༄༅། །ཕྱི་ལོ་ ༢༠༢༤ ཟླ་ ༥ ཚེས་ ༢༩ ནས་ཟླ་ ༦ ཚེས་ ༢ བར་ཉིན་གྲངས་ལྔའི་རིང་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་གོ་སྒྲིག་དང་། ཌེ་ན་ཌ་ (DANIDA) རོགས་ཚོགས་ཀྱི་མཐུན་འགྱུར་འོག་དྷ་ས་འཛིན་སྐྱོང་སྦྱོང་བརྡར་ཁང་དུ་བོད་པའི་སློབ་གྲྭ་ཁག་གི་སཱི་ཤེས་ཡོན་སློབ་གསོའི་མཐུན་སྦྱོར་བ་རྣམས་ལ་སཱི་ཤེས་ཡོན་སློབ་གསོ་དང་། དཔྱད་སྒོམ་ལ་བརྟེན་པའི་སྙིང་རྗེའི་སྦྱོང་བརྡར་ཐོག་ཟབ་སྦྱོང་ཞིག་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཚུ་ཚོད་ ༩།༠༠ སྐུ་མགྲོན་གཙོ་བོ་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་དྲུང་ཆེ་འཇིགས་མེད་རྣམ་རྒྱལ་ལགས་དང་། ཨ་རིའི་ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་དགེ་བཤེས་བློ་བཟང་བསྟན་འཛིན་ལགས། ཨེ་མོ་རི་གཙུག་ལག་སློབ་གཉེར་ཁང་གི་སཱི་ཤེས་ཡོན་འགན་འཛིན་གཞོན་པ་དང་མཐུན་སྦྱོར་བ་རྒན་པ་བརྩོན་འགྲུས་བསམ་འཕེལ་ལགས། ཤེས་རིག་ལས་ཁུངས་ཀྱི་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་རྒྱུས་སྟོན་པ་དགེ་བཤེས་ལྷ་རམས་པ་ཡེ་ཤེས་རྒྱལ་མཚན་ལགས། དེ་བཞིན་སློབ་གྲྭ་ཁག་གི་དགེ་རྒན་མཐུན་སྦྱོར་བ་ཁྱོན་མི་གྲངས་ ༣༨ བཅས་ཚང་འཛོམས་ཀྱིས་ཐོག་མར་ཤེས་ཡོན་ལྷན་ཚོགས་ཡིག་ཚང་གི་འགན་འཛིན་དྲུང་འཕར་བསྟན་འཛིན་པདྨ་ལགས་ཀྱིས་ཟབ་སྦྱོང་གི་ངོ་སྤྲོད་གསུང་བཤད་གནང་དོན།

ད་ཐེངས་ཟབ་སྦྱོང་ཉིན་གྲངས་ལྔའི་ཁྲོད་ཉིན་གསུམ་རིང་སྰི་ཤེས་ཡོན་སློབ་གསོའི་ཐོག་སྦྱོང་བརྡར་དང་། ཉིན་གཉིས་རིང་དཔྱད་སྒོམ་ལ་བརྟེན་པའི་སྙིང་རྗེའི་སྦྱོང་བརྡར་གནང་རྒྱུའི་ལས་རིམ་ཞིག་བང་བསྒྲིགས་ཡོད། ཟབ་སྦྱོང་གི་མཐུན་སྦྱོར་བ་གཙོ་བོ་དགེ་བཤེས་བློ་བཟང་བསྟན་འཛིན་ལགས་དང་། རྒན་བརྩོན་འགྲུས་བསམ་འཕེལ་ལགས་རྣམ་གཉིས་ཆགས་བསྡད་ཡོད། གཞན་ཡང་མཉམ་ཞུགས་པའི་ཁོངས་ནས་རྩ་བའི་དེ་སྔ་དྲྭ་ཐོག་ནས་སྦྱོང་བརྡར་གནང་མྱོང་མཁན་མི་གྲངས་ ༤༣ དང་། དེའི་ཁྲོད་མི་གྲངས་ ༥ ཞིག་སྒེར་གྱི་ཛ་དྲག་གནས་སྟངས་རྐྱེན་པའི་དགོངས་པ་ཞུ་དགོས་བྱུང་ཡོད། ད་ཆ་ཟབ་སྦྱོང་ཐོག་བལ་ཡུལ་གངས་ཅན་བདེ་རྩ་དང་། སམ་བྷོ་ཊ་བོད་སློབ་ཚོགས་པ། མ་སུ་རི་བོད་ཁྱིམ། རྡ་ས་བོད་ཁྱིམ་བཅས་བོད་པའི་སློབ་སྡེ་ཁག་བཞི་དང་། གཞན་ཡང་ལ་དྭགས་མི་མང་སློབ་གྲྭ་ནས་དགེ་རྒན་གཉིས། གཏོང་ལེན་སློབ་གྲྭའི་ལས་བྱེད་གཅིག ཤེས་རིག་ལས་ཁུངས་ཀྱི་ལས་བྱེད་ཟུར་པ་གཅིག་བཅས་ཁྱོན་མི་གྲངས་ ༣༨ མཉམ་ཞུགས་གནང་ཐུབ་པ་བྱུང་ཡོད།

ཚང་མས་མཁྱེན་གསལ་ལྟར་སཱི་ཤེས་ཡོན་སློབ་གསོའི་དྲྭ་ཐོག་གི་སྦྱོང་བརྡར་དེ་བཞིན་ཕྱི་ལོ་ ༢༠༢༣ ཟླ་ ༡༠ ནས་འགོ་འཛུགས་ཀྱིས་ད་བར་ཟླ་བ་བདུན་ཕྱིན་ཞིང་། ཟླ་བ་རེ་རེའི་ནང་ཨེ་མོ་རི་གཙུག་ལག་སློབ་གཉེར་ཁང་གི་མཐུན་སྦྱོར་བ་ཚོས་ཟབ་ཁྲིད་གནང་ཡོད་པ་མ་ཟད། སོ་སོའི་ངོས་ནས་ཀྱང་དྲྭ་ཐོག་བརྒྱུད་ལྟ་ཀློག་སྦྱོང་སོགས་གནང་བར་བརྟེན་ད་ཆ་ཟླ་གྲངས་བདུན་ནང་སཱི་ཤེས་ཡོན་སློབ་གསོའི་ནང་དོན་ཐོག་ལ་གང་འཚམ་ཡག་པོ་ཆགས་བསྡད་ཡོད་རེད། རྣམ་པ་ཚོ་ལ་ཡོང་རྒྱུའི་ཟླ་བ་གཅིག་གཉིས་རྗེས་ལ་སཱི་ཤེས་ཡོན་སློབ་གསོའི་མཐུན་སྦྱོར་བའི་ལག་ཁྱེར་ཐོབ་ཀྱི་ཡོད་སྟབས། ད་ལན་ཉིན་གྲངས་ལྔའི་རིང་མཐུན་སྦྱོར་གནང་སྟངས་ཐོག་ཟབ་སྦྱོང་གོ་སྒྲིག་ཞུས་པ་ཞིག་ཡིན།  དེ་སྔོན་ཉིན་གྲངས་གཉིས་རིང་དྲྭ་ཐོག་བརྒྱུད་མཐུན་སྦྱོར་བར་སྦྱོང་བརྡར་གནང་བའི་སྐབས་ཞུས་པ་བཞིན་རྣམ་པ་ཚོའི་ངོས་ནས་སཱི་ཤེས་ཡོན་སློབ་གསོའི་ནང་དོན་དང་མཐུན་སྦྱོར་གནང་སྟངས། གཞན་ཡང་གང་ཅིའི་ཐོག་ཧ་ལས་པ་ཡག་པོ་གནང་ཡོད། ད་བར་རྣམ་པ་ཚོས་སྐུ་ལས་ཧ་ཅང་བསྐྱོན་ཡོད་པ་ང་ཚོས་ཤེས་ཀྱི་ཡོད་པས། བོད་མིའི་སྒྲིག་འཛུགས་དང་སྒེར་གྱི་ངོས་ནས་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཞེས་སོགས་ཀྱི་ངོ་སྤྲོད་གསུང་བཤད་གནང་གྲུབ་མཚམས། ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་དགེ་བཤེས་བློ་བཟང་བསྟན་འཛིན་ལགས་ཀྱིས་ཟབ་སྦྱོང་དང་འབྲེལ་བའི་གསུང་བཤད་གནང་དོན།

