གླིང་གེ་སར་ཉིན་མོའི་སློབ་གྲྭ།

དཀར་ཆག

༡།    འགོ་འཛུགས།
༢།    མཐུན་རྐྱེན་འཛུགས་སྐྲུན།
༣།    སློབ་འཇུག་གནས་སྟངས།
༤།    ཤེས་ཡོན་ལས་རིམ།
༥།     གཞུང་འབྲེལ་འཚམས་གཟིགས།

༡།     འགོ་འཛུགས།

ཐོག་མར་༡༩༧༧ ལོར་གླིང་གེ་སར་སློབ་གྲྭ་འདི་བཞིན་དབུ་འཛུགས་གནང༌། སྐབས་དེར་ཚོགས་པའི་མི་མང་ཡོངས་ནས་མཐུན་འགྱུར་རྒྱ་གང་ཆེ་གནང་ཡོད། ཐོག་མར་སློབ་ཕྲུག་གྲངས་༢༠ ཐམ་པ་ནས་འགོ་འཛུགས་དང་སློབ་དགེ་༢ ནས་དང་བླངས་ཀྱིས་ལོ་གཅིག་རིང་སློབ་ཁྲིད་གནང༌། དེ་རྗེས་ཡེ་ཤུའི་ཆོས་ཚོགས་ཤིག་ནས་དགེ་རྒན་༢ ལ་གསོལ་ཕོགས་ཐབས་འཚོལ་གནང༌། སློབ་ཕྲུག་གྲངས་འབོར་རིམ་གྱིས་མང་དུ་ཕྱིན་པ་མ་ཟད། གཞི་རྩའི་མཐུན་རྐྱེན་ཡར་རྒྱས་གང་ལེགས་བྱུང༌།
ལོ་ཤས་སོང་རྗེས་ཡེ་ཤུའི་ཚོགས་པ་དེ་ནས་གསུངས་གསལ། སློབ་གྲྭའི་འཛིན་སྐྱོང་གི་འགན་ཁུར་ཡོངས་རྫོགས་ཀྱི་བདག་དབང་ཁོ་ཚོར་བྱུང་ཚེ་དེ་ལུགས་བྱ་རྩིས་དང་དེ་མིན་དགེ་རྒན་ཀྱི་མཐུན་འགྱུར་རོགས་རམ་སོགས་ཕྱིར་བསྡུ་བྱ་རྒྱུ་ཡིན་ཚུལ་གསུངས། ཚོགས་པའི་མི་མང་ཚོགས་འཛོམས་གྱིས་ཉིན་ཤས་རིང་གྲོས་བསྡུར་གནང་མཐར། སློབ་གྲྭ་ཡེ་ཤུའི་ཚོགས་པར་རྩིས་སྤྲོད་བྱ་རྒྱུར་མོས་མཐུན་མ་བྱུང་བ་ད་བར་མི་ལོ་༣༢ རིང་ཚོགས་པ་རང་ཁོངས་ནས་འཇིན་སྐྱོང་གནང༌། ཐོག་མའི་འཆར་གཞི་ལྟར་ན་འཛིན་རིམ་བརྒྱད་པ་བར་གྱི་འཆར་གཞི་ཞིག་བཟུང་སྟེ་མདུན་བསྐྱོད་བྱས་རུང༌། དཔལ་འབྱོར་རྒྱབ་རྟེན་ཞན་པའི་དབང་གིས་འཛིན་གྲྭ་ལྔ་པ་བར་ལས་གྲ་སྒྲིག་ཞུ་མ་ཐུབ་པ་དང༌། བར་སྐབས་ཕྱི་ལོ་༢༠༠༣ ལོར་འཛིན་སྐྱོང་གི་དཀའ་ངལ་འཕྲད་དེ་ཟླ་ཤས་རིང་སློབ་གྲྭ་སྒོ་རྒྱག་དགོས་བྱུང༌། སྐབས་དེར་རང་གཞུང་ཤེས་རིག་བཀའ་བློན་མཆོག་ལ་ཐད་ཀར་འབྲེལ་བ་ཞུས་པར་དགེ་རྒན་ཞིག་གི་གསོལ་ཕོགས་མཐུན་འགྱུར་རོགས་མགོན་ཞུས་པར་ཞལ་བཞེས་བཟང་པོ་ཐོབ་རུང༌། མཐའ་མ་དོན་འབྲས་མ་སོན། སྤྱིར་དེ་སྔོན་ནས་བོད་དགེ་ཕུན་ཚོགས་དབང་འདུས་ལགས་ཀྱི་གསོལ་ཕོགས་དེ་རང་གཞུང་ཤེས་རིག་རོགས་སྐྱོར་འོག་ནས་གནང་དང་གནང་མུས་ཡིན།
ཕྱི་ལོ་༢༠༠༢ ལོར་སློབ་གྲྭ་འདི་བཞིན་ཐོག་མར་དབུ་བརྙེས་ཏེ་ལོ་ངོ་༣༥ འཁོར་བའི་མཛད་སྒོ་གཟབ་རྒྱས་ཞུས།
ཕྱི་ལོ་༢༠༠༨ ལོར་སློབ་ཕྲུག་གྲངས་༧༧ ནང་བོད་ཕྲུག་གྲངས་༣༣ དང་ཡུལ་མིའི་ཕྲུག་གྲངས་༤༤ ཡོད། རྒྱ་གར་དགེ་རྒན་༢ དང་བོད་དགེ་༣ དགེ་ཆེ་༡ དང་ཡིག་སྐྱེལ་༡ བཅས་ཁྱོན་བསྡོམས་དགེ་ལས་༧ ཡོད།

༢།     མཐུན་རྐྱེན་འཛུགས་སྐྲུན།

སློབ་གྲྭ་འདིའི་འཛིན་ཁང་དང་མཐུན་རྐྱེན་གཞན་དག་སྔོན་ཆད་དང་བསྡུར་ན་ཡར་རྒྱས་གང་འཚམས་ཕྱིན་ཡོད་ཀྱང༌། ཉེ་བའི་ལོ་ཤས་ནས་བཟུང་བོད་མིའི་བུ་ཕྲུག་སློབ་འཇུག་ཉུང་བ་དང༌། སློབ་བོད་དགེ་ཕུན་ཚོགས་དབང་འདུས་ལགས་ཕུད་དེ་འཕྲོས་དགེ་རྒན་ཡོངས་ཀྱི་གསོལ་ཕོགས་ཚོགས་པའི་ངོས་ནས་ཐབས་འཚོལ་ཞུ་དགོས་སོང་དཀའ་ངལ་ཆེ་ཙམ་འཕྲད་བཞིན་འདུག་རུང༌། དཀའ་ངལ་ལ་གདོང་ལེན་གྱིས་མུ་མཐུད་རྒྱུན་འཛིན་བྱེད་མུས་ཡིན།

༣།     སློབ་འཇུག་གནས་སྟངས།

ཕྱི་ལོ་༢༠༠༧ ཟླ་༡༢ ཚེས་༣༡ ཉིན་བོད་གཞུང་ཤེས་རིག་ལས་ཁུངས་ཀྱི་སྡོམ་རྩིས་ལྟར་ན། ལོ་དེར་གླིང་གེ་སར་ཉིན་སློབ་ཏུ་སློབ་ཕྲུག་བུ་༣༢ དང་བུ་མོ་༢༦ བཅས་ཁྱོན་བསྡོམས་སློབ་ཕྲུག་༥༨ ཡོད་པ་ཚང་མ་ཉིན་སློབ་ཡིན་ཞིང༌། དེའི་ཁྲོད་བོད་རིགས་སློབ་ཕྲུག་༡༧ དང་ཡུལ་མིའི་སློབ་ཕྲུག་༤༡ ཡོད། དགེ་རྒན་༩ དང་ལས་བྱེད་༡ བཅས་ཁྱོན་བསྡོམས་དགེ་ལས་༡༠ ཡོད།
སློབ་གྲྭ་འདིའི་ཕྱི་ལོ་༡༩༨༩ ལོ་ནས་༢༠༠༩ བར་འདས་པའི་ལོ་ངོ་༢༡ རིང་གི་སློབ་ཕྲུག་གྲངས་འབོར་འཕར་ཆག་ཅི་བྱུང་གི་གནས་སྟངས་གཤམ་གསལ།

༤།     ཤེས་ཡོན་ལས་རིམ།

སློབ་གྲྭའི་ནང་རྒྱུན་ལྡན་ཤེས་ཡོན་དང་རིག་གཞུང༌། སྤྱི་ཚོགས་ཀྱི་བྱེད་སྒོ་རྣམས་དབུས་བོད་སློབ་འཛིན་ཚོགས་ཀྱི་སློབ་ཁག་གཞན་དང་སྤྱི་མཚུངས་ལྟར་ཡིན། སློབ་གྲྭའི་དགེ་ལས་རྣམས་རང་གཞུང་ཤེས་རིག་ལས་ཁུངས་ཀྱིས་གོ་སྒྲིག་གནང་བའི་འབྲེལ་ཡོད་ཟབ་སྦྱོང་རིམ་པའི་ནང་འཛུལ་ཞུགས་ཀྱི་གོ་སྐབས་གནང་བ་དམ་འཛིན་ཞུས་ཏེ། དགེ་རྒན་གྱི་ཆེད་ལས་ཤེས་ཚད་གོང་མཐོར་གཏོང་རྒྱུ་དང༌། སློབ་གྲྭའི་འཛིན་སྐྱོང་ལ་གཞོགས་འདེགས་སླད་ས་གནས་མི་མང་དང་ཕ་མའི་འཐུས་ཚོགས་སོགས་འབྲེལ་ཡོད་ཚང་མས་ཕྱར་གྲུ་མཉམ་འདེགས་ཞུས་འབྲས་སུ། སློབ་གྲྭ་འདིའི་སློབ་མ་རྣམས་སློབ་གྲྭ་གཞན་དང་སྤྱི་མཚུངས་བཞིན་ཤེས་ཡོན་སློབ་སྦྱོང་གི་མཐུན་རྐྱེན་ལོངས་སུ་སྤྱོད་ཐུབ་པ་མ་ཟད། སློབ་གྲྭ་མཐར་ཕྱིན་ནས་སློབ་ཁག་གཞན་དུ་འཛུལ་སྐབས་ཤེས་ཚད་དང་གཤིས་སྤྱོད་གང་ཅིའི་ཐད་དཀའ་ངལ་གང་ཡང་འཕྲད་ཀྱིན་མེད་དོ། །

