསྟན་བཅོས་འདིའི་སྡོམ་ཚིག་ནི། སྤྱིར་བསྟན་གྲངས་ངེས་ཚིག་ཕྲད་དང༌། །འཕུལ་དང་བརྟེན་པའི་སྤང་བླང་དང༌། །དམིགས་བསལ་སོ་སོར་དབྱེ་བ་སྟེ། །རྣམ་པ་ལྔ་ཡིས་བསྡུས་པ་ཡིན། ། ཞེས་བྱའོ། །
དེ་ལ་དང་པོ་ནི། ཡི་གེ་སུམ་ཅུ་བུ་ནི་བཞི། །ཡ་བཏགས་བདུན་དང་ར་བཏགས་བཅུ། །དེ་བཞིན་འོག་ཏུ་ལ་བཏགས་དྲུག །ཝ་བཏགས་རྣམ་པ་བཅུ་གཉིས་དང༌། །ར་ལ་བཏགས་པ་བཅུ་གསུམ་དང༌། ། ལ་ལ་བཏགས་པ་བཅུ་དང་ནི། །ས་ལ་བཏགས་པ་བཅུ་གཉིས་དང༌། །འཕུལ་ཡིག་ལྔ་དང་མཐའ་རྟེན་བཅུ། །སྟེང་འོག་ཡི་གེ་མུ་བཞི་སྟེ། །འཕུལ་དང་རྟེན་ལ་མུ་གསུམ་ཡིན། །ཞེས་པ་ནི། བསྟན་བཅོས་འདིའི་བརྗོད་བྱ་གཙོ་ཆེ་བ་སྤྱིར་བསྟན་པའོ། །
ད་ནི་སྤྱིར་བསྟན་པ་དེ་དག་རིམ་པ་བཞིན་དུ་གྲངས་ངེས་པའི་ཚུལ་འདི་དག་ཡིན་ནོ། །ཞེས་བཤད་པར་བྱ་སྟེ། ཡི་གེ་སུམ་ཅུ་དཔེར་བརྗོད་ནི། ཨ་ཕ་ཁོ་ནི་ཇ་ཆང་ཤ །གཅིག་པུ་ཟ་འཛུ་དེ་ལ་ཧེ། །ཉེ་ཝ་ཚོ་ཡི་ཏི་ཀ་རེ། །ཐོབ་ཙམ་ཞུ་ཞེས་བྱ་བ་ཡིན། །
གུ་གུ་ཞབས་ཀྱུ་ན་རོ་འགྲེང་བུ་རྣམས་ནི་བུ་བཞི་སྟེ། ཡི་གེ་ཀུན་ལ་སྦྱར་རུང་དཔེར། །ཚིག་འདི་ཡིད་ཀྱིས་འདྲིས་བགྱིའི་ཕྱིར། །བུ་ཚུར་མྱུར་དུ་ཟུང་དུ་ཟུངས། །གཡེལ་མེད་བཤེས་གཉེན་ཉེར་བསྟེན་ཏེ༑ ༑ཆོས་ནོར་ལོངས་སྤྱོད་ཡོངས་ཐོབ་མཛོད། །
ཡ་བཏགས་བདུན་དང་ར་བཏགས་ནི། །བཅུ་ཉིད་བཤད་པ་དེ་དག་དཔེར། ༈ །ཀྱེ་མ་གྲོགས་ཁྱོད་ཆང་ལ་དགྱེས། །རྟོག་དཔྱོད་ཕྱོགས་བཅུར་བྱེད་ཅིང་མྱོང༌། ༈ །བཀྲ་ཤིས་འཁྲིགས་པའི་གྲྭ་ས་འདིར། །དྲ་སྒོས་སྤྲས་པའི་འཕྲེད་སྒོ་ཅན། །ཕོ་བྲང་ནང་ན་སྨྲ་མཁན་བྱ། །སྐེ་བ་བསྲིང་ནས་ཧྲིག་གེ་བལྟ། ༈ །ལ་བཏགས་དྲུག་གི་དཔེར་བརྗོད་ནི། ཀླ་ཀློ་གླན་པ་བླུན་པོ་རྣམས། །ཟླ་བོ་བརླག་གོ་བྱ་བ་སློབ། ༈ །ཝ་བཏགས་བཅུ་གཉིས་དེ་ཡང་དཔེར། །ཀྭ་ཡེ་ཁྭ་མཁོན་གྲྭ་པ་འདི། །ལན་གྲངས་བཅྭ་བརྒྱད་རྩྭ་ཁུ་འབྱུགས། །ལན་ཚྭ་ཟོས་ནས་འཕྲུག་ཞྭ་གྱོན། །ཟྭ་ཐུག་རྭ་གཟར་དག་གིས་བཅུས། །ཤྭ་ཆུ་བསྭག་ལམ་འཛེམ་མེད་རྒོལ། །ཕུ་ཐུང་ཧྭ་གདོད་གོས་རྣམས་གྱོན། ༈ །ར་ལ་བཏགས་པ་བཅུའི་དཔེར། མཐུན་རྐྱེན་རྒྱགས་ཆུ་རྔམ་པོ་ཆེ། །རྗེ་ཡི་སྲོལ་རྙིང་བརྟེན་པ་ཡི། །མཚོ་ཆེན་རྡོལ་བ་རྣམས་ཀྱི་རྦ། །རྨངས་ན་རྩེ་མོའི་རྫོང་ཞེས་ནི། །རླུང་གིས་བསྐྱོད་འདྲ་ཐོབ་པར་འགྱུར། ༈ །ལ་ལ་བཏགས་པ་བཅུ་པོའི་དཔེར།། ལྐུགས་པ་འདི་ཡི་ལྒང་གྲོ་ལྔ། །ལྕུག་ཕྲན་ལྗོན་པའི་ལྡངས་ནས་རྙེད། །བལྟས་ན་ཟོས་པའི་ལྤགས་པ་ངེས། །ལྦོས་པའི་ལྷུམས་དག་བདེ་བར་འགྱུར། ༈ །ས་ལ་བཏགས་པ་བཅུ་གཉིས་ནི། །ཟས་སྙོམ་སྒྲིམས་པའི་སྔ་རོལ་ཏུ། །སྙན་བརྒྱུད་སྟེར་བའི་སྡོམ་བརྩོན་ཏེ། །སྣ་ཚོགས་སྤེལ་ཞིང་སྦྱར་བ་ཡིས། །མདོ་དང་སྨོན་ལམ་བཀའ་སྩལ་ཏེ། །སླད་ནས་ཟས་ཀྱི་བྱ་བ་བྱས། །