སཱི་ཤེས་ཡོན་སློབ་གསོའི་གནད་དོན་སྐོར་ལ་ད་ལྟ་མདོར་བསྡུས་ཤིག་ཞུ་རྒྱུ་ཡིན། སཱི་ཤེས་ཡོན་ལུགས་སྲོལ་དེ་བཞིན་ང་ཚོ་ནང་པའི་སྤྱི་ཚོགས་ནང་འབྲེལ་བ་གང་འདྲ་ཆགས་ཀྱི་ཡོད་སྐོར་ཕྱིས་སུ་ཟབ་སྦྱོང་དངོས་གཞིའི་ཐོག་ཞུ་ཆོག་གི་རེད།
ཐེངས་འདིར་ཟབ་སྦྱོང་ཐོག་ཕེབས་པ་རྒན་ལགས་ཆ་ཚང་སཱི་ཤེས་ཡོན་སློབ་གསོའི་མཐུན་སྦྱོར་བ་ཤ་སྟག་ཡིན་སྟབས་རྒྱབ་ལྗོངས་ཀྱི་གནས་ཚུལ་ཞུ་མི་དགོས་པར་ཚང་མས་མཁྱེན་གསལ་རེད། འོན་ཀྱང་སཱི་ཤེས་ཡོན་སློབ་གསོ་དེ་ཉིད་དེ་རིང་ཁ་སང་གི་སྤྱི་ཚོགས་ཁྲོད་གལ་ཆེ་ཆུང་ཇི་ལྟར་ཡིན་སྐོར་མདོར་བསྡུས་ཤིག་ཞུ་རྒྱུ་ཡིན། རྩ་བའི་དེང་དུས་ཀྱི་ཤེས་ཡོན་ནང་བརྗོད་གཞི་འདྲ་མིན་ཚན་རིག་དང་། སྐད་ཡིག་ལ་སོགས་མང་དག་ཅིག་དགོས་ངེས་ཅན་ཆགས་ཀྱི་ཡོད། འོན་ཀྱང་འཛམ་གླིང་གི་ཤེས་ཡོན་ཁྱད་ལས་པའི་ཐོག་མཉམ་ཞུགས་གནང་མཁན་ཚོས་དེང་དུས་ཀྱི་ཤེས་ཡོན་གཅིག་པུས་ཏག་ཏག་ཅིག་འདང་གི་མེད་པའི་མཐོང་ཚུལ་ཞིག་གཟིགས་ཏེ་ལོ་ ༣༠ ལྷག་ཙམ་འགྲོ་ཡི་ཡོད། ཕྱི་ལོ་ ༡༩༨༥ ནས་བཟུང་སློབ་ཕྲུག་ཚོར་ཤེས་ཡོན་ཁྲོད་(Emotional Learning) སེམས་མྱོང་གི་སྐོར་ལ་སློབ་སྦྱོང་སྤྲོད་དགོས་སྐོར་ཐོག་དགོངས་ཚུལ་ཆེན་པོ་བྱུང་བ་རེད། གལ་ཏེ་སློབ་ཕྲུག་རྣམས་ལ་སེམས་མྱོང་གི་སྐོར་ལ་སློབ་སྦྱོང་གི་མཐུན་འགྱུར་མེད་ཚེ་ཤེས་ཡོན་ཡར་རྒྱས་ག་ཚོད་ཕྱིན་ཡང་། རང་སོ་སོའི་སེམས་རྒྱུད་སྟངས་འཛིན་ནན་པོ་བྱེད་མ་ཐུབ་ཚེ་སྤྱི་སྒེར་གཉིས་ལ་དཀའ་ངལ་འཕྲད་ཀྱི་ཡོད་སྟབས་སེམས་མྱོང་གི་ཐོག་ལ་སྟངས་འཛིན་གནང་ཐུབ་རྒྱུའི་རྣམ་དཔྱོད་དེ་ཉིད་ཧ་ཅང་གལ་ཆེ་བ་ཆགས་པར་བརྟེན་ནུབ་ཕྱོགས་ལ་བྱུང་བ་རེད། འདས་པའི་ལོ་སུམ་ཅུ་སོ་གྲངས་རིང་མར་བལྟས་ཚེ་སེམས་མྱོང་སྐོར་གྱི་སློབ་སྦྱོང་གི་སྒྲོམ་གཞིར་ནུས་རྩལ་ལྔ་གཞིར་བཟུང་བསླབ་གཞི་བརྒྱ་ཕྲག་མང་པོ་བཟོས་ཏེ་ཕྱིས་སུ་སློབ་ཕྲུག་ཚོར་ཕན་ཐོགས་ཇི་ཡོད་སྐོར་སློབ་ཕྲུག་ས་ཡ་གཅིག་ལ་ཉམས་ཞིབ་བྱས་པ་བརྒྱུད་གཞན་ཕན་གྱི་སྤྱོད་ལམ་སོགས་ཀྱི་ཐད་ཧ་ཅང་བཟང་དུ་ཕྱིན་པར་བརྟེན། ད་ལྟའི་ཆར་ཆོས་ལུགས་ལ་མ་བརྟེན་པའི་བཟང་སྤྱོད་དེ་བཞིན་ནུབ་ཕྱོགས་རྒྱལ་ཁབ་ཁག་ཏུ་གང་འཚམ་ཁྱབ་ཆེན་པོ་བྱུང་ཡོད།