༥།     གཞུང་འབྲེལ་འཚམས་གཟིགས།

སློབ་གྲྭ་འདི་ཉིན་བོད་མི་སྒེར་གྱིས་གཉེར་བའི་སློབ་གྲྭ་ཡིན་ནའང༌། རང་གཞུང་ཤེས་རིག་ལས་ཁུངས་ནས་བཙན་བྱོལ་བོད་མི་ཚོས་རང་འཚོའི་བསམ་བློའི་འདུ་ཤེས་བརྟན་བཟུང་ནས་བུ་ཕྲུག་གི་ཤེས་ཡོན་ཐོག་མི་མང་རང་ངོས་ནས་རང་དོན་རང་གཅེས་བྱ་ཐུབ་རྒྱུ་གལ་འགངས་ཧ་ཅང་ཆེ་བར་གཟིགས་ཏེ་སྒེར་གཉེར་སློབ་གྲྭ་རྣམས་འཛིན་སྐྱོང་ཐོག་རང་དབང་གཙང་མ་ལྡན་ཞིང༌། ཤེས་ཡོན་ཐོག་གཟིགས་རྟོག་ཚགས་ཚུད་ཡོང་ཐབས་ཀྱི་དགོངས་པ་ཟབ་བཞེས་གནང་མུས་ཡིན། ཕྱི་ལོ་༢༠༠༤ ཟླ་༩ ཚེས་འགོར་བོད་གཞུང་ཤེས་རིག་ལས་ཁུངས་ཀྱི་ཤེས་ཡོན་ལས་འཛིན་པ་ཚེ་རིང་བསམ་གྲུབ་ལགས་ཆེད་ཕེབས་ཀྱིས་སློབ་གྲྭ་འདིར་ཤེས་ཡོན་རྟོག་ཞིབ་དང་སྦྲགས། སློབ་གྲྭའི་དགེ་སློབ་ཡོངས་ལ་བསྔགས་བརྗོད་དང་ལམ་སྟོན་གསུང་བཤད་གནང༌།
སློབ་གྲྭའི་མཛད་སྒོ་ཁག་གི་སྐབས་སུ་ད་ཡོད་ཚོགས་ཁང་ཞིག་ཡོད་པ་དེ་ཤིན་ཏུ་ཆུང་རྐྱེན་དཀའ་ངལ་ཆེ་ཙམ་འཕྲད་ཀྱིས་འདུག་ན་མ་འོངས་ད་ཡོད་ཚོགས་ཁང་དེ་ལས་ཅུང་ཟད་ཆེ་བ་ཞིག་གསར་རྒྱག་ཐུབ་རེ་དང་དེ་ཡང་རང་གཞུང་ཤེས་རིག་ལས་ཁུངས་ལ་མཐུན་འགྱུར་ཞུ་རྩིས་ཡིན།

ཤྲི་ན་སྒར་ཉིན་སློབ།

དཀར་ཆག

༡།    འགོ་འཛུགས།
༢།    མཐུན་རྐྱེན་འཛུགས་སྐྲུན།
༣།    སློབ་འཇུག་གནས་སྟངས།
༤།    ཤེས་ཡོན་ལས་རིམ།
༥།     གཞུང་འབྲེལ་འཚམས་གཟིགས།

༡།     འགོ་འཛུགས།

ཤྲི་ན་སྒར་བོད་རིགས་ཁ་ཆེའི་ཉིན་མོ་སློབ་གྲྭའམ། ཤྲི་ན་སྒར་བོད་རིགས་སློབ་གྲྭ་ནི། ཕྱི་ལོ་༡༩༧༨ ལོར་གསར་འཛུགས་གནང་ཞིང༌། ཐོག་མའི་ཆར་སློབ་ཕྲུག་༢༥ དང་དགེ་རྒན་༢ བཅས་ཡོད་པའི་གཞི་རིམ་འོག་མའི་སློབ་གྲྭ་ཞིག་ཡིན།
སློབ་གྲྭ་ཆགས་ཡུལ་ནི་རྒྱ་གར་བྱང་སྣེའི་མངའ་སྡེ་ཇཱ་མུ་དང་ཀ་ཤི་མིར་གྱི་རྒྱལ་ས་ཤྲི་ན་སྒར་གྲོང་ཁྱེར་ཡིན། ཡུལ་དེར་ཕྱི་ལོ་༡༩༥༩ ལོར་བཙན་བྱོལ་དུ་ཕེབས་པའི་བོད་རིགས་ཁ་ཆེ་གང་ཙམ་གནས་སྡོད་བྱས་ཡོད།
ཐོག་མའི་ཆར་སློབ་གྲྭའི་ནང་དངོས་གཞི་མ་ཡིན་པའི་འཛིན་གྲྭ་ཚོགས་ཏེ། སློབ་ཚན་གཙོ་བོ་ཨིན་ཡིག་དང༌། ཨང་རྩིས། ཚན་རིག་བཅས་ཡིན། ཕྱི་ལོ་༡༩༨༠ ལོའི་འགོ་སྟོད་དུ་འཛིན་རིམ་བརྒྱད་པ་བར་སྤར་ཏེ་གཞི་རིམ་བར་མའང་བཙུགས།
ཕྱི་ལོ་༡༩༨༤ ལོར་སློབ་ཕྲུག་བུ་༨༢ དང་བུ་མོ་༡༠༢ བཅས་ཁྱོན་བསྡོམས་སློབ་ཕྲུག་༡༨༤ ཡོད་ཅིང༌། ཕྱི་ལོ་༢༠༠༨ ལོར་སློབ་ཕྲུག་༤༡༨ དང་དགེ་ལས་༣༥ ཙམ་ཡོད།
སློབ་གྲྭ་འདི་བདག་སྐྱོང་བྱེད་པོ་ཚོགས་མི་ལྔས་གྲུབ་པའི་བོད་མིའི་སློབ་གྲྭའི་ཡིད་ཆེས་དགེ་རྩའི་ཚོགས་པ་དེ་ཡིན། དགེ་རྩ་ཚོགས་པ་དེའི་འོག་སློབ་གྲྭའི་འཛིན་སྐྱོང་ལྷན་ཚོགས་ཡོད་ཅིང༌། སློབ་གྲྭའི་འགན་འཛིན་དང་སློབ་སྤྱི་གཉིས་ཀྱིས་སློབ་གྲྭའི་ཉིན་རེའི་ལས་དོན་ལག་བསྟར་བྱེད། དེང་སྐབས་ཀྱི་སློབ་སྤྱི་ནི་སྐུ་ཞབས་ཨ་མན་ནུ་ལ་མཱ་ལིག་(Mr. Amanullha Malik)ཡིན།

༢།     མཐུན་རྐྱེན་འཛུགས་སྐྲུན།

ཕྱིས་སུ་བོད་རིགས་ཁྱོན་ཆེ་གནས་སྤོས་ཀྱིས་ཤྲི་ན་སྒར་གྱི་བཱ་དམ་ཝ་རི་ས(Badamwari)ཁུལ་གྱི་ཧ་ཝལ་(Hawal)ཞེས་པར་གནས་གཞི་ཆགས་པར་བརྟེན། སློབ་གྲྭ་ཡང་གནས་དེར་གནས་སྤོས་བྱས། སྐབས་དེར་སློབ་ཁང་གི་མཐུན་རྐྱེན་མེད་པར་ལྕགས་ཤོག་གི་ཁང་པ་ཞིག་བརྒྱབ་སྟེ་འཕྲལ་སེལ་ངང་སློབ་གྲྭ་ཚོགས།
སློབ་གྲྭར་ས་ཁུངས་དང་སློབ་ཁང་སོགས་གཞི་རིམ་མཐུན་རྐྱེན་དགོས་ངེས་ཛ་དྲག་ཆེ་བའི་གནས་སྟངས་ལ་གཟིགས་ཏེ། བོད་གཞུང་ཤེས་རིག་ལས་ཁུངས་ཀྱི་རོགས་སྐྱོར་འོག་སློབ་གྲྭ་ཆགས་ཡུལ་ས་ཁུངས་བཱ་དམ་ཝ་རི་ཁུལ་དུ་གསར་ཉོ་དང༌། ཐོག་བརྩེགས་གསུམ་ཅན་གྱི་གཞི་རིམ་འོག་མའི་སློབ་ཁང་གསར་རྒྱག་གནང་བ་ལེགས་གྲུབ་ཀྱིས་ཕྱི་ལོ་༢༠༠༦ ཟླ་༩ ཚེས་༩ ཉིན་ཇཱ་མུ་ཀ་ཤི་མིར་མངའ་སྡེ་སྤྱི་ཁྱབ་བློན་ཆེན་ཕཱ་རུག་ཨབ་དུ་(Dr.Farooq Abdullah, Chief Minister of J&K.)་མཆོག་གིས་དབུ་འབྱེད་གནང༌། དབུ་འབྱེད་མཛད་སྒོའི་ཐོག་མངའ་སྡེའི་ཤེས་རིག་བློན་ཆེན་དང༌། མངའ་སྡེའི་ཤེས་ཡོན་ལྷན་ཚོགས་ཀྱི་ངེས་སྟོན་པ་(State School Education Board)ཤྲི་ན་སྒར་གྲོང་ཁྱེར་སྤྱི་ཁྱབ། ས་གནས་བོད་རིགས་ཁ་ཆེ་གཞོན་ནུ་ལྷན་ཚོགས་ཀྱི་ཚོགས་གཙོ་སོགས་སྐུ་མགྲོན་དུ་ཕེབས། སློབ་ཁང་གསར་རྒྱག་གི་འགྲོ་གྲོན་ཁྱོན་བསྡོམས་སྒོར་༡༢༥༦༥༢༥ སོང་བ་བོད་གཞུང་ཤེས་རིག་ལས་ཁུངས་དང༌། ཨིན་ལན་བོད་ཀྱི་ངལ་སེལ་ཐེབས་རྩ། རྒྱ་གར་དབུས་ནང་སྲིད་ལས་ཁུངས་བཅས་ཀྱིས་རོགས་སྐྱོར་གནང་ཡོད།
བོད་གཞུང་ཤེས་རིག་ལས་ཁུངས་ནས་ཀམ་པུ་ཊར་སྦྱོང་བརྡར་ཁང་དང་དཔེ་མཛོད་ཁང་གསར་རྒྱག་བཅས་ཀྱི་རོགས་དངུལ་ཐབས་འཚོལ་གནང༌།
ཕྱི་ལོ་༢༠༠༧ ལོར་སློབ་གྲྭ་འདིའི་འཛིན་རིམ་གནས་སྤར་གྱིས་གཞི་རིམ་བར་མའི་སློབ་གྲྭར་བསྒྱུར། གཞི་རིམ་འོག་མའི་འཛིན་ཁང་གསར་སྐྲུན་ཆེད་བོད་གཞུང་ཤེས་རིག་ལས་ཁུངས་བརྒྱུད་དཔལ་ལྡན་སྐུ་སྒེར་ཡིག་ཚང་དང་ཨིན་ལན་བོད་ཀྱི་ཐེབས་རྩ་(Tibet Relief Fund UK)གཉིས་ཀྱི་རོགས་རམ་འོག་སྔོན་འགྲོ་འཛིན་གྲྭའི་འཛིན་ཁང་གསར་རྒྱག་དང༌། ཡིག་ཚང་དང་དཔེ་མཛོད་བཅས་གསར་རྒྱག་གི་ལས་གཞི་ལག་བསྟར་མཇུག་སྐྱོང་བྱུང༌།
ཕྱི་ལོ་༢༠༠༨ ཟླ་༡༠།༡༡ ནང༌། སློབ་གྲྭ་འདིའི་འཛིན་རིམ་བཅུ་པའི་སློབ་མ་ཐོན་ཐེངས་དང་པོ་རྣམས་རྒྱལ་ཡོངས་ལོ་འཁོར་ཡིག་རྒྱུགས་ནང་འཛུལ་ཞུགས་བྱས་པར། སློབ་ཕྲུག་བརྒྱ་ཆ་༥༠ རྒྱུགས་འབྲས་ལེགས་སོན་བྱུང་བའི་ནང༌། དེ་ཡང་བརྒྱ་ཆ་༢༥ ཨང་སྡེ་དང་པོ་དང༌། བརྒྱ་ཆ་༢༥ ཨང་སྡེ་གཉིས་པ་ཐོབ་ཡོད།

