འདི་ག་ཤེས་རིག་ལས་ཁུངས་ནས་གཏན་ཉིན་སློབ་གྲྭ་ཁག་གི་རིགས་ལམ་འདུ་འཛོམས་ཐེངས་གསུམ་པ་ཕྱི་ཟླ་ ༨ ཚེས་ ༧ སྔ་དྲོ་སྦེལ་ཀོབ་བོད་ཁྱིམ་དུ་གོ་སྒྲིག་ཞུས་ཡོད་པ་རེད། དབུ་འབྱེད་མཛད་སྒོར་ཤེས་རིག་དྲུང་ཆེ་དངོས་གྲུབ་ཚེ་རིང་མཆོག་དང་གཞིས་ཆགས་ཁག་གཉིས་ཀྱི་ས་གནས་འགོ་འཛིན། སྦེལ་ཀོབ་བོད་ཁྱིམ་གྱི་དབུ་འཛིན་དང་སློབ་སྤྱི། སྦེལ་ཀོབ་ས་གནས་སློབ་ཁག་གི་སློབ་སྤྱི་བཅས་ཚོགས་ཕེབས་གནང་ཡོད་པ་རེད།
ཐོག་མར་ཤེས་རིག་སྲོལ་རྒྱུན་ཚན་པའི་འགན་འཛིན་ཚེ་རིང་བསམ་གྲུབ་ནས་ཕེབས་བསུ་དང་སྦྲགས་རིགས་ལམ་འདུ་འཛོམས་ཀྱི་དམིགས་ཡུལ་དང་དགོས་པ། ཆ་ཤས་ལེན་མཁན་སློབ་ཁག་དང༌། དེ་བཞིན་བདུན་གཅིག་གི་རིགས་ལམ་འདུ་འཛོམས་ལས་འཆར་ཁག་ངོ་སྤྲོད་ཞུས། དེའི་རྗེས་མོན་གྷོ་གཏན་སློབ་དང་སྦེལ་ཀོབ་བདེ་སླར་ཉིན་སློབ། སྦེལ་ཀོབ་བོད་ཁྱིམ་སློབ་མ་གཉིས་རེ་ནས་བོད་སྐད་ཡིག་དང་དེང་རབས་ཤེས་ཡོན་ཐོག་རིགས་ལམ་རྟགས་གསལ་སྤྱན་འབུལ་ཞུས།
དེ་ནས་སྦེལ་ཀོབ་བོད་ཁྱིམ་དབུ་འཛིན་ཚེ་རིང་དཔལ་ལྡན་མཆོག་ནས་སྦེལ་ཀོབ་བོད་ཁྱིམ་གྱི་ལོ་རྒྱུས་སྙིང་བསྡུས་དང་ཤེས་ཡོན་གལ་གནད་ཆེ་བའི་སྐོར་ལམ་སྟོན་བཀའ་སློབ་གནང༌།
ཤེས་རིག་དྲུང་ཆེ་དངོས་གྲུབ་ཚེ་རིང་མཆོག་ནས་དབུ་འབྱེད་གསུང་བཤད་ལམ་སྟོན་དུ་རིགས་ལམ་འདུ་འཛོམས་ཀྱི་དགེ་ཕན་དང་རིགས་ལམ་ནི་སློབ་མ་རྣམས་ཀྱི་རིག་པ་སྒོ་འབྱེད་ཀྱི་ལྡེ་མིག་ལྟ་བུ་ཡིན་པ་དང༌། དེའི་བརྒྱུད་ནས་དེང་རབས་ཤེས་ཡོན་རྣམས་མགྱོགས་པ་དང་མྱུར་བ། གསལ་བར་ཤེས་རྟོགས་ཐུབ་པར་ཕན་གྲོགས་ཡོང་ངེས་ཡིན་པ་ྋགོང་ས་མཆོག་གི་བཀའ་སློབ་དང་སྦྱར་ནས་ལམ་སྟོན་གནང་བ་དང༌། གཞན་ཡང་