འཛམ་གླིང་ཞི་བདེའི་དེད་དཔོན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལྟར་(Social, Emotional and Ethical Learning)སྤྱི་ཚོགས་དང་། སེམས་མྱོང་། བཟང་སྤྱོད་བཅས་ཀྱི་སཱི་ཤེས་ཡོན་སློབ་གསོ་དེ་བཞིན་གཏིང་ཟབ་པོ་དང་རྒྱ་ཆེ་བ། ཆ་ཚང་བ་ཞིག་ཆགས་ཀྱི་ཡོད་པ་ཙམ་མ་ཟད། ནུབ་ཕྱོགས་རྒྱལ་ཁབ་ཁག་དང་རྒྱ་གར་ནང་སཱི་ཤེས་ཡོན་སློབ་གསོའི་རླབས་ཆེན་གྱི་ཕན་ཐོགས་ཆེན་པོ་བྱུང་གི་ཡོད་པ་རེད།
ཉེ་ཆར་སྤྱི་ནོར་༸གོང་ས་༸སྐྱབས་མགོན་ཆེནཔོ་མཆོག་དབུ་བཞུགས་ཐོག་ཧི་མཱ་ཅལ་མངའ་སྡེའི་གཞུང་དང་པི་ར་མལ་ཐེབས་རྩ་ (Piramal Foundation) བཅས་ཟུང་འབྲེལ་ཐོག་ནས་ཧི་མཱ་ཅལ་དུ་རྟེན་གཞི་བྱས་པའི་རྒྱ་གར་གཞུང་གི་སློབ་གྲྭ་ཡོངས་རྫོགས་ནང་སཱི་ཤེས་ཡོན་གྱི་སློབ་གསོའི་བསླབ་གཞིའི་ལག་བསྟར་གནང་རྒྱུའི་གན་ཡིག་ཅིག་འཇོག་ཡོད།

འཛམ་གླིང་གི་འགྲོ་བ་མིའི་ཐོག་ནས་སཱི་ཤེས་ཡོན་སློབ་གསོ་དེ་ནི་ཞེ་དྲག་གལ་ཆེན་པོ་དང་ཕན་ཐོགས་ཆེན་པོ་ཡོང་གི་ཡོད་པ་ཡོངས་གྲངས་རེད་འདུག ད་ལྟའི་ཆར་རྒྱལ་ཁབ་ ༤༠ ལྷག་ཙམ་ནང་ལག་བསྟར་འགྲོ་བཞིན་པ་རེད། ད་ཆ་བོད་པའི་སློབ་གྲྭ་ཁག་གི་ནང་སཱི་ཤེས་ཡོན་སློབ་གསོ་ལག་བསྟར་གནང་རྒྱུ་གལ་ཆེན་པོ་ཡིན་པ་དང་། ང་ཚོའི་ཐོག་ནས་རྩ་ཆེན་པོ་ཞིག་བརྩིས་ཀྱི་ཡོད་ལ་རྣམ་པ་ཚོའི་ངོས་ནས་ཀྱང་སཱི་ཤེས་ཡོན་སློབ་གསོའི་མཐུན་སྦྱོར་བའི་ཟབ་སྦྱོང་ཐོག་མཉམ་ཞུགས་ཀྱིས་ཕྱིར་སློབ་གྲྭར་ཕེབས་པའི་སྐབས་དགེ་ལས་སློབ་ཕྲུག་རྣམས་ལ་སློབ་ཁྲིད་བྱེད་པ་དེ་ནི་མི་རིགས་གཅིག་གི་ཞབས་ཞུ་སྒྲུབ་པ་དེ་ལས་གལ་ཆེ་བ་ཞིག་མེད། བྱས་ཙང་དེར་མཉམ་ཞུགས་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་སོགས་གསུངས།

