ས་པཎ་ཀུན་དགའ་རྒྱལ་མཚན།(༡༡༨༢-༡༢༥༡)
༄༅། །བླ་མ་དང་མགོན་པོ་འཇམ་དཔལ་དབྱངས་ལ་ཕྱག་འཚལ་ལོ། །སྤྱིར་ནི་ཡི་གེ་སུམ་ཅུ་ལ། །སྔོན་འཇུག་ལྔ་དང་མཐའ་རྟེན་བརྒྱད། །ཡི་གེ་ཕྱེད་དང་བཅུ་གསུམ་ཡིན། །ག་ད་བ་མ་འ་རྣམས་ནི། །འཕུལ་བྱེད་ལྔ་རུ་གྲགས་པ་ཡིན། །ག་ང་ད་ན་བ་མ་དྲུག །ར་ལ་ས་དང་བཅས་པ་རྣམས། །མཐའ་རྟེན་ཡི་གེ་དགུ་ཡིན་ནོ། །འ་ནི་མཐའ་རྟེན་ཕྱེད་དུ་འདོད། །དགའ་མདའ་དམའ་ལ་སོགས་པའོ། །བུ་དྲུག་ཅན་ལ་འ་མཐའ་སྤངས། །ག་ང་གཉིས་ལ་གི་འོང་སྟེ། །བདག་གི་ཁོང་གི་ལྟ་བུའོ། །ན་མ་ར་ལ་བཞི་པོ་གྱི༑ ༑གནམ་གྱི་བར་གྱི་གཞན་གྱི་དང། །ད་དང་ས་ཡི་རྗེས་སུ་ཀྱི། །ཡོད་ཀྱི་ཆབ་ཀྱི་སེམས་ཀྱི་ནི། །ཁྲུས་ཀྱི་བག་ཡོད་ཀྱི་ཞེས་པ། །དེ་འདྲའི་བྱེ་བྲག་དགོས་པར་བཤད། །ཀ་ར་ཀུ་ཤུའི་ཞལ་ཟས་དང། །ཀ་བ་ཀོ་བ་ཀ་རྐྱང་ཡིན། །སྐོར་བ་སྐོར་དང་སྐོར་(དཀོར་)མཛོད་དང། །ས་མཐའ་སྐོར་བ་ས་སྐོར་ཡིན། །རྒྱལ་བའི་སྐུ་ནི་ས་སྐུ་ལ། །རྐུན་མ་དག་ནི་ར་རྐུ་ཡིན། །ཀུ་ཅོ་བྱེད་པ་ཀུ་རྐྱང་ལ། །ལྐུགས་པ་དག་ནི་ལ་ལྐུགས་ཡིན། ། བཀྲ་ཤིས་དག་ནི་བ་བཀྲ་ཡིན། །མགོ་བོའི་སྐྲ་ནི་ས་སྐྲ་ཡིན། །དུས་ལ་སྔ་བ་ས་སྔ་ལ། །ཐུགས་ལ་མངའ་བ་མ་མངའ་ཡིན། །བརྡུང་བའི་རྔ་ནི་ར་རྔ་ལ། །གྲངས་ཀྱི་ལྔ་ནི་ལ་ལྔ་ཡིན། །གོང་མས་མངག་པ་མ་མངག་ལ། །སྔགས་འདྲེན་པ་དང་སྔགས་པ་རྣམས། །ས་སྔགས་ཡིན་པས་ཤེས་པར་བྱ། །གོང་མའི་དྲུང་ནི་ད་དྲུང་ལ། །སྤྱང་གྲུང་འཛོམ་པ་ག་གྲུང་ཡིན། །དྲུང་དུ་མཇལ་བ་མ་མཇལ་ལ། །བུ་ལོན་འཇལ་བ་འ་འཇལ་ཡིན། །འབྲུ་ཡི་གྲོ་ནི་ག་གྲོ་ལ། །མེ་དང་ཉི་མ་ད་དྲོ་ཡིན། །ཤིང་གི་འཁན་པ་འ་འཁན་ལ། །མཁས་པའི་དབང་པོ་མཁས་གྲུབ་རྣམས། །མཁར་པོ་ལ་སོགས་མ་ཡིས་འཕུལ། །དུས་ལ་འདས་པ་འ་འདས་ལ། །ལུང་པའི་མདའ་དང་འཕེན་པའི་མདའ། །མ་མདའ་ཡིན་པས་ཤེས་པར་བྱ། །གནམ་གྱི་ཟླ་བ་ཟློ་བ་དང། །ཟློག་པ་ཟླུམ་པོ་ཟློ་བ་སོགས། །ཟློས་པ་ལ་སོགས་ཟ་ལ་འདོགས། །གངྒཱའི་ཀླུང་དང་ཆུ་ཀླུང་སོགས། །ཀ་ཀླུང་ཡིན་པས་ཤེས་པར་བྱ། །ས་བདག་ཀླུ་ནི་ཀ་ཀླུ་ལ། །ལེན་པའི་གླུ་ནི་ག་གླུ་ཡིན། །བློན་པོ་དག་ནི་བ་བློན་ལ༑ ༑ངན་པས་བསླུ་བ་ས་བསླུ་ཡིན། །བ་ཡིས་འཕུལ་བས་ཤེས་པར་བྱ། །འབྱུང་བའི་རླུང་ནི་ར་རླུང་ལ། ། ཡི་གེ་ཀློག་པ་ཀ་ཀློག་ཡིན། །གོན་པའི་སློག་པ་ས་སློག་ལ། །བློ་གྲོས་བློ་ལྡན་བ་བློ་ཡིན། །ལུས་ཀྱི་གློ་བ་ག་གློ་ལ། །གླེགས་བམ་གླེགས་ཤིང་གླེགས་ཐག་དང། །གླིང་བུ་གླེན་པ་གློག་དམར་དང། །གླ་བ་གླང་མ་གླིང་བཞི་སོགས། །ག་ལ་ལ་འདོགས་ཤེས་པར་བྱ། །ཡིད་དགའ་བ་ནི་ད་དགའ་ཡིན། །དུད་འགྲོའི་སྒ་དང་ལུས་ཀྱི་སྒལ། །ས་སྒལ་ཡིན་པས་ཤེས་པར་བྱ། །རྒོད་མ་རྒན་མོ་ར་རྒན་ལ། །དགོན་པ་དག་ནི་ད་དགོན་ཡིན། ། ཆུ་ལ་རྒལ་བ་ར་རྒལ་ལ། །གནན་པ་བྱེད་པ་ག་གནན་ཡིན། །མང་དུ་བསྣན་པ་ས་བསྣན་ལ། །ལུག་པའི་སྣོད་དང་སྣོད་བཅུད་རྣམས། །ས་སྣོད་ཡིན་པས་ཤེས་པར་བྱ། །ནམ་མཁའི་གཟའ་ནི་ག་གཟའ་ལ། །ཁ་རུ་བཟའ་བ་བ་བཟའ་ཡིན། །གོང་མས་གནང་བ་ག་གནང་ལ། །མངོན་སུམ་སྣང་བ་ས་སྣང་ཡིན། །ཡིན་ནམ་སྙམ་པ་ས་སྙམ་ལ། །ས་བདག་གཉན་ནི་ག་གཉན་ཡིན། །གཉེར་པ་དག་ནི་ག་གཉེར་ལ། །བྱད་ཀྱི་སྙེར་མ་ས་སྙེར་ཡིན། །འདིང་བའི་སྟན་ནི་ས་སྟན་ཡིན། །མི་འགྱུར་བརྟན་ནི་ར་བརྟན་ཡིན། །ནད་འགོ་བ་ནི་འ་འགོ་ལ། །མིག་གིས་བལྟ་བ་ལ་