ག་ད་བ་མ་འ་དང་ལྔ། །འཕུལ་ཡིག་ལྔ་ཡིས་འཕུལ་བ་ན། ༈ །ག་ཡིས་འཕུལ་བ་བཅུ་གཅིག་དཔེར། །གཏན་དུ་གདན་སར་གནས་པའི་ཚེ། །ལན་གྲངས་གཅིག་དང་གཉིས་མིན་པར། །གཙུག་ལག་གཞུང་རྣམས་བློ་ལ་བཟུངས། །གཡེལ་མེད་བདེ་གཤེགས་གསུང་རབ་བལྟས། ༈ །ད་ཡིས་འཕུལ་བ་དྲུག་གིས་དཔེར། དཀར་པོ་དགེ་བའི་དངོས་གྲུབ་ཏུ། །དཔལ་འབྱོར་དབང་ཕྱུག་མི་དམན་ཐོབ། ༈ ། བས་འཕུལ་བཅུ་ཡི་དཔེར་བརྗོད་ནི། བཀྲ་ཤིས་བགྲང་བས་བཅོམ་ལྡན་བཏུད། །བདུག་གིས་བཙུན་ཚུགས་ཚུལ་བཞིན་བཟུངས། །སྡིག་པ་བཤགས་ནས་དགེ་བ་བསགས། ༈ །མ་ཡིས་འཕུལ་བ་བཅུ་གཅིག་དཔེར། །མཁས་པ་མགོན་པོའི་མངོན་སུམ་དུ། །མཆི་ནས་མཇལ་བར་མཉེས་གྱུར་ཏེ། །མཐོ་བའི་མདུན་མ་གྲུབ་བམ་མནོ། །མཚན་མོའི་རྨི་ལྟས་མཛེས་པ་རྨིས། ༈ །འས་འཕུལ་བཅུ་ཡི་དཔེར་བརྗོད་ནི། འཁུན་ཅིང་འགུལ་བའི་ལུས་འཆང་སྟེ། །འཇའ་མོ་འཐད་པར་འདུག་ཅེས་ཏེ། །འཕྱོན་མ་འབོད་པར་འཚལ་ནས་འཛུད། །
ག་ང་ད་ན་བ་མ་འ། །ར་ལ་ས་བཅུ་མཐའ་རྟེན་ཏེ། །ཕྱོགས་ཙམ་རིམ་བཞིན་དཔེར་བརྗོད་ན། ། བདག་ཀྱང་ཁྱེད་བཞིན་གྲུབ་བསམ་དགའ། །མྱུར་དུ་འཇལ་ཞུས་ལྟ་བུ་སྟེ། ༈ །ཀ་ནས་ཨ་ཡི་བར་དག་ལ༑ ༑ཕལ་ཆེར་འཇུག་སྟེ་སྐབས་ཀྱིས་ཤེས། །རྐྱང་པ་འཕུལ་བ་འ་མཐའ་དགོས། །བརྩེགས་དང་བུ་དྲུག་ཅན་ལ་སྤང༌། །དེ་ཕྱིར་འ་ནི་མཐའ་རྟེན་ཕྱེད། །འི་དང་འང་སོགས་ཚེག་བར་མིན། །སྟེང་འོག་དག་གི་ཡི་གེ་ལ། །གཉིས་ཀ་ཡིན་དང་གཉིས་ཀ་མིན། །སྟེང་ཡིག་ཡིན་ཡང་འོག་ཡིག་ནི། །མིན་ཞེས་བྱ་བའི་མུ་བཞི་སྟེ། །རིམ་པས་ཀ་ཁ་ས་ཧ་བཞིན། །འཕུལ་ཡིག་མཐའ་རྟེན་གཉིས་ཀ་མིན། །གཉིས་ཀ་ཡིན་དང་མཐའ་རྟེན་ནི། །ཡིན་ཡང་འཕུལ་ཡིག་མིན་པ་གསུམ། །ཀ་དང་ག་དང་ང་བཞིན་ནོ། །ཞེས་པ་ནི་གྲངས་ངེས་རྒྱས་པར་བསྟན་པའོ། །
ད་ནི་ཡི་གེ་སྔ་མའི་ཤུགས་ཀྱིས་དེའི་རྗེས་འཇུག་ཏུ་ཚིག་འདི་དང་འདི་འཇུག་གོ་ཞེས་ཇི་ལྟར་ཐོབ་ཚུལ་རིམ་པ་བཞིན་བཤད་པ་ནི། ༈ ད་བ་ས་ཀྱི་ག་ང་གི །ན་མ་ར་ལ་གྱི་སྟེ་དཔེར། །ཁྱོད་ཀྱི་རྒྱབ་ཀྱི་ངོས་ཀྱི་ཆ། །བདག་གི་གདོང་གི་ངོས་ན་མཆིས། །མདུན་གྱི་རུམ་གྱི་སྐོར་གྱི་ནི། །མངལ་གྱི་སྒོ་དེ་བདག་ལ་སྟོན། །འ་དང་རྐྱང་པ་འདོགས་ཅན་གྱི། །རྗེས་སུ་འི་འཐོབ་ཚིགས་བཅད་ཀྱི། །ཡི་གེ་མ་ཚང་ཡི་ཐོབ་དཔེར། །རྩེ་དགའི་དགའ་བས་བདེ་བའི་མཆོག །དེ་སུས་མྱང་བ་དགའ་ཡི་དཔལ། །ས་ཡི་བདག་པོ་དེ་ཡི་གཞན། །
ག་དང་བ་ཡི་རྗེས་སུ་ཏུ། །ང་ད་ན་མ་ར་ལ་དུ། །ས་སུ་འ་དང་འདོགས་ཅན་དང༌། །རྐྱང་པ་རུ་སྟེ་དཔེ་རིམ་བཞིན། །རྟག་ཏུ་རབ་ཏུ་འབྱུང་དུ་དེ། །སྣོད་དུ་རྒྱུན་དུ་ཞིམ་དུ་ཟོ། །མྱུར་དུ་མཇལ་དུ་འོང་དུས་སུ༑ ༑བཟའ་རུ་ཡོད་པའི་གནས་འདི་རུ། །ཁ་རུ་ཞིམ་རྒྱུའི་ཟས་འདི་བྱིན། །
ད་དེ་ན་ར་ལ་ས་ཏེ། །བཏུད་དེ་བཟླན་ཏེ་བྱིན་པ་ཡིས། །བསྐྱད་དེ་འཐུལ་ཏེ་འཇིགས་ཏེ་བྱུང༌། །ག་ང་བ་མ་འ་རྣམས་དང༌། །འདོགས་ཅན་རྐྱང་མཐར་ས་སྟེ་སྟེ། །སྐྲག་སྟེ་གསང་སྟེ་གནས་པ་ཡིས། །ཐུབ་སྟེ་འཛུམ་སྟེ་དགའ་སྟེ་གདའ། །བདེ་སྟེ་ཤ་ཆང་ཟ་སྟེ་སྣང༌། །