༣།     སློབ་འཇུག་གནས་སྟངས།

ཕྱི་ལོ་༢༠༠༧ ཟླ་༡༢ ཚེས་༣༡ ཉིན་བོད་གཞུང་ཤེས་རིག་ལས་ཁུངས་ཀྱི་སྡོམ་རྩིས་ལྟར་ན། ལོ་དེར་ཤྲི་ན་སྒར་ཉིན་སློབ་ཏུ་སློབ་ཕྲུག་བུ་༡༩༠ དང་བུ་མོ་༡༣༦ བཅས་ཁྱོན་བསྡོམས་སློབ་ཕྲུག་༣༢༦ ཡོད་པ་ཚང་མ་ཉིན་སློབ་ཡིན་ཞིང༌། དེའི་ཁྲོད་བོད་རིགས་སློབ་ཕྲུག་༩༨ དང་ཡུལ་མིའི་སློབ་ཕྲུག་༢༢༨ ཡོད། དགེ་རྒན་༢༡ དང་ལས་བྱེད་༧ བཅས་ཁྱོན་བསྡོམས་དགེ་ལས་༢༨ ཡོད།
ཕྱི་ལོ་༡༩༨༩ ནས་༢༠༠༩ བར་འདས་པའི་ལོ་ངོ་༢༡ རིང་སློབ་གྲྭ་འདིའི་ནང་སློབ་ཕྲུག་གྲངས་འབོར་གནས་སྟངས་ཅི་ཆགས་གཤམ་གསལ།

༤།     ཤེས་ཡོན་ལས་རིམ།

སློབ་གྲྭ་འདིའི་ནང་རྒྱུན་ལྡན་གྱི་སློབ་ཁྲིད་ལས་རིམ་ཁག་ཕུད། རིག་གཞུང་དང༌། སྤྱི་ཚོགས་ཀྱི་བྱེད་སྒོ་ཅི་རིགས་ཤིག་གི་ནང་མཉམ་ཞུགས་བྱས་དང་བྱེད་མུས་ཡིན།
དེ་ཡང་ལོ་རེའི་ཕྱི་ཟླ་༤།༥ ཡས་མས་སུ་འཛིན་རིམ་ལྔ་པ་ཡན་གྱི་སློབ་མ་ཚོ་ཡུལ་ལུང་སྐོར་རྒྱུག་འགྲན་བསྡུར་དང༌། འཛིན་རིམ་ལྔ་པ་ཡན་གྱི་སློབ་མའི་ཁྲོད་ཀུ་རན་ཆོས་གཞུང་ངག་སྐྱོར་འགྲན་བསྡུར། རིག་རྩལ་འགྲན་བསྡུར། བུ་བཅོལ་ཁང་དང་སྔོན་འགྲོའི་འཛིན་གྲྭའི་སློབ་མ་ཚོའི་གླུ་གཞས་འགྲན་བསྡུར་ལས་རིམ། འཛིན་རིམ་དྲུག་པ་ནས་བཅུ་པ་བར་གྱི་སློབ་མའི་ཁྲོད་རྩོམ་ཡིག་འགྲན་བསྡུར། ལོ་འཁོར་ལུས་རྩལ་འགྲན་ཚོགས། སློབ་གྲྭ་ནང་ཁུལ་བགྲོ་གླེང་དང་གཏམ་བཤད་འགྲན་བསྡུར། གཞི་རིམ་འོག་མའི་འཛིན་གྲྭ་དམའ་བ་ཚོའི་ཆེད་རྩེད་ཆས་དང་རྩེད་མོའི་རིགས་དམིགས་བསལ་གོ་སྒྲིག་བྱེད་བཞིན་ཡོད།

༥།     གཞུང་འབྲེལ་འཚམས་གཟིགས།

ཕྱི་ལོ་༢༠༠༠ ལོར་ཤེས་རིག་བཀའ་བློན་རིན་ཆེན་མཁའ་འགྲོ་དང་དྲུང་ཆེ་ཚེ་རིང་དོན་གྲུབ་རྣམ་གཉིས་ཤྲི་ན་སྒར་ཉིན་སློབ་ཏུ་འཚམས་གཟིགས་དང་སྦྲགས། ཡུལ་དེའི་དགེ་སློབ་མི་མང་བཅས་ལ་ལམ་སྟོན་གསུང་བཤད་གནང༌།
ཕྱི་ལོ་༢༠༠༤ ཟླ་༧ ཚེས་༡༧ ཉིན་ཤེས་རིག་བཀའ་བློན་ཐུབ་བསྟན་ལུང་རིགས་དང་དྲུང་ཆེ་གཡུ་ཐོག་ཀརྨ་དགེ་ལེགས་རྣམ་གཉིས་ནས་འཚམས་གཟིགས་དང་སྦྲགས། ད་ཡོད་སློབ་གྲྭའི་ཁང་བརྩེགས་གསར་བཞེངས་གྲུབ་པའི་དབུ་འབྱེད་མཛད་སྒོ་བསྐྱངས། སློབ་གྲྭའི་འཛུགས་སྐྲུན་ལས་འཆར་ལ་རྟོག་ཞིབ་བཀོད་འདོམས་དང༌། སྤྱི་ཡོངས་གནས་སྟངས་རྟོག་ཞིབ་བཅས་ཀྱི་ཆེད་ཤེས་རིག་དྲུང་འཕར་དངོས་གྲུབ་རྡོ་རྗེ་ལགས་ཕྱི་ལོ་༢༠༠༥ ཟླ་༡༢ ཚེས་༦ ནས་༡༢ བར་སློབ་གྲྭ་འདིར་ཆེད་ཕེབས་ཀྱིས་རྟོག་ཞིབ་དང་ལམ་སྟོན་གནང༌། ཕྱི་ལོ་༢༠༠༦ ཟླ་༥ ཚེས་༢ ནས་༥ བར་ཤེས་རིག་ལས་ཁུངས་ཀྱི་དྲུང་ལས་བསྟན་འཛིན་བློ་གསལ་ལགས་སློབ་གྲྭ་འདིར་སྤྱི་ཡོངས་ཤེས་ཡོན་རྟོག་ཞིབ་དང་འབྲེལ་ཨིན་ལན་བོད་ཀྱི་ཐེབས་རྩའི་རོགས་དངུལ་ལས་འཆར་ལ་དམིགས་བསལ་རྟོག་ཞིབ་གནང༌།
ཕྱི་ལོ་༢༠༠༧ ལོར་དཔལ་ལྡན་སྐུ་སྒེར་ཡིག་ཚང་དང་ཨིན་ལན་བོད་ཀྱི་ཐེབས་རྩ་གཉིས་ཀྱི་རོགས་སྐྱོར་འོག་གསར་དུ་གྲུབ་པའི་སློབ་གྲྭའི་འཛིན་ཁང་དང་ཡིག་ཚང་ཁང་བརྩེགས་ལེགས་གྲུབ་བྱུང་བའི་དབུ་འབྱེད་ཆེད་ཤེས་རིག་བཀའ་བློན་ཐུབ་བསྟན་ལུང་རིགས་དང༌། དྲུང་ཆེ་གཡུ་ཐོག་ཀརྨ་དགེ་ལེགས་བཅས་སློབ་གྲྭར་ཆེད་ཕེབས་ཀྱིས་འཚམས་གཟིགས་དང་ས་གནས་མི་མང་དང་དགེ་སློབ་ཚོར་ཤེས་ཡོན་སྲིད་བྱུས་དང་འབྲེལ་བའི་བཀའ་སློབ་ཟབ་རྒྱས་གནང༌།

སྤོག་ར་ཨེས་ཨོ་ཨེས་བོད་ཁྱིམ་སློབ་གྲྭ།

དཀར་ཆག

༡། འགོ་འཛུགས།
༢། མཐུན་རྐྱེན་འཛུགས་སྐྲུན།
༣། སློབ་འཇུག་དང་ཡིག་རྒྱུགས་གྲུབ་འབྲས།
༤། ཤེས་ཡོན་ལས་རིམ།
༥། ཨེས་ཨོ་ཨེས་ལས་རིགས་སྦྱོང་བརྡར་ཁང།
༦། མི་སྣ་འཚམས་གཟིགས།

