།གསང་བ་ཡེ་ཤེས་གསང་བས་མཇལ། །ལུང་བསྟན་རྡོ་རྗེའི་གླུ་གར་མཛད།
ཀ
(དེར་རྒྱལ་བུ་དཀོན་མཆོག་འབངས་བླ་མའི་ཞལ་གདམས་དང་བཅས་ཚོགས་ཁང་དུ་བྱོན་པ་ན། མཁའ་འགྲོ་མ་ཞིག་གིས་དགའ་བའི་གར་དང་བཅས་རྒྱལ་བུའི་དྲུང་དུ་འོང་ནས་བསུས།)
རྒྱལ་བུས། །དམ་ཆོས་ཟག་མེད་གཞལ་ཡས་ན། །གནས་ལུགས་ཆོས་ཀྱི་རྒྱལ་པོ་བཞུགས། །བདེ་སྟོང་ཆོས་ཀྱི་ང་རོ་ཅན། །མ་ཆགས་ཡན་ལག་དྲུག་ཅུའི་དབྱངས། །ཕྱོགས་རིས་མེད་པར་མཉམ་ཉིད་སྒྲོགས། །བདག་གི་བླ་མ་ཡིན་ནོ་ཀུན། །ཕནབདེའི་འབྱུང་གནས་གདམས་པ་བསྐུར། །(ཅེས་གསུངས་པ་དང་རང་བཞིན་གྱིས་བླ་མའི་གསུང་འཕྲིན་དེ་བླ་མ་རང་གི་གསུང་སྐད་ཇི་བཞིན་ཀུན་ཀྱི་རྣ་བར་ཁྱབ།)
མཁའ་འགྲོ་མ་ཚོས། །མ་བཅོས་ལྷུན་གྲུབ་ཆེན་པོ་ལ། །བདེ་སྟོང་བྲག་ཅའི་དབྱངས་སུ་གྲག །གནས་ལུགས་སྟོན་པའི་ང་རོ་དེ། །སངས་རྒྱས་ཀུན་གྱི་གསུང་དང་མཚུངས། །ཉོན་མོངས་གསོ་བའི་སྨན་ཆེན་དེ། །འཆི་མེད་བདུད་རྩིའི་ཆུ་དང་མཚུངས། །འགྲོ་བ་འདྲེན་པའི་ཐུགས་རྗེ་དེ། །ནད་གསོ་མཛད་པའི་སྨན་མཆོག་ཡིན། །དེང་སང་གདམས་པ་དུས་ལ་བབ། །དོ་ནུབ་ཚོགས་ཀྱི་འཁོར་ལོ་སྐོར། །དཔའ་མོ་བྱེ་བ་འབུམ་ཕྲག་ལ། །དཔའ་བོ་དཔག་མེད་གཅིག་ཏུ་བཞུགས། །དམ་ཆོས་དུ་མ་རོ་གཅིག་ལ། །ཟབ་དབྱངས་ཆུ་བོ་ཕྱོགས་བཅུར་འབབ། །ནང་བར་བྲག་གི་བྱང་ལྡེབས་ན། །གསང་བ་ཡེ་ཤེས་བླ་མའི་ཡུམ། །མཁའ་འགྲོ་བྱེ་བ་འབུམ་གྱིས་བསྐོར། །འཁོར་བ་རྩད་ནས་གཅོད་པ་ཡི། །རྩིབས་སྟོང་ཆོས་ཀྱི་འཁོར་ལོ་བསྐོར། །ནང་བར་གནས་དེར་དགའ་བར་གླེང། །རྡོ་རྗེ་འཛིན་པ་འཁོར་བཅས་རྣམས། །གཞལ་ཡས་བྱིན་རླབས་འབྱོན་པར་འགྱུར། །རང་བཞིན་ཉིད་ཀྱི་དཔའ་བོ་ཆེ། །སླར་ཡང་དཔའ་བོ་ཆེན་པོ་ལ། །མཁའ་འགྲོའི་ཚོགས་བརྒྱས་དབང་བསྐུར་རོ། །
(ཞེས་རྡོ་རྗེའི་གླུ་རུ་དང་ལྷན་དུ་རྡོ་རྗེའི་གར་སྟབས་སྣ་ཚོགས་སྒྱུར་གྱིན་ཚོགས་ཀྱི་འཁོར་ལོ་རྒྱ་ཆེན་པོ་བསྐོར་དེ་དཔའ་བོ་ཆེན་པོར་བྱིན་གྱིས་བརླབས་པའི་ཚུལ་འོས་ཤིང་འཚམ་པ་ཞིག་འཁྲབ་ཐུབ་མིན་ལྟ་བར་བྱའོ)
ཁ
(སང་གི་ནང་མོ་ཉི་མ་རྡོ་རྗེའི་བྲག་རིའི་རྩེར་ཤར་བ་དང། རྡོ་རྗེ་བྲག་དེའི་བྱང་གི་གསང་བའི་བྲག་ཁུང་ཞེས་པ་འདོམ་གང་གྲུ་བཞི་བར་སྤྲུལ་པ་ཞིག་ཡོད་པ་དེར་བྱོན་པ་དང། རྣལ་འབྱོར་མ་ལོ་བརྒྱ་དང་བརྒྱད་ཙམ་ལོན་པ་འདྲ་བ། དབུ་སྐྲ་དཀར་པོ། སོ་རྩ་བ་གཅིག་ལ་རྩེ་མོ་གསུམ་ཅན་ཡོད་པ་ཞིག་དང་མཇལ།)
མོ་ན་རེ། བྱིས་པ་ཁྱོད་ངའི་ནང་ལ་འོང་ནས་ཅི་དགོས།
རྒྱལ་བུས། ང་ལ་ཁྱེད་དགོས།
མོ་ན་རེ། ཁྱེད་ལ་ངས་ཅི་བྱེད། ཁྱེད་ལ་ཨ་མ་མེད་པ་ཡིན་ནམ།
རྒྱལ་བུས། མིན་མིན། ང་མནའ་མ་བསུ་བར་འོངས་པ་ཡིན།
མོ་ན་རེ། ཁྱོད་ག་རེ་ཟེར་གྱི་ཡོད། ཁྱེད་ཀྱིས་མི་ནོར་བ་འདྲ། ངས་ཁྱོད་མི་ཤེས།
རྒྱལ་བུས། ཁྱེད་བླ་མ་དྲི་མ་མེད་པའི་ཡུམ་ཆེན་གསང་བ་ཡེ་ཤེས་མིན་ནམ། ང་ས་ཐག་རིང་པོ་ནས་ཆེད་དུ་ཁྱེད་གདན་འདྲེན་དུ་འོངས་པ་ཡིན།
མོ་ན་རེ། གསང་བ་ཡེ་ཤེས་ལ་རྒ་བ་མེད་ལ་འཁོར་བྱེ་བ་འབུམ་ཡོད། ཁྱེད་ཀྱིས་ནོར་སོང།
