༡) རྩ་བར། ག་ང་གཉིས་ལ་གི་འོང་སྟེ། །བདག་གི་ཁོང་གི་ལྟ་བུའོ། །
ཞེས་པའི་དོན་ནི་སུམ་ཅུ་པའི་རྩ་བར། དང་པོ་གཉིས་ལ་དང་པོ་མཐུན། །ཞེས་རྗེས་འཇུག་གི་དང་པོ་ག་ང་གཉིས་ལ་འབྲེལ་སྒྲའི་དང་པོ་གི་སྦྱར་དགོས་པར་བསྟན་པ་ལྟར། འདིར་ཡང་དེ་ལྟར་ཤེས་དགོས། དཔེར་ན།
| རྗེས་འཇུག | ཕྲད། | དཔེར་བརྗོད། |
| ག | གི | བདག་གི༷་སློབ་གྲོགས། |
| ང | གི | ཁོང་གི༵་སློབ་ཕྲུག |
༢) རྩ་བར། ན་མ་ར་ལ་བཞི་པོ་གྱི། །གནམ་གྱི་བར་གྱི་གཞན་གྱི་དང༌། །
ཞེས་པའི་དོན་ནི་དེ་ཉིད་ལས། ལྷག་མ་རྣམས་ལ་གྱ་སྦྱར་བ། །ཞེས་འབྲེལ་སྒྲའི་ཕྲད་གི་དང༌། ཀྱི་དང༌། འི་བཅས་ཀྱི་ལྟོས་ཡུལ་རྗེས་འཇུག་ག་ང་ད་བ་ས་འ་བཅས་དྲུག་གི་ལྷག་མ་རྗེས་འཇུག་ན་མ་ར་ལ་བཞིའི་མཐར་འབྲེལ་སྒྲའི་ཕྲད་གྱི་སྦྱར་དགོས་པར་བསྟན་པ་ལྟར་འདིར་ཡང་དེ་ལྟ་བུར་ཤེས་དགོས། དཔེར་ན།
| རྗེས་འཇུག | ཕྲད། | དཔེ་བརྗོད། |
| ན | གྱི | གཞན་གྱི༷་སྐྱོན་ལ་མ་བལྟ། |
| མ | གྱི | གཤམ་གྱི༷་རི་མོར་ལྟོས་དང༌། |
| ར | གྱི | སློབ་ཕྲུག་བར་གྱི༷་མཐུན་སྒྲིལ། |
| ལ | གྱི | རྣམ་རྒྱལ་གྱི༷་ཞྭ་མོ། |
རྩ་བར་རྗེས་འཇུག་ལའི་སྦྱོར་ཚུལ་མི་འབྱུང་བ་ནི་ཚིགས་བཅད་ཀྱི་དབང་གིས་ཡིན་ནོ། །
༣)རྩ་བར། ད་བ་ས་ཡི་རྗེས་སུ་ཀྱི། །ཡོད་ཀྱི་ཆབ་ཀྱི་སེམས་ཀྱི་ནི། །ཁྲུས་ཀྱི་བག་ཡོད་ཀྱི་ཞེས་པ། །དེ་འདྲའི་བྱེ་བྲག་དགོས་པར་བཤད། །
ཅེས་པའི་དོན་ནི། དེ་ཉིད་ལས། གསུམ་ལྔ་བཅུ་ལ་གྱ་དང་སྦྱར། །ཞེས་གསུངས་པའི་དོན་ནི། རྗེས་འཇུག་གི་གསུམ་པ་ད་དང༌། ལྔ་པ་བ་དང༌། བཅུ་པ་ས་བཅས་ཀྱི་མཐར་འབྲེལ་སྒྲའི་ཕྲད་ཀྱི་སྦྱར་དགོས་པར་བསྟན་པ་ལྟར། འདིར་ཡང་དེ་ལྟར་ཤེས་དགོས། དཔེར་ན།
| རྗེས་འཇུག | ཕྲད། | དཔེར་བརྗོད། |
| ད | ཀྱི | རྭ་ཡོད་ཀྱི༵་སེམས་ཅན། |
| བ | ཀྱི | བྱང་ཆུབ་ཀྱི༵་གོ་འཕང༌། |