དེ་རྗེས་དབུ་འབྱེད་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ཀྱི་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས་གསུང་བཤད་གནང་དོན། དེ་རིང་གི་བརྗོད་གཞི་འདི་དང་འབྲེལ་བའི་ཐོག་རྣམ་པ་ཚོས་མ་མཁྱེན་པ་དང་གསན་མ་མྱོང་བ་དེ་འདྲ་དམིགས་བསལ་ང་ལ་ཞུ་རྒྱུ་གང་ཡང་མེད། འོན་ཀྱང་འགན་ཞིག་ཡོད་པའི་ཐོག་ལས་རིམ་གྱི་ས་བཅད་མ་སྟོང་ཙམ་ཚིག་ཁ་ཤས་ཤིག་ཞུ་རྒྱུ་ཡིན། ཚང་མས་མཁྱེན་གསལ་དང་། དེ་བཞིན་གོང་ལ་དགེ་བཤེས་ལགས་ཀྱིས་གསུངས་པ་ལྟར།  ཆོས་ལུགས་ལ་མ་བརྟེན་པའི་བཟང་སྤྱོད་སློབ་སྤེལ་གྱི་ལས་གཞི་དེ་ཉིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ཡིན་པ་དང་། བོད་མིའི་སྒྲིག་འཛུགས་ཤེས་རིག་ལས་ཁུངས་ལ་ཆ་བཞག་ན་བཙན་བྱོལ་བོད་མིའི་གཞི་རིམ་གྱི་ཤེས་ཡོན་སྲིད་བྱུས་ནང་གསལ་པོར་བཀོད་ཡོད། ཤེས་ཡོན་གྱི་དགོས་དམིགས་སྤྱི་མར་བགྲང་བའི་སྐབས་ལ་དོན་ཚན་གཅིག་མིའི་ཤེས་རབ་ལྷག་པར་དུ་བྱམས་བརྩེ་ལ་བརྟེན་ནས་བཟང་སྤྱོད་དང་། གསར་གཏོད་ཀྱི་སྒྱུ་རྩལ་གོང་ནས་གོང་དུ་སྤེལ་རྒྱུ་དང་བླང་དོར་གྱི་གནད་ལ་དཔྱད་པ་ཡང་དག་པ་བྱེད་ཐུབ་པ། གཞན་གྱི་རོགས་སྐྱོར་ལ་བརྟེན་མི་དགོས་པར་སོ་སོ་རང་ཉིད་ཀྱི་རྐང་ཐོག་ལངས་ཐུབ་པ་ཤེས་ཡོན་གྱི་དགོས་དམིགས་སྤྱི་དང་། ལྷག་པར་དུ་བྲེ་བྱག་བོད་མིའི་ཤེས་ཡོན་གྱི་དགོས་དམིགས་བགྲང་བའི་སྐབས་བོད་ཀྱི་ཐུན་མིན་ཆོས་དང་རིག་གཞུང་། ལེགས་བྱང་ལ་བརྟེན་པའི་ཁྱད་ནོར་སྐྱེ་འགྲོ་ཡོངས་ལ་ཕན་པར་བྱེད་ཆེད་གང་འདྲ་གནང་དགོས་སྐོར་ཐོག་ལ་གསལ་པོ་འཁོད་ཡོད། ང་ཚོའི་དུས་དང་རྣམ་པ་ཀུན་ཏུ་ཟབ་སྦྱོང་དེ་ལྟ་བུ་གལ་ཆེན་པོ་བརྩི་ཡི་ཡོད།