རྒྱལ་བུས། ངས་ནོར་མེད། གསང་བ་ཡེ་ཤེས་གནས་འདི་ན་བཞུགས་ཡོད་ཟེར།
མོ་ན་རེ། ང་རྒན་མོ་མོ་ཧྲེང་ཞིག་ཁྱོད་ལྟ་བུའི་བུ་ཆུང་ཞིག་གི་མནའ་མ་བྱས་ན་ངོ་ཚ། ང་གཉིས་འགྲིག་གི་མ་རེད།
རྒྱལ་བུས། ལོ་བརྒྱ་མ་ཚད་སྟོང་ཡིན་ན་ཡངཡིན། ལས་ངན་ནས་འགྲོ་མ་ནུས་ཀྱང་ངས་ཁུར་ནས་འགྲོ་ཆོག ཡིན་ན་ཡང་ངས་འཁུར་མི་དགོས། ང་ལ་རླུང་རྟ་རྫུ་འཕྲུལ་ཅན་ཡོད།
མོ་ན་རེ། ངོ་མ་ཁྱོད་ལ་ང་དགོས་ན། དོ་ནུབ་འདིར་སྡོད། ཆང་སའི་རྟེན་འབྲེལ་གྱི་ཚབ་ལ་ཚོགས་འཁོར་ཆུང་ངུ་ཞིག་ཀྱང་བསྐོར་ཆོག ད་ཚོགས་རྫས་ཀྱང་མང་པོ་མེད་མོད། མཛེ་ཕོའི་ཀླད་པ་ཐོད་ཆུང་གང་ཡོད་པ་འདི་ངེད་གཉིས་འཐུང་དགོས།
(ཟེར་ནས་མནྜལ་ཁྲི་གང་བ་དེར་བྱིན་རླབས་བྱས་ཏེ། མཛེ་ཀླད་ཀྱི་བདུད་རྩི་ཁོལ་མ་ཕོར་གང་དེ་ནས་ཧུབ་གཅིག་བཏུང་ནས་རྒྱལ་བུར་དྲངས་པས་རྒྱལ་བུས་དགྱེས་ཉམས་ཆེན་པོས་བླངས་ཏེ་འདི་སྐད་དུ།)
།སྔོན་ཆད་ཟག་པ་འཕེལ་བའི་རྒྱུ། །འདོད་ཡོན་རོ་མཆོག་བརྒྱ་བ་ཟོས། །ད་ནི་ཟག་པ་མེད་པའི་ཟས། །ཆགས་པའི་གདུང་བ་ཞི་མཛད་པའི། །མཛེ་ཀླད་བདུད་རྩི་སྟེར་བ་བཟང༌། །
(ཞེས་ཞབས་བཏེགས་བརྒྱབ་པ་དང། རྣལ་འབྱོར་བ་རྒན་མོ་དེ་འཛུམ་ཙམ་གནང་བ་དང་ཚེམས་རྩེ་གསུམ་པ་དེའི་བར་ནས་འོད་ཟེར་ཅིག་འཕྲོས་ཏེ། དཀྱིལ་འཁོར་དེ་ལ་ལན་གསུམ་བསྐོར་ནས་དཔལ་གྱི་ཕོ་བྲང་ག་ལ་བ་དེར་སོང་ངོ༌།)
ག
(དེ་ནས་ཉི་མ་ཡང་ནུབ་པས། མཁའ་འགྲོ་མ་སྟག་ལྤགས་ཀྱི་ཤམ་ཐབས་ཅན། ཐོད་པ་ལྟག་སྤྲོད་ཀྱི་ཌཱ་མ་རུ་ཐོགས་པ་ཞིག་བྱུང་ནས་རྣལ་འབྱོར་མ་རྒན་མོ་དེར་ཕྱག་བཙལ་ཏེ་ཕོ་བྲང་གི་གཡོན་ཕྱོགས་དེར་འཁོད་པ་དང་རིམ་པས་མཁའ་འགྲོ་མ་བྱེ་བ་འབུམ་འཚོགས་ཤིང་ནང་གི་གར་རིགས་མི་འདྲ་བ་བཅོ་བརྒྱད་རྩེ་བར་བྱེད། དེ་ནས་ཌཱ་མ་རུ་དང་ཧཱུཾ་དང་ཕཊ་སྒྲ་ས་གཡོ་བ་ཙམ་བྱུང་བའི་རྗེས་སུ། བླ་མ་དྲི་མ་མེད་པ་དེ་ཉིད་དབུ་རྒྱན་དང་རྣ་རྒྱན་དང་མགུལ་རྒྱན། དཔུང་རྒྱན། སྐ་རགས། སེ་མོ་དོ། དོ་ཤལ་ལ་སོགས་པའི་རྒྱན་སྣ་ཚོགས་ཀྱིས་བརྒྱན་ཏེ། འཁོར་རྡོ་རྗེ་འཛིན་པ་བརྒྱ་ཡིས་བསྐོར་ཅིང་རྡོ་རྗེ་མི་བསྐྱོད་པའི་གར་བྱེད་ཀྱིན་ཕོ་བྲང་གི་གཡས་ཕྱོགས་སུ་འཁོད། དེར་མཁའ་འགྲོ་མ་བྱེ་བ་འབུམ་གྱིས་རྡོ་རྗེའི་གར་དང་བཅས་མགྲིན་དབྱངས་གཅིག་གིས་འདི་སྐད།)
།བླ་མ་དཀོན་མཆོག་གསུམ་ལ་ཕྱག་འཚལ་ལོ། །ཤར་རྡོ་རྗེ་གདན་གྱི་བྱང་ཕྱོགས་ན། །གནས་པུ་རྒྱལ་བོད་ཅེས་བྱ་བ་ཡོད། །རི་མཐོན་པོ་གནམ་གྱི་ཀ་བ་ཡོད། །མཚོ་དམའ་མོ་གཡུ་ཡི་མནྜལ་ཡོད། །གངས་དཀར་པོ་ཤེལ་གྱི་ཆོད་རྟེན་ཡོད། །སྤང་སེར་པོ་གསེར་གྱི་ལྷུན་པོ་ཡོད། །སྟོན་བཀྲ་བ་གསེར་གྱི་མེ་ཏོག་ཡོད། དབྱར་བཀྲ་བ་ཡུ་ཡི་མེ་ཏོག་ཡོད། །ཀྱེ་གངས་རིའི་མགོན་པོ་སྤྱན་རས་གཟིགས། །གནས་དེ་ན་ཁྱོད་ཀྱི་ཞིང་ཁམས་ཡོད། །ཞིང་དེ་ན་ཁྱོད་ཀྱི་གདུལ་བྱ་ཡོད། །
(ཅེས་མཁའ་འགྲོ་རྣམས་ཀྱིས་བླ་མ་དྲི་མེད་དང་དཀོན་མཆོག་འབངས་གཉིས་ལ་གུས་ཕྱག་གི་ཕྱག་རྒྱ་མཛད་ཀྱིན་གྲལ་ལྟར་བསྒྲིགས་པ་ན་དེའི་ནང་ནས་མཁའ་འགྲོ་མ་གཅིག་གིས་གར་བྱེད་ཀྱིན་འོང་ནས་འདི་གླུ་འདི་སྐད་ལེན།)
།ཀྱེ་གངས་རིའི་མགོན་པོ་སྤྱན་རས་གཟིགས། །རི་པད་མ་སྟོང་ལྡན་དབྱིབས་ལེགས་པ། །དུས་དགུན་གསུམ་དཀར་པོ་ཤེལ་གྱི་མདོག །དུས་དབྱར་གསུམ་སྔོན་པོ་གཡུ་ཡི་མདོག །དུས་སྟོན་གསུམ་སེར་པོ་གསེར་གྱི་མདོག །དུས་དཔྱིད་གསུམ་ཁྲ་བོ་གཟི་ཡི་མདོག །མདོག་ཕུན་སུམ་ཚོགས་པའི་རི་བོ་ལ། །ལྟས་ཁྱད་པར་འཕགས་པའི་མཚན་མ་ཡོད། །
(ཅེས་བླངས་ཏེ་དཀོན་མཆོག་འབངས་ལ་དགའ་བའི་འཛུམ་གྱིས་ལྟ་བཞིན་གུས་ཕྱག་ཅིག་ཕུལ་བ་དང༌། ཡང་མཁའ་འགྲོ་མ་ཞིག་གིས་གར་བྱེད་ཀྱིན་འོངས་ཏེ་འདི་སྐད།)
།དུང་དཀར་པོ་གཡས་སུ་འཁྱིལ་བ་ལ། །དར་དམར་པོ་རཱ་གའི་ཅོད་པན་ཡོད། །མི་ཁྱོད་ཀྱི་སྙན་གྲགས་ཕྱོགས་བཅུར་འཕེལ། །(ཅེས་སྔོན་མ་བཞིན་སོང་བ་དང་ཡང་མཁའ་འགྲོ་མ་ཞིག་སྔར་བཞིན་འོངས་ཏེ)
།དཔལ་བེའུས་རི་བསྐོར་བརྒྱན་པ་ལ། །ནགས་བཀྲ་ཤིས་ཡལ་འདབ་རྒྱས་པ་ཡོད། །མི་ཁྱོད་ཀྱི་བུ་སློབ་ཕྱོགས་བཅུར་འཕེལ། །(ཅེས་སྔོན་མ་བཞིན་སོང་བ་དང་ཡང་མཁའ་འགྲོ་མ་ཞིག་སྔར་བཞིན་འོངས་ཏེ།)
།རི་བོགས་ཆད་གཡུ་ཡི་བུམ་པ་ལ། །ཆུ་ལན་ལག་བརྒྱད་ལྡན་ཆུ་མིག་འབབ། །མི་ཁྱོད་ཀྱི་ཐུགས་རྗེས་བསིལ་བར་བྱེད། །(ཅེས་སྔོན་མ་བཞིན་སོང་བ་དང་ཡང་མཁའ་འགྲོ་མ་ཞིག་སྔར་བཞིན་འོངས་ཏེ)
།གནམ་སྔོན་མོ་གཡུ་བྱའི་གདགས་སུ་ཕུབ། །ལས་ཉོན་མོངས་ཚད་པ་ཞི་བར་བྱེད། །མི་ཁྱོད་ཀྱི་དགེ་བཤེས་འཕེལ་བའི་རྟགས། །ཅེས་སྔོན་མ་བཞིན་སོང་བ་དང་ཡང་མཁའ་འགྲོ་མ་ཞིག་སྔར་བཞིན་འོངས་ཏེ།
།རི་ཟུར་གསུམ་བྲག་གཞུང་གནམ་དུ་མཐོ། །ངེད་མཁའ་འགྲོའི་རྒྱལ་མཚན་བསྒྲེངས་པ་འདྲ། །མི་ཁྱོད་ཀྱི་གནས་དེར་བསྟན་པ་འཕེལ། །(ཅེས་སྔོན་མ་བཞིན་སོང་བ་དང་ཡང་མཁའ་འགྲོ་མ་ཞིག་སྔར་བཞིན་འོངས་ཏེ)
།ས་རྩེ་བརྒྱད་ལུང་པ་ཕྱོགས་སུ་གྱེས། །དེ་འཁོར་ལོ་རྩིབས་བརྒྱད་ཕུབ་པ་འདྲ། །མི་ཁྱོད་ཀྱི་མི་མཐུན་གཅོད་པའི་རྟགས། །(ཅེས་སྔོན་མ་བཞིན་སོང་བ་དང་ཡང་མཁའ་འགྲོ་མ་ཞིག་སྔར་བཞིན་འོངས་ཏེ།)
ཐང་ཆེན་པོའི་གསེབ་ན་རི་ཆུང་ཉལ། །མཚོ་ཆེན་པོའི་ནང་གི་ཉ་མོ་འདྲ། །མི་ཁྱོད་ཀྱི་སྤྱན་སྔ་འཕེལ་བའི་རྟགས། །ཀྱེ་གངས་རིའི་མགོན་པོ་སྤྱན་རས་གཟིགས། །གནས་དེ་ན་ཁྱོད་ཀྱི་ཞིང་ཁམས་ཡོད། །ཞིང་དེ་ན་ཁྱོད་ཀྱི་གདུལ་བྱ་ཡོད། །(ཅེས་སྔོན་མ་བཞིན་སོང་བ་དང་ཡང་མཁའ་འགྲོ་མ་ཞིག་སྔར་བཞིན་འོངས་ཏེ)
།འབྲུ་སྣ་ཚོགས་སྨིན་པའི་ཞིང་ས་ཅན། །འབྲུ་བང་མཛོད་རྒྱས་པའི་རྟགས་སུ་བཟང༌། །ཤིང་སྣ་ཚོགས་སྐྱེས་པ་ནགས་ཀྱི་ཚལ། །གནས་ཁང་བཟང་འཕེལ་བའི་རྟགས་སུ་བཟང༌། །ཆུ་མི་ཆེ་རྒྱ་མཚོ་ཆེན་པོ་མེད། །ཆུ་མི་ཆུང་ཆུ་བོ་དཔག་མེད་འབབ། །ཆུ་སྙོམ་པས་ཡུལ་མི་རྟག་དུ་བདེ། །ཀྱེ་གངས་རིའི་མགོན་པོ་སྤྱན་རས་གཟིགས། །གནས་དེ་ན་ཁྱོད་ཀྱི་ཞིང་ཁམས་ཡོད། །ཞིང་དེ་ན་ཁྱོད་ཀྱི་གདུལ་བྱ་ཡོད། །(ཅེས་སྔོན་མ་བཞིན་སོང་བ་དང་ཡང་མཁའ་འགྲོ་མ་ཞིག་སྔར་བཞིན་འོངས་ཏེ།)