༡། འགོ་འཛུགས།

སྤོག་ར་ཨེས་ཨེ་ཨེས་བོད་ཕྲུག་ཁྱིམ་སྡེ་ནི། བལ་ཡུལ་གྱི་རྒྱལ་ས་ཀ་ཐ་མན་གྲུ་ནས་ནུབ་ཕྱོགས་སུ་ཀི་ལོ་མི་ཊར་༢༠༠ ཡས་མས་ཀྱི་སར་ཡོད་པའི་སྤོག་ར་བཀྲ་ཤིས་གླིང་བོད་མིའི་གཞིས་སྒར་གྱི་ཉེ་འདབས་སུ་ཆགས་ཡོད། ས་ཁུལ་འདིའི་མཐོ་ཚད་རྒྱ་མཚོ་ནས་མི་ཊར་༡༠༠༠ ལྷག་ཙམ་དང་དབྱར་དུས་ཉིན་མོའི་གནམ་གཤིས་ཚ་ཚད་མཐོ་ཤོས་35 oCསྐྲ ཙམ་དང་དགུན་ཁར་མཚན་གྱི་གྲང་ཚད་དམའ་ཤོས་5 oCཙམ་ཡིན། གངས་རི་དང༌། མཚོ་རྫིང༌། ནགས་ཚལ་བཅས་ཀྱིས་ལེགས་པར་བརྒྱན་པས་ཡུལ་ལྗོངས་མཛེས་ཤིང་ཡུལ་བསྐོར་སྤྲོ་འཆམ་གྱི་ས་ཁུལ་གྲགས་ཅན་ཞིག་ཏུ་གྱུར་ཡོད། ཕྱི་ལོ་༡༩༧༤ ནང་བལ་ཡུལ་གློ་སྒྲིག་གི་དྲག་པོ་ལས་འགུལ་ཕྱིར་བསྡུ་གནང་ནས་བོད་མི་༢༠༠༠ ལྷག་བལ་ཡུལ་སྤོག་ར་ས་ཁུལ་དུ་འབྱོར་སྐབས་བོད་མི་རྣམས་ལྟོ་གོས་དང་གནས་མལ་སོགས་གཞི་རིམ་གྱི་དཀའ་ངལ་ཅི་ཆེ་ཡོད་ཁར། ས་ཆའི་གནས་བབ་ཀྱིས་འཕྲོད་བསྟེན་གྱི་མཐུན་རྐྱེན་ཞན་སྟབས་ནད་གཞི་འདྲ་མིན་འཕོག་པས། མི་མང་པོ་ཞིག་འདས་གྲོངས་སུ་ཕྱིན་ཏེ་བོད་ཕྲུག་མང་པོ་ཞིག་དྭ་ཕྲུག་ཏུ་ལུས་པ་སོགས་ཀྱི་གནས་སྟངས་ཤིན་ཏུ་ཐ་ཞན་དུ་གྱུར་པས། རྒྱལ་སྤྱི་ཨེས་ཨོ་ཨེས་བྱིས་པའི་ཁྱིམ་སྡེ་(SOS-Kinderdr of International Austria)ནས་བལ་ཡུལ་དོན་གཅོད་ལས་ཁུངས་བརྒྱུད་ཐོག་མར་སྤོག་ར་ཁུལ་དུ་དྭ་ཕྲུག་༣༢ ཙམ་ཡོད་པ་དེ་དག་ལ་རོགས་རམ་གནང་རྒྱུ་ཞལ་བཞེས་ཐོབ་འཕྲལ་ཕྱི་ལོ་༡༩༧༥ ལོ་ནས་བཟུང་སྟེ་ཨེས་ཨོ་ཨེས་བོད་ཁྱིམ་དབུ་བརྙེས། སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་དང་བཙན་བྱོལ་བོད་གཞུང་གི་དབུ་ཁྲིད་འོག རྒྱལ་སྤྱིའི་ཨེས་ཨོ་ཨེས་བྱིས་པའི་ཁྱིམ་སྡེའི་ཚོགས་པ་ནས་ཕྱི་ལོ་༡༩༧༠ ཙམ་ལ་བལ་ཡུལ་རྒྱས་ས་ཀ་ཐ་མན་གྲུར་ཆགས་པའི་ཨེས་ཨོ་ཨེས་ལྷོ་ཤར་ཨེ་ཤི་ཡའི་སྐུ་ཚབ་ལྕམ་སྐུ་ཨེ་ཌི་ཐེ་ཕོལ་(Edith Poul)བརྒྱུད་རང་གཞུང་བལ་ཡུལ་དོན་གཅོད་ཁང་གི་སྐུ་ཚབ་རྣམས་སྤོག་ར་ཁུལ་དུ་ཆེད་ཕེབས་ཀྱིས་བོད་མི་སྐྱབས་བཅོལ་བའི་གནས་སྟངས་ལ་གཟིགས་ཞིབ་གནང་སྟེ། ཕྱི་ལོ་༡༩༧༥ ཟླ་༡ ནང་ཛ་དྲག་ངང་དྭ་ཕྲུག་གྲངས་༣༢ དང་ལས་བྱེད་གྲངས་༤ བཅས་ཀྱི་ཆེད་བལ་ཡུལ་རྒྱ་གྲམ་དམར་པོའི་ཐེབས་རྩ་ཚོགས་པ་(Nepal Red Cross)དང་བཀྲ་ཤིས་གླིང་གཞིས་ཆགས་ལ་ས་ཆ་རྒྱ་མི་ཆུང་བ་ཞིག་ཐོབ་པའི་རེ་འདུན་ཞུས་པར་དོན་སྨིན་བྱུང་སྟེ་སྡོད་ཁང་གསར་རྒྱག་གི་ལས་གཞི་ལོ་དེའི་ཟླ་༡༠ ནང་ལེགས་གྲུབ་བྱུང་སྟེ་ཨེས་ཨོ་ཨེས་བོད་ཕྲུག་གི་སྡོད་ཁང་ཞེས་པའི་མིང་བཏགས། ཐོག་མར་ཕྱི་ལོ་༡༩༧༥ ལོར་སློབ་གྲྭ་འདིར་སློབ་ཕྲུག་༣༢ དང་ལས་བྱེད་༤ བཅས་ཡོད། དེ་ནས་རིམ་པས་ཁྱིམ་ཚང་ཡར་རྒྱས་རྒྱ་བསྐྱེད་བྱུང་སྟེ་ད་ལྟའི་ཆར་ཁྱིམ་ཚང་གྲངས་༡༢ ནང་བོད་ཕྲུག་ཕོ་མོ་གྲངས་༡༡༥ དང༌། དེ་མིན་རྒྱ་གར་དང་བལ་ཡུལ་ནང་ཕྲུ་གུ་ན་གཞོན་མཐོ་རིམ་སློབ་སྦྱོང་བྱེད་མུས་གྲངས་༩༢ བཅས་ཁྱོན་བསྡོམས་སློབ་ཕྲུག་གྲངས་༢༠༧ དང༌། དགེ་རྒན་ལས་བྱེད་གྲངས་༢༧ བཅས་ཡོད།