རྩ་བའི་ཆོས་དང་། རིག་གཞུང་། ལེགས་བྱང་དང་ཡུལ་སྲོལ་གོམས་གཤིས་ནི་སྐབས་རེ་གཞས་དང་ཞབས་བྲོ། ཆས་གོས། གླུ་གཞས། ཟ་མ་མཆོད་སྟངས་ལ་སོགས་མང་པོ་ཞིག་རིག་གཞུང་ཁོངས་གྲངས་ཀྱི་ཡོད།  དེ་དག་རྣམས་རིག་གཞུང་གི་རྣམ་པ་གཅིག་རེད། རིག་གཞུང་ནི་སོ་སོའི་བསམ་བློ་དང་རྒྱུད་ལ་སྦྱར་བ་ལ་གསུང་གི་ཡོད། བོད་ཀྱི་ཐུན་མིན་ཆོས་དང་། རིག་གཞུང་རྣམས་སྐྱེ་འགྲོ་སྤྱི་ལ་ཕན་ཐུབ་ཐབས་གནང་ཕྱོགས་ཐོག་ཤེས་ཡོན་སྲིད་བྱུས་ནང་གསལ་པོ་འཁོད་ཡོད།  དེའི་འོག་ནས་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་སློབ་སྤེལ་གནང་ཕྱོགས་ཤེས་རིག་ལས་ཁུངས་ཀྱི་གལ་ཆེན་པོ་བརྩིས་ཏེ་ད་ལྟ་ཟབ་སྦྱོང་གོ་སྒྲིག་གནང་མཁན་གྱི་ཚན་པའི་འགན་འཛིན་ནས་གསུངས་པ་ལྟར་ད་བར་མཐུན་སྦྱོར་བ་ཁྱོན་མི་གྲངས་ ༦༡ ཁོངས་ནས་དེ་སྔ་ཐོབ་ཟིན་པ་ ༢༢ དང་མཐུན་སྦྱོར་བའི་ལག་ཁྱེར་ཐོབ་ལ་ཉེ་བ་ ༣༩ ཆགས་བསྡད་ཀྱི་འདུག ཤེས་ཡོན་བསྟི་གནས་སློབ་གྲྭ་ཁག་གི་ནང་གལ་ཆེ་དོན་ཆེར་བརྩིས་ཏེ་བར་ལམ་ཤེས་རིག་ལས་ཁུངས་ཀྱི་ངོས་ནས་སློབ་གྲྭ་ཁག་གི་སློབ་ཁྲིད་ཀྱི་རེའུ་མིག་བསྐྱར་ཞིབ་ཀྱིས་སློབ་གྲྭའི་ནང་བདུན་ཕྲག་གཅིག་ནང་ཉུང་མཐར་ཚོགས་ཐེངས་གཅིག་རིང་སཱི་ཤེས་ཡོན་སློབ་གསོ་ཐོག་སློབ་ཁྲིད་གནང་རོགས་ཞེས་འབོད་སྐུལ་སྔ་ཕྱི་རིམ་པ་མང་པོ་ཞུས་ཡོད། ད་ཆ་སློབ་གྲྭ་མང་པོ་ཞིག་ལ་གནང་གི་ཡོད།
གཞན་ཡང་གཞི་རིམ་སློབ་གྲྭ་ཙམ་མིན་པར་མཐོ་སློབ་འགྲིམས་བཞིན་པའི་སློབ་ཕྲུག་ཚོ་ལ་དེ་ལྟ་བུའི་གོ་རྟོགས་དགོས་པ་ལྟར་བར་ལམ་ཤེས་རིག་ལས་ཁུངས་ཀྱི་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་རྒྱུད་སྟོན་པ་དགེ་བཤེས་ལྷ་རམས་པ་ཡེ་ཤེས་རྒྱལ་མཚན་ལགས་མཐོ་སློབ་ཏུ་ཆེད་ཕེབས་ཀྱིས་གོ་རྟོགས་ཀྱི་སློབ་གསོ་དང་བསམ་ཚུལ་བརྗེ་ལེན་སོགས་ལས་གཞི་མང་པོ་ཞིག་སྤེལ་ཡོད། གང་ལྟར་སཱི་ཤེས་ཡོན་སློབ་གསོ་དེ་ང་ཚོས་གལ་ཆེན་པོ་བརྩིས་ཀྱི་ཡོད། འོན་ཀྱང་ཤེས་རིག་ལས་ཁུངས་ལ་ལས་དོན་སྣ་ཚོགས་གནང་དགོས་པའི་འགན་དབང་བཀུར་ཡོད་སྟབས། ཟུར་དུ་ཚན་པ་ཕྱེ་ཐུབ་མེད། གང་ལྟར་མི་གསུམ་བཞིས་འགན་འཁྱེར་བའི་ཐོག་གནང་གི་ཡོད། དུས་རྒྱུན་དཔེ་ལ་ཞུས་པ་བཞིན་ཐབ་ཆུང་ཆུང་མེ་ཚ་པོ་ལྟར་རེད།