།ཤར་ལྷུན་པོའི་རྩེ་ནས་ཉི་མ་འཆར། །ལྷོ་ནུབ་བྱང་གང་ཡིན་མི་ནོར་ཤེས། །འཆར་མི་སྔ་སྔ་དྲོར་བསམ་གཏན་འཕེལ། །འཆར་མི་ཕྱི་ཉི་མ་ལྷོད་བབ་དུས། །ལུས་བག་ཕེབས་བདེ་བར་སྤྱོད་པར་བྱེད། །རྒས་མི་སྔ་ཕོ་རབས་བདུན་སྟངས་འཕེལ། །རྒས་མི་ཕྱི་མཛངས་མའི་ལས་རྣམས་འགྲུབ། །ཀྱེ་གངས་རའི་མགོན་པོ་སྤྱན་རས་གཟིགས། །ཡུལ་བཀྲ་ཤིས་འབྱུང་དེ་ཁྱོད་ཀྱི་ཞིང། །ཞིང་དེ་ན་ཁྱོད་ཀྱི་གདུལ་བྱ་ཡོད། །
(ཅེས་བླངས་པ་དང་མཁའ་འགྲོ་མའི་ཚོགས་ཀྱིས་སླར་ཡང་གར་དང་བཅས་མགྲིན་གཅིག་གིས་འདི་སྐད་དུ།)
།ལས་སྐལ་ལྡན་བསོད་ནམས་བསགས་པའི་མི། །ཆོས་དགེ་བཅུའི་འོད་ཟེར་སྤྲོ་བར་བྱེད། །འོད་སྟོང་ལྡན་འཕྲོ་བ་ཉི་མའི་འོད། །སེམས་དག་པའི་དཔེ་རུ་འཆར་ཚུལ་བཟང༌། །གླིང་དེ་ན་ཁྱོད་ཉིད་ཉི་མ་ཤར། །གླིང་དེ་ན་བག་ཕེབས་ཁྱོད་ལ་བལྟ། །ཕ་འབྲོམ་སྟོན་པ་ཞེས་མཆོད་བྱེད་ཀྱང༌། ཁྱོད་དགེ་བསྙེན་ཙམ་ཞེས་དམན་ཆ་འཛིན། །གྲོགས་སུ་དང་འགྲོགས་ཀྱང་ཆོས་སུ་འཆར། །རྒྱུད་མ་སྨིན་དག་ལ་ལས་འབྲས་སྟོན། །ཁྱོད་རང་བཟོ་མི་བྱེད་སྡེ་སྣོད་འཛིན། །མི་ཁྱོད་ཀྱི་བསོད་ནམས་བསམ་མི་ཁྱབ། །ཀྱེ་གངས་རིའི་མགོན་པོ་སྤྱན་རས་གཟིགས། །ཡུལ་བཀྲ་ཤིས་འབྱུང་དེ་ཁྱོད་ཀྱི་ཞིང། །ཞིང་དེ་ན་ཁྱོད་ཀྱི་གདུལ་བྱ་ཡོད། །ངེད་མཁའ་འགྲོའི་ཚོགས་ཀྱང་དེ་ལ་འོང། །ཁྱོད་བསྟན་འགྲོའི་དོན་ཆེན་སྤེལ་རོགས་བགྱི། །
(དེར་བླ་མ་དྲི་མ་མེད་པ་ཐུགས་ཤིན་ཏུ་དགྱེས་པའི་ངང་འཛུམ་བཅས་སྒོ་གསུམ་པོ་ལས་འོད་ཟེར་ཁ་དོག་གསུམ་སྤྲོས་པ་ན། འོད་ཟེར་དཀར་པོ་ཞིག་དཀོན་མཆོག་འབངས་ལ་ཕོག དམར་པོ་ཞིག་མཁའ་འགྲོ་མ་རྣམས་ལ་ཕོག སྔོན་པོ་ཞིག་བླ་མ་ཉིད་ལ་ལན་གསུམ་བསྐོར་ཏེ་ཐུགས་ཀར་ཐིམ་ཞིང༌། སྤྱན་གཡོན་མའི་ཟུར་གྱིས་མཁའ་འགྲོ་མའི་ཚོགས་ལ་གཟིགས། སྤྱན་གཡས་པའི་ཟུར་གྱིས་དཀོན་མཆོག་འབངས་ལ་གཟིགས། ཕྱག་གཡས་པས་སྤྲུལ་པའི་ཌཱ་མ་རུ་ཞིག་ཐོགས། གཡོན་པས་བཀྲ་ཤིས་པའི་ཕྱག་རྒྱ་མཛད་ཅིང་གསུང་ཚངས་པའི་དབྱངས་ཀྱིས་འདི་སྐད་དུ)
།དེ་དེ་བཞིན་ལགས་སོ་མཁའ་འགྲོའི་ཚོགས། །བོད་པུ་རྒྱལ་ཡུལ་གྱི་མགོན་པོ་འདི། །མི་ཁོ་བོའི་སྲས་ཀྱི་ཐུ་བོ་ཡིན། །ཐུགས་མ་བསྒྲིབས་ཐམས་ཅད་སལ་ལེ་ཡང༌། །ཐུགས་སྦས་པའི་ཚུལ་གྱིས་འགྲོ་དོན་སྤྱོད། །ཀྱེ་དགའ་བའི་དགའ་མཆོག་སྤྱན་རས་གཟིགས། །ཐུགས་བདེ་བའི་བདེ་མཆོག་སྡུག་བསྔལ་སེལ། །ཆོས་དགེ་བའི་དགེ་མཆོག་ལས་འབྲས་ཟབ། །མཆོག་དཔག་མེད་འདུས་པའི་སྤྱན་རས་གཟིགས། །སྐུ་བརྗིད་པ་གངས་རིའི་ལྷུན་པོ་འདྲ། །གསུང་བརྗིདཔ་ཚངས་པའི་ང་རོ་ཅན། །ཐུགས་བརྗིད་པ་རྒྱལ་བའི་འབྱུང་གནས་འདི། །སྤྱིར་སེམས་ཅན་ཀུན་གྱི་མགོན་པོ་ཡིན། །སྒོས་གངས་རིའི་ཁྲོད་དུ་རྒྱལ་སྲིད་སྐྱོང། །མི་ཁྱོད་ཀྱི་ཐུགས་རྗེས་མི་སྐྱོང་བ། །བདུད་སྡིག་ཏོ་ཅན་གྱིས་གཡོ་ནུས་མིན། །མི་ཁྱོད་ཀྱི་ཞིང་ཁམས་དག་པ་དེར། །རྒྱུད་ཚུལ་ཁྲིམས་དག་པའི་སྐྱེ་དགུ་འདུ། །དུས་མ་འོངས་བདག་ཀྱང་དེ་རུ་འགྲོ། །ལས་ཞི་དྲག་ཐབས་བརྒྱས་བོད་ཡུལ་སྐྱོང། ཁྱེད་མཁའ་འགྲོའི་ཚོགས་ཀྱང་དེ་རུ་འདུ། །བོད་གངས་ཅན་བསྟན་པ་དར་བར་བྱེད། །