ག་ད་བ་སའི་རྗེས་སུའང་ཀྱང༌། །སྐབས་འགར་ནའི་རྗེས་སུའང་ཀྱང༌། །བདག་ཀྱང་འབད་ཀྱང་འབྲེལ་མེད་པའི། །བྱ་བ་ཐོབ་ཀྱང་དེས་ཀྱང་ཅི། །འོན་ཀྱང་འཕྲལ་གྱི་འཚོ་བ་འབྱུང༌། །ང་འ་ན་མ་ར་ལ་ཡང༌། །ཡང་ཡང་སྐྱེས་བུ་འགའ་ཡང་ནི། །བྱོན་ཡང་ནམ་ཡང་མ་ཕྲད་དེ། །སླར་ཡང་མཇལ་ཡང་སྤྱན་མ་དྲོངས། །འདོགས་ཅན་རྐྱང་མཐར་ཕལ་ཆེར་འང༌། །ཚིག་རྐང་མ་ཚང་ཡང་སྟེ་དཔེར། །ཅི་ཡང་ཡོད་པའི་ཕྱུག་པོ་ཡང༌། །དེ་འདྲ་བདག་ལ་འབྱུང་དུའང་རེ། །
ག་ད་བ་ཅིང་ས་མཐར་ཤིང༌། །ཕྱུག་ཅིང་བླུན་པ་རྒུད་ཅིང་འགྲོ །སློབ་ཅིང་ནུས་པ་མཁས་ཤིང་ཕྱུག །ང་འ་ན་མ་ར་ལ་དང༌། །འདོགས་ཅན་རྐྱང་པ་རྣམས་ཞིང་དཔེར། །དྲང་ཞིང་བདེ་བ་རབ་དགའ་ཞིང༌། །སྙན་ཞིང་འགྱུར་བ་འཇམ་ཞིང་མཛེས། །དར་ཞིང་རྒྱས་པར་འཚལ་ཞིང་བདག །བདེ་ཞིང་སྐྱིད་ནས་ཟ་ཞིང་སྣང༌། །ག་ད་བ་ཅེས་ང་འ་དང༌། །ན་མ་ར་ལ་ས་དང་ནི། །འདོགས་ཅན་རྐྱང་པ་ཞེས་ཏེ་དཔེར། །རྟག་ཅེས་བྱ་བའི་བདག་ཡོད་ཅེས། །སྨྲ་བ་ཟབ་ཅེས་བྱུང་ཞེས་ཐོབ། །གདའ་ཞེས་འདི་ལྟ་ཡིན་ཞེས་པའམ། །འདི་ཙམ་ཞེས་པ་འགྱུར་ཞེས་པར། །འཁྲུལ་ཞེས་སྟོན་པས་ལེགས་གསུངས་ཞེས།། མི་མཁས་པ་ཞེས་སྨྲ་ཞེས་བཤད། །ཁ་ཅིག་ས་མཐར་ཤེས་ཞེས་ཟེར། །མི་འཐད་པར་མཐོང་ཁོ་བོས་འདོར། །ག་ད་བ་ཅིག་ས་མཐར་ཤིག །རྐྱང་པའི་རྗེས་སུའང་ཡིན་ཏེ་དཔེར། །ཤོག་ཅིག་སོད་ཅིག་རྒྱོབ་ཅིག་ཅེས། །གྱིས་ཤིག་ཅེས་ནི་ཁ་ཅིག་སྨྲ། །ང་འ་ན་མ་ར་ལ་དང༌། །འདོགས་ཅན་རྣམས་ཀྱི་མཐར་ཞིག་དཔེར། །ཅུང་ཞིག་སྡོད་ལ་འགའ་ཞིག་ལ། །ཕྲིན་ཞིག་ནམ་ཞིག་བསྐུར་ཞིག་ཅེས། །ངལ་ཞིག་གསོས་ལ་མདོ་ཞིག་སྨྲོས། །ན་ར་ལ་གསུམ་རྗེས་སུ་ནི། །སྒྲ་བསྒྱུར་སྔ་མས་ད་དྲག་བཞེད། །དེ་ཚེ་ཅིང་ཅེས་ཅིག་འཐོབ་ཀྱང༌། །ཕྱི་མ་རྣམས་ཀྱིས་ད་དྲག་དོར། །འོན་ཀྱང་ན་ར་ལ་གསུམ་གྱི། །རྗེས་སུ་ཞིང་ཞེས་ཞིག་ཡིན་ནའང༌། །ད་དྲག་ངེས་པར་ཐོབ་པ་དེར། །ད་དྲག་སྦྱོར་རམ་མི་སྦྱོར་ཡང༌། །ཅིང་ཅེས་ཅིག་ཅེས་ཞེས་ཏེ་དཔེར། །མཁས་པར་མཁྱེན་ཅིང་ཡོན་ཏན་གྱིས། །བརྒྱན་ཅེས་ཐོབ་ཀྱི་སྟོན་ཅིག་ཅེས། །ཟེར་ཅིང་མཐོང་ནས་མཚར་ཅེས་ཏེ། །བདག་ཀྱང་འདི་འདྲར་གྱུར་ཅིག་ཅེས། །སྨོན་ལམ་བཙལ་ཅིང་སློབ་པར་ནི། །འཚལ་ཅེས་ཟེར་གྱིས་མྱུར་རྩོལ་ཅིག །ག་ད་བ་མཐར་ཅེ་ན་དང༌། །ས་མཐར་ཤེ་ན་སྦྱར་ཏེ་དཔེར། །སུ་འདུག་ཅེ་ན་བླ་མ་བཞུགས། །ཅི་འཆད་ཅེ་ན་གདམས་པ་སྟེ། །གང་ཟབ་ཅེ་ན་སྤྲོས་བྲལ་ཆོས། །སུས་ཐོས་ཤེ་ན་བདག་གིས་ཐོས། །ང་འ་ན་མ་ར་ལ་དང༌། །འདོགས་ཅན་རྐྱང་པ་ཞེ་ནས་དཔེར།། གང་བྱུང་ཞེ་ན་ཧོར་འདྲ་སྟེ། །དུ་གདའ་ཞེ་ན་མང་པོ་འོ། །སུ་ཡིན་ཞེ་ན་དབེན་པ་སྟེ། །ཁྲིམས་ཀྱིས་དབེན་ནམ་ཞེ་ན་དབེན། །ཅི་སྐོར་ཞེ་ན་རྒྱལ་ཁམས་ཏེ། །གང་བཙལ་ཞེ་ན་ནོམ་པའོ། །ཅི་སྐྱེས་ཞེ་ན་བུ་སྐྱེས་ཏེ། །སུ་ལ་ཞེ་ན་སྨད་ཚོང་ལའོ། །
ག་ད་བ་ས་ན་མ་ནི། །ཟག་པ་མེད་པའི་བྱ་བ་ནི། །ཐོབ་པ་ཉེས་པ་ལས་གྲོལ་ནས། །འགྲོ་ལ་ཕན་པའི་བསམ་པས་གནས། །ང་འ་ར་ལ་འདོགས་ཅན་དང༌། །རྐྱང་པའི་རྗེས་སུ་བ་ཕྱེད་ཝར། །འབོད་པ་རྣམས་ལ་ཝ་སྦྱར་ཞིང༌། །གཞན་ལ་པ་ཉིད་སྦྱར་ཏེ་དཔེར། །བཏུང་བ་དགའ་བ་མྱུར་བར་འཐུང༌། །མཇལ་བ་ཞི་བ་ཚ་བར་འདོད། །ལུང་པ་མདའ་པ་འབྱོར་པ་ཆེ། །ཡུལ་པ་ཕུ་པ་བྱ་བ་མང༌། །