༢། མཐུན་རྐྱེན་འཛུགས་སྐྲུན།

ཕྱི་ལོ་༡༩༧༨ ནས་རིམ་བཞིན་འཛམ་གླིང་རྒྱལ་སྤྱི་ཨེས་ཨོ་ཨེས་བྱིས་པའི་ཁྱིམ་སྡེ་ཚོགས་པའི་གཙོ་འཛིན་ཌོག་ཊར་ཧར་མན་གྷ་མན་ནར་(Dr. Hermann Gmeiner) ནས་ཐུགས་བརྩེ་ཆེན་པོས་བོད་མི་དྭ་ཕྲུག་རྣམས་ཀྱི་བདེ་དོན་ལ་གཟིགས་རྟོག་ལེགས་པར་གནང་སྟེ་ལོ་རིམ་བཞིན་ཁྱིམ་ཚང་ཁག་རྒྱ་བསྐྱེད་གནང་བ་མ་ཚད། དམ་པ་དེ་ཉིད་སྐུ་གཤེགས་པའི་རྗེས། ཁོང་གི་སྐུ་ཚབ་ཏུ་སྐུ་ཞབས་ཧེལ་མོ་ཊེ་ཀུ་ཏིང་(Mr Helmut Kutin)ནས་ཐུགས་འགན་བཞེས་ཏེ། ཕྱི་ལོ་༡༩༨༢ ནས་ད་བར་ལོ་རེ་བཞིན་སློབ་གྲྭར་ཆེད་ཕེབས་གཟིགས་རྟོག་གནང་སྟེ། ཁྱིམ་ཚང་རྒྱ་བསྐྱེད་ལེགས་པར་གྲུབ་རྗེས་ལོ་དེའི་ནང་ཁོང་དང་བལ་ཡུལ་རྒྱ་གྲམ་དམར་པོ་རོགས་ཚོགས་ཀྱི་ཚོགས་གཙོ་རྣམ་གཉིས་ནས་དབུ་འབྱེད་མཛད་སྒོ་གནང༌། དེ་བཞིན་བལ་ཡུལ་སྐུ་ཚབ་དོན་གཅོད་མཆོག་དང་མི་དྲག་དཔོན་རིགས་མང་པོ་དུས་གཅིག་ཏུ་འཚམས་གཟིགས་གནང་སྟེ་གཞུང་འབྲེལ་ཐོག་སྤོག་ར་ཨེས་ཨོ་ཨེས་བོད་ཕྲུག་ཁྱིམ་སྡེ་ཞེས་པའི་ཚོགས་པའི་མིང་གསོལ་བསྩལ་དང་གཏན་འབེབས་གནང༌། ལོ་དེ་གའི་ནང་ཁོང་གིས་བོད་ཕྲུག་གཞོན་སྐྱེས་རྣམས་ཀྱི་ཆེད་དུ་ཁྱིམ་ཚང་རྒྱ་བསྐྱེད་ཙམ་མ་ཡིན་པར་གཤམ་གསལ་ཨེས་ཨོ་ཨེས་ལས་རིགས་སྦྱོང་བརྡར་གྱི་སྡེ་ཚན་ཞིག་ཀྱང་གསར་འཛུགས་གནང༌། ཕྱི་ལོ་༡༩༨༦ བར་བོད་ཕྲུག་ཁྱིམ་སྡེའི་ཕྲུ་གུ་རྣམས་དང་དེ་བཞིན་བཀྲ་ཤིས་གླིང་གཞིས་ཆགས་ཀྱི་ན་གཞོན་རྣམས་ཡུལ་མིའི་སློབ་གྲྭར་བསྐྱོད་དེ་བོད་ཡིག་ཟུར་ཁྲིད་བྱས། ཨེས་ཨོ་ཨེས་རོགས་ཚོགས་ནས་གཙོ་བོར་བོད་ཕྲུག་ཁྱིམ་སྡེའི་དྭ་ཕྲུག་དེ་དག་དང་གཞིས་ཆགས་ཀྱི་ཕྲུ་གུ་རྣམས་ལ་མ་འོངས་པར་བོད་མིའི་ཤེས་ཡོན་དང༌། རིག་གཞུང་སྲུང་སྐྱོབ་སོགས་ལ་དགོངས་པ་ཆེ་བཞེས་ཀྱིས་ཕྱི་ལོ་༡༩༨༦ ལོར་སླར་ཡང་བལ་ཡུལ་རྒྱ་གྲམ་དམར་པོ་ཚོགས་པ་དང་བཀྲ་ཤིས་གླིང་གཞིས་ཆགས་སུ་ས་ཆ་གསོལ་སྩལ་ཞུས་འབྲས་སུ། ས་ཆ་གནང་སོན་བྱུང་སྟེ་ཕྱི་ལོ་༡༩༨༧ ཟླ་༦ ཚེས་༦ ཉིན་ཤྲཱི་དཔལ་ལྔ་ལྡན་ལྷ་ལྕམ་སྲས་མོ་ཤ་ར་རྡ་ཧ་མཆོག་ནས་སློབ་གྲྭ་(SOS Hermann Gmeiner School)འདི་བཞིན་དབུ་འབྱེད་གནང༌། སློབ་གྲྭ་འདིའི་ནང་ཨེས་ཨོ་ཨེས་བོད་ཕྲུག་ཁྱིམ་སྡེའི་ཕྲུ་གུ་ཙམ་མ་ཟད༌། ས་གནས་གཞིས་ཆགས་ཀྱི་ཕྲུ་གུ་དང༌། ཡུལ་མི་ཉམ་ཐག་རྣམས་ཀྱི་ཕྲུ་གུ་བཅས་ལ་སློབ་སྦྱོང་གི་གོ་སྐབས་དང་མཐུན་རྐྱེན་ལེགས་པོ་བསྐྲུན་ཡོད། སློབ་གྲྭའི་ས་ཆ་སྤུས་གཟིགས་གནང་སྐབས་དཔལ་འབྱོར་གྱི་དཀའ་ངལ་ཆེ་སྟབས། བོད་གཞུང་ཤེས་རིག་ལས་ཁུངས་ལ་རེ་སྐུལ་ཞུས་དོན་བཞིན་ཞལ་བཞེས་ལེགས་པར་ཐོབ་སྟེ་ས་ཆའི་རིན་འབབ་ཆ་ཚང་གསོལ་བསྩལ་གནང་བས། ཕྱི་ལོ་༡༩༩༣ དང་༡༩༩༤ ལོ་སོ་སོར་ཨེས་ཨོ་ཨེས་གཙོ་འཛིན་སྐུ་ཞབས་ཀུ་ཊིང་(Mr Helmut Kutin)ནས་སློབ་གྲྭ་འདིའི་རྨང་གཞིའི་ལས་འཆར་འགོ་འཛུགས་ཀྱིས་ཕྱི་ལོ་༡༩༩༥ ལོར་དབུ་འབྱེད་མཛད་སྒོ་གནང༌། དེང་གི་ཆར་བལ་ཡུལ་སྤོག་ར་ཨེས་ཨོ་ཨེས་ཧར་མན་གྷར་མན་ནར་བོད་ཁྱིམ་འདི་ཉིད་བོད་ཕྲུག་རྣམས་ཀྱི་སློབ་སྦྱོང་གི་བསྟི་གནས་ཡིད་དུ་འོང་བ་ཞིག་ཏུ་གྱུར་ཡོད། དེ་ལྟར་སྤོག་ར་བོད་མིའི་གཞིས་ཆགས་ཁག་བཞིའི་བོད་ཕྲུག་དང་དམིགས་བཀར་ཨེས་ཨོ་ཨེས་བོད་ཕྲུག་ཁྱིམ་སྡེའི་ཕྲུ་གུ། དེ་བཞིན་བལ་ཡུལ་ནུབ་ཕྱོགས་ལུང་ཁུག་ཁག་ཏུ་གནས་པའི་བོད་ཕྲུག་རྣམས་ལ་ཤེས་ཡོན་སློབ་སྦྱོང་གི་གོ་སྐབས་ཐོབ་བཞིན་ཡོད། ལྷག་པར་བོད་ཕྲུག་ཁྱིམ་སྡེའི་ཕྲུ་གུར་མཚོན་ན་སོ་སོ་རང་ཉིད་ནས་འཇོན་ན་སློབ་སྦྱོང་ཇི་ཙམ་བར་དུ་བྱ་ཐུབ་ཚེ་སློབ་ཡོན་ཆ་ཚང་ཚོགས་པ་ནས་གནང་དང་གནང་མུས་ཡིན། མདོར་ན། བལ་ཡུལ་སྤོག་ར་ཨེས་ཨོ་ཨེས་ཧར་མན་གྷམཡེ་ནར་སློབ་གྲྭའི་ནང་ཕྱི་ལོ་༡༩༨༢ ལོར་སྔོན་འགྲོ་ནས་འགོ་འཛུགས་གནང་སྟེ། ཕྱི་ལོ་༡༩༨༧ ལོར་དམའ་འབྲིང་དང༌། ཕྱི་ལོ་༡༩༩༥ ལོར་མཐོ་འབྲིང་བཅས་གསར་འཛུགས་གནང༌། སློབ་གྲྭའི་བུ་བཅོལ་ཁང་དང་སྔོན་འགྲོ། འབྲིང་སློབ། མཐོ་སློབ་བཅས་སྡེ་ཚན་གསུམ་པོ་སློབ་གྲྭའི་འཛིན་སྐྱོང་ལྷན་ཚོགས་དང་སློབ་སྤྱིའི་གཟིགས་སྐྱོང་འོག་ཡོད། སྔོན་འགྲོ་དང་འབྲིང་སློབ་ནང་འཛིན་རིམ་དང་པོ་ནས་བདུན་པ་བར་ནི་བཀྲ་ཤིས་གླིང་གཞིས་ཆགས་ཀྱི་ཉེ་འདབས་སུ་རྒྱལ་སྤྱི་ཨེས་ཨོ་ཨེས་བྱིས་པའི་ཁྱིམ་སྡེ་(SOS-Kinderdrof International Austria)ནས་གསར་འཛུགས་གནང༌། ཨེས་ཨོ་ཨེས་བོད་ཕྲུག་ཁྱིམ་སྡེའི་ཕྲུ་གུ་དང་བཀྲ་ཤིས་གླིང་གཞིས་ཆགས་ཀྱི་ཕྲུ་གུ་རྣམས་སློབ་གྲྭ་དེ་གཉིས་སུ་བསྐྱོད་དང་སྐྱོད་མུས་ཡིན། ཨེས་ཨོ་ཨེས་མཐོ་སློབ་ནི་འབྲིང་སློབ་ཡོད་ས་ནས་ཀི་ལོ་མི་ཊར་༢ ཙམ་གྱི་ས་ཕྱོགས་གྷ་རི་པ་ཋན་(Gharipatan)དུ་གོང་བཀོད་ལྟར་ཐོག་མར་བོད་གཞུང་ཤེས་རིག་ལས་ཁུངས་ནས་ས་ཆའི་རིན་འབབ་གསོལ་བསྩལ་གནང་བ་ལྟར་རྒྱལ་སྤྱི་ཨེས་ཨོ་ཨེས་ཚོགས་པའི་སྟངས་འཛིན་གྱིས་འཛིན་རིམ་བརྒྱད་པ་ནས་བཅུ་གཉིས་བར་ཡོད། ཕྱི་ལོ་༢༠༠༡ ལོར་སླར་ཡང་རྒྱལ་སྤྱི་ཨེས་ཨོ་ཨེས་རོགས་ཚོགས་ནས་རྒྱུ་གྲོན་བཏང་སྟེ་སློབ་ཕྲུག་བུ་མོའི་ཉལ་ཁང་ཞིག་གསར་རྒྱག་ལེགས་གྲུབ་གནང༌། སྤོག་ར་ཨེས་ཨོ་ཨེས་བོད་ཕྲུག་ཁྱིམ་སྡེའི་དང་སྤོག་ར་གཞིས་ཆགས་ཁག་བཞི། དེ་བཞིན་བལ་ཡུལ་བྱང་ཕྱོགས་ལུང་ཁུག་གི་གཞིས་སྒར་གློ་ཚེ་རོག་དང། མ་ནང༌། ནོར་འཛིན་གླིང་བཅས་ཀྱི་གཞིས་སློབ་དང་འབྲིང་སློབ་ཐོན་པའི་སློབ་ཕྲུག་རྣམས་ཀྱང་སློབ་གྲྭ་འདིར་སློབ་ཞུགས་ཀྱིས་བོད་ཡིག་གཙོ་བོར་གྱུར་པའི་དེང་དུས་ཀྱི་སྐད་ཡིག་སློབ་ཚན་ལ་སྦྱང་བརྩོན་གནང་ཡུལ་གྱི་མཐུན་རྐྱེན་བཟང་པོ་ཐོབ་བཞིན་ཡོད། ཐོག་མ་དང་ད་བར་སློབ་ཕྲུག་དང་དགེ་རྒན་ལས་བྱེད་གྲངས་འབོར་ཁྱད་པར་ཅི་བྱུང་རེའུ་མིག་གཤམ་གསལ།