འབྲེལ་ཡོད་ཚན་པའི་ལས་འགན་གཙོ་བོ་ནི་གཞི་རིམ་སློབ་གྲྭ་ཁག་གི་བསླབ་གཞིའི་རྩ་འཛིན་བཟོས་གནང་རྒྱུ་དང་། དེ་གཞི་ལ་བཞག་པའི་ཐོག་ནས་སློབ་དེབ་རྩོམ་སྒྲིག་གནང་རྒྱུ་སོགས་ཐུགས་འགན་མང་པོ་ཞིག་ཡོད་པ་རེད། ཤེས་རིག་ལས་ཁུངས་ཀྱི་ངོས་ནས་ཆོས་ལུགས་ལ་མ་བརྟེན་པའི་བཟང་སྤྱོད་སློབ་གསོ་དེ་ནང་བཞིན་རིགས་ལམ་རྣམ་གཞག་ཐོག་ལའང་འབད་བརྩོན་ཞུ་ཡི་ཡོད། གང་ལྟར་སློབ་ཕྲུག་ཚོ་ལ་ཆུང་དུས་ནས་དཔྱད་པ་བྱེད་ཐུབ་པའི་བསམ་བློ་ཞིག་བསྐྲུན་དགོས་རྒྱུ་ཧ་ཅང་གལ་ཆེན་པོ་ཞིག་རེད། ཆུང་དུས་ནས་དྲི་བ་དྲིས་ལན་གནང་རྒྱུའི་གོམས་གཤིས་ཤིག་སྦྱར་ཐུབ་ཚེ་མི་ཚེ་གང་བོར་ཕན་ཐོགས་ཀྱི་ཡོད་པ་བརྗོད་མི་དགོས་པ་རེད།
སློབ་གྲྭ་ཁག་ལ་རྒན་ལགས་རྣམས་ནས་དེའི་ཐོག་ལ་ཤུགས་བསྐྱོན་རྒྱུ་གལ་ཆེན་པོ་ཞིག་མཐོང་གི་འདུག སཱི་ཤེས་ཡོན་སློབ་གསོ་དང་སྲོལ་རྒྱུན་གྱི་སློབ་སྦྱོང་གཞན་སོགས་སློབ་གཉེར་གནང་བའི་སྐབས་གང་ཟག་གི་རྒྱུད་ལ་སྦྱར་ཏེ་ཉམས་ལེན་གནང་ཐུབ་ཚེ་དེ་ཁྱབ་ཆེ་རུ་འགྲོ་བ་མ་ཟད་སོ་སོའི་མི་ཚེའང་དོན་དང་ལྡན་པ། བདེ་སྐྱིད་ལྡན་པ། བྱམས་བརྩེའི་སྤྱི་ཚོགས་ཤིག་བསྐྲུན་ཐུབ་རྒྱུར་དགེ་མཚན་ཆེན་པོ་ཞིག་ཡོང་གི་རེད།སཱི་ཤེས་ཡོན་སློབ་གསོ་དེའི་བརྒྱུད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་བསྒྲུབ་ཐུབ་པ་དང་། བོད་མིའིི་ངོས་ནས་འཛམ་གླིང་གི་ཤེས་ཡོན་ཐོག་ལ་རླབས་ཆེན་གྱི་ཞབས་འདེགས་ཆེན་པོ་ཞིག་བསྒྲུབ་ཐུབ་ཀྱི་ཡོད། ཅེས་སོགས་ཀྱི་གསུང་བཤད་གནང་ཡོད།

མཐར་ཤེས་རིག་ལས་ཁུངས་ཀྱི་སཱི་ཤེས་ཡོན་སློབ་གསོའི་མཐུན་སྦྱོར་བ་སྡེ་ཚན་འགན་འཛིན་ཀརྨ་བདེ་སྐྱིད་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་བ་དང་སྦྲགས་དབུ་འབྱེད་མཛད་སྒོ་ལེགས་པར་གྲུབ་སྟེ་ཟབ་སྦྱོང་དངོས་གཞི་དབུ་འཛུགས་གནང་ཡོད་པ་བཅས།།

ཟབ་སྦྱོང་འདིའི་འགྲོ་གྲོན་ཡོངས་རྫོགས་ཌེ་ན་ཌ་ (DANIDA) རོགས་ཚོགས་ཀྱིས་མཐུན་འགྱུར་གནང་ཡོད་པ་བཅས། །