| ས | ཀྱི | སོ་ཁྲུས་ཀྱི༵་རིན་གོང༌། |
རྩ་བར། སེམས་ཀྱི་ཞེས་པས་རྗེས་འཇུག་ཏུ་མ་ཟད་ཡང་འཇུག་སའི་རྗེས་སུའང་ཀྱི་ཐོབ་པའི་ཚུལ་ཤེས་དགོས་པར་བསྟན་ཏོ། །
༤) གཞུང་འདིར་དངོས་སུ་མ་བསྟན་ཀྱང༌། སུམ་ཅུ་པའི་རྩ་བར། བདུན་པ་ཉིད་ལ་བདུན་པ་སྟེ། །ཞེས་རྗེས་འཇུག་བདུན་པ་འ་ཡིག་གི་མཐར་འབྲེལ་སྒྲའི་ཕྲད་འི་སྦྱར་དགོས་པར་བསྟན་པ་དང༌། ཤུགས་བསྟན་ཚིག་གི་རྐང་པ་ཁ་སྐོང་བའི་ཕྲད་ཡི་ཡང་སྦྱར་དགོས་པ་དོན་གྱིས་འཕངས་སོ། །དེ་གཉིས་ཀྱི་དཔེ་བརྗོད་ཆབས་ཅིག་ཏུ་འགོད་རྒྱུ། དཔེར་ན།
| རྗེས་འཇུག | ཚིག་རྐང༌། | ཕྲད། | དཔེར་བརྗོད། |
| འ | མི་སྐོང་བ། | འི | ཀུན་དགའི༵་ལས་གནས། |
| འ | ཁ་སྐོང་བ། | ཡི | ཀུན་དགའ་ཡི༵་གསོལ་ཕོགས། |
ཡང་ལེགས་བཤད་ལྗོན་དབང་ལས། འ་དང་མཐའ་མེད་འི་དང་ཡི། །ཞེས་གསུངས་པའི་འ་མཐའ་ནི་བཤད་མ་ཐག་པའི་རྗེས་འཇུག་འ་ཡིན་ལ། མཐའ་མེད་ཅེས་པ་ནི། རྗེས་འཇུག་མེད་པའི་ཡི་གེ་ལ་ཟེར། དཔེར་ན། མཐོ། གྲི། དྲི། བརྒྱ། མཐུ་སོགས་བུ་དྲུག་ཅན་གྱི་ཡི་གེ་ཡོད་དོ་ཅོག་ལ་མཐའ་མེད་ཅེས་ཟེར་རོ། །དེ་ལྟར་ན་བོད་ཀྱི་བརྡ་སྤྲོད་རིག་པ་བ་ཕལ་ཆེ་བས་མགྲིན་གཅིག་དབྱངས་གཅིག་གིས་བོད་ཀྱི་ཡི་གེ་ཡིན་ན་མཐའ་རྟེན་ཡོད་པས་ཁྱབ། རྗེས་འཇུག་མེད་པའི་ཡེ་གེ་མེད་དོ། །ཞེས་གསུངས་པ་དང་འགལ་ལོ་ཞེ་ན། དེ་ནི་དེ་ལྟར་མ་ཡིན་ཏེ། སྐད་གསར་བཅད་ཀྱི་ལུགས་ལྟར་བུ་དྲུག་ཅན་གྱི་མཐར་འ་མཐའ་སྤངས་པ་ལ་དགོངས་པ་ཡིན་ལ། རྗེས་འཇུག་གཏན་ནས་མེད་པར་འདོད་པ་མིན་ཏེ། དུས་ཕྱིས་སུ་འ་མཐའ་དངོས་སུ་བྲིས་མེད་པ་མ་གཏོགས་བུ་དྲུག་ཅན་གྱི་ཡི་གེ་གང་ཡིན་ལ་འ་མཐའ་ཐོབ་པ་ཤེས་དགོས། དེའི་རྒྱུ་མཚན་གཙོ་བོ་ཞིག་ནི་དེང་སྐབས་ཀྱང་འ་དང་མཐའ་མེད་མཐར་སྒྲ་སྦྱོར་གཅིག་མཚུངས་ལས་ལོགས་སུ་མེད་པའི་གནད་འགག་ཀྱང་དེར་ཐུག་ཡོད། གོང་དུ་འབྲེལ་སྒྲའི་ཕྲད་འི་ཡི་གཉིས་འ་མཐར་སྦྱོར་ཚུལ་རེའུ་མིག་ཏུ་བཀོད་པ་ལྟར་འདིར་ཡང་མཐའ་མེད་ཀྱི་དཔེ་བརྗོད་རྣམ་གསལ་ཞིག་དགོད་པར་བྱའོ། །དཔེར་ན།