༣། སློབ་འཇུག་དང་ཤེས་ཡོན་གནས་སྟངས།

ཕྱི་ལོ་༢༠༠༧ ཟླ་༡༢ ཚེས་༣༡ ཉིན་བོད་གཞུང་ཤེས་རིག་ལས་ཁུངས་ཀྱི་སྡོམ་ཐོ་ལྟར་ན། རྣམ་རྒྱལ་མཐོ་སློབ་ཏུ་སློབ་ཕྲུག་བུ་༢༥༥ དང་བུ་མོ་༢༧༣ བཅས་ཁྱོན་བསྡོམས་༥༢༨ ཡོད་པ་ལས་གཏན་སློབ་གྲངས་༩༣ དང༌། ཉིན་སློབ་གྲངས་༤༣༥ ཡོད་ཅིང༌། བོད་རིགས་མ་ཡིན་པའི་སློབ་ཕྲུག་༡༡༦ ཡོད། དགེ་རྒན་༤༦ དང་ལས་བྱེད་༡༦ བཅས་ཁྱོན་བསྡོམས་དགེ་ལས་༥༧ ཡོད། ཕྱི་ལོ་༡༩༨༩ ནས་༢༠༠༩ བར་འདས་པའི་ལོ་ངོ་༢༡ རིང་སྤོག་ར་ཨེས་ཨོ་ཨེས་བོད་ཁྱིམ་སློབ་གྲྭ་འདིའི་སློབ་མའི་གྲངས་འབོར་གནས་སྟངས་གཤམ་གསལ། སྤོག་ར་བཀྲ་ཤིས་གླིང་ཉིན་སློབ་འདིའི་འདས་པའི་ལོ་ངོ་༡༠ རིང་སློབ་ཕྲུག་སྤྱི་ཡོངས་ཀྱི་ལོ་འཁོར་ཡིག་རྒྱུགས་གྲུབ་འབྲས་གཤམ་གསལ།

སྤོག་ར་ཨེས་ཨོ་ཨེས་བོད་ཕྲུག་ཁྱིམ་སྡེ་འདི་བཞིན་བཙུགས་ནས་ད་བར་ཁྱོན་བསྡོམས་སློབ་གཉེར་བ་༡༩༥ ཙམ་མཐོ་སློབ་དང། ལས་རིགས་སྦྱོང་བརྡར་འདྲ་མིན་གྱི་བསླབ་པ་མཐར་སོན་བྱུང་སྟེ་སྤྱི་ཚོགས་ནང་དོན་ཕན་ལྡན་པའི་ཞབས་འདེགས་སྒྲུབ་བཞིན་པ་ཡིན། སྤོག་ར་ཨེས་ཨོ་ཨེས་བོད་ཕྲུག་ཁྱིམ་སྡེ་མ་ལག་སློབ་གྲྭྭ་དང་ལས་རིགས་སྦྱོང་བརྡར་སློབ་ཁང་གི་ལས་འཆར་དང་རྒྱུ་གྲོན་ཡོངས་རྫོགས་ཀྱི་རྩིས་ཁྲ་དང་ལས་བསྡོམས་སོགས་བལ་ཡུལ་ཨེས་ཨོ་ཨེས་དབུས་སྤྱི་ཁྱབ་ལས་ཁུངས་བརྒྱུད་རྒྱལ་སྤྱི་ཨེས་ཨོ་ཨེས་ཚོགས་པར་རྩིས་འབུལ་ཞུ་དགོས་པ་དང༌། དེ་བཞིན་ལས་འཆར་དང་འཛིན་སྐྱོང་ཡོངས་རྫོགས་རྒྱལ་སྤྱི་ཨེས་ཨོ་ཨེས་ཚོགས་པའི་བཀོད་སྒྲིག་འོག་བལ་ཡུལ་ཨེས་ཨོ་ཨེས་དབུས་སྤྱི་ཁྱབ་ལས་ཁུངས་ནས་སྟངས་འཛིན་གནང་བཞིན་ཡོད།

༤། ཤེས་ཡོན་ལས་རིམ།

སློབ་གྲྭ་འདིའི་སྔོན་འགྲོའི་སྡེ་ཚན་ཁག་ནང་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ཀྱི་དགོངས་དོན་དང་མཐུན་པའི་མོན་ཊོ་སོ་རི་ཕྲུ་གུ་གསོ་སྐྱོང་གི་ལམ་སྲོལ་ལག་བསྟར་གནང་སྟེ། ཕྲུ་གུའི་ཚོར་ཤེས་ཡོན་འཕེལ་རྒྱས་ཀྱི་ཆོས་ཉིད་དང་མཐུན་པའི་སྦྱོང་བརྡར་བྱེད་ཐབས་དང༌། སློབ་སྦྱོང་གི་བྱེད་སྒོ་རྣམས་སྤྲོ་སྣང་དོད་པོ་དང༌། ཉམས་མཚར་པོ། ལས་སླ་པོ་བཅས་ཀྱི་རྩ་དོན་རྒྱུན་འཛིན་གནང་ཡོད། སློབ་གྲྭའི་ནང་རྒྱུན་ལྡན་སློབ་ཚན་གྱི་ལས་རིམ་ཁག་ཕུད། སྔ་དྲོ་ཞོགས་ཚོགས་སྐབས་སློབ་ཕྲུག་སྡེ་ཚན་སོ་སོས་རེས་མོས་ཀྱིས་ཚོགས་ཐོག་ཏུ་ཀློག་འདོན་དང༌། གཏམ་བཤད། སྙན་སྒྲོན། གསར་གནས་དང་རྒྱུན་ཤེས་སོགས་སྐད་རིགས་གསུམ་པོ་གང་རུང་ཐོག་སྤེལ་མུས་དང༌། ཕྱི་དྲོ་ཚོགས་ཐུན་དང་རང་སྦྱོང་སྐབས་འཛིན་རིམ་དྲུག་པ་ཡན་གྱི་སློབ་མ་ཚོས་ཀམ་པུ་ཊར་སྦྱོང་བརྡར་ལ་སྤྲོ་སྣང་ཆེན་པོས་འཛུལ་ཞུགས་བྱེད། ཕྱི་དྲོ་འཛིན་གྲྭ་གྲོལ་རྗེས་སློབ་ཕྲུག་ཆུང་གྲས་ནང་སློབ་སྦྱོང་ཞན་པའི་སློབ་མར་དམིགས་བསལ་ཁ་གསབ་འཛིན་གྲྭ་གོ་སྒྲིག་གནང་ཡོད་ལ། ཉལ་ཁང་ནང་ཞག་སྡོད་སློབ་མ་ཡོངས་ལ་དགོང་དྲོ་རང་སྦྱོང་དང་སློབ་སྟོན་ཆད་མེད་ཚོགས་བཞིན་ཡོད། ཤེས་ཡོན་སློབ་སྦྱོང་ནི་ཁང་པའི་ནང་འཛུལ་ནས་འབད་རྩོལ་བྱས་པ་ཙམ་གྱིས་མི་འགྲིགས་པར། དེ་ལས་ལྡོག་སྟེ་དགེ་རྒན་དང་དཔེ་དེབ་ནས་ཐོབ་པའི་ཤེས་ཡོན་རྣམས་རང་བྱུང་དང་སྤྱི་ཚོགས་ཁྲོད་བརྟག་ཞིབ་དང༌། གཤིབས་བསྡུར། ལག་ལེན་བཅས་ངེས་པར་བརྒྱུད་དགོས་སྟབས། སློབ་གྲྭའི་ནང་འཛིན་རིམ་སོ་སོར་སྤྱི་ཚོགས་ཞབས་ཞུ་དང༌། བྱེད་སྒོར་མཉམ་ཞུགས། ཕྱིར་བསྐྱོད་བལྟ་བསྐོར་སོགས་ཀྱི་ལས་རིམ་གལ་ཆེན་ཏུ་བརྩིས་ཏེ་གོ་སྒྲིག་གནང་མུས་ཡིན། དཔེར་ན། སྔོན་འགྲོའི་ཕྲུ་གུ་རྣམས་ལ་ལོ་འཁོར་རྩེད་རིགས་འགྲན་ཚོགས་གོ་སྒྲིག་ཞུ་མུས་ཡིན་ཞིང༌། འགྲན་ཚོགས་ཀྱི་མཛད་སྒོ་དང་བརྒྱུད་རིམ་ཁྲོད་ཕྲུ་གུའི་ཕ་མ་དང་དགེ་ལས། ཉེ་འཁོར་ཡུལ་མི་དང་སྐུ་མགྲོན་སོགས་འདུས་ཚོགས་ཀྱིས་སྤྲོ་ཉམས་ཆེན་པོས་ལྟད་མོར་བལྟ་བ་དང་ཕྲུ་གུ་ཚོའི་སེམས་ཤུགས་སྤར་གྱི་ཡོད། གཞན་ཡང༌། གཞི་རིམ་བར་མ་དང་གོང་མའི་ཁྲོད་སློབ་གྲྭ་ནང་ཁུལ་ཡི་གེའི་དག་ཆ་འགྲན་བསྡུར་དང༌། རིག་རྩལ་འགྲན་བསྡུར། ཀློག་འདོན་དང་སྐྱོར་འདོན། བགྲོ་གླེང༌། ལོ་འཁོར་ལུས་རྩལ་འགྲན་ཚོགས། ཡིག་གཟུགས་དང་རྩོམ་ཡིག་འགྲན་བསྡུར། ཕྱི་བསྐྱོད་ལྟ་བསྐོར། སློབ་མའི་ལོ་འཁོར་དུས་དེབ། སློབ་གྲྭའི་ལོ་འཁོར་དུས་དེབ་རྩོམ་སྒྲིག་སོགས་བྱེད་སྒོ་སྣ་མང་བརྒྱུད་སློབ་མ་ཚོས་རང་རང་གི་ནུས་རྩལ་གོང་སྤེལ་དང་སྤྱི་མཐུན་མཉམ་འབྲེལ་གྱི་འདུ་ཤེས་མཐོར་འདེགས། སློབ་གྲྭའི་འཚོ་བ་སྤྲོ་སྣང་དོད་པོ་ཡོང་བ་བཅས་ལ་ཕན་རླབས་ཆེན་པོ་བྱུང་ཡོད། ཕྱི་ལོ་༢༠༠༧ ཟླ་༡༡ ནང་བོད་གཞུང་ཤེས་རིག་ལས་ཁུངས་ནས་གོ་སྒྲིག་གནང་བའི་རྒྱལ་ཡོངས་སློབ་གྲྭ་ཁག་སྡེ་ཚན་དྲུག་ཏུ་ཕྱེ་སྟེ་བོད་ཡིག་ཡིག་གཟུགས་འགྲན་བསྡུར་གནང་བའི་ཁྲོད། སློབ་གྲྭ་འདིའི་སློབ་ཕྲུག་བསྟན་འཛིན་སྐལ་བཟང་ལ་འཛིན་རིམ་བདུན་པ་བརྒྱད་པའི་སྡེ་ཚན་གྱི་བྱ་དགའ་ཨང་དང་པོ་ཐོབ། སྤྱིར་བཏང་ལོ་འཁོར་ཡིག་རྒྱུགས་གཏོང་མུས་ཐོག འཛིན་རིམ་བརྒྱད་པ་དང་བཅུ་པ། བཅུ་གཉིས་བཅས་བལ་ཡུལ་བོད་སློབ་ཁག་གསུམ་ནས་ལོ་ལྟར་གངས་ཅན་བདེ་རྩའི་གོ་སྒྲིག་འོག་བལ་ཡུལ་རྒྱལ་ཡོངས་བོད་ཡིག་ཡིག་རྒྱུགས་བཏང་དང་གཏོང་བཞིན་པ་མ་ཟད། ཕྱི་ལོ་༢༠༠༩ ལོའི་འཛིན་རིམ་བཅུ་པའི་བོད་ཡིག་རྒྱལ་ཡོངས་ནང་སློབ་མ་ཉི་མ་རྡོ་རྗེ་ལ་བརྒྱ་ཆ་༧༧ ལྷག་དང་ཨང་རིམ་གསུམ་པའི་བྱ་དགའ་ལེགས་གསོལ་ཐོབ། དེང་སྐབས་སློབ་མ་དེ་བཞུགས་སྒར་དྷ་སྟེང་བོད་ཁྱིམ་དུ་ཚན་རིག་སློབ་སྦྱོང་བྱ་མུས་ཡིན། སློབ་དགེ་སྒེར་ལ་དམིགས་བསལ་གྲུབ་འབྲས་དང་བྱ་དགའ་བྱུང་མེད་ཀྱང༌། ཕྱི་ལོ་༢༠༠༩ ཟླ་༥ ཚེས་༦ ཉིན་གཅིག་གི་རིང་སྤོག་ར་ཡུལ་ལྗོངས་སུ་ཡོད་པའི་མ་ཎི་པལ་སྦྱོང་བརྡར་སྨན་ཁང་དུ་སློབ་དགེ་རྣམས་ལ་ཛ་དྲག་སྨན་བཅོས་ཀྱི་ཟབ་སྦྱོང་ཐོབ་སྟེ་དགེ་རྒན་རྣམས་ལ་ལག་ཁྱེར་སྩལ་གནང་བྱུང༌། རྒྱལ་སྤྱིའི་ཨེས་ཨོ་ཨེས་སྒྲིག་འཛུགས་ནས་སྲིད་ཇུས་སྣ་ཚོགས་ཆེད་བཙུགས་གནང་བའི་ནང་ཤེས་ཡོན་སྲིད་ཇུས་སྡེ་ཚན་ནང་སྤོག་ར་ཨེས་ཨོ་ཨེས་སློབ་གྲྭའི་སློབ་སྤྱི་ཚེ་རིང་དོན་གྲུབ་ལགས་ཀྱིས་ཨེ་ཤ་ཡའི་གླིང་ཕྲན་ཁུལ་གྱི་ཨེས་ཨོ་ཨེས་སློབ་གྲྭའི་མགྲིན་ཚབ་པ་བྱས་ནས་ཨཕ་རི་ཀའི་ཡུལ་གྲུ་བྷི་ནན་དང་ལྷོ་ཨ་མི་རི་ཀའི་ཡུལ་གྲུ་པེ་ར་གྷོ་ཡེ་(Paragua)ཁུལ་གཉིས་སུ་ཨེས་ཨོ་ཨེས་བུ་ཕྲུག་ཁྱིམ་སྡེའི་ཤེས་ཡོན་སྲིད་ཇུས་ཟབ་སྦྱོང་ཐོག་ངོ་བསྐྱོད་བཅར་ཞུགས་མཛད། སློབ་ཁག་གཞན་དང་མཚུངས་པར་སློབ་གྲྭ་འདིར་དགེ་རྒན་ཕ་མའི་འཐུས་ཚོགས་ཤིག་བཙུགས་ཡོད་པས། སློབ་གྲྭ་དང་དགེ་རྒན། ཁྱིམ་བདག་ཕ་མ་བཅས་དབར་བགྲོ་གླེང་དང་མཉམ་འབྲེལ་གྱིས་དཀའ་རྙོག་སེལ་ཐབས་བྱེད་ཀྱི་ཡོད། ལོ་རེའི་ཟླ་དྲུག་ཡིག་ཚད་གྲུབ་རྗེས་དགེ་རྒན་ཕ་མའི་ཚོགས་ཆེན་བསྐངས་ཚོགས་ཀྱིས་སློབ་མའི་ཤེས་ཡོན་ཡར་རྒྱས་ལ་ཁྱིམ་ཚང་ཕ་མའི་ངོས་ནས་རོགས་འདེགས་ཞུ་མུས་ཡིན།