བལྟ་ཡིན། །ཞོན་པའི་རྟ་ནི་ར་རྟ་ལ། །བླ་མའི་བསྟན་པ་ས་བསྟན་ཡིན། །བ་ཡིས་འཕུལ་བས་ཤེས་པར་བྱ། །རྟེན་མཆོད་ལ་སོགས་ར་རྟེན་ལ། །འཕུར་བའི་བྱ་ནི་བ་བྱ་ཡིན།། འཐུང་བའི་ཇ་ནི་ཇ་རྐྱང་ལ། །གྱེན་ལ་འདྲེན་པ་ད་འདྲེན་ཡིན། །ཟ་མ་འགྲེམ་པ་ག་འགྲེམ་ལ། །འ་ཡིས་འཕུལ་བས་ཤེས་པར་བྱ། །རྣམ་པ་མང་པོ་ར་རྣམ་ལ། །སྣ་བདུན་དག་ནི་ས་སྣ་ཡིན། །སྣམ་བུ་སྣལ་མ་ས་སྣལ་ལ། །ནམ་ལ་དབྱར་ནི་ད་དབྱར་ཡིན། །གཡར་པ་གཡོར་བ་ག་གཡར་ལ། །ཁོག་པའི་སྙིང་ནི་ས་སྙིང་ཡིན། །བུ་ལོན་རྙིང་པ་ར་རྙིང་ལ། །གཅོད་པའི་གྲི་ནི་ག་གྲི་ཡིན
། །མནམ་པའི་དྲི་ནི་ད་དྲི་ལ། །གཞན་ལ་སྟོར་བ་ས་སྟོར་ཡིན། །མི་ཟད་གཏེར་ནི་ག་གཏེར་ལ། །དངོས་པོ་འཛད་པ་འ་འཛད་ཡིན། །བྱ་བ་མཛད་དང་ཁང་པའི་མཛོད། །མཛོད་དང་མཛེས་དང་མཛེས་མོ་གསུམ། །མཛད་སྤྱོད་ལ་སོགས་མ་ཡིས་འཕུལ།། སེམས་ལ་རྟོག་པ་ར་རྟོག་ལ། །ཁོངས་སུ་གཏོགས་པ་ག་གཏོགས་ཡིན། །ཀ་ཆ་སྟེར་བ་ས་སྟེར་ལ། །གཏོར་མ་གཏོང་བ་ག་གཏོང་ཡིན། །སྡེ་པ་དག་ནི་ས་སྡེ་ལ། །སྐུ་ཁམས་བདེ་བ་བ་བདེ་ཡིན། །དབང་དུ་བསྡུས་པ་ས་བསྡུས་ལ། །བར་ཆད་བདུད་ནི་བ་བདུད་ཡིན། །ནང་དུ་གཤེགས་པ་ག་གཤེགས་ལ། །སྡིག་པ་བཤགས་པ་བ་བཤགས་ཡིན། །མཐོ་བའི་སྒང་ནི་ས་སྒང་ལ། །སྒྱེ་སྣོད་བསྒང་བ་ས་བསྒང་ཡིན། །གནས་ནས་སྤགས་པ་ས་སྤགས་ལ། །དཔག་ཏུ་མེད་པ་ད་དཔག་ཡིན། །པགས་པ་དག་ཀྱང་པགས་རྐྱང་ལ། །ལུས་ཀྱི་ལྤགས་པ་ལ་ལྤགས་ཡིན། །དཔལ་འབྱོར་དཔེ་ཆ་ལ་སོགས་པ། །ད་ཡིས་འཕུལ་བས་ཤེས་པར་བྱ། །ཤིང་གི་སྟག་དང་དུད་འགྲོའི་སྟག །ས་སྟག་ཡིན་པས་ཤེས་པར་བྱ། །དམིགས་པ་དག་ནི་ད་དམིགས་ལ། །དུད་འགྲོའི་རྨིག་པ་ར་རྨིག་ཡིན། །འཚོ་བྱེད་སྨན་པ་ས་སྨན་ལ། །སྐྱེ་བ་དམན་པ་ད་དམན་ཡིན། །ཁང་པའི་སྒོ་ནི་ས་སྒོ་ལ། །ཕྱེ་མ་བགོ་བ་བ་བགོ་ཡིན། །མགྱོགས་པར་འགྲོ་བ་མ་མགྱོགས་ལ། །ཁྱོགས་ལ་འགྱོགས་པར་འ་འགྱོགས་ཡིན། །ཕྱག་ཏུ་བཞེས་པ་བ་བཞེས་ལ། །དུས་ཀྱི་གཞེས་པ་ག་གཞེས་ཡིན། །གཞོན་ནུ་མ་ནི་ག་གཞོན་ལ། །འོག་ཏུ་བཞོན་པ་བ་བཞོན་ཡིན། །ཤིང་གི་སྨྱུག་མ་ས་སྨྱུག་ལ། །སྟོང་ཉིད་གཉུག་མ་ག་གཉུག་ཡིན། །ཉེ་བའི་གཉེན་དང་བཤེས་གཉེན་དང༌། །གཉེར་པ་ལ་སོགས་ག་གཉེར་ལ། །ཚུར་ལ་བསྙེན་པ་ས་བསྙེན་ཡིན། །རླིག་པ་རློན་པ་རླངས་པ་ཆེ། །ར་ལ་ལ་འདོགས་ཤེས་པར་བྱ། །གཡང་ས་ཆེ་དང་གཡང་ལོན་བྱེད། །ག་ཡིས་འཕུལ་བས་ཤེས་པར་བྱ། །དབྱངས་ལེན་པ་ནི་ད་དབྱངས་ལ། །མིག་འཕྲུལ་སྒྱུ་མ་ས་སྒྱུ་ཡིན།། ལུས་ཀྱི་རྒྱུ་མ་ར་རྒྱུ་ལ། །རིན་ཆེན་མཚལ་ནི་མ་མཚལ་ཡིན། །ཞེ་སའི་འཚལ་ནི་འ་འཚལ་ལ། །རྒྱ་མཚོ་དག་ནི་མ་མཚོ་ཡིན། །རྒྱུ་ཡི་འཚོ་བ་འ་འཚོ་ལ། །ལམ་ལ་འཚེར་བ་འ་འཚེར་ཡིན། །མཚེར་དུ་བསྐྱལ་བ་མ་མཚེར་ལ། །རིན་ཆེན་གསེར་ནི་ག་གསེར་ཡིན། །བསེར་མ་ལངས་པ་བ་བསེར་ལ། །རི་དྭགས་རྙན་(གཉན་)ནི་ར་རྙན་(གཉན་)ཡིན། །སྙན་པའི་སྒྲ་ནི་ས་སྒྲ་ལ། །སྡང་བའི་དགྲ་ནི་ད་དགྲ་ཡིན། །རོལ་མོའི་སྒྲ་ནི་ས་སྒྲ་ལ། །གོང་མའི་གསུང་ནི་ག་གསུང་ཡིན། །དྲི་བསུང་དག་ནི་བ་བསུང་ལ། །བྱ་བ་བཤོལ་བ་བ་བཤོལ་ཡིན། །ཞིང་རྨོ་གཤོལ་ནི་ག་གཤོལ་ལ། །སངས་རྒྱས་བསྟན་པ་ས་བསྟན་ཡིན། །རིན་ཆེན་གཟི་ནི་ག་གཟི་ལ༑ ༑ཆང་གིས་བཟི་བ་བ་བཟི་ཡིན། །ཁ་ལ་མངར་བ་མ་མངར་ལ། །གཡུལ་དུ་དངར་བ་ད་དངར་ཡིན། ། འབྱུང་བའི་རྡོ་ནི་ར་རྡོ་ལ། །འཛེག་པའི་སྐས་ནི་ས་སྐས་ཡིན། །ཆུ་ཡི་རྐ་ནི་ར་རྐ་ཡིན། །སྡུག་བསྔལ་བ་ནི་ས་བསྔལ་ཡིན། །མངལ་ནས་སྐྱེས་པ་མ་མངལ་ལ། །ལུས་ཀྱི་རྨ་ནི་ར་རྨ་ཡིན། །ཁ་དོག་དམར་བ་ད་དམར་ལ༑ ༑རྨེ་བ་རློངས་པ་ར་ལ་འདོགས། །ལུས་ཀྱི་སྨེ་བ་ས་སྨེ་ལ། །ལྕང་མ་ལྕུགས་(ལྕུག་)མ་ལྕགས་(ལྕག་)མཚན་དང། །ལྕི་བ་ལྕགས་དང་ལྕེ་ལ་སོགས། །ལ་ལ་ཅ་འདོགས་ཤེས་པར་བྱ། །གཅོད་ན་གཅིང་(གཅིན)སེར་ག་ཡིས་འཕུལ། །རྟ་ཡི་རྟེའུ་རྟོད་འཕུར་དང༌། །བྱ་རྒོད་མི་རྒོད་ར་རྒོད་དང། །ཁྱི་རྒོད་ལ་སོགས་ར་(མགོ་ཅན་)ལ་འདོགས། །འཚོམ་བུ་དགོད་པ་ད་དགོད་ལ། །རྒད་མོ་རྒོད་པ་ར་རྒོད་ཡིན། །བཤད་པ་འདོད་པ་བ་བཤད་ལ། །མགོ་སྤུ་བཤད་(ཤད་)དང་གཏམ་བཤད་བྱེད། །བ་ཡིས་འཕུལ་བས་ཤེས་པར་བྱ། །ཡོད་དེ་མེད་དེ་དེ་རྐྱང་བྱེད། །ལུས་དང་ས་ཡི་ལྟེ་བ་དང། །རང་ཐག་ལྟེ་བ་ལ་ལྟེ་ལ། །གྲངས་ཀྱི་སྟོང་ཕྲག་ས་སྟོང་ཡིན།། གཟུང་བ་གཏོང་བ་ག་གཏོང་ལ། །མདུན་མ་བཤམས་པ་བ་བཤམས་ཡིན། །གོས་ཀྱི་བཤམས་(གཤམ)དང་ཡི་གེའི་བཤམས(གཤམ)། །བ་ཡིས་འཕུལ་བས་ཤེས་པར་བྱ། །མཆོག་དཀར་གཞུ་ནི་ག་གཞུ་ལ། །གླེང་གླེང་བྱེད་པ་ག་གླེང་ཡིན། །ཆུ་སློངས་པ་ནི་ས་སློངས་ལ། །
གྲོད་པ་ལྟོགས་པ་ལ་ལྟོགས་ཡིན། །དར་གྱི་ཏོག་ནི་ཏ་རྐྱང་ཏོག །བྱད་ཀྱི་སྣ་ནི་ས་སྣ་ལ། །དག་འབྱིན་མནའ་ནི་མ་མནའ་ཡིན། །སྙད་སྐོ་བ་ནི་ས་སྐོ་ལ། །ཉན་པའི་རྣ་བ་ར་རྣ་ཡིན། །གནས་ཀྱི་མནའ་ནི་མ་མནའ་ལ། །དཔང་པོ་བྱེད་པ་ད་དཔང་ཡིན། །པང་དུ་སྡོད་པ་པ་རྐྱང་ལ། །རྐེ་ཡི་ལྦ་བ་ལ་ལྦ་ཡིན། །ནང་དུ་སྦ་བ་ས་སྦ་ལ། །ཆུ་ཡི་རྦ་ནི་ར་རྦ་ཡིན། །སྦལ་པ་དག་ནི་ས་སྦལ་ལ། །གྲལ་ལ་སྡོད་པ་ག་གྲལ་ཡིན། །སོག་ལེས་དྲས་པ་ད་དྲས་ལ། །སྟ་རེ་དག་ནི་ས་སྟ་ཡིན། །བུན་གྱིས་གཏང་བ་ག་གཏང་ལ། །འཇིགས་མེད་སྡེ་ནི་ས་སྡེ་ཡིན། ལྷ་བསངས་བྱེད་པ་བ་བསངས་ལ། །མཚོན་ཆ་གདེངས་པ་ག་གདེངས་ལ། །གསང་གཏམ་བྱེད་པ་ག་གསང་ཡིན། །རྫུན་གྱིས་བསྙོན་པ་ས་བསྙོན་ལ། ། ཤེས་པ་སྨྱོ་བ་ས་སྨྱོ་ཡིན། །གཉིད་ལོག་པ་དེ་ག་གཉིད་ལ། །ཚད་པས་རྙིད་པ་ར་རྙིད་ཡིན། །གདམས་ངག་ཞུ་བ་ག་གདམས་ལ། །ཐག་པས་སྡམ་པ་ས་སྡམ་ཡིན། །རྩེད་མོ་རྩེ་བ་ར་རྩེ་ལ། །གཟུང་བའི་བརྩོན་ནི་ར་བརྩོན་ཡིན། །སེམས་ལ་བརྩེ་བ་ར་བརྩེ་ལ། །བརྩོན་(བཙོན་)པ་དག་ནི་ར་བརྩོན་(བ་བཙོན)ཡིན། །སེམས་ཙམ་པ་ནི་ཙམ་རྐྱང་ལ། །ཟ་བའི་རྩམ་པ་ར་རྩམ་ཡིན། །གཙང་དང་གཙང་མ་ག་གཙང་ལ། །ལུས་ཀྱི་རྩ་ནི་ར་རྩ་ལ། །རི་ཁྲོད་དབེན་དང་དབེན་བཅུག་བྱེད། །ད་ཡིས་འཕུལ་བས་ཤེས་པར་བྱེད། །འབིག་པའི་གསོར་ནི་ག་གསོར་ལ། །ཆད་པ་བསར་འདུན་བ་བསར་ཡིན། །རྟ་ཡི་གསར་ནི་ག་གསར་ལ། །ཕྱགས་མ་དག་ནི་ཕ་ཕྱགས་ཡིན། །པགས་པ་མཉེན་པ་མ་མཉེན་ལ། །ལུང་པའི་ལྗོངས་དང་ལྕེ་ཡི་ལྗགས། །ལ་ལ་ཇ་འདོགས་ཤེས་པར་བྱ། །གཉིས་པོ་དག་ནི་ག་གཉིས་ལ། །རྣལ་འབྱོར་དག་ནི་ར་རྣལ་ཡིན། །སྣག་ཚ་དག་ནི་ས་སྣག་ལ༑ ༑སྒོ་ང་དག་ཀྱང་ས་སྒོ་ཡིན། །ཐུགས་ཀྱི་དགོངས་པ་ད་དགོངས་ལ། །གྲངས་ཀྱི་བཞི་ནི་བ་བཞི་ཡིན།། ས་གཞི་དག་ནི་ག་གཞི་ལ། །སྐལ་ལྡན་དག་ནི་ས་སྐལ་ཡིན། །དུས་ཀྱིས་བསྐལ་པ་བས་འཕུལ་བསྐལ། །དུད་འགྲོའི་གཡི་དང་རིན་ཆེན་གཡུ། །གཡུལ་ཁ་ལ་སོགས་ག་ཡིས་འཕུལ། །ཁང་པའི་སྨང་ནི་ས་སྨང་(རྨང་ནི་ར་རྨང་)ལ། །ཞིང་རྨོ་བ་ནི་ར་རྨོ་ཡིན། །མངའ་ཐང་མངའ་ནི་མ་མངའ་ལ། །མཚོན་ཆས་གསོད་པ་ག་གསོད་ཡིན། །བསོད་ནམས་དགེ་ནི་བ་བསོད་ལ། །སྨོན་ལམ་འདེབས་པ་འ་འདེབས་ཡིན། །དག་པར་བྱེད་པའི་སྡེབ་སྦྱོར་རིན་ཆེན་རྒྱ་མཚོ་ཞེས་བྱ་བ། །ས་པཎ་ཀུན་དགའ་རྒྱལ་མཚན་གྱིས་སྦྱར་བའོ།། །།