(ཅེས་གསུང་མགུར་བཞེངས་ཏེ་ཁྲི་ལ་བཞུགས་པ་དང། དེར་རྣལ་འབྱོར་མ་བགྲེས་མོའི་ཚུལ་གྱི་མཁའ་འགྲོ་མ་གསང་བ་ཡེ་ཤེས་དེ་སྐད་ཅིག་ལ་ལང་ཚོ་གཞོན་པ་རུས་པའི་རྒྱན་དྲུག་གིས་བརྒྱན་པ། ཕྱག་གཡས་པས་ཐོད་པ་ལྟག་སྤྲོད་ཌཱ་མ་རུ་ཞིག་བསྣམས་པ་ཞིག་ཏུ་གྱུར་ཅིང། ཕྱག་གཡོན་པས་བཀྲ་ཤིས་པའི་ཕྱག་རྒྱ་མཛད་དེ་གསུང་ཚངས་པའི་དབྱངས་ཀྱིས་འདི་སྐད།)
།རྗེ་རྡོ་རྗེ་འཛིན་པ་བདག་ལ་གསོན། །བུ་དཀོན་མཆོག་འབངས་ཞེས་ཟེར་བ་འདི། །ཐུགས་མངོན་པར་ཤེས་པ་ཐོགས་མེད་ཀྱང༌། །ངས་མི་ཤེས་ཉམ་ཐག་ཡིན་ཞེས་ཟེར། །མི་གཡོ་སྒྱུ་ཅན་ཞིག་འདི་ན་འདུག །ང་བདེ་ལྡན་ཡུལ་ལ་འཁྲིད་རྒྱུ་ཟེར། །མི་ཁོ་ཡི་རིག་མ་བྱེད་དགོས་ཟེར། །མི་ཧམ་པ་ཅན་ཞིག་འདི་ན་འདུག །མི་ཁོ་ལ་ཉོན་མོངས་མི་མངའ་ཡང༌། །མ་གཞན་དོན་དཔག་མེད་སེྤལ་བའི་ཕྱིར། །བུ་རིག་པའི་ཁྱེའུ་སྤེལ་དགོས་ཟེར། །མི་ཁོ་ལ་སེར་སྣ་མ་མཆིས་ཀྱང༌། །ཕ་རྒྱལ་སྲིད་འཛིན་པར་བྱེད་དོ་ཟེར། །མི་ཁོ་ལ་རྣམ་གཡེང་མེད་ན་ཡང༌། །འབངས་རིག་པ་ཅན་རྣམས་དགོས་ཡོད་ཟེར། །མི་འདི་འདྲའི་སྤྱང་པོ་གང་ན་ཡོད། །ངའི་ཆེད་དུ་དཀའ་ངལ་མྱངས་རབས་ཟེར། །ང་མ་སོང་ཕྱིར་ལ་མི་འགྲོ་ཟེར། །རྗེ་ཁྱེད་ཀྱང་ཁོ་མོ་སོང་ཞེས་ཟེར། །དེ་བསྟན་དང་འགྲོ་བའི་དོན་ཡིན་ཟེར། །ང་མི་འགྲོའི་ཐབས་ཀྱང་གང་ན་ཡོད། །ང་དགའ་ཞིང་སྤྲོ་བཞིན་ཁོ་རྗེས་འགྲོ །མི་འདི་ཡི་སྤྲུལ་པའི་ཕོ་བྲང་དུ། །ང་མཁའ་འགྲོ་བྱེ་བ་འབུམ་དང་བཅས། །ཚོགས་རྒྱ་ཆེན་འཁོར་ལོ་ཀུན་ཏུ་བསྐོར། །ཉམས་བདེ་སྟོང་རོལ་བས་དབྱིངས་སུ་སྐྱོང། །ངག་གྲག་སྟོང་ཧཱུཾ་དང་ཕཊསྒྲ་སྒྲོགས། །གར་རྡོ་རྗེ་འགྱིང་བས་ས་ཆེན་གནོན། །ཐབས་ཤེས་རབ་གྲགས་པས་བར་སྣང་བཀང༌། །
(ཞེས་དང་དེ་ནས་གཤམ་གྱི་ཚིག་དོན་དང་མཐུན་པའི་རྡོ་རྗེའི་གར་བཅས་གླུ་གར་བྱེད་ཚུལ་ནི།)
།ངས་གཡས་སུ་སྡང་མིག་བགྲད་པ་ཡིས། །བདུད་ནག་མོ་འབུམ་ཕྲག་བྱེ་བ་ཞི། །ངས་གཡོན་དུ་འཛུམ་མིག་བསྟན་པ་ཡིས། །ལྷ་དཀར་པོ་བྱེ་བ་འབུམ་ཕྲག་འདུ། །ངས་རྐང་པས་ས་ལ་བརྡབས་པ་ཡིས། །འོག་ཀླུ་ཡི་ཚོགས་རྣམས་དབང་དུ་འདུ། །གཟུགས་ཤར་དུ་གཡོ་ཞིང་བསྐྱོད་པ་ཡིས། །ཤར་དྲི་ཟའི་ཚོགས་རྣམས་དབང་དུ་འདུ། །གཟུགས་ལྷོ་རུ་འགྱིང་ཞིང་བསྐྱོད་པ་ཡིས། །ལྷོ་གྲུལ་བུམ་ཚོགས་རྣམས་དབང་དུ་འདུ། །གཟུགས་ནུབ་ཏུ་འགྱིང་ཞིང་བསྐྱོད་པ་ཡིས། །ནུབ་ཆུ་ལྷའི་ཚོགས་རྣམས་དབང་དུ་འདུ། །གཟུགས་བྱང་དུ་གཡོ་བསྐྱོད་པ་ཡིས། །བྱང་གནོད་སྦྱིན་ཚོགས་རྣམས་དབང་དུ་འདུ། །གཟུགས་སྟེང་དུ་བསྐྱོད་ཅིང་འཕར་བ་ཡིས། །སྟེང་ཚངས་པའི་འཇིག་རྟེན་དབང་དུ་འདུ། །ང་འཛུམ་ཞིང་འཛུམ་ཞིང་འོད་ཟེར་འཕྲོ། །རྒྱུད་ལས་འཕྲོ་ཅན་རྣམས་སད་པར་བྱེད། །ང་ཁྲོ་ཞིང་ཁྲོ་ཞིང་མཆེ་བ་གཙིགས། །དགྲ་འཆི་བདག་བདུད་ནི་འཇོམས་པར་བྱེད། །
(མཚམས་འདི་ནས་སླར་ཡང་བཀྲ་ཤིས་ཕྱག་རྒྱ་མཛད་དེ་རྒྱལ་བུའི་ཞལ་ལ་འཛུམ་བཅས་གཟིགས་བཞིན།)