༥། ཨེས་ཨོ་ཨེས་ལས་རིགས་སྦྱོང་བརྡར་ཁང།

ཨེས་ཨོ་ཨེས་ལས་རིགས་སྦྱོང་བརྡར་ཁང་ནི་ཕྱི་ལོ་༡༩༧༨ ལོར་གསར་འཛུགས་གནང་ཞིང༌། ཐོག་མར་ཤིང་བཟོ་དང་ཚ་ལའི་མཐུད་སྦྱོར་(Welding)ལས་རིགས་གཉིས་ལས་མེད། དེ་རྗེས་རིམ་བཞིན་གློག་ལས་དང༌། དཀྲུག་རྒྱག(Turner) གློག་ཆས། ཀམ་པུ་ཊར་དང་རྩིས་དྲུང་སྦྱོང་བརྡར། མོ་ཊར་འཕྲུལ་ལས་བཅས། ད་ལྟ་ལས་རིགས་སྡེ་ཚན་ཁག་འདྲ་མིན་བདུན་ཡོད། ལས་རིགས་སྦྱོང་བརྡར་ཁང་འདི་ཐོག་མར་སྤོག་ར་ཨེས་ཨོ་ཨེས་བོད་ཕྲུག་ཁྱིམ་སྡེའི་བོད་ཕྲུག་སློབ་སྦྱོང་རྗེས་མ་ཟིན་པའམ་ལག་ཤེས་སྦྱོང་འདོད་ཅན་རྣམས་ལ་ཆེད་དམིགས་གསར་འཛུགས་གནང་བ་ལྟར། ད་བར་གོང་གསལ་ལས་རིགས་ཁག་ནས་ཐོན་པའི་གཞོན་སྐྱེས་མང་དག་ཅིག་སྤྱི་ཚོགས་ནང་གོ་འཕེར་ཐོན་པའི་ཞབས་ཞུ་སྒྲུབ་མུས་ཡིན་ཞིང༌། ལས་རིགས་སྦྱོང་བརྡར་ཁང་འདི་བལ་ཡུལ་རྒྱལ་ཡོངས་ཨེས་ཨོ་ཨེས་ཁྱབ་ཁོངས་ཀྱི་འཛིན་སྐྱོང་སྟངས་འཛིན་འོག་ཡོད་སྟབས་ལོ་རེའི་དངུལ་རྩིས་དང༌། ལས་བསྡོམས་སོགས་བལ་ཡུལ་ཨེས་ཨོ་ཨེས་ལས་ཁུངས་ཨ་མར་རྩིས་འབུལ་ཞུ་བཞིན་ཡོད། ཕྱི་ལོ་༢༠༠༨ ལོར་སྦྱོང་བརྡར་ཁང་འདིར་སློབ་ཕྲུག་བུ་མོ་༡༧ དང་བུ་༣༦ བཅས་ཁྱོན་བསྡོམས་སློབ་ཕྲུག་གྲངས་༥༣ ཡོད་པའི་ནང༌། བོད་རིགས་༧ དང། དེ་བྱིངས་ཚང་མ་ཡུལ་མིའི་ཕྲུ་གུ་ཡིན། ལས་རིགས་སྦྱོང་བརྡར་ཁང་ནང་སློབ་སྟོན་དགེ་རྒན་གྲངས་༡༦ དང༌། ལས་བྱེད་༡༠ བཅས་ཁྱོན་བསྡོམས་དགེ་ལས་༢༦ ཡོད། སྤོག་ར་ཨེས་ཨོ་ཨེས་བོད་ཕྲུག་ཁྱིམ་སྡེས་ཆེད་དུ་བཙུགས་པའི་འཕྲོད་བསྟེན་སྨན་ཁང་ཆུང་ངུ་ཞིག་ཡོད་ཀྱང། ནད་གཞི་ཆེ་ཁག་རིགས་ཡུལ་མིའི་སྨན་ཁང་ཏུ་བསྟེན་གཏུགས་བྱས་དང་བྱེད་མུས་ཡིན། རྒྱལ་སྤྱིའི་ཨེས་ཨོ་ཨེས་ཚོགས་པའི་སྒྲིག་གཞི་ལྟར་སྤོག་ར་ཨེས་ཨོ་ཨེས་བོད་ཁྱིམ་ནང་མ་ཚབ་བགྲེས་ཡོལ་རྣམས་ལ་རྒན་གསོ་ཁང་གི་སྡོད་ཁང་དང་འབྲེལ་མཐུན་རྐྱེན་ཡོད་བཞིན་ལ། ད་ལྟའི་ཆར་ཨ་མ་རྒན་ཡོལ་དུ་སོང་བ་༢ ཡོད།