དྲི་བའི་དགག་ཚིག་སྐབས་སུ་ནི། །མཐའ་རྟེན་རྣམས་ལ་མ་སྦྱར་ཞིང༌། །སྐབས་འགར་ར་ལ་ཏམ་དང་ནི། །འདོགས་ཅན་རྐྱང་པ་འམ་སྟེ་དཔེར། །འདུག་གམ་བྱུང་ངམ་ཡོད་དམ་དང༌། །ཡིན་ནམ་གྲུབ་བམ་སྒོམ་མམ་དང༌། །གདའ་འམ་འགྱུར་རམ་འཚལ་ལམ་དང༌། །ཤེས་སམ་ཟེར་ཏམ་གོའམ་དང༌། །ཁ་འམ་ཞེས་པ་ལྟ་བུའོ། །
རྫོགས་ཚིག་སྐབས་སུ་ན་ར་གཉིས། །མ་གཏོགས་མཐའ་རྟེན་བརྒྱད་པོ་ལ། །རང་ལ་ན་རོ་སྦྱར་ཏེ་དཔེར། །ཁྱོད་ནི་ཕྱུག་གོ་གཤིས་བཟང་ངོ༌། །གཏོང་ཡང་ཕོད་དོ་ཆོས་གྲུབ་བོ། །འཁོར་ཡང་འཛོམ་མོ་བཞུགས་གདའོ། །ཐུགས་ཀྱང་དལ་ལོ་ཞེས་ཐོས་སོ། །ན་ར་གཉིས་ལ་ན་རོ་དང༌། །ཏོ་ཞེས་རྣམ་གཉིས་སུ་འགྱུར་དཔེར། །བཞིན་ནོ་ཞེས་ནི་ངས་བསྟན་ཏོ། །ངོ་མཚར་རོ་ཞེས་གཞན་ཟེར་ཏོ། །རྐྱང་པ་འདོགས་ཅན་འོ་སྟེ་དཔེར། །ཤ་ནི་ཟ་འོ་སྐྱིད་དེའོ། །དེ་རྣམས་ཕལ་ཆེར་ཉིས་ཤད་དང༌། །ལེའུའི་མཚམས་སོགས་བཞི་ཤད་འཐོབ། །རྐྱང་ཤད་དང་ནི་ཚིག་ཤད་དག །ཐོབ་ཚུལ་སྐབས་དང་སྦྱར་ལ་དཔྱད། །ག་ཡི་རྗེས་སུ་ཆིག་ཤད་དང༌། །ཤད་གོང་ཕལ་ཆེར་ཕྱི་ཚེག་སྤང༌། །ཞེས་པ་ནི་ཚིག་ཕྲད་རྒྱས་པར་བཤད་པའོ། །
ད་ནི་འཕུལ་ཡིག་དང་མཐའ་རྟེན་སྦྱར་དུ་རུང་བ་དང༌། མི་རུང་བ་རྣམ་པར་དབྱེ་བ་བསྟན་པའི་ཕྱིར་སྨྲས་པ། ཚོགས་པས་ཆོས་གསུམ་(ཚོམས་སུ)བྱོན་པ་ནི། །ཕལ་པའི་ཆང་གིས་བཟི་བ་ཡི། །ཕུན་ཚོགས་ཕྲིན་ལས་རིམ་གྲོ་པ། །སྐུ་ཁམས་ཁྲོས་དང་ཁྲོ་བ་དང༌། །ཕྲ་མ་ཁོན་འཛིན་ཅན་དང་ཕྲད། །ཕྲ་ལ་ཕྲག་པར་ཕྱུང་བ་ཡི། །ཕྲེང་བས་ཚོན་གྱི་ཁ་བསྒྱུར་བ། །ཕྲ་མོ་ཕལ་ཆེར་ཁྲོན་པར་ལྷུང༌། །ཐུར་དུ་བབས་ཏེ་ཕྱིན་པ་ཡིས། །ཕྲན་ཚེགས་ཙམ་ལས་མ་རྙེད་ཕམ། །སྐད་ཅིག་ཐང་ཅིག་ཡུད་ཙམ་ཅིག །ཤོག་ཅིག་སྡོད་ཅིག་ཁ་ཅིག་ཟེར། །ཞེས་སོགས་རྣམས་ལ་འཕུལ་ཡིག་སྤང༌། །ལྷ་བཙུན་བཟའ་བཏུང་མེད་པ་དང༌། །ཆེ་བཙུན་ན་བཟའ་ཧྲུལ་བ་དང༌། །ལྷ་རྗེ་ང་རྒྱལ་ཆེ་བ་དང༌། །བྱ་རྒོད་རྡོ་རྗེ་བཅོམ་པ་རྣམས། །མེ་ཏོག་རྒྱ་མཚོར་ལྷུང་བ་འདྲ། །ཞེས་སོགས་མཐའ་རྟེན་མེད་ཕྱིར་སྤང༌། །བདུད་རྩི་ཐུགས་རྗེ་བྱང་ཆུབ་སོགས། །མཐའ་རྟེན་མེད་ཀྱང་ནོར་བས་སྤང༌། །ལྷ་རྫས་རྒྱ་ཆེར་ཡོངས་འཐོར་ཏེ། །མྱང་འདས་ཐོབ་པའི་རྒྱུར་གྱུར་ནས།། ཕར་ཕྱིན་རྫོགས་ཏེ་ཉེར་ཞི་ཞིང༌། །དབྱེར་མེད་སོགས་ལ་མཐའ་རྟེན་ནི། །ལྷུག་པའི་ཚེ་ན་མི་འཐོབ་ཀྱང༌། །ཚིགས་བཅད་སྡེབ་སྦྱོར་དགོས་པའང་ཡོད། །ཏིང་ངེ་འཛིན་དང་འགྱུར་རོ་དང༌། །གཞོན་ནུས་ཆུང་ངུ་ཉུང་ངུ་སོགས། །ཕྱི་མའི་ཚིག་གིས་ཤུགས་དག་གིས། །ཅུང་ཟད་ཕན་པས་ངེས་པར་སྦྱོར། །ཞེས་པ་ནི་འཕུལ་ཡིག་དང་མཐའ་རྟེན་རྣམ་པར་ཕྱེ་ནས་བསྟན་པའོ། །
ད་ནི་འདིར་དོན་འདྲ་བ་གཅིག་ཉིད་ལ་ཡང་ཚིག་བརྗོད་ཚུལ་མི་འདྲ་བ་དུ་མས་ནོར་བར་བྲི་བ་དང༌། འཁྲུལ་བར་ཀློག་པར་མང་མཐོང་ཞིང༌། དོན་མི་འདྲ་བ་དུ་མ་ཡང་ཚིག་མི་འདྲ་བ་གཅིག་ཉིད་ཀྱིས་འབྲི་ཞིང་ཀློག་པ་ཡང་མཐོང་བས། དེ་དག་བསལ་བའི་ཕྱིར་ཚིག་འདི་ནི་དོན་འདི་བརྗོད་པ་ལ་འཇུག་ལ། དོན་འདི་བརྗོད་པ་ལ་མི་འཇུག་གོ །ཞེས་ཁྱད་པར་རྣམ་པར་ཕྱེ་བས་བསྟན་པའི་ཕྱིར།