།གནས་དེ་རུ་སེམས་ཅན་སྨིན་བྱས་ནས། །ང་སླར་ཡང་ཨུ་རྒྱན་གནས་འདིར་འོང། །རྗེ་དཀོན་མཆོག་འབངས་འདི་བོད་ལ་འགྲོ། །བོད་གློ་བུར་རྒྱལ་པོ་ཆོས་ལ་སྤྱོད། །ང་རྒྱ་ནག་ཡུལ་ནས་བཙུན་མོར་བསུ། །རྒྱ་ནག་པོའི་མཆོད་གནས་བོད་དུ་འདྲེན། །གནས་དེ་རུ་ལས་ཅན་དཔག་མེད་འདུ། །ཆོས་བདེ་སྟོང་རོལ་བའི་གླུ་ལེན་ཅིང། །ཉམས་དགའ་བའི་བཀྲ་ཤིས་བདེ་བས་སྐྱོང༌། །(ཞེས་ཡིད་དུ་འོང་བའི་གླུ་གར་མཛད་པ་དང་མཁའ་འགྲོ་མ་རྣམས་ཀྱིས་མགྲིན་གཅིག་ཏུ།)
།མ་གསང་བ་ཡེ་ཤེས་ཁྱོད་ཀྱི་བཀའ། །གསུང་འགྱུར་བ་མེད་པར་ཀུན་ཏུ་གྲགས། །མ་སེམས་ཅན་རྣམས་ལ་ཕན་པར་འགྱུར། ངག་གྲག་སྟོང་སྙན་པའི་ང་རོ་ཅན། །དོན་སྐྱེ་བ་མེད་པའི་མགུར་ཞིག་བཞེས། །
(ཞེས་ཞུས་པ་དང། གསང་བ་ཡེ་ཤེས་ཀྱིས་སླར་ཡང་གར་སྟབས་དང་བཅས་འདི་སྐད།)
།ཡང་གསོན་དང་ཡབ་སྲས་མཁའ་འགྲོའི་ཚོགས། །ལར་ཆོས་ཀྱི་གནས་ལུགས་ཡེ་སྟོང་ལ། །ང་བྲག་ཆའི་ཆོས་སྒྲ་སྒྲོགས་པར་ཟད། །ཆོས་དོན་ལ་གྲུབ་པ་ཅི་ཡང་མེད། །གཞི་སྐྱེ་མེད་མ་བཅོས་གཉུག་མའི་ངང། །བློ་མ་བཅོས་ལྷུག་པ་ཉིད་དུ་བཞག །ལམ་གནས་མེད་རང་གྲོལ་ཆེན་པོ་ཡིན། །མཐར་འགག་མེད་འབྲས་བུ་ཆེན་པོ་ལ། །དཔེ་ནམ་མཁའ་དག་པ་འདི་ལས་མེད། །
(ཅེས་གསུངས་ཏེ་ཁྲི་ལ་བཞུགས་པ་དང། དེ་ནས་དཀོན་མཆོགས་འབངས་ཁྲི་ལས་བཞེངས་ཏེ་འདི་སྐད་དུ།)
།མ་ཆོས་ཀྱི་གནས་ལུགས་དེ་བཞིན་ལགས། །ང་གནས་ལུགས་དེ་ལས་མ་གཡོས་ཀྱང༌། །མ་འགྲོ་བའི་དོན་དུ་གཟུགས་སུ་ཤར། །གཟུགས་གཟུགས་ཀྱིས་སྟོང་ངོ་བདེན་མ་འཛིན། །ང་ཆོས་ཀྱི་དབྱིངས་ལས་མ་གཡོས་ཀྱང༌། །མ་འགྲོ་བའི་དོན་དུ་སྒྲ་རུ་གྲག ། སྒྲ་གྲག་སྟོང་བྲག་ཅའི་རང་བཞིན་ཡིན། །ང་སྣང་སྟོང་འོད་ཀྱི་སྣང་བ་ལ། ཁོང་མིག་ཅན་འཁྲུལ་བ་ལྟད་མོ་ཆེ། །ང་གངས་རིའི་མགུལ་དུ་ཆོས་ཀྱི་རྒྱལ། །སེམས་གཡོ་སྒྱུ་མེད་པར་གསོང་བོར་སྨྲ། །ཆོས་ནུས་མཐུ་བཙན་པས་གཞན་ལ་ཕན། །ང་སྙིང་རྗེ་ཆེ་བས་ཞིང་ཁམས་དག །ང་སྣ་ཚོགས་སྤྲུལ་པ་སྟོན་ན་ཡང༌། །སེམས་མ་དག་རྣམས་ཀྱིས་ཅི་ཞིག་ཤེས། །ང་བུ་མེད་རྣམས་ལ་བུར་སྟོན་ཡང༌། །མ་སྙིང་མེད་རྣམས་ཀྱིས་ཅི་ཞིག་ཤེས། །མི་དབུལ་བོ་དག་ལ་ནོར་མཆོག་དང། །ཐང་སྐམ་པོ་རྣམས་སུ་ཆུ་བོ་དང། །མི་ནད་པར་སྨན་པ་སྨན་ལ་སོགས། །ང་ཁྲིམས་ལྡན་མཁན་པོའི་སྐུར་སྟོན་ཡང༌། ཁོང་མངོན་ཤེས་མེད་རྣམས་ཅི་ཞིག་ཤེས། །ང་ཐུགས་རྗེ་ཆེན་པོར་སུ་ཡིས་ཤེས། །བོད་ཁ་བ་ཅན་གྱི་གདུལ་བྱ་རྣམས། །བུ་སྙིང་མེད་ཕ་ལ་གཤེ་བ་བཞིན། །ང་ཕནབདེའི་འབྱུང་གནས་རིན་ཆེན་ལ། །སེམས་རྟོག་པ་ཆེ་ཞེས་སྨོད་པར་བྱེད། །ལར་བསྐལ་པ་བྱེ་བ་བསམ་ཡས་སུ། །ལྷ་དཀོན་མཆོག་སྤྱི་བོར་མཆོད་པ་ལས། །བདག་ང་རྒྱལ་རློམ་པར་ག་ལ་བྱེད། །ང་ཚངས་སྤྱོད་དཔལ་ལྡན་དགེ་བསྙེན་དུ། །ལུས་དམན་པའི་ཚུལ་དུ་གནས་བར་བྱེད། །
(ཅེས་གསུངས་ཏེ་ཁྲིར་འཁོད་པ་དང་སླར་ཡང་མཁའ་འགྲོ་མའི་ཚོགས་ཀྱིས་གར་བྱེད་ཀྱིན་འདི་སྐད་དུ།)