༦། མི་སྣ་འཚམས་གཟིགས།

སྤྱིར་སློབ་གྲྭ་འདིར་བཙན་བྱོལ་བོད་གཞུང་གི་མཛད་གཙོ་རྣམ་པ་དང༌། ཁྱད་པར་བོད་གཞུང་ཤེས་རིག་ལས་ཁུངས་ཀྱི་བཀའ་བློན་དང་དྲུང་ཆེ། དྲུང་འཕར་གཙོས་པའི་འབྲེལ་ཡོད་ལས་བྱེད་རྣམས་དུས་ཡུན་ངེས་མེད་ནང་འཚམས་གཟིགས་གནང་མུས་ཀྱང༌། སློབ་གྲྭའི་མགོ་ཁོངས་དང་སྦྱིན་བདག་གཙོ་བོ་ཨེས་ཨོ་ཨེས་ཡིན་སྟབས་དེ་འབྲེལ་འགོ་ལས་དང་སྐུ་མགྲོན། སྦྱིན་བདག་སོགས་ཀྱིས་འཚམས་གཟིགས་ཆད་མེད་གནང་བཞིན་ཡོད། འདིར་ཕྱི་ལོ་༢༠༠༨ ལོ་ཁོ་ནར་བྱུང་བའི་འཚམས་གཟིགས་གལ་ཆེན་འགའ་དཔེ་མཚོན་དུ་བཀོད་པ་གཤམ་གསལ། ཕྱི་ལོ་༢༠༠༨ ཟླ་༥ ཚེས་༤ སློབ་གྲྭ་འགོ་འཛུགས་ཉིན། སུད་སི་ཨེས་ཨོ་ཨེས་འགན་འཛིན་ལྕམ་སྐུ་ཀི་རི་སི་ཊིན་(Mrs. Cristine)གཞི་རིམ་འོག་མའི་སློབ་ཆུང་ལ་འཚམས་གཟིགས་གནང༌། ཁོང་གིས་གལ་ཆེའི་གསུང་བཤད་གནང་བ་དང་གསར་དུ་འདེམས་ཐོན་བྱུང་བའི་དགེ་རྒན་ཕ་མའི་འཐུས་མི་ཚོར་མཇལ་དར་བསྒྲོན། ཟླ་༦ ཚེས་༤ ཉིན། བལ་ཡུལ་གཞུང་བྱིས་པ་ཡར་རྒྱས་ལས་འཛིན་ལྕམ་སྐུ་ཤུ་སི་མ་པོག་རེལ་ལགས་སློབ་གྲྭ་འདིར་ཆེད་ཕེབས་ཀྱིས་གཞི་རིམ་གོང་མའི་སློབ་ཕྲུག་ཚོར་བྱིས་པ་སྲུང་སྐྱོབ་ཀྱི་སྲིད་བྱུས་སྐོར་བལ་སྐད་ཐོག་གསུང་བཤད་དྲིལ་བསྒྲགས་གནང༌། ཚོགས་འདུའི་དེའི་ནང་དགེ་ལས་༥༦ ཙམ་ཚོགས་ཞུགས་བྱས། གསུང་བཤད་གྲུབ་རྗེས་བལ་སྐད་དང་ཨིན་སྐད་ཐོག་དྲི་བ་དྲིས་ལན་ཡང་གནང༌། ཟླ་༩ ཚེས་༡༡ ཉིན་རྒྱལ་སྤྱིའི་ཨེས་ཨོ་ཨེས་གཙོ་འཛིན་སྐུ་ཞབས་ཧེལ་མུཏ་ཀུ་ཊན་(Mr. Helmut Kutin)དང༌། ཨེ་ཤ་ཡ་སྡེ་ཚན་འགན་འཛིན་ལྕམ་སྐུ་ཤུ་བྷ།(Miss M.Shubha) འཇར་མན་ཨེས་ཨོ་ཨེས་དོ་དམ་འགན་འཛིན་ཌོག་ཊར་ཀའེ་ཝོར་ཝེཀ་(Dr.Kay Vorwerk) ཨོ་སི་ཊི་རི་ཡ་ཨེས་ཨོ་ཨེས་དོ་དམ་འགན་འཛིན་སྐུ་ཞབས་ཀི་རི་སི་ཊན་མོ་སར།(Mr.Christian Moser) ཨོ་སི་ཊི་རི་ཡ་ཨེས་ཨོ་ཨེས་ལས་རོགས་ལྕམ་སྐུ་མི་ཅི་ལ་ཤེལ་ཀེར་(Mrs.Michaela Schalk) བལ་ཡུལ་གཞུང་ཨེས་ཨོ་ཨེས་འགན་འཛིན་སྐུ་ཞབས་པར་དྷན་ནན་ག་(Mr.S.S.Pradhananga)བཅས་སློབ་གྲྭར་འཚམས་གཟིགས་བསྐྱངས་པར་སྣེ་ལེན་གཟབ་རྒྱས་ཀྱིས་འཛིན་རིམ་བརྒྱད་པའི་སློབ་མའི་འཁྲབ་སྟོན་གཟིགས་འབུལ་ཞུས། དེ་རྗེས་སྐུ་ཞབས་ཧེལ་མུཏ་ཀུ་ཊན་གྱིས་སློབ་མ་ཚོས་བོད་ཀྱི་སྲོལ་རྒྱུན་བཟང་པོ་རྒྱུན་འཛིན་གང་ལེགས་བྱས་པར་བསྔགས་བརྗོད་གནང༌། ཕྱི་ལོ་༢༠༠༨ ཟླ་༡༠ ཚེས་༢༠ ཉིན་འཕྲོད་བསྟེན་མི་རྗེ་བཀའ་བློན་དཔལ་འབྱོར་ཚེ་རིང་མཆོག་འདི་ག་སྤོག་རར་གཞུང་འབྲེལ་འཚམས་གཟིགས་ཞབས་སོར་འཁོད་དེ་འདི་སློབ་ཏུ་དགེ་སློབ་ཡོངས་ལ་བསྩལ་བའི་བཀའ་སློབ་སྙིང་དོན་ཤེས་ཡོན་གྱི་གནས་ཚད་གོང་མཐོར་བཏང་སྟེ་མི་རིགས་ཀྱི་ཞབས་འདེགས་བསྒྲུབ་རྒྱུ་དང༌། དེ་ལྟར་སྒྲུབ་མཁན་དགེ་ལས་ཀུན་ལ་རྗེས་སུ་ཡི་རང་དང་སླད་སྙིང་སྟོབས་ཞུམ་མེད་དགོས་གལ་དྲན་སྐུལ་དང་འཚམས་འདྲིའི་བཀྲ་ཤིས་བདེ་ལེགས་ཞུ་ཞེས་བཀའ་བསྩལ། ཕྱི་ལོ་༢༠༠༩ ཟླ་༦ ཚེས་༢༤ རེས་གཟའ་ལྷག་པའི་ཉིན་བོད་མི་མང་སྤྱི་འཐུས་རྒྱལ་ནོར་ཚེ་དབང་མཆོག་འདི་གའི་གཞིས་ཆགས་ཁག་ལ་བཙན་བྱོལ་བོད་གཞུང་གི་ཆབ་སྲིད་དྲིལ་བསྒྲགས་ཆེད་ཕེབས་ཞོར་དུ་སློབ་གྲྭ་འདིར་ཉིན་དེའི་ཕྱི་དྲོའི་ཆུ་ཚོད་༡་༣༠ ནས་༣་༣༠ བར་འཚམས་གཟིགས་གནང༌། སློབ་གྲྭའི་དགེ་སློབ་ཡོངས་ནས་བཀྲ་ཤིས་མཇལ་དར་ཐོགས་ཏེ་ཚོགས་ཁང་དུ་གདན་འདྲེན་ཞུས། སྤྱི་འཐུས་རྒྱལ་ནོར་ཚེ་དབང་མཆོག་ནི་བཙན་བྱོལ་བོད་མིའི་ཁྲོད་སྤྱི་སྒེར་གྱི་ལས་དོན་ཐོག་ཐུགས་འཁུར་ཆེན་པོས་རོགས་རམ་གནང་མཁན་ཞིག་ཡིན་ལ། ཁོང་གིས་ལོ་ལྟར་ཉམ་ཐག་བོད་ཕྲུག་བཅུ་གྲངས་ལྷག་ལ་སློབ་ཡོན་རོགས་རམ་གནང་དང་གནང་བཞིན་ཡོད་པས་ཉེ་སྔོན་བོད་གཞུང་གིས་ལེགས་གསོལ་ཀྱང་སྩལ་འདུག དེར་ཁོང་གིས་ཐུགས་སྣང་ཆེན་པོས་དགེ་སློབ་ཡོངས་ལ་དེང་དུས་བཙན་བྱོལ་བོད་གཞུང་གི་ཆབ་སྲིད་མཛད་ཕྱོགས་སྐོར་ངོ་སྤྲོད་དང༌། གཙོ་བོ་ྋསྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གི་ཐུགས་བསྐྱེད་བཀའ་དྲིན་དང་དམ་པ་མཁས་དབང་གྷ་མ་ཨི་ནར་གྱི་ལྷག་བསམ་གཞེན་སྐུལ་གྱི་ཉེར་ལེན་ལས་ཨེས་ཨོ་ཨེས་སློབ་གྲྭའི་ཕྱིའི་མཐུན་རྐྱེན་ཕུན་སུམ་ཚོགས་པ་དེ་དག་ནང་དགེ་སློབ་ཡོངས་ཀྱིས་ཆུད་ཟོས་སུ་མ་ཕྱིན་པར་བེད་སྤྱོད་ལེགས་གཏོང་དང༌། ལྷག་པར་སློབ་ཕྲུག་རྣམས་ཀྱིས་བོད་ཀྱི་ཐུན་མིན་སྐད་ཡིག་རིག་གཞུང་གི་རིན་ཐང་ངོ་མ་ཤེས་པའི་སྒོ་ནས་འབྱུང་འགྱུར་སྤྱི་སྒེར་ལས་དོན་ཡང་དག་པར་བསྒྲུབ་ཐུབ་པ་བྱ་རྒྱུ་དང༌། ཕྱོགས་གཞན་ནས་བཙན་བྱོལ་བོད་གཞུང་དང་རྒྱལ་སྤྱིའི་ཆབ་སྲིད་ཀྱི་འགྱུར་ལྡོག་ལ་དོ་སྣང་བྱ་རྒྱུ་ཤིན་ཏུ་གལ་ཆེན་ཡིན། ཁོང་ཉིད་ཆུང་དུས་སློབ་སྦྱོང་གི་མཐུན་རྐྱེན་ཧ་ཅང་ཞན་པས་རྡོ་ལེབ་སྟེང་ས་སྨྱུག་གིས་བྲིས་པ་དང་མཚན་མོར་ཟླ་འོད་ལས་ཡི་གེ་འབྲི་ཀློག་བྱས། དཔེ་ཁུག་དང་འབྲི་དེབ་ཅེས་པ་རྒྱུན་རིང་མཐོང་མྱོང་མ་བྱུང་ཞེས་སོགས་སྒོ་གསུམ་གཡོ་འགུལ་ཐེབས་པའི་བཀའ་སློབ་ཟབ་ཅིང་རྒྱས་པ་གནང༌།