| ཚིག་ཕྲད། | ཚིག་རྐང༌། | དཔེར་བརྗོད། |
| འི | མི་སྐོང་བ། | རྒྱ་མཚོ་ཆེན་པོའི༵་རྦ་རླབས། |
| ཡི | ཁ་སྐོང་བ། | རྒྱ་མཚོ་ཆེན་པོ་ཡི༵་རྦ་རླབས། |
འདི་ལྟ་བུའི་དཔེར་བརྗོད། ཆེན་པོ་ཞེས་པའི་མཐར་འ་མཐའ་དངོས་སུ་བྲིས་མེད་ཀྱང་སྒྲ་སྦྱོར་སྐབས་ཐོན་མིའི་དགོངས་པ་ལྟར་ཐོབ་ཀྱི་ཡོད་པ་ཤེས་དགོས་པ་གནད་ཀྱི་དམ་པའོ། །ཁོ་ན་རེ། བོད་ཀྱི་ཡི་གེར་རྗེས་འཇུག་གིས་ཁྱབ་པར་བཤད་པ་མི་འཐད་དེ། ཕ། མ། ལ། ཤ། ང༌། ར། ཚ། ཟ་སོགས་ལ་མ་ངེས་པའི་ཕྱིར་ཞེ་ན། སྐྱོན་མེད་དེ། དེ་དག་ལ་འ་མཐའ་མེད་པའང་སྐད་གསར་བཅད་ཀྱིས་གཏན་ལ་ཕབ་ཟིན་རྗེས་སྒྲིག་ཁྲིམས་བརྩི་ཕྱིར་དངོས་སུ་བྲིས་མེད་པ་ལས། ཐོབ་ཀྱི་མེད་པ་མ་ཡིན་ཏེ། བོད་སྐད་ཕལ་ཆེ་བའི་གདངས་ནི་རིང་ཆ་ཅན་ཡིན་པས། རྗེས་འཇུག་གཞན་དགུ་པོ་མེད་པའི་མཐར་འ་མཐའ་སྦྱོར་དགོས་པའང་རྒྱུ་མཚན་དེའི་ཕྱིར་རོ། །
སྨྲས་པ།
གང་ཞིག་རྟོགས་ན་གསུང་རབ་རིན་ཆེན་དོན། །བདེ་བླག་སྟེར་མཛད་དཔྱིད་གྱུར་རབ་དང་ཕུལ། །
ཐོན་མིས་ལེགས་མཛད་བརྡ་སྤྲོད་རིག་པའི་གཞུང༌། །སྒྲ་དོན་སྦྱོར་བ་ཞིབ་ཏུ་སྦྱོངས་ཤིག་ཨང༌། །
རྙེད་དཀའ་འཇིག་སླ་དལ་རྟེན་འདིར། །སྲོག་དང་ལྡན་ན་འཚོ་ཞིང་གཞེས། །
ལོ་རྒྱུས་རིང་བའི་གངས་ཅན་པ། །ཡུན་དུ་གནས་མིན་ཡི་གེར་ཐུག །
སེམས་ཤིག་ཡོད་ན་སྐད་ཡིག་འདི། །དགོས་འདོད་ཀུན་འབྱུང་ནོར་བུ་ལྟར། །
སེམས་ཀྱི་བང་མཛོད་ཐབས་བྱུས་བརྒྱས། །ལེགས་པར་ཉར་དང་རིགས་ཀྱི་བུ། །
བློ་རིག་དམན་པས་ཡང་དག་མི་ཤེས་ཀྱང༌། །གསུམ་ལྡན་བཤེས་གཉེན་དམ་པའི་མན་ངག་དང༌། །
ཚད་ལྡན་མཁས་པའི་བསྟན་བཅོས་ལ་བརྟེན་ཏེ། །གཙུག་ལག་འཇུག་པའི་སྒོ་མོ་རབ་ཡངས་ཕྱེ། །
ཞེས་པ་ནི་ངལ་གསོ་བའི་དབྱངས་སུ་གྱེར་བའོ། །