མཆན། དག་ཡིག་འདི་བོད་གཞུང་ཤེས་རིག་དཔར་ཁང་གིས་ཕྱི་ལོ་༢༠༠༤ ལོའི་པར་མ་གཞི་བཞག་ཐོག ཕྱི་ལོ་༢༠༠༤ ལོར་མི་རིགས་དཔེ་སྐྲུན་ཁང་གིས་དཔར་བའི་བོད་ཀྱི་བཅུ་ཕྲག་རིག་མཛོད་ཆེན་མོ་ལས་དཔལ་ལྡན་ས་སྐྱ་པའི་གསུང་རབ་པོད་གཉིས་པ། སིམ་ལ་གཏན་སློབ་ཀྱི་ཆོས་དགེ་རྟའུ་ཆོས་མཛད་ཕུན་ཚོགས་དབང་འདུས་ལགས་ཀྱི་《གཙུག་ལག་འཇུག་སྒོ་》ཞེས་པ་བོད་གཞུང་ཤེས་རིག་ལས་ཁུངས་ཀྱིས་ཕྱི་ལོ་༢༠༠༧ ལོར་དཔར་མ་དང། རྡ་ས་བོད་ཀྱི་དཔེ་མཛོད་ཁང་དུ་བཞུགས་པའི་ཤིང་པར་དཔེ་ཐུང་མ་བཅས་ལྷན་ཞིབ་སྡུར་གྱིས་བཀོད་པ་ཡིན།
རྩོམ་པ་པོའི་ལོ་རྒྱུས་མདོར་བསྡུས།
༄༅། །ས་སྐྱ་པཎྜིཏ་ཀུན་དགའ་རྒྱལ་མཚན་དཔལ་བཟང་པོ་མཆོག་ནི། བོད་རབ་བྱུང་གསུམ་པའི་ཆུ་སྟག ཕྱི་ལོ་༡༡༨༢ ལོར་འཁོན་གྱི་གདུང་རྒྱུད་ཡབ་ས་སྐྱའི་རྗེ་བཙུན་གྲགས་པ་རྒྱལ་མཚན་གྱི་གཅུང་པོ་ དཔལ་ཆེན་འོད་པོ་ཆེ་དང༌། ཡུམ་མ་གཅིག་གར་ཕུ་མ་ཉི་ཁྲི་ལྕམ་གཉིས་ལ་སྲས་ཆེ་ཆུང་གཉིས་འཁྲུངས་པའི་ནང་ནས་ ཆེ་བ་ཡིན། མཚན་ལ་དཔལ་ལྡན་དོན་གྲུབ་ཏུ་གསོལ་ཞིང༌། རྗེས་སུ་ཁུ་བོ་རྗེ་བཙུན་གྲགས་པ་རྒྱལ་མཚན་གྱི་དྲུང་ནས་དགེ་བསྙེན་གྱི་སྡོམ་པ་ བཞེས་པའི་མཚན་ལ་ཀུན་དགའ་རྒྱལ་མཚན་དུ་གསོལ། དགུང་ལོ་ཆུང་དུས་ནས་བཟུང་ཚད་མ་རིག་པ་དང་། བཟོ་རིག་པ། སྐར་རྩིས་རིག་པ། སྒྲ་རིག་པ། གསོ་བ་རིག་པ། ཕར་ཕྱིན། དབུ་མ། འདུལ་བ། མཛོད་སོགས་མདོ་སྔགས་ཀྱི་ཟབ་གནད་མ་ལུས་པ་གསན་ཏེ། ཤེས་པའི་རྐང་གྲངས་ཙམ་མིན་པར་ལག་ལེན་ཐོག་འཁྱོལ་ཐུབ་པའི་མཁས་པར་གྱུར། དགུང་ལོ་ཉེར་གསུམ་པར་ཁ་ཆེ་པཎ་ཆེན་ཤཱཀྱ་ཤྲི་བོད་དུ་ཕེབས་པ་དང་མཇལ་ནས་བསྙེན་ རྫོགས་ཀྱི་སྡོམ་པ་བཞེས། མཁན་སློབ་ལས་རིག་གནས་ཆེ་ཆུང་བཅུ་ལ་སྦྱངས་པ་མཐར་ཕྱིན་པར་མཛད་པས་པཎྜི་ཏའི་ མཚན་སྙན་ཐོབ་པ་འདི་བོད་ནང་གི་པཎྜི་ཏ་དང་པོ་དེ་ཡིན། རབ་བྱུང་བཞི་པའི་ཤིང་འབྲུག ཕྱི་ལོ་༡༢༤༤ ལོར་ཧོར་རྒྱལ་པོ་ཨོ་གོ་ཏའི་སྲས་གོ་དན་གྱིས་གདན་ཞུའི་ཡི་གེ་འབྱོར་ཞིང༌། ཡི་གེའི་ནང་དོན་ལ་གདན་དྲངས་པ་ལྟར་མ་ཕེབས་ན་བོད་དུ་དམག་དཔུང་གཏོང་རྒྱུ་ཡིན་ ཞེས་གསལ་བས་དགུང་ལོ་མཐོ་ཡང་བོད་མི་རིགས་ཀྱི་བདེ་འཇགས་དང་ཆོས་ལུགས་ཁག་གི་ བདེ་འཇགས་ཀྱི་ཆེད་དུ་རང་སྲོག་ཕངས་མེད་མཛད་དེ་ཁོང་རང་དང༌། སྐུ་ཚ་འགྲོ་མགོན་ཆོས་རྒྱལ་འཕགས་པ་དང༌། འགྲོ་མགོན་ཕྱག་ན་རྡོ་རྗེ་འཁོར་དང་བཅས་ལང་ཅུ་སྡེ་བཞིའི་ས་ཆར་ཕེབས་ནས་རྒྱལ་ པོ་དང་མཇལ། ཡོན་མཆོད་ཀྱི་འབྲེལ་བ་བྱུང༌། བོད་དུ་དཔོན་རིགས་བསྐོ་ལུགས་དང་ཁྲལ་འུལ་བསྐུལ་ཚུལ་སོགས་ལ་ཞལ་འཆམས་ཏེ། བོད་ཀྱི་བཀའ་གྲོས་ལ་དབང་བའི་བླ་དཔོན་སེར་སྐྱ་རྣམས་ལ་ཡི་གེ་སྔ་ཕྱི་ལན་གཉིས་ བཏང་ནས་དབུས་གཙང་གི་ས་ཕྱོགས་རྣམས་ཧོར་རྒྱལ་པོར་བསྟུན་མཁས་བྱེད་དགོས་པའི་ བཀའ་སློབ་གནང༌། མཐར་དགུང་ལོ་བདུན་ཅུ་བཞེས་པ། རབ་བྱུང་བཞི་པའི་ལྕགས་ཕག ཕྱི་ལོ་༡༢༥༡ ལོར་ལང་གྲུའུ་སྤྲུལ་པའི་སྡེར་སྐུ་གཤེགས།
གསུང་རྩོམ་ལ་སྡོམ་གསུམ་རབ་དབྱེ་དང༌། ཚད་མ་རིགས་གཏེར། མཁས་འཇུག ལེགས་བཤད་རིན་པོ་ཆེའི་གཏེར་སོགས་བརྡ་སྤྲོད་པའི་གཞུང་མང་དུ་བརྩམས།