ཁྱོད་བོད་ཀྱི་རྒྱལ་པོར་སྐུར་བསྟན་ཏེ། །བོད་མཐའ་འཁོབ་སྨིན་པར་བྱས་གྱུར་ནས། །སླར་པོ་ཏ་ལ་ཡི་རྩེ་མོ་ལ། །ཆོས་དགེ་བ་བཅུ་ཡི་འོད་ཟེར་འགྱེད། །བོད་བྱང་གི་ཕྱོགས་ནས་བྱང་ཕྱོགས་སུ། །མི་ཁྱོད་ཀྱི་སྤྲུལ་པ་དམ་པ་ཞིག །མ་མགོན་མེད་མང་པོ་འདྲེན་དུ་འགྲོ། །གངས་དཀར་པོའི་གསེར་ཐང་མཎཌལ་དུ། །གསེར་དྲི་མ་མེད་པའི་མཆོད་རྟེན་འབྱུང། །བྱང་རྒྱལ་པོ་ཆེན་པོའི་མདུན་ཐང་དུ། །གཡུ་དྲི་མ་མེད་པའི་མཆོད་རྟེན་འབྱུང། །ས་བརྟན་པ་གསེར་གྱི་ས་གཞི་ལ། །གཏེར་རིན་ཆེན་རྣམ་པ་སྣ་ཚོགས་འབྱུང། །ཐང་དཀར་པོ་ཤེལ་གྱི་མཎཌལ་དང༌། །གནས་བྱིན་ཆེན་མཆོད་རྟེན་ལྔ་བརྒྱ་བཅས། །གནས་དེ་དག་མཁའ་འགྲོའི་རྩེད་ར་ཡིན། ཁྱོད་དེ་དག་རྣམས་སུ་འགྲོ་དོན་སྐྱོང། །ཞིང་དེ་དང་ཁྱོད་ཀྱི་ཡོན་ཏན་ཀུན། །དུས་བསྐལ་བརྒྱར་བརྗོད་ཀྱང་མི་ཚར་བས། །རྗེ་དྲི་མེད་བླ་མངོནཤེས་ཅན། །མ་སེམས་ཅན་དགའ་ཞིང་དགེ་བའི་ཕྱིར། །གསུང་སྙན་མོའི་ལུང་བསྟན་གནང་དུ་གསོལ། །
(ཞེས་གླུར་བླངས་པ་དང་བླ་མ་དྲི་མེད་ཀྱིས་སྔོན་མའི་བཞུགས་སྟངས་མཛད་དེ། ལུང་དུ་སྟོན་པའི་ཚིགས་སུ་བཅད་པ་འདི་སྐད་དུ་སྨྲས་པ།)
།སྤྱིར་བཀྲ་ཤིས་ཆོས་ལྡན་ཁ་བ་ཅན། །སྒོས་དབུ་རུ་བྱང་ཕྱོགས་དཔལ་གྱི་སྡེ། །སྔོན་རྒྱལ་བ་རྣམས་ཀྱིས་བྱིན་བརླབས་པའི། །གནས་ཕུན་ཚོགས་རྭ་སྒྲེང་བྱ་བ་ཡོད། །ར་ཞེས་བྱ་བ་འདོད་ཆགས་རྡུལ་དང་བྲལ། །ཆགས་པ་མེད་པའི་དམ་པ་ཆོས་ཀྱི་སྒོ། །ར་ཞེས་བྱ་བ་ཞེ་སྡང་རྡུལ་དང་བྲལ། །བྱམས་པ་ཆེན་པོ་དམ་པ་ཆོས་ཀྱི་སྒོ། །ར་ཞེས་བྱ་བ་གཏི་མུག་རྡུལ་དང་བྲལ། །ཤེས་རབ་ཆེན་པོ་དམ་པ་ཆོས་ཀྱི་སྒོ། །ར་ཞེས་བྱ་བ་ཕྲག་དོག་རྡུལ་དང་བྲལ། །མཉམ་ཉིད་ཆེན་པོ་དམ་པ་ཆོས་ཀྱི་སྒོ། །ར་ཞེས་བྱ་བ་ང་རྒྱལ་རྡུལ་དངབྲལ། །ཞི་དུལ་བག་ཡོད་དམ་པ་ཆོས་ཀྱི་སྒོ། །སྒོ་ལྔའི་རྒྱལ་མཚན་མི་གཡོ་བརྟན་པ་དེ། །ཡོད་མིན་མེད་མིན་སྐྱེ་མཆེད་མཐར་ཐུག་བར། །མི་ཉམས་རྒྱས་པར་རྟག་ཏུ་སྒྲེང་བར་བྱེད། །དེ་ནི་སྤྱན་རས་གཟིགས་ཀྱི་ཕོ་བྲང་ཡིན། །གནས་མཆོག་དེ་རུ་འགྲོ་བ་གང་སྐྱེས་པ། །སྔོན་གྱི་ལས་འཕྲོ་སྟོབས་ལྡན་སད་པ་ཡིན། །དེ་ནི་རི་བོ་པོ་ཏ་ལ་དང་མཚུངས། །འགྲོ་བའི་དཔལ་མགོན་སྤྱན་རས་གཟིགས་དབང་འདི། །སྲས་ཀྱི་ཐུ་བོར་ངེས་པར་བྱིན་གྱིས་རློབས། །སྲས་འདིའི་དབུ་ལ་དེ་བཞིན་གཤེགས་པ་ཡི། །ཞིང་ཁམས་ཉི་ཁྲི་ཆིག་སྟོང་ཚང་བར་གནས། །དེ་ལས་འོད་ཟེར་ཉི་ཁྲི་ཆིག་སྟོང་འཕྲོས། །གནས་དེར་པད་སྡོང་ཉི་ཁྲི་ཆིག་སྟོང་འཁྲུངས། །དེ་ལ་ཕྱོགས་བཅུའི་རྒྱལ་བ་དཔག་མེད་བཞུགས། །བསྟན་འགྲོའི་བདེ་སྐྱིད་དཔལ་འབྱོར་སྤེལ་བར་བྱེད། །ཕྱོགས་བཞི་མཚམས་བརྒྱད་དབུས་དང་བཅས་པ་ན། །ཆུ་མིག་བརྒྱ་ཕྲག་གཅིག་དང་བཅུ་གསུམ་འབབ། །སུ་ཡིས་དེ་འཐུང་སྡུག་བསྔལ་ཞི་བར་བྱེད། ། ནམ་མཁས་གར་ཁྱབ་ཞིང་ཁམས་དཔག་མེད་དུ། །སྐུ་ཡི་བཀོད་པ་དཔག་མེད་སྟོན་པར་བྱེད །འགྲོ་བ་གང་ལ་གང་དགོས་དེར་སྤྲུལ་ཏེ། །གང་དག་འདོད་པ་མ་ལུས་ཚིམ་པར་བྱེད། །
(ཅེས་གསུངས་པ་དང་ཡང་མཁའ་འགྲོ་མ་རྣམས་ཀྱིས་གར་བྱེད་ཀྱིན་འདི་སྐད་དུ།)
།བླ་མ་ཁྱེད་ཀྱི་ཐུགས་ལ་འཁྲུལ་བ་མེད། །རྭ་སྒྲེང་དཔལ་གྱི་གཙུག་ལག་ཁང་ཞེས་པ། །རྒྱལ་བ་རྒྱ་མཚོའི་འབྱུང་གནས་རྒྱལ་བའི་དཔལ། །གནས་དེ་བྱིན་གྱིས་རློབ་ཅིང་ལྷུན་པོར་གནས། ། དམག་དཔོན་དཔའ་བོ་ཁྱིམ་བདག་འབྱོར་བ་ཅན། །བཙུན་མོ་རིན་ཆེན་གླང་བོ་འཁུར་ཤེད་ཅན། །ནོར་བུ་རིན་ཆེན་རྟ་མཆོག་རྫུ་འཕྲུལ་ཅན། །འཁོར་ལོ་རྩིབས་སྟོང་དཔག་མེད་མཁའ་འགྲོའི་གནས། །རྒྱལ་བ་ཁྱོད་ཀྱི་རྒྱལ་སྲིད་བསྐྱང་ཕྱིར་འབྱུང། །སྟེང་ན་འཁོར་ལོ་རྩིབས་བརྒྱད་འཕགས་ལམ་བརྒྱད། །རྣམ་དག་ལྟ་བ་མཛེས་པ་ཡས་ཀྱིས་ཕུབ། །རྣམ་དག་སྤྱོད་པ་རྒྱས་པར་མཐའ་རྣམས་རྒྱས། །ངག་དང་འཚོ་བ་རྩོལ་བ་ཕུན་སུམ་ཚོགས། །དྲན་དང་ཏིང་འཛིན་ཤེས་རབ་ཕུན་ཚོགས་པའི། །ས་ཆེན་པད་མ་འདབ་བརྒྱད་དག་པ་ལ། །མི་དབང་ཁྱེད་བཞུགསཤིན་ཏུ་དབེན་པ་ནི། །གནམ་ས་གའུ་ཁ་སྦྱར་ལྟ་བུས་མཛེས། །
(ཞེས་མགུར་དུ་བླངས་པ་དང་མཁའ་འགྲོ་མ་བྱེ་བ་འབུམ་ཕྲག་དེ་དག་ལས་འོད་ཟེར་སེར་བོ་རེ་འཕྲོས་ཏེ། བླ་མ་དྲི་མེད་པ་དཔའ་བོ་བརྒྱ་དང། རྒྱལ་བུ་དཀོན་མཆོག་འབངས་ལ་བསྐོར་ཅིང་མཆོད། ཤ་ལྔ། བདུད་རྩི་ལྔ། འདོད་ཡོན་ཆེན་པོ་ལྔ། ཕུང་པོ་ལྔ། ངོ་བོ་བདེ་བར་གཤེགས་པ་ལྔ་ལ་རྣམ་པ་མཁའ་འགྲོ་མ་དང་དཔའ་བོའི་ཆ་ལུགས་སུ་གནས་པ་ལ། ཆགས་པ་མེད་པའི་ཚུལ་གྱིས་མཆོད་ཅིང་རོལ་བར་བྱེད་པའི་ཚུལ་དག་འཁྲབ་དཀའ་ན་རྡོ་རྗེའི་གར་སྟབས་ཀྱིས་མཆོད་པའི་ཚུལ་བྱའོ། དེ་ནས་དཀོན་མཆོག་འབངས་ཀྱིས་འདི་སྐད་དུ།)
།སྐྱེ་མེད་ཆོས་དབྱིངས་ཆེན་པོའི་གཞལ་ཡས་ན། །སྣ་ཚོགས་སྤྲུལ་པའི་གར་བྱེད་མཁའ་འགྲོ་ཀུན། །རྣམ་དག་ཤེས་རབ་མཆོག་ལ་རྟོག་མི་མངའ། །རྒྱུས་སྟོང་སྐྱེ་བྲལ་འབྲས་བུ་མི་མངའ་བའི། །རོལ་བ་ཆེན་པོར་འདི་སྐད་གསུང་བ་ཐོས། །མ་འཛིན་མ་འཛིན་ཡུལ་ལ་བདེ་བ་མེད། །མ་བཟུང་མ་བཟུང་སེམས་ཀྱི་གཞི་རྩ་ཆོད། །གཟུང་འཛིན་གཉིས་བྲལ་ཆོས་དབྱིངས་ཆེན་པོ་ལ། །དཀོན་མཆོག་འབངས་ཀྱིས་གསང་བ་ཡེ་ཤེས་འདྲེན། །ད་ནི་བདེ་ལྡན་གནས་སུ་འགྲོ་བར་བྱེད། །སྤྲུལ་པའི་ཕོ་བྲང་ཉམས་དགའ་དཔག་མེད་པར། །རྡོ་རྗེམཁའ་འགྲོ་ལ་སོགས་གནས་དེར་གཤེགས། ། དྲི་མེད་བླ་མ་རིག་འཛིན་ཚོགས་རྣམས་ཀྱང༌། །ཐུགས་རྗེའི་དབང་གིས་གནས་དེར་གཤེགས་པར་འཚལ། ཁྱེད་ཅག་འགྲོ་འོང་ཀུན་ལས་འདས་ན་ཡང༌། །བལྟར་མེད་བརྗོད་འདས་དགའ་བའི་ཉམས་སྐྱོང་བ། །གཡོ་མེད་རྡོ་རྗེའི་གར་ནི་ཕྱོགས་བཅུར་བགྲོད། །དེ་ནི་བདག་གིས་གསོལ་ལོ་དུས་ལ་བབ། །
(ཅེས་གསོལ་བ་དང། བླ་མ་དྲི་མ་མེད་པ་དེ་ཉིད་ཤེས་རབ་སྒྲོན་མ་ཞེས་པའི་ཏིང་ངེ་འཛིན་ལ་མཉམ་པར་བཞག་ཅིང༌། ཤར་ཕྱོགས་བདེ་ལྡན་གྱི་ཡུལ་ག་ལ་བ་དེར་གཟིགས་ནས། སརྦབུདངྷཌཱཀིམ། ཤར་ཕྱོགས་བདེ་ལྡན་གྱི་གནས་སུ་ཛཿ ཞེས་གསུངས་བ་དང། མཁའ་འགྲོམ་རྣམས་རང་རང་གི་གནས་སུ་གཤེགས་ཤིང༌། དཀོན་མཆོག་འབངས་དང་གསང་བ་ཡེ་ཤེས་གཉིས་ཀྱང་རང་རང་གི་རྫུ་འཕྲུལ་དང་བླ་མའི་བྱིན་རླབས་ཀྱིས་ཡུད་ཙམ་ཞིག་ལ་བདེ་སྤྱོད་སྤྲུལ་པའི་ཕོ་བྲང་དུ་ལྷགས་སོ། །)