དཔལ་ལྡན་སྲིད་སྐྱོང་མཆོག་གི་ལས་དོན་ཚང་མའི་ནང་ནས་གལ་ཆེ་ཤོས་ཤེས་ཡོན་ཡིན་གསུངས་པ་དེས་གང་མཚོན་གྱི་ཡོད་ཞུས་ན། སློབ་ཕྲུག་ཁྱེད་རང་ཚོ་གལ་ཆེན་པོ་ཡིན་པ་དང༌། ཁྱེད་རང་ཚོ་ལ་ཤེས་ཡོན་མཁོ་སྤྲོད་ཚད་ལྡན་གནང་རྒྱུའི་གོ་སྐབས་བསྐྲུན་དགོས་པ་ཞུ་གི་ཡོད་པ་རེད། དེའི་ཆེད་དགེ་རྒན་རྣམ་པས་འཛིན་གྲྭའི་ནང་སློབ་ཁྲིད་ཚད་ལྡན་མཁོ་སྤྲོད་དང་འབྲེལ་སློབ་མ་རྣམས་ནས་ཕྱིའི་མཐུན་རྐྱེན་བཟང་པོ་ལོངས་སུ་སྤྱད་ནས་ཤེས་ཡོན་རྩེ་ཕུད་ཤ་སྟག་གསོ་སྐྱོང་གནང་ཐབས་དགོས་པའི་འབོད་སྐུལ་ཞུ་རྒྱུ་ཡིན། གཞན་ཡང་ཤེས་ཡོན་རྐྱང་པའི་
མི་འགྲིག་པར་སྒོ་གསུམ་གྱི་ཀུན་སྤྱོད་ཚུལ་དང་ལྡན་པ་ཡོང་དགོས་པ་མེད་དུ་མི་རུང་བ་ཞིག་ཆགས་ཡོད་པས་ཚང་མས་དམ་དོན་གནང་དགོས། སློབ་མ་རྣམས་སྤྱི་ཚོགས་ནང་གཞན་དང་དཔུང་པ་མཉམ་སྒྲིག་ངང་འཛམ་གླིང་མདུན་སར་འདོན་ཐུབ་པ་བྱ་དགོས་པའི་ལམ་སྟོན་བཀའ་སློབ་ཟབ་རྒྱས་གནང༌། དེ་ནས་ཤེས་ཡོན་འགན་འཛིན་དངོས་གྲུབ་བསྟན་པ་ནས་སྐུ་མགྲོན་རྣམ་པ་དང༌། ལྷག་པར་བོད་ཁྱིམ་གྱི་དབུ་འཛིན་དང་སློབ་སྤྱི་གཙོས་དགེ་ལས་རྣམས་ནས་མཐུན་འགྱུར་གནང་བར་དམིགས་བསལ་ཐུགས་རྗེ་ཆ༌། ཆོས་དགེ་དང་མཉམ་ཞུགས་གནང་མཁན་སློབ་མ་བཅས་ལ་ཐུགས་རྗེ་ཆེ་ཞུས་ནས་མཛད་སྒོ་ལེགས་གྲུབ་བྱུང་ཡོད་པ་རཻད།
རིགས་ལམ་འདུ་འཛོམས་ཐེངས་དང་པོ་དང་གཉིས་པ་སྔ་ལོ་ཅོན་ཏ་ར་སམ་བྷོ་ཊ་སློབ་གྲྭ་དང་སེ་ལ་ཀུ་ཡེ་བོད་ཁྱིམ་དུ་གོ་སྒྲིག་ཞུས་ཡོད་པ་རེད། ད་ལན་རིགས་འདུ་འཛོམས་ནང་ལྷོ་ཕྱོགས་སློབ་ཁག་དགུའི་སློབ་མ་ ༦༢ དང་ཆོས་དགེ་ ༩ མཉམ་ཞུགས་གནང་ཡོད་པ་བཅས།