དམིགས་ཀྱིས་བསལ་ཏེ་སྨྲས་པ། ར་རྐ་ད་དཀའ་ས་སྐ་རྣམས། །ཆུ་ལམ་མི་ནུས་ལྕེ་ཡི་ཡུལ། །བ་འོག་བཀའ་ནི་རྒྱལ་བའི་གསུང༌། །ར་རྒོ་ས་སྒོ་བ་བགོ་རྣམས། །རི་དྭགས་སྒོ་བསྲུངས་གོས་གྱོན་ཏེ། །བ་འོག་ས་བསྒོ་བཀའ་བསྒོའོ། །ལ་ལྐལ་ས་སྐལ་བ་སའི་བསྐལ། །མེད་དང་ཐོབ་དང་དུས་ཡིན་ནོ། །ར་རྒ་ས་སྒ་ད་དགའ་རྣམས། །ན་ཚོད་རྟ་སྒ་ཡིད་དགའ་སྟེ། །ལ་ལ་ལྒ་བཏགས་སྨན་གྱི་མིང༌། །ས་སྔ་ལ་ལྔ་ར་རྔ་རྣམས། །དུས་དང་གྲངས་དང་བརྡུང་བྱ་སྟེ། །མ་འོག་མངའ་ནི་ཞེ་སའོ། །ཉེ་དུའི་གཉེན་ནི་གས་འཕུལ་ཏེ། །རེག་བྱ་མཉེན་པ་མས་འཕུལ་ལོ། །བ་འོག་ས་བསྙེན་དྲུང་དུ་བཏུད། །ས་བདག་གཉན་ནི་གས་འཕུལ་ལོ། །རྣ་བར་སྙན་པ་ས་སྙན་ཡིན། །ཆོས་མཉན་མ་ཡིས་ཉ་འཕུལ་ཏེ། །བ་འོག་ར་བརྙན་གཟུགས་བརྙན་ནོ། །ག་གཏར་ཉིད་ནི་ཁྲག་འབྱིན་པ། །བ་འོག་ས་བསྟར་ཆས་གཟབ་བོ། །ཏར་ལ་བརྒྱུས་པ་ཏར་རྐྱང་ཡིན། །ག་གཏན་ས་སྟན་བ་སའི་བསྟན། །རྒྱུན་དུ་བཏིང་བྱ་གཞན་བསྟན་ཏེ། །བ་འོག་ར་བརྟན་མི་འགྱུར་བ། །ག་འོག་གདའ་དང་བ་འོག་བདའ། །ཞེ་ས་དང་ནི་ཟས་སྐོམ་ཞིམ། །བ་འོག་ར་བརྡ་ལག་བརྡ་ཡིན། །བ་བདུག་ག་གདུག་ས་སྡུག་རྣམས། །སྤོས་དང་སྦྲུལ་དང་མཛེས་ཉོན་མོངས། །ག་གཅིན་ས་ལ་པ་བཏགས་སྤྱིན། །མི་གཙང་བ་དང་འབྱར་བྱེད་དོ། །དས་འཕུལ་དཔྱད་དང་ས་བཏགས་སྤྱད། །ཤེས་པའི་ཡུལ་དང་ལོངས་སྤྱོད་དོ། །བས་འཕུལ་བཅད་པ་དུམ་བུར་རོ། །ར་རྦ་ས་སྦ་ལ་ལྦ་རྣམས། །ཆུ་དྲག་མི་མངོན་མགུལ་པའི་རྒྱན། །མིག་དང་དམིག་ར་རྨིག་པ་རྣམས། །དབང་པོ་བུ་ག་དུད་འགྲོའི་ལྷམ། །དས་འཕུལ་དགྲ་དང་ས་བཏགས་སྒྲ། །གནོད་པ་བྱེད་དང་རྣ་བའི་ཡུལ། །འབུབས་སྦྲ་ས་ལ་བ་བཏགས་སོ། །ཚལ་དང་འ་ཡིས་འཕུལ་བའི་འཚལ། །ནགས་ཚལ་དང་ནི་ཞེ་ས་སྟེ། །སྨན་གྱི་མཚལ་ནི་མ་ཡིས་འཕུལ། །ས་སྦས་མི་མངོན་གབ་པ་སྟེ། །ལ་ལྐུགས་ལྕེ་ཡིས་སྨྲ་མི་ཤེས། །ཆང་ནི་མྱོས་བྱེད་བཏུང་བྱ་སྟེ། །འཛིན་པའི་འཆང་ནི་འ་ཡིས་འཕུལ། །ཐུར་དུ་ཕྱུང་བ་ཕ་ཕྱུང་ཡིན། །ཡུ་མར་ཇ་ནི་ཇ་རྐྱང་སྟེ། །བ་བྱ་མཁའ་ལ་འཕུར་བའི་བྱ། །མ་མགོ་ཡན་ལག་དམ་པ་སྟེ། །འ་འགོ་ནད་དང་སྐྱོན་ལ་སོགས། །མ་མགུལ་མགྲིན་པའི་ཞེ་ས་སྟེ། །འ་འགུལ་གཡོ་བའི་བྱེ་བྲག་རྣམས། །ད་དྲིན་ཕན་པས་བསྐྱངས་པ་སྟེ། །བ་བྲིན་ཉོ་ཚོང་སྐྱེན་པའི་མིང༌། །ག་གྲགས་ཕྱོགས་བཅུར་ཁྱབ་པ་སྟེ། །ད་དྲགས་ཚར་གཅོད་ཐལ་བར་རོ། །དས་འཕུལ་དངུལ་ནི་རིན་ཆེན་ཏེ། །ར་རྔུལ་ལུས་ཀྱི་དྲོད་ལངས་ཆུ། །སྔོན་པོའི་སྔོན་ནི་ས་སྔོན་ཏེ། །མས་འཕུལ་མངོན་ནི་མིག་གིས་མཐོང༌། །ར་རྔོན་རི་དྭགས་གསོད་པ་འོ། ། ངེས་པ་སྒྲོ་འདོགས་ཆོད་པ་སྟེ། །ཉེས་པ་མ་ལེགས་པ་ཡི་མིང༌། །དབེན་པ་དགོན་པའམ་སྟོང་པ་ཉིད།། དབྱེན་ནི་མཐུན་པ་འབྱེད་པའོ། །ས་སྙེད་མང་པོའི་སྒྲ་ཡིན་ཏེ། །ར་རྙེད་གསར་དུ་རྙེད་པའོ། །བ་བློ་སེམས་དང་སེམས་བྱུང་སྟེ། །ག་གློ་ལུས་ཀྱི་བྱེ་བྲག་ཡིན། །ར་རྟོགས་དང་ནི་ག་གཏོགས་གཉིས། །གོ་དང་ཁོངས་སུ་གཏོགས་པའོ། །ལ་ལྟོགས་བཀྲེས་པའི་མིང་ཡིན་ནོ། །ག་གནོན་འོག་ཏུ་འཛུད་པ་སྟེ། ། ས་སྣོན་མང་དུ་བཏང་བའོ། །ར་རྣོ་མཚོན་རྩེ་ལྟ་བུ་སྟེ། །མ་མནོ་བསམ་པའི་གཞིག་མ་གཏོང༌། །ད་དཔྱི་ལུས་ཀྱི་བྱེ་བྲག་སྟེ། །ས་སྤྱི་ཐུན་མོང་བ་ལ་འཇུག །ག་གཉུག་རང་བཞིན་སྟོང་པ་ཉིད། །ས་སྙུག་ཤིང་གི་བྱེ་བྲག་གོ །ག་གསོད་སྲོག་ནི་གཅོད་པ་སྟེ། །བ་བསོད་ཞིང་གི་བསོད་ནམས་སོ། །གཉིད་དུ་མནལ་བ་མས་འཕུལ་ཏེ། །སྣམ་བུའི་སྣལ་མ་ས་བཏགས་སོ། །རྣལ་འབྱོར་པ་ནི་ར་རྣལ་ཡིན། །འོད་གསལ་བ་ནི་ག་གསལ་ཡིན། །སྐྱོན་བསལ་བ་ནི་བ་བསལ་ཏེ། །ག་གྲན་རན་པ་ལ་སོགས་ཏེ། །ད་དྲན་སྔར་བྱས་སེམས་ལ་ཤར། །བ་བྲན་ཞེས་པ་གཡོག་གི་མིང༌། །ནུས་པ་རྟུག་པ་ར་རྟུག་སྟེ། །ཕུབ་པའི་གདུགས་ནི་ག་གདུགས་སོ། །གཞན་ལ་རྡེག་པ་ར་རྡེགས་ཏེ། །ཁང་པའི་གདུང་ནི་ག་གདུང་ཡིན། །ལོག་འདྲེན་བདུད་ནི་བས་འཕུལ་ཏེ། །དབང་དུ་སྡུད་པ་ས་
སྡུད་ཡིན། །བཟང་ངན་མཉམ་པ་མས་འཕུལ་ཏེ། །ཡིན་ནམ་སྙམ་པ་ས་སྙམ་ཡིན། །གནོད་པའི་གཙེ་བ་ག་གཙེ་སྟེ། །རྩེད་མོ་རྩེ་བ་ར་རྩེ་ཡིན། །བ་འོག་ར་བརྩེ་སྙིང་བརྩེའོ། །ས་སྟེར་གཞན་ལ་སྟེར་བའོ། །ག་གཏེར་མི་འཛད་པ་ཡི་མཛོད། །ས་སྨག་མུན་རུམ་འཐིབས་པ་སྟེ། །ད་དམག་གོ་ཆ་དམག་དཔུང་བཅས། །ད་དྲག་སྟོབས་དང་རྩལ་ཡིན་ཏེ། །ག་གྲག་རྣ་བའི་ཡུལ་གྱི་སྒྲ། །བ་བྲག་རི་རྡོའི་བྱེ་བྲག་ཡིན། །ས་སྟག་གཅན་གཟན་ཁྲ་བོ་སྟེ། །ར་རྟག་ནམ་ཡང་མི་འགྱུར་བ། ། བ་བཏགས་ཕྱེ་མར་འཐག་པ་སྟེ། །བ་འོག་ར་བརྟག་བརྟག་དཔྱད་དོ། །བྱ་བ་མངགས་པ་མས་འཕུལ་ཏེ།། སྐྲག་པའི་དངང་པ་དས་འཕུལ་ལོ། །སྔགས་བཟླས་པ་ལ་ང་བཏགས་སོ། །བ་བཤོལ་བྱ་བ་འཇོག་པ་སྟེ།། ག་གཤོལ་ཡུལ་ལུགས་ཐོང་པའི་གཤོལ། །དུས་ཀྱི་སྔ་ཕྱི་ག་གཟོད་དེ། །བཟོད་བསྲན་ཆེ་བ་བ་བཟོད་ཡིན། །རླན་གྱི་འདྲུལ་བ་ད་འདྲུལ་ཏེ། །ལམ་གྱི་འགྲུལ་པ་ག་འགྲུལ་ལོ། །ཐུར་དུ་ཟབ་པ་ག་གཏིང་སྟེ།། རྗེས་མའམ་རྐང་རྟིང་ར་རྟིང་ཡིན། །བ་བརྟིང་གདན་མ་ལ་སོགས་ཏེ། །བ་བཏོང་བཞག་པ་ལ་སོགས་ཏེ༑ ༑ག་གཏོང་སྦྱིན་པ་གཏོང་བ་ཡིན། །ས་སྟོང་མེད་པའི་སྟོང་པའོ། །དུམ་བུར་གསིལ་བ་གས་འཕུལ་ཏེ༑ ༑གྲང་བའི་བསིལ་བ་བས་འཕུལ་ལོ། །ཞེ་སའི་མཛད་ནི་མས་འཕུལ་ཏེ། །ཟད་པའི་འཛད་ནི་འས་འཕུལ་ལོ། །ས་སྣང་མངོན་སུམ་སྣང་བ་སྟེ། །ག་གནང་གཞན་ལ་སྟེར་བའོ། །ར་རྣམ་རྣམ་པའི་གྲངས་ཡིན་ཏེ། །དྲི་མ་མནམ་པ་མས་འཕུལ་ཡིན། །ག་གནམ་ནམ་མཁའ་སྔོན་པོ་སྟེ། །ས་སྣམ་ཞེས་བྱ་གོས་ཀྱི་རྒྱུ། །ས་སྙིང་ནང་གི་དོན་སྙིང་སྟེ། །ར་རྙིང་རྒས་ནས་ཟད་པའོ། །ག་གླ་ལས་ཀྱི་རྔན་པ་སྟེ། །བ་བླ་བླ་མེད་བླ་མའོ། །ས་སླ་ཆུ་མང་ཚེགས་མེད་དེ། །བ་འོག་ར་བརླ་ལུས་ཀྱི་ཆ། །ར་རྣམས་བ་འོག་ས་བསྣམས་ནི༑ ༑གྲངས་དང་ཕྱག་ན་བསྣམས་པའོ། །ས་བཏགས་སྟེའུ་ར་བཏགས་རྟེའུ། །གཅོད་པའི་གྲི་དང་རྟ་ཡི་བུ༑ ༑ག་གྲ་ད་དྲ་བ་བྲ་མ། །སྙེ་རྩེ་ཡ་རབས་ཚེར་མ་ཅན། །ག་གྲལ་ད་དྲལ་བ་བྲལ་རྣམས། །སྒྲིག་པ་རལ་པ་གྱེས་པའོ། །ག་གྲྭ་ད་དྲ་བ་བྲ་རྣམས། །ཚོགས་པ་གོས་བཟོ་སེམས་སྟོར་རོ། །ག་གྲེད་ད་དྲེད་བ་བྲེད་རྣམས། །འགྱེལ་བ་དུད་འགྲོ་བྱེར་པའོ། །ག་གྲོད་ད་དྲོད་བ་བྲོད་རྣམས། །ཟས་སྣོད་ཚ་བ་བློ་བྲོད་དོ། །ག་གྲི་ད་དྲི་བ་བྲི་རྣམས། །མཚོན་དང་སྣའི་ཡུལ་ཟད་པའོ། །ག་གྲངས་ད་དྲངས་རིམ་བཞིན་དུ། །གཅིག་གཉིས་གསུམ་དང་ཟས་སྦྱིན་པའོ། །ག་གྲོགས་ད་དྲོགས་རིམ་བཞིན་དུ། །ལམ་མཐུན་སྐྲགས་ནས་བྲོས་པའོ། །ར་རྩལ་ས་སྩལ་བ་སའི་བསྩལ། །སྟོབས་དང་བཀའ་སྩལ་བསྩལ་དུ་གསོལ། །ར་རྒྱུ་ས་སྒྱུ་རྐྱེན་ཟླ་དང༌། །སྐྱེས་བུ་གཡོ་སྒྱུ་ཆ་ཅན་ཉིད། །ར་རྒྱུ་མ་དང་ས་སྒྱུ་མ། །ནང་གྲོལ་(ཁྲོལ་)དང་ནི་མི་བདེན་དཔེར། ། ས་སྐྱེན་ར་རྐྱེན་མྱུར་བ་དང༌། །རྒྱུ་ཟླ་མྱ་ངན་བྱུང་ལའང་འཇུག །ས་སྐུ་ལུས་ཀྱི་ཞེ་ས་སྟེ། །ར་རྐུ་མ་བྱིན་ལེན་གྱི་མིང༌། །ད་དཀུ་ལུས་ཀྱི་བྱེ་བྲག་ཡིན། །ས་སྐར་སྐར་མ་ད་དཀར་མདོག།།བ་བཀར་ལོགས་སུ་བཀར་བའོ། །ས་སྨན་འཚོ་བྱེད་ད་དམན་ངན། །ག་གསུང་ཞེ་ས་བ་བསུང་དྲི། །ག་གྲོ་འབྲུ་ཡིན་ད་དྲོ་དྲོད། །བ་བྲོ་རོལ་མོ་རོ་བྲོ་བ། །ག་གྲང་རེག་བྱ་ད་དྲང་སྲོངས། །བ་བྲང་ལུས་ཀྱི་མདུན་ཕྱོགས་ཡིན། །ར་རྩང་གནོད་བྱེད་ག་གཙང་ཆུ། །ག་གཞོན་ན་ཚོད་བ་བཞོན་རྟ། །ར་རླུང་གཡོ་བ་ཀ་ཀླུང་ཆུ། །ཀ་ཀློག་གསུང་སྒྲོགས་ག་གློག་འགྱུ། །ག་གླ་རི་དྭགས་ས་སླ་མྱུར། །བ་བྲིས་ཡི་གེ་ད་དྲིས་གཏམ། །ས་སྐྲགས་འཇིགས་པ་བ་བཀྲག་འོད། །ད་དཔའ་བརྟུལ་ཕོད་ས་སྤ་མཛེས། །ཚིག་ཕྲད་པ་རྣམས་རྐྱང་པ་ཡིན། ། བ་བཙོན་ཁྲིམས་མུན་བཅུག་པ་སྟེ། །བ་འོག་ར་བརྩོན་དགེ་ལ་སྤྲོ། །ཚོན་རྩི་ལ་ནི་འཕུལ་མེད་དེ། །གྲི་མཚོན་རྟགས་མཚོན་མས་འཕུལ་ལོ། །མཆོད་པའི་རྟེན་ནི་ར་རྟེན་ཡིན། །བ་འོག་ས་བསྟེན་བླ་མའོ། ། རིགས་འདྲ་སྦྱོར་བ་ག་འགྲེ་སྟེ། །གནོད་བྱེད་འདྲེ་ནི་ད་འདྲེ་ཡིན། །ཟླ་བོའི་གྲོ
གས་ནི་ག་གྲོགས་ཏེ། ། ཁུར་བའི་དྲོགས་ནི་ད་དྲོགས་ཡིན། །ནད་ཀྱི་རྣག་ནི་ན་རྣག་སྟེ། །ཁ་དོག་གནག་པ་ག་གནག་ཡིན། ། ཟས་ཀྱི་རྣངས་པ་ར་རྣངས་ཏེ། །དུས་ཀྱི་གནངས་ནི་ག་གནངས་ཡིན། །ལུས་ཀྱི་རྔོ་ནི་ར་རྔོ་ཡིན། །ཁ་དོག་སྔོ་བ་ས་སྔོ་ཡིན། །བ་འོག་ས་བསྔོ་དགེ་བའོ། །ས་རྡོའི་རྡོ་ནི་ར་རྡོ་ཡིན། །བ་བདོ་དར་ལ་བབ་པ་ཡིན། །ད་དཀོར་དཀོན་མཆོག་རྫས་ཡིན་ཏེ། །བ་འོག་ས་བསྐོར་འཁོར་གྱིས་ཡོད། །ནོར་འཇལ་འ་ཡིས་ཇ་འཕུལ་ཏེ། །རྟེན་མཇལ་མ་ཡིས་ཇ་འཕུལ་ལོ། །ཆུ་ལ་རྒལ་བ་ར་རྒལ་ཏེ། །ཟས་ཀྱི་སྐལ་བ་ས་སྐལ་ལོ༑ ༑ངོ་མཚར་རྨད་བྱུང་ར་རྨད་དེ། །སྟོད་སྨད་སྨད་ནི་ས་སྨད་དོ། །ཀ་ཀླུ་གནོད་པའི་ས་བདག་སྟེ། །ག་གླུ་སྙན་པའི་དབྱངས་བརྗོད་དོ། །བ་བླུ་རིན་གྱིས་ཉོ་བ་སྟེ། །ས་སླུ་གཞན་གྱིས་སླུས་པའོ། །པྲ་ཕབ་པ་ལ་ར་བཏགས་ཏེ། །བས་འཕུལ་གཞན་ཡང་དེ་ལ་སོགས། །བརྟགས་ན་ནོར་བ་མི་སྲིད་པས། །འཁྲུལ་པར་འབྱུང་བ་མི་སྲིད་ཀྱང༌། །འདྲའོ་སྙམ་ནས་ནོར་བར་བྲིས། །ཀློག་མཁན་རྣམས་ཀྱིས་ནོར་བར་ཀློག ། རྟོག་དཔྱོད་མཁན་པོས་ལོག་པར་གོ །དེ་ནས་དོན་རྣམས་འཆུགས་པ་སྲིད། །དེ་ཕྱིར་འཁྲུལ་པ་བསལ་བྱའི་ཕྱིར། །ཉེར་མཁོའི་བསྟན་བཅོས་འདི་ཉིད་ཀྱིས། །དབྱེ་བ་སོ་སོར་བཤད་པ་འདི། །མ་འདྲེས་སོ་སོར་ཤེས་པར་བྱ། །དེ་ནི་འདིར་དམིགས་བསལ་གྱི་སྒོ་ནས་འདྲ་འོ་སྙམ་པ་རྣམས་མི་འདྲ་བར་སོ་སོར་དབྱེ་བའོ། །འདི་ནི་སྔོན་གྱི་སྒྲ་བསྒྱུར་རྣམས། །སྦྱོར་ཚུལ་མཐུན་པའི་བརྡ་ལ་ནི། །ཅུང་ཟད་ཕལ་ཆེར་མ་མཐུན་ནའང༌། །ཕལ་ཆེར་གསར་བཅད་དབང་དུ་བྱས། །འདི་ནི་མཁས་རྨོངས་འབྱེད་པ་སྟེ། །དོན་འདི་ཁོང་དུ་ཆུད་པའི་མིས། །མང་པོ་འདུས་པའི་དཀྱིལ་དག་ཏུ། །མཁས་པའི་གདན་ལ་འདུག་པར་དབང༌། །དེ་སླད་བློ་གྲོས་གསལ་རྣམས་ཀྱི། །དྲི་མེད་གཞུང་ལུགས་འདི་ཉིད་ལ། །རྣམ་དཔྱོད་བློ་གྲོས་གོམས་པ་ཡིས། །ཚིག་གིས་སྡེབ་སྦྱོར་ལེགས་པར་བྱས།། །།དག་ཡིག་ཉེར་མཁོ་བསྡུས་པ་ཞེས་བྱ་བ། ཤཱཀྱའི་དགེ་སློང་བློ་ལྡན་ཤེས་རབ་ཀྱིས་ཕྱོགས་གཅིག་ཏུ་སྡེབས་པའོ།། སརྦ་མངྒ་ལཾ།།
རྩོམ་པ་པོའི་ལོ་རྒྱུས་མདོར་བསྡུས།
༄༅། །བོད་ཀྱི་ལོ་རྒྱུས་ཐོག་སྐད་གྲགས་ཡོད་པའི་རྔོག་ལོ་ཙཱ་བ་བློ་ལྡན་ཤེས་རབ་ནི། རབ་བྱུང་དང་པོའི་ས་ཕག་ཕྱི་ལོ་༡༠༥༩ ལོར་འཁྲུངས་ཤིང༌། རབ་བྱུང་གཉིས་པའི་ས་གླང་ཕྱི་ལོ་༡༡༠༩ ལོར་སྐུ་གཤེགས། རྔོག་ནི་རུས་ཀྱི་མིང་ཡིན། རྔོག་ལོ་ཙཱ་བ་ལེགས་པའི་ཤེས་རབ་ཀྱི་གཅུང་པོ་ཆེ་ཆུང་བཞིའི་ནང་ནས་གསུམ་པ་ཆོས་སྐྱབས་ཀྱི་སྲས་ཡིན། ཆུང་དུས་སྐུ་ངལ་ཤིན་ཏུ་ཆེ་བས་དགུང་ལོ་བཅུ་བདུན་སྐབས་ཁུ་བོ་རྔོག་ལེགས་པའི་ཤེས་རབ་ཀྱི་དྲུང་དུ་བྲོས་ནས་ལོ་གཅིག་ཙམ་བཞུགས། དེའི་ཕྱི་ལོ་ཁུ་བོས་བཀའ་སློབ་དང་མཐུན་རྐྱེན་གནང་སྟེ་རྒྱ་གར་དུ་སློབ་གཉེར་ལ་བརྫངས་པ་ལྟར་མངའ་རིས་བརྒྱུད་ནས་རྒྱ་གར་དུ་བྱོན། ལམ་གྲོགས་སུ་རྒྱ་གར་དུ་ཆོས་སློབ་པར་ཕེབས་པའི་ལོ་ཙཱ་བ་བཙན་ཁ་བོ་ཆེ། ཁྱུང་པོ་ཆོས་བརྩོན། རྭ་ལོ་ཙཱ་བ། གཉན་ལོ་ཙཱ་བ་རྣམས་མཉམ་དུ་བྱུང༌། རྒྱ་གར་ཡུལ་དབུས་དང་ཁ་ཆེ་བཅས་སུ་ལོ་བཅུ་བདུན་རིང་མདོ་དང༌། སྔགས། སྒྲ་རིག་པ། ཚད་མ་རིག་པ་སོགས་ལ་དཀའ་སྤྱད་འབད་བརྩོན་བློ་ཡུལ་དུ་མི་ཤོང་བ་གནང་ནས་སྦྱངས་པ་མཐར་ཕྱིན་ཏེ་ཕྱི་ལོ་༡༠༩༢ ལོར་བོད་དུ་ཕྱིར་ཕེབས། ཚད་མ་རིག་པ་དང་ཕར་ཕྱིན་སོགས་གཞུང་རིགས་མི་འདྲ་བ་སྟོང་ཕྲག་ཁ་ཤས་རྒྱ་གར་སྐད་ནས་བོད་སྐད་དུ་བསྒྱུར་བར་མཛད་པས། བོད་ཀྱི་ལོ་ཙཱ་བའི་ནང་ནས་གཞུང་བསྒྱུར་མང་ཤོས་དང་མཁས་ཤོས་ཡིན། འོན་ཀྱང་ང་རྒྱལ་དང་ཁེངས་སེམས་མི་གནང་བར་སྔོན་བྱོན་བོད་ཀྱི་ལོ་ཙཱ་བ་མཁས་པ་ཉི་ཟླ་ལྟ་བུའི་དྲུང་ནས་རང་ཉིད་རྒྱུ་སྐར་ཆུང་ཆུང་ཞིག་གི་གྲས་སུ་ཚུད་པ་ཙམ་ཡིན་ཞེས་གསུངས། ཆོས་གསུངས་པ་ལ་ཤིན་ཏུ་མཁས་པས་ཆོས་ཐེངས་རེ་གསུང་དུས་ཉན་མཁན་ཁྲི་ཕྲག་དང་ཉུང་མཐར་སྟོང་ཕྲག་མི་ཉུང་བ་འདུས། ཟུར་ཁྲིད་ཀྱི་འཆད་ཉན་བྱེད་ཐུབ་པའི་སློབ་མ་རྐྱང་པ་ཡང་ཆིག་སྟོང་བརྒྱད་བརྒྱ་ཙམ་ཡོད་ཟེར། དགུང་ལོ་ང་གཉིས་བཞེས་པ། རབ་བྱུང་གཉིས་པའི་ས་མོ་གླང་སྟེ། ཕྱི་ལོ་༡༡༠༩ ལོར་སྐུ་གཤེགས། འདི་ལས་ལོ་རྒྱུས་ཅུང་ཟད་རྒྱས་པ་ཉི་ཐང་སྤྲུལ་སྐུ་ངག་དབང་གཞོན་ནུས་མཛད་པའི་གསང་ཕུའི་དཀར་ཆག་ཏུ་གསལ།
མདུན